লৌউ-শিংউ মন্ত্রালয়

আই.এ.আর.আই. ঝার্খন্দগী অনৌবা এদমিনিস্ত্রেতিব অমসুং একাদেমিক বিলদিং অমা ঙসি লৈখিদ্রবা দাঃ স্যামা প্রসাদ মুকর্জীগী মপোক কুমওনগা মরী লৈননা মহাক্কী মমিং লৌদুনা মিংথোনখ্রে

কেন্দ্রগী লৌউ-শিংউ মন্ত্রী শ্রী নরেন্দ্র সিংহ তোমারনা হায়খিবদা সরকারনা লৌউবশিংগী শেন্থোক অসি ইং ২০২২ ফাওবগী মউংদা শরুক অনি ওইহন্নবা পান্দম থম্লি; লৌউ-শিংউবগী কৈথেলশিং লিবরেল ওইহনবা, অনৌবা তেক্নোলোজী শিজিন্নবা অমসুং লৌউ-শিংউবদা চাংয়েংনবগী তঙাই ফদবগী মতাংদা পনখ্রে

ঝার্খন্দ অমসুং অৱাং-নোংপোক্কী মফমশিংদা অনিশুবা গ্রীন রিবোলুসন পুরকপা ঙম্বগী লোইনাইদ্রবা ওইথোকপা কয়া অমা লৈ- শ্রী তোমার

Posted On: 06 JUL 2020 4:58PM by PIB Imphal

কেন্দ্রগী লৌউ-শিংউ, খুঙ্গং চাউখৎপা অমসুং পঞ্চায়তী রাজ মন্ত্রী শ্রী নরেন্দ্র সিংহ তোমারনা হায়খিবদা সরকারনা লৌঊবশিংগী শেন্থোক ইং ২০২২গী মনুংদা শরুক অনি ওইহন্নবা কন্না হোৎনরি অমসুং মসিগীদমক্তা তোঙান তোঙানবা স্কিম অমসুং প্রোগ্রামশিংগী খুত্থাংদা মরু ওইবা থবক কয়া পায়খৎপা হৌখ্রে। ঝার্খন্দগী হজারীবাঘকী বারহিগী মনাক্তা লৈবা গৌরিয়া করমাদা লৈবা ইন্দিয়ন এগ্রিকলচরেল রিসর্চ ইন্সতিত্যুৎ (আই.এ.আর.আই.)গী নৌনা শাবা মীথুংশঙ অমা ভিদিও কনফরেন্সিংগী খুত্থাংদা শঙ্গাবা অমসুং অনৌবা এদমিনিস্ত্রেতিব অমসুং একাদেমিক বিলদিং অমা ঙসি লৈখিদ্রবা দাঃ স্যামা প্রসাদ মুকর্জীগী মপোক কুমওনগা মরী লৈননা মহাক্কী মমিং লৌদুনা মিংথোনখিবা থৌরমদা ৱাফম অসি হায়খিবনি। দাঃ স্যামা প্রসাদ মুকর্জীনা মহাক্কী পুন্সি অসি লৈবাক অসিগী অপুনবগীদমক কত্থোকখি অমসুং লৈবাক অমা-আইন অমগী খোল্লাও লাওখি অমসুং কশ্মিরদা মপুন্সি কত্থোকখি হায়না মহাক্না মখা তানা হায়খি।

কেন্দ্রগী লৌঊ-শিংঊ মন্ত্রীনা বজেৎ ২০২০-২১দা পোইন্ত ১৬কী এক্সন প্লান অমা লাওথোকখ্রে অমসুং অনৌবা লিগেল প্রোবিজন অসিনা লৌঊবশিংগী শেন্থোক শরু অনি হেনগৎহনবগী পান্দম ফংবদা তেংবাংগনি হায়খি। লৌঊ-শিংঊগী কৈথেল অসি লিবরেল ওইহনবা, লৌঊ-শিংঊবদা চাংয়েংনবা, লৌঊ-শিংঊবগা মরী লৈনবা থবকশিংদা হেন্দহোলদিং পীবা, লেংদবা লৌঊ-শিংঊবগী চৎনবি ইনবা অমসুং য়ারিবমখৈ অনৌবা তেক্নোলোজী তঙাই ফদনা শিজিন্নগদবনি হায়খি। শ্রী তোমারনা বজেৎ ২০২০-২১দা সরকারনা লৌঊ-শিংঊবা, ঈশিং ফংহনবা অমসুং খুঙ্গং চাউখৎহনবগী, শেনফম খ্বাইদগী য়াম্না থাদবা মফম, থবকশিংগীদমক্তা লুপা কোতি লাখ ২.৮৩ পীখ্রে হায়খি। প্রধান মন্ত্রী শ্রী নরেন্দ্র মোদীনা আত্মা নির্ভর ভারত অভিয়ানগী মখাদা লৌঊ-শিংঊবগী শেক্তরগী লুপা কোতি লাখ ১গী ইনফ্রাস্ত্রকচর ফন্দ য়াওনা স্কিম কয়া অমা লাউথোকখ্রে হায়খি। ঙা-য়োকপা, এনিমেল হসবেন্দরী, হর্বেল ফার্মিং, খোয় য়োকপনচিংবগী শাহৌ লৌনবা পেকেজ কয়া অমসু লাউথোকখ্রে হায়খি। মসিগী খোংথাংশিং অসিনা লৌঊ-শিংঊবা অমসুং খুঙ্গংগী সেক্তর চাউখৎহনবতা নত্তনা হীরম পুম্নমক্কী লৈবাক চাউখৎহনবদা তেংবাংগনি হায়খ্রে।

লৈবাক অসিগী হেনগৎলক্লিবা মীশিংগী চান্নবা চেং-হৱাই পীনবগী অনিশুবা গ্রীন রিবোলুসন অমা পুরকপগী তঙাই ফদবা লৈরকপগী মতাংদা পল্লদুনা মন্ত্রীনা হায়খিবদা অসিগুম্বা ইহৌ অমা পুরক্নবা ঝার্খন্দ অমসুং অৱাং-নোংপোক্কী লমদমশিংদা লোইনাইদ্রবা খুদোংচাবশিং লৈ হায়নসু হায়খি। বেল্যু এদিসন, স্তার্ত-অপ অমসুং অপিকপা ইন্দস্ত্রীনচিংবা চাউখৎহনবদা অহেনবা মিৎয়েং চংফম থোকই। লৌঊবশিংগী শু-নোম্বা কনবা অমসুং সাইন্তিস্তশিংনা পীরিবা কান্নবশিং অসি পুন্সিন্নদুনা হোৎনমিন্নবগী খুত্থাংদা মরোমদোম লেপচবা ঙম্বা ভারত অমা ওইহন্নবগী পাংথোকপা য়াবা থবক খুদিংমক পাংথোক্কদবনি হায়খি। পুসা ইন্সতিত্যুৎ হায়নসু হেন্না খংনবা নই-দিল্লীগী আই.এ.আর.আই.না লৈবাক অসিগী কোন্নজনবা চেং-হৱাই পুথোকচবগী হীরমদা মরু ওইবা থৌদাং কয়া পাংথোকপদগী হৌজিক্তি লৈবাক অসিদা চেং-হৱাই হেন্দোক পাথোক্না লৈজরে হায়খি। পুসা ইন্সতিত্যুৎ লৈবদগী পঞ্জাব, হরয়ানা অমসুং য়ু.পি.গুম্বা থংনবা রাজ্যশিংদা লৌউ-শিংঊগী পোত্থোক পুথোকপসি লেপ্তনা হেনগৎলক্লি। মসিদা য়ুম্ফম ওইদুনা প্রধান মন্ত্রী শ্রী নরেন্দ্র মোদীনা ঝার্খন্দ অমসুং অসমদা অনৌবা লৌউ-শিংউগী রিসর্চ ইন্সতিত্যুৎ অনি হাংদোকখ্রে।  

কোরোনাভাইরসকী ইরাং মনুংদা লৌউ-শিংঊগী শেক্তর অসিনা মরু ওইবা পাঙ্গল অমা ওইনা থোকলকখি হায়না শ্রী তোমারনা হায়খি। লোকদাউন লাউথোকখিবা মতমদা লৌরোকশিং অসি খাউবা য়াবগী মতম ওইখি অমসুং মরম অসিগীদমক্তা প্রধান মন্ত্রীনা থবকশিং অসিগী ওইনদি কোমথোকখি অমসুং লৌউবশিংনা লৌ খাউবা অমসুং কালেনগী লৌরোক হুন্নবা কন্না হোৎনখি অমসুং হৌজিক্তি খরিফকী লৌরোক থাবদা থবক চিন্নরি। অফবা মোন্সুন অমা লাক্কনি হায়বদগী হন্দক্কী চহীদি অফবা লৌরোক ফংলগনি হায়বগী থাজবা পীরি।

কেন্দ্রগী রাজ্যগী লৌউ-শিংউ মন্ত্রী শ্রী পুরুশোত্তম রুপালা অমদি শ্রী কাইলাশ চৌধরী, আই.সি.এ.আর.গী দাইরেক্তর জেনেরেল দাঃ ত্রিলোচান মাহাপাত্রা, আই.এ.আর.আই.গী দাইরেক্তর দাঃ এ.কে. সিংহ অমসুং অতোপ্পা ওফিসারশিং, সাইন্তিস্তশিং অমসুং লৌউবশিংনা ভিদিও কনফরেন্সতা শরুক য়াখি।

*****



(Release ID: 1636881) Visitor Counter : 28