প্ৰধানমন্ত্ৰী শ্ৰী নৰেন্দ্ৰ মোদীয়ে ২৪ ফেব্ৰুৱাৰীত উত্তৰ-প্ৰদেশৰ গোৰখপুৰ ভ্ৰমণ কৰিব৷

গোৰখপুৰত তেওঁ প্ৰধানমন্ত্ৰী-কিষাণ আঁচনি মুকলি কৰিব৷

গোৰখপুৰৰ ফাৰ্টিলাইজাৰ ক’ৰ্পোৰেচন অৱ ইণ্ডিয়া গ্ৰাউণ্ডত প্ৰধানমন্ত্ৰীয়ে বুটাম টিপি আঁচনিখনৰ শুভাৰম্ভ কৰিব৷ ইয়াৰ পাছতে তেওঁ নিৰ্বাচিত ক্ষুদ্ৰ আৰু মজলীয়া কৃষকৰ একাউণ্টলৈ ২,০০০ টকাৰ প্ৰথমটো কিস্তি আনুষ্ঠানিকভাৱে হস্তান্তৰ কৰিব৷

প্ৰধানমন্ত্ৰীয়ে লগতে কিষাণ আঁচনিৰ অধীনত নিৰ্বাচিত কৃষকসকলৰ মাজত প্ৰমাণপত্ৰও বিতৰণ কৰিব৷

ইয়াৰ পাছত প্ৰধানমন্ত্ৰীয়ে ভিডিঅ’ কনফাৰেন্সৰ মাধ্যমেৰে কিষাণ সন্মান নিধি যোজনা(প্ৰধানমন্ত্ৰী-কিষাণ)ৰ উপভোক্তাৰ সৈতে মতবিনিময় কৰিব৷

প্ৰধানমন্ত্ৰী কিষাণ সন্মান নিধি যোজনা

প্ৰধানমন্ত্ৰী কিষাণ সন্মান নিধি যোজনা যোৱা ১ ফেব্ৰুৱাৰীত দাখিল কৰা ২০১৯-২০ৰ অন্তৰ্ৱতীকালীন বাজেটত ঘোষণা কৰা হৈছিল৷

এই আঁচনিৰ অধীনত ২ হেক্টৰ পৰ্যন্ত ভূমি থকা ক্ষুদ্ৰ আৰু মজলীয়া কৃষকে বছৰি ৬,০০০ টকাকৈ লাভ কৰিব৷

এই ধনৰাশি ২০০০ টকাকৈ তিনিটা কিস্তিত আদায় দিয়া হ’ব৷

আঁচনিৰ ধনৰাশি উপভোক্তাই পোনপটীয়াকৈ নিজৰ বেংক একাউণ্টত লাভ কৰিব৷ প্ৰত্যক্ষ লাভ হস্তান্তৰে সমগ্ৰ প্ৰক্ৰিয়াটোক স্বচ্ছ কৰাৰ লগতে কৃষকৰ সময় ৰাহি কৰিব৷

ক্ষুদ্ৰ আৰু মজলীয়া কৃষকৰ উপাৰ্জন বৃদ্ধি কৰাৰ লক্ষ্যৰে এই আঁচনি আৰম্ভ কৰা হৈছে৷ ইয়ে ১২কোটিতকৈ অধিক কৃষকক উপকৃত কৰাৰ লক্ষ্য লৈছে৷

প্ৰধানমন্ত্ৰী কিষাণ আঁচনি হ’ল কেন্দ্ৰীয় খণ্ডৰ আঁচনি, যাৰ পুঁজি সম্পূৰ্ণৰূপে ভাৰত চৰকাৰে বহন কৰিব৷ আঁচনিখন ২০১৮ৰ ১ ডিচেম্বৰৰ পৰা কাৰ্যকৰী হৈছে৷

ৰাজ্য চৰকাৰ আৰু কেন্দ্ৰীয় শাসিত অঞ্চল প্ৰশাসনে আঁচনিৰ নীতি-নিয়মৰ ভিত্তিত যোগ্য কৃষকক চিনাক্ত কৰিব৷

প্ৰধানমন্ত্ৰী কিষাণ হ’ল এক যুগান্তকাৰী আঁচনি, যাৰ লক্ষ্য হ’ল দেশৰ ক্ষুদ্ৰ আৰু মজলীয়া কৃষকক প্ৰতিবছৰে তিনিটা কিস্তিৰ জৰিয়তে বিত্তীয় সহযোগিতা আগবঢ়াই তেওঁলোকৰ জীৱন ধাৰণৰ মান উন্নত কৰা৷ কৃষকে প্ৰত্যক্ষ লাভ হস্তান্তৰৰ জৰিয়তে নিজৰ বেংক একাউণ্টত ধনৰাশি লাভ কৰিব আৰু ইয়াৰ ফলত মধ্যভোগীৰ দৌৰাত্মা দূৰ হ’ব আৰু দুৰ্নীতি হ্ৰাস হ’ব৷

প্ৰধানমন্ত্ৰীয়ে গোৰখপুৰত আন কেইবাটাও উন্নয়নমূলক প্ৰকল্পৰ আধাৰশিলা স্থাপন আৰু উদ্বোধন কৰিব৷ তেওঁ সমবেত ৰাইজক সম্বোধি ভাষণো আগবঢ়াব৷

প্ৰধানমন্ত্ৰীয়ে মুকলি কৰিবলগীয়া এই উন্নয়নমূলক প্ৰকল্পসমূহ গেছ আন্তঃগাথনিৰ পৰা আৰম্ভ কৰি স্বাস্থ্যখণ্ডলৈ ব্যাপ্ত হৈ আছে৷ প্ৰকল্পসমূহে উত্তৰ-প্ৰদেশৰ জনসাধাৰণক ব্যাপকভাৱে উপকৃত কৰাৰ আশা কৰা হৈছে৷

****

AKT/KP/MS