অমুক হন্না শেমদোক্লবা চৎন-পথাপ অমদা, লায়না ঙাকথোকপা ঙম্বগী শক্তি হেনগৎহন্নবা অমসুং ভাইরস মচা পোকপা হন্থহন্নবা ইন্দিয়ন কাউন্সিল ওফ মেদিকেল রিসর্সনা হায়দ্রোক্সীক্লোরোকুইনগী মহুৎ ঐচ.আই.ভি. ঙাকথোক্নবা হিদাকশিংনা মহুৎ শিল্লবা য়ারি। অদুম ওইনমক, কংগ্রা চাদা য়াওরিবা কেমিকেলশিং অসিনা লায়না ঙাকথোকপা ঙম্বগী শক্তি হেনগৎহন্দুনা মখোয়না ঐচ.আই.ভি. ঙাকথোক্নবা হিদাকশিংদগী হেন্না কোরোনাভাইরসকী থবকশিং থিংবা ঙমগনি হায়না হিমাচল প্রদেসকী পালাম্পুরদা লৈবা ইন্সতিত্যুৎ ওফ হিমালয়ন বাইওরিসোর্স তেক্নোলোজীগী দিরেক্তর দোক্তর সঞ্জয় কুমারনা হায়রি।মালেমগী চা নুমিৎ থৌরমগী শরুক অমা ওইনা ইন্সতিত্যুৎ অসিদা পাংথোকখিবা ৱেবিনার অমদা ৱাফম অসি দোক্তর সঞ্জয় কুমারনা ফোংদোকখি।

মহাক্কী ৱারোলদা দোক্তর সঞ্জয় কুমারনা খুন্নাই অমসুং ইন্দস্ত্রিদা কংগ্রা চাগী কান্নবা, মীওইবগী হকচাংদা কান্নবা পীরিবা মেদিকেলগী মগুনশিং অমসুং কোবিদ-১৯ লায়না থেংননবা ইন্সতিত্যুৎ অসিনা শেমগৎলিবা তেক্নোলোজীগী মতাংদা ফোংদোকখি। মহাক্না হায়খি, কোবিদ-১৯ লায়েংবদা শিজিন্নরিবা ঐচ.আই.ভি. ঙাকথোক্নবা হিদাকশিংদগী হেন্না ফবা বাইও এক্তিব কেমিকেল ৬৫ নৎত্রগা পোলিফেনোলশিং সাইনতিস্তশিংনা কম্পুতরদা য়ুম্ফম ওইবা মোদেলশিং শিজিন্নদুনা খঙদোক্লে। হায়রিবা কেমিকেলশিং অসিনা মীওইবগী সেল মনুংদা ভাইরেল প্রোতিন্না মথৌ পাংথোকপা থিংবা ঙমহল্লি।

কাউন্সিল ওফ সাইন্তিফিক এন্দ ইন্দস্ত্রিয়েল রিসর্সকী শরুক অমা ওইরিবা ইন্সতিত্যুৎ ওফ হিমালয়ন বাইওরিসোর্স তেক্নোলোজীনা চাগী মচাকশিং অমসুং মহৌশাদা ফংবা মনম নুংশিবা থাও য়াওবা য়ুদগী শুংবা হেন্দ সেনিতাইজরশিং পুথোকলি অমসুং মীয়ামদা ফংহল্লি। ইন্সতিত্যুৎ অসিনা চাগী পোৎলমশিং য়াওবা মনা-মশিংদগী শুংবা সাপোন পুথোক্লি। মসিগী সাপোন অসি কোকফাই, বেক্তরিয়া চংদবা, অমোৎপা চামথোকপা অমসুং উন্সা থোৎহনবা ঙম্বা মগুনশিং য়াওরি। হিমাচল প্রদেসতা লৈবা কম্পেনী অনিনা সাপোন অসি পুথোক্লি অমসুং য়োল্লি।

দোক্তর কুমারনা হায়খি চা (কেৎচিন) পুথোকপগী থবক অসি এম/এস বাইজনাথ ফার্মসিউতিকেলসদা শীন্নখ্রে অমসুং খুদক্ত থকপা য়ারবা চা অমসুং চাগী য়ু অসি কংগ্রা চাগী অচৌবা অওনবা ওইরগনি। কেতচিনশিং অসি সেল মাংহনবদগী কনবা ঙম্বা মহৌশাদা ফংবা এন্তিওক্সিদেন্দশিংনি অমসুং মসিনা কান্নবা কয়া পীরি।

থৌরম অসিদা, ধর্মসালাদা লৈবা কম্পেনী অমদা তি ভিনেজর তেক্নোলোজী শিজিন্নখি। তি ভিনেজর অসি হকচাং নোইবা হন্থহন্নবগী মগুনশিং য়াওরি। থৌরম অদুদা অয়ুসনা অয়াবা পীরবা হর্বেল গ্রিন অমসুং ব্লেক তি হৌদোকখি। হায়রিবা পোৎলমশিং অসি কোবিদ-১৯ থেংননবা হকচাংগী লায়না ঙাকথোকপা ঙম্বগী শক্তি হেনগৎহনবদা য়াম্না কান্নবা পীবা ঙাক্তনি হায়রি।

****