نئی دلّی ، 21 فروری ؍وزیر اعظم جناب نریندر مودی نے جمہوریہ کوریہ کے لئے روانہ ہونے سے قبل اپنے ایک بیان میں کہا ہے کہ ’’ میں صدر مون جے ۔ ان کی دعوت پر جمہوریہ کوریا جا رہا ہوں ۔ جمہوریہ کوریا کے لئے یہ میرا دوسرا دورہ ہو گا اور صدر مون کے ساتھ میری دوسری چوٹی ملاقات ہو گی ۔
ہم نے گزشتہ سال جولائی میں صدر مون جے ۔ ان اور خاتون اول محترمہ کم جونگ سوک کا بھارت میں خیر مقدم کیا تھا ۔ جمہوریہ کوریا کے لئے میرا یہ دورہ ہمارے دونوں ملکوں کے تعلقات کی اہمیت کا مظہر ہے ۔
ایک قابل قدر دوست ، ایک خصوصی اسٹریٹجک ساجھے دار قوم کے طور پر ہم جمہوریہ کوریا کا احترام کرتے ہیں ۔ دیگر جمہوریتوں کی مانند بھارت اور جمہوریہ کوریا علاقائی اور عالمی امن کے لئے مشترک اقدار اور مشترک نظریہ کے حامل ہیں ۔ ہماری مارکیٹ اقتصادیات ، ہماری ضروریات اور قوت یکساں ہے ۔ جمہوریہ کوریا ہمارے میک ان انڈیا پہل قدمی کے ساتھ ساتھ اسٹارٹ اپ انڈیا اور کلین انڈیا جیسی پہل قدمیوں میں بھی ہمارا اہم ساجھے دار ہے ۔ سائنس اور تکنالوجی کے شعبوں میں بنیادی سائنس سے ایڈوانس سائنس کی سطح تک مشترکہ تحقیق میں ہمارا اشتراک کافی حوصلہ افزا ہے ۔
ہمارے عوام سے عوام کے درمیان تعلقات اور تبادلے ، دیرینہ طور پر ، ہماری دوستی کو بنیاد فراہم کرتے ہیں ۔ گزشتہ نومبر میں ایودھیا میں منعقدہ ’ دیپ اتسو ‘ میلے میں اپنے خصوصی نمائندے کے طور پر خاتون اول کو بھیجنے کے صدر مون کے فیصلے نے ہمارے دل کو چھو لیا تھا ۔
ہمارے دونوں ملکوں کے درمیان روز افزوں تعلقات کی گہرائی اور تنوع ہماری ایکٹ ایسٹ پالیسی اور جمہوریہ کوریا کی نئی شمالی پالیسی کی ہم آہنگی کی مرہون منت ہے ۔ ایک دوسرے کے ساتھ مل کر کام کر کے ہم مستقبل پر مبنی اپنے عوام ، خوش حالی اور امن کے لئے تعلقات کی پیش رفت کے لئے تہہیہ کئے ہوئے ہیں ۔
اپنے دورے کے دوران صدر مون کے ساتھ تبادلہ خیالات کے علاوہ میں تجارتی رہنماؤں ، ہندوستانی برادری کے افراد کے ساتھ ساتھ تمام شعبہ ہائے حیات کے نام ور افراد سے ملاقات کروں گا ۔
مجھے یقین ہے کہ اس دورے سے ہمیں اپنی اس اہم ساجھے داری کو مزید مستحکم کرنے میں مدد ملے گی ۔ ‘‘
 

U . 1156