মশিং য়ামদবা কাংবুগী মন্ত্রালয়
ত্রিপল তলাক - অচৌবা শেমদোকপা, অচৌবা মহৈ
Posted On:
22 JUL 2020 12:27PM by PIB Imphal
অইবাঃ মুখতার অব্বাস নাকবি, মাইনোরিতী এফিয়ার্সকী কেন্দ্র মন্ত্রী
ওগস্তকী থা অসি ভারতকী পুৱারীদা “ইহৌ, হক অমসুং শেমদোকপগী থা” হায়না শক খংনৈ; ওগস্ত ৮গী ভারত থাদোকউ ইহৌ; ওগস্ত ১৫গী নিং তম্বগী নুমিৎ; ওগস্ত ১৯গী “মালেমগী হ্যুমেনতরিয়ান নুমিৎ”; ওগস্ত ২৯গী “সদভাবনা দিবস”; ওগস্ত ৫দা আর্তিকল ৩৭০ মুখৎখিবা কয়া অসি ভারতকী পুৱারীগী শেংলবা লমাইদা ইদুনা লৈখ্রবনি।
ওগস্ত ১ অসি মুস্লিম নুপীশিংবু খুন্নাইগী ফত্ত্রা ওইরিবা তলাক অহুমদগী নিং-খা তম্বা ফংখিবা নুমিৎনই; লৈবাক অসিগী পুৱারীদা ওগস্ত ১ অসি “মুস্লিম নুপীশিংগী হক্কী নুমিৎ” হায়না খংনরবনি।
তলাক অহুম নত্ত্রগা তলাক-এ-বিদ্দত অসি আইন্না য়াবা অমসুং ইস্লামিক ওইবা নত্তে। অদু ওইরবশু মসিগী খুন্নাইগী ফত্ত্রগা চৎনবি অসি “ভোৎ ললোনবা” মীওইশিংনা রাজনিতিগী ওইবা ঙাক্লৌ পীখিবনি।
ওগস্ত ১, ২০১৯ অসি ভারতকী পার্লিয়ামেন্তকী পুৱারীদা লৈহৌরগদবা নুমিৎ অমনি। নুমিৎসিদা কংগ্রেস, কম্ম্যুনিস্ত পার্তী, এস.পি., বি.এস.পি. অমসুং তৃনামুল কংগ্রেস য়াওনা “চেম্পিয়ন্স ওফ সেক্যুলারিজম” হায়না খংনরিবা পার্তীশিংনা অয়েৎপা কয়া পীবগী মরক্তা তলাক অহুমগী বিল অসি আইন ওনখি। ওগস্ত ১ অসি মান্নবা জেন্দরগী চৎনবি লৈহনবা অমসুং মুস্লিম নুপীশিংগী সংবিধানগী, ফন্দামেন্তেল অমসুং দিমোক্রেতিক ওইবা হকশিংগী মপাঙ্গল হেনগৎহনখিবা নুমিৎ অমা ওইখি অমসুং মসিনা ভারতকী মীশিংগী শরুক তংখাই ওইরিবা নুপীশিংদশু মশা মশাদা থাজবা হেনগৎহনখি। ওগস্ত ১ অসি ভারতকী গনতন্ত্র অমসুং পার্লিয়ামেন্তকী পুৱারীগী কাওররোইদবা নুমিৎ অমা ওইনা লৈহৌরগনি।
ফত্ত্রবা তলাক অহুমগী মায়োক্তা লৈবা আইন অসি ১৯৮৬তা শাহবাও কেসকী মতাংদা ইকাই খুম্ননিংঙাই ওইরবা সুপ্রীম কোর্ত্না ৱায়েল পীখিবা মতম অদুদা চৎহনবা য়ারম্লবনি। মতমদুদা কংগ্রেস্না লোক সভাগী মেম্বর ৫৪৫গে মনুংদা ৪০০ লৈদুনা অমসুং রাজ্য সভাদা মেম্বর ২৪৫গী মনুংদা ১৫৯ হেনবা লৈদুনা এবসোল্যুৎ মেজোরিতী ওইরম্মি। মতমদুগী প্রধান মন্ত্রী রজিব গান্ধীনা পার্লিয়ামেন্ততা লৈবা মহাক্কী শক্তি শিজিন্নদুনা সুপ্রীম কোর্তকী ৱায়েল অদুবু অরেম্বদা তাহন্দুনা মুস্লিম নুপীশিংগী সংবিধানগী অমসুং ফংফম থোকপা হক ফংহনখিদে।
মতমদুগী সরকারনা “ৱাখল থেনবা মীওই” খরগী ৱাখল্লোন ইনখিদুনা মুস্লিম নুপীশিংবু ফংফম থোকপা সংবিধানগী হক ফংহনখিদবগী আইন্না য়াদবা মরাল লংশিঞ্জখি। কংগ্রেসকী “পুংফম অমগী অশোয়বা” অদুনা মুস্লিম নুপীশিংগী “চহী তরাগী চৈরাক” ওইখি। কংগ্রেস্না “ভোৎ কা উধার”গীদমক পাখত্তুনা লৈরম্মি অদুবু ঐখোয়গী সরকারনদি “সামাজিক সুধার” (খুন্নাইবু শেমদোকপা)গীদমক্তা ৱারি।
ভারত অসি সংবিধানগী মখাদা, শারিয়ৎ নত্ত্রগা ধর্মগী লায়রিক অমত্তগী মখাদা নত্তবিদা, লৈঙাকপনি। হান্নদি লৈবাক অসিদা সতি প্রথা নত্ত্রগা অঙাং ওইনা লুহোংবগী চৎনবী মুত্থৎনবা আইন কয়া অমা পুরক্লম্মি। তলাক অহুম অসি ধর্মগা মরী অমত্তা লৈনদে, আইন অসিদি খুন্নাইগী ওইবা ফত্ত্রবা, তমথিবা অমসুং কাংলোন তাদবা চৎনবি কয়া মুত্থত্তুনা মান্নবা জেন্দরগী ৱাখল্লোন পুরক্নবা তেংবাংবনি। তলাক হায়না অহুম্লক হেক হায়বগা মতৈ-মনাও খায়নবা অসি আইন্না য়াদবনি। নুপী কয়াদা চিথি, ফোন, মেসেজ নত্ত্রগা ৱাৎসএপকী খুত্থাংদা ফাওবা তলাক পীবগী থৌদৌ কয়া অমা লৈখ্রে। মসিগী চৎনবি অসি ৱাখল খনবা লৈবাক অমদি মীয়াম পুন্না চাউখৎমিন্ননবগী খোংফম লৈবা সরকার অমদদি চৎনগদবা নত্তে।
মালেমগী মুস্লিমগী লৈবাক কয়া অমনদি হান্ননা তলাক অহুমগী চৎনবি অসি আইন্না য়াদবা অমসুং ইস্লামিক ওইবা নত্তে হায়বা য়ানখ্রবনি। ইজিপ্তনা ১৯২৯দা মসিগী খুন্নাইগী ওইবা ফত্তবা অসিবু মুত্থৎখিবা অহানবা মুস্লিম লৈবাক ওইখি। সুদান্না ১৯২৯দা, পাকিস্তান্না ১৯৫৬তা, বাঙ্গলাদেশ্না ১৯৭২দা, ইরাকনা ১৯৫৯দা, সিরিয়ানা ১৯৫৩দা, মলেসিয়ানা ১৯৬৯দা তলাক অহুমগী চৎনবি মুত্থৎখি। মসিদা নত্তনা সাইপ্রস, জোর্দান, অলজেরিয়া, ইরান, ব্রুনৈ, মোরোক্কো, কতার, য়ু.এ.ই.নশু চৎনবি অসি চহী কয়াগী মমাংদা মুত্থৎখ্রবনি। তৌবতবু ভারতনা অসিগুম্লবা ফত্ত্রবা অমসুং তমথিবা চৎনবি অসি মুত্থৎপদা চহী ৭০ চংখি।
প্রধান মন্ত্রী শ্রী নরেন্দ্র মোদীনা লুচিংবা সরকারনা তলাক অহুমগী চৎনবিগী মায়োক্তা আইন ওইহন্নবা সুপ্রীম কোর্ত্না তাখিবা ৱায়েল অদু চৎনহনখি। সুপ্রীম কোর্ত্না মে ১৮, ২০১৭তা তলাক অহুম অসি সংবিধান্না অয়াবা পীদে হায়না লাউথোকখি। তলাক হুমগী চৎবি অসি মুত্থত্তুনুয়া মোদী সরকারনা মুস্লিম নুপীশিংগী সোসিও-ইকোনোমিক, ফন্দামেন্তেল অমসুং সংবিধানগী হকশিংগী মপাঙ্গল কনখৎহনখ্রে।
তলাক অহুমগী মায়োক্তা আইন শেমখিবা চহী ফারে অমসুং মসিগী মতুং ওইনা তলাক অহুমগী থৌদোক্তা চাদা ৮২ তাথরে। করিগুম্বা অসিগুম্বা থৌওং অমা হেক থোকপদা মতিক চাবা থবক লৌখৎলগনি।
প্রধান মন্ত্রী শ্রী নরেন্দ্র মোদী সরকারনা কাংলুপ খুদিংমক অমসুং খুন্নাইগী ওইবা শেমদোকপশিংবু মপাঙ্গল হাপ্নবগীদমক্তা চেৎনা লেপ্লি। করিগুম্বা রাজনিতিগী পার্তী খরনদি করিগীদমক্তা মোদী সরকারনা মুস্লিম নুপীশিংগী তলাক্কী মরমদা য়াম্না খঞ্জিল্লিবনো হায়না হংনরি। মহাক্না করিগীদমক্তা মখোয়গী সোসিও –ইকোনোমিক ইদেকেস্নেল ইম্পাৱর্মেন্তকী মতাংদদই করিমত্তা তৌদ্রিবনো? মসিদা ঐহাক্না হীরমসিগী মতাংদা হৌখিবা চহী ৬তগী অসিগী ৱাহং অসি হংদুনা লাক্লিবা মীয়ামদা ময়েক শেংনিংবদি মোদী সরকারনা মুস্লিম নুপীশিং য়াওনা অপুনবগী চাউখৎনবগী থবক তৌদুনা লাক্ললি হায়বসিনি।
মোদীনা সরকারনা মীয়াম পুম্বগী চাউখৎনবা থবক পায়খৎলক্লিবা অসিনা মুস্লিম নুপীশিংশু চপ মান্ননা য়াইফবা য়াওরিবনি। চহী ৬ অসিগী মনুংদা নুপী মহৈরোয় ৬০% য়াওনা অপিকপা কাংলুপকী মহৌরোয় কোতি ৩গা লাখ ৮৭তা মখল মখা কয়াগী স্কোলার্শিপ পীদুনা লাক্লি। “হুনর হাৎ”কী খুত্থাংদা মুস্লিম নুপী কয়া অমদা থবক অমসুং থবক তৌবগী খুদোংচাবা পীদুনা লাক্লি। অপিকপা কাংলুপকী নহা লাখ ১০ হেনবদা “সীখো ওর কমাও”, “গরীব নৱাজ স্বরোজগার য়োজনা”, “উস্তাদ”, “নই মঞ্জিল”, “নই রোশন” নচিংবা স্কিল ফগৎহনবা স্কিমশিংগী খুত্থাংদা থবক অমসুং থবক তৌবগী খুদোংচাবা পীদুনা লাক্লি অমসুং মসিগী মনুংদা বেনিফিশরী ৫০%দি নুপীনি। ইং ২০১৮দা মোদী সরকারনা মুস্লিম নুপীশিংনা “মেহরম” (মখোয়গা লোয়নবা নুপা) য়াওদনা হজ পাংথোকপা য়াহনখিবদগী অপুনবা নুপী ৩০৪০না হজ পাংথোকখি। হন্দক্কী চহীসিদশু মুস্লিম নুপী ২৩০০না মেহরম য়াওদনা হজ পাংথোক্নবা চে থারকখি মসিগী নুপীশিং অসিনা হজ ২০২০গী চে থারকপগী মতুং ইন্না হজ ২০২১ চৎপগী অয়াবশু পীগনি। মসিদা নত্তনা অনৌবা চে থারকপা নুপীশিংশু নথং চহীগী হজতা চৎপা য়াগনি।
মোদী সরকারগী থবকশিং অসিনা চপ মান্ননা মুস্লিম নুপীশিংশু কান্নবা ফংহল্লি। ওপোজিসন্দা লৈবা অমসুং “মহৌশানা মোদীগী মায়োক্তা ৱা ঙাংবা মীওইশিং” না য়াইফ য়ুম্বালগী স্কিমশিংদা কাংলুপ অমত্তদা অচান মীরায় নায় হায়না হায়রকপা ঙম্লোই। ঐখোয়না মীওই পুম্নমক্কী চাউখৎপগী পাংথোক্লিবা থবকশিং অসিগী মহৈ য়াল্লে। ঐখোয়গী সরকারনা লায়রবশিংদা য়ু কোতি ২ পীবা মতমদা বেনেফিশরী ৩১%দি অপিকপা কাংলুপকী মীওইশিংনি। ঐখোয়গী সরকারনা চহী কয়া কয়াদগী ইলেক্ত্রিসিতী ফংদনা লৈরকপা খুঙ্গং কয়াদা হৌজিক্তি মৈ ফংহল্লে অমসুং মসিগী মনুংদা অমম্বদা লৈরম্বা অপিকপা কাংলুপকী মীওই কয়া অমসু য়াওরিবনি। ঐখোয়গী সরকারনা লৌউবা কোতি ২২দা “কিসান সম্মান নিধি”গী মখাদা কান্নবা ফংহনখ্রে অমসুং মসিগী মনুংদা অপিকপা কাংলুপকী মীওই ৩৩% য়াওরি। গ্যাস কনেক্সন লেম্না পীবা “উজ্বালা য়োজনা”গী কোতি ৮ হেনবা বেনিফিশরীশিংগী মনুংদা অপিকপা কাংলুপকী মীওই ৩৭% য়াওরি। মীওই কোতি ২৪দা অপিকপা অমসুং ময়ায় ওইরপ্পা কারবার অমদি শেন্মিৎলোনগা মরী লৈনবা থবক পীবা “মুদ্রা য়োজনা”গী লোন পীরিবা বেনিফিশরীশিংগী মনুংদা অপিকপা কাংলুপকী মীওই ৩৬% য়াওরি। ময়াম পুন্না চাউখৎমিন্নবগী শরুক অমা ওইদুনা মুস্লিমশিংনা অসিগুম্লবা য়াইফ য়ুম্বালগী স্কিম কয়া অসিদগী কান্নবা কয়া ফংলিবনি।
*****
(Release ID: 1640376)
Visitor Counter : 143