কে.ই.এম. হোস্পিতাল অমসুং রিসর্স সেন্তর, পুনে; সি.এস.আই.আর.-সেন্তর ফোর সেলুলার এন্দ মোলিক্যুলার বাইওলোজী (সি.সি.এম.বি.), হাইদেরবাদ; অমসুং য়ুনিবর্সিতী ওব এক্সেতর, য়ু.কে.গী রিসর্সরশিংনা খঙবা ঙম্লে মদুদি জেনেতিক্স রিস্ক স্কোর অসি ভারত মচাশিংদা তাইপ-১ দাইবেতিসকী লাইওং খঙদোকপদা কান্নবা ফংলে। মখোয়না তৌখিবা থিজিনবা অদু সাইন্তিফিক রিপোর্তস তা ফোংখ্রে।

মসিগী জেনেতিক রিস্ক স্কোর হায়বসি করিনো? য়ুনিবর্সিতী ওব এক্সেতরনা পুথোক্লদুনা জেনেতিক্স রিস্ক স্কোর হায়বসিদা তাইপ-১ দাইবিতিস হৌরকপা য়াবগী অকুপ্পা জেনেতিক ইনফোর্মেসনশিং য়াওরি। স্কোর অসি দাইবিতিসকী লাইওং খঙদোক্নবা হোৎনবদা কনাগুম্বা অমদা তাইপ-১ দাইবিতিস লৈব্রা খঙদোকপদা মতেং পাংনবা শীজিন্নবা য়াই।

য়ুরোপিয়ন জেনেতিক রিস্ক স্কোর অসি ভারত মচাশিংদা তাইপ-১ দাইবিতিস খঙদোকপদা কান্নবা ফংগদ্রা? মসিগী ৱাহং অসিনি মসিগী হীরম অসিদা য়ুরোপকী মীয়ামদা পাকতক্ননা নৈননবা হোৎনরকপদা অহানবা হংখিবা ৱাহং অসি। মসিগী ৱাহং অসিগী পাউখুম পীনবগীদমক, রিসর্সকী কাংবু অসিনা ভারতকী পুনেদা লৈবা দাইবিতিসনা নারবা মীওইশিংবু জেনেতিক রিস্ক স্কোর শীজিন্নদুনা নৈনখি। কাংবু অসিনা তাইপ-১ দাইবিতিস লৈরবা মীওই ২৬২দা, তাইপ-২ দাইবিতিস লৈবা মীওই ৩৫২দা অমসুং দাইবিতিস লৈতবা মীওই ৩৩৪দা নৈনখি। রিসর্স তৌখিবা অসিগী ফল অসি ৱেল্কম ত্রস্ত কেস কন্ত্রোল কন্সোর্তিয়ম স্তদীদা ফোংখিবগুম য়ুরোপিয়নশিংগা চান্নবা ফল ফংখি।

অঙাং অমসুং ইনখৎলক্লিবা মীওইশিংদতা তাইপ-১ দাইবিতিস নাই হায়না পাকশন্না থাজনরমই অমসুং অহল ওইরিবা (চহী ৪৫গী মতুংগী মীওইশিং) অমসুং মশা নোইবা মীওইশিংদনা তাইপ-২ দাইবিতিস নাই হায়না থাজনরমই। অদুমওইনমক, হন্দক্তা নৌনা ফংবা থিজিনবা অমনা হায়রিবনা, তাইপ-১ দাইবিতিস অসি তুংগী পুন্সিদসু লাকপা য়াই, অদুগা তাইপ-২ দাইবিতিস অসি নহা ওইরিবা অমসুং অপাবা ভারত মচাশিংদা নাখৎলকপা থেংনখি। দাইবিতিস মখল অনীসিবু তোখাইনা লেপথোকপসিনা, হৌজিক্তি হেন্না লুশিল্লকপা হেল্লে। হায়রিবা মখল অনী অসি তোঙান-তোঙানবা লাইয়েং চত্থরি, তাইপ-১ দাইবিতিস্না পুন্সি চুপ্পা ইন্সুলিন কাপ্পা মথৌ তাবা য়াওই অমসুং তাইপ-২ দাইবিতিস্না চীঞ্জাক অমসুং তেব্লেৎ চাদুনা লাইয়েংলি। দাইবিতিস মখল লান্না খন্দোকখিবনা লাইয়েং পথাপ শোইদুনা হেন্না ফিবম লুশিনহল্লকপা য়াই। মসিগী হীরম অসিদা, অখন্নবা নৈনবা অমনা দাইবিতিস মখলশিং অসি চুম্না খন্দোকপদা হেন্না খুদোংচাহল্লি।

অদুমওইনমক, য়ুরোপিয়ানশিংগী দেতা অমগী মতুং ইন্না, রিসর্সরশিংনা ফংলে মদুদি ভারত মচাশিংদদি তেস্ত তৌবনা হৌজিক ওইরিবা ফিবম অসিদা করম্বা মখলগী দাইবিতিস্নোন হায়বা খঙদোকপদা য়াম্না কান্নবা পীরি। মখোয়না মীশিংগী মরক্তা খেন্নবা জেনেতিক্স ফংলমই, অমসুং মসিনা ভারত মচাশিংদদি তেস্ত হেন্না মপাঙ্গল কলহন্দুনা ফল হেন্না কান্নবা মওংদা ফংহনবা য়ারি হায়বসি উৎলে।

"অচুম্বা মখলগী দাইবিতিস তাইপ খন্দোকপসি ক্লিনিসিয়ানশিংদদি তাইপ-১ দাইবিতিস অসি চহী কাংলুপ অমদা হেক্তা লাকপা য়াবনা অরুবা ফিবম অমা ওইহনলি। মসিগী থবক অসি ভারত্তনা হেন্না খুদোংচাহন্দে, মরমদি বি.এম.আই. নেম্বা মীওইশিংদনা হেন্না তাইপ-২ দাইবিতিস লাকপগী ফিবম লাক্লি। ঐখোয়না খঙলে মদুদি ঐখোয়গী জেনেতিক্স রিস্ক স্কোর অসি ভারত মচাশিংদদি য়াম্না কান্নবা অমা ওইরনি অমসুং মসিনা দাইবিতিস কেতোএসিদোসিসকুম্বা পুন্সি মাংবা য়াবা অরুবা ফিবম লাক্ত্রিঙৈ কলহৌবা ঙম্লগনি অমসুং হকশেল ওইবা খ্বাইদগী ফরবা ফল ফংবা ঙম্লগনি।" হায়না য়ুনিবর্সিতী ওব এক্সেতর মেদিকেল স্কুলগী দা. রিচার্দ ওরমনা হায়রি।

কে.ই.এম. হোস্পিতাল এন্দ রিসর্স সেন্তর, পুনেগী দা. চিতরঞ্জন য়াজনিকনা দা. ওরম্না হায়রিবা ৱাফম অসি য়ানিংবা ফোংদোক্লি। মহাক্না হায় মদুদি দাইবিতিসকী লাইচৎ অসি ভারত মচাশিংদা হেনগৎলকপনা আন্না লাইয়েংখিদনবা, সমাজ অমসুং শেলথুমগী ফিবমদা শোকচিলহন্দনবা মখল চুম্না খঙদোকহৌগদবনি। অনৌবা জেনেতিক তুল অসিনা মসিদা মতেং পাংবা ঙম্লগনি। মসিনা ইন্সুলিন কাপ্পনা মরম ওইদুনা পেঙ্ক্রিএতিক বি.সেলশিং মথৌ তৌবা য়ারক্তবা মতমদা অমসুং ভারত মচাশিংদা মসল মাস পীকপা ('থিন ফেত ইন্দিয়ন' হন্থহল্লগনি। মহাক্না মখা তানা হায়খি, "মসিগী তেস্ত অসি ঐখোয়না তোঙান-তোঙানবা মফমদা লৈরিবা দাইবিতিসনা নারবা মখোয়গী হকচাংগী ফিবম অসি মহৌশাগী ফিবমগা মান্নদ্রবা ভারত মচাশিংদা শীজিন্ননবা মীৎয়েং থম্লি।"

অইবশিংনা হায়রি মদুদি ভারত মচাশিংদা তাইপ-১ দাইবিতিস লাক্কদবা মাঙজৌননা খঙদোকপা ঙম্লগনি।

ভারত অমসুং য়ুরোপিয়ন মচাশিংদা লৈবা তাইপ-১ দাইবিতিসকা মরী লৈনবা জেনেতিক এরিয়া মাপল লৈবা (সিঙ্গল ন্যুক্লিওতাইদ পোলিমোর্ফিজম [এস.এন.পি.]) ফাইন্দিংবু পল্লদুনা সি.সি.এম.বি.দা নৈনরিবা অসিবু লুচিংলিবা দা. জি.আর. চন্দাক, চীফ সাইন্তিস্তনা হায়খি, "তোঙান-তোঙানবা এস.এন.পি.শিং অসি ভারত অমসুং য়ুরোপিয়নশিংদা মরাং কাইনা ফংবসি উবদা অঙকপা ফাওই। মসিনা লাইনা অসি ওইরক্নবা হোৎনবদা এস.এন.পি.শিং অসিগা অকোইবগী ফিবমগা মরি লৈনরম্বা য়াই হায়বসি মসিনা পুথোক্লক্লে।"

ভারত্তা লৈবা তোঙান-তোঙানবা জেনেতিক অসিবু য়েংলদুনা, নৈনরিবা অসি লৈবাক অসিগী অতোপ্পা কাংলুপশিংদসু য়েংবা মথৌ তাই। দা. রাকেশ কে. মিশ্রা, সি.এস.আই.আর.- সেন্তর ফোর সেলুলার এন্দ মোলিকুলার বাইওলোজী (সি.সি.এম.বি.)না হায়রি, "তাইপ-১ দাইবিতিস লৈবা চহী ১৫গী মখাদা লৈবা মীওইশিংগী মনুংদগী চাদা ২০দি ভারত্তা লৈ, তাইপ-১দগী তাইপ-২ দাইবিতিস খেন্নবা লেপথোক্নবা জেনেতিক তেস্ত কিৎ অমা শেমগৎপা হায়বসি লৈবাক অসিদা য়াম্না মরু ওইবা হীরম অমা ওইরি।"

  

সি.এস.আই.আর.-সি.সি.এম.বি.গী রিসর্সর দা. সীমা ভাস্কর (ওই) দা. জি.আর. চান্দক (ময়াই) অমসুং শ্রী ইন্দর দিও মালি (য়েৎ)

*****

(Release ID: 1636639) Visitor Counter : 197