ভারত বাওইতেক্কী কোভেক্সিন অমসুং জাইদস কেদিলাগী জাইকোব-দি. বেক্সিন লাউথোরকপদা পাউরৌশিংদা হায়নবগুম্না কোবিদ-১৯গী অমম্বা মরক্তদগী আসাগী পরিং অমা উবা হৌরক্লি। ইন্দিয়া সি.দি.এস.সি.ও. (সেন্ত্রেল দ্রগস স্তেন্দর্দ কন্ত্রোল ওর্গনাইজেসন)গী দ্রগ কন্ত্রোল্লর জেনেরেল অফ ইন্দিয়ানা বেক্সিনশিং অসিগী হ্যুমেন ত্রাইএল হৌবগী অয়াবা পীরকপা অসিনা লোইশিল্লকপগী অহৌবা হায়বদু হৌজিক ওইরে।

মমাংগী চহীশিংদা ভারত অসি বেক্সিন শাফমগী মরু ওইবা হব অমা ওইরক্লি। য়ুনিসেফতা পীবা বেক্সিন সপ্লাইগী ৬০%দি ভারতকী মেন্যুফেকচররশিংননি। নোবেল কোরোনাভাইরসকী বেক্সিন অসি মালেমগী মফম অমা হেক্তদা শাবা য়াই অদুবু ভারতকী মেন্যুফেকচররশিং য়াওদনদি তঙাই ফদবা মশিংশিং অসি শাবদা ওইথোক্লোই।

বেক্সিনগী লমজেল

বেক্সিনগী মখল ১৪০ রোমদি শেম শাবগী তোঙানবা থাক্তা লৈরি। মমাং থানা লৈরিবা অমদি য়ুনিবর্সিতী ওফ ওক্সফোর্দকী জেন্নর ইন্সতিত্যুৎনা শাবা অমসুং ইংলেন্দ, কেম্ব্রিজতা ময়ায় লোয়শঙ ওইরিবা এস্ত্রা জেনেকা ব্রিতিশ স্বীদিশ মলতিনেস্নেল ফার্মাস্যুতিকেল এন্দ বাইওফার্মাস্যুতিকেল কম্পেনীদা লাইসেন্স পীরবা এ.জেৎ.দি.১২২২ অসিনি। ৱাশিংতনগী কাইসের পর্মানেন্তে ৱাশিংতন হেলথ রিসর্স ইন্সতিত্যুৎনা শাবা অমসুং য়ু.এস.তা লৈবা মোদেরনা ফার্মাস্যুতিকেলনা হিদাক পুথোকপগী থৌদাং লৌগদবা এম.আর.এন.এ.-১২৭৩না অনিশুবদা লৈরি। ফর্ম অনিমক অসিনা কোবিদ বেক্সিন পুথোক্নবগীদমক্তা ভারতকী মেন্যুফেকচররশিংগা অইবা য়ানবা কয়া খুৎয়েক পীনখ্রবনি।

মসিগা ইরোয়ননা ভারতকী ইন্সতিত্যুসনশিংশু ভারত্তা বেক্সিন পুথোক্নবা আর. এন্দ দি. কয়া চত্থরি। পুনেদা লৈবা আই.সি.এম.আর. ইন্সতিত্যুসন, নেস্নেল ইন্সতিত্যুৎ ওফ বাইরোলোজী অমসুং হাইদ্রবাদতা লৈবা সি.এস.আই.আর. ইন্সতিত্যুসন, সেল্ল্যুলার এন্দ মোলিক্যুলার বাইওলোজীদগী সাইন্তিফিক ইনপুৎ কয়া ফংদুনা ভারতকী কম্পেনী তরুক্না কোবিদ-১৯গী বেক্সিন পুথোক্নবা হোৎনরি। অতোপ্পা ভারতকী কম্পেনী অনি, কোভেক্সিন অমসুং জাইকোব-দি.গা লোয়ননা, মালেম পুম্বগী ওইনা, বেক্সিন ১৪০গী মনুংদা ১১দি হ্যুমেন ত্রাইএল তৌবা হৌখ্রে। হায়রিবা হিদাকশিং অসি ইং ২০২১গী মমাংদদি মীয়াম্না শিজিন্নবগীদমক্তি ফংখিরোই।

ইম্ম্যুন সীস্তেম

পেথোজেন্দগী লৌবা এন্তিজেন অমসুং মীওইবগী ইম্ম্যুন সেলশিংনা পুথোকপা এন্তিবোদিশিং অসি চান্নবা পুংবানি হায়না লৌই। পেথোজেন খুদিংমক্তা এন্তিজেন কৌবা অখন্নবা মোলিক্যুলার স্ত্রকচর য়াওই। মখোয় অসি অকক্নবা মচু অমসুং মওং লৈবা মমায়গা মান্নৈ। মহিক্না অমুক চংখ্রবদি মীওইবগী ইম্ম্যুন সীস্তেম্না এন্তিজেন কৌবা এন্তিবোদি অমা পুথোকই।

দিজাইনগী রিতেল্লর অমনা মশিং কয়াগী মচু অমসুং মশক থোকপা মেতরিএল কয়াগা চান্ননবা হোৎনবা অসিগুম্না ঐখোয়গী হকচাংগী ইম্ম্যুন সীস্তেমদসু এন্তিবোদি মখল লিশিং লিশিংদা লৈ। করিগুম্বা পেথোজেন অসি মশক খংলবা য়েক্নবা অমা ওইরবদি ইম্ম্যুন সীস্তেম অসিনা লৈরিবা দিজাইনশিংদগী চান্নবা অমা খনগৎপা ঙম্মি। মসিদা হেক চান্নবা অমা ফংখিবদা পেথোজেন অসিবু হাত্তোকই। মসিনা মখা তানা শোকহনবা ঙমদে।

অদুবু করিগুম্বা মাইক্রো-ওর্গনিজম অসি মশক খংদবা ওইরগদি, মতমগী মতুং ইন্না ওইরকপা ওইরবদি, লৈরিবা মচু অমসুং মওংগা চান্নবা ফংদে। অদুম ওইনমক, তেক্সতাইলদদি তৌদবদৌনা, এন্তিবোদিদি পুথোরকপা য়াই। অহানবদা, খরা চান্নবা হান্না থিবা হৌই। এন্তিবোদি শেম্বগী থৌওং কয়াগী মতুংদা খ্বাইদগী চান্নবা অদুনা মেচ্যুর ওইবা ঙম্মি। এন্তিজেন হায়রিবা মরু ওইবা মমায়গী মচু অমসুং এন্তোবিদি হায়রিবা চান্নবা মশক-মতৌ অসি থিবদা চংবা মতম অসিনা লায়না অসিনা খজিক্তং নত্ত্রগা য়াম্না শোকহনবগী মওং লেপ্পি। হায়রিবা মহিক অসি ইম্ম্যুন সীস্তেম অসিনা মপুং ফানা হাত্তোকপা ঙম্লবকান্দা লায়না অসিদগী ঙাকথোকপা ঙম্মি।

ইম্ম্যুন সীস্তেম মেমোরী অমসুং বেক্সিন

মশক অমগী মচু অমা হেক ফংবগা তুংদা শিজিন্ননবা থমখিবা অদুগুম্না এন্তিবোদিগা চান্নবা এন্তিজেন অমা হেক শেম্বা ঙম্বগা মসি ইম্ম্যুনোলোজিকেল মেমোরীদা থমখি। মথংদা চপ মান্নবা পেথোজেন অসিনা লান্দারকপা মতমদা ইম্ম্যুনোলোজিকেল মেমোরী অসি মথৌ তৌবা হৌরকই অমসুং ত্বিন তৌরবা এন্তিবোদি থাদোরকই। লায়না অসি মখোং থোংনা ককথৎলি অমসুং মসিদগী ঐখোয়না ইম্ম্যুনিতী ফংই।

বেক্সিন হায়বসি ইম্ম্যুনোলোজিকেল মেমোরীবু খুৎশেম্না থোকহনবা থৌওং অমনি। করিগুম্বা ফত্ত্রবা পেথোজেন অসিগী এন্তিজেন অসি হেক থাজিনবগা ইম্ম্যুন সীস্তেম অসি মথৌ তৌহন্দুনা মসিগা চান্নবা এন্তিবোদি অমসুং ইম্ম্যুনোলোজিকেল মেমোরী অমা শেমহল্লি।

এন্তিবোদিশিং অমসুং মেমোরীবু খুৎশেমগী থৌওংনা থোকহনবগী পাম্বৈ য়াম্না লৈ। খ্বাইদগী মরু ওইবা ৱাফমদি মীওইবগী ইম্ম্যুন সীস্তেমদা নোবেল কোরোনাভাইরসকী এন্তিজেন পীশিনবা অসিনি। এদেনোভাইরস-বেজদ-লাইব এত্তেনুএতেদ ভাইরস্তগী হৌরগা রিকম্বিনেন্ত জেনেতিক তেক্নোলোজী ফাওবগী থৌওংশিং অসি মখল কয়াগী বেক্সিন পুথোকপদা শিজিন্নৈ। ভারত্তা পুথোক্লিবা অসিনা ময়াম অসিদগী মনুংদগী শিজিন্না য়াবা অনি খল্লিবা অসি ইনএক্তিবেতেদ ভাইরস বেক্সিন অমসুং দি.এন.এ. প্লস্মিদ বেক্সিননি।

বেক্সিনশিংশিনা মতৌ করম্না মথৌ তৌই

ঐখোয়না ভাইরস অমবু মৈশা নত্ত্রগা ফোর্মেলদিহাইদ (মসিনা হাত্তোকই) শিজিন্নরগা মথৌ তৌহন্দবা অমদুগা মসিগী এন্তিজেন মোলিক্ত্যুলার স্ত্রকচরবু লেংদনা থম্বা য়াই। অদুবু মথৌ তৌহন্দ্রবা ভাইরস অসিনদি অমুক হন্না লায়না নাহনবা নত্ত্রগা শোকহনবা ঙম্লরোই। ভারত বাইওতেক্কী কোভেক্সিননা ইনএক্তিবেতেদ ভাইরস বেক্সিন অসি শানবা নেস্নেল ইন্সতিত্যুৎ ওফ ভাইরোলোজীনা ভারতকী অনাবা অমদগী আইসোলেৎ তৌখিবা ভাইরস অমা শিজিন্নৈ।

নোবেল কোরোনাভাইরসনা মসিগী স্পাইক প্রোতিনগী মতেংনা মীওইবগী সেলশিংদা শোকহনবা ঙম্মি। ভাইরস্কী স্পাইক প্রোতিন অসিনা মীওইবগী নিংশা হোনবগী ত্রেক্ত সেলশিংগী মমায়দা লৈরিবা এ.সি.ই.২ রিসেপ্তরশিংদা নপশিল্লি। মখোয় হেক পুনশিন্নবগা ভাইরসকী জিনোম অসি মীওইবগী সেলদা চংশিল্লি অমসুং মসিদগীদি মথংগী পুং ১০গী মনুংদা ভাইরস অসিনা লিশিং লিশিংদা মচা পোকই। মসিগী ভাইরস মচাশিং অসিনা থংনবা সেলশিংদা চংবা হৌই। ঐখোয়না নোবেল কোরোনাভাইরস্কী স্পাইক প্রোতিন অসিবু মথৌ তৌহন্দ্রবা মতুংদতা ঐখোয়না লায়না অসি থিংবা ঙমগনি। মরম অদুনা স্পাইক প্রোতিন অসিগী এন্তিজেন অসি খ্বাইদগী মরু ওইবা পান্দম ওইরিবনি। করিগুম্বা এন্তিবোদিনা স্পাইক প্রোতিন অসিবু থিংবা ঙম্লবদি ভাইরস অসিনা সেল অমতগা পুনশিন্নবা ঙম্লরোই অমসুং মখা তানা মচা পোকপশু ঙম্লরোই।

স্পাইক প্রোতিন অসিগী জিনোমিক কোদ অসি কিনিংঙাই ওইদবা দি.এন.এ. প্লাস্মিদতা মচেৎ তানা থুগাই। ভাইরেল স্পাইক প্রোতিন য়াওবা শেমদোক্লবা প্লাস্মিদ দি.এন.এ. অসি হোস্ত সেলদা থাজিনগনি। সেল্ল্যুলার মেছিনরীনা দি.এন.এ.গী ৱাহন্থোক পীগনি অমসুং জিনোম মনুংদা হাপখ্রবা ভাইরেল প্রোতিনশিং পুথোকপা হৌগনি। মীওইবগী ইম্ম্যুন সীস্তেম্না চংলক্লিবা মশক খংদবা প্রোতিন অসি মশক খংলবা তুংদা চান্নবা এন্তোবোদি পুথোক্কনি। মসিগী বেক্সিনেসন তৌবগী থৌওং অসিগী মতুংদা ঐখোয়দা নোবেল কোরোনাভাইরস চংবা মতমদা ঐখোয়গী ইম্ম্যুন সীস্তেম্না স্পাইক প্রোতিন অসি হেক থেংনবা হৌবগা খুদক্তা এন্তিবোদি পুথোকপা হৌগনি। ইম্ম্যুন হাৎপা সেলশিংনা ভাইরসশিং অসি খুদক্তা লাকশিনগনি। মতৌ অসুম্না লায়চৎ অমা লায়না শন্দোকপা হৌদ্রিঙৈদা ঙাকথোকপা ঙমগনি।

*****