উপ রাস্ত্রপতি, শ্রী এম. ভেনকৈ নাইদুনা হান্নগী প্রধান মন্ত্রী, শ্রী পি.ভি. নরসিমহ রাওগী মপোক কুমওন্না লাকপগদা ঙসি ইকাই খুম্নবা উৎখ্রে অমসুং ভারতকী শেন্মিৎলোন্না মরাইচাইথরগদবগী মীৎকুপতা শেন্মিৎলোনদা অহোংবা অমা পুরক্নবা হোৎনবদা মহাক্না লৌখিবা থৌদাংশিংবু নিংশিংখ্রে।

ফেসবুক পোস্ত অমদা, শ্রী নাইদুনা শেন্মিৎলোনবু লিবরেলাইজ তৌনবা হোৎনবদা শ্রী রাওনা লৌখিবা থৌরাংশিং পনখি। "লাইসেন্স রাজগী মখাদা থম্লম্বা অথিংবশিং মাহক্না লৌথোকপা, রেদ তেপ হন্থবা অমসুং ভারতকী ইন্দস্ত্রীশিং হেন্না চাংদম্নিংঙাই ওইনবা হোৎনখি।" হায়না মহাক্না নিংশিংখি।

হান্নগী প্রধান মন্ত্রী অসিনা ভারতকী শেন্মিৎলোনবু মালেমগী শেন্মিৎলোনগা, মরু ওইনা ইস্ত এসিয়ান লৈবাকশিংগা নৌনা পুশিন্নবা অমসুং ললোন-ইতিক্তা লিবরেলাইজ তৌনবগী য়ুম্ফম হুনবীরম্ববু নিংশিংলদুনা উপ রাস্ত্রপতিনা হায়খিঃ 'মমাংদা পাল্লম্বশিংদা মনুং খক্তগী ওইবা থৌরাংশিংবু চাউনা মালেমগী চাউখৎলোনগা পুনশিন্ননবা হোৎনখিবা অহোংবা অমনি'।

মহাক শেমদোকপা পাম্বা মীওই অমনি অমসুং ভারতপু মালেমদা থোক্লিবশিং অসিদগী তমশিলহনবা পামজখি। মহাক্না খুদোংথীবা থোকপশিংবু খুদোংচাবা ওন্থোক্নবা হোৎনখি হায়না শ্রী নাইদুনা হায়খি।

উপ রাস্ত্রপতিনা হায়খি মদুদি ভারতকী জি.দি.পি.না হৌখিবা চহি খরা অসিদা চাউখৎলক্লিবা অমসুং লৈবাকি অসিনা শেন্মিৎলোন য়াঙনা চাউখৎপা লৈবাক অমা ওইরিবসি শ্রী রাওনা হোৎনবীরম্বগীদমক্তনি।

লৈবাক অসিদা শেমকোক শেমদোকপশিং মখা তানা চত্থবা পাম্বগী অনীংবা ফোংদোক্নরকপা লোইননা মহাক্না হায়খি, শ্রী অতল বিহারী বাজপায়ীনা শেমদোকপা অসিবু খোঙজেল য়াঙখৎহনখি, মরক অসিদা প্রধান মন্ত্রী শ্রী নরেন্দ্র মোদীনা শেমদোক্লিবশিং অসিবু থৱাই হকচাং য়াওনা থবক্তা ওন্থোক্লি।

শ্রী রাওনা নেসনেল ন্যুক্লিয়র সেক্যুরিতীগী য়ুম্বীশু লিংখৎপীরমই হায়রদুনা উপ রাস্ত্রপতিনা হায়খি, মহাক্না মতীং লৈনা লৌখৎপীরম্বা মপানগী পোলিসীশিংগী মনুংদা ইজরেলগা দিপ্লোমেতিক্কী ওইবা মরী অমা শাগৎপীরম্বা অমসুং য়ুনাইতেদ স্তেৎস্কা লৈরম্বা ফমজিল্লবা মরীবু অমুক নৌনা হিংগৎপীরম্বসু য়াওই।

হান্নগী প্রধান মন্ত্রী অসিনা পঞ্জাব অমসুং কাশ্মিরদা লৈবা তোঙান তানিংবগী ৱাখল্লোনবুসু মাই পাক্না লাকশিনখি হায়খি।

উপ রাস্ত্রপতিনা হায়খি মদুদি, লুক ইস্ত পোলিসী হৌদোকপা অমসুং লোকেল বোদীশিংবু মপাঙ্গল পীবীরম্বা ৭৩ অমসুং ৭৪শুবা সংবিধান শেমদোকপসু শ্রী রাওনা প্রধান মন্ত্রী ওইরিঙৈদা পায়খৎখিবা পনবা য়াবা থবকশিংনি।

*****