ক’ৰোনা ভাইৰাছ প্ৰতিৰোধৰ বাবে দেশজুৰি ঘোষণা কৰা লকডাউনৰ সময়ত যাতে কৃষি তথা আনুষংগিক সেৱাত কোনো ধৰণৰ সমস্যাৰ সন্মুখীন নহয়, তাৰ বাবে এই ক্ষেত্ৰসমূহত ৰেহাই দিয়া হৈছে৷ ইয়াৰ ফলত শস্য চপোৱাত কোনো ধৰণৰ বাধা নাথাকে৷ কেন্দ্ৰীয় কৃষি আৰু কৃষক  কল্যান, তথা গ্ৰামোন্নয়ন আৰু পঞ্চায়তীৰাজ মন্ত্ৰী শ্ৰী নৰেন্দ্ৰ টোমৰে এই নিৰ্দেশনাৰ বাবে প্ৰধানমন্ত্ৰী শ্ৰী নৰেন্দ্ৰ মোদী আৰু গৃহমন্ত্ৰী শ্ৰী অমিত শ্বাহৰ প্ৰতি কৃতজ্ঞতা জনায়৷

শ্ৰী টোমৰে বিগত সময়ছোৱাত কৃষকৰ সৈতে জড়িত প্ৰতিটো বিষয় ধাৰাবাহিকভাৱে নিৰীক্ষণ কৰি আহিছে৷ তেওঁক জনোৱা হয় যে এই বন্ধৰ সময়ছোৱাত কৃষকসকলে শস্য চপোৱাৰ লগতে বজাৰলৈ তেওঁলোকৰ সামগ্ৰী সৰবৰাহত অসুবিধাৰ সন্মুখীন হৈছে৷ কৃষকসকলৰ লগতে কৃষিৰ সৈতে জড়িত সংগঠনৰ দাবীৰ প্ৰতি লক্ষ্য ৰাখি প্ৰধানমন্ত্ৰী আৰু কেন্দ্ৰীয় চৰকাৰে বিষয়টোৰ গুৰু্ত্ব বিবেচনা কৰি কৃষক তথা ইয়াৰ সৈতে জড়িত সমূদায়ৰ স্বাৰ্থত এই ফলপ্ৰসূ সমাধান দিয়ে৷

কেন্দ্ৰীয় গৃহ মন্ত্ৰালয়ৰ দ্বাৰা ক’ৰোনা ভাইৰাছৰ বিৰুদ্ধে যুঁজাৰ বাবে দেশজুৰি ঘোষণা কৰা লকডাউনৰ বিষয়ে ২৪ আৰু ২৫ মাৰ্চত জাৰি কৰা ৪০-৩/২০২০-ডিএম-আই(এ) শীৰ্ষক নিৰ্দেশত ৰাষ্ট্ৰীয় কাৰ্যকৰী কমিটীৰ অধ্যক্ষৰ দ্বাৰা দুৰ্যোগ ব্যৱস্থাপনা অধিনিয়মৰ অনুচ্ছেদ ১০(২)ৰ অধীনত প্ৰদান কৰি ক্ষমতা অনুসৰি নিৰ্দেশনাৰ ভিত্তিত এতিয়া দ্বিতীয় পৰিশিষ্ট জাৰি কৰা হৈছে৷ এই পৰিশিষ্টত ২১ দিনীয়া লকডাউনত দুৰ্যোগ ব্যৱস্থাপনা অধিনিয়মৰ অধীনত কৃষি তথা ইয়াৰ সৈতে জড়িত সামগ্ৰী, সেৱা আৰু কাম-কাজক ৰেহাই দিয়া হৈছে৷

কেন্দ্ৰীয় গৃহ মন্ত্ৰালয়ে জাৰি কৰা নিৰ্দেশ অনুসৰি লকডাউনৰ সময়ত এমএছপি পৰিচালনাকে ধৰি কৃষিজাত সামগ্ৰী উপাদনত জড়িত এজেন্সি; ৰাজ্য চৰকাৰৰ নিৰ্দেশনাৰ ভিত্তিত কৃষিজাত সামগ্ৰীৰ বজাৰ কমিটীৰ দ্বাৰা পৰিচালিত বজাৰ; খেতি পথাৰত কৃষিকাৰ্য কৰা কৃষক আৰু কৃষি শ্ৰমিক; কৃষি সঁজুলি লাভ কৰাৰ বাবে কাষ্টম হায়াৰিং চেণ্টাৰ(চিএছচি); সাৰ, কীটনাশক তথা বীজৰ নিৰ্মাণ তথা পেকেজিং বিভাগ আৰু শস্য চপোৱা তথা ৰোপনৰ সৈতে জড়িত কৃষি তথা উদ্যানৰ কামত ব্যৱহৃত যন্ত্ৰপাতিৰ অন্তঃ তথা আন্তঃৰাজ্যিক অনা-নিয়াতো ৰেহাই দিয়া হৈছে৷

লকডাউনৰ সময়ত সাধাৰণ জনতা তথা কৃষকসকলে যাতে অত্যাৱশ্যকীয় সামগ্ৰীৰ ক্ষেত্ৰত সমস্যাৰ সন্মুখীন হ’বলগীয়া নহয় তাৰ প্ৰতি গুৰুত্ব আৰোপ কৰিয়েই এই সিদ্ধান্ত গ্ৰহণ কৰা হয়৷ ভাৰত চৰকাৰে সকলো ৰাজ্য আৰু কেন্দ্ৰীয় শাসিত অঞ্চলৰ সংশ্লিষ্ট মন্ত্ৰালয় তথা বিভাগ আৰু বিষয়াসকললৈ এই নিৰ্দেশনা প্ৰেৰণ কৰিছে৷

*****

APS/PK/MS/DB