पत्र सूचना कार्यालय

1926-ലേക്കുള്ള പാത

സ്വജനപക്ഷപാതത്തിന് പകരം യോഗ്യതയുടെ അടിസ്ഥാനത്തിലായിരിക്കണം പൊതുസർവീസിലേക്കുള്ള പ്രവേശനം എന്ന തത്ത്വം 1855-ൽ ഔദ്യോഗിക രൂപം പ്രാപിച്ചു. ഈസ്റ്റ് ഇന്ത്യ കമ്പനിയുടെ നാമനിർദ്ദേശ രീതിക്ക് പകരം മത്സരപരീക്ഷ ഏർപ്പെടുത്തിക്കൊണ്ട് ലണ്ടനിൽ ഇന്ത്യൻ സിവിൽ സർവീസ് (ഐ.സി.എസ്) പരീക്ഷ ആരംഭിച്ചപ്പോഴായിരുന്നു അത്. എന്നാൽ ഭൂരിഭാഗം ഇന്ത്യക്കാർക്കും ഈ വാതിൽ തുറക്കുക എന്നത് ഏറെക്കുറെ അസാധ്യമായിരുന്നു. ലണ്ടനിൽ വെച്ച് ഇംഗ്ലീഷിൽ മാത്രമാണ് പരീക്ഷ നടത്തിയിരുന്നത്. കൂടാതെ ബംഗാളിലെയും പഞ്ചാബിലെയും ജില്ലകൾ ഭരിക്കാൻ ആവശ്യമായതുകൊണ്ടല്ല, മറിച്ച് ബ്രിട്ടീഷ് വിദ്യാഭ്യാസ സമ്പ്രദായത്തിൽ പഠിച്ചവർക്ക് അനുകൂലമാകാൻ വേണ്ടി ഗ്രീക്ക്, ലാറ്റിൻ തുടങ്ങിയ വിഷയങ്ങളിലായിരുന്നു ഉദ്യോഗാർത്ഥികളെ പരീക്ഷിച്ചിരുന്നത്.

1862-ൽ രവീന്ദ്രനാഥ ടാഗോറിന്റെ മൂത്ത സഹോദരനായ 21 വയസ്സുകാരൻ സത്യേന്ദ്രനാഥ ടാഗോർ സ്വന്തം രാജ്യത്ത് എഴുതാൻ അനുവാദമില്ലാത്ത ഒരു പരീക്ഷയിൽ പങ്കെടുക്കാനായി കൽക്കട്ടയിൽ നിന്ന് ഇംഗ്ലണ്ടിലേക്ക് കപ്പൽ കയറി. 1863-ൽ അദ്ദേഹം പരീക്ഷ വിജയിക്കുകയും 1864-ൽ സർവീസിൽ ചേരുകയും ചെയ്തു. ബ്രിട്ടീഷുകാർ "ദൈവതുല്യമായ സർവീസ്" (heaven-born service) എന്നുവിളിച്ചിരുന്ന സർവീസിലെ ആദ്യത്തെ ഇന്ത്യക്കാരനായിരുന്നു അദ്ദേഹം. ബോംബെ പ്രസിഡൻസിയിൽ അദ്ദേഹം മുപ്പതിലേറെ വർഷം സേവനമനുഷ്ഠിച്ചു. അദ്ദേഹത്തിന്റെ വിജയത്തിന്റെ ആറുവർഷത്തിന് ശേഷം സുരേന്ദ്രനാഥ് ബാനർജി, ബിഹാരി ലാൽ ഗുപ്ത, രമേഷ് ചന്ദർ ദത്ത് എന്നിവരും അദ്ദേഹത്തിന്റെ പാത പിന്തുടർന്നു. എങ്കിലും പരീക്ഷ എഴുതാനുള്ള പരമാവധി പ്രായപരിധി 23-ൽ നിന്ന് 19 ആയി ക്രമേണ കുറച്ചു. ഇത് ഇന്ത്യൻ ഉദ്യോഗാർത്ഥികൾക്ക് പരീക്ഷയ്ക്കായി തയ്യാറെടുക്കാൻ വളരെ കുറഞ്ഞ സമയം മാത്രം നൽകി. 1919 ആയപ്പോഴേക്കും ആകെ 1,255 ഐ.സി.എസ് ഓഫീസർമാരിൽ 78 പേർ മാത്രമായിരുന്നു ഇന്ത്യക്കാർ.

തുടർച്ചയായ ദേശീയവാദ ആവശ്യങ്ങൾ ക്രമേണ മാറ്റങ്ങൾക്ക് വഴിയൊരുക്കി. മൊണ്ടേഗു-ചെംസ്ഫോർഡ് പരിഷ്കാരങ്ങൾക്ക് ശേഷം പ്രാബല്യത്തിൽ വന്ന 1919-ലെ ഗവൺമെന്റ് ഓഫ് ഇന്ത്യ ആക്ട് ഒരു പബ്ലിക് സർവീസ് കമ്മീഷൻ രൂപീകരിക്കുന്നതിനുള്ള വ്യവസ്ഥ മുന്നോട്ടുവെച്ചു. 1855-ന് ശേഷം ആദ്യമായി 1922-ൽ ലണ്ടനൊപ്പം ഇന്ത്യയിലെ അലഹബാദിലും ഐ.സി.എസ് പരീക്ഷ നടത്തപ്പെട്ടു. 1928-ൽ ഇന്ത്യയിലെ പരീക്ഷാ കേന്ദ്രം ഡൽഹിയിലേക്ക് മാറ്റി. ആർതർ ഹാമിൽട്ടൺ ലീ അധ്യക്ഷനായ ലീ കമ്മീഷൻ, നിയമപരമായ ഒരു പബ്ലിക് സർവീസ് കമ്മീഷൻ ഉടനടി സ്ഥാപിക്കാൻ 1924-ൽ ശുപാർശ ചെയ്തു. ഓരോ പത്ത് പുതിയ ഉദ്യോഗാർത്ഥികളിലും നാലുപേർ ബ്രിട്ടീഷുകാരും നാലുപേർ ഇന്ത്യക്കാരും രണ്ടുപേർ പ്രൊവിൻഷ്യൽ സർവീസുകളിൽ നിന്ന് പ്രൊമോഷൻ ലഭിക്കുന്ന ഇന്ത്യക്കാരുമായിരിക്കണമെന്നും അത് നിർദ്ദേശിച്ചു - കടലാസിൽ ഇത് തുല്യതയിലേക്കുള്ള വഴിയായിരുന്നെങ്കിലും പ്രായോഗികമായി മത്സരത്തിലൂടെയല്ലാതെ ജന്മം കൊണ്ട് മാത്രം ബ്രിട്ടീഷുകാർക്ക് ഓരോ നിയമനത്തിലും 40 ശതമാനം ഉറപ്പുനൽകുന്ന ഒന്നായിരുന്നു ഇത്.

1919-ലെ ആക്ടിലെ 96B, 96C എന്നീ വകുപ്പുകൾ പ്രകാരം തയാറാക്കിയ 1926-ലെ പബ്ലിക് സർവീസ് കമ്മീഷൻ (ഫങ്ഷൻസ്) ചട്ടങ്ങൾ പ്രകാരമാണ് കമ്മീഷൻ സ്ഥാപിതമായത്. യുണൈറ്റഡ് കിംഗ്ഡത്തിലെ ഹോം സിവിൽ സർവീസ് അംഗമായിരുന്ന സർ റോസ് ബാർകർ ആയിരുന്നു ഇതിന്റെ ആദ്യ അധ്യക്ഷൻ. അദ്ദേഹത്തെ സഹായിക്കാൻ നാല് അംഗങ്ങളുമുണ്ടായിരുന്നു. ഡൽഹിയിലെ മെറ്റ്കാഫ് ഹൗസിലാണ് കമ്മീഷൻ പ്രവർത്തിച്ചിരുന്നത്. ഇതിന്റെ പരിമിതമായ അധികാരങ്ങൾ സ്വാതന്ത്ര്യസമര നേതാക്കളുടെ ശക്തമായ വിമർശനത്തിന് ഇരയായി. എങ്കിലും ഇന്ത്യയിൽ ആസ്ഥാനവും ജീവനക്കാരുമുള്ള ഒരു സ്ഥിരം റിക്രൂട്ട്മെന്റ് ഏജൻസി നിലവിൽ വന്നു - അതുകൊണ്ടാണ് കമ്മീഷൻ അതിന്റെ ചരിത്രം 1926 മുതൽ കണക്കാക്കുന്നത്.

ഭരണഘടനാപരമായ ചുമതല

1949 ഓഗസ്റ്റ് 22-ന് ഡ്രാഫ്റ്റിംഗ് കമ്മിറ്റി അധ്യക്ഷനായ ഡോ. ബി.ആർ. അംബേദ്കർ യൂണിയൻ-സംസ്ഥാന പബ്ലിക് സർവീസ് കമ്മീഷനുകളെക്കുറിച്ചുള്ള കരടു അനുച്ഛേദങ്ങൾ ഭരണഘടനാ നിർമ്മാണ സഭയിൽ അവതരിപ്പിച്ചു. ഇവ ഭരണഘടനയുടെ പാർട്ട് XIV (315–323 അനുച്ഛേദങ്ങൾ) ആയി മാറി. 1949 നവംബർ 26-ലെ തന്റെ യാത്രയയപ്പ് പ്രസംഗത്തിൽ പബ്ലിക് സർവീസ് കമ്മീഷനുകളുടെ സ്വതന്ത്രമായ നിലനിൽപ്പ് പൊതുനിയമനങ്ങളിലെ നിഷ്പക്ഷത ഉറപ്പാക്കുന്നതിനും അനർഹമായ ജോലി നൽകൽ, സ്വജനപക്ഷപാതം, പ്രീണനം എന്നിവയ്ക്കെതിരെ സംരക്ഷണം തീർക്കുന്നതിനും അത്യന്താപേക്ഷിതമാണെന്ന് ഡോ.രാജേന്ദ്ര പ്രസാദ് ഊന്നിപ്പറഞ്ഞു.

• പരീക്ഷ മുഖേനയുള്ള റിക്രൂട്ട്മെന്റ്: സിവിൽ സർവീസസ്, ഇന്ത്യൻ ഫോറസ്റ്റ് സർവീസ്, എഞ്ചിനീയറിംഗ് സർവീസസ്, കമ്പൈൻഡ് മെഡിക്കൽ സർവീസസ്, നാഷണൽ ഡിഫൻസ് അക്കാദമി & നേവൽ അക്കാദമി, കമ്പൈൻഡ് ഡിഫൻസ് സർവീസസ്, സെൻട്രൽ ആംഡ് പോലീസ് ഫോഴ്‌സ് (അസിസ്റ്റന്റ് കമാൻഡന്റ്സ്) എന്നീ പരീക്ഷകളും മറ്റ് പരീക്ഷകളും ഇതിൽ ഉൾപ്പെടുന്നു.
• തിരഞ്ഞെടുപ്പ് മുഖേനയുള്ള റിക്രൂട്ട്മെന്റ്: മന്ത്രാലയങ്ങളും വകുപ്പുകളും ആവശ്യപ്പെടുന്ന വിദഗ്ധ തസ്തികകളിലേക്കുള്ള അഭിമുഖങ്ങളും റിക്രൂട്ട്മെന്റ് പരീക്ഷകളും.
• ഗവൺമെന്റിനുള്ള ഉപദേശം: റിക്രൂട്ട്മെന്റ് ചട്ടങ്ങൾ, ഡിപ്പാർട്ട്‌‌മെന്റൽ പ്രൊമോഷൻ കമ്മിറ്റികൾ വഴിയുള്ള പ്രൊമോഷനുകൾ, അഖിലേന്ത്യാ സർവീസുകളിലേക്കുള്ള നിയമനം, അച്ചടക്ക നടപടികൾ എന്നിവയിൽ ഉപദേശം നൽകുന്നു. 2023-24 വർഷത്തിൽ പ്രൊമോഷനായി 24,581 ഉദ്യോഗസ്ഥരുടെ രേഖകൾ കമ്മീഷൻ പരിശോധിക്കുകയും 532 ഉദ്യോഗസ്ഥരെ അഖിലേന്ത്യാ സർവീസുകളിലേക്ക് ഉൾപ്പെടുത്തുകയും ചെയ്തു.
• പോലീസ് നേതൃത്വം: പ്രകാശ് സിംഗ് വേഴ്സസ് യൂണിയൻ ഓഫ് ഇന്ത്യ കേസിൽ 2006 സെപ്റ്റംബർ 22-ലെ സുപ്രീം കോടതി ഉത്തരവിനെ തുടർന്ന് 2012-13 മുതൽ സംസ്ഥാനങ്ങളിൽ ഡയറക്ടർ ജനറൽ ഓഫ് പോലീസ്/പോലീസ് മേധാവി തസ്തിക നിയമനത്തിനായി മുതിർന്ന ഐ.പി.എസ് (IPS) ഉദ്യോഗസ്ഥരുടെ പട്ടിക തയ്യാറാക്കുന്നത് കമ്മീഷനാണ്.

പ്രധാന സംഭവങ്ങൾ: 1926–2026

അടിത്തറകൾ: 1926–1949

റിപ്പബ്ലിക്കിന്റെ സർവീസുകൾ കെട്ടിപ്പടുക്കൽ: 1950–1979

പരിഷ്കരണവും ആധുനികവൽക്കരണവും: 1985–2010

ഡിജിറ്റൽ, സുതാര്യം, എല്ലാവരെയും ഉൾച്ചേർക്കൽ: 2011–2026

2025, 2026 വർഷങ്ങളിലെ വികസന പ്രവർത്തനങ്ങൾ സെക്ഷൻ 7-ൽ പട്ടികപ്പെടുത്തിയിട്ടുണ്ട്.

വസ്തുതകളും കണക്കുകളും

UPSC കൈകാര്യം ചെയ്യുന്ന ജോലികളുടെ വ്യാപ്തിയും സങ്കീർണ്ണതയും വർഷങ്ങളായി ഗണ്യമായി വർധിച്ചിട്ടുണ്ട്. വിവിധ പരീക്ഷകളിലൂടെയും തിരഞ്ഞെടുപ്പ് വഴിയുള്ള റിക്രൂട്ട്‌മെന്റിലൂടെയും ലഭിക്കുന്ന അപേക്ഷകളുടെ എണ്ണം 1950-51 ലെ 42,727-ൽ നിന്ന് 2022-23-ൽ 45,10,044 എന്ന എക്കാലത്തെയും ഉയർന്ന നിരക്കിലേക്ക് ഉയർന്നു - അതായത് നൂറുമടങ്ങിലധികം വർധനവ്. ആ വർഷം കമ്മീഷൻ 15 പരീക്ഷകൾ (33,51,916 അപേക്ഷകൾ) നടത്തുകയും തിരഞ്ഞെടുപ്പ് വഴിയുള്ള റിക്രൂട്ട്‌‌മെന്റിന് കീഴിൽ 4,411 തസ്തികകളിലേക്കായി 233 നിയമന അഭ്യർത്ഥനകൾ (11,58,128 അപേക്ഷകൾ) സ്വീകരിക്കുകയും ചെയ്തു.

• വനിതകൾ: 1949-നും 1951-നും ഇടയിൽ ഇന്ത്യൻ ഫോറിൻ സർവീസിലേക്ക് ഒരു വനിതയും ഐ.എ.എസിലേക്ക് (IAS) രണ്ട് വനിതകളും മാത്രമാണ് തിരഞ്ഞെടുക്കപ്പെട്ടത്. 1952-ൽ ശുപാർശ ചെയ്യപ്പെട്ടവരിൽ വനിതകൾ 3.6 ശതമാനമായിരുന്നുവെങ്കിൽ 2025-ലെ സിവിൽ സർവീസസ് പരീക്ഷയിൽ (CSE) അത് 31.2 ശതമാനമായി ഉയർന്നു; കൂടാതെ ആദ്യ 25 റാങ്കുകളിൽ 11 എണ്ണവും നേടിയത് വനിതകളാണ്.

• അഭിമുഖത്തിൽ ഇന്ത്യൻ ഭാഷകൾ: 1970-71-ൽ ഇന്റർവ്യൂ ഇംഗ്ലീഷിൽ മാത്രമേ നടത്താൻ കഴിയൂവെന്ന് കമ്മീഷൻ ഗവൺമെന്റിനെ അറിയിച്ചിരുന്നു. 1980-81-ൽ ഈ നിലപാടിൽ മാറ്റം വന്നു; കമ്മീഷൻ നൽകുന്ന ഒരു പരിഭാഷകന്റെ (ഇന്റർപ്രെറ്റർ) സഹായത്തോടെ ഉദ്യോഗാർത്ഥികൾക്ക് ഇപ്പോൾ ഇന്ത്യൻ ഭാഷകളിൽ ഉത്തരം നൽകാവുന്നതാണ്. 2010-11-ൽ 803 പേരും 2023-24-ൽ 307 പേരും ഈ സൗകര്യം തിരഞ്ഞെടുക്കുകയുണ്ടായി.

ഉപകഥകൾ

കമ്മീഷന്റെ നൂറുവർഷത്തെ ചരിത്രത്തിലെ ലഘുസംഭവങ്ങൾ

സർ തോമസ് മെറ്റ്കാഫ് 1835-ൽ നിർമ്മിച്ച മെറ്റ്കാഫ് ഹൗസിന് ചരിത്രത്തിൽ മറ്റൊരു പ്രാധാന്യം കൂടിയുണ്ട്. 1947 ഏപ്രിൽ 21-ന് സർദാർ വല്ലഭ്ഭായ് പട്ടേൽ സിവിൽ സർവീസ് പ്രൊബേഷണർമാരുടെ ആദ്യ ബാച്ചിനെ അവിടെവെച്ച് അഭിസംബോധന ചെയ്യുകയും സിവിൽ സർവീസുകളെ "ഇന്ത്യയുടെ ഉരുക്കു ചട്ടക്കൂട്" (സ്റ്റീൽ ഫ്രെയിം ഓഫ് ഇന്ത്യ) എന്നു വിശേഷിപ്പിക്കുകയും ചെയ്തു. ഈ ദിവസം ഇപ്പോൾ എല്ലാ വർഷവും സിവിൽ സർവീസസ് ദിനമായി ആചരിച്ചുവരുന്നു.

ഷാജഹാൻ റോഡിലെ ധോൽപൂർ ഹൗസ് ധോൽപൂരിലെ മഹാരാജ റാണാ ഉദയ്ഭാനു സിംഗ് ഡൽഹി സന്ദർശന വേളകളിൽ താമസിക്കാനായി 1835-ൽ 'ആർട്ട് ഡെക്കോ' ശൈലിയിൽ നിർമ്മിച്ചതാണ്. 1949 ഏപ്രിൽ 7-ന് ധോൽപൂർ നാട്ടുരാജ്യം ഇന്ത്യൻ യൂണിയനിൽ ലയിച്ചതോടെ ഈ മന്ദിരം ഗവൺമെന്റ് സ്വത്തായി മാറി. മൂന്ന് വർഷങ്ങൾക്ക് ശേഷം 1952-ൽ, ഇത് കമ്മീഷന്റെ സ്ഥിരം ആസ്ഥാനമായി തീർന്നു.

1972-ൽ ഇതുവരെ ഒരു വനിതാ ഓഫീസർ പോലും ഉണ്ടായിട്ടില്ലാത്ത ഇന്ത്യൻ പോലീസ് സർവീസിലേക്ക് (IPS) കമ്മീഷൻ തിരഞ്ഞെടുത്ത ആദ്യ വനിതയായി കിരൺ ബേദി മാറി. ആ വർഷത്തെ 80 ഒഴിവുകളിൽ അവർ മാത്രമായിരുന്നു ഏക വനിത.

1989-ൽ തപാൽ സർവീസ് മന്ദഗതിയിലായതിനാൽ വിദൂര പ്രദേശങ്ങളിൽ അപേക്ഷാ ഫോമുകൾ എത്താൻ പ്രയാസമുണ്ടായപ്പോൾ കമ്മീഷൻ അവ പത്രങ്ങളിൽ നേരിട്ട് അച്ചടിച്ചു നൽകി. 1984-ൽ കനത്ത മഞ്ഞുവീഴ്ചയെ തുടർന്ന് കാംഗ്ര ഒറ്റപ്പെട്ടപ്പോൾ ദുരിതബാധിതരായ ഉദ്യോഗാർത്ഥികൾക്കായി അപേക്ഷ സമർപ്പിക്കാനുള്ള അവസാന തീയതി കമ്മീഷൻ രണ്ടാഴ്ചത്തേക്ക് നീട്ടി നൽകുകയും ചെയ്തു.

1977 നവംബർ 8-ന് പോസ്റ്റ്സ് ആൻഡ് ടെലിഗ്രാഫ്സ് വകുപ്പ് കമ്മീഷന്റെ സുവർണ്ണ ജൂബിലിയോടനുബന്ധിച്ച് 25 പൈസയുടെ സ്റ്റാമ്പ് പുറത്തിറക്കി. സമത്വത്തിന്റെയും നിഷ്പക്ഷതയുടെയും പ്രതീകമായി ദേശീയ ത്രിവർണ്ണ പതാകയ്ക്കൊപ്പം സൂര്യനെയും അതിൽ ചിത്രീകരിച്ചിരുന്നു. 2001 ഡിസംബർ 14-ന് പ്രധാനമന്ത്രി അടൽ ബിഹാരി വാജ്പേയി ഉദ്ഘാടനം ചെയ്ത പ്ലാറ്റിനം ജൂബിലിയോടനുബന്ധിച്ച് തപാൽ വകുപ്പ് ഫസ്റ്റ് ഡേ കവർ പുറത്തിറക്കി.

കേസ് സ്റ്റഡികൾ: ഈ സംവിധാനം എങ്ങനെ പ്രവർത്തിക്കുന്നു

മുംബൈയിൽ ദിവസവും രാവിലെ അയ്യായിരത്തോളം ഡബ്ബാവാലകൾ രണ്ട് ലക്ഷത്തോളം വീട്ടിലുണ്ടാക്കിയ ഉച്ചഭക്ഷണ പാത്രങ്ങൾ ശേഖരിക്കുകയും പാത്രത്തിന്റെ അടപ്പിൽ ചോക്ക് കൊണ്ട് അടയാളപ്പെടുത്തിയ കളർ കോഡ് മാത്രം ഉപയോഗിച്ച് ഉച്ചഭക്ഷണ സമയത്തിന് മുമ്പായി ഓരോന്നും കൃത്യമായ മേശപ്പുറത്ത് എത്തിക്കുകയും ചെയ്യുന്നു. ഇതിലും വളരെ ഉയർന്ന ഉത്തരവാദിത്തത്തോടെ കമ്മീഷൻ എല്ലാ വർഷവും സമാനമായ ഒരു ദൗത്യം നിർവഹിക്കുന്നുണ്ട്: കൃത്യമായ ചോദ്യപേപ്പർ കൃത്യമായ മിനിറ്റിൽ കൃത്യമായ ഉദ്യോഗാർത്ഥിയിൽ എത്തണം, കൂടാതെ ഓരോ ഉത്തരവും യോഗ്യതയുടെ അടിസ്ഥാനത്തിൽ മാത്രം വിലയിരുത്തപ്പെടുകയും വേണം. അത് എങ്ങനെയെന്ന് താഴെ പറയുന്ന കേസ് സ്റ്റഡികൾ വിശദീകരിക്കുന്നു.

ഒരു ഉദ്യോഗാർത്ഥി ഒരു തിരഞ്ഞെടുപ്പ് മാത്രമേ നടത്തുന്നുള്ളൂ: നഗരം. ആ നഗരത്തിനുള്ളിലെ പരീക്ഷാ കേന്ദ്രവും മുറിയും സിസ്റ്റം അനുവദിക്കുന്നു. അങ്ങനെ പരീക്ഷാ ദിനമാകുമ്പോഴേക്കും ഓരോ ഉദ്യോഗാർത്ഥിക്കും സിസ്റ്റത്തിന് മാത്രം മുൻകൂട്ടി അറിയാവുന്ന ഒരു സവിശേഷ വിലാസം ഉണ്ടായിരിക്കും - നഗരം, പരീക്ഷാ കേന്ദ്രം, മുറി, ഉദ്യോഗാർത്ഥി. ഒരേ മുറിയിലിരിക്കുന്ന ഉദ്യോഗാർത്ഥികൾ എഴുതുന്നത് വ്യത്യസ്ത പരീക്ഷകളായിരിക്കാം - സിവിൽ സർവീസസ് മെയിൻ പരീക്ഷയിൽ മാത്രം 48 ഐച്ഛിക വിഷയങ്ങളിൽ (ഓപ്ഷണൽ സബ്ജക്റ്റുകൾ) നിന്നാണ് ഉദ്യോഗാർത്ഥികൾ തിരഞ്ഞെടുക്കുന്നത് - അതിനാൽ മുറി തിരിച്ച് തരംതിരിച്ച സീൽ ചെയ്ത ഓരോ പാക്കറ്റിലും ആ കേന്ദ്രത്തിന് ആവശ്യമായ ചോദ്യപേപ്പറുകൾ കൃത്യമായി അടങ്ങിയിരിക്കണം.

കർശനമായ രഹസ്യസ്വഭാവമുള്ള നിബന്ധനകൾ പാലിച്ചുകൊണ്ട് തികച്ചും അജ്ഞാതമായി പ്രവർത്തിക്കുന്ന അക്കാദമിക വിദഗ്ധർ തയ്യാറാക്കുന്ന ചോദ്യബാങ്കുകളിൽ നിന്നാണ് ചോദ്യപേപ്പറുകൾ നിർമ്മിക്കുന്നത്. ഒരു വിദഗ്ധനും ഒരു മുഴുവൻ ചോദ്യപേപ്പർ തയ്യാറാക്കുന്നില്ല, കൂടാതെ ഏതെല്ലാം ചോദ്യങ്ങളാണ് ഉപയോഗിക്കുകയെന്നോ എപ്പോഴാണ് ഉപയോഗിക്കുകയെന്നോ ഒരു വിദഗ്ധനും അറിയുകയുമില്ല. ഒരു ചോദ്യപേപ്പർ തയ്യാറാക്കുമ്പോൾ അത് മുഴുവൻ സിലബസിനെയും ഉൾക്കൊള്ളുന്നുണ്ടെന്നും അതിന്റെ കാഠിന്യം തുല്യമായി പാലിക്കപ്പെടുന്നുണ്ടെന്നും മുൻപത്തെ ഒരു യു.പി.എസ്.സി പരീക്ഷയിലും ചോദിക്കാത്ത ചോദ്യങ്ങളാണ് ഉൾപ്പെടുത്തിയിട്ടുള്ളതെന്നും കമ്മീഷൻ ഉറപ്പുവരുത്തുന്നു.

'അറിയേണ്ട സംഗതികൾ മാത്രം അറിയുക' എന്ന തത്ത്വത്തിലാണ് ഈ പ്രക്രിയ മുഴുവൻ നിലകൊള്ളുന്നത് - ചെയർമാൻ ഉൾപ്പെടെയുള്ള ഒരു വ്യക്തിക്കും ഇതിന്റെ സമ്പൂർണ്ണ രൂപം മുൻകൂട്ടി കാണാൻ കഴിയില്ല.

നാഷണൽ ഇ-ഗവേണൻസ് ഡിവിഷനുമായി സഹകരിച്ച് 2025 സെപ്റ്റംബർ 14-ന് നടന്ന എൻ.ഡി.എ & എൻ.എ (II), സി.ഡി.എസ് (II) പരീക്ഷകളിൽ ഗുരുഗ്രാമിലെ തിരഞ്ഞെടുത്ത പരീക്ഷാ കേന്ദ്രങ്ങളിൽ ആർട്ടിഫിഷ്യൽ ഇന്റലിജൻസ് (AI) അധിഷ്ഠിത ഫേഷ്യൽ ഓതന്റിക്കേഷൻ - അപേക്ഷയിലെ ഫോട്ടോയുമായി ഉദ്യോഗാർത്ഥിയുടെ തത്സമയ ചിത്രം ഒത്തുനോക്കുന്ന രീതി - കമ്മീഷൻ പരീക്ഷണാടിസ്ഥാനത്തിൽ നടപ്പിലാക്കി. 2026 മേയ് 24-ന് നടന്ന സിവിൽ സർവീസസ് (പ്രിലിമിനറി) പരീക്ഷയിൽ ഇത് വൻതോതിൽ നടപ്പിലാക്കുകയും നിരീക്ഷകരുടെ (ഇൻവിജിലേറ്റർ) മൊബൈൽ ഫോണുകൾ വഴി 5.50 ലക്ഷത്തോളം ഉദ്യോഗാർത്ഥികളുടെ മുഖം പരിശോധിക്കുകയും ചെയ്തു. ഓരോ ഉദ്യോഗാർത്ഥിക്കും 6 മുതൽ 8 സെക്കൻഡ് സമയം മാത്രമാണ് ഇതിനായി എടുത്തത്.

2026-ലെ സിവിൽ സർവീസസ് (പ്രിലിമിനറി) പരീക്ഷയ്ക്ക് മുന്നോടിയായി കഴിഞ്ഞ 15 വർഷത്തെ ഉദ്യോഗാർത്ഥികളുടെ വിവരങ്ങൾ പരിശോധിക്കുകയും അധിക അവസരങ്ങൾ നേടുന്നതിനായി വ്യാജ വിവരങ്ങൾ നൽകിയ 569 അപേക്ഷകരെ കണ്ടെത്തുകയും നിരസിക്കുകയും ചെയ്തു.

രാഷ്ട്രത്തിന് ആവശ്യമായി വന്നപ്പോഴൊക്കെയും കമ്മീഷൻ അതിന്റെ ഗുണനിലവാരം കുറയ്ക്കാതെ തന്നെ പ്രവർത്തനങ്ങൾ വിപുലീകരിച്ചിട്ടുണ്ട്. 1948 ജൂലൈയിൽ സ്പെഷ്യൽ റിക്രൂട്ട്മെന്റ് ബോർഡ് രേഖകളുടെയും അഭിമുഖങ്ങളുടെയും അടിസ്ഥാനത്തിൽ 27 മുതൽ 45 വയസ്സുവരെ പ്രായമുള്ള പരിചയസമ്പന്നരായ ഉദ്യോഗസ്ഥരെ ഐ.എ.എസ് (IAS), ഐ.പി.എസ് (IPS) സർവീസുകളിലേക്ക് റിക്രൂട്ട് ചെയ്തു. 1956–57-ൽ നടപ്പിലാക്കിയ പ്രത്യേക പദ്ധതിയൂടെ 22,000-ത്തിലധികം ഉദ്യോഗാർത്ഥികളെ പരിശോധനയ്ക്ക് വിധേയമാക്കി. 1958-ൽ വിദേശത്തുള്ള അപേക്ഷകർ ഉൾപ്പെടെ 197 ശാസ്ത്രജ്ഞരെയും സാങ്കേതിക വിദഗ്ധരെയും ഒരു സ്പെഷ്യൽ റിക്രൂട്ട്മെന്റ് ബോർഡ് ദേശീയ പൂളിലേക്ക് തിരഞ്ഞെടുക്കുകയും ഇതിന്റെ അംഗബലം 1962-ഓടെ 500 ആയി ഉയരുകയും ചെയ്തു. 1962-ലെ അടിയന്തിരാവസ്ഥക്കാലത്ത് ഒരു എമർജൻസി കമ്മീഷൻ രണ്ട് മാസത്തിനുള്ളിൽ പ്രതിരോധവുമായി ബന്ധപ്പെട്ട 1,353 തസ്തികകളിലേക്ക് നിയമനം നടത്തി.

കോവിഡ്-19 കാലഘട്ടത്തിൽ ട്രെയിൻ ഗതാഗതം തടസ്സപ്പെട്ടപ്പോൾ കമ്മീഷൻ ഒറ്റത്തവണ ആശ്വാസ നടപടിയെന്ന നിലയിൽ അഭിമുഖത്തിന് എത്തിയ ഉദ്യോഗാർത്ഥികൾക്ക് വിമാനക്കൂലി തിരികെ നൽകുകയും ഇ-സമ്മൻസ് കത്തുകളുള്ള ഉദ്യോഗാർത്ഥികളെ നിയന്ത്രിത മേഖലകളിലൂടെ യാത്ര ചെയ്യാൻ അനുവദിക്കണമെന്ന് സംസ്ഥാനങ്ങളോട് അഭ്യർത്ഥിക്കുകയും താമസത്തിനും ഗതാഗതത്തിനുമായി സഹായങ്ങൾ നൽകുകയും ചെയ്തു. കൂടാതെ മാസ്ക്, ഫേസ് ഷീൽഡ്, സാനിറ്റൈസർ, ഗ്ലൗസ് എന്നിവയടങ്ങിയ സീൽ ചെയ്ത ഓരോ കിറ്റുകൾ ഓരോ ഉദ്യോഗാർത്ഥിക്കും കൈമാറുകയും ചെയ്തു.

സൗകര്യമൊരുക്കുന്നതിനാണ് പ്രഥമ പരിഗണന. കാഴ്ചപരിമിതിയുള്ള ഉദ്യോഗാർത്ഥികൾക്കായി 1994-ൽ കമ്മീഷൻ സ്ക്രൈബുമാരെ (പരീക്ഷ എഴുതാൻ സഹായിക്കുന്നയാൾ) അവതരിപ്പിച്ചു. ഇന്ന് സ്ക്രൈബിന്റെ സഹായത്തിനും അധിക സമയത്തിനുമുള്ള അവകാശം ഭിന്നശേഷിക്കാർക്കുള്ള (PwBD) നിയമപരമായ അവകാശമാണ്. ഇവർക്ക് അവർക്കിഷ്ടമുള്ള പരീക്ഷാ കേന്ദ്രം അനുവദിക്കുകയും കൂടെ ഒരാളെ കൊണ്ടുവരാൻ അനുവദിക്കുകയും അഭിമുഖവേളയിൽ ഒരു ഫെസിലിറ്റേറ്ററുടെ സഹായം ലഭ്യമാക്കുകയും ചെയ്യുന്നു. വനിതാ ഉദ്യോഗാർത്ഥികൾക്ക് പരീക്ഷാ ഫീസിൽ ഇളവ് നൽകുന്നുണ്ട്. തങ്ങളുടെ നിയന്ത്രണത്തിന് അതീതമായ സംഭവങ്ങളാൽ പരീക്ഷാ തയ്യാറെടുപ്പുകൾ തടസ്സപ്പെട്ടവർക്കും പ്രായപരിധിയിൽ ഇളവുകൾ അനുവദിച്ചിട്ടുണ്ട് - ഗോവ വിമോചന സമര സേനാനികൾ (1961–62), ബംഗ്ലാദേശ് വിമോചന യുദ്ധത്താലും ഉഗാണ്ട-സാൻസിബാർ പ്രതിസന്ധിയാലും നാടുകടത്തപ്പെട്ട ഇന്ത്യക്കാർ (1971–72), ഗൾഫ് യുദ്ധബാധിതരായ ഇന്ത്യക്കാർ (1991).

തുടർന്ന് നീതിപൂർവ്വമായ സമീപനം: രേഖാമൂലമുള്ള പരീക്ഷകൾ മുതൽ ഇന്റർവ്യൂ ബോർഡ് വരെ വ്യക്തിത്വം വെളിപ്പെടുത്താത്തതും നിഷ്പക്ഷവുമായ ഒരു മൂല്യനിർണ്ണയ സംവിധാനം. സംവരണ നയം രൂപീകരിച്ചത് കമ്മീഷനല്ലെങ്കിലും അത് നടപ്പിലാക്കുന്നതിനുള്ള ദേശീയ പ്ലാറ്റ്‌ഫോം നിർമ്മിച്ചത് കമ്മീഷനാണ്. 2019-ലെ സിവിൽ സർവീസസ് പരീക്ഷ മുതൽ സാമ്പത്തികമായി പിന്നോക്കം നിൽക്കുന്ന വിഭാഗങ്ങൾക്കുള്ള (EWS) സംവരണവും 2020 മുതൽ ഓൺലൈൻ റിക്രൂട്ട്‌മെന്റ് അപേക്ഷാ ഫോമിൽ ട്രാൻസ്‌ജെൻഡറുകൾക്കായി പ്രത്യേക വിഭാഗവും ഇതിൽ ഉൾപ്പെടുന്നു.

പരീക്ഷയുടെ ഓരോ ഘട്ടവും വിജയിക്കുകയും എന്നാൽ അന്തിമ പട്ടികയിൽ വളരെ കുറഞ്ഞ മാർക്കിന് സ്ഥാനം നഷ്ടപ്പെടുകയും ചെയ്യുന്ന ഉദ്യോഗാർത്ഥികളെ പൊതുസർവീസിന് പൂർണ്ണമായി നഷ്ടപ്പെടുന്നില്ല. 2018 ഓഗസ്റ്റ് 20 മുതൽ പ്രാബല്യത്തിൽ വരികയും 2017-ലെ കമ്പൈൻഡ് മെഡിക്കൽ സർവീസസ് പരീക്ഷയിൽ ആദ്യമായി ഉപയോഗിക്കുകയും ചെയ്ത പബ്ലിക് ഡിസ്ക്ലോഷർ സ്കീം പ്രകാരം ഇത്തരം താല്പര്യമുള്ള ഉദ്യോഗാർത്ഥികളുടെ വിവരങ്ങൾ തൊഴിൽ ദാതാക്കൾക്ക് ലഭ്യമാക്കിയിരുന്നു. 2025 ജൂൺ 9-ന് ഇത് പരിഷ്കരിക്കുകയും പ്രതിഭാ സേതു എന്ന് പുനർനാമകരണം ചെയ്യുകയും ചെയ്തു. ഇത് ഉദ്യോഗാർത്ഥികളെ മന്ത്രാലയങ്ങൾ, പൊതുമേഖലാ സ്ഥാപനങ്ങൾ, സ്വയംഭരണ സ്ഥാപനങ്ങൾ, സ്വകാര്യ സ്ഥാപനങ്ങൾ എന്നിവയുൾപ്പെടെയുള്ള അംഗീകൃത തൊഴിൽ ദാതാക്കളുമായി ബന്ധിപ്പിക്കുന്നു.

സമീപകാല വികസന പ്രവർത്തനങ്ങൾ

ഇന്നത്തെ കമ്മീഷൻ

ഡോ.അജയ് കുമാർ ചെയർമാനായി കമ്മീഷനെ നയിക്കുന്നു (2025 മേയ് 15 മുതൽ). ലഫ്റ്റനന്റ് ജനറൽ രാജ് ശുക്ല (റിട്ട.), ശ്രീമതി സുമൻ ശർമ്മ, ശ്രീ ബിദ്യുത് ബിഹാരി സ്വയിൻ, ഡോ.ദിനേശ് ദാസ, ശ്രീ ഷീൽ വർദ്ധൻ സിംഗ്, ശ്രീ സഞ്ജയ് വർമ്മ, ശ്രീമതി സുജാത ചതുർവേദി, ശ്രീമതി അനുരാധ പ്രസാദ് എന്നിവരാണ് കമ്മീഷനിലെ എട്ട് അംഗങ്ങൾ. എട്ട് അംഗങ്ങളിൽ മൂന്ന് പേർ വനിതകളാണ്. നൂറുവർഷത്തിനിടയിൽ ഈ പ്രസ്ഥാനം എത്രത്തോളം മുന്നേറിയെന്ന് വ്യക്തമാക്കുന്നതാണ് ഈ ഘടന.

നൂറുവർഷമായി രാഷ്ട്രത്തിന്റെ ഏറ്റവും നിർണ്ണായകമായ ഉത്തരവാദിത്തങ്ങളിലൊന്നാണ് കമ്മീഷൻ നിർവഹിച്ചുപോരുന്നത്. യോഗ്യതയെ അംഗീകരിക്കുക, നിഷ്പക്ഷത പുലർത്തുക, ആനുകൂല്യങ്ങൾ, ഭൂമിശാസ്ത്രപരമായ പ്രത്യേകതകൾ, ഭാഷ അല്ലെങ്കിൽ സാഹചര്യം എന്നിവയ്ക്കപ്പുറത്തേക്ക് അവസരങ്ങൾ എത്തിച്ചേരുന്നുവെന്ന് ഉറപ്പാക്കുക. ഒരു നൂറ്റാണ്ട് മുമ്പ് മത്സരിക്കാനുള്ള ഇന്ത്യക്കാരുടെ അവകാശത്തിനായുള്ള പോരാട്ടമായിരുന്നു അത്. ഇന്ന് രാജ്യത്തെ സേവിക്കാൻ ആഗ്രഹിക്കുന്ന അർഹരായ ഇന്ത്യക്കാരിലേക്ക് ഈ അവകാശം യഥാർത്ഥത്തിൽ എത്തിച്ചേരുന്നുവെന്ന് ഉറപ്പാക്കുക എന്നതാണ് ദൗത്യം.

അവലംബം

• Department of Personnel and Training (DoPT)

Please See PDF

***

SK