পেত্রোলিয়ম অমসুং নেচরেল গ্যাস অমসুং স্তীলগী মন্ত্রী শ্রী ধরমেন্দ্রে প্রধান্না বঙ্গলাদেশকী ইকাইখুম্ননিংঙাই ওইরিবা প্রধান মন্ত্রীগী এদবাইজর ওইরিবা হিজ এক্সিলেন্সী সলমান ফজলুর রহমন, অমসুং বঙ্গলাদেশকী পাৱর, ইনর্জী অমসুং মিনরেল রিসোর্সকী রাজ্যগী মন্ত্রী ওইরিবা হিজ এক্সিলেন্সী নসরুল হমিদকা লোইননা জইন্ত ভেঞ্চর এগ্রীমেন্ত (জে.ভি.এ.) অমা দুবাইদা লৈবা ইন্দিয়ন ওইলগী সবসিদিয়রী অমা ওইরিবা আই.ও.সি. মিদ্দল ইস্ত এফ.জেদ.ই. অমসুং বেক্সিমকো গ্রুপকী আর.আর. হোল্দিংস লিমিতেদকী মরক্তা খহুৎয়েক পীনবদা শরুক য়াখ্রে। মসিগী জোইন্ত ভেঞ্চর অসিগী মখাদা, আই.ও.সি.এল.না বেক্সিমকোগা লোইননা মখোয়গী বঙ্গলাদেশ অমসুং অতোপ্পা লৈবাকশিংদা লৈরিবা দাউন্সত্রিম ব্যুজিনেসশিং অসি পাকথোক চাউথোকহন্নবা খন্নরি।

শ্রী প্রধান্না থৌরম অদুদা ৱা ঙাংবদা ভারত অমসুং বঙ্গলাদেশকী মরক্তা পুৱারী, নাৎ অমসুং কত্থোকমিন্নখিবা কয়ানা শেম্লকপা শাংলবা মরী অসিগী মতান্দা ফোংদোকখি। ভারত-বঙ্গলাদেশকী মরক্তা ইনর্জীগী হীরমদা লৈরিবা মরী অসিগী মরমদা ফোংদোক্লদুনা মহাক্না হায়খি, "লোবাক অনীগী মরক্তা পীনরিবা ইনর্জীগী কোওপরেসন অসিনা হৌখিবা চহী খরসিদা শিংথাবা য়াবা মওংদা চাউখৎপা পুরকখিবসি উবদা ঐহাক হরাউবা পোকচৈ। মসিমক ঐখোয়গী ইকাইখুম্নজরিবা প্রধান মন্ত্রী শ্রী নরেন্দ্র মোদীনা "য়ুম্লোন্নবনা অহানবদা" হায়বা পোলিসী অসিগী শরুক অমা ওইনা বঙ্গলাদেশকা "ইনর্জীগী থোং" অমা শানবা মংজরিবা মংলান অসিগী শরুক অমনি। হন্দক্তা ওক্তোবর ২০১৯দা ইকাইখুম্নজরিবা বঙ্গলাদেশকী প্রধান মন্ত্রীগী নই দিল্লীগী খোংচৎ অদুনা মরী অসিবু চেৎশিলহনলে অমসুং অনৌবা তৌমিন্নবা য়াবা থবকশিংগী খুদোংচাবা কয়া হাংদোক্লে।"

জোইন্ত ভেঞ্চর এগ্রিমেন্ত অসিগী মতাংদা ৱা ঙাংলদুনা মাহক্না হায়খি, মসিগী থৌরম অসিনা লৈবাক বঙ্গলাদেশকা লোইননা অনীগী মরক্তা পীনরিবা ইনর্জীগী মরীদা খোংথাং অমা থাংজিলহনলে, অমসুং ইন্দিয়ন ওইলনা ভারতকী খুঙ্গংগী লমশিংদা এল.পি.জি.বু মৈখু চেন্দবা চাক থোংনবা ফ্যুল ওইনা শীজিন্নবা হৌদোকপা ওইনা প্রধান মন্ত্রী উজ্ব্বলা য়োজনা মাংজিল থানা চৎনহনখিবনা বঙ্গলাদেশতা এল.পি.জি. শীজিন্নবা হৌদোকপদা মতেং পাংলগনি হায়না থাজবা ফোংদোকখি।

মসিগী জোইন্ত ভেঞ্চর অসিনা বঙ্গলাদেশতা মৈখু চেন্দবা চাক থোংনবা ফ্যুল ওইহন্দুনা সমাজ অমসুং শেন্মিৎলোন্দ চাউনা অহোংবা অমা পুরক্কনি হায়না থাজবা ফোংদোকখি।

বঙ্গলাদেশকী ইকাইখুম্নজরিবা প্রধান মন্ত্রীগী এদবাইজর ওইরিবা হিজ এক্সিলেন্সী সলমান ফজলুর রহমন্না হায়, "জোইন্ত ভেঞ্চর এগ্রিমেন্ত অসিনা বঙ্গলাদেশতা লৈরিবা ইনভেস্তমেন্ত তৌবা ঙম্বগী চাং অসিগী খুদম অমা ওইরগনি। মালেম অসিদা লৈরিবা লৈবাক খুদিংমক্না কোবিদ-১৯ লাইচৎনা মরম ওইদুনা শেন্মিৎলোন্দা চৈথেং ফংনরবা মতম অসিদা মসিগী ইনবেস্তমেন্ত অসিনা বঙ্গলাদেশ অমসুং ভারতকগী মরক্তা লৈরিবা খাঙবা কনবা অমসুং অচেৎপা মরী অসিবু মশক তাক্লি।"

বঙ্গলাদেশকী পাৱর, ইনর্জী অমসুং মিনরেল রিসোর্সকী রাজ্যগী মন্ত্রী ওইরিবা হিজ এক্সিলেন্সী নসরুল হমিদনা হায়খি, "বঙ্গলাদেশকী মিদল ক্লাসনা লৈবা ঙম্বগী শক্তি হেল্লক্লিবনা, এল.পি.জি. সেক্তর অসি চহী খরা অসিদা মশক থোক্না চাউখৎপা উরে অমসুং লাক্লিবা চহীশিং অসিদসু হেন্না চাউখৎকদৌরি। অসিগুম্না চাউনা খঙ হৈরবা অমসুং মরুওইবা প্লেয়রশিংনা পুনশিন্দুনা ইনভেস্ত তৌবা অসিনা ইন্দস্ত্রী অসিদা অহোংবা পুরকপা অমগী শক্লোন লৌরগনি।"

ইন্দিয়ন ওইলগী চেয়রমেন শ্রী সঞ্জিব সিংহ, অমসুং আর.আর. হোল্দিংস লিমিতেদকী চেয়রমেন শ্রী শায়ান এফ রহমনসু থৌরম অদুদা ৱা ঙাংখি।

*****