पत्र सूचना कार्यालय

অৱলোকন

ভাৰত বিশ্বৰ আগশাৰীৰ বাণিজ্যিক ৰাষ্ট্ৰসমূহৰ ভিতৰত অন্যতম, আৰু ইয়াৰ বাণিজ্যৰ অধিকাংশই সামুদ্ৰিক পথৰ জৰিয়তে প্ৰবাহিত হয়। সাগৰ ভাৰতৰ বাবে কেৱল পৰিবহনৰ মাধ্যম নহয়; ই বাণিজ্যৰ মেৰুদণ্ড। ই শক্তি সুৰক্ষা সমৰ্থন কৰে আৰু ৰাষ্ট্ৰীয় অৰ্থনীতিৰ বিভিন্ন খণ্ডত অৰ্থনৈতিক বিকাশক আগুৱাই নিয়ে। খাৰুৱা তেল আমদানিৰ পৰা আৰম্ভ কৰি সামগ্ৰী ৰপ্তানিলৈকে সামুদ্ৰিক সংযোগে ভাৰতৰ অৰ্থনীতিৰ প্ৰায় প্ৰতিটো খণ্ডকে আধাৰ প্ৰদান কৰে। উপকূলীয় জাহাজ পৰিবহন আৰু অভ্যন্তৰীণ জলপথে এই জীৱনৰেখাক অধিক শক্তিশালী কৰে, যাৰ ফলত বাণিজ্যত স্থিতিস্থাপকতা আৰু দক্ষতা নিশ্চিত হয়।

ভাৰতৰ সামুদ্ৰিক বাণিজ্য সম্প্ৰসাৰিত হৈছে, কিন্তু মুখ্য সামুদ্ৰিক বীমা সেৱাসমূহ এতিয়াও বহুলাংশে বিদেশী সেৱা প্ৰদানকাৰীৰ ওপৰত নিৰ্ভৰশীল। ইয়াৰ ফলত সুৰক্ষা আৰু ক্ষতিপূৰণ প্ৰিমিয়ামৰ বাবদ বছৰি ৪৫–৬০ মিলিয়ন মাৰ্কিন ডলাৰ বহিঃপ্ৰবাহ হোৱাৰ উপৰি বিদেশত সামুদ্ৰিক বীমাৰ বাবে অধিক ধনো পৰিশোধ কৰিবলগীয়া হয়।

ভাৰত মেৰিটাইম ইঞ্চুৰেঞ্চ পুল-ক ঘৰুৱা সামুদ্ৰিক বীমা সক্ষমতাৰ এই কৌশলগত ব্যৱধানৰ বাবে এক সাৰ্বভৌম সমাধান হিচাপে পৰিকল্পনা কৰা হৈছে। ১৮ এপ্ৰিল ২০২৬ত অনুমোদিত আৰু ১২ মে’ ২০২৬ত আনুষ্ঠানিকভাৱে আৰম্ভ কৰা বি.এম.আই.পি. হৈছে ১৩,৯০৬.৫০ কোটি টকা (১.৫ বিলিয়ন মাৰ্কিন ডলাৰ)ৰ ভাৰতৰ প্ৰথম ঘৰুৱা সামুদ্ৰিক বীমা পুল। ই ১২,৯৮০ কোটি টকা (১.৪ বিলিয়ন মাৰ্কিন ডলাৰ)ৰ সাৰ্বভৌম সমৰ্থন নিশ্চিত কৰে। প্ৰথমবাৰৰ বাবে, ভাৰতীয় কোম্পানীসমূহে অধিক মূল্যৰ ভাৰতীয় জাহাজসমূহৰ স্বতন্ত্ৰভাৱে বীমা কৰি আছে। এই বীমা কভাৰেজত কাঠামো আৰু যন্ত্ৰপাতি, অধিক বিপদসংকুল অঞ্চলত যুদ্ধৰ বিপদৰ পৰা মালবস্তুৰ নিৰাপত্তা আৰু সুৰক্ষা আৰু ক্ষতিপূৰণ অন্তৰ্ভুক্ত আছে।

ভাৰতৰ সামুদ্ৰিক খণ্ড: সাগৰৰ ৰাষ্ট্ৰ

ভাৰতত ১২টা প্ৰধান আৰু ২১৭টা অ-প্ৰধান বন্দৰ আছে, যিয়ে সমগ্ৰ দেশত বিভিন্ন ধৰণৰ কাৰ্গো পৰিচালনা কৰে। ২০২৫–২৬ চনত ভাৰতৰ প্ৰধান আৰু অ-প্ৰধান বন্দৰসমূহে ১,৬৬৮ মিলিয়ন মেট্ৰিক টন কাৰ্গো পৰিচালনা কৰিছিল, যিটো অৰ্থনৈতিক বিকাশ আৰু বাণিজ্য সম্প্ৰসাৰণৰ সৈতে বৃদ্ধি পাইছে।

• ভাৰতৰ উপকূলৰেখা প্ৰায় ১১,০৯৮ কিলোমিটাৰ, যি বিশ্বৰ অন্যতম দীঘল উপকূলৰেখা, আৰু ইয়াত প্ৰাকৃতিক বন্দৰ আৰু বন্দৰ স্থাপনৰ স্থান আছে।
• এক্সক্লুছিভ ইকনমিক জ’ন ২.৪ মিলিয়ন বৰ্গ কিলোমিটাৰলৈ বিস্তৃত, যিয়ে সামুদ্ৰিক সম্পদ আৰু মৎস্য আহৰণ কাৰ্যকলাপৰ ওপৰত সাৰ্বভৌম অধিকাৰ প্ৰদান কৰে।
• অভ্যন্তৰীণ জলপথ ১৪,৫০০ কিলোমিটাৰতকৈ অধিক, যিয়ে ব্যয়-সাশ্ৰয়ী মাল পৰিবহনৰ বাবে নদী, খাল আৰু জলাভূমিৰ পথ প্ৰদান কৰে।
• উপকূলীয় ৰাজ্য আৰু কেন্দ্ৰীয় শাসিত অঞ্চলসমূহ সাগৰৰ সৈতে সংলগ্ন, যাৰ ফলত জনসংখ্যা আৰু উদ্যোগে সামুদ্ৰিক বাণিজ্যৰ পৰা লাভান্বিত হোৱাৰ সুযোগ লাভ কৰে।
• সামুদ্ৰিক জীৱিকাই ৩০ মিলিয়নতকৈ অধিক লোকক সহায় কৰে, যাৰ ভিতৰত মৎস্যজীৱী, বন্দৰ কৰ্মী, নাৱিক আৰু জাহাজ নিৰ্মাতা অন্তৰ্ভুক্ত।

ভাৰত মেৰিটাইম ইঞ্চুৰেঞ্চ পুলৰ প্ৰয়োজন কিয়

২০২৬ চনৰ মাজভাগলৈ ভাৰতীয় পতাকাবাহী বহৰত ১,৬০৯খন জাহাজ আৰু ১৪.৩৩ মিলিয়ন জি.টি. (Gross Tonnage - GT) আছে, যিটো ২০১৫ চনৰ পৰা টনেজত প্ৰায় ৩৬% বৃদ্ধি। ভাৰতৰ বাণিজ্যিক মূল্যৰ ৯৫% আৰু বাণিজ্যিক পৰিমাণৰ ৭০% সামুদ্ৰিক পথৰ জৰিয়তে প্ৰবাহিত হয়।

• সামুদ্ৰিক বীমা: অদৃশ্য জীৱনৰেখা

বিশ্বব্যাপী বাণিজ্যৰ বাবে সামুদ্ৰিক বীমা বাধ্যতামূলক। হাল আৰু যন্ত্ৰপাতি পলিচিয়ে জাহাজসমূহক সুৰক্ষা দিয়ে, কাৰ্গো বীমাই সামগ্ৰীসমূহ সুৰক্ষিত কৰে, আৰু সুৰক্ষা আৰু ক্ষতিপূৰণ-এ প্ৰদূষণ বা ক্ৰুৰ আঘাতৰ দৰে দায়বদ্ধতাসমূহ সামৰি লয়। যুদ্ধজনিত বিপদ বীমাই জলদস্যুতা আৰু সংঘাতৰ বিৰুদ্ধে সুৰক্ষা প্ৰদান কৰে। একেলগে, এইসমূহে ভাৰতৰ জাহাজ পৰিবহন অৰ্থনীতিৰ বাবে বীমাক এক আইনী আৰু বাণিজ্যিক প্ৰয়োজনীয়তা হিচাপে গঢ়ি তোলে।

• বিদেশী সুৰক্ষা আৰু ক্ষতিপূৰণ ক্লাবৰ ওপৰত অতিনিৰ্ভৰশীলতা

ভাৰত বীমা মূল্য শৃংখলাৰ বাবে বিদেশী বীমাকৰ্তাৰ ওপৰত নিৰ্ভৰশীল হৈ আহিছে। ভাৰতীয় জাহাজৰ মালিকসকল প্ৰায় সম্পূৰ্ণৰূপে ১৩টা আন্তঃৰাষ্ট্ৰীয় সুৰক্ষা আৰু ক্ষতিপূৰণ ক্লাবৰ ওপৰত নিৰ্ভৰশীল, যাৰ অধিকাংশই পশ্চিমীয়া দেশসমূহত অৱস্থিত। এই নিৰ্ভৰশীলতাই ভাৰতক হঠাতে কভাৰেজ প্ৰত্যাহাৰ বা ৰাজনৈতিকভাৱে প্ৰভাৱিত সিদ্ধান্তৰ প্ৰতি অসুৰক্ষিত কৰি তোলে, যিয়ে ঘৰুৱা বিকল্পৰ গুৰুত্বক উজ্জ্বল কৰি তোলে।

• ভূ-ৰাজনৈতিক অস্থিৰতা আৰু বাণিজ্য ব্যাঘাত

লোহিত সাগৰত সংঘাত আৰু ষ্ট্ৰেইট অৱ হৰমুজৰ ওচৰৰ উত্তেজনাই গুৰুত্বপূৰ্ণ পথসমূহত ব্যাঘাত সৃষ্টি কৰিছে। খাৰুৱা তেলৰ এক বৃহৎ অংশ সাগৰীয় পথে আমদানি কৰাৰ পৰিপ্ৰেক্ষিতত ভাৰতৰ শক্তি সুৰক্ষা নিৰৱচ্ছিন্ন কভাৰেজৰ ওপৰত নিৰ্ভৰশীল। এই সময়ছোৱাত বিদেশী বীমাকৰ্তাসকলে বীমা প্ৰিমিয়াম বৃদ্ধি কৰিছিল অথবা কভাৰেজ প্ৰদান বন্ধ কৰিছিল। ইয়াৰ ফলত জাহাজৰ মালিকসকলৰ ব্যয় তীব্ৰভাৱে বৃদ্ধি পাইছিল আৰু ঘৰুৱা সুৰক্ষা ব্যৱস্থাৰ প্ৰয়োজনীয়তা বৃদ্ধি পাইছিল।

• ঘৰুৱা দক্ষতাৰ অনুপস্থিতি

ইয়াৰ পূৰ্বে ভাৰতত সামুদ্ৰিক আণ্ডাৰৰাইটিং আৰু দাবী ব্যৱস্থাপনাৰ ক্ষেত্ৰত প্ৰতিষ্ঠানিক গভীৰতা নাছিল। বি.এম.আই.পি.-এ এই দক্ষতা দেশীয়ভাৱে গঢ়ি তুলিছে, যাৰ ফলত বিশ্বমানৰ ঘৰুৱা বীমা খণ্ডৰ ভেটি স্থাপন হৈছে আৰু লণ্ডন বা ছুইজাৰলেণ্ডৰ দৰে বিদেশী কেন্দ্ৰৰ ওপৰত নিৰ্ভৰশীলতা হ্ৰাস পাইছে।

ভাৰত মেৰিটাইম ইঞ্চুৰেঞ্চ পুল-এ জাহাজ আৰু কাৰ্গোৰ বাবে সুলভ, সাৰ্বভৌম কভাৰেজ নিশ্চিত কৰে, যিয়ে বিশ্বব্যাপী বিপদৰ বিৰুদ্ধে স্থিতিস্থাপকতা বৃদ্ধি কৰে।

ভাৰত মেৰিটাইম ইঞ্চুৰেঞ্চ পুল: নক্সা, গাঁথনি আৰু কভাৰেজ

পুলটোৱে বাণিজ্যিক পথত জাহাজ আৰু কাৰ্গো সুৰক্ষিত কৰিবলৈ সামুদ্ৰিক বীমা কভাৰ প্ৰদান কৰে। ই বৃহৎ সামুদ্ৰিক বিপদ পৰিচালনাৰ বাবে সামূহিক বীমাকৰ্তা অংশগ্ৰহণ আৰু গাঁথনিগত শাসন ব্যৱস্থাৰ জৰিয়তে কাম কৰে।

• সাৰ্বভৌম নিশ্চয়তা: ১২,৯৮০ কোটি টকা (১.৪ বিলিয়ন আমেৰিকান ডলাৰ)ৰ চৰকাৰ-সমৰ্থিত সহযোগিতাই বিত্তীয় শক্তিশালীতা নিশ্চিত কৰে। এই নিশ্চয়তাই বৃহৎ লোকচানৰ পৰিস্থিতিতো দায়বদ্ধতাসমূহ পূৰণ কৰে।
• আণ্ডাৰৰাইটিং সক্ষমতা: পুলটোৱে ১৩,৯০৬.৫ কোটি টকা, অৰ্থাৎ ১.৫ বিলিয়ন মাৰ্কিন ডলাৰ মূল্যৰ বিপদ বীমা কৰিব পাৰে, যি সাৰ্বভৌম নিশ্চয়তাৰ দ্বাৰা সমৰ্থিত আৰু বৃহৎ সামুদ্ৰিক ক্ষতি সামৰি লোৱাৰ ক্ষমতা বৃদ্ধি কৰে।
• বিপদৰ কভাৰেজ: কাঠামো আৰু যন্ত্ৰপাতি, কাৰ্গো, সুৰক্ষা আৰু ক্ষতিপূৰণ, আৰু যুদ্ধজনিত বিপদ অন্তৰ্ভুক্ত।
• জাহাজৰ যোগ্যতা: ভাৰতীয় পতাকাবাহী বা ভাৰতীয় প্ৰতিষ্ঠানৰ মালিকানাধীন, পৰিচালিত বা নিয়ন্ত্ৰিত জাহাজ, অথবা ভাৰত অভিমুখী বা ভাৰতৰ পৰা আৰম্ভ হোৱা কাৰ্গো জাহাজসমূহ যোগ্য।
• সময়কাল: ইয়াৰ সময়কাল ১০ বছৰ, যিটো ১৫ বছৰলৈ সম্প্ৰসাৰণযোগ্য।
• যুটীয়া পলিচি জাৰি: পুলৰ সদস্য ঘৰুৱা বীমাকৰ্তাসকলে তেওঁলোকৰ সংযুক্ত আণ্ডাৰৰাইটিং সক্ষমতা ব্যৱহাৰ কৰি পলিচিসমূহ জাৰি কৰিব। এই পলিচিসমূহৰ অধীনত সামৰি লোৱা বিপদসমূহ তাৰ পিছত প্ৰতিগৰাকী সদস্যই প্ৰতিশ্ৰুতিবদ্ধ কৰা সক্ষমতাৰ অনুপাতত পুলৰ সকলো সদস্যৰ দ্বাৰা সামূহিকভাৱে পুনৰবীমা কৰা হ’ব।
• দাবী ব্যৱস্থাপনা: ১০০ মিলিয়ন মাৰ্কিন ডলাৰ পৰ্যন্ত দাবীসমূহ সঞ্চিত ৰিজাৰ্ভ আৰু পুনৰবীমা উদ্ধাৰৰ পৰা পূৰণ কৰা হয়। বৃহৎ দাবীৰ ক্ষেত্ৰত পুলৰ ৰিজাৰ্ভ সম্পূৰ্ণৰূপে শেষ হোৱাৰ পিছতহে সাৰ্বভৌম নিশ্চয়তা সক্ৰিয় হয়।
• প্ৰশাসন: জেনেৰেল ইঞ্চুৰেঞ্চ কৰ্প’ৰেচন অৱ ইণ্ডিয়া-এ পুল প্ৰশাসক হিচাপে কাম কৰে, দৈনন্দিন কাৰ্যকলাপ পৰিচালনা কৰে। ই কাৰ্যসম্পাদন প্ৰতিবেদন দাখিল কৰে আৰু পুলৰ দক্ষ কাৰ্যকলাপত সহায় কৰে।
• শাসন: এটা গভৰ্ণিং ব’ডিয়ে পুলৰ কাৰ্যকলাপ তদাৰক আৰু নিয়ন্ত্ৰণ কৰে, নিয়ম-নীতি মানি চলা আৰু সুচাৰুৰূপে কাৰ্যসম্পাদন নিশ্চিত কৰে।
• আণ্ডাৰৰাইটিং শৃংখলা: এটা আণ্ডাৰৰাইটিং কমিটীয়ে সুস্থ আৰু সামঞ্জস্যপূৰ্ণ বিপদ মূল্যায়ন নিশ্চিত কৰে, যিয়ে দীৰ্ঘম্যাদী বিত্তীয় স্থায়িত্বত সহায় কৰে।

• কভাৰেজৰ প্ৰকাৰ আৰু পৰিসৰ:

বি.এম.আই.পি.-ৰ পৰিকল্পনা সামুদ্ৰিক বিপদৰ শ্ৰেণীসমূহৰ সম্পূৰ্ণ পৰিসৰত ব্যাপক কভাৰেজ প্ৰদান কৰাৰ বাবে কৰা হৈছে। ই নিশ্চিত কৰে যে ভাৰতীয় বাণিজ্যৰ সৈতে জড়িত কোনো জাহাজ বা কাৰ্গো ঘৰুৱা বীমা সুৰক্ষাৰ অবিহনে নাথাকে, পথ বা বিপদৰ প্ৰকৃতি যিয়েই নহওক।

• জাহাজৰ কাঠামো আৰু যন্ত্ৰপাতিৰ যুদ্ধজনিত কভাৰেজ: ই জাহাজৰ হাল ষ্ট্ৰাকচাৰ (জাহাজৰ মূল কাঠামো), প্ৰপালচন ছিষ্টেম (জাহাজ চলোৱা যন্ত্ৰপাতি) আৰু সংলগ্ন সঁজুলিসমূহৰ ক্ষতিৰ পৰা সুৰক্ষা দিয়ে। ইয়াৰ ফলত ভাৰতৰ বাণিজ্যিক জাহাজৰ বহৰৰ মূলধন সুৰক্ষিত থাকে আৰু ইয়াৰ বীমা দেশৰ ভিতৰতে কৰা হয়।
• কাৰ্গো যুদ্ধজনিত কভাৰেজ: ই আন্তঃৰাষ্ট্ৰীয় সামুদ্ৰিক পথৰ জৰিয়তে পৰিবহন কৰা সামগ্ৰীসমূহক চালানৰ ক্ষতি বা নষ্ট হোৱাৰ পৰা সুৰক্ষা দিয়ে। ইয়াৰ ফলত অধিক বিপদসংকুল বা সংঘাতপূৰ্ণ সামুদ্ৰিক পথত ভাৰতীয় ৰপ্তানিকৰ্তা আৰু আমদানিকৰ্তাসকল লাভান্বিত হয়।

• সুৰক্ষা আৰু ক্ষতিপূৰণ কভাৰেজ: ই প্ৰদূষণ, তেল প্ৰদূষণ পৰিষ্কাৰ কৰা, ধ্বংসাৱশেষ আঁতৰোৱা, কৰ্মচাৰীৰ দুৰ্ঘটনা আৰু মালবস্তুৰ ক্ষতিকে ধৰি বিভিন্ন দায়বদ্ধতাৰ সমাধান কৰে। ভাৰতীয় জাহাজ মালিকসকলে এতিয়া এই কভাৰেজ ঘৰুৱাভাৱে লাভ কৰে, যিটো পূৰ্বতে কেৱল বিদেশী ক্লাবসমূহৰ জৰিয়তেহে উপলব্ধ আছিল।
• যুদ্ধজনিত বিপদৰ কভাৰেজ: ই সশস্ত্ৰ সংঘাত, জলদস্যুতা, সন্ত্ৰাসবাদ আৰু শত্ৰুৰ জাহাজৰ দ্বাৰা দখল কৰাৰ ফলত হোৱা ক্ষতিৰ বিৰুদ্ধে বীমা সুৰক্ষা প্ৰদান কৰে। এই সুৰক্ষা লোহিত সাগৰ, হৰমুজ প্ৰণালী আদি সংবেদনশীল অঞ্চল আৰু অন্যান্য উচ্চ বিপদসংকুল অঞ্চলৰ মাজেৰে পাৰ হোৱা ভাৰতীয় বাণিজ্যিক পথসমূহৰ বাবে অতি গুৰুত্বপূৰ্ণ।

ফলাফল আৰু প্ৰভাৱ

মে’ ২০২৬ত ভাৰত মেৰিটাইম ইঞ্চুৰেঞ্চ পুল-ৰ আৰম্ভণিয়ে ভাৰতৰ সামুদ্ৰিক বীমা খণ্ডত এক গুৰুত্বপূৰ্ণ মাইলৰ খুঁটি চিহ্নিত কৰিছে। কাৰ্যকৰীভাৱে আৰম্ভ হোৱাৰ পিছৰে পৰা বি.এম.আই.পি.-এ আৰম্ভণিৰ পৰাই ভাৰতীয় সামুদ্ৰিক অংশীদাৰসকলৰ বাবে নিৰৱচ্ছিন্ন যুদ্ধজনিত বিপদৰ বীমা নিশ্চিত কৰিছে। পশ্চিম এছিয়াত সংঘাত বৃদ্ধি পোৱাৰ পিছৰে পৰা যুদ্ধজনিত বিপদৰ বীমা প্ৰিমিয়াম প্ৰায় ৩৫ৰ পৰা ৪০ শতাংশ হ্ৰাস পাইছে। ৭ ছেপ্টেম্বৰ, ২০২৬লৈকে এই পুলে ৩,০০০খন মালবাহী জাহাজৰ যুদ্ধজনিত বিপদৰ বীমা, ৯২খন জাহাজৰ কাঠামো আৰু যন্ত্ৰপাতিৰ যুদ্ধজনিত বিপদৰ বীমা তথা ৩খন সুৰক্ষা আৰু ক্ষতিপূৰণ বীমা পলিচি জাৰি কৰিছে।

• এটা শক্তিশালী আৰম্ভণি: এতিয়ালৈকে বি.এম.আই.পি.-এ কি লাভ কৰিছে

~ ভাৰতৰ প্ৰথম সুৰক্ষা আৰু ক্ষতিপূৰণ পলিচি: ৩০ জুলাই ২০২৬ত বি.এম.আই.পি.-ৰ অধীনত ভাৰতৰ প্ৰথম সুৰক্ষা আৰু ক্ষতিপূৰণ বীমা পলিচি শ্বিপিং কৰ্প’ৰেচন অৱ ইণ্ডিয়া লিমিটেডক জাৰি কৰা হয়। দ্য নিউ ইণ্ডিয়া এশ্বুৰেন্স কোম্পানী লিমিটেড-এ জাৰি কৰা এই পলিচিখনে তৃতীয় পক্ষৰ দায়বদ্ধতাৰ বিৰুদ্ধে বিত্তীয় সুৰক্ষা প্ৰদান কৰে।

~ প্ৰথম কাঠামো আৰু যন্ত্ৰপাতি যুদ্ধজনিত বিপদ পলিচি: ১২ মে’, ২০২৬ তাৰিখে সংঘাতপূৰ্ণ অঞ্চলৰ মাজেৰে পাৰ হোৱা এখন জাহাজৰ বাবে পুলৰ প্ৰথম পলিচি প্ৰদান কৰা হৈছিল। নিউ ইণ্ডিয়া এশ্বুৰেন্সে এই সামুদ্ৰিক জাহাজৰ কাঠামো আৰু যন্ত্ৰপাতিৰ যুদ্ধজনিত বিপদৰ পলিচি মেছাৰ্ছ হোগাৰ অফশ্ব’ৰ এণ্ড মেৰিন প্ৰাইভেট লিমিটেডক জাৰি কৰিছিল। সহজ ভাষাত ক’বলৈ গ’লে, এতিয়া এখন ভাৰতীয় জাহাজে যুদ্ধজনিত বিপদৰ বিৰুদ্ধে দেশীয় সুৰক্ষাৰে সাগৰত চলাচল কৰে।

~ ভাৰতলৈ অহা সামগ্ৰীৰ বাবে কভাৰ: মেছাৰ্ছ বেদান্ত ষ্টাৰলাইট কপাৰ লিমিটেডক এখন সামুদ্ৰিক মালবস্তুৰ যুদ্ধজনিত বিপদৰ পলিচি জাৰি কৰা হৈছিল। এই পলিচিয়ে কোম্পানীটোৱে ভাৰতলৈ কেবল তাঁৰ আমদানি কৰাৰ বিপদ হ্ৰাস কৰে। ইয়াৰ পৰা দেখা যায় যে বি.এম.আই.পি.-এ ভাৰতৰ বৃহৎ ঔদ্যোগিক আমদানিকৰ্তাসকলকো সেৱা আগবঢ়াব পাৰে। ই ভাৰতীয় উদ্যোগসমূহক যোগান ধৰা যোগান শৃংখলক সুৰক্ষিতভাৱে বীমাকৃত কৰি ৰাখে।

~ শ্বিপিং কোম্পানীৰ বাহিৰেও: চেনি উৎপাদনকাৰী কোম্পানী বলৰামপুৰ চিনি মিলছ লিমিটেডকো এখন পলিচি জাৰি কৰা হৈছিল। ইয়াৰ পৰা প্ৰমাণ হয় যে বি.এম.আই.পি. কেৱল জাহাজৰ মালিকসকলৰ বাবেই নহয়। সাগৰীয় পথেৰে সামগ্ৰী পৰিবহন কৰা কৃষি, কাৰখানা আৰু অন্যান্য সামগ্ৰীৰ ব্যৱসায়ীসকলেও এই বীমাৰ সুবিধা লাভ কৰিব পাৰে। এই দিশৰ পৰা এই পুলে বিস্তৃত ভাৰতীয় অৰ্থনীতিৰ বাবেও কাম কৰে।

~ প্ৰশাসন আৰু ব্যৱস্থা গঠন: বি.এম.আই.পি. আৰম্ভ হোৱাৰ পিছৰে পৰা গভৰ্ণিং বডী আৰু আণ্ডাৰৰাইটিং কমিটি (শাসকীয় সংস্থা আৰু বীমা সমিতি) গঠন কৰা হৈছে। জেনেৰেল ইঞ্চুৰেন্স কৰ্প’ৰেচন অৱ ইণ্ডিয়া-এ পুল পৰিচালক/প্ৰশাসক হিচাপে দায়িত্ব গ্ৰহণ কৰিছে। বিপদ-অংকন, দাবী আৰু নিয়ামকীয় অনুপালনৰ বাবে ব্যৱস্থাসমূহো স্থাপন কৰা হৈছে। এই পুলে এতিয়া ইয়াৰ সম্পূৰ্ণ বাণিজ্যিক ক্ষমতাৰে কাম কৰি আছে।

আগবাঢ়ি যোৱাৰ পথ

ভাৰত মেৰিটাইম ইঞ্চুৰেঞ্চ পুল-এ ভাৰতৰ সামুদ্ৰিক বিত্তীয় স্বাধীনতাৰ দিশত এক গুৰুত্বপূৰ্ণ পদক্ষেপ। ইয়াৰ ভূমিকা হৈছে অংশীদাৰসকলৰ বাবে নিৰ্ভৰযোগ্য কাৰ্যকলাপ, প্ৰতিযোগিতামূলক মূল্য নিৰ্ধাৰণ আৰু বিশ্বাসযোগ্য দাবী নিষ্পত্তি নিশ্চিত কৰা। মধ্যম্যাদীভাৱে ইয়াৰ লক্ষ্য হৈছে মানৱ সম্পদ, আইনী কাঠামো আৰু পুনৰবীমা অংশীদাৰিত্ব শক্তিশালী কৰা। এই প্ৰচেষ্টাসমূহে চৰকাৰী সহায়ৰ ওপৰত নিৰ্ভৰশীলতা হ্ৰাস কৰাৰ লগতে স্থিতিস্থাপকতা বৃদ্ধি কৰে।

দীৰ্ঘম্যাদীভাৱে এই পুলে ভাৰত মহাসাগৰীয় অঞ্চলত সামুদ্ৰিক বীমাৰ বাবে এক আঞ্চলিক ভিত্তি হিচাপে আত্মপ্ৰকাশ কৰি আছে। ভাৰত বিত্তীয় সেৱা প্ৰদানকাৰী আৰু সামুদ্ৰিক বিপদৰ মানদণ্ড নিৰ্ধাৰণকাৰী হিচাপে স্বীকৃতি লাভ কৰি আছে। জাহাজ নিৰ্মাণৰ সম্প্ৰসাৰণ আৰু বন্দৰসমূহৰ জৰিয়তে মাল পৰিবহন বৃদ্ধি পোৱাৰ লগে লগে এই পুলেও ভাৰতৰ সামুদ্ৰিক আকাংক্ষাৰ সৈতে একেলগে বিকশিত হ’ব। ইয়াৰ ক্ষমতা আৰু কভাৰেজ ভাৰতৰ সামুদ্ৰিক আন্তঃগাঁথনিৰ এক স্থায়ী স্তম্ভ হিচাপে থিয় হৈ আছে।

তথ্যসূত্ৰ:

বন্দৰ, জাহাজ আৰু জলপথ মন্ত্ৰালয়:

https://www.pib.gov.in/PressReleasePage.aspx?PRID=2253432&reg=3&lang=1

https://www.pib.gov.in/PressReleasePage.aspx?PRID=2260712&reg=3&lang=2

https://www.pib.gov.in/PressReleasePage.aspx?PRID=2244786&reg=3&lang=1

https://shipmin.gov.in/sites/default/files/Maritime%20Amrit%20Kaal%20Vision%202047%20%28MAKV%202047%29_compressed.pdf

https://sansad.in/getFile/lsapps/loksabhaquestions/annex/188/AU927_Q1ssYz.pdf?source=lsapps

বিত্ত মন্ত্ৰালয়:

https://www.pib.gov.in/PressReleasePage.aspx?PRID=2260413&reg=3&lang=1

https://x.com/DFS_India/status/2045461170069594537

জাহাজ পৰিবহন সঞ্চালকালয়:

https://dgma.gov.in/download/1781517244_6a2fcbbc219f8_bmip-note.pdf

https://dgma.gov.in/nautical-wing/insurance

Inland Waterways Authority of India:

https://iwai.nic.in/

কেবিনেট:

https://www.pib.gov.in/PressReleasePage.aspx?PRID=2253242&reg=3&lang=1

হিন্দী পিডিএফ ফাইলৰ বাবে ইয়াত ক্লিক কৰক।

*****

পিআইবি গৱেষণা

RR