पत्र सूचना कार्यालय

ഇന്ത്യയുടെ സൂപ്പർകമ്പ്യൂട്ടിംഗ് ശേഷികൾ കെട്ടിപ്പടുക്കുന്നു

വിളവ് പ്രവചിക്കുന്നതും രോഗബാധകൾ നിരീക്ഷിക്കുന്നതും മുതൽ മരുന്ന് കണ്ടെത്തൽ വേഗത്തിലാക്കുന്നതിനും നദികളിലെ വെള്ളപ്പൊക്കം കാരണം ബാധിക്കപ്പെടുന്ന പ്രദേശങ്ങൾ പ്രവചിക്കുന്നതിനും വരെ, ദൈനംദിന ജീവിതത്തെ ബാധിക്കുന്ന സാമൂഹിക ആവശ്യങ്ങൾക്കുള്ള പ്രയോഗങ്ങളെ ഹൈ-പെർഫോമൻസ് കമ്പ്യൂട്ടിംഗ് പിന്തുണയ്ക്കുന്നു. കാലാവസ്ഥ, ബഹിരാകാശം, ആരോഗ്യ സംരക്ഷണം, എഞ്ചിനീയറിംഗ് എന്നിവയിലുടനീളമുള്ള ഭീമമായ ഡാറ്റാസെറ്റുകൾ പ്രോസസ്സ് ചെയ്യാനും സങ്കീർണ്ണമായ സിമുലേഷനുകൾ നടപ്പിലാക്കാനും അവ സഹായിക്കുന്നു. അവ വേഗത്തിലുള്ള വിശകലനം സാധ്യമാക്കുകയും സങ്കീർണ്ണമായ ശാസ്ത്രീയ വെല്ലുവിളികളെ നേരിടാൻ ഗവേഷകരെ സഹായിക്കുകയും ചെയ്യുന്നു. ശാസ്ത്രീയ കണ്ടെത്തലുകളും സാങ്കേതിക നവീനാശയങ്ങളും വേഗത്തിലാക്കാൻ ഇത് അത്യന്താപേക്ഷിതമായി മാറുകയാണ്.

സങ്കീർണ്ണമായ കണക്കുകൂട്ടലുകൾ അസാധാരണമായ വേഗതയിൽ പ്രോസസ്സ് ചെയ്യാൻ രൂപകൽപ്പന ചെയ്തിട്ടുള്ള ഹൈ-പെർഫോമൻസ് കമ്പ്യൂട്ടിംഗ് സിസ്റ്റങ്ങളാണ് സൂപ്പർകമ്പ്യൂട്ടറുകൾ. ഒരേസമയം ഒന്നിലധികം കണക്കുകൂട്ടലുകൾ നടത്തുന്നതിന് അവ വൻതോതിലുള്ള പ്രൊസസ്സറുകളെ സംയോജിപ്പിക്കുന്നു. ഇത് ഭീമമായ ഡാറ്റാസെറ്റുകൾ വിശകലനം ചെയ്യാനും സങ്കീർണ്ണമായ സിമുലേഷനുകൾ കാര്യക്ഷമമായി നടത്താനും ഗവേഷകരെ പ്രാപ്തരാക്കുന്നു. അതുകൊണ്ടുതന്നെ ഉന്നത ശാസ്ത്രീയ ഗവേഷണങ്ങൾക്കും തന്ത്രപ്രധാനമായ പ്രയോഗങ്ങൾക്കും ആവശ്യമായ സുപ്രധാന അടിസ്ഥാന സൗകര്യങ്ങൾ സൂപ്പർകമ്പ്യൂട്ടറുകൾ നൽകുന്നു.

ഇന്ത്യയുടെ വളർന്നുവരുന്ന ഡിജിറ്റൽ ആവാസവ്യവസ്ഥ അത്യാധുനിക കമ്പ്യൂട്ടിംഗ് അടിസ്ഥാന സൗകര്യങ്ങൾക്കായുള്ള ആവശ്യകത വർധിപ്പിക്കുന്നു. ലോകത്തിലെ ഡാറ്റയുടെ ഏകദേശം 20 ശതമാനവും ഉത്പാദിപ്പിക്കുന്നത് ഇന്ത്യയിലാണ്. നിർമിത ബുദ്ധി, കാലാവസ്ഥാ പ്രവചനം, ബഹിരാകാശ ഗവേഷണം തുടങ്ങിയ മേഖലകളിലെ ആവശ്യങ്ങൾക്ക് ഉയർന്ന കമ്പ്യൂട്ടിംഗ് ശേഷി ആവശ്യമാണ്. അതുകൊണ്ടുതന്നെ ഗവേഷണ സ്ഥാപനങ്ങളിലുടനീളം സൂപ്പർകമ്പ്യൂട്ടിംഗിലേക്കുള്ള പ്രവേശനം ഗവൺമെന്റ് വിപുലീകരിക്കുകയാണ്. ഈ ശ്രമം തദ്ദേശീയ ശേഷികളെ ശക്തിപ്പെടുത്തുകയും ആത്മനിർഭർ ഭാരത് എന്ന ഇന്ത്യയുടെ കാഴ്ചപ്പാടിനെ പിന്തുണയ്ക്കുകയും ചെയ്യുന്നു.

നാഷണൽ സൂപ്പർകമ്പ്യൂട്ടിംഗ് മിഷന് പിന്നിലെ തന്ത്രം

രാജ്യത്തിന്റെ കമ്പ്യൂട്ടിംഗ് ശേഷി ശക്തിപ്പെടുത്തുന്നതിനായി 2015 ഏപ്രിലിലാണ് ഇന്ത്യ നാഷണൽ സൂപ്പർകമ്പ്യൂട്ടിംഗ് മിഷന് (NSM) തുടക്കമിട്ടത്. ഏകദേശം 4,500 കോടി രൂപ ചെലവഴിച്ചാണ് ഈ മിഷൻ ആരംഭിച്ചത്. ഡിപ്പാർട്ട്‌മെന്റ് ഓഫ് സയൻസ് ആൻഡ് ടെക്‌നോളജിയും (DST) വാര്‍ത്താവിനിമയ, വിവരസാങ്കേതികവിദ്യാ മന്ത്രാലയവും (MeitY) സംയുക്തമായാണ് ഇതിന് നേതൃത്വം നൽകുന്നത്.

സൂപ്പർകമ്പ്യൂട്ടിംഗിൽ സ്വയംപര്യാപ്തത കൈവരിക്കാനും ഇന്ത്യയുടെ ഹൈ-പെർഫോമൻസ് കമ്പ്യൂട്ടിംഗ് ശേഷി ശക്തിപ്പെടുത്താനുമാണ് ഈ മിഷൻ ലക്ഷ്യമിടുന്നത്. ശാസ്ത്രീയവും സാങ്കേതികവുമായ മേഖലകളിലുടനീളമുള്ള ഗവേഷണം, വികസനം, പ്രശ്നപരിഹാരം എന്നിവയ്ക്കായി സൂപ്പർകമ്പ്യൂട്ടിംഗിന്റെ ഉപയോഗം ഇത് പ്രോത്സാഹിപ്പിക്കുന്നു. സാമൂഹികാവശ്യങ്ങൾക്കുള്ള പ്രയോഗങ്ങൾക്കായുള്ള പരിഹാരങ്ങൾ വികസിപ്പിക്കുന്നതിനെയും ഇത് പിന്തുണയ്ക്കുന്നു. ഇന്ത്യയിൽ ആഗോളതലത്തിൽ മത്സരശേഷിയുള്ള ഒരു സൂപ്പർകമ്പ്യൂട്ടിംഗ് ആവാസവ്യവസ്ഥ സ്ഥാപിക്കാനാണ് ഈ മിഷൻ ശ്രമിക്കുന്നത്.

പൂനെയിലെ സെന്റർ ഫോർ ഡെവലപ്‌‌മെന്റ് ഓഫ് അഡ്വാൻസ്ഡ് കമ്പ്യൂട്ടിംഗും (C-DAC) ബെംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസും (IISc) ചേർന്നാണ് ഈ മിഷൻ നടപ്പിലാക്കുന്നത്. തദ്ദേശീയമായ സൂപ്പർകമ്പ്യൂട്ടിംഗ് അടിസ്ഥാന സൗകര്യങ്ങൾ നിർമ്മിക്കുന്നതിനായി അസംബ്ലി, മാനുഫാക്ചറിംഗ്, ഡിസൈൻ ആൻഡ് മാനുഫാക്ചറിംഗ് സപ്പോർട്ട് എന്നിങ്ങനെ ഒരേസമയം നടക്കുന്ന മൂന്ന് ഘട്ടങ്ങളടങ്ങിയ ഒരു ബിൽഡ് സമീപനമാണ് NSM പിന്തുടരുന്നത്. ഈ സമീപനം കമ്പ്യൂട്ടിംഗ് അടിസ്ഥാന സൗകര്യങ്ങളുടെ വിപുലീകരണത്തെ തദ്ദേശീയ ശേഷികളുടെ വികസനവുമായി സംയോജിപ്പിക്കുന്നു.

സൂപ്പർകമ്പ്യൂട്ടറുകളെക്കുറിച്ചുള്ള രസകരമായ വസ്തുതകൾ

• സാധാരണ കമ്പ്യൂട്ടറുകളിൽ നിന്ന് വ്യത്യസ്തമായി ഭീമമായ തോതിലുള്ള ഡാറ്റ വളരെ ഉയർന്ന വേഗതയിൽ പ്രോസസ്സ് ചെയ്യാനാണ് സൂപ്പർകമ്പ്യൂട്ടറുകൾ രൂപകൽപ്പന ചെയ്തിരിക്കുന്നത്. അവ ഒരേസമയം ഒരുമിച്ച് പ്രവർത്തിക്കുന്ന ഒന്നിലധികം പ്രൊസസ്സറുകളോ കമ്പ്യൂട്ടിംഗ് നോഡുകളോ ഉപയോഗിക്കുന്നു. സങ്കീർണ്ണമായ പ്രശ്നങ്ങൾ സാധാരണ കമ്പ്യൂട്ടറുകളേക്കാൾ വേഗത്തിൽ പരിഹരിക്കാൻ ഇത് അവയെ സഹായിക്കുന്നു. ഈ നോഡുകൾ തമ്മിലുള്ള ഉയർന്ന വേഗതയിലുള്ള കണക്ഷനുകൾ, വൻതോതിലുള്ള കണക്കുകൂട്ടലുകൾക്കിടയിൽ കാര്യക്ഷമമായി ഡാറ്റ കൈമാറ്റം ചെയ്യാൻ അവയെ പ്രാപ്തമാക്കുന്നു.
• സൂപ്പർകമ്പ്യൂട്ടിംഗിൽ പാരലൽ പ്രൊസസിംഗ് ഉപയോഗിക്കാൻ കഴിയുന്നതിനാൽ സൂപ്പർകമ്പ്യൂട്ടറുകളെ ചിലപ്പോൾ പാരലൽ കമ്പ്യൂട്ടറുകൾ എന്നും വിളിക്കാറുണ്ട്. തന്നിരിക്കുന്ന ഒരു സമയത്ത് ഒരു കണക്കുകൂട്ടൽ നടത്തുന്നതിനായി ഒന്നിലധികം CPU-കൾ പ്രവർത്തിക്കുന്നതിനെയാണ് പാരലൽ പ്രൊസസിംഗ് എന്ന് പറയുന്നത്.
• ഒരു സൂപ്പർകമ്പ്യൂട്ടറിന്റെ ശേഷി അളക്കുന്നത് ഫ്ലോപ്സിലാണ് (FLOPS - Floating Point Operations Per Second). ഒരു സെക്കൻഡിൽ എത്ര കണക്കുകൂട്ടലുകൾ നടത്താൻ കഴിയുമെന്ന് ഇത് നമ്മോട് പറയുന്നു. ഒരു ടെറാഫ്ലോപ്സ് (TF) എന്നാൽ ഒരു സെക്കൻഡിൽ ഒരു ട്രില്യൺ കണക്കുകൂട്ടലുകൾ എന്നാണ് അർത്ഥമാക്കുന്നത്. എന്നാൽ ഒരു പെറ്റാഫ്ലോപ്സ് (PF) എന്നാൽ ഒരു സെക്കൻഡിൽ ഒരു ക്വാഡ്രില്യൺ കണക്കുകൂട്ടലുകൾ എന്നാണ് അർത്ഥമാക്കുന്നത്.
• ലോകത്തിലെ ഏറ്റവും വേഗതയേറിയ സൂപ്പർകമ്പ്യൂട്ടർ 2026-ൽ ഏകദേശം 2.19 എക്സാഫ്ലോപ്സ് കൈവരിക്കുന്നു. ഇതിന് ഒരു സെക്കൻഡിൽ ഏകദേശം 2.19 ക്വിന്റില്യൺ കണക്കുകൂട്ടലുകൾ നടത്താൻ കഴിയും.

മിഷന്റെ നിലവിലെ സ്ഥിതി

നാഷണൽ സൂപ്പർകമ്പ്യൂട്ടിംഗ് മിഷന് (NSM) കീഴിൽ സൂപ്പർകമ്പ്യൂട്ടിംഗിൽ സ്വയംപര്യാപ്തത കൈവരിക്കുന്നതിൽ ശ്രദ്ധ കേന്ദ്രീകരിക്കുന്ന ഒരു ആവാസവ്യവസ്ഥ ഇന്ത്യ സ്ഥാപിച്ചിട്ടുണ്ട്. സൂപ്പർകമ്പ്യൂട്ടർ രൂപകൽപ്പന, വികസനം, ഉത്പാദനം, സിസ്റ്റം സോഫ്റ്റ്‌വെയർ, പ്രത്യേക ആപ്ലിക്കേഷനുകൾ എന്നിവ ഇത് ഉൾക്കൊള്ളുന്നു. വളർന്നുവരുന്ന ഈ തദ്ദേശീയ ശേഷി, വിദേശ സാങ്കേതികവിദ്യകളെ ആശ്രയിക്കുന്നത് കുറയ്ക്കാൻ സഹായിക്കും. ഇത് ഇന്ത്യയുടെ ആഭ്യന്തര ഹൈ-പെർഫോമൻസ് കമ്പ്യൂട്ടിംഗ് ആവാസവ്യവസ്ഥയെ ശക്തിപ്പെടുത്തുകയും ചെയ്യുന്നു.

ഇന്ത്യയിലുടനീളമുള്ള വിവിധ അക്കാദമിക/ഗവേഷണ സ്ഥാപനങ്ങളിലായി ആകെ 123 പെറ്റാഫ്ലോപ്സിൽ കൂടുതൽ ശേഷിയുള്ള 50 സൂപ്പർകമ്പ്യൂട്ടറുകൾ സ്ഥാപിക്കാൻ എൻ.എസ്.എം ലക്ഷ്യമിടുന്നു. ഈ സംവിധാനങ്ങൾ അവയുടെ പ്രൊസസ്സിംഗ് ശേഷിക്കനുസരിച്ച് വിവിധ കമ്പ്യൂട്ടിംഗ് ആവശ്യങ്ങൾ നിറവേറ്റുന്നു.

കമ്പ്യൂട്ടിംഗ് ശേഷി വിപുലീകരിക്കൽ

2026 സെപ്റ്റംബറിലെ കണക്കനുസരിച്ച് ആകെ 68 പെറ്റാഫ്ലോപ്സ് ശേഷിയുള്ള 40 സൂപ്പർകമ്പ്യൂട്ടറുകൾ ഇന്ത്യ വിന്യസിച്ചിട്ടുണ്ട്. ഒരു പെറ്റാഫ്ലോപ്സിന് മുകളിൽ ശേഷിയുള്ള 13 ഹൈ-എൻഡ് സിസ്റ്റങ്ങൾ ഇതിൽ ഉൾപ്പെടുന്നു. 12 മിഡ്-റേഞ്ച് സിസ്റ്റങ്ങൾക്ക് 500 ടെറാഫ്ലോപ്സിനും ഒരു പെറ്റാഫ്ലോപ്സിനും ഇടയിലാണ് ശേഷിയുള്ളത്. മറ്റ് 15 സിസ്റ്റങ്ങൾക്ക് 500 ടെറാഫ്ലോപ്സിൽ താഴെയാണ് ശേഷി. ഈ യന്ത്രങ്ങൾ പ്രാദേശികമായി നിർമ്മിക്കുകയും രാജ്യത്തുടനീളം പ്രവർത്തനസജ്ജമാക്കുകയും ചെയ്തിട്ടുണ്ട്. അടിസ്ഥാന സൗകര്യങ്ങൾ, ആപ്ലിക്കേഷനുകൾ, ഗവേഷണ വികസന പ്രവർത്തനങ്ങൾ, മാനവ വിഭവശേഷി വികസനം എന്നിവ മുന്നോട്ട് കൊണ്ടുപോകുന്നത് ഈ ദൗത്യം തുടരുന്നു.

എൻ.എസ്.എമ്മിന് കീഴിലെ ദേശീയതല സൂപ്പർകമ്പ്യൂട്ടിംഗ് പ്രയോഗങ്ങൾ

എൻ.എസ്.എമ്മിന് കീഴിൽ വിന്യസിച്ചിട്ടുള്ള സൂപ്പർകമ്പ്യൂട്ടറുകൾ വൻതോതിലുള്ള സിമുലേഷനുകളെയും വേഗത്തിലുള്ള ഡാറ്റാ പ്രോസസ്സിംഗിനെയും പിന്തുണയ്ക്കുകയും വിവിധ മേഖലകളിലുടനീളം ദേശീയതലത്തിലുള്ള പ്രയോഗങ്ങൾ സാധ്യമാക്കുകയും ചെയ്യുന്നു.

• ജെനോമിക്‌സ് ആൻഡ് ഡ്രഗ് ഡിസ്കവറി പ്ലാറ്റ്‌‌ഫോം: മരുന്നുകൾ കണ്ടെത്തുന്നതിനും പരിശോധിക്കുന്നതിനും സഹായിക്കുന്നതിനായി ഇത് വൻതോതിലുള്ള തന്മാത്രാ കൂട്ടങ്ങളെക്കുറിച്ച് പഠിക്കുന്നു. കോവിഡ്-19 സമയത്ത് നിലവിലുള്ള മരുന്നുകൾ സ്ക്രീൻ ചെയ്യാനും ഹൃദയാഘാത സാധ്യത പോലുള്ള പാർശ്വഫലങ്ങൾ പ്രവചിക്കാനും ഇത് ഉപയോഗിച്ചിരുന്നു.
• അർബൻ എൻവയോൺമെന്റ് ഡിസിഷൻ സപ്പോർട്ട് സിസ്റ്റം: കാലാവസ്ഥയും വായുമലിനീകരണവും നിരീക്ഷിക്കുന്നതിന് ഇത് വിശാല മോഡലുകൾ ഉപയോഗിക്കുന്നു. കനത്ത മഴയും മലിനീകരണവും ഇത് മുൻകൂട്ടി പ്രവചിക്കുന്നു. അതുവഴി നഗരങ്ങൾക്ക് മുൻകരുതലുകൾ എടുക്കാനും നാശനഷ്ടങ്ങൾ കുറയ്ക്കാനും സാധിക്കുന്നു.
• സീസ്മിക് ഇമേജിംഗ് സ്യൂട്ട്: ഭൂഗർഭ ഘടനകൾ മാപ്പ് ചെയ്യുന്നതിന് അത്യാധുനിക അൽഗോരിതങ്ങൾ ഉപയോഗിച്ച് എണ്ണ, വാതക പര്യവേക്ഷണം മെച്ചപ്പെടുത്തുകയാണ് ഇത് ലക്ഷ്യമിടുന്നത്. ഇതിന്റെ പ്രവർത്തനം വാണിജ്യ സീസ്മിക് ഇമേജിംഗ് ടൂളുകളോട് കിടപിടിക്കുന്നതാണ്.
• നദീതടങ്ങളിലെ വെള്ളപ്പൊക്കത്തിനെ കുറിച്ച് മുൻകൂട്ടി മുന്നറിയിപ്പ് നൽകുന്ന സംവിധാനം: 2 ദിവസം മുമ്പ് വരെ വെള്ളപ്പൊക്കം പ്രവചിക്കാൻ ഇത് ഡാറ്റാ വിശകലനവും പ്രവചന മോഡലുകളും പ്രയോജനപ്പെടുത്തുന്നു. ജനങ്ങളെയും അടിസ്ഥാന സൗകര്യങ്ങളെയും സംരക്ഷിക്കുന്നതിനായി മഹാനദി തടത്തിൽ ഇത് ഉപയോഗിച്ചുവരുന്നു.
• ഫോറസ്റ്റ് ഫയർ സ്പ്രെഡ് മോഡൽ: കാട്ടുതീ എങ്ങനെ പടരുമെന്ന് പ്രവചിക്കുന്നതിന് ഇത് സാറ്റലൈറ്റ് റിമോട്ട് സെൻസിംഗിനെ കമ്പ്യൂട്ടേഷണൽ മോഡലുകളുമായി സംയോജിപ്പിക്കുന്നു. ഒരു എച്ച്.പി.സി സംവിധാനം ഉപയോഗിച്ച് സിക്കിം ഹിമാലയം പോലുള്ള പ്രദേശങ്ങളിൽ ഇത് പരീക്ഷിച്ചിട്ടുണ്ട്.
• മെറ്റീരിയൽസ് സയൻസ് ആൻഡ് കമ്പ്യൂട്ടേഷണൽ കെമിസ്ട്രി ആപ്ലിക്കേഷൻസ്: ആറ്റങ്ങൾ, തന്മാത്രകൾ, ലോഹസങ്കരങ്ങൾ എന്നിവയുടെ സിമുലേഷനുകൾ അനുവദിക്കുന്ന ഒരു സ്യൂട്ട് ഇത് നൽകുന്നു. ഇവ അവയുടെ സ്വഭാവത്തെക്കുറിച്ചുള്ള പഠനം എളുപ്പമാക്കുന്നു.

ഇന്ത്യയുടെ വളർന്നുവരുന്ന എച്ച്.പി.സി അടിസ്ഥാന സൗകര്യങ്ങൾ ഗവേഷണത്തെ ശക്തിപ്പെടുത്തുന്നതും തെളിവുകളെ അടിസ്ഥാനമാക്കിയുള്ള തീരുമാനങ്ങൾ എടുക്കുന്നതിനെ പിന്തുണയ്ക്കുന്നതും ആരോഗ്യം, പരിസ്ഥിതി, ഊർജ്ജം, അത്യാധുനിക ശാസ്ത്രം എന്നിവയിലുടനീളമുള്ള സങ്കീർണ്ണമായ വെല്ലുവിളികളെ നേരിടുന്നതും എങ്ങനെയെന്ന് ഈ പ്രയോഗങ്ങൾ വ്യക്തമാക്കുന്നു.

നേട്ടങ്ങൾ: എൻ.എസ്.എമ്മിന് കീഴിൽ വികസിപ്പിച്ച തദ്ദേശീയ ഘടകങ്ങൾ

എൻ.എസ്.എമ്മിന് കീഴിൽ സൂപ്പർകമ്പ്യൂട്ടിംഗിൽ സ്വയംപര്യാപ്തത കൈവരിക്കുക എന്ന വ്യക്തമായ ലക്ഷ്യത്തോടെ ഒരു സമ്പൂർണ്ണ ആവാസവ്യവസ്ഥ സ്ഥാപിച്ചിട്ടുണ്ട്. മറ്റ് കാര്യങ്ങൾക്കൊപ്പം താഴെ പറയുന്ന സുപ്രധാന സൂപ്പർകമ്പ്യൂട്ടിംഗ് ഉപഘടകങ്ങളുടെ രൂപകൽപ്പന, വികസനം, ഉത്പാദനം എന്നിവ ഇതിൽ ഉൾപ്പെടുന്നു:

1. രുദ്ര സീരീസ് സെർവറുകൾ: ഇതൊരു പ്രധാന സൂപ്പർകമ്പ്യൂട്ടിംഗ് ഘടകമാണ്. സങ്കീർണ്ണമായ കണക്കുകൂട്ടലുകൾ, സിമുലേഷനുകൾ, എഐ വർക്ക്‌ലോഡുകൾ എന്നിവ പ്രവർത്തിപ്പിക്കുന്നതിന് ആവശ്യമായ പ്രൊസസ്സിംഗ് കരുത്ത് ഇത് നൽകുന്നു. ഇത് സി-ഡാക് തദ്ദേശീയമായി രൂപകൽപ്പന ചെയ്യുകയും വികസിപ്പിക്കുകയും ചെയ്തിട്ടുള്ളതാണ്. കൂടാതെ ഇതിന്റെ സാങ്കേതികവിദ്യ ഉത്പാദനത്തിനായി ഇന്ത്യൻ ഇലക്ട്രോണിക്സ് മാനുഫാക്ചറിംഗ് സർവീസസ് പങ്കാളികൾക്ക് കൈമാറുകയും ചെയ്തു.

2. ഹൈ-സ്പീഡ് ഇന്റർകണക്ട് നെറ്റ്‌വർക്ക്: കമ്പ്യൂട്ടർ നോഡുകൾ തമ്മിൽ ആശയവിനിമയം നടത്തുന്നതിനുള്ള അതിവേഗ നെറ്റ്‌വർക്ക് 100 Gbps, 200 Gbps വേഗതയിൽ വികസിപ്പിക്കുകയും പരീക്ഷിക്കുകയും ചെയ്തിട്ടുണ്ട്. ഇത് കമ്പ്യൂട്ടിംഗ് നോഡുകൾ തമ്മിലുള്ള ഡാറ്റാ കൈമാറ്റവും ആശയവിനിമയവും മെച്ചപ്പെടുത്തുകയും ഇന്ത്യയുടെ സൂപ്പർകമ്പ്യൂട്ടിംഗ് ശേഷിയെ ശക്തിപ്പെടുത്തുകയും ചെയ്യുന്നു.
3. തദ്ദേശീയ കൂളിംഗ് സാങ്കേതികവിദ്യ: കൂളിംഗ് സാങ്കേതികവിദ്യ തദ്ദേശീയമായി വികസിപ്പിക്കുകയും പ്രദർശിപ്പിക്കുകയും ചെയ്തിട്ടുണ്ട്. ഇപ്പോൾ ഇത് വിന്യാസ ഘട്ടത്തിലാണ്. ഹൈ-പെർഫോമൻസ് കമ്പ്യൂട്ടിംഗ് സിസ്റ്റങ്ങളുടെ പ്രവർത്തന താപനില നിലനിർത്തുന്നതിനും മികച്ച ഊർജ്ജ കാര്യക്ഷമത ഉറപ്പാക്കുന്നതിനും ഇത് പ്രധാനമാണ്.
4. ഹൈ പെർഫോമൻസ് കമ്പ്യൂട്ടിംഗ് (HPC) സിസ്റ്റം സോഫ്റ്റ്‌വെയർ: സൂപ്പർകമ്പ്യൂട്ടിംഗ് സംവിധാനങ്ങളുടെ കാര്യക്ഷമമായ പ്രവർത്തനത്തിനും പരിപാലനത്തിനും പിന്തുണ നൽകുന്നതിനായി സമ്പൂർണ്ണ എച്ച്.പി.സി സിസ്റ്റം സോഫ്റ്റ്‌വെയർ സ്റ്റാക്ക് വികസിപ്പിക്കുകയും സംയോജിപ്പിക്കുകയും ചെയ്തിട്ടുണ്ട്.
5. പരം ശാവാക് (PARAM Shavak): എഞ്ചിനീയറിംഗ് കോളേജുകളിലെയും സർവ്വകലാശാലകളിലെയും വിദ്യാർത്ഥികളുടെയും ഗവേഷകരുടെയും എച്ച്.പി.സി, എഐ കമ്പ്യൂട്ടിംഗ് ആവശ്യങ്ങൾ നിറവേറ്റുന്നതിനായി ഇന്ത്യയിൽ രൂപകൽപ്പന ചെയ്ത് വികസിപ്പിച്ച് നിർമ്മിച്ച ഒരു സൂപ്പർകമ്പ്യൂട്ടിംഗ്-ഇൻ-എ-ബോക്സ് സിസ്റ്റമാണിത്.
6. ദേശീയ ആവശ്യങ്ങൾക്കായുള്ള എച്ച്.പി.സി ആപ്ലിക്കേഷനുകൾ: ജെനോമിക്‌സ്, ഡ്രഗ് ഡിസ്കവറി തുടങ്ങിയ മേഖലകളിലുടനീളം എച്ച്.പി.സി ആപ്ലിക്കേഷനുകൾ വികസിപ്പിക്കുകയും വിന്യസിക്കുകയും ചെയ്തിട്ടുണ്ട്. ഇന്ത്യ കേന്ദ്ര കാലാവസ്ഥാ വകുപ്പ് (IMD), കേന്ദ്ര ജല കമ്മീഷൻ (CWC), കേന്ദ്ര മലിനീകരണ നിയന്ത്രണ ബോർഡ് (CPCB), ആയുഷ് മന്ത്രാലയം എന്നിവയുൾപ്പെടെയുള്ള സ്ഥാപനങ്ങളെ ഈ പ്രയോഗങ്ങൾ പിന്തുണയ്ക്കുന്നു.

പ്രധാന കമ്പ്യൂട്ടിംഗ് അടിസ്ഥാന സൗകര്യങ്ങൾ മുതൽ ദേശീയ ആവശ്യങ്ങൾ പരിഹരിക്കുന്ന ആപ്ലിക്കേഷനുകൾ വരെ രാജ്യത്തിനുള്ളിൽ തന്നെ അത്യാധുനിക കമ്പ്യൂട്ടിംഗ് സാങ്കേതികവിദ്യകൾ വികസിപ്പിക്കുന്നതിനും ഉപയോഗിക്കുന്നതിനുമുള്ള ഇന്ത്യയുടെ ശേഷി എൻ.എസ്.എം വിപുലീകരിക്കുകയാണ്.

ഇന്ത്യയിൽ ഹൈ-പെർഫോമൻസ് കമ്പ്യൂട്ടിംഗിനായി വിദഗ്ധ മാനവ വിഭവശേഷി കെട്ടിപ്പടുക്കുന്നു

സൂപ്പർകമ്പ്യൂട്ടിംഗ് അടിസ്ഥാന സൗകര്യങ്ങളിലേക്കുള്ള പ്രവേശനം വികസിക്കുന്നതിനനുസരിച്ച് ഈ വിഭവങ്ങൾ കാര്യക്ഷമമായി ഉപയോഗിക്കുന്നതിന് ആവശ്യമായ നൈപുണ്യങ്ങളും എൻ.എസ്.എം വളർത്തിയെടുക്കുന്നു. എൻ.എസ്.എമ്മിന്റെ അടിസ്ഥാന സൗകര്യങ്ങൾ 400-ലധികം സ്ഥാപനങ്ങളിലായി 2,900-ലധികം പിഎച്ച്.ഡി ഗവേഷകർ ഉൾപ്പെടെ 16,000-ത്തിലധികം ഗവേഷകരെ പിന്തുണച്ചിട്ടുണ്ട്. 2026 സെപ്റ്റംബറിലെ കണക്കനുസരിച്ച് ഈ സിസ്റ്റങ്ങൾ 1.5 കോടിയിലധികം കമ്പ്യൂട്ട് ജോലികൾ (ഒരു സൂപ്പർകമ്പ്യൂട്ടറിന് നൽകുന്ന സങ്കീർണ്ണമായ ദൗത്യം അല്ലെങ്കിൽ സിമുലേഷൻ) നിർവഹിക്കുകയും 1,990-ലധികം ഗവേഷണ പ്രസിദ്ധീകരണങ്ങൾക്ക് സംഭാവന നൽകുകയും ചെയ്തിട്ടുണ്ട്.

വിദഗ്ധരായ ഉപയോക്താക്കളുടെ എണ്ണം കൂടുതൽ വിപുലീകരിക്കുന്നതിനായി മിഷൻ വിവിധ പരിശീലന ബോധവൽക്കരണ പരിപാടികൾ വികസിപ്പിച്ചെടുത്തിട്ടുണ്ട്:

• എച്ച്.പി.സി, ഡീപ്പ് ലേണിംഗ് ബോധവൽക്കരണ പരിപാടികൾ: വിദ്യാർത്ഥികൾക്കും ഗവേഷകർക്കും അധ്യാപകർക്കും ഹൈ-പെർഫോമൻസ് കമ്പ്യൂട്ടിംഗും (HPC) ഡീപ്പ് ലേണിംഗും (DL) പരിചയപ്പെടുത്തുന്നതിനായി എൻ.എസ്.എം സ്ഥാപനങ്ങളുമായി ചേർന്ന് ഇന്ത്യയിലുടനീളം വർക്ക്‌ഷോപ്പുകൾ സംഘടിപ്പിക്കുന്നു.
• ഹാക്കത്തോണുകളും ബൂട്ട്‌ക്യാമ്പുകളും: എച്ച്.പി.സി, ഡി.എൽ ഹാക്കത്തോണുകളും ബൂട്ട്‌ക്യാമ്പുകളും പ്രായോഗിക പരിശീലനം നൽകുകയും എച്ച്.പി.സി, എ.ഐ, ജനറേറ്റീവ് എ.ഐ എന്നിവയിലെ പ്രശ്നപരിഹാരങ്ങളെ പ്രോത്സാഹിപ്പിക്കുകയും ചെയ്യുന്നു.
• ഫാക്കൽറ്റി ഡെവലപ്‌മെന്റ് ആൻഡ് ക്വാളിറ്റി ഇംപ്രൂവ്‌മെന്റ് പ്രോഗ്രാമുകൾ: കമ്പ്യൂട്ടർ സയൻസ് ഇതര വിഷയങ്ങളിലെ അധ്യാപകർ ഉൾപ്പെടെയുള്ള ഫാക്കൽറ്റികൾക്ക് ഓൾ ഇന്ത്യ കൗൺസിൽ ഫോർ ടെക്നിക്കൽ എജ്യുക്കേഷനുമായി (AICTE) സഹകരിച്ച് എച്ച്.പി.സി, എ.ഐ, മെഷീൻ ലേണിംഗ് (ML), ഡി.എൽ എന്നിവയിൽ പരിശീലനം നൽകുന്നു.
• എഡ്യൂ എച്ച്.പി.സി (EduHPC) വർക്ക്‌‌ഷോപ്പ്: ഇന്ത്യയിലുടനീളമുള്ള സ്ഥാപനങ്ങളിലെ ഫാക്കൽറ്റികൾക്ക് എച്ച്.പി.സിയിൽ സമഗ്രമായ പരിശീലനം നൽകുന്നതിനായി പ്രതിവർഷ വർക്ക്‌ഷോപ്പ് സംഘടിപ്പിക്കുന്നു.
• ഹൈ-പെർഫോമൻസ് സയന്റിഫിക് കമ്പ്യൂട്ടിംഗ് കോഴ്‌സ്: നാഷണൽ പ്രോഗ്രാം ഓൺ ടെക്നോളജി എൻഹാൻസ്ഡ് ലേണിംഗിന് (NPTEL) കീഴിൽ സ്വയം (SWAYAM) പ്ലാറ്റ്‌ഫോമിലുള്ള ഘടനാപരമായ കോഴ്‌സ് പഠിതാക്കളെ എച്ച്.പി.സിയിൽ ശക്തമായ അടിത്തറയുണ്ടാക്കാൻ സഹായിക്കുന്നു.
• എച്ച്.പി.സി ശിക്ഷാ പോർട്ടൽ: ഈ പോർട്ടൽ എച്ച്.പി.സി വിഭവങ്ങളിലേക്കും റെക്കോർഡ് ചെയ്ത പ്രഭാഷണങ്ങളിലേക്കും പഠന സാമഗ്രികളിലേക്കും പ്രവേശനം നൽകുന്നു. ഇത് പ്രായോഗിക പരിചയം നേടാൻ വിദ്യാർത്ഥികളെയും അധ്യാപകരെയും പ്രാപ്തരാക്കുന്നു.
• എൻ.എസ്.എം യൂസേഴ്‌സ് ഫോറം: സാങ്കേതിക പ്രശ്നങ്ങൾ ചർച്ച ചെയ്യുന്നതിനും സംശയങ്ങൾ പരിഹരിക്കുന്നതിനും അറിവുകളും മികച്ച മാതൃകകളും പങ്കുവെക്കുന്നതിനും എൻ.എസ്.എം കേന്ദ്രങ്ങളിലുടനീളമുള്ള ഉപയോക്താക്കൾക്ക് ഈ ഫോറം ഒരു പ്ലാറ്റ്‌ഫോം ഒരുക്കുന്നു.

പ്രത്യേക കമ്പ്യൂട്ടിംഗ് സ്ഥാപനങ്ങൾക്കപ്പുറത്തേക്ക് എച്ച്.പി.സി നൈപുണ്യങ്ങൾ വ്യാപിപ്പിക്കുന്നതിനും അത്യാധുനിക കമ്പ്യൂട്ടിംഗ് ഉപയോഗിക്കാൻ സജ്ജമായ, വിശാലമായ ഒരു തൊഴിൽ സേനയെ കെട്ടിപ്പടുക്കുന്നതിനും ഈ സംരംഭങ്ങൾ സഹായിക്കുന്നു.

മുന്നോട്ടുള്ള പാത

കമ്പ്യൂട്ടിംഗ് ശേഷി വിപുലീകരിച്ചും രാജ്യത്തിനുള്ളിൽ കൂടുതൽ അത്യാധുനിക സാങ്കേതികവിദ്യകൾ വികസിപ്പിച്ചും ഗവേഷകർക്കും അക്കാദമിക രംഗത്തിനും വ്യവസായ മേഖലയ്ക്കും ഹൈ-പെർഫോമൻസ് കമ്പ്യൂട്ടിംഗ് (HPC) കൂടുതൽ ലഭ്യമാക്കിയും ഇന്ത്യയുടെ സൂപ്പർകമ്പ്യൂട്ടിംഗ് ആവാസവ്യവസ്ഥ വൻതോതിൽ വളരാൻ ഒരുങ്ങുകയാണ്. വേഗമേറിയതും ഊർജ്ജക്ഷമതയുള്ളതും വിശ്വസനീയവുമായ സംവിധാനങ്ങൾ നിർമ്മിക്കുന്നതിലും ഇന്ത്യൻ ഹാർഡ്‌വെയർ, സോഫ്റ്റ്‌വെയർ ശേഷികൾ ശക്തിപ്പെടുത്തുന്നതിലും വിദഗ്ധരായ പ്രൊഫഷണലുകളെ വാർത്തെടുക്കുന്നതിലുമായിരിക്കും മിഷൻ ശ്രദ്ധ കേന്ദ്രീകരിക്കുക. നിർമിത ബുദ്ധിയും എച്ച്.പി.സിയും തമ്മിലുള്ള മികച്ച സംയോജനം കാലാവസ്ഥ, ആരോഗ്യ സംരക്ഷണം, കൃഷി, ഊർജ്ജം, ഔഷധ ഗവേഷണം, എഞ്ചിനീയറിംഗ്, ശാസ്ത്രീയ ഗവേഷണം തുടങ്ങിയ മേഖലകളിലെ സുപ്രധാന വെല്ലുവിളികളെ നേരിടാൻ സഹായിക്കും. ഗവൺമെന്റ്, അക്കാദമിക മേഖല, വ്യവസായം, സ്റ്റാർട്ടപ്പുകൾ, ഗവേഷണ സ്ഥാപനങ്ങൾ എന്നിവയെ ഒന്നിച്ചുകൊണ്ടുവരുന്നതിലൂടെ അത്യാധുനിക കമ്പ്യൂട്ടിംഗിനെ പ്രായോഗിക പരിഹാരങ്ങളാക്കി മാറ്റാനും നവീനാശയവും സാമ്പത്തിക വളർച്ചയും ത്വരിതപ്പെടുത്താനും സുരക്ഷിതവും സുസ്ഥിരവും സ്വയംപര്യാപ്തവുമായ ഒരു സൂപ്പർകമ്പ്യൂട്ടിംഗ് ആവാസവ്യവസ്ഥ കെട്ടിപ്പടുക്കാനും ഇന്ത്യയ്ക്ക് സാധിക്കും.

അവലംബം

Department of Science and Technology

• https://nsmindia.in/applications/
• https://dst.gov.in/national-supercomputing-mission-1
• https://dst.gov.in/pm-launches-country-1st-indigenously-build-supercomputer
• https://www.pib.gov.in/PressReleaseDetail.aspx?PRID=1709875&reg=3&lang=1
• https://www.pib.gov.in/PressReleasePage.aspx?PRID=2212885&reg=48&lang=2
• https://www.pib.gov.in/PressReleaseIframePage.aspx?PRID=2201437&reg=48&lang=2
• https://www.pib.gov.in/PressReleasePage.aspx?PRID=2198307&reg=48&lang=2
• https://www.pib.gov.in/PressReleasePage.aspx?PRID=2198307&reg=48&lang=2
• https://dst.gov.in/sites/default/files/NSM%20Achievements%20book%20design%2016725.pdf

Ministry of Electronics & IT

• https://www.pib.gov.in/PressReleasePage.aspx?PRID=2158517&reg=48&lang=2
• https://www.pib.gov.in/PressReleasePage.aspx?PRID=1926942&lang=2&reg=48
• https://www.pib.gov.in/PressReleasePage.aspx?PRID=2212879&reg=48&lang=2
• https://www.pib.gov.in/PressReleaseDetail.aspx?PRID=2201437&reg=3&lang=1
• https://www.pib.gov.in/PressReleasePage.aspx?PRID=2201437&reg=3&lang=2

Centre for Development of Advanced Computing

• https://www.cdac.in/index.aspx?id=hpc_ss_supercomputing_systems

Click here to see pdf

***

SK