కేంద్ర ఆరోగ్య మరియు కుటుంబ సంక్షేమ శాఖ మంత్రి డాక్టర్ హర్షవర్ధన్ ,  నీతి  ఆయోగ్ సిఈఓ శ్రీ అమితాబ్ కాంత్ తో కలసి పౌర సమాజ సంస్థలు  మరియు ఎన్ జీ ఓ  దర్పణ్ లో నమోదు చేసుకున్న స్వచ్ఛంధ  సంస్థలతో వీడియో కాన్ఫరెన్సు ద్వారా  కోవిడ్ -19 మహమ్మారిని ఎదుర్కోవడానికి ప్రభుత్వం చేపడుతున్న చర్యలను వివరించి వారి సూచనలను ఆహ్వానించారు.  

సమాజంలోని వివిధ వర్గాల వారికి ఈ కష్టకాలంలో ఆహారం తదితర అవసరాలు తీర్చేందుకు నిస్వార్ధ సేవ చేస్తున్న 92,000 ఎన్ జీ ఓలను ప్రధానమంత్రి,  కేంద్ర ఆరోగ్య మరియు కుటుంబ సంక్షేమ మంత్రిత్వ శాఖ తరపున డాక్టర్ హర్షవర్ధన్  కృతజ్ఞతలు తెలిపారు.    కోవిడ్ -19ను ఎదుర్కోవడంలో ఈ సంస్థల తోడ్పాటు కీలకమని ఆయన ప్రశంసించారు.   ఈ సంస్థలు చేస్తున్న సేవ ఎంతో ఘన మైనదని, ఇది ఇతరులకు  స్ఫూర్తిదాయకంగా నిలిచి వారిలో సేవాభావాన్ని పెంపొందించి సహాయం చేయడానికి ముందుకు వచ్చేలా చేస్తుందని మంత్రి అన్నారు.  

కోవిద్-19 మహమ్మారిని అదుపు చేసేందుకు ప్రభుత్వ యత్నాల క్రమాన్ని డాక్టర్ హర్షవర్ధన్ కాన్ఫరెన్సుకు హాజరైన వారికి తెలిపారు.   కోవిద్-19ను ఎదుర్కొనేందుకు జాతీయ, ప్రపంచ ఆరోగ్య సంస్థ వంటి అంతర్జాతీయ సంస్థలతో కలసి ఆరోంభంలోనే వ్యూహాన్ని రూపొందించిన దేశాలలో ఇండియా ఒకటని ఆయన తెలిపారు.     భారత ప్రభుత్వం ముందుగానే కార్యాచరణ రూపొందించుకున్నదని,    క్రియాశీలకంగా వ్యవహరించి, పరిస్థితికి అనుగుణంగా తీవ్రత పెంచిందని అన్నారు.  

ప్రధానమంత్రి మార్గదర్శకత్వంలో వివిధ మంత్రిత్వ శాఖలు తీసుకున్న చర్యలను వెల్లడిస్తూ కోవిద్-19 అదుపు చేయడానికి ప్రత్యేకంగా మంత్రుల బృందాన్ని ఏర్పాటు చేసినట్లు తెలిపారు.  రాష్ట్రాలకు ఎప్పటికప్పుడు సూచనలు,మార్గదర్శకాలు జారీచేయడంతో పాటు  ఆరోగ్య మౌలిక  సదుపాయాలను పెంచడం, సంరక్షణ సాధనాలు సమకూర్చడం, దేశంలోకి వచ్చే ప్రయాణీకులను పరీక్షించడం,   సామాజిక నిఘా / పర్యవేక్షణ,  సత్వర స్పందన బృందాల ఏర్పాటు వంటి చర్యలు తీసుకున్నట్లు వెల్లడించారు.  అంతేకాక ఆరోగ్య సేతు యాప్ ప్రారంభించడం,  సమాజంలోని దుర్బల వర్గాల వారి కోసం  ఆర్ధిక ప్యాకేజీ -- ప్రధానమంత్రి గరీబ్ కళ్యాణ్ యోజన -- ప్రకటించడాన్నీ గురించి ఆయన ఉద్ఘాటించారు.   హోమ్ మంత్రిత్వ శాఖ తాజాగా జారీ చేసిన మార్గదర్శకాల వల్ల వలస కూలీల సమస్య కూడా పరిష్కారం కాగలదని అన్నారు.  

 ఈ సమావేశానికి హాజరై విలువైన సూచనలు ఇచ్చినందుకు డాక్టర్ హర్షవర్ధన్ కు,  పౌర సమాజ సంస్థలు  మరియు ఎన్ జీ ఓ సంస్థల ప్రతినిధులకు నీతి  ఆయోగ్ సిఈఓ శ్రీ అమితాబ్ కాంత్  కృతజ్ఞతలు తెలిపారు.