पत्र सूचना कार्यालय

ആമുഖം

2017 ജൂലൈ 1-ന് അവതരിപ്പിച്ച ജിഎസ്ടി (ചരക്ക് സേവന നികുതി), കേന്ദ്ര-സംസ്ഥാന ഗവൺമെന്റുകളുടെ നിരവധി നികുതികളെ ഒരു പൊതു ചട്ടക്കൂടിന് കീഴിൽ കൊണ്ടുവന്നു. ഇന്ത്യയുടെ പരിഷ്കരണ യാത്രയിലെ ഒരു നാഴികക്കല്ലായിരുന്നു ഇത്. “ഒരു രാജ്യം, ഒരു നികുതി” എന്ന തത്വത്തിന് ഇത് പ്രാബല്യം നൽകി. കൂടാതെ, സംയോജിത നികുതി സംവിധാനത്തിലേക്ക് ഇന്ത്യയെ മുന്നോട്ട് നയിക്കാനും സഹായിച്ചു.

കഴിഞ്ഞ ഒൻപത് വർഷങ്ങളിലായി, ഏകീകൃത നടപടിക്രമങ്ങളും യുക്തിസഹമാക്കിയ നികുതി നിരക്കുകളും കൂടുതൽ സുതാര്യതയ്ക്കും ഉത്തരവാദിത്വത്തിനും സാമ്പത്തിക വളർച്ചയ്ക്കും പിന്തുണ നൽകിയിട്ടുണ്ട്. ‘ഏക് ഭാരത് - ശ്രേഷ്ഠ ഭാരത്’ എന്ന കാഴ്ചപ്പാടിനും ഇവ കൂടുതൽ കരുത്തേകി.

ഈ പുരോഗതിയുടെ തുടർച്ചയായി, 56-ാമത് ജിഎസ്ടി കൗൺസിൽ യോഗം നാല് തലത്തിലുള്ള ജിഎസ്ടി നികുതി ഘടന ലളിതമാക്കുന്നതിനുള്ള അടുത്ത തലമുറ പരിഷ്കാരങ്ങൾ ശുപാർശ ചെയ്തു. പുതിയ ഘടനയിൽ 5%, 18% എന്നീ രണ്ട് പ്രധാന നികുതി നിരക്കുകളും തിരഞ്ഞെടുത്ത ചില ചരക്കുകൾക്കും സേവനങ്ങൾക്കുമായി പ്രത്യേകമായി 40% നികുതി നിരക്കും ഉൾപ്പെടുന്നു.

2026 ഒക്ടോബറിൽ നടന്ന 57-ാമത് യോഗത്തിലും ഈ പരിഷ്കരണ പ്രക്രിയ തുടർന്നു. കൂടുതൽ നടപടിക്രമ പരിഷ്കാരങ്ങൾ, തിരഞ്ഞെടുത്ത ചില ചരക്കുകളെയും സേവനങ്ങളെയും സംബന്ധിച്ച വ്യക്തതകൾ, വ്യാപാരം സുഗമമാക്കുന്നതിനും നികുതി പാലന നടപടികൾ കാര്യക്ഷമമാക്കുന്നതിനുമുള്ള നടപടികൾ എന്നിവ സമിതി ശുപാർശ ചെയ്തു.

കണക്കുകളിലെ ജിഎസ്ടി: വിശാലമായ വ്യാപ്തി, ഗണ്യമായ നികുതി വരുമാനം

വിപുലമായ നികുതിദായക അടിത്തറ: രജിസ്റ്റർ ചെയ്ത നികുതിദായകരുടെ എണ്ണം 2017-ൽ ഏകദേശം 60 ലക്ഷമായിരുന്നത് 2026 സെപ്റ്റംബർ വരെ ഏകദേശം 1.70 കോടിയായി വർദ്ധിച്ചു.

വൻതോതിലുള്ള ഡിജിറ്റൽ നികുതി സംവിധാനം: 2026 സെപ്റ്റംബർ 30-ലെ കണക്കനുസരിച്ച്, ജിഎസ്ടി സംവിധാനം ആകെ 3,053 കോടി ഇൻവോയ്സ് അപ്‌ലോഡുകളും 833.82 കോടി ഇ-വേ ബില്ലുകളും തയ്യാറാക്കിയിട്ടുണ്ട് 

ശക്തമായ വരുമാന വളർച്ച: 2026 ഏപ്രിൽ മുതൽ സെപ്റ്റംബർ വരെയുള്ള കാലയളവിൽ മൊത്തം ജിഎസ്ടി വരുമാനം ഏകദേശം ₹12.46 ലക്ഷം കോടി രൂപയിലെത്തി. മുൻവർഷത്തെ ഇതേ കാലയളവിനെ അപേക്ഷിച്ച് 11.6% വർദ്ധനയാണ് രേഖപ്പെടുത്തിയത്.

ജിഎസ്ടി രജിസ്ട്രേഷൻ ലളിതവും വേഗത്തിലുള്ളതും കൂടുതൽ കൃത്യവുമാക്കൽ 

കൂടുതൽ കൃത്യതയുള്ളതും നികുതിദായക സൗഹൃദവുമായ ജിഎസ്ടി രജിസ്ട്രേഷൻ ചട്ടക്കൂട് സൃഷ്ടിക്കുകയാണ് ജിഎസ്ടി കൗൺസിലിന്റെ നിർദേശങ്ങളുടെ ലക്ഷ്യം. സുഗമമായ ബിസിനസ് പ്രവർത്തനങ്ങളെ പിന്തുണയ്ക്കാനും ഔപചാരിക സമ്പദ്‌വ്യവസ്ഥയിൽ കൂടുതൽ പേർ പങ്കാളികളാകുന്നത് പ്രോത്സാഹിപ്പിക്കാനും ഇവ ലക്ഷ്യമിടുന്നു.

 രജിസ്ട്രേഷൻ നടപടിക്രമത്തിലെ പരിഷ്കാരങ്ങൾ:

ജിഎസ്ടി കൗൺസിൽ താഴെപ്പറയുന്ന കാര്യങ്ങൾ ശുപാർശ ചെയ്തു:-

a. രജിസ്ട്രേഷൻ അപേക്ഷകളിലെ നടപടികൾ പൂർത്തിയാക്കുന്നതിനായി പതിവായി ഉന്നയിക്കുന്ന ചോദ്യങ്ങൾക്കുള്ള ഉത്തരങ്ങൾ (FAQs) ഉൾപ്പെടുന്ന സമഗ്രവും വിശദവുമായ രേഖകൾ പുറത്തിറക്കും.

b. നികുതിദായകർക്കും നികുതി ഉദ്യോഗസ്ഥർക്കും കൂടുതൽ വ്യക്തത ലഭിക്കുന്നതിനും അപേക്ഷ സമർപ്പിക്കുന്ന നടപടിക്രമം ലളിതമാക്കുന്നതിനുമായി രജിസ്ട്രേഷൻ അപേക്ഷാ ഫോമിൽ ഭേദഗതി വരുത്തും.

c. രജിസ്ട്രേഷൻ അപേക്ഷകൾ സമർപ്പിക്കുന്നതിനായി ജിഎസ്ടി പോർട്ടലിൽ ഉപയോക്തൃ സൗഹൃദമായ ഇന്റർഫേസ് ഒരുക്കും. വ്യക്തമായ നാവിഗേഷൻ മാർഗങ്ങൾ, ഡ്രോപ്പ്-ഡൗൺ ലിസ്റ്റുകൾ, ടൂൾ- ടിപ്പുകൾ, സന്ദർഭാനുസൃത മാർഗനിർദേശങ്ങൾ എന്നിവ ഇതിൽ ഉൾപ്പെടും.

എന്താണ് ഇൻപുട്ട് ടാക്സ് ക്രെഡിറ്റ് ?

രജിസ്റ്റർ ചെയ്ത വ്യക്തിക്ക്, സ്വീകരിച്ച ചരക്കുകൾക്കോ സേവനങ്ങൾക്കോ നൽകിയ നികുതിയുടെ ക്രെഡിറ്റ് അവകാശപ്പെടാൻ കഴിയുന്നതാണ് ഇൻപുട്ട് ടാക്സ് ക്രെഡിറ്റ് (Input Tax Credit).

ഉദാഹരണത്തിന്: ഒരു നിർമ്മാതാവ് അസംസ്കൃത വസ്തുക്കൾ വാങ്ങിയപ്പോൾ ₹10,000 നികുതിയായി അടയ്ക്കുകയും ഉൽപ്പന്നങ്ങളുടെ വിൽപ്പനയിലൂടെ ₹25,000 നികുതിയായി ഈടാക്കുകയും ചെയ്തുവെന്ന് കരുതുക. അപ്പോൾ ഫലത്തിൽ മൊത്തം നികുതി അടയ്ക്കേണ്ട തുക ₹15,000 ആയിരിക്കും. കൂടാതെ നിർമ്മാതാവിന് അസംസ്കൃത വസ്തുവിന്മേൽ നൽകിയ നികുതി ക്ലെയിം ചെയ്യാവുന്നതുമാണ്.

ഈ നടപടികൾ രജിസ്ട്രേഷൻ അപേക്ഷകൾ ശരിയായ രീതിയിൽ സമർപ്പിക്കാൻ സഹായിക്കുകയും അത്തരം അപേക്ഷകളുടെ നിരസിക്കലുകളും അതിന്മേൽ കൂടുതൽ വിവരങ്ങൾ ആവശ്യപ്പെട്ടുകൊണ്ടുള്ള അന്വേഷണങ്ങളും കുറയ്ക്കുകയും ചെയ്യും.

 സ്വയമേവയുള്ള അംഗീകാരം

രജിസ്‌ട്രേഷൻ വിവരങ്ങൾ എളുപ്പത്തിലും തത്സമയത്തോട് അടുത്ത രീതിയിലും പുതുക്കുന്നതിനായി, രജിസ്ട്രേഷൻ വിവരങ്ങളിലെ ഭേദഗതികൾക്ക് സ്വയമേവയുള്ള അംഗീകാരം നൽകാൻ കൗൺസിൽ നിർദ്ദേശിക്കുന്നു. പ്രധാന ബിസിനസ്സ് സ്ഥലവുമായി ബന്ധപ്പെട്ട മാറ്റങ്ങൾ ഒഴികെയുള്ളവ പോർട്ടലിൽ ഇത് വഴി ലഭ്യമാക്കും.

എന്താണ് പ്രധാന ബിസിനസ്സ് സ്ഥലം ?

2017-ലെ സി.ജി.എസ്.ടി (CGST) നിയമത്തിലെ സെക്ഷൻ 2(89) ഇത് താഴെ പറയുന്ന രീതിയിൽ നിർവ്വചിക്കുന്നു: "'പ്രധാന ബിസിനസ്സ് സ്ഥലം' എന്നാൽ രജിസ്ട്രേഷൻ സർട്ടിഫിക്കറ്റിൽ പ്രധാന ബിസിനസ്സ് സ്ഥലമായി വ്യക്തമാക്കിയിട്ടുള്ള സ്ഥലമാണ്".

സ്വയമേവ രജിസ്റ്റർ ചെയ്ത നികുതിദായകർക്ക്, PPoB ഉൾപ്പെടെയുള്ള എല്ലാ രജിസ്ട്രേഷൻ വിവരങ്ങളിലെയും ഭേദഗതികൾ സ്വയമേവ തന്നെ അംഗീകരിക്കപ്പെടും.

രജിസ്ട്രേഷൻ റദ്ദാക്കൽ പ്രക്രിയ:

രജിസ്ട്രേഷൻ റദ്ദാക്കൽ പ്രക്രിയ ലളിതമാക്കുന്നതിനായി, 2017-ലെ സി.ജി.എസ്.ടി നിയമത്തിലും 2017-ലെ സി.ജി.എസ്.ടി ചട്ടങ്ങളിലും ഭേദഗതികൾ വരുത്താൻ കൗൺസിൽ ശുപാർശ ചെയ്തു. നിർദ്ദേശത്തിൽ താഴെ പറയുന്നവ ഉൾപ്പെടുന്നു:

 a. സ്വമേധയാ ഉള്ള റദ്ദാക്കൽ: ഉദ്യോഗസ്ഥ ഇടപെടൽ കുറയ്ക്കുന്നതിനായി ഘട്ടങ്ങളായുള്ള പരിഷ്കാരങ്ങൾ കൗൺസിൽ നിർദ്ദേശിച്ചു.

   * ഘട്ടം 1:

     കുടിശ്ശികയുള്ള റിട്ടേണുകൾ സമർപ്പിക്കുകയും എല്ലാ കുടിശ്ശികകളും അടയ്ക്കുകയും ചെയ്ത ശേഷം റദ്ദാക്കൽ അപേക്ഷകൾ സ്വയമേവ അംഗീകരിക്കപ്പെടും.

     * ഏതെങ്കിലും ഒരു മാസത്തിൽ ₹2.5 ലക്ഷത്തിൽ കൂടുതൽ ഐ.ടി.സി (ITC) കൈമാറ്റം ചെയ്യാത്ത നികുതിദായകർക്ക് ഇത് ബാധകമായിരിക്കും.

     * നിർദ്ദിഷ്ട സമയത്തിനുള്ളിൽ അന്തിമ റിട്ടേൺ സമർപ്പിക്കുകയാണെങ്കിൽ ഒരു മാസത്തിൽ ഐ.ടി.സി ₹2.5 ലക്ഷം കവിഞ്ഞ കേസുകളിലും ഇത് ബാധകമാകും.

   * ഘട്ടം 2:

      കുടിശ്ശികയുള്ള എല്ലാ റിട്ടേണുകളും സമർപ്പിക്കുകയും എല്ലാ കുടിശ്ശികകളും അടയ്ക്കുകയും ചെയ്തു കഴിഞ്ഞാൽ, രജിസ്ട്രേഷൻ റദ്ദാക്കുന്നതിനുള്ള എല്ലാ അപേക്ഷകളും സിസ്റ്റം സ്വയം അംഗീകരിക്കും. അപേക്ഷയിൽ തന്നെ FORM GSTR-10-ന്റെ വിവരങ്ങൾ നൽകാൻ കഴിയുന്നവിധം FORM GST REG-16 ഭേദഗതി ചെയ്യും. 

 b.സ്വമേധയാ ഉള്ള നടപടി വഴിയുള്ള റദ്ദാക്കൽ: റദ്ദാക്കൽ പ്രക്രിയ വേഗത്തിലാക്കാൻ, നികുതി ഉദ്യോഗസ്ഥർ നടത്തുന്ന രജിസ്ട്രേഷൻ റദ്ദാക്കലിനുള്ള ചില കാരണങ്ങൾ ഒഴിവാക്കുകയും അതിലൂടെ ഇടപെടലുകൾ കുറയ്ക്കുകയും ചെയ്യും.

വ്യവസ്ഥകൾ പാലിക്കാതിരിക്കൽ, പിന്നീട് അവ പാലിക്കൽ എന്നിവയുടെ അടിസ്ഥാനത്തിൽ റദ്ദാക്കലിനും പുനഃസ്ഥാപിക്കലിനും ഒരു സിസ്റ്റം അധിഷ്ഠിത സംവിധാനം സൗകര്യമൊരുക്കും. നിർദ്ദിഷ്ട സമയത്തിനുള്ളിൽ റിട്ടേൺ സമർപ്പിക്കാതിരിക്കൽ, ബാങ്ക് അക്കൗണ്ട് വിവരങ്ങൾ നൽകാതിരിക്കൽ എന്നീ വീഴ്ചകൾ ഈ സംവിധാനത്തിന്റെ പരിധിയിൽ വരുന്നു.

ഇ-കൊമേഴ്സ് വിൽപ്പനക്കാർക്കുള്ള പരിഷ്കാരം:

ഇ-കൊമേഴ്‌സ് പ്ലാറ്റ്‌ഫോമുകളിലൂടെ സാധനങ്ങളോ സേവനങ്ങളോ വിതരണം ചെയ്യുന്ന ചെറുകിട നികുതിദായകർക്കായി ലളിതമായ രജിസ്‌ട്രേഷൻ സംവിധാനം GST കൗൺസിൽ നിർദേശിച്ച പരിഷ്കാരങ്ങളിൽ ഉൾപ്പെടുന്നു.

പ്രതിമാസം ₹2.5 ലക്ഷത്തിൽ കൂടുതൽ ഐ.ടി.സി കൈമാറാത്ത (സ്റ്റോക്ക് ട്രാൻസ്ഫർ ഒഴികെ) ചെറുകിട വിൽപ്പനക്കാർക്ക് അവരുടെ സ്വന്തം സംസ്ഥാനം/കേന്ദ്രഭരണ പ്രദേശത്തിന് പുറത്തുള്ള മറ്റ് സംസ്ഥാനങ്ങളിൽ/കേന്ദ്രഭരണ പ്രദേശങ്ങളിൽ പാൻ അടിസ്ഥാനമാക്കിയുള്ള ലളിതമായ രജിസ്ട്രേഷൻ തിരഞ്ഞെടുക്കാം.

 നേരിട്ടുള്ള സാന്നിധ്യമില്ലാത്ത ഒരു സംസ്ഥാനത്ത്/കേന്ദ്രഭരണ പ്രദേശത്ത് ഇലക്ട്രോണിക് കൊമേഴ്സ് ഓപ്പറേറ്ററുടെ (ECO) വെയർഹൗസ് PPoB ആയി പ്രഖ്യാപിക്കാം.

മറ്റ് സംസ്ഥാനങ്ങളിൽ ബിസിനസ്സ് സ്ഥാപിക്കാൻ സഹായിക്കുന്നതിലൂടെ ചെറുകിട ഇ-കൊമേഴ്സ് വിൽപ്പനക്കാർക്ക് ഇത് ബിസിനസ്സ് ചെയ്യുന്നത് കൂടുതൽ എളുപ്പമാക്കും.

കൃത്യതയും നിയമപാലനവും മെച്ചപ്പെടുത്തുന്നതിനുള്ള GST റിട്ടേൺ പരിഷ്കാരങ്ങൾ

വിതരണ ശൃംഖലയിലുടനീളം ഉണ്ടാകുന്ന പൊരുത്തക്കേടുകൾ കുറയ്ക്കുന്നതിനും ഐ.ടി.സിയുടെ കൃത്യത മെച്ചപ്പെടുത്തുന്നതിനുമായി റിട്ടേൺ സമർപ്പണ പ്രക്രിയ കാര്യക്ഷമമാക്കാൻ കൗൺസിൽ ശുപാർശ ചെയ്തു. ഇത് നികുതി ബാധ്യതയുടെയും ഐ.ടി.സിയുടെയും കൂടുതൽ കൃത്യമായ റിപ്പോർട്ടിംഗിന് വഴിയൊരുക്കുകയും നിയമപാലന ഭാരം കുറയ്ക്കുകയും ചെയ്യും. കൗൺസിലിന്റെ നിർദ്ദേശങ്ങൾ താഴെ പറയുന്നവയാണ്:

 a. ജി.എസ്.ടി.ആർ-3ബി (GSTR-3B)-യുമായി മികച്ച പൊരുത്തപ്പെടൽ സാധ്യമാക്കുന്നതിന് ജി.എസ്.ടി.ആർ-1/1എ/ഐ.എഫ്.എഫ് (GSTR-1/1A/IFF) മെച്ചപ്പെടുത്തും.

 b."റിവേഴ്സ് ചാർജ്ജ് അടിസ്ഥാനത്തിൽ അടച്ച നികുതിയുടെയും ക്ലെയിം ചെയ്ത ഇൻപുട്ട് ടാക്സ് ക്രെഡിറ്റിന്റെയും ഇലക്ട്രോണിക് സ്റ്റേറ്റ്മെന്റ്" എന്ന സൗകര്യം, റിവേഴ്സ് ചാർജ്ജിന് വിധേയമായ വിതരണങ്ങളിലെ നികുതി ബാധ്യതയുടെയും ഐ.ടി.സിയുടെയും കൃത്യമായ റിപ്പോർട്ടിംഗിന് സഹായിക്കും.

 C. GSTR-1/1A/IFF-ൽ റിപ്പോർട്ട് ചെയ്ത വിവരങ്ങളുമായി പൊരുത്തപ്പെടുന്ന രീതിയിൽ GSTR-3B-യിലെ ബാധ്യത റിപ്പോർട്ട് ചെയ്യുന്നതിനും/തിരുത്തുന്നതിനും ഒരു സംവിധാനം നടപ്പാക്കും.

 d. പണം അടച്ചതിന്റെ ഇൻവോയ്സ് വിവരങ്ങൾ പ്രഖ്യാപിക്കാൻ അനുവദിക്കുന്നതിനായി GST DRC-03 ഭേദഗതി ചെയ്യും.

 e. ഇൻവോയ്സ് മാനേജ്മെന്റ് സിസ്റ്റം (IMS), ഐ.ടി.സി റിപ്പോർട്ടിംഗിനായി രേഖകൾ സ്വീകരിക്കാനോ നിരസിക്കാനോ മാറ്റിവയ്ക്കാനോ സ്വീകർത്താക്കളെ അനുവദിക്കും.

f. ഒരു ഇലക്ട്രോണിക് ക്രെഡിറ്റ് റിവേഴ്സൽ ആൻഡ് റീക്ലെയിം സ്റ്റേറ്റ്മെന്റ്, തിരികെ നൽകിയതും വീണ്ടും ക്ലെയിം ചെയ്തതുമായ ഐ.ടി.സിയുടെ കൃത്യമായ റിപ്പോർട്ടിംഗിന് സഹായിക്കും.

 g. GSTR-2B-ൽ ലഭ്യമായ ഐ.ടി.സിയുമായി പൊരുത്തപ്പെടുന്ന തരത്തിൽ GSTR-3B-യിൽ റിപ്പോർട്ട് ചെയ്ത ഐ.ടി.സി റിപ്പോർട്ട് ചെയ്യുന്നതിനും/തിരുത്തുന്നതിനും ഒരു സംവിധാനം സൗകര്യമൊരുക്കും.

  h.GSTR-3B-3ബി-യിൽ ഐ.ടി.സി റിപ്പോർട്ട് ചെയ്യുന്നതിനെയും അത് തിരികെ നൽകുന്നതിനെയും (reversal) സംബന്ധിച്ച് സർക്കുലർ രൂപത്തിൽ വ്യക്തത വരുത്തും.

 നികുതി ബാധ്യതയും ഐ.ടി.സിയും തിരുത്തുന്നതിനുള്ള ബദൽ സംവിധാനം 2027 ഏപ്രിൽ റിട്ടേൺ കാലയളവ് മുതൽ നടപ്പിലാക്കാൻ നിർദ്ദേശിക്കുന്നു.

GSTR-1:

GSTR-1 എന്നത് സാധനങ്ങളുടെയും സേവനങ്ങളുടെയും അല്ലെങ്കിൽ രണ്ടിന്റെയും പുറത്തേക്കുള്ള വിതരണം നടത്തുന്ന രജിസ്റ്റർ ചെയ്ത നികുതിദായകർ ഇത് സംബന്ധിച്ച് സമർപ്പിക്കേണ്ട പ്രതിമാസ/ത്രൈമാസ സാധനങ്ങളുടെയും സേവനങ്ങളുടെയും പ്രസ്താവനയാണ്.

 ബാഹ്യ വിതരണങ്ങളെക്കുറിച്ചുള്ള വിവരങ്ങൾ ഇതിൽ ഉൾപ്പെടുന്നു.

 GSTR-1A:

GSTR-1-ൽ സമർപ്പിച്ചിട്ടുള്ള ഏതെങ്കിലും വിതരണ രേഖയിൽ ഭേദഗതി വരുത്തുകയോ പുതിയ വിതരണ രേഖ ചേർക്കുകയോ ചെയ്യേണ്ട നികുതിദായകർക്ക് GSTR-1A വഴി അത് ചെയ്യാൻ കഴിയും.

 IFF:

ഇൻവോയ്സ് സമർപ്പണ സൗകര്യം (Invoice Furnishing Facility – IFF) എന്നത് QRMP (ത്രൈമാസ റിട്ടേണും പ്രതിമാസ അടവും ) പദ്ധതിയിൽ ഉൾപ്പെട്ട നികുതിദായകർക്ക് നൽകുന്ന ഐച്ഛിക സൗകര്യമാണ്. ഒരു പാദത്തിലെ ആദ്യ രണ്ട് മാസങ്ങളിൽ (M1, M2) അവരുടെ പുറത്തേക്കുള്ള വിതരണങ്ങളുടെ വിവരങ്ങൾ സമർപ്പിക്കുന്നതിനും അതുവഴി സ്വീകർത്താക്കൾക്ക് ഇൻപുട്ട് ടാക്സ് ക്രെഡിറ്റ് കൈമാറുന്നതിനും ഈ സൗകര്യം സഹായിക്കുന്നു.

GSTR-3B:

ഇത് ലളിതമാക്കിയ സംഗ്രഹ റിട്ടേണാണ്. ഒരു നിശ്ചിത നികുതി കാലയളവിലെ GST ബാധ്യതകളുടെ സംഗ്രഹം, ഉപയോഗിച്ച ഇൻപുട്ട് ടാക്സ് ക്രെഡിറ്റ് (ITC) തുടങ്ങിയവ പ്രഖ്യാപിക്കുന്നതിനും ഈ ബാധ്യതകൾ അടച്ചുതീർക്കുന്നതിനുമാണ് ഈ റിട്ടേൺ ഉപയോഗിക്കുന്നത്.

 GST DRC-03:

ഇത് ഒരു പേയ്‌മെന്റ് ഫോമാണ്. GST നിയമപ്രകാരം അടയ്ക്കേണ്ട നികുതി, പലിശ, പിഴ, ഫീസ് അല്ലെങ്കിൽ മറ്റേതെങ്കിലും തുക അടയ്ക്കുന്നതിനായി നികുതിദായകർ ഈ ഫോം ഉപയോഗിക്കുന്നു.

 GSTR-2B:

GSTR-2B എന്നത് സ്വയമേവ തയ്യാറാക്കുന്ന ഇൻപുട്ട് ടാക്സ് ക്രെഡിറ്റ് (ITC) സ്റ്റേറ്റ്‌മെന്റാണ്. ഓരോ സാധാരണ നികുതിദായകന്റെയും വിതരണക്കാർ അതത് ഫോമുകളിൽ സമർപ്പിച്ച വിവരങ്ങളുടെ അടിസ്ഥാനത്തിൽ ഇത് തയ്യാറാക്കുന്നു. വിതരണക്കാർ സമർപ്പിച്ച ഓരോ രേഖയുടെയും അടിസ്ഥാനത്തിൽ നികുതിദായകന് ഇൻപുട്ട് ടാക്സ് ക്രെഡിറ്റ് ലഭ്യമാണോ അല്ലയോ എന്ന് ഈ സ്റ്റേറ്റ്‌മെന്റ് വ്യക്തമാക്കുന്നു.

 വേഗത്തിലുള്ളതും സിസ്റ്റം അധിഷ്ഠിതവുമായ നടപടിക്രമങ്ങളിലൂടെ GST റീഫണ്ടുകൾ കാര്യക്ഷമമാക്കൽ:

റീഫണ്ട് അപേക്ഷകൾ സിസ്റ്റം അധിഷ്ഠിതമായി പരിശോധിക്കുകയും അനുവദിക്കുകയും ചെയ്യുന്ന സംവിധാനം GST കൗൺസിൽ നിർദേശിച്ച പരിഷ്കാരങ്ങളിൽ ഉൾപ്പെടുന്നു. ഇതിലൂടെ റീഫണ്ട് നടപടികൾ വേഗത്തിലാക്കാനും കൂടുതൽ സുതാര്യത ഉറപ്പാക്കാനും മാനുഷിക ഇടപെടൽ കുറയ്ക്കാനും കഴിയും.

 ഘട്ടം 1 (Phase 1)

*അധികമായി ക്യാഷ് ലെഡ്ജറിൽ ശേഷിക്കുന്ന തുകയുടെ റീഫണ്ടുകൾ സ്വയമേവ അനുവദിക്കുന്ന സംവിധാനമുണ്ടാകും. ഇത് ബിസിനസുകൾക്ക് പണം വേഗത്തിൽ ലഭ്യമാക്കാൻ സഹായിക്കും.

* അപേക്ഷ സ്വീകരിച്ചതായി അറിയിക്കുന്നതിനുള്ള(അക്നോളജ്മെന്റ്) കാലയളവ് 15 ദിവസത്തിൽ നിന്ന് 10 ദിവസമായി കുറയ്ക്കും. മറുപടി നൽകാത്ത സാഹചര്യങ്ങളിൽ അപേക്ഷ സ്വീകരിച്ചതായി കണക്കാക്കും.

 അപകടസാധ്യതാ വിലയിരുത്തലിന്റെ അടിസ്ഥാനത്തിൽ, സീറോ റേറ്റഡ് വിതരണങ്ങൾ, വിപരീത തീരുവ ഘടന എന്നിവയുമായി ബന്ധപ്പെട്ട റീഫണ്ട് അപേക്ഷകളിൽ ആവശ്യപ്പെട്ട തുകയുടെ 90% അനുവദിക്കുമെന്ന് പ്രതീക്ഷിക്കുന്നു.

ഘട്ടം 2 (Phase 2)

i.പൂജ്യം നിരക്കിലുള്ള വിതരണങ്ങൾ, വിപരീത തീരുവ ഘടന എന്നിവയുമായി ബന്ധപ്പെട്ട റീഫണ്ട് അപേക്ഷകൾ സിസ്റ്റം പരിശോധിച്ച് സ്ഥിരീകരിച്ചശേഷം, നികുതി ഉദ്യോഗസ്ഥരുടെ ഇടപെടലില്ലാതെ അപേക്ഷ സ്വീകരിച്ചതായി സ്വയമേവ അറിയിക്കുന്ന സംവിധാനം നടപ്പിലാക്കും.

ഇത്തരത്തിൽ സ്വീകരിച്ചതായി അംഗീകരിച്ച അപേക്ഷകളിൽ, സീറോ റേറ്റഡ് വിതരണങ്ങളുമായി ബന്ധപ്പെട്ട റീഫണ്ട് അപേക്ഷകൾക്ക് മാത്രമായി, സിസ്റ്റം അപകടസാധ്യതകൾ തിരിച്ചറിയുകയും വിലയിരുത്തുകയും ചെയ്യുന്ന അടിസ്ഥാനത്തിൽ, കുടിശ്ശികയുള്ള തുകകളുണ്ടെങ്കിൽ അവ ക്രമീകരിച്ചശേഷം, ആവശ്യപ്പെട്ട മുഴുവൻ റീഫണ്ട് തുകയും നികുതി ഉദ്യോഗസ്ഥരുടെ ഇടപെടലില്ലാതെ സിസ്റ്റം സ്വയമേവ അനുവദിക്കും.

റീഫണ്ടുകൾ വേഗത്തിലാക്കുന്നതിനും നടപടിക്രമങ്ങൾ ലളിതമാക്കുന്നതിനുമുള്ള നടപടികൾ:

a.FORM GST RFD-01 ലെ റീഫണ്ട് അപേക്ഷയിൽ ഭേദഗതി: പൂസീറോ റേറ്റഡ് വിതരണങ്ങളുമായി, വിപരീത നികുതി ഘടനയുമായി ബന്ധപ്പെട്ട റീഫണ്ട് ക്ലെയിമുകളുടെ വിശദാംശങ്ങൾ സിസ്റ്റത്തിന് വായിക്കാനാകുന്ന രീതിയിൽ രേഖപ്പെടുത്താൻ ഇത് സഹായിക്കും.

b.2017-ലെ CGST ചട്ടങ്ങളിലെ ചട്ടം 89(4)(C) ൽ ഭേദഗതി: പൂജ്യം നികുതി നിരക്കുള്ള ചരക്ക് വിതരണത്തിന്റെ വിറ്റുവരവ് ആഭ്യന്തരമായി വിതരണം ചെയ്യുന്ന സമാന സാധനങ്ങളുടെ മൂല്യത്തിന്റെ 1.5 മടങ്ങ് ആയി പരിമിതപ്പെടുത്തിയിരുന്ന പരിധി ഇത് നീക്കം ചെയ്യും

c.2017-ലെ CGST നിയമത്തിലെ വകുപ്പ് 54(14) ൽ ഭേദഗതി: ₹1,000 എന്ന റീഫണ്ട് പരിധി, CGST, SGST/UTGST, IGST എന്നിവ ഉൾപ്പെടെയുള്ള ആകെ റീഫണ്ട് തുകയ്ക്ക്

എന്താണ് GST പ്രകാരമുള്ള സീറോ റേറ്റഡ് വിതരണം)?

സാധനങ്ങളുടെയും സേവനങ്ങളുടെയും കയറ്റുമതിയും പ്രത്യേക സാമ്പത്തിക മേഖലയുടെ (SEZ) ഡെവലപ്പർക്കോ SEZ യൂണിറ്റിനോ നടത്തുന്ന വിതരണങ്ങളും ഇതിൽ ഉൾപ്പെടുന്നു.

മുൻകൂർ നിക്ഷേപത്തിന്റെ റീഫണ്ടിനുള്ള പലിശ സംബന്ധിച്ച വ്യക്തത

a.2017-ലെ CGST നിയമത്തിലെ വകുപ്പ് 115 ൽ ഭേദഗതി: അപ്പീലുകൾ ഫയൽ ചെയ്യുന്നതിനായി അടച്ച പ്രീ-ഡെപ്പോസിറ്റ് തുകകളുടെ റീഫണ്ടുകൾക്ക് ബാധകമായ പലിശ നിരക്ക് വ്യക്തമാക്കുന്ന ഒരു സ്വതന്ത്ര വ്യവസ്ഥയായി ഇത് മാറ്റും. 

b.ഇത്തരം റീഫണ്ടുകൾക്ക് ബാധകമായ പലിശ നിരക്കുമായി ബന്ധപ്പെട്ട ആശങ്കകൾ വ്യക്തമാക്കുന്നതിനായി ഒരു സർക്കുലറും പുറപ്പെടുവിക്കും.

 തർക്കപരിഹാരം ലളിതമാക്കുന്നതിനും വ്യവഹാരങ്ങൾ കുറയ്ക്കുന്നതിനുമുള്ള പരിഷ്കാരങ്ങൾ:

നികുതി ഉദ്യോഗസ്ഥർക്കായി സമഗ്രമായ മാർഗനിർദേശങ്ങളടങ്ങിയ ഒരു സർക്കുലർ പുറപ്പെടുവിക്കാൻ GST കൗൺസിൽ ശുപാർശ ചെയ്തു. നികുതി ആവശ്യപ്പെടുന്ന നോട്ടീസുകൾ, തീർപ്പാക്കൽ ഉത്തരവുകൾ, അപ്പീൽ ഉത്തരവുകൾ എന്നിവയ്ക്കുള്ള നടപടിക്രമങ്ങൾ ലളിതമാക്കുന്നതും ഈ സർക്കുലറിൽ ഉൾപ്പെടും. തർക്കപരിഹാരം കാര്യക്ഷമമാക്കുന്നതിനും നികുതിപാലനത്തിന്റെ ഭാരം കുറയ്ക്കുന്നതിനും വ്യവഹാരങ്ങൾ കുറയ്ക്കുന്നതിനുമായി GST കൗൺസിൽ നിർദ്ദേശങ്ങൾ മുന്നോട്ടു വച്ചിട്ടുണ്ട്. മറ്റ് പരിഷ്കാരങ്ങൾ താഴെപ്പറയുന്നവയാണ്:

a.- ₹10,000-ൽ താഴെയുള്ള നികുതി തുകയ്ക്ക് കാരണം കാണിക്കൽ നോട്ടീസ് നൽകില്ല. ഈ വ്യവസ്ഥ പ്രാബല്യത്തിൽ വരുന്ന തീയതിയിൽ തീർപ്പാകാതെ കിടക്കുന്ന നോട്ടീസുകളും ₹10,000-ൽ താഴെയുള്ള തുകകൾ ഉൾപ്പെടുന്ന അപ്പീലുകളും, നോട്ടീസ് പുറപ്പെടുവിച്ച സമയത്ത് തന്നെ ₹10,000 എന്ന കുറഞ്ഞ പരിധി നിലവിലുണ്ടായിരുന്നുവെന്ന നിലയിൽ പരിഗണിച്ച് തീരുമാനിക്കും.

b. പിഴയ്ക്ക് പകരം ‘ചാർജ്’ എന്ന പദം ഉപയോഗിക്കും: നിശ്ചിത സമയപരിധിക്കുള്ളിൽ മുഴുവൻ നികുതി തുകയും അതിന്റെ പലിശയും പിഴയും സ്വമേധയാ അടയ്ക്കുന്ന സാഹചര്യങ്ങളിൽ പിഴയെ ‘ചാർജ്’ എന്ന് വിശേഷിപ്പിക്കും.

c. കുറഞ്ഞ പിഴയായ 5% ബാധകമാക്കും: തീർപ്പാക്കൽ ഉത്തരവ് വന്ന് 30 ദിവസത്തിനുള്ളിലോ (സെക്ഷൻ 73 പ്രകാരം) അല്ലെങ്കിൽ 60 ദിവസത്തിനുള്ളിലോ (സെക്ഷൻ 74A പ്രകാരം) നികുതിയും പലിശയും അടച്ചുതീർക്കുകയാണെങ്കിൽ 5% കുറഞ്ഞ പിഴ ബാധകമാകും.

d. വഞ്ചന ഉൾപ്പെടാത്ത കേസുകളിൽ ₹10,000 എന്ന കുറഞ്ഞ പിഴ ഒഴിവാക്കും.

e.പരമാവധി പൊതുപിഴ കുറയ്ക്കും: പരമാവധി പൊതുപിഴ ₹25,000-ൽ നിന്ന് ₹10,000 ആയി കുറയ്ക്കും.

 ഉത്തരവിൽ പിഴ മാത്രം ഉൾപ്പെടുകയും നികുതി ആവശ്യപ്പെടാതിരിക്കുകയും ചെയ്യുന്ന കേസുകളിൽ, അപ്പലറ്റ് അതോറിറ്റിക്കോ അപ്പലറ്റ് ട്രൈബ്യൂണലിനോ മുൻപിൽ അപ്പീൽ നൽകുന്നതിനുള്ള മുൻകൂർ നിക്ഷേപത്തിനുള്ള പരിധി പരമാവധി ₹40 കോടി എന്ന നിലയിൽ നിശ്ചയിക്കും.

 GST-യിലെ മറ്റ് പ്രധാന പരിഷ്കാരങ്ങൾ

ITC റീഫണ്ടുകളും ക്ലെയിമുകളും ലഭിക്കുന്നതിനുള്ള അവസരങ്ങൾ വിപുലീകരിക്കൽ:

റീഫണ്ടിന് അർഹതയുള്ള സാഹചര്യങ്ങൾ വിപുലീകരിക്കൽ

നിർദിഷ്ട സാഹചര്യങ്ങളിൽ സമാഹരിക്കപ്പെട്ട ഇൻപുട്ട് ടാക്സ് ക്രെഡിറ്റിന്റെ (ITC) റീഫണ്ട് അനുവദിക്കുന്നതിനായി CGST നിയമത്തിലും ചട്ടങ്ങളിലും മാറ്റങ്ങൾ വരുത്താൻ GST കൗൺസിൽ ശുപാർശ ചെയ്തു.

Table 1