য়ুনিয়ন পব্লিক সর্বিস কম্মিসন্না সিবিল সর্বিস পরিখা ২০১৯ (সি.এস.ই.-২০১৯)গী ওইনা মীওই ২৩০৪গী পর্সনেলিতী তেস্ত (পি.তি.)/ইন্তর্বিয়ু পাংথোক্লিঙৈ মরক্তা ভারত সরকারনা কোবিদ-১৯ শন্দোরকপা থিংনবা হায়দুনা লোকদাউন থম্বগী ৱারেপ লৌখি। কম্মিসন অসিনা মতমদুগী ফিভম য়েংশিন্দুনা লেমহৌরিবা মীওই ৬২৩গী  সি.এস.ই.-২০১৯গী পি.তি. বোর্দ অসি ২৩/৩/২০২০গী মতুংদা ওইনা পাংথোক্নবা ৱারেপ লৌখি।

লোকদাউন তপ্না তপ্না হাংদোক্লকপগা লোয়ননা কম্মিসন অসিনা লেমহৌরিবা মীওইশিংগী পি.তি. অসি জুলাই ২০-৩০, ২০২০দা পাংথোক্নবা ৱারেপ লৌখ্রে অমসুং মসিগী মতুং ইন্না পরিখা য়াওগদৌরিবা মীওইশিংদশু মাংজৌননা খংহনখ্রে। মখোয়শিং অসিগা লোয়ননা এক্সপর্ত এদবাইজরশিং অমসুং কম্মিসনগী স্তাফশিংগী হকশেলদা তেক্ত কায়দনবগীদমক মতিক চানা শেম-শাবশু লোয়রে।

ত্রেন চেন্দবগী মরম ওইদুনা অমুক খক্তং পাংথোকপা থৌওং অমা ওইনা পি.তি. য়াওবা লাক্কদৌরিবা মীওইশিংগী ওইনা চত্থোক চৎশিন তৌবগী প্লেনগী খ্বাইদগী নেম্বা মমল হঞ্জিন্নবা কম্মিসন অসিনা ৱারেপ অমসু লৌখ্রে। হীরম অসিগীদমক্তা পি.তি.গী ই.-সম্মোন পায়রবা মীওইশিংবু মখোয়না লৈরিবা রেস্ত্রিক্তেদ জোনশিংদগী থোক্লকপা য়াহন্নবা রাজ্য সরকারশিংদশু খংহনখ্রে। কম্মিসন অসিনা মীওইশিং অসিগী লৈফম-চাফম অমসুং চত্থোক চৎশিনগী পাম্বৈশিংশু শিনগনি।

কম্মিসন য়ৌবা মতমদা কেন্দিদেৎ খুদিংদা ফেস মাস্ক, ফেস শিল্দ, সেনিতাইজর বোতল অমা অমসুং হেন্দ গ্লোব য়াওবা ‘সিল্দ কিৎ’ অমমম পীগনি। ইন্তর্বিয়ুগী বোর্দশিং অসিদা অহল ওইরবা মীওই য়াওগনবনিনা কম্মিসন অসিনা ইন্তর্বিয়ু পীগদৌরিবা অমসুং লৌগদৌরিবা মীওইশিংগী মরক্তা ঙাকথোকপগী থৌওং লৈহন্নবা হায়দুনা কম্মিসন অসিনা শোক্ন-শম্নদনা পি.তি. পাংথোক্নবা চেকশিং থৌরাং অমসুং তেক্ত কায়দা থোক্তনবা থবক খুদিংমক পায়খৎপা লোইখ্রে। পি.তি. পাংথোকপদা শরুক য়াগদবা কম্মিসনগী স্তাফ খুদিংমকশু মতিক চাবা ঙাকথোক্নবা খুৎলায় লোইনা শিজিন্নগনি। লৈরিবা কা খুদিংমক, হোলশিং, তেবল-চৌক্রিশিং অমসুং খুৎলায় খুদিংমক চাং নায়না সেনিতাইজ তৌনবা অশিন-অরাংগী থবকশিংশু লোইশিনখ্রে। মফম খুদিংগী ওইবা কেন্দিদেৎশিংনা ফমগদবা পথাপশিংশু তেক্ত কায়দবা লাপ্ননা লৈবগী থৌওং খুদিংমক লোয়না পাংথোক্কনি। ইন্তর্বিয়ু তৌবা মতমদা ইনগদবা চৎন-কাংলোনশিং কেন্দিদেৎশিংদা লোয়না খংহনখ্রে।

কম্মিসন অসিনা মসিগী সংবিধান্না হায়বগী মতুং ইন্না পরিখাগী খুত্থাংদা খ্বাইদগী মতিক চাবা মীওই খনবগী থৌওং পাংথোকপগা লোয়ননা হকশেলদা অশোয়-অঙাম থোকহন্দনবা খ্বাইদগী ফবা চৎন-কাংলোনশিংশু ইন্দুনা চৎনবা অচেৎপা খোংফম অমদা লেপ্লি।

********