ৰাষ্ট্ৰপতি শ্ৰী ৰামনাথ কোৱিন্দে আজি সাংস্কৃতিক সদ্ভাৱনাৰ বাবে ২০১৪,২০১৫ আৰু ২০১৬ বৰ্ষৰ টেগৰ বঁটা প্ৰদান কৰে৷ এক অনুষ্ঠানত ৰাষ্ট্ৰপতিৰ পৰা শ্ৰী ৰাজকুমাৰ সিংহজিৎ সিং, বাংলাদেশৰ এক সাংস্কৃতিক সংগঠন চায়ানট আৰু শ্ৰী ৰাম ভাঞ্জী সূতাৰে এই বঁটা গ্ৰহণ কৰে৷ প্ৰধানমন্ত্ৰীৰ অধ্যক্ষতাত গঠিত এখন বাচনি কমিটিয়ে বঁটাসমূহ নিৰ্বাচিত কৰে৷ মূখ্য ন্যায়াধীশ ৰঞ্জন গগৈ, প্ৰাক্তন মুখ্য নিৰ্বাচন আয়ুক্ত শ্ৰী এন গোপালাস্বামী আৰু ভাৰতীয় সাংস্কৃতিক সম্পৰ্ক আয়োগৰ সভাপতি শ্ৰী বিনয় সহস্ৰবুদ্ধে এই জুৰিৰ সদস্য আছিল৷

অনুষ্ঠানত প্ৰধানমন্ত্ৰী শ্ৰী নৰেন্দ্ৰ মোদীয়ে কয় যে সংস্কৃতি যিকোনো দেশৰ জীৱনৰেখা আৰু ইয়ে দেশৰ পৰিচয় বহণ কৰে৷ ‘ভাৰতৰ চহকী সংস্কৃতি উপনিৱেশবাদ আৰু বিদেশী আক্ৰমণৰ পাছতো সুৰক্ষিত হৈ আছে৷ গুৰুদেৱ টেগৰ আৰু স্বামী বিবেকানন্দৰ দৰে ব্যক্তিৰ বাবেই এয়া সম্ভৱ হৈছিল৷’—প্ৰধানমন্ত্ৰীয়ে কয়৷

প্ৰধানমন্ত্ৰী মোদীয়ে কয় যে ভাৰতৰ বহু বৈচিত্ৰপূৰ্ণ ঐতিহ্য গুৰুদেৱৰ কামৰ মাজত প্ৰতিফলিত হৈছিল৷ ৰবীন্দ্ৰ সংগীতত আমাৰ দেশৰ সকলো বৈচিত্ৰ-সংস্কৃতিৰ সমাবেশ ঘটে আৰু ই মাথো এটা ভাষাৰ মাজত সীমাবদ্ধ নহয়৷ তেওঁ কয় যে টেগৰৰ শিক্ষাৰ কোনো সময় সীমা নাই আৰু তেওঁ কৰ্মৰাজিৰ পৰা বিশ্বই বহুতো কথা শিকিব পাৰে৷ তেওঁ লোক কলা আৰু পৰম্পৰাগত নৃত্যক ভাৰতীয় সংস্কৃতিৰ বাহক হিচাপে গণ্য কৰিছিল৷ 

মণিপুৰী নৃত্যৰ সাধক শ্ৰী ৰাজকুমাৰ সিংহজিৎ সিঙক ২০১৪ বৰ্ষৰ বাবে এই বঁটা আগবঢ়োৱা হয়৷ গুৰুদেৱ ৰবীন্দ্ৰনাথ ঠাকুৰৰ কৰ্মৰাজি আৰু বাংলা কলাৰ প্ৰসাৰৰ ক্ষেত্ৰত গ্ৰহণ কৰা উল্লেখনীয় অৱদানৰ বাবে বাংলাদেশৰ সাংস্কৃতিক সংগঠন চায়ানাটক ২০১৫ৰ বাবে বঁটা প্ৰদান কৰা হয়৷

প্ৰখ্যাত ভাস্কৰ্য শিল্পী আৰু পণ্ডিত শ্ৰী ৰাম ভাঞ্জী সূতাৰক ২০১৬ৰ বাবে বঁটা প্ৰদান কৰা হয়৷

ৰবীন্দ্ৰনাথ ঠাকুৰৰ ১৫০সংখক জন্মবাৰ্ষিকী উপলক্ষে ভাৰত চৰকাৰে ২০১২ৰ পৰা সাংস্কৃতিক সদ্ভাৱানাৰ বাবে টেগৰ বঁটা আগবঢ়াই আহিছে৷ বছৰি প্ৰদান কৰা এই বঁটাৰ সৈতে এক কোটি টকা, এখন মানপত্ৰ আৰু পৰম্পৰাগত হস্তশিল্পৰ সামগ্ৰী আগবঢ়োৱা হয়৷

Please click here for the Prime Minister’s speech

***

AKT/AK/MS