প্ৰধানমন্ত্ৰী শ্ৰী নৰেন্দ্ৰ মোদীয়ে আজি ঝাঁচী ভ্ৰমণ কৰে৷ ঝাঁচীত তেওঁ প্ৰতিৰক্ষা কৰিডৰৰ আধাৰশিলা স্থাপন কৰাৰ উপৰিও বিভিন্ন উন্নয়নমূলক প্ৰকল্প মুকলি কৰে৷

উপস্থিত জনসাধাৰণক উদ্দেশ্যি তেওঁ কয়, ‘‘আমাৰ চুবুৰীয়াৰ গৰিহণামূলক কাৰ্যক ভাৰতৰ জনতাই উচিত প্ৰত্যুত্তৰ দিব৷ বিশ্বৰ বৃহৎ শক্তিসকল আমাৰ ওচৰত থিয় দিছে আৰু সমৰ্থন প্ৰদান কৰিছে৷ তেওঁলোকে প্ৰেৰণ কৰাৰ বাৰ্তাত কেৱল দুখেই নহয়, ক্ৰোধৰো আভাস পোৱা গৈছে৷ প্ৰত্যেকেই সন্ত্ৰাসবাদ নাশ কৰাৰ পক্ষত আছে৷’’

প্ৰধানমন্ত্ৰীয়ে কয় যে আমাৰ সাহসী সৈন্যসকলে তেওঁলোকৰ জীৱন ত্যাগ কৰিছে আৰু এই ত্যাগ অথলে যাবলৈ দিয়া নহ’ব৷ তেওঁ পুলৱামা আক্ৰমণৰ উচিত প্ৰত্যুত্তৰ দিয়া হ’ব বুলি প্ৰতিশ্ৰুতি প্ৰদান কৰে৷ তেওঁ কয়, ‘‘আমাৰ চুবুৰীয়া দেশে পাহৰি গৈছে যে এইখন নতুন ভাৰত৷ পাকিস্তানে সমগ্ৰ বিশ্বতে ভিক্ষাপাত্ৰ লৈ ঘূৰি ফুৰিছে কিন্তু কাৰো পৰা সহায় পোৱা নাই৷’’

প্ৰতিৰক্ষা কৰিডৰৰ আধাৰশিলা স্থাপন কৰি প্ৰধানমন্ত্ৰীয়ে কয় যে ঝাঁচীৰ প্ৰতিৰক্ষা কৰিডৰে দেশৰ যুৱ প্ৰজন্মক প্ৰত্যক্ষ আৰু পৰোক্ষভাৱে নিয়োজনৰ সুবিধা প্ৰদান কৰিব৷ এই অঞ্চলটোত বহুতো দেশী-বিদেশী প্ৰতিৰক্ষা সম্বন্ধীয় উদ্যোগে বিনিয়োগ কৰিব৷ তেওঁলোকে দক্ষতা বৃদ্ধিৰো সুবিধা প্ৰদান কৰিব, প্ৰধানমন্ত্ৰীয়ে এইদৰে কয়৷ তেওঁ এই প্ৰকল্পৰ গুৰুত্ব আলোকপাত কৰি কয় যে যুৱপ্ৰজন্মই ঘৰৰ কাষতে উপাৰ্জনৰ সুবিধা লাভ কৰিব, তেওঁলোক বাহিৰলৈ যোৱাৰ প্ৰয়োজন নহ’ব৷ এই প্ৰতিৰক্ষা কৰিডৰে প্ৰতিৰক্ষা উৎপাদনত ভাৰতক স্ব-নিৰ্ভৰশীল কৰি তুলিব বুলিও তেওঁ উল্লেখ কৰে৷

প্ৰধানমন্ত্ৰীয়ে বুন্দেলখণ্ডৰ গ্ৰামীণ এলেকাৰ বাবে পাইপযুক্ত পানী যোগান আঁচনিৰ আধাৰশিলা স্থাপন কৰে৷ তেওঁ কয় যে এয়া কেৱল পাইপ লাইন নহয়, ই অঞ্চলটোৰ জীৱন ৰেখা৷ ইয়াৰ দ্বাৰা মাতৃ আৰু ভগ্নীসকলে দূৰৈৰ পৰা পানী কঢ়িওৱাৰ কষ্টৰ পৰা মুক্ত হ’ব৷ প্ৰত্যেক ঘৰতে খোৱা পানীৰ পাইপৰ ব্যৱস্থা কৰা হ’ব৷

অমৃত যোজনাৰ অধীনত প্ৰধানমন্ত্ৰীয়ে ঝাঁচী নগৰ খোৱা পানী প্ৰকল্পৰ দ্বিতীয় পৰ্যায়ৰ আধাৰশিলা স্থাপন কৰে৷ তেওঁ কয় যে ৬০০ কোটি টকাৰ এই প্ৰকল্পৰ জৰিয়তে বেতৱা নদীৰ পৰা ঝাঁচী তথা পাৰ্শ্বৱৰ্তী গাঁওসমূহলৈ খোৱা পানীৰ যোগান ধৰা হ’ব৷

এই অনুষ্ঠানতে প্ৰধানমন্ত্ৰীয়ে ৪২৫ কিলোমিটাৰ দৈৰ্ঘৰ ঝাঁচী-মানিকপুৰ আৰু ভীমসেন-খাইৰাৰ ৰে’লৱে লাইনৰ দ্বৈতকৰণ তথা দবা পুনৰ মেৰামতি প্ৰকল্পৰ আধাৰশিলা স্থাপন কৰে৷

প্ৰধানমন্ত্ৰীয়ে ২৯৭ কিলোমিটাৰ দৈৰ্ঘৰ ঝাঁচী-খাইৰাৰ অংশৰ বৈদ্যুতিকীকৰণো মুকলি কৰে৷ এই প্ৰকল্পই নিয়োজনৰ সুবিধা সৃষ্টি কৰাৰ লগতে বুন্দেলখণ্ড অঞ্চলৰ উন্নয়নো সাধিত কৰিব৷ এই সংক্ৰান্তত প্ৰধানমন্ত্ৰীয়ে বুন্দেলখণ্ড অঞ্চলটো গুজৰাটৰ কচ্চৰ দৰে উন্নত হৈ উঠিব বুলি আশা প্ৰকাশ কৰে৷

পশ্চিম উত্তৰ প্ৰদেশত নিৰৱচ্ছিন্ন বিদ্যুৎ যোগানৰ নিশ্চিতিৰে পশ্চিম-উত্তৰ আন্তঃ আঞ্চলিক শক্তি পৰিবহণ সৱলীকৰণ প্ৰকল্প দেশবাসীলৈ আজি উচৰ্গা কৰা হয়৷ ইয়াৰ দ্বাৰা অঞ্চলটোৰ দীৰ্ঘদিনীয়া বিদ্যুৎ চাহিদাৰ দাবী পূৰণ হ’ব৷

পাহাৰী বান্ধ আধুনিকীকৰণ প্ৰকল্পৰ মুকলি আছিল অন্য এটা উল্লেখযোগ্য পদক্ষেপ৷ এই প্ৰকল্পৰ দ্বাৰা বান্ধৰ পানীৰ ওলাই যোৱা হ্ৰাস হোৱাৰ জৰিয়তে কৃষকসকল উপকৃত হ’ব তথা খেতিৰ বাবে পৰ্যাপ্ত পানীৰ সুবিধাও লাভ কৰিব৷

ভাষণ প্ৰসংগত প্ৰধানমন্ত্ৰীয়ে এয়াও উল্লেখ কৰে যে প্ৰায় ৭.৫ লাখ কোটি টকাৰ প্ৰধানমন্ত্ৰী কিষাণ সন্মান নিধি যোজনাৰ দ্বাৰা কৃষকসকলৰ বেংক একাউণ্টত প্ৰত্যক্ষভাৱে ধন জমা হ’ব৷ ঠিক সেইদৰে সাহায্য, জলপানি আদি প্ৰত্যক্ষভাৱে হিতাধিকাৰীৰ বেংক একাউণ্টত প্ৰদান কৰাৰ জৰিয়তে ১ লাখ কোটি টকাৰ ছিদ্ৰ নোহোৱা কৰা হৈছে, প্ৰধানমন্ত্ৰীয়ে এইদৰে জানিবলৈ দিয়ে৷

*****

AKT/AK/SBP-/MANN