দিফেন্স সর্বিসেস স্তাফ কোলেজ, ৱেলিংতন্না শীন্দুনা জুন ২৭, ২০২০দা ফিল্দ মার্সেল এস.ঐচ.এফ.জে. মনেশো, পদ্ম ভিভুশন, পদ্ম ভুশন, এম.সি.গী ১২শুবা লৈখিদবগী কুমওন থৌরম নীংশিংবা ওইনা উধগমন্দলমদা লৈবা পার্সি জোরোস্ত্রিয়ন সিমিতরীদা রীথ লেয়িং থৌরম অমা পাঙথোকখ্রে‍। ত্রাই-সর্বিসেস ফ্রেতর্নিতীগী মায়কৈদগী, দিফেন্স সর্বিসেস স্তাফ কোলেজকী কম্মান্দেন্ত লেফ্তনেন্ত জেনরেল ৱাই.ভি.কে. মোহন, এ.ভি.এস.এম., এস.এম., ভি.এস.এম.না লমদমদুগী পার্সি ফুরুপকী মীয়াম্না শরুক য়াখিবা থৌরমদুদা ইকায়খুম্ননিংঙাই ওইরবা লান্মী অদুনা অরোয়বা য়াহিপ তানখিবা মফমদুদা রীথ কৎখি‍।

ফিল্দ মার্সেল এস.ঐচ.এফ.জে. মনেশো অমৃতসরদা এপ্রিল ০৩, ১৯১৪দা পোকখি‍। মহাক্কী দিকেদ মরি শাংনা মশক থোকপা মিলিতরী করিয়র লৈরম্মী‍। অনিশুবা মালেমগী লাঞ্জাওদা নহা ওইরিবা কেপ্তেন অমা ওইনা মহাক্না বর্মাদা লান য়াওখি অমদি শাথিনা শোকখি‍। মহাক্না য়েক্নবগা লান্থেংনবদা উৎখিবা থৌনা অদুগীদমক ১৯৪২দা মিলিতরী ক্রোস লান্থোকখি‍। ইং ১৯৪৬-৪৭দা ফিল্দ মার্সেল মনেশো মিলিতরী ওপরেসন দাইরেক্তরেততা থবক পুরম্মী অমদি পার্তিসনগা মরী লৈনবা তোঙান তোঙানবা থৌশিলগী অমদি লৈঙাক্লোনগী ৱাফমশিং অমদি মখা তারকপা ওইনা জম্মু এন্দ কাশ্মিরদা মিলিতরী ওপরেসন য়েংশিল্লম্মী‍। ইং ১৯৬২গী ওপরেসনদা কোর কম্মান্দর অমা ওইনা মহাক্না মশক থোকপা লমজিং উৎখি অমদি ওপরেসন অদুদা অফবা শাফু পীখি‍। মহাক ইনফেন্ত্রী স্কুল, মো অমদি দিফেন্স সর্বিসেস স্তাফ কোলেজ, ৱেলিংতনগী কম্মান্দেন্ত ওইনা লৈরম্মী‍। মঙোনদা ইং ১৯৬৮তা পদ্ম ভুশন লান্থোকখি‍।

ফিল্দ মার্সেল এস.ঐচ.এফ.জে. মনেশো জনুৱারী ০৮, ১৯৬৯দা চীফ ওফ আর্মী স্তাফ ওইনা থৌ পুরম্মী‍। মহাক্না ১৯৭১ ওপরেসনদা ইন্দিয়ন আর্মীবু লুচিংদুনা ভারতকী খ্বাইদগী চাউবা লান্মীগী মায় পাকপা পুরক্তুনা নুমিৎ ১৩নিগী তেনখ্রবা মতমদা বঙ্গলাদেশপু মনীং তমহনখি‍। মহাকপু ইং ১৯৭২দা পদ্ম ভিভুশন পীখি‍। লান্মীদা অমদি লৈবাকসিদা জেনরেল ওফিসর অদুনা লৌরম্বা থৌদাংবু ইকায় খুম্নবা ওইনা মহাকপু ফিল্দ ওফিসরগী রেঙ্কতা জনুৱারী ১৫, ১৯৭৩দা ফম থীন্দোকখি‍। মহাক জুন ২৭, ২০০৮দা অরোয়বা য়াহিপ তানখি‍।

ফিল্দ মার্সেল এস.ঐচ.এফ.জে. মনেকশোনা মহাক্কী থবক মতুংদা ৱেলিংতনদা লৈখি‍। মহাক্কা এসোসিএসন অদুগা লৈনবা মরী অসি মহাক্না দিফেন্স স্তাফ কোলেজকী কম্মান্দেন্ত ওইনা লৈরিঙৈ মতমদগীনি‍। মহাক্কা নিলগিরিগা অখন্নবা মরী অমা লৈরম্মী অমদি মদুগা মান্ননা লমদমদুগী মীওইশিংনা মহাকপু নুংশিরম্মী‍। ফিল্দ মার্সেল এস.ঐচ.এফ.জে. মনেশোনা লমদমদুগী মীয়ামগা লৈনরমবা নক্নবা মরী অদু নীংশিংদুনা দিফেন্স স্তাফ কোলেজনা লমদমদুগী এন.জি.ও.শিংগী খুত্থাঙদা চঙদ্রবা য়াদ্রবা পোৎলমশিং লৈত-লায়রশিংদা য়েন্থোক্তুনা তেংবাং পীরম্মী‍। অকনবা লমচৎ অমদি শিংথানিংঙাই ওইবা লুচিংবগী মতিক চেনবা নুপা অমা ওইনা মহাক্কী পুন্সিবু মতম পুম্নমক্তা লৈবাক অসিগগী অমদি লান্মীগী থৌনাগী হৌরকফম অমা ওইনা লৈহৌরগনি‍।

********