पत्र सूचना कार्यालय

ಪರಿಚಯ

ವಿಶ್ವ ಆರೋಗ್ಯ ಸಂಸ್ಥೆಯ 2025ರ ಜಾಗತಿಕ ಕ್ಷಯರೋಗ ವರದಿಯ ಪ್ರಕಾರ, ಭಾರತವು ಕ್ಷಯರೋಗ ನಿರ್ಮೂಲನೆಯ ಹಾದಿಯಲ್ಲಿ ದೃಢವಾಗಿ ಮುನ್ನಡೆಯುತ್ತಿದೆ. 2015ರಿಂದ 2024ರ ಅವಧಿಯಲ್ಲಿ ಜಾಗತಿಕವಾಗಿ ಹೊಸ ಕ್ಷಯರೋಗ ಪ್ರಕರಣಗಳ ಇಳಿಕೆ ಪ್ರಮಾಣ ಶೇ. 12ರಷ್ಟಿದ್ದರೆ, ಭಾರತದಲ್ಲಿ ವಾರ್ಷಿಕವಾಗಿ ಹೊಸ ಪ್ರಕರಣಗಳ ಸಂಖ್ಯೆಯು ಶೇ. 21ರಷ್ಟು ಗಣನೀಯವಾಗಿ ತಗ್ಗಿದೆ. ಜಾಗತಿಕ ಚಿಕಿತ್ಸಾ ವ್ಯಾಪ್ತಿಯು ಶೇ. 78ರಷ್ಟಿದ್ದರೆ, ಭಾರತದಲ್ಲಿ ಚಿಕಿತ್ಸಾ ವ್ಯಾಪ್ತಿಯು ಶೇ. 92ರಷ್ಟು ಉನ್ನತ ಮಟ್ಟದಲ್ಲಿದೆ.

ಇದು ಜಾಗತಿಕವಾಗಿ ಟಿಬಿ ಪ್ರಕರಣಗಳಲ್ಲಿ ಕಂಡುಬಂದಿರುವ ಅತ್ಯಂತ ಮಹತ್ವದ ಇಳಿಕೆಗಳಲ್ಲಿ ಒಂದಾಗಿದ್ದು, ಇತರ ಹೆಚ್ಚು ಹೊರೆ ಹೊಂದಿರುವ ರಾಷ್ಟ್ರಗಳಲ್ಲಿ ದಾಖಲಾಗಿರುವ ಇಳಿಕೆಯ ವೇಗಕ್ಕಿಂತ ಇದು ಹೆಚ್ಚಾಗಿದೆ. ಇದೇ ಅವಧಿಯಲ್ಲಿ ಟಿಬಿಯಿಂದ ಸಂಭವಿಸುವ ಸಾವುಗಳು ಶೇ. 28ರಷ್ಟು ಕಡಿಮೆಯಾಗಿವೆ. ಕ್ಷಯರೋಗವನ್ನು ಪತ್ತೆಹಚ್ಚುವ, ತಪಾಸಣೆ ಮಾಡುವ ಮತ್ತು ಚಿಕಿತ್ಸೆ ನೀಡುವ ನಿಟ್ಟಿನಲ್ಲಿ ಭಾರತ ಸರ್ಕಾರದ ನಿರ್ದಿಷ್ಟ ಹಾಗೂ ಬಹುಮುಖಿ ವಿಧಾನವು ಈ ಪ್ರಗತಿಪರ ಧೋರಣೆಗೆ ಗಣನೀಯ ಕೊಡುಗೆ ನೀಡಿದೆ. ಸುಧಾರಿತ ತಂತ್ರಜ್ಞಾನ, ವಿಸ್ತರಿಸಲಾದ ಸ್ಥಳೀಯ ಆರೋಗ್ಯ ಸೇವೆಗಳು, ಸಮುದಾಯದ ಸಹಭಾಗಿತ್ವ ಮತ್ತು ಕೈಗೆಟುಕುವ ಚಿಕಿತ್ಸೆಯು ಈ ವ್ಯಾಪಕ ಹಾಗೂ ಮಾರಣಾಂತಿಕ ಕಾಯಿಲೆಯನ್ನು ನಿರ್ಮೂಲನೆ ಮಾಡುವ ಹಾದಿಯಲ್ಲಿ ಭಾರತವನ್ನು ಮುಂಚೂಣಿಯಲ್ಲಿರಿಸಿದೆ.

ಕ್ಷಯರೋಗ ಮತ್ತು ಅದರ ಲಕ್ಷಣಗಳು

ಕ್ಷಯರೋಗ ಎಂದರೇನು?

ಕ್ಷಯರೋಗವು (ಟಿಬಿ) ಮೈಕೋಬ್ಯಾಕ್ಟೀರಿಯಂ ಟ್ಯೂಬರ್‌ಕ್ಯುಲೋಸಿಸ್ ಎನ್ನುವ ಬ್ಯಾಕ್ಟೀರಿಯಾದಿಂದ ಉಂಟಾಗುತ್ತದೆ ಮತ್ತು ಇದು ಸಾಮಾನ್ಯವಾಗಿ ಶ್ವಾಸಕೋಶಗಳ ಮೇಲೆ ಪರಿಣಾಮ ಬೀರುತ್ತದೆ. ಟಿಬಿ ರೋಗವು ಮೆದುಳು, ಮೂತ್ರಪಿಂಡಗಳು ಅಥವಾ ಬೆನ್ನುಹುರಿಯಂತಹ ದೇಹದ ಇತರ ಭಾಗಗಳಿಗೂ ಹಬ್ಬಬಹುದು.

ಈ ಬ್ಯಾಕ್ಟೀರಿಯಾದಿಂದ ಸೋಂಕಿಗೆ ಒಳಗಾದ ವ್ಯಕ್ತಿಯು ಅನ್ಯಾಸಗೊಳ್ಳಬಹುದು (ಕಾಯಿಲೆಗೆ ತುತ್ತಾಗಬಹುದು), ಆದರೆ ಕೆಲವರಲ್ಲಿ ಯಾವುದೇ ಲಕ್ಷಣಗಳು ಕಾಣಿಸುವುದಿಲ್ಲ. ಸುಪ್ತ ಟಿಬಿ ಸೋಂಕುಗಳು ಅಥವಾ ನಿಷ್ಕ್ರಿಯ ಟಿಬಿ ಪ್ರಕರಣಗಳೂ ಇರುತ್ತವೆ. ನಿಷ್ಕ್ರಿಯ ಟಿಬಿ ಇರುವವರು ಸಕ್ರಿಯ ಸೋಂಕು ಇರುವವರಂತೆ ಇತರರಿಗೆ ರೋಗವನ್ನು ಹರಡುವುದಿಲ್ಲ – ಆದರೂ ಅವರು ಯಾವಾಗ ಬೇಕಾದರೂ ಸಕ್ರಿಯ ಟಿಬಿಗೆ ಒಳಗಾಗಿ ಅಸ್ವಸ್ಥರಾಗಬಹುದು. ಶಿಶುಗಳು, ಮಕ್ಕಳು ಮತ್ತು ರೋಗನಿರೋಧಕ ಶಕ್ತಿ ಕಡಿಮೆ ಇರುವವರು ಸೋಂಕಿಗೆ ತುತ್ತಾದಾಗ ಬೇಗನೆ ಕಾಯಿಲೆಗೆ ಒಳಗಾಗುವ ಸಾಧ್ಯತೆ ಹೆಚ್ಚು. ಸರಿಯಾದ ಚಿಕಿತ್ಸೆ ಇಲ್ಲದಿದ್ದರೆ, ಸಕ್ರಿಯ ಟಿಬಿ ಮಾರಣಾಂತಿಕವಾಗಬಹುದು.

ಟಿಬಿ ಲಕ್ಷಣಗಳು

ಸಕ್ರಿಯ ಕ್ಷಯರೋಗದ ಲಕ್ಷಣಗಳು ಸಾಮಾನ್ಯವಾಗಿ ಬ್ಯಾಕ್ಟೀರಿಯಾದಿಂದ ಬಾಧಿತವಾದ ದೇಹದ ನಿರ್ದಿಷ್ಟ ಭಾಗಕ್ಕೆ ತಕ್ಕಂತೆ ಇರುತ್ತವೆ. ಆದಾಗ್ಯೂ, ಎಲ್ಲಾ ರೀತಿಯ ಟಿಬಿಗೂ ಅನ್ವಯವಾಗುವ ಕೆಲವು ಸಾಮಾನ್ಯ ಲಕ್ಷಣಗಳೂ ಇರುತ್ತವೆ.

ಸಕ್ರಿಯ ಅಥವಾ ರೋಗಲಕ್ಷಣಗಳಿರುವ ಕ್ಷಯರೋಗ (ಟಿಬಿ) ಪೀಡಿತರು ಈ ರೋಗದ ಬ್ಯಾಕ್ಟೀರಿಯಾವನ್ನು ಇತರರಿಗೆ ಹರಡಬಹುದು. ಅವರು ಕೆಮ್ಮುವಾಗ, ಸೀನುವಾಗ ಅಥವಾ ಮಾತನಾಡುವಾಗ, ಬ್ಯಾಕ್ಟೀರಿಯಾವನ್ನು ಹೊಂದಿರುವ ಸೂಕ್ಷ್ಮ ಹನಿಗಳು ಗಾಳಿಯಲ್ಲಿ ಬಿಡುಗಡೆಯಾಗುತ್ತವೆ ಮತ್ತು ಹತ್ತಿರದಲ್ಲಿರುವವರಿಂದ (ವಿಶೇಷವಾಗಿ ಗಾಳಿಯಾಡದ ಕಳಪೆ ಸ್ಥಳಗಳಲ್ಲಿ) ಉಸಿರಾಟದ ಮೂಲಕ ಒಳಗೆಳೆಸಲ್ಪಡುತ್ತವೆ.

ಕ್ಷಯರೋಗವು ಗಾಳಿಯ ಮೂಲಕ ಹಬ್ಬುತ್ತದೆಯಾದರೂ, ಈ ಕೆಳಗಿನವುಗಳ ಮೂಲಕ ಇದು ಹರಡುವುದಿಲ್ಲ:

• ಹಸ್ತಲಾಪ ಮಾಡುವುದರಿಂದ
• ಸಾರ್ವಜನಿಕ ಶೌಚಾಲಯಗಳನ್ನು ಬಳಸುವುದರಿಂದ
• ಆಹಾರ ಮತ್ತು ಪಾತ್ರೆಗಳನ್ನು ಹಂಚಿಕೊಳ್ಳುವುದರಿಂದ
• ದೈನಂದಿನ ಸಾಮಾಜಿಕ ಪರಸ್ಪರ ಕ್ರಿಯೆಗಳಿಂದ

ಶ್ವಾಸಕೋಶದ ಟಿಬಿ ರೋಗಿಗಳು ಸೂಕ್ತವಾದ ಟಿಬಿ ಔಷಧಿಗಳನ್ನು ಕನಿಷ್ಠ ಎರಡು ವಾರಗಳ ಕಾಲ ಸೇವಿಸಿದ ನಂತರ ಸಾಮಾನ್ಯವಾಗಿ ಸೋಂಕು ಹರಡುವುದನ್ನು ನಿಲ್ಲಿಸುತ್ತಾರೆ. ಶ್ವಾಸಕೋಶವನ್ನು ಹೊರತುಪಡಿಸಿ ದೇಹದ ಇತರ ಭಾಗಗಳಲ್ಲಿ ಟಿಬಿ ಇರುವವರು ಸಾಮಾನ್ಯವಾಗಿ ಈ ಕಾಯಿಲೆಯನ್ನು ಇತರರಿಗೆ ಹರಡುವುದಿಲ್ಲ.

ಭಾರತದಲ್ಲಿ ಟಿಬಿ ನಿರ್ಮೂಲನೆಗಾಗಿ ಕಾರ್ಯತಂತ್ರದ ಯೋಜನೆ

ಸುಸ್ಥಿರ ಅಭಿವೃದ್ಧಿ ಗುರಿ 3ಕ್ಕೆ ಅನುಗುಣವಾಗಿ, ಎಲ್ಲರಿಗೂ ಆರೋಗ್ಯಕರ ಜೀವನವನ್ನು ಖಚಿತಪಡಿಸಲು ಮತ್ತು ಯೋಗಕ್ಷೇಮವನ್ನು ಉತ್ತೇಜಿಸಲು ಭಾರತ ಸರ್ಕಾರವು ಕ್ಷಯರೋಗವನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡಲು ಬದ್ಧವಾಗಿದೆ. ಜೂನ್ 2020ರಲ್ಲಿ ಘೋಷಿಸಲಾದ 'ಭಾರತದಲ್ಲಿ ಟಿಬಿ ನಿರ್ಮೂಲನೆಗಾಗಿ ರಾಷ್ಟ್ರೀಯ ಕಾರ್ಯತಂತ್ರದ ಯೋಜನೆ 2020-25' ನಾಲ್ಕು ಪ್ರಮುಖ ಸ್ತಂಭಗಳ ಮೂಲಕ ಕ್ಷಯರೋಗವನ್ನು ತೊಡೆದುಹಾಕುವ ಗುರಿಯನ್ನು ಹೊಂದಿದೆ: ನಿರ್ಮಿಸುವುದು, ತಡೆಗಟ್ಟುವುದು, ಪತ್ತೆಹಚ್ಚುವುದು ಮತ್ತು ಚಿಕಿತ್ಸೆ ನೀಡುವುದು. ಈ ಯೋಜನೆಯು ಶೀಘ್ರ ರೋಗನಿರ್ಣಯ, ಸೋಂಕು ಹರಡುವುದನ್ನು ತಗ್ಗಿಸುವುದು, ಸೂಕ್ತ ಔಷಧಗಳು ಮತ್ತು ಚಿಕಿತ್ಸಾ ವಿಧಾನಗಳ ಮೂಲಕ ರೋಗಿಗಳಿಗೆ ಚಿಕಿತ್ಸೆ ನೀಡುವುದು ಹಾಗೂ ರೋಗಿಗಳ ಬೆಂಬಲ ವ್ಯವಸ್ಥೆಗಳನ್ನು ರೂಪಿಸುವುದರ ಮೇಲೆ ಕೇಂದ್ರೀಕರಿಸುತ್ತದೆ.

ರಾಷ್ಟ್ರೀಯ ಕ್ಷಯರೋಗ ನಿರ್ಮೂಲನಾ ಕಾರ್ಯಕ್ರಮ

2020ರಲ್ಲಿ, ಭಾರತ ಸರ್ಕಾರವು ಪರಿಷ್ಕೃತ ರಾಷ್ಟ್ರೀಯ ಕ್ಷಯರೋಗ ನಿಯಂತ್ರಣ ಕಾರ್ಯಕ್ರಮವನ್ನು ರಾಷ್ಟ್ರೀಯ ಕ್ಷಯರೋಗ ನಿರ್ಮೂಲನಾ ಕಾರ್ಯಕ್ರಮ ಎಂದು ಮರುನಾಮಕರಣ ಮಾಡಿತು. ಇದು ಜಾಗತಿಕ ಗುರಿಯಾದ 2030ರ ಮೊದಲು ಕ್ಷಯರೋಗವನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡುವ ಭಾರತದ ಸಂಕಲ್ಪವನ್ನು ಪ್ರತಿಬಿಂಬಿಸುತ್ತದೆ. ಎನ್‍ಟಿಇಪಿ ಯೋಜನೆಯು ಎನ್‍ಎಸ್‍ಪಿ ಯ ನಾಲ್ಕು ಸ್ತಂಭಗಳಾದ - ಪತ್ತೆಹಚ್ಚುವುದು– ಚಿಕಿತ್ಸೆ ನೀಡುವುದು– ತಡೆಗಟ್ಟುವುದು – ನಿರ್ಮಿಸುವುದು - ತಳಹದಿಯ ಮೇಲೆ ರೂಪುಗೊಂಡಿದೆ. ಈ ಕಾರ್ಯಕ್ರಮದ ಪ್ರಮುಖ ಚಟುವಟಿಕೆಗಳು ಇಲ್ಲಿವೆ:

• ಉತ್ತಮ ಗುಣಮಟ್ಟದ ಪರೀಕ್ಷೆಗಳ ಮೂಲಕ ಟಿಬಿ ರೋಗಿಗಳನ್ನು ಆರಂಭಿಕ ಹಂತದಲ್ಲೇ ಪತ್ತೆಹಚ್ಚುವುದು ಮತ್ತು ದುರ್ಬಲ ಜನಸಂಖ್ಯೆಯಲ್ಲಿ ಕಾಣೆಯಾದ ಪ್ರಕರಣಗಳನ್ನು ಹುಡುಕಲು ಸಕ್ರಿಯ ಸಮುದಾಯ ಸಂಪರ್ಕವನ್ನು ನಡೆಸುವುದು.
• ಔಷಧ-ನಿರೋಧಕ ಟಿಬಿ ಸೇರಿದಂತೆ, ಗುಣಮಟ್ಟದ ಭರವಸೆ ಇರುವ ಔಷಧಿಗಳು ಮತ್ತು ಚಿಕಿತ್ಸಾ ವಿಧಾನಗಳೊಂದಿಗೆ ತ್ವರಿತ ಚಿಕಿತ್ಸೆ ನೀಡುವುದು.
• ಖಾಸಗಿ ವಲಯದಲ್ಲಿ ಚಿಕಿತ್ಸೆ ಪಡೆಯುವ ರೋಗಿಗಳನ್ನು ಈ ವ್ಯವಸ್ಥೆಯೊಂದಿಗೆ ಬೆಸೆಯುವುದು.
• ನೇರ ನಗದು ವರ್ಗಾವಣೆ ಮತ್ತು 'ನಿಕ್ಷಯ್ ಮಿತ್ರ' ಉಪಕ್ರಮದ ಮೂಲಕ ರೋಗಿ-ಕೇಂದ್ರಿತ ಚಿಕಿತ್ಸಾ ಬೆಂಬಲ ಹಾಗೂ ಪೌಷ್ಟಿಕಾಂಶದ ನೆರವು ನೀಡುವುದು.
• ಮನೆಯ ಸದಸ್ಯರು, ಮಕ್ಕಳು, ಎಚ್‌ಐವಿ ಪೀಡಿತರು ಹಾಗೂ ಅತಿ ಅಪಾಯಕಾರಿ/ದುರ್ಬಲ ಜನಸಂಖ್ಯೆಯ ನಡುವೆ ಸಂಪರ್ಕ ಪತ್ತೆಹಚ್ಚುವಿಕೆ ಮತ್ತು ಟಿಬಿ ತಡೆಗಟ್ಟುವ ಚಿಕಿತ್ಸೆ ನೀಡುವುದು.
• ಗಾಳಿಯ ಮೂಲಕ ಹರಡುವ ಸೋಂಕನ್ನು ನಿಯಂತ್ರಿಸುವ ಕ್ರಮಗಳು.
• ಸಾಮಾಜಿಕ ನಿರ್ಣಾಯಕ ಅಂಶಗಳನ್ನು ಪರಿಹರಿಸಲು ಬಹು-ವಲಯದ ಪ್ರತಿಕ್ರಿಯೆ.
• ಸರ್ಕಾರವು ಎನ್‍ಟಿಇಪಿ ಅಡಿಯಲ್ಲಿ ವಿವಿಧ ಕಾರ್ಯಕ್ರಮಗಳನ್ನು ನಡೆಸುತ್ತಿದೆ.

ಪ್ರಧಾನಮಂತ್ರಿ ಟಿಬಿ ಮುಕ್ತ ಭಾರತ ಅಭಿಯಾನ

ಎನ್‌ಟಿಇಪಿಯ ಹೆಚ್ಚುವರಿ ಪ್ರಮುಖ ಅಂಶವಾಗಿ ಪ್ರಧಾನಮಂತ್ರಿ-ಟಿಬಿ ಮುಕ್ತ ಭಾರತ ಅಭಿಯಾನವನ್ನು (ಟಿಬಿ-ಮುಕ್ತ ಭಾರತ ಚಳಳಿ) ಸೆಪ್ಟೆಂಬರ್ 9, 2022 ರಂದು ಪ್ರಾರಂಭಿಸಲಾಯಿತು. ಸಮಾಜದ ಎಲ್ಲ ವರ್ಗದ ಜನರನ್ನು 'ಜನ ಆಂದೋಲನ'ದಲ್ಲಿ (ಜನರ ಚಳಳಿ) ಒಗ್ಗೂಡಿಸಲು ಮತ್ತು ಟಿಬಿ ನಿರ್ಮೂಲನೆಯತ್ತ ದೇಶದ ಪ್ರಗತಿಯನ್ನು ಚುರುಕುಗೊಳಿಸಲು ಈ ಉಪಕ್ರಮವನ್ನು ಆರಂಭಿಸಲಾಗಿದೆ. ಇದರ ಪ್ರಮುಖ ಉದ್ದೇಶಗಳು:

• ಚಿಕಿತ್ಸೆಯ ಫಲಿತಾಂಶಗಳನ್ನು ಸುಧಾರಿಸಲು ಟಿಬಿ ರೋಗಿಗಳಿಗೆ ಹೆಚ್ಚುವರಿ ಬೆಂಬಲ ನೀಡುವುದು.
• ಸಮುದಾಯದ ಪಾಲ್ಗೊಳ್ಳುವಿಕೆಯನ್ನು ಹೆಚ್ಚಿಸುವುದು.

ಕಾರ್ಪೊರೇಟ್ ಸಾಮಾಜಿಕ ಜವಾಬ್ದಾರಿಯನ್ನು ಬಳಸಿಕೊಳ್ಳುವುದು.

ನಿಕ್ಷಯ್ ಪೋಷಣ್ ಯೋಜನೆ ಮತ್ತು ನಿಕ್ಷಯ್ ಮಿತ್ರ ಕಾರ್ಯಕ್ರಮ

ಚಿಕಿತ್ಸೆಯಲ್ಲಿ ಬಳಸುವ ಔಷಧಿಗಳ ಅಡ್ಡಪರಿಣಾಮಗಳನ್ನು ಎದುರಿಸಲು ಟಿಬಿ ರೋಗಿಗಳು ಅಧಿಕ ಪ್ರೊಟೀನ್ ಇರುವ ಆಹಾರವನ್ನು ಸೇವಿಸುವುದು ಕಡ್ಡಾಯವಾಗಿದೆ. 2018ರಲ್ಲಿ ಪ್ರಾರಂಭಿಸಲಾದ 'ನಿಕ್ಷಯ್ ಪೋಷಣ್ ಯೋಜನೆ'ಯು ಅಧಿಸೂಚನೆಗೆ ಒಳಪಟ್ಟ ಪ್ರತಿಯೊಬ್ಬ ಕ್ಷಯರೋಗಿಗೆ ತಿಂಗಳಿಗೆ 1,000 ರೂ.ಗಳ ಆರ್ಥಿಕ ಸಹಾಯವನ್ನು ಒದಗಿಸುತ್ತದೆ. 2018ರ ಏಪ್ರಿಲ್‌ನಲ್ಲಿ ಇದು ಆರಂಭವಾದಾಗಿನಿಂದ, 1.38 ಕೋಟಿ ಫಲಾನುಭವಿಗಳ ಬ್ಯಾಂಕ್ ಖಾತೆಗಳಿಗೆ ನೇರವಾಗಿ ಒಟ್ಟು 4,454.68 ಕೋಟಿ ರೂ.ಗಳನ್ನು ಪಾವತಿಸಲಾಗಿದೆ.

ಟಿಬಿ ಚಿಕಿತ್ಸೆಯು ದೀರ್ಘಕಾಲದ್ದಾಗಿದ್ದು, ಕನಿಷ್ಠ 6 ತಿಂಗಳು ಅಥವಾ ಕೆಲವೊಮ್ಮೆ ಅದಕ್ಕಿಂತ ಹೆಚ್ಚಿನ ಕಾಲ ಮುಂದುವರಿಯುತ್ತದೆ. 'ನಿಕ್ಷಯ್ ಮಿತ್ರ' ಎಂದರೆ ಈ ಚಿಕಿತ್ಸಾ ಅವಧಿಯಲ್ಲಿ ಟಿಬಿ ರೋಗಿಗಳಿಗೆ ಸಹಾಯ ಹಸ್ತ ಚಾಚುವ ಒಬ್ಬ "ಟಿಬಿ ಸ್ನೇಹಿತ" ಅಥವಾ ಬೆಂಬಲಿಗ. ಯಾವುದೇ ವ್ಯಕ್ತಿ, ಎನ್‌ಜಿಒ, ಕಾರ್ಪೊರೇಟ್ ಸಂಸ್ಥೆಗಳು, ಧಾರ್ಮಿಕ ಹಾಗೂ ಸಾಮುದಾಯಿಕ ಗುಂಪುಗಳು, ಸರ್ಕಾರಿ ಅಧಿಕಾರಿಗಳು ಮತ್ತು ಸಾರ್ವಜನಿಕ ಗಣ್ಯರು ಸ್ವಯಂಪ್ರೇರಿತರಾಗಿ 'ನಿಕ್ಷಯ್ ಮಿತ್ರ'ರಾಗಬಹುದು.

ರೋಗಿಗಳು ತಮ್ಮ ಜೇಬಿನಿಂದ ಹಣ ಖರ್ಚು ಮಾಡುವುದನ್ನು ತಗ್ಗಿಸಲು ಈ ಟಿಬಿ ಸ್ನೇಹಿತರು ನಿಯಮಿತವಾಗಿ ಆಹಾರದ ಕಿಟ್‌ಗಳನ್ನು ಒದಗಿಸುತ್ತಾರೆ. ಇದರೊಂದಿಗೆ, ರೋಗಿಗಳ ಯೋಗಕ್ಷೇಮವನ್ನು ನಿಯಮಿತವಾಗಿ ವಿಚಾರಿಸುವ ಮೂಲಕ ಮಾನಸಿಕ-ಸಾಮಾಜಿಕ ಬೆಂಬಲವನ್ನು ಹಾಗೂ ಗುಣಮುಖರಾದ ಬಳಿಕ ತಮ್ಮ ಬದುಕನ್ನು ಮರುಕಟ್ಟಿಕೊಳ್ಳಲು ವೃತ್ತಿಪರ ಬೆಂಬಲವನ್ನು ಸಹ ನೀಡಬಹುದು.

ನವೆಂಬರ್ 12, 2025 ರ ಹೊತ್ತಿಗೆ:

• 6,77,541 ವ್ಯಕ್ತಿಗಳು ಮತ್ತು ಸಂಸ್ಥೆಗಳು 'ನಿಕ್ಷಯ್ ಮಿತ್ರ'ರಾಗಿ ನೋಂದಾಯಿಸಿಕೊಂಡು, ಟಿಬಿ ರೋಗಿಗಳಿಗೆ 45 ಲಕ್ಷಕ್ಕೂ ಹೆಚ್ಚು ಆಹಾರದ ಕಿಟ್‌ಗಳನ್ನು ವಿತರಿಸಿದ್ದಾರೆ.
• 2 ಲಕ್ಷಕ್ಕೂ ಅಧಿಕ 'ಮೈ ಭಾರತ್' ಸ್ವಯಂಸೇವಕರು ನಿಕ್ಷಯ್ ಮಿತ್ರರಾಗಿ ಸೇವೆ ಸಲ್ಲಿಸಲು ಮುಂದೆ ಬಂದಿದ್ದಾರೆ. 'ಮೈ ಭಾರತ್' ಎಂಬುದು ಯುವ ವ್ಯವಹಾರಗಳು ಮತ್ತು ಕ್ರೀಡಾ ಸಚಿವಾಲಯದ ಒಂದು ಉಪಕ್ರಮವಾಗಿದ್ದು, ಇದು 15 ರಿಂದ 29 ವರ್ಷ ವಯಸ್ಸಿನ ಯುವಕರನ್ನು ವಿವಿಧ ಸರ್ಕಾರಿ ಇಲಾಖೆಗಳು, ಖಾಸಗಿ ಸಂಸ್ಥೆಗಳು ಮತ್ತು ನಾಗರಿಕ ಸಮಾಜದ ಪಾಲುದಾರಿಕೆಗಳೊಂದಿಗೆ ಸಂಪರ್ಕಿಸುವ ಮೂಲಕ ನೈಜ ಜಗತ್ತಿನ ಸವಾಲುಗಳು ಹಾಗೂ ಸಮಸ್ಯೆಗಳನ್ನು ಪರಿಹರಿಸಲು ಸಹಾಯ ಮಾಡುತ್ತದೆ.

100 ದಿನಗಳ ಟಿಬಿ ಮುಕ್ತ ಭಾರತ ಅಭಿಯಾನ

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು 2024ರ ಡಿಸೆಂಬರ್ 7 ರಂದು 33 ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳ 337 ಅಧಿಕ-ಮುಖ್ಯ ಗಮನದ ಜಿಲ್ಲೆಗಳಲ್ಲಿ ಭಾರತದ ಅತ್ಯಂತ ತೀವ್ರವಾದ ಟಿಬಿ ನಿರ್ಮೂಲನಾ ಅಭಿಯಾನಗಳಲ್ಲಿ ಒಂದಾದ '100 ದಿನಗಳ ಟಿಬಿ ಮುಕ್ತ ಭಾರತ ಅಭಿಯಾನ'ಕ್ಕೆ ಚಾಲನೆ ನೀಡಿತು. ಟಿಬಿಯನ್ನು ಮುಂಚಿತವಾಗಿ ಪತ್ತೆಹಚ್ಚಲು, ದುರ್ಬಲ ಜನಸಂಖ್ಯೆಯ ದುರ್ಬಲ್ಯ ಮ್ಯಾಪಿಂಗ್ ಮತ್ತು ವ್ಯವಸ್ಥಿತ ತಪಾಸಣೆಯನ್ನು ಕೈಗೊಳ್ಳಲಾಯಿತು. ಈ 'ಜನ ಆಂದೋಲನ'ವು 30,000ಕ್ಕೂ ಹೆಚ್ಚು ಚುನಾಯಿತ ಪ್ರತಿನಿಧಿಗಳು ಮತ್ತು 24 ಇಲಾಖೆಗಳ ಸಕ್ರಿಯ ಭಾಗವಹಿಸುವಿಕೆಗೆ ಹಾಗೂ 'ನಿಕ್ಷಯ್ ಮಿತ್ರ'ರ ಬೆಂಬಲಕ್ಕೆ ಕಾರಣವಾಯಿತು, ಇದು ಟಿಬಿ ನಿರ್ಮೂಲನೆಗೆ 'ಸಮಾಜದ ಎಲ್ಲಾ ವರ್ಗದ ಸಹಭಾಗಿತ್ವ' ಮತ್ತು 'ಸರ್ಕಾರದ ಎಲ್ಲಾ ಅಂಗಗಳ ಒಮ್ಮುಖ' ವಿಧಾನವನ್ನು ಪ್ರದರ್ಶಿಸಿತು. ಟಿಬಿ ಮುಕ್ತ ಭಾರತ ಅಭಿಯಾನದ ಈ ಕಾರ್ಯತಂತ್ರಗಳನ್ನು ಈಗ ದೇಶಾದ್ಯಂತ ಎಲ್ಲಾ ಜಿಲ್ಲೆಗಳಿಗೂ ವಿಸ್ತರಿಸಿ ಮೇಲ್ದರ್ಜೆಗೇರಿಸಲಾಗಿದೆ.

2026ರ ಜೂನ್ ವೇಳೆಗೆ, ಈ ತೀವ್ರಗೊಂಡ ಅಭಿಯಾನವು ಪ್ರಮುಖ ಮೈಲಿಗಲ್ಲುಗಳನ್ನು ದಾಟಿದೆ: 28.1 ಕೋಟಿಗೂ ಅಧಿಕ ಜನರಿಗೆ ತಪಾಸಣೆ ನಡೆಸಲಾಗಿದೆ, 20 ಲಕ್ಷ ವ್ಯಕ್ತಿಗಳಿಗೆ ಟಿಬಿ ತಡೆಗಟ್ಟುವ ಚಿಕಿತ್ಸೆ ನೀಡಲಾಗಿದೆ ಮತ್ತು 5.7 ಲಕ್ಷ ಹೊಸ ನಿಕ್ಷಯ್ ಮಿತ್ರರನ್ನು ಸೇರಿಸಿಕೊಳ್ಳಲಾಗಿದೆ.

ಮಾರ್ಚ್ 2026 ರಿಂದ ಪ್ರಾರಂಭವಾದ ಅಭಿಯಾನದ ಎರಡನೇ ಹಂತದ ಅವಧಿಯಲ್ಲಿ, 1.2 ಲಕ್ಷಕ್ಕೂ ಹೆಚ್ಚು ಅಧಿಕ-ಅಪಾಯಕಾರಿ ಹಳ್ಳ ಗಳು ಮತ್ತು ವಾರ್ಡ್‌ಗಳಲ್ಲಿ 1.7 ಲಕ್ಷಕ್ಕೂ ಅಧಿಕ 'ಆಯುಷ್ಮಾನ್ ಆರೋಗ್ಯ ಶಿಬಿರ'ಗಳನ್ನು ಆಯೋಜಿಸಲಾಯಿತು. ಇದಕ್ಕೆ 32 ಲಕ್ಷ ವಿದ್ಯಾರ್ಥಿಗಳು ಮತ್ತು 1.9 ಲಕ್ಷ 'ಮೈ ಭಾರತ್' ಸ್ವಯಂಸೇವಕರಿಂದ ಸಕ್ರಿಯ ಬೆಂಬಲ ದೊರೆಯಿತು. ಟಿಬಿ ಮುಕ್ತ ಭಾರತ ಅಭಿಯಾನದ ಅಡಿಯಲ್ಲಿ ಚಿಕಿತ್ಸೆಯ ಯಶಸ್ಸಿನ ಪ್ರಮಾಣವು ಶೇ. 90ಕ್ಕೆ ಏರಿದ್ದು, ಇದು ಶೇ. 88ರಷ್ಟಿರುವ ಜಾಗತಿಕ ಸರಾಸರಿಯನ್ನು ಮೀರಿದೆ.

ಹೊಸ ಉಪಕ್ರಮಗಳು

ಔಷಧ-ನಿರೋಧಕ ಟಿಬಿ ರೋಗಿಗಳಿಗಾಗಿ ಬೆಡಾಕ್ವಿಲಿನ್, ಪ್ರೆಟೊಮ್ಯಾನಿಡ್, ಲಿನೆಜೋಲಿಡ್ ಮತ್ತು ಮಾಕ್ಸಿಫ್ಲೋಕ್ಸಾಸಿನ್ ಒಳಗೊಂಡ ಹೊಸ, ಕಡಿಮೆ ಅವಧಿಯ, ಸುರಕ್ಷಿತ ಹಾಗೂ ಅತ್ಯಂತ ಪರಿಣಾಮಕಾರಿಯಾದ ಬಿಪಿಎಎಲ್‍ಎಂ ಚಿಕಿತ್ಸಾ ವಿಧಾನವನ್ನು ಕಾರ್ಯಕ್ರಮದಡಿ ಪರಿಚಯಿಸಲಾಗಿದೆ. ಇದು ಚಿಕಿತ್ಸೆಯ ಅವಧಿಯನ್ನು 6 ತಿಂಗಳಿಗೆ ತಗ್ಗಿಸಲಿದೆ. 15,000ಕ್ಕೂ ಹೆಚ್ಚು ಎಂಡಿಆರ್‍/ಆರ್‍ಆರ್‍-ಟಿಬಿ ರೋಗಿಗಳಿಗೆ ಈಗಾಗಲೇ ಈ ಚಿಕಿತ್ಸೆಯನ್ನು ನೀಡಲು ಪ್ರಾರಂಭಿಸಲಾಗಿದೆ.

ಟಿಬಿ ತಡೆಗಟ್ಟುವ ಚಿಕಿತ್ಸೆ: ರೋಗ ಗುಣಪಡಿಸುವುದಷ್ಟೇ ಅಲ್ಲದೆ ತಡೆಗಟ್ಟುವುದು ಕೂಡ ಅಷ್ಟೇ ಮುಖ್ಯ ಎಂಬುದನ್ನು ಮನಗಂಡು, ಟಿಬಿ ಸೋಂಕು ಸಕ್ರಿಯ ಕಾಯಿಲೆಯಾಗಿ ಬದಲಾಗುವುದನ್ನು ತಡೆಯಲು ಅರ್ಹ ಫಲಾನುಭವಿಗಳಿಗೆ ಟಿಬಿ ತಡೆಗಟ್ಟುವ ಚಿಕಿತ್ಸೆಯನ್ನು ಒದಗಿಸಲಾಗುತ್ತದೆ. ಗುರಿ-ಆಧಾರಿತ ಹಾಗೂ ನವೀನ ವಿಧಾನದ ಮೂಲಕ, ಈ ಕಾರ್ಯಕ್ರಮವು ಕಳೆದ ಕೆಲವು ವರ್ಷಗಳಿಂದ ಮನೆಯ ಸದಸ್ಯರನ್ನು ಮತ್ತು ಎಚ್‌ಐವಿ ಪೀಡಿತರನ್ನು ಟಿಪಿಟಿ ಒದಗಿಸುವ ಮೂಲಕ ಯಶಸ್ವಿಯಾಗಿ ರಕ್ಷಿಸಿದೆ. ಈ ಹಸ್ತಕ್ಷೇಪವನ್ನು ಸಕ್ರಿಯ ಹಾಗೂ ತೀವ್ರವಾದ ಪ್ರಕರಣ ಪತ್ತೆಹಚ್ಚುವ ಅಭಿಯಾನಗಳೊಂದಿಗೆ ಸಂಯೋಜಿಸಲಾಗಿದೆ ಮತ್ತು ಇತರ ದುರ್ಬಲ ಗುಂಪುಗಳಿಗೂ ವಿಸ್ತರಿಸಲಾಗಿದೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಎಲ್ಲರಿಗೂ ಸಾರ್ವತ್ರಿಕ ಮತ್ತು ಕೈಗೆಟುಕುವ ಆರೋಗ್ಯ ಸೇವೆಯನ್ನು ಒದಗಿಸುವ ಬೃಹತ್ 'ಆಯುಷ್ಮಾನ್ ಭಾರತ್' ಯೋಜನೆಯ ಅಡಿಯಲ್ಲಿ ಬರುವ ಸಮುದಾಯ ಆರೋಗ್ಯ ಕೇಂದ್ರಗಳಾಗಿವೆ. ಅಕ್ಟೋಬರ್ 13, 2026 ರ ಹೊತ್ತಿಗೆ ಭಾರತದಲ್ಲಿ ಒಟ್ಟು 1,87,250 ಆಯುಷ್ಮಾನ್ ಆರೋಗ್ಯ ಮಂದಿರಗಳಿವೆ – ಇವುಗಳಲ್ಲಿ ಉಪ-ಆರೋಗ್ಯ ಕೇಂದ್ರಗಳು, ಪ್ರಾಥಮಿಕ ಆರೋಗ್ಯ ಕೇಂದ್ರಗಳು, ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು, ಆಯುಷ್ (ಆಯುರ್ವೇದ, ಯೋಗ ಮತ್ತು ನುಚುಪತಿ, ಯುನಾನಿ, ಸಿದ್ಧ ಮತ್ತು ಹೋಮಿಯೋಪತಿ) ಕೇಂದ್ರಗಳು ಮತ್ತು ನಗರ ಆರೋಗ್ಯ ಮತ್ತು ಸ್ವಾಸ್ಥ್ಯ ಕೇಂದ್ರಗಳು ಸೇರಿವೆ. ಟಿಬಿ ಲಕ್ಷಣಗಳನ್ನು ತೋರಿಸುವ ವ್ಯಕ್ತಿಗಳು ರೋಗನಿರ್ಣಯಕ್ಕಾಗಿ ಈ ಕೇಂದ್ರಗಳಿಗೆ ಭೇಟಿ ನೀಡಬಹುದು.

ಹಿಮಾಚಲ ಪ್ರದೇಶದ ಕುಲ್ಲು ಜಿಲ್ಲೆಯ ಆಯುಷ್ಮಾನ್ ಆರೋಗ್ಯ ಮಂದಿರವೊಂದರಲ್ಲಿ ಆರೋಗ್ಯ ಕಾರ್ಯಕರ್ತರು ಮಹಿಳೆಯರಿಗೆ ಟಿಬಿ ಮತ್ತು ಇತರ ಕಾಯಿಲೆಗಳ ತಪಾಸಣೆ ನಡೆಸುತ್ತಿದ್ದಾರೆ (ಸೆಪ್ಟೆಂಬರ್ 20, 2025) – ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ

ತಾಂತ್ರಿಕ ಮೂಲಸೌಕರ್ಯ

ಕ್ಷಯರೋಗವನ್ನು (ಟಿಬಿ) ಆರಂಭಿಕ ಹಂತದಲ್ಲೇ ಪತ್ತೆಹಚ್ಚಲು ಮತ್ತು ಉತ್ತಮ ಆರೈಕೆ ಒದಗಿಸಲು, ಭಾರತದಲ್ಲಿ ವಿಶ್ವದಲ್ಲೇ ಬೃಹತ್‍ ಜಾಲವಿದೆ – ಇದರಡಿ 9,800ಕ್ಕೂ ಹೆಚ್ಚು ಕ್ಷಿಪ್ರ ಆಣ್ವಿಕ ಪರೀಕ್ಷಾ ಸೌಲಭ್ಯಗಳು ಮತ್ತು 107 ಕಲ್ಚರ್ ಹಾಗೂ ಔಷಧ ಸಂವೇದನಾಶೀಲತಾ ಪರೀಕ್ಷಾ ಪ್ರಯೋಗಾಲಯಗಳು ಕಾರ್ಯನಿರ್ವಹಿಸುತ್ತಿವೆ. ಇದರೊಂದಿಗೆ ಇತರೆ ಪ್ರಮುಖ ತಾಂತ್ರಿಕ ಉಪಕರಣಗಳು ಇಲ್ಲಿವೆ:

• ಕೈಯಲ್ಲೇ ಹಿಡಿಯಬಹುದಾದಎಐ-ಸಮರ್ಥಿತ ಎಕ್ಸ್‌ರೇ ಯೂನಿಟ್‌ಗಳು: ಸಮುದಾಯ ಮಟ್ಟದ ತಪಾಸಣೆಗಾಗಿ 500ಕ್ಕೂ ಹೆಚ್ಚು ಹ್ಯಾಂಡ್‌ಹೆಲ್ಡ್ ಚೆಸ್ಟ್ ಎಕ್ಸ್‌ರೇ ಯೂನಿಟ್‌ಗಳನ್ನು ಬಳಸಲಾಗುತ್ತಿದ್ದು, ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಹೆಚ್ಚುವರಿಯಾಗಿ 1,500 ಯೂನಿಟ್‌ಗಳನ್ನು ತಲುಪಿಸಲಾಗುತ್ತಿದೆ.
• ನಿಕ್ಷಯ್ ಡಿಜಿಟಲ್ ವೇದಿಕೆ: ಪೌಷ್ಟಿಕಾಂಶದ ಬೆಂಬಲಕ್ಕಾಗಿ ನೇರ ನಗದು ವರ್ಗಾವಣೆಯನ್ನು ಈ ಡಿಜಿಟಲ್ ವೇದಿಕೆಯು ಸುಲಭಗೊಳಿಸುತ್ತದೆ.
• ಎಕ್ಸ್‌ರೇ ತಪಾಸಣೆಯಲ್ಲಿ 34 ಪಟ್ಟು ಏರಿಕೆ: ದೇಶಾದ್ಯಂತ ದೊಡ್ಡ ಪ್ರಮಾಣದಲ್ಲಿ ಹ್ಯಾಂಡ್‌ಹೆಲ್ಡ್ ಎಕ್ಸ್‌ರೇ ಯೂನಿಟ್‌ಗಳನ್ನು ನಿಯೋಜಿಸಿರುವುದರಿಂದ ಈ ಗಮನಾರ್ಹ ಪ್ರಗತಿ ಸಾಧ್ಯವಾಗಿದೆ.
• ಟಿಬಿ ಮುಕ್ತ ಭಾರತ ಆ್ಯಪ್ ಮತ್ತು 'ಖುಷಿ' ಚಾಟ್‌ಬಾಟ್: ಪ್ರಗತಿಯನ್ನು ಟ್ರ್ಯಾಕ್ ಮಾಡಲು, ರೋಗಲಕ್ಷಣಗಳ ಕುರಿತು ನಾಗರಿಕರಿಗೆ ಮಾರ್ಗದರ್ಶನ ನೀಡಲು ಮತ್ತು ಹತ್ತಿರದ ರೋಗನಿರ್ಣಯ ಕೇಂದ್ರಗಳನ್ನು ಪತ್ತೆಹಚ್ಚಲು ಎಐ-ಚಾಲಿತ ಚಾಟ್‌ಬಾಟ್ ಅನ್ನು ಒಳಗೊಂಡ ಹೊಸ ಡಿಜಿಟಲ್ ವೇದಿಕೆಯಾಗಿದೆ.
• ಸಾಮರ್ಥ್ಯ ವರ್ಧನೆ: ಟ್ರುಯೇಂಟ್‍ ಮತ್ತು ಸಿಬಿಎನ್‍ಎಎಟಿ ರೋಗನಿರ್ಣಯ ಯಂತ್ರಗಳ ವಿಸ್ತರಣೆಯ ಜೊತೆಗೆ, ರಾಷ್ಟ್ರೀಯ ಆರೋಗ್ಯ ಮಿಷನ್ ಅಡಿಯಲ್ಲಿ ರೇಡಿಯೋಗ್ರಾಫರ್ ಹುದ್ದೆಗಳನ್ನು ಸಚಿವಾಲಯವು ವಿಸ್ತರಿಸಿದೆ.

ಕೃತಕ ಬುದ್ಧಿಮತ್ತೆ ಆಧಾರಿತ ಉಪಕ್ರಮಗಳು

ಆರೋಗ್ಯ ಸೇsವೆಗಳ ವಿತರಣೆಯಲ್ಲಿ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುವ ಮೂಲಕ ರೋಗಿಗಳ ಆರೈಕೆಯ ವೇಗ ಮತ್ತು ಗುಣಮಟ್ಟವನ್ನು ಸುಧಾರಿಸಲು ಸರ್ಕಾರವು ಕ್ಷಯರೋಗದ (ಟಿಬಿ) ಪತ್ತೆ, ರೋಗನಿರ್ಣಯ ಮತ್ತು ಚಿಕಿತ್ಸೆಗಾಗಿ ಕೃತಕ ಬುದ್ಧಿಮತ್ತೆ ವ್ಯವಸ್ಥೆಗಳನ್ನು ಬಳಸಿಕೊಳ್ಳುತ್ತಿದೆ. ಪ್ರಮುಖ ಉಪಕ್ರಮಗಳು ಇಲ್ಲಿವೆ:

ಕ್ಷಯರೋಗ ನಿರ್ಮೂಲನೆಯತ್ತ ಭಾರತದ ಹೆಜ್ಜೆ

ಟಿಬಿ ಪ್ರಕರಣಗಳಲ್ಲಿ ಭಾರತದಲ್ಲಿ ನಿರಂತರವಾಗಿ ಕಂಡುಬರುತ್ತಿರುವ ಇಳಿಕೆಯು, ದೃಢಸಂಕಲ್ಪ, ಸಮುದಾಯದ ಸಹಭಾಗಿತ್ವ ಮತ್ತು ಬಲವಾದ ಸಾರ್ವಜನಿಕ ಆರೋಗ್ಯ ಕ್ರಮಗಳು ನಿಜಕ್ಕೂ ದೊಡ್ಡ ಬದಲಾವಣೆ ತರಬಲ್ಲವು ಎಂಬುದಕ್ಕೆ ಪ್ರಬಲ ನಿದರ್ಶನವಾಗಿದೆ. ಮುಂದುವರಿದ ಜಾಗರೂಕತೆ, ವಿಸ್ತರಿಸಲ್ಪಟ್ಟ ಆರೋಗ್ಯ ಸೇವೆಗಳು ಮತ್ತು ಸಾಮೂಹಿಕ ಜವಾಬ್ದಾರಿಯೊಂದಿಗೆ, 'ಟಿಬಿ ಮುಕ್ತ ಭಾರತ' ಎಂಬುದು ಕೇವಲ ಒಂದು ಗುರಿಯಷ್ಟೇ ಅಲ್ಲ, ಬದಲಿಗೆ ನೈಜವಾಗಿ ಸಾಧಿಸಬಹುದಾದ ಭವಿಷ್ಯದತ್ತ ದೇಶವು ವೇಗವಾಗಿ ಸಾಗುತ್ತಿದೆ.

ಟಿಬಿ ಕುರಿತು ಅರಿವು ಮೂಡಿಸಲು ಮತ್ತು ಕ್ಷಯರೋಗ ನಿರ್ಮೂಲನೆಯಲ್ಲಿ ಸಮುದಾಯಗಳನ್ನು ಒಗ್ಗೂಡಿಸಲು 'ಜೋಷ್' ಸಾಮಾಜಿಕ ಮಾಧ್ಯಮ ಅಭಿಯಾನವು ಶ್ರಮಿಸುತ್ತಿದೆ. ಎಲ್ಲಾ ಹಂತದ ಆರೋಗ್ಯ ಸಂಸ್ಥೆಗಳು, ಯುವಜನತೆ ಮತ್ತು ಸಮುದಾಯಗಳನ್ನು ಒಳಗೊಂಡ ಈ ಎಲ್ಲಾ ಉಪಕ್ರಮಗಳ ಮೂಲಕ, 'ವಿಕಸಿತ ಭಾರತ 2047' ಕನಸನ್ನು ನನಸಾಗಿಸಲು ಅಪಾಯಕಾರಿ ಹಾಗೂ ವ್ಯಾಪಕವಾಗಿರುವ ಈ ರೋಗವನ್ನು ತೊಡೆದುಹಾಕಲು ಭಾರತವು ಸಜ್ಜಾಗಿದೆ.

References

Ministry of Health and Family Welfare

https://www.pib.gov.in/PressReleasePage.aspx?PRID=2189415

https://www.pib.gov.in/PressReleasePage.aspx?PRID=2275402&reg=1&lang=1

https://www.pib.gov.in/PressReleasePage.aspx?PRID=2114549

https://www.pib.gov.in/PressReleasePage.aspx?PRID=1808582

https://www.pib.gov.in/PressReleasePage.aspx?PRID=2184456

https://www.pib.gov.in/PressReleasePage.aspx?PRID=2081662

https://mohfw.gov.in/?q=en/basicpage-

https://tbcindia.mohfw.gov.in/national-strategic-plan-to-end-tb-in-india-2020-25/

https://dghs.mohfw.gov.in/national-tuberculosis-elimination-programme.php

https://tbcindia.mohfw.gov.in/concept-note/

https://aam.mohfw.gov.in/

https://tbcindia.mohfw.gov.in/wp-content/uploads/2024/10/TB-Report_for-Web_08_10-2024-1.pdf

https://mohfw.gov.in/?q=/press-info/7783

https://www.mohfw.gov.in/?q=en/pressrelease-217

https://tbcindia.mohfw.gov.in/wp-content/uploads/2023/05/4193711960Social-action-plan-2013-Final-7th-Jan-14.pdf

https://tbcindia.mohfw.gov.in/wp-content/uploads/2023/05/4773363959TOG-Chapter-1-Introduction.pdf

PIB Backgrounder

        https://www.pib.gov.in/PressReleasePage.aspx?PRID=2244661&reg=3&lang=1

Click to see pdf

*****