पत्र सूचना कार्यालय

ಎಲ್ಲರಿಗೂ ಆರೋಗ್ಯ ರಕ್ಷಣೆ ಖಾತರಿಪಡಿಸುವುದು

ಆರೋಗ್ಯ ಕ್ಷೇತ್ರದಲ್ಲಿ ಹೂಡಿಕೆ ಮಾಡುವುದು ಸಮುದಾಯಗಳನ್ನು ಹೆಚ್ಚು ಸಕ್ಷಮ, ಸಾಮರ್ಥ್ಯವುಳ್ಳ ಮತ್ತು ಉತ್ಪಾದಕವನ್ನಾಗಿ ಮಾಡುತ್ತದೆ. ಸಾರ್ವತ್ರಿಕ ಆರೋಗ್ಯ ರಕ್ಷಣೆಯು ಅತಿ ಹೆಚ್ಚು ದುರ್ಬಲ ಕುಟುಂಬಗಳು ಸೇರಿದಂತೆ ಪ್ರತಿಯೊಬ್ಬರಿಗೂ ಕೈಗೆಟುಕುವ, ಗುಣಮಟ್ಟದ ಆರೋಗ್ಯ ಸೇವೆಯ ಲಭ್ಯತೆಯನ್ನು ಖಾತ್ರಿಪಡಿಸುತ್ತದೆ, ಹಾಗೂ ಅವರು ಆರೋಗ್ಯಕರ ಮತ್ತು ಸಾರ್ಥಕ ಜೀವನವನ್ನು ನಡೆಸಲು ಅನುವು ಮಾಡಿಕೊಡುತ್ತದೆ.

ಸಾರ್ವತ್ರಿಕ ಆರೋಗ್ಯ ರಕ್ಷಣೆಯನ್ನು ಸಾಧಿಸಲು ಭಾರತ ಸರ್ಕಾರವು ಎಂಟು ವರ್ಷಗಳ ಹಿಂದೆ 2018ರ ಸೆಪ್ಟೆಂಬರ್ 23 ರಂದು ಆಯುಷ್ಮಾನ್ ಭಾರತ್ ಪ್ರಧಾನ್-ಮಂತ್ರಿ ಜನ್ ಆರೋಗ್ಯ ಯೋಜನೆಯನ್ನು ಪ್ರಾರಂಭಿಸಿತು. ಇದು ಸಾರ್ವಜನಿಕ ಆರೋಗ್ಯ ಭರವಸೆ ಯೋಜನೆಯಾಗಿದ್ದು, ದ್ವಿತೀಯ ಮತ್ತು ತೃತೀಯ ಹಂತದ ಚಿಕಿತ್ಸಾ ರಕ್ಷಣೆಯನ್ನು ನೀಡುತ್ತದೆ. ಇದು ವಿಶ್ವದ ಅತಿದೊಡ್ಡ ಸಾರ್ವಜನಿಕ ಆರೋಗ್ಯ ರಕ್ಷಣಾ ಯೋಜನೆಗಳಲ್ಲಿ ಒಂದಾಗಿದೆ, ಹಾಗೂ ಈ ಯೋಜನೆಯ ಎಂಟನೇ ವಾರ್ಷಿಕೋತ್ಸವದ ವೇಳೆಗೆ (2026 ರ ಸೆಪ್ಟೆಂಬರ್ 21 ರಂತೆ) ಭಾರತದ ಜನಸಂಖ್ಯೆಯ ಶೇಕಡಾ 33 ರಷ್ಟು ಭಾಗ (48.51 ಕೋಟಿಗೂ ಹೆಚ್ಚು ಜನರು) ಈಗಾಗಲೇ ಆಯುಷ್ಮಾನ್ ಕಾರ್ಡ್‌ಗಳನ್ನು ಹೊಂದಿದ್ದಾರೆ.

ಆಯುಷ್ಮಾನ್ ಭಾರತ್ ಪ್ರಧಾನ್ ಮಂತ್ರಿ ಜನ್ ಆರೋಗ್ಯ ಯೋಜನೆಯು 38,000 ಕ್ಕೂ ಹೆಚ್ಚು ನೋಂದಾಯಿತ ಸಾರ್ವಜನಿಕ ಮತ್ತು ಖಾಸಗಿ ಆಸ್ಪತ್ರೆಗಳ ಜಾಲದ ಮೂಲಕ ಸುಮಾರು 13.25 ಕೋಟಿ ಆಸ್ಪತ್ರೆ ದಾಖಲಾತಿಗಳಲ್ಲಿ ₹2.03 ಲಕ್ಷ ಕೋಟಿ ಮೌಲ್ಯದ ಚಿಕಿತ್ಸೆಯನ್ನು ಜನರಿಗೆ ಒದಗಿಸಿದೆ (2026 ರ ಆಗಸ್ಟ್ 31 ರಂತೆ).

ಎಬಿ-ಪಿಎಂಜೆಎವೈ ಸಾರ್ವತ್ರಿಕ ಆರೋಗ್ಯ ರಕ್ಷಣೆಯನ್ನು ಉತ್ತೇಜಿಸುತ್ತಿರುವ ಆಯುಷ್ಮಾನ್ ಭಾರತ್ ಅಡಿಯಲ್ಲಿನ ಒಂದು ಯೋಜನೆಯಾಗಿದೆ. ಭಾರತದ ಸಾರ್ವಜನಿಕ ಆರೋಗ್ಯ ಮೂಲಸೌಕರ್ಯವನ್ನು ನಿರ್ಮಿಸುತ್ತಿರುವ ಇತರ ಯೋಜನೆಗಳೆಂದರೆ: ಆಯುಷ್ಮಾನ್ ಆರೋಗ್ಯ ಮಂದಿರಗಳು, ಆಯುಷ್ಮಾನ್ ಭಾರತ್ ಡಿಜಿಟಲ್ ಮಿಷನ್ ಮತ್ತು ಪಿಎಂ-ಆಯುಷ್ಮಾನ್ ಭಾರತ್ ಆರೋಗ್ಯ ಮೂಲಸೌಕರ್ಯ ಮಿಷನ್. ಎಬಿ-ಪಿಎಂಜೆಎವೈ ನೇತೃತ್ವದಲ್ಲಿ, ಈ ನಾಲ್ಕು ಪ್ರಮುಖ ಯೋಜನೆಗಳು ಸಾರ್ವತ್ರಿಕ ಆರೋಗ್ಯ ರಕ್ಷಣೆಯನ್ನು ತಲುಪಿಸಲು ಭಾರತದ ಸಾರ್ವಜನಿಕ ಆರೋಗ್ಯ ಮೂಲಸೌಕರ್ಯವನ್ನು ಬಲಪಡಿಸುತ್ತಿವೆ.

ಎಬಿ ಪಿಎಂ-ಜೆಎವೈ: ನಾಗರಿಕರನ್ನು ವೈದ್ಯಕೀಯ ಸಾಲದಿಂದ ರಕ್ಷಿಸುವುದು

ಎಬಿ ಪಿಎಂ-ಜೆಎವೈ ಕುಟುಂಬಗಳನ್ನು ಭಾರಿ ವೈದ್ಯಕೀಯ ವೆಚ್ಚಗಳ ಸಾಲದ ಹೊರೆಯಿಂದ ರಕ್ಷಿಸುವ ಗುರಿಯನ್ನು ಹೊಂದಿದೆ. ಇದು 27 ವೈದ್ಯಕೀಯ ವಿಭಾಗಗಳಲ್ಲಿ 1,961 ಚಿಕಿತ್ಸಾ ವಿಧಾನಗಳಿಗೆ ನಗದು ರಹಿತ ಆರೋಗ್ಯ ಸೇವೆಗಳನ್ನು ಒದಗಿಸುತ್ತದೆ.

ಮಾರ್ಚ್ 2024 ರಲ್ಲಿ, ಸರ್ಕಾರವು ಆಶಾ ಕಾರ್ಯಕರ್ತೆಯರು, ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಅಂಗನವಾಡಿ ಸಹಾಯಕಿಯರ ಸುಮಾರು 37 ಲಕ್ಷ ಕುಟುಂಬಗಳನ್ನು ಸೇರ್ಪಡೆಗೊಳಿಸಲು ಈ ಯೋಜನೆಯನ್ನು ವಿಸ್ತರಿಸಿತು. 21.09.2026 ರ ಹೊತ್ತಿಗೆ, ಈ ಯೋಜನೆಯಡಿಯಲ್ಲಿ ಆಶಾ/ಅಂಗನವಾಡಿ ಕಾರ್ಯಕರ್ತೆಯರು/ಸಹಾಯಕಿಯರಿಗಾಗಿ 44.81 ಲಕ್ಷಕ್ಕೂ ಹೆಚ್ಚು ಆಯುಷ್ಮಾನ್ ಕಾರ್ಡ್‌ಗಳನ್ನು ಸೃಷ್ಟಿಸಲಾಗಿದೆ.

ಇದರ ಬೆನ್ನಲ್ಲೇ, 2024 ರ ಸೆಪ್ಟೆಂಬರ್ 11 ರಂದು, ಸರ್ಕಾರವು 70 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಎಲ್ಲಾ ಹಿರಿಯ ನಾಗರಿಕರನ್ನು ಸೇರಿಸಲು ಯೋಜನೆಯನ್ನು ವಿಸ್ತರಿಸಿತು, ಇದು ಸುಮಾರು 6 ಕೋಟಿ ಹಿರಿಯ ನಾಗರಿಕರನ್ನು ಒಳಗೊಳ್ಳುತ್ತದೆ. 21.09.2026 ರ ಹೊತ್ತಿಗೆ, 1.36 ಕೋಟಿಗೂ ಹೆಚ್ಚು ಹಿರಿಯ ನಾಗರಿಕರು 'ಆಯುಷ್ಮಾನ್ ವಯ ವಂದನಾ' ಕಾರ್ಡ್‌ಗಳನ್ನು ಹೊಂದಿದ್ದಾರೆ.

ದುರ್ಬಲ ಫಲಾನುಭವಿಗಳ ಸಬಲೀಕರಣ

ಫಲಾನುಭವಿ ಕುಟುಂಬಗಳನ್ನು ಸಾಮಾಜಿಕ-ಆರ್ಥಿಕ ಜಾತಿ ಗಣತಿ 2011 ರ ಆಧಾರದ ಮೇಲೆ, ವ್ಯಾಖ್ಯಾನಿಸಲಾದ ವಂಚಿತತೆ ಮತ್ತು ಉದ್ಯೋಗದ ಮಾನದಂಡಗಳನ್ನು ಬಳಸಿ ಗುರುತಿಸಲಾಗುತ್ತದೆ. ಈ ಯೋಜನೆಯು ಈ ಹಿಂದೆ ರಾಷ್ಟ್ರೀಯ ಸ್ವಾಸ್ಥ್ಯ ಬಿಮಾ ಯೋಜನೆ ಅಡಿಯಲ್ಲಿ ಒಳಪಟ್ಟಿದ್ದ ಕುಟುಂಬಗಳನ್ನು ಸಹ ಒಳಗೊಂಡಿದೆ.

1. ಗ್ರಾಮೀಣ ಫಲಾನುಭವಿಗಳು

ಗ್ರಾಮೀಣ ಪ್ರದೇಶಗಳಿಗೆ ಸಂಬಂಧಿಸಿದಂತೆ, ಎಬಿ ಪಿಎಂ-ಜೆಎವೈ ಅಡಿಯಲ್ಲಿ ಅರ್ಹತೆಯನ್ನು ಸಾಮಾಜಿಕ-ಆರ್ಥಿಕ ಮತ್ತು ಜಾತಿ ಗಣತಿ, 2011 ರಲ್ಲಿ ನಿರ್ದಿಷ್ಟಪಡಿಸಿದ ವಂಚಿತತೆಯ ಮಾನದಂಡಗಳ ಆಧಾರದ ಮೇಲೆ ನಿರ್ಧರಿಸಲಾಗುತ್ತದೆ. ಅರ್ಹ ಕುಟುಂಬಗಳು ಈ ಕೆಳಗಿನ ಆರು ಮಾನದಂಡಗಳಲ್ಲಿ ಒಂದನ್ನು ಅಥವಾ ಹೆಚ್ಚಿನದನ್ನು ಪೂರೈಸುವ ಕುಟುಂಬಗಳಾಗಿವೆ:

• D1: ಹಸಿ ಮಣ್ಣಿನ ಗೋಡೆ ಮತ್ತು ಹಸಿ ಮಣ್ಣಿನ ಮೇಲ್ಛಾವಣಿ ಹೊಂದಿರುವ ಒಂದೇ ಕೊಠಡಿಯಿರುವ ಕುಟುಂಬಗಳು
• D2: 16 ರಿಂದ 59 ವರ್ಷ ವಯಸ್ಸಿನ ನಡುವಿನ ಯಾವುದೇ ವಯಸ್ಕ ಸದಸ್ಯರಿಲ್ಲದ ಕುಟುಂಬಗಳು
• D3: 16 ರಿಂದ 59 ವರ್ಷ ವಯಸ್ಸಿನ ನಡುವಿನ ಯಾವುದೇ ವಯಸ್ಕ ಪುರುಷ ಸದಸ್ಯರಿಲ್ಲದ, ಮಹಿಳಾ ಮುಖ್ಯಸ್ಥರನ್ನು ಹೊಂದಿರುವ ಕುಟುಂಬಗಳು
• D4: ವಿಕಲಚೇತನ ಸದಸ್ಯರನ್ನು ಹೊಂದಿದ್ದು, ಯಾವುದೇ ದೈಹಿಕ ಸಾಮರ್ಥ್ಯವುಳ್ಳ ವಯಸ್ಕ ಸದಸ್ಯರಿಲ್ಲದ ಕುಟುಂಬಗಳು
• D5: ಪರಿಶಿಷ್ಟ ಜಾತಿ / ಪರಿಶಿಷ್ಟ ಪಂಗಡದ ಕುಟುಂಬಗಳು
• D7: ದೈಹಿಕ ಕಾಯಕದ ಕೂಲಿ ಶ್ರಮದಿಂದಲೇ ತಮ್ಮ ಆದಾಯದ ಪ್ರಮುಖ ಭಾಗವನ್ನು ಗಳಿಸುವ ಭೂರಹಿತ ಕುಟುಂಬಗಳು.

2. ನಗರ ಫಲಾನುಭವಿಗಳು

ನಗರ ಪ್ರದೇಶಗಳಿಗೆ ಸಂಬಂಧಿಸಿದಂತೆ, ಕೆಳಗಿನ 11 ಉದ್ಯೋಗ ವರ್ಗಗಳ ಕಾರ್ಮಿಕರು ಈ ಯೋಜನೆಗೆ ಅರ್ಹರಾಗಿರುತ್ತಾರೆ:

• ಕಸ ಆಯುವವರು
• ಭಿಕ್ಷುಕರು
• ಗೃಹ ಕಾರ್ಮಿಕರು (ಮನೆಗೆಲಸದವರು)
• ಬೀದಿ ಬದಿ ವ್ಯಾಪಾರಿಗಳು/ ಚಮ್ಮಾರರು/ ಹಾವರ್ಸ್/ ಬೀದಿಗಳಲ್ಲಿ ಕೆಲಸ ಮಾಡುವ ಇತರ ಸೇವಾದಾರರು
• ಕಟ್ಟಡ ಕಾರ್ಮಿಕರು/ ಪ್ಲಂಬರ್/ ಮೇಸ್ತ್ರಿ/ ಕಾರ್ಮಿಕರು/ ಪೇಂಟರ್/ ವೆಲ್ಡರ್/ ಸೆಕ್ಯೂರಿಟಿ ಗಾರ್ಡ್/ ಕೂಲಿ ಮತ್ತು ಇತರೆ ಹೊರೆ ಹೊರಬಲ್ಲ ಕಾರ್ಮಿಕರು
• ಪೌರಕಾರ್ಮಿಕರು/ ನೈರ್ಮಲ್ಯ ಸಿಬ್ಬಂದಿ/ ತೋಟಗಾರರು (ಮಾಲಿ)
• ಗೃಹ ಆಧಾರಿತ ಕಾರ್ಮಿಕರು/ ಕುಶಲಕರ್ಮಿಗಳು/ ಹಸ್ತಕಾಂತ ಕಾರ್ಮಿಕರು/ ಟೈಲರ್‌ಗಳು
• ಸಾರಿಗೆ ಕಾರ್ಮಿಕರು/ ಚಾಲಕರು/ ಕಂಡಕ್ಟರ್‌ಗಳು/ ಚಾಲಕರು ಮತ್ತು ಕಂಡಕ್ಟರ್‌ಗಳ ಸಹಾಯಕರು/ ಕೈಗಾಡಿ ಎಳೆಯುವವರು/ ರಿಕ್ಷಾ ಎಳೆಯುವವರು
• ಅಂಗಡಿ ಕೆಲಸಗಾರರು/ ಸಹಾಯಕರು/ ಸಣ್ಣ ಸಂಸ್ಥೆಗಳಲ್ಲಿನ ಪ್ಯೂನ್‌ಗಳು/ ಹೆಲ್ಪರ್‌ಗಳು/ ಡೆಲಿವರಿ ಸಹಾಯಕರು/ ಅಟೆಂಡೆಂಟ್‌ಗಳು/ ವೇಟರ್‌ಗಳು
• ಎಲೆಕ್ಟ್ರಿಷಿಯನ್/ ಮೆಕ್ಯಾನಿಕ್/ ಅಸೆಂಬ್ಲರ್/ ರಿಪೇರಿ ಕಾರ್ಮಿಕರು
• ಮಡಿವಾಳರು (ಬಟ್ಟೆ ಒಗೆಯುವವರು)/ ಚೌಕಿದಾರರು

3. ನಿರ್ದಿಷ್ಟ ಉಪಕ್ರಮಗಳ ಮೂಲಕ ಸೇರ್ಪಡೆಗೊಂಡ ಹೆಚ್ಚುವರಿ ಫಲಾನುಭವಿ ವರ್ಗಗಳು

• ಕಟ್ಟಡ ಮತ್ತು ಇತರೆ ನಿರ್ಮಾಣ ಕಾರ್ಮಿಕರು ಮತ್ತು ಅವರ ಅವಲಂಬಿತರು;
• ಪಿಎಂ-ರಾಹತ್ ಅಡಿಯಲ್ಲಿ ಒಳಪಡುವ ರಸ್ತೆ ಅಪಘಾತ ಸಂತ್ರಸ್ತರು;
• ಸ್ಮೈಲ್  (ಜೀವನಾಧಾರ ಮತ್ತು ಉದ್ಯಮಕ್ಕಾಗಿ ಅಂಚಿನಲ್ಲಿರುವ ವ್ಯಕ್ತಿಗಳ ಬೆಂಬಲ) ಉಪಕ್ರಮದಡಿ ಒಳಪಡುವ ಲಿಂಗಪರಿವರ್ತಿತ (ಟ್ರಾನ್ಸ್‌ಜೆಂಡರ್) ವ್ಯಕ್ತಿಗಳು;
• ಕೋವಿಡ್-19 ಸಾಂಕ್ರಾಮಿಕ ರೋಗದಿಂದಾಗಿ ತಂದೆ-ತಾಯಿ ಇಬ್ಬರನ್ನೂ, ಬದುಕಿರುವ ಒಬ್ಬ ಪೋಷಕರನ್ನು, ಕಾನೂನುಬದ್ಧ ಪೋಷಕರನ್ನು ಅಥವಾ ದತ್ತು ಪಡೆದ ಪೋಷಕರನ್ನು ಕಳೆದುಕೊಂಡ 'ಪಿಎಂ ಕೇರ್ಸ್ ಫಾರ್ ಚಿಲ್ಡ್ರನ್' ಯೋಜನೆಯಡಿಯಲ್ಲಿನ ಅರ್ಹ ಮಕ್ಕಳು;
• ನಮಸ್ತೆ (ಯಾಂತ್ರೀಕೃತ ನೈರ್ಮಲ್ಯ ಪರಿಸರ ವ್ಯವಸ್ಥೆಗಾಗಿ ರಾಷ್ಟ್ರೀಯ ಅಭಿಯಾನ) ಯೋಜನೆಯಡಿ ಒಳಪಡುವ ತ್ಯಾಜ್ಯ ಸಂಗ್ರಹಕಾರರು ಮತ್ತು ಗುರುತಿಸಲಾದ ನೈರ್ಮಲ್ಯ ಕಾರ್ಮಿಕರು; ಮತ್ತು
• ಪ್ರಧಾನ್ ಮಂತ್ರಿ ಜನಜಾತಿ ಆದಿವಾಸಿ ನ್ಯಾಯ ಮಹಾ ಅಭಿಯಾನ ಅಡಿಯಲ್ಲಿ ಒಳಪಡುವ ವಿಶೇಷವಾಗಿ ದುರ್ಬಲ ಬುಡಕಟ್ಟು ಗುಂಪುಗಳು.

ಎಬಿ-ಪಿಎಂಜೆಎವೈ ನಿಧಿ ರಚನೆ ಮತ್ತು ಕೇಂದ್ರ ಬಜೆಟ್ ಹಂಚಿಕೆ

ಎಬಿ-ಪಿಎಂಜೆಎವೈ ಕೇಂದ್ರ ಪುರಸ್ಕೃತ ಯೋಜನೆಯಾಗಿದೆ. ಈ ಯೋಜನೆಗೆ ಅಗತ್ಯವಿರುವ ನಿಧಿಯನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು 60:40 ಅನುಪಾತದಲ್ಲಿ ಹಂಚಿಕೊಳ್ಳುತ್ತವೆ. ಆದರೆ, ಈಶಾನ್ಯ ರಾಜ್ಯಗಳು, ಹಿಮಾಚಲ ಪ್ರದೇಶ, ಉತ್ತರಾಖಂಡ ಮತ್ತು ಜಮ್ಮು ಮತ್ತು ಕಾಶ್ಮೀರ ಕೇಂದ್ರಾಡಳಿತ ಪ್ರದೇಶಕ್ಕೆ ಕೇಂದ್ರ ಮತ್ತು ರಾಜ್ಯಗಳ ನಿಕಟ ನಿಧಿ ಹಂಚಿಕೆ ಅನುಪಾತವು 90:10 ರಷ್ಟಿರುತ್ತದೆ. ಶಾಸನಸಭೆಯಿಲ್ಲದ ಕೇಂದ್ರಾಡಳಿತ ಪ್ರದೇಶಗಳಿಗೆ ಕೇಂದ್ರ ಸರ್ಕಾರವೇ ಶೇಕಡಾ 100 ರಷ್ಟು ಸಂಪೂರ್ಣ ಧನಸಹಾಯ ನೀಡುತ್ತದೆ, ಹಾಗೂ ಶಾಸನಸಭೆಯಿರುವ ಕೇಂದ್ರಾಡಳಿತ ಪ್ರದೇಶಗಳಿಗೆ ಕೇಂದ್ರ ಮತ್ತು ಕೇಂದ್ರಾಡಳಿತ ಪ್ರದೇಶಗಳು 60:40 ಅನುಪಾತದಲ್ಲಿ ವೆಚ್ಚವನ್ನು ಹಂಚಿಕೊಳ್ಳುತ್ತವೆ. ಕೇಂದ್ರ ಬಜೆಟ್ ಅಂದಾಜುಗಳು ಕಳೆದ ಕೆಲವು ವರ್ಷಗಳಲ್ಲಿ ಗಣನೀಯವಾಗಿ ಹೆಚ್ಚಾಗಿದ್ದು, 2026-27 ರ ಹಣಕಾಸು ವರ್ಷಕ್ಕೆ ₹9,500 ಕೋಟಿ ಬಜೆಟ್ ಅನ್ನು ಅಂದಾಜು ಮಾಡಲಾಗಿದೆ.

ಜೇಬಿನಿಂದ ವೆಚ್ಚವಾಗುವ ವೈದ್ಯಕೀಯ ವೆಚ್ಚವನ್ನು ತಗ್ಗಿಸುವುದು

ಜನರು ಹಿಂದೆಂದಿಗಿಂತಲೂ ಈಗ ತಮ್ಮ ಸ್ವಂತ ಹಣವನ್ನು ಆರೋಗ್ಯ ರಕ್ಷಣೆಗಾಗಿ ಅತ್ಯಂತ ಕಡಿಮೆ ಪ್ರಮಾಣದಲ್ಲಿ ವೆಚ್ಚ ಮಾಡುತ್ತಿದ್ದಾರೆ. ಸರ್ಕಾರದ ಹೆಚ್ಚಿನ ಧನಸಹಾಯ ಹಾಗೂ ಎಬಿ-ಪಿಎಂಜೆಎವೈನಂತಹ ಉಚಿತ ಮತ್ತು ಕಡಿಮೆ ವೆಚ್ಚದ ಯೋಜನೆಗಳಿಂದಾಗಿ ವೈಯಕ್ತಿಕ ಆರೋಗ್ಯ ವೆಚ್ಚಗಳು ಇಳಿಕೆಯಾಗಿರುವುದನ್ನು ಸರ್ಕಾರಿ ಅಂಕಿಅಂಶಗಳು ಪ್ರತಿಫಲಿಸುತ್ತವೆ.

ಎಬಿ-ಪಿಎಂಜೆಎವೈ ಅನ್ನು ಹೊರತುಪಡಿಸಿ, ಆಯುಷ್ಮಾನ್ ಭಾರತ್‌ನ ಇತರ ಯೋಜನೆಗಳು ಸಹ ಜನರಿಗೆ ಸಾರ್ವತ್ರಿಕ ಆರೋಗ್ಯ ರಕ್ಷಣೆ ಸಿಗುವಂತೆ ಖಾತ್ರಿಪಡಿಸುತ್ತಿವೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು: ತಳಮಟ್ಟದ ಪ್ರಾಥಮಿಕ ಆರೈಕೆಯನ್ನು ಬಲಪಡಿಸುವುದು

ಆಯುಷ್ಮಾನ್ ಭಾರತ್‌ನ ಎರಡನೇ ಸ್ತಂಭವಾಗಿರುವ ಆಯುಷ್ಮಾನ್ ಆರೋಗ್ಯ ಮಂದಿರಗಳು ಪ್ರಾಥಮಿಕ ಆರೋಗ್ಯ ಸೇವೆಯನ್ನು ಜನರಿಗೆ ಮತ್ತಷ್ಟು ಸುಲಭವಾಗಿ ಲಭ್ಯವಾಗುವಂತೆ ಮಾಡುತ್ತವೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಸಮುದಾಯ ಆರೋಗ್ಯ ಕೇಂದ್ರಗಳಾಗಿದ್ದು, ವೈದ್ಯಕೀಯ ತಜ್ಞರು ಮುಂಚೂಣಿ ಆರೋಗ್ಯ ಕಾರ್ಯಕರ್ತರನ್ನು ಮುನ್ನಡೆಸುತ್ತಾರೆ. ಹಿಂದೆ ಕೇವಲ ಮೂಲಭೂತ ಮಾತೃ ಮತ್ತು ಮಕ್ಕಳ ಆರೈಕೆ ಸೇವೆಗಳು ಅಥವಾ ಇತರೆ ಸೇವೆಗಳನ್ನು ನೀಡುತ್ತಿದ್ದ ಅಸ್ತಿತ್ವದಲ್ಲಿರುವ ಆರೋಗ್ಯ ಕೇಂದ್ರಗಳನ್ನು ಮೇಲ್ದರ್ಜೆಗೇರಿಸಿ ಈ ಆರೋಗ್ಯ ಮಂದಿರಗಳನ್ನಾಗಿ ಪರಿವರ್ತಿಸಲಾಗಿದೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಈ ಕೆಳಗಿನವುಗಳನ್ನು ಒಳಗೊಂಡಂತೆ ಅಗತ್ಯವಿರುವ ಎಲ್ಲಾ ಸಂಪನ್ಮೂಲಗಳನ್ನು ಹೊಂದಿವೆ:

• ಮೇಲ್ದರ್ಜೆಗೇರಿಸಲಾದ ಮೂಲಸೌಕರ್ಯ
• ಹೆಚ್ಚುವರಿ ಮಾನವ ಸಂಪನ್ಮೂಲಗಳು
• ಅತ್ಯಗತ್ಯ ಔಷಧಗಳು ಮತ್ತು ರೋಗನಿರ್ಣಯ ಪರೀಕ್ಷೆಗಳು (ಡಯಾಗ್ನೋಸ್ಟಿಕ್ಸ್)ಮಾಹಿತಿ ತಂತ್ರಜ್ಞಾನ ವ್ಯವಸ್ಥೆಗಳು, ಇತ್ಯಾದಿ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಮಾತೃ ಮತ್ತು ಮಕ್ಕಳ ಆರೋಗ್ಯ ರಕ್ಷಣಾ ಸೇವೆಗಳನ್ನೂ ಮೀರಿ ಸೇವೆ ನೀಡುತ್ತವೆ. ಅವು ಇವುಗಳನ್ನು ಒಳಗೊಂಡಂತೆ ಕೆಳಗಿನ ಸೇವೆಗಳನ್ನು ಒದಗಿಸುತ್ತವೆ: ರೋಗಗಳ ತಪಾಸಣೆ ಮತ್ತು ನಿರ್ವಹಣೆ, ಮೌಖಿಕ (ಬಾಯಿ/ಹಲ್ಲು), ಕಣ್ಣು, ಮತ್ತು ಮೂಗು-ಕಿವಿ-ಗಂಟಲು ಆರೈಕೆ ಹಾಗೂ ಮಾನಸಿಕ ಆರೋಗ್ಯ ಬೆಂಬಲ. ಪ್ರಥಮ ಹಂತದ ತುರ್ತು ಮತ್ತು ಟ್ರಾಮಾ (ಆಘಾತ) ಆರೈಕೆ, ಹಾಗೂ ಉಚಿತ ಅತ್ಯಗತ್ಯ ಔಷಧಗಳು ಮತ್ತು ರೋಗನಿರ್ಣಯ ಸೇವೆಗಳನ್ನು ಸಹ ಈ ಕೇಂದ್ರಗಳಲ್ಲಿ ನೀಡಲಾಗುತ್ತದೆ.

ಸರ್ಕಾರವು ಆಯುಷ್ (ಆಯುರ್ವೇದ, ಯೋಗ ಮತ್ತು ನಿಸರ್ಗೋಪಚಾರ, ಯುನಾನಿ, ಸಿದ್ಧ ಮತ್ತು ಹೋಮಿಯೋಪತಿ) ಆರೈಕೆಯನ್ನು ಸಹ ವಿಸ್ತರಿಸುತ್ತಿರುವುದರಿಂದ, ಸಾರ್ವಜನಿಕರಿಗಾಗಿ ಈಗ ಆಯುಷ್ ಆಯುಷ್ಮಾನ್ ಆರೋಗ್ಯ ಮಂದಿರಗಳು ಸಹ ಲಭ್ಯವಿವೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಸಮುದಾಯ ಆರೋಗ್ಯ ಕಾರ್ಯಕರ್ತರು ಮತ್ತು ಮಾನ್ಯತೆ ಪಡೆದ ಸಾಮಾಜಿಕ ಆರೋಗ್ಯ ಕಾರ್ಯಕರ್ತೆಯರ (ಆಶಾ) ಸಮುದಾಯ ಆರೋಗ್ಯ ತಲುಪುವಿಕೆಗಾಗಿ ಕಾರ್ಯನಿರ್ವಹಿಸುವ ಕೇಂದ್ರಗಳಾಗಿವೆ. ಈ ಕೇಂದ್ರಗಳಲ್ಲಿ, ಅವರು ಆರೋಗ್ಯ ಕಾರ್ಯಕ್ರಮಗಳ ಬಗ್ಗೆ ಜಾಗೃತಿ ಮೂಡಿಸುತ್ತಾರೆ, ರೋಗಿಗಳ ಆರೋಗ್ಯ ಸ್ಥಿತಿಯನ್ನು ಪರಿಶೀಲಿಸುತ್ತಾರೆ ಮತ್ತು ಸಮುದಾಯದ ಆರೋಗ್ಯದ ಮೇಲ್ವಿಚಾರಣೆ ನಡೆಸುತ್ತಾರೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು, ಸರ್ಕಾರಿ ಚಾಲಿತ ಟೆಲಿಮೆಡಿಸಿನ್ ಸೇವೆಯಾದ ಇ-ಸಂಜೀವನಿ ಮೂಲಕ ನಾಗರಿಕರು ಜಿಲ್ಲಾ, ರಾಜ್ಯ ಅಥವಾ ರಾಷ್ಟ್ರೀಯ ಮಟ್ಟದ ಆಸ್ಪತ್ರೆಗಳ ವೈದ್ಯಕೀಯ ತಜ್ಞರನ್ನು ಸಂಪರ್ಕಿಸಬಹುದಾದ ಕೇಂದ್ರಗಳೂ ಆಗಿವೆ.

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಸೇರಿದಂತೆ ದೇಶಾದ್ಯಂತ 50 ಕೋಟಿಗೂ ಹೆಚ್ಚು ಟೆಲಿ-ಸಮಾಲೋಚನೆಗಳನ್ನು ನಡೆಸಲಾಗಿದೆ (2026 ರ ಸೆಪ್ಟೆಂಬರ್ 17 ರ ಹೊತ್ತಿಗೆ).

ಆಯುಷ್ಮಾನ್ ಆರೋಗ್ಯ ಮಂದಿರಗಳು ಇಲ್ಲಿಯವರೆಗೆ 540 ಕೋಟಿಗೂ ಹೆಚ್ಚಿನ ಒಟ್ಟು ಸಾರ್ವಜನಿಕ ಭೇಟಿಗಳನ್ನು ದಾಖಲಿಸಿವೆ. ಸರ್ಕಾರವು ಈ ಮೂಲಸೌಕರ್ಯವನ್ನು ಅತ್ಯಂತ ವೇಗವಾಗಿ ನಿರ್ಮಿಸುತ್ತಿದೆ.

ಆಯುಷ್ಮಾನ್ ಭಾರತ್ ಡಿಜಿಟಲ್ ಮಿಷನ್ ಮೂಲಕ ಡಿಜಿಟಲ್ ಆರೋಗ್ಯ ಮೂಲಸೌಕರ್ಯ ನಿರ್ಮಾಣ

ಭೌತಿಕ ಮೂಲಸೌಕರ್ಯವು ಸಾರ್ವತ್ರಿಕ ಆರೋಗ್ಯ ಸೇವೆಯ ಬೆನ್ನೆಲುಬಾಗಿದ್ದರೆ, ಅಷ್ಟೇ ಪ್ರಬಲವಾದ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯವೂ ಅತ್ಯಗತ್ಯವಾಗಿದೆ. ಇದು ಆರೋಗ್ಯ ಸೇವೆಯನ್ನು ಇನ್ನಷ್ಟು ತಡೆರಹಿತ, ಪರಿಣಾಮಕಾರಿ ಮತ್ತು ಸುಲಭವಾಗಿ ಲಭ್ಯವಾಗುವಂತೆ ಮಾಡಲು ಸಹಾಯ ಮಾಡುತ್ತದೆ. ಇದನ್ನು ಗುರುತಿಸಿ, ಭಾರತ ಸರ್ಕಾರವು ಸೆಪ್ಟೆಂಬರ್ 2021 ರಲ್ಲಿ ಸಮಗ್ರ, ನಾಗರಿಕ ಕೇಂದ್ರಿತ ರಾಷ್ಟ್ರೀಯ ಡಿಜಿಟಲ್ ಆರೋಗ್ಯ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲು ಆಯುಷ್ಮಾನ್ ಭಾರತ್ ಡಿಜಿಟಲ್ ಮಿಷನ್ ಅನ್ನು ಪ್ರಾರಂಭಿಸಿತು.

ಎಬಿಡಿಎಂ ಮೂಲಸೌಕರ್ಯವು ಪ್ರತಿಯೊಬ್ಬ ವ್ಯಕ್ತಿಗೆ ನೀಡಲಾಗುವ ಡಿಜಿಟಲ್ ಆರೋಗ್ಯ ಗುರುತಿನ ಸಂಖ್ಯೆಯಾದ ಆಯುಷ್ಮಾನ್ ಭಾರತ್ ಆರೋಗ್ಯ ಖಾತೆ (ಅಭಾ) ಆಧಾರದ ಮೇಲೆ ನಿಂತಿದೆ. ಜನರ ಆರೋಗ್ಯ ದಾಖಲೆಗಳು ಮತ್ತು ವಿಮಾ ಹಕ್ಕುಗಳನ್ನು ಅಭಾ ಐಡಿಗಳೊಂದಿಗೆ ಸಂಯೋಜಿಸಲಾಗುತ್ತದೆ. ಅಭಾ ಐಡಿಗಳ ಮೂಲಕ, ವ್ಯಕ್ತಿಗಳು ತಮ್ಮ ಎಲ್ಲಾ ವೈದ್ಯಕೀಯ ಇತಿಹಾಸವನ್ನು ಒಂದೇ ಇಂಟರ್‌ಆಪರೇಬಲ್ ನೆಟ್‌ವರ್ಕ್‌ನಲ್ಲಿ ಭದ್ರವಾಗಿರಿಸಿಕೊಂಡು ವಿಮಾದಾರರು, ಆರೋಗ್ಯ ಸೌಲಭ್ಯಗಳು, ವೈದ್ಯರು ಮತ್ತು ಇತರ ಸೇವೆಗಳೊಂದಿಗೆ ಸಂಪರ್ಕ ಸಾಧಿಸಬಹುದು.

2026 ರ ಸೆಪ್ಟೆಂಬರ್ 17 ರ ಹೊತ್ತಿಗೆ, 97.61 ಕೋಟಿಗೂ ಹೆಚ್ಚು ಅಭಾ ಐಡಿಗಳು ಕಾರ್ಯಾಚರಣೆಯಲ್ಲಿದ್ದು, 119.95 ಕೋಟಿಗೂ ಹೆಚ್ಚು ಆರೋಗ್ಯ ದಾಖಲೆಗಳನ್ನು ಈ ಖಾತೆಗಳಿಗೆ ಲಿಂಕ್ ಮಾಡಲಾಗಿದೆ. ಅಭಾ ಐಡಿ ಬಳಕೆದಾರರಲ್ಲಿ ಮಹಿಳೆಯರು 49.74%, ಪುರುಷರು 50.26% ಮತ್ತು ಇತರ ಲಿಂಗದವರು 0.01% ಇದ್ದಾರೆ (2026 ರ ಸೆಪ್ಟೆಂಬರ್ 17 ರಂತೆ). ಹೆಚ್ಚುವರಿಯಾಗಿ, 5.78 ಲಕ್ಷಕ್ಕೂ ಹೆಚ್ಚು ಪರಿಶೀಲಿಸಿದ ಆರೋಗ್ಯ ಸೌಲಭ್ಯಗಳು ಮತ್ತು 11 ಲಕ್ಷಕ್ಕೂ ಹೆಚ್ಚು ಆರೋಗ್ಯ ವೃತ್ತಿಪರರು ಈ ವೇದಿಕೆಯಲ್ಲಿ ನೋಂದಾಯಿಸಿಕೊಂಡಿದ್ದಾರೆ.

ಅಭಾ ಹೊರತಾಗಿಯೂ, ಎಬಿಡಿಎಂ ಒಂದು ಪೂರ್ಣ ಪ್ರಮಾಣದ ಡಿಜಿಟಲ್ ಆರೋಗ್ಯ ಪರಿಸರ ವ್ಯವಸ್ಥೆಯಾಗಿದೆ. ಇದು ಎಲ್ಲಾ ಆರೋಗ್ಯ ಪೂರೈಕೆದಾರರನ್ನು ಒಂದೇ ಜಾಲಕ್ಕೆ ತರುತ್ತದೆ.

• ಆರೋಗ್ಯ ವೃತ್ತಿಪರರ ನೋಂದಣಿ: ವೈದ್ಯರಿಂದ ಹಿಡಿದು ಆಯುಷ್ ವೈದ್ಯರವರೆಗಿನ ಎಲ್ಲಾ ಆರೋಗ್ಯ ವೃತ್ತಿಪರರ ರಾಷ್ಟ್ರೀಯ ನೋಂದಣಿಯಾಗಿದ್ದು, ಇವರೆಲ್ಲರನ್ನೂ ಪರಿಶೀಲಿಸಿ ಡಿಜಿಟಲ್ ರೂಪದಲ್ಲಿ ಸಂಪರ್ಕಿಸಲಾಗುತ್ತದೆ.
• ಆರೋಗ್ಯ ಸೌಲಭ್ಯಗಳ ನೋಂದಣಿ: ಸಾರ್ವಜನಿಕ ಮತ್ತು ಖಾಸಗಿ ವಲಯದ ಆಸ್ಪತ್ರೆಗಳು, ಕ್ಲಿನಿಕ್‌ಗಳು, ಪ್ರಯೋಗಾಲಯಗಳು, ಫಾರ್ಮಸಿಗಳು ಸೇರಿದಂತೆ ಎಲ್ಲಾ ಆರೋಗ್ಯ ಸೌಲಭ್ಯಗಳ ರಾಷ್ಟ್ರೀಯ ನೋಂದಣಿ.
• ಯೂನಿಫೈಡ್ ಹೆಲ್ತ್ ಇಂಟರ್‌ಫೇಸ್: ಆರೋಗ್ಯ ಸೇವೆಗಳಿಗಾಗಿ ಮುಕ್ತ ನೆಟ್‌ವರ್ಕ್ - ಇದು ಆರೋಗ್ಯ ರಕ್ಷಣಾ ಕ್ಷೇತ್ರದಲ್ಲಿ 'ಯುಪಿಐ' ಇದ್ದಂತೆ. ಯಾವುದೇ ಆ್ಯಪ್ ಮೂಲಕ ಅಪಾಯಿಂಟ್‌ಮೆಂಟ್ ಕಾಯ್ದಿರಿಸಲು, ವೈದ್ಯರನ್ನು ಸಂಪರ್ಕಿಸಲು ಮತ್ತು ಸೇವೆಗಳನ್ನು ಕಂಡುಕೊಳ್ಳಲು ಸಹಾಯ ಮಾಡುತ್ತದೆ.
• ಆರೋಗ್ಯ ಸೇತು 2.0: ಇದು ಡಿಜಿಟಲ್ ಆರೋಗ್ಯ ಸೇವೆಗಳು ಮತ್ತು ವೈಯಕ್ತಿಕ ಆರೋಗ್ಯ ದಾಖಲೆಗಳಿಗೆ ಏಕೀಕೃತ ಆ್ಯಪ್ ಆಗಿ ಕಾರ್ಯನಿರ್ವಹಿಸುತ್ತದೆ, ದೇಶಾದ್ಯಂತ ಡಿಜಿಟಲ್ ಆರೋಗ್ಯ ಅಳವಡಿಕೆಯನ್ನು ವೇಗಗೊಳಿಸುತ್ತದೆ.

ಪಿಎಂ-ಎಬಿಹೆಚ್‌ಐಎಂ: ಕ್ರಿಟಿಕಲ್ ಕೇರ್ ಮತ್ತು ರೋಗ ಕಣ್ಗಾವಲು ಬಲಪಡಿಸುವುದು

ಕೋವಿಡ್-19 ಸಾಂಕ್ರಾಮಿಕದ ಸಂದರ್ಭದಲ್ಲಿ, ಸರ್ಕಾರವು ಏಕೀಕೃತ ಹಾಗೂ ಸಮಗ್ರ ಸರ್ಕಾರಿ ವಿಧಾನದ ಮೂಲಕ ತ್ವರಿತವಾಗಿ ಸ್ಪಂದಿಸಿತು. ಸ್ಥಳೀಯ ಚಿಕಿತ್ಸಾಲಯಗಳಿಂದ ಹಿಡಿದು ಪ್ರಮುಖ ಆಸ್ಪತ್ರೆಗಳವರೆಗಿನ ರಾಷ್ಟ್ರೀಯ ಆರೋಗ್ಯ ರಕ್ಷಣಾ ವಲಯವನ್ನು ಪರಿವರ್ತಿಸುವ ಸಕ್ರಿಯ ಬದ್ಧತೆಯನ್ನು ಪ್ರದರ್ಶಿಸಿದ ಸರ್ಕಾರವು, ಬಜೆಟ್ 2021-22 ರ ಭಾಗವಾಗಿ 2021 ರ ಅಕ್ಟೋಬರ್ 25 ರಂದು ಐತಿಹಾಸಿಕ ಪಿಎಂ-ಆಯುಷ್ಮಾನ್ ಭಾರತ್ ಆರೋಗ್ಯ ಮೂಲಸೌಕರ್ಯ ಮಿಷನ್ ಅನ್ನು ಪ್ರಾರಂಭಿಸಿತು.

₹64,180 ಕೋಟಿಯ (2021-2026) ಬೃಹತ್ ಬಜೆಟ್‌ನೊಂದಿಗೆ, ಪಿಎಂ-ಎಬಿಹೆಚ್‌ಐಎಂ ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಆರೋಗ್ಯ ಮೂಲಸೌಕರ್ಯವನ್ನು ಬಲಪಡಿಸುವುದು, ರೋಗಗಳ ಕಣ್ಗಾವಲನ್ನು ಸುಧಾರಿಸುವುದು ಮತ್ತು ಆರೋಗ್ಯ ಸಂಶೋಧನೆಯನ್ನು ವಿಸ್ತರಿಸುವುದರ ಮೇಲೆ ಗಮನ ಹರಿಸುತ್ತದೆ. ಈ ಪ್ರಯತ್ನವು ಭವಿಷ್ಯದ ಆರೋಗ್ಯ ಸವಾಲುಗಳನ್ನು ಎದುರಿಸುವಲ್ಲಿ ಸ್ವಾವಲಂಬನೆ ಮತ್ತು ಸಂಪೂರ್ಣ ಸಾಮರ್ಥ್ಯವನ್ನು ಸಾಧಿಸಲು ಭಾರತಕ್ಕೆ ಶಕ್ತಿ ನೀಡುತ್ತದೆ.

ಪಿಎಂ-ಎಬಿಹೆಚ್‌ಐಎಂ ಕೆಳಗಿನ ಪ್ರಮುಖ ಅಂಶಗಳ ಮೇಲೆ ಗಮನ ಹರಿಸುತ್ತದೆ:

• 10 ಅತಿ ಹೆಚ್ಚು ಗಮನ ಹರಿಸಬೇಕಾದ ರಾಜ್ಯಗಳಲ್ಲಿ 23,224 ಗ್ರಾಮೀಣ ಆರೋಗ್ಯ ಮತ್ತು ಯೋಗಕ್ಷೇಮ ಕೇಂದ್ರಗಳಿಗೆ ಬೆಂಬಲ ನೀಡುವುದು.
• ಎಲ್ಲಾ ರಾಜ್ಯಗಳಲ್ಲಿ 13,736 ನಗರ ಆರೋಗ್ಯ ಮತ್ತು ಯೋಗಕ್ಷೇಮ ಕೇಂದ್ರಗಳನ್ನು ಸ್ಥಾಪಿಸುವುದು.
• 11 ಅತಿ ಹೆಚ್ಚು ಗಮನ ಹರಿಸಬೇಕಾದ ರಾಜ್ಯಗಳಲ್ಲಿ 3,389 ಬ್ಲಾಕ್ ಸಾರ್ವಜನಿಕ ಆರೋಗ್ಯ ಘಟಕಗಳನ್ನು ಸ್ಥಾಪಿಸುವುದು.
• ಎಲ್ಲಾ ಜಿಲ್ಲೆಗಳಲ್ಲಿ 744 ಸಂಯೋಜಿತ ಸಾರ್ವಜನಿಕ ಆರೋಗ್ಯ ಪ್ರಯೋಗಾಲಯಗಳನ್ನು ಸ್ಥಾಪಿಸುವುದು.
• 5 ಲಕ್ಷಕ್ಕಿಂತ ಹೆಚ್ಚು ಜನಸಂಖ್ಯೆಯನ್ನು ಹೊಂದಿರುವ ಎಲ್ಲಾ ಜಿಲ್ಲೆಗಳಲ್ಲಿ 631 ಕ್ರಿಟಿಕಲ್ ಕೇರ್ ಆಸ್ಪತ್ರೆ ಬ್ಲಾಕ್‌ಗಳನ್ನು ಸ್ಥಾಪಿಸುವುದು.

ಸಾರ್ವತ್ರಿಕ ಆರೋಗ್ಯ ರಕ್ಷಣೆಯ ಹಾದಿ

ಎಬಿ-ಪಿಎಂಜೆಎವೈ ಅರ್ಹ ಫಲಾನುಭವಿಗಳಿಗೆ ಗುಣಮಟ್ಟದ ಮತ್ತು ಕೈಗೆಟುಕುವ ದ್ವಿತೀಯ ಹಾಗೂ ತೃತೀಯ ಹಂತದ ವೈದ್ಯಕೀಯ ರಕ್ಷಣೆಯ ಲಭ್ಯತೆಯನ್ನು ವಿಸ್ತರಿಸುತ್ತದೆ, ಮತ್ತು ಆಯುಷ್ಮಾನ್ ಆರೋಗ್ಯ ಮಂದಿರಗಳು ಸಮಗ್ರ ಪ್ರಾಥಮಿಕ ಆರೋಗ್ಯ ಸೇವೆಯನ್ನು ಸಮುದಾಯಗಳ ಮನೆಬಾಗಿಲಿಗೆ ತಲುಪಿಸುತ್ತವೆ. ಅಭಾ (ಆಯುಷ್ಮಾನ್ ಭಾರತ್ ಆರೋಗ್ಯ ಖಾತೆ) ಪ್ರತಿಯೊಬ್ಬ ವ್ಯಕ್ತಿಗೆ ವಿಶಿಷ್ಟ ಡಿಜಿಟಲ್ ಆರೋಗ್ಯ ಗುರುತನ್ನು ರಚಿಸಲು ಮತ್ತು ಪಾಲ್ಗೊಳ್ಳುವ ಆರೋಗ್ಯ ಸೌಲಭ್ಯಗಳಾದ್ಯಂತ ತಮ್ಮ ಆರೋಗ್ಯ ದಾಖಲೆಗಳನ್ನು ಪಡೆಯಲು ಅನುವು ಮಾಡಿಕೊಡುತ್ತದೆ. ಪಿಎಂ-ಎಬಿಹೆಚ್‌ಐಎಂ ತಳಮಟ್ಟದಿಂದ ಜಿಲ್ಲಾ ಮಟ್ಟದವರೆಗೆ ಆರೋಗ್ಯ ಕೇಂದ್ರಗಳು, ಪ್ರಯೋಗಾಲಯಗಳು ಮತ್ತು ಕ್ರಿಟಿಕಲ್ ಕೇರ್ ಸೌಲಭ್ಯಗಳ ಅಭಿವೃದ್ಧಿಗೆ ಬೆಂಬಲ ನೀಡುವ ಮೂಲಕ ಆರೋಗ್ಯ ವ್ಯವಸ್ಥೆಯ ಮೂಲಸೌಕರ್ಯ ಮತ್ತು ಸನ್ನದ್ಧತೆಯನ್ನು ಬಲಪಡಿಸುತ್ತದೆ.

ಒಟ್ಟಾರೆಯಾಗಿ, ಈ ಉಪಕ್ರಮಗಳು ಪ್ರಾಥಮಿಕ ಆರೈಕೆ ಮತ್ತು ಡಿಜಿಟಲ್ ಆರೋಗ್ಯ ಸೇವೆಗಳಿಂದ ಹಿಡಿದು ಆಸ್ಪತ್ರೆ ಆಧಾರಿತ ಚಿಕಿತ್ಸೆ ಮತ್ತು ಸಕ್ಷಮ ಆರೋಗ್ಯ ಮೂಲಸೌಕರ್ಯದವರೆಗೆ ಸಂಪೂರ್ಣ ಆರೋಗ್ಯ ರಕ್ಷಣಾ ಸರಪಳಿಯನ್ನು ಬಲಪಡಿಸುತ್ತವೆ, ಹಾಗೂ ಸಾರ್ವತ್ರಿಕ ಆರೋಗ್ಯ ರಕ್ಷಣೆಯ ಗುರಿಯನ್ನು ಮುನ್ನಡೆಸುತ್ತವೆ.

References        

Prime Minister’s Office

https://www.pib.gov.in/PressReleaseDetail.aspx?PRID=1547032&reg=48&lang=1

Ministry of Health and Family Welfare

https://www.pib.gov.in/Pressreleaseshare.aspx?PRID=1546948&reg=48&lang=2#:~:text=Ayushman%20%E2%80%A2%20Bharat%20%E2%80%93Pradhan%20Mantri%20Jan,to%20a%20new%20aspirational%%2020level

https://www.pib.gov.in/PressReleasePage.aspx?PRID=2116209&reg=48&lang=2

https://www.pib.gov.in/PressReleasePage.aspx?PRID=2151239&reg=48&lang=2

https://www.pib.gov.in/PressReleasePage.aspx?PRID=2152534&reg=48&lang=2

https://www.pib.gov.in/Pressreleaseshare.aspx?PRID=1848808&reg=48&lang=2

https://www.pib.gov.in/PressReleasePage.aspx?PRID=2294278&reg=6&lang=1

https://www.pib.gov.in/PressReleasePage.aspx?PRID=2241085&reg=3&lang=1

https://www.pib.gov.in/PressReleaseIframePage.aspx?PRID=1577932&reg=48&lang=2

https://esanjeevani.mohfw.gov.in/#/

National Health Authority

https://dashboard.nha.gov.in/public/

Ministry of Tribal Affairs

https://www.pib.gov.in/Pressreleaseshare.aspx?PRID=1577166&reg=48&lang=2

Ministry of Finance

https://www.pib.gov.in/PressReleasePage.aspx?PRID=2097868&reg=48&lang=2

https://www.pib.gov.in/PressReleasePage.aspx?PRID=2034937&reg=48&lang=2

https://www.indiabudget.gov.in/economicsurvey/doc/echapter.pdf

https://www.indiabudget.gov.in/

PIB Backgrounder

https://www.pib.gov.in/PressReleasePage.aspx?PRID=2281466&reg=3&lang=1

National Portal of India

https://www.india.gov.in/spotlight/details/ayushman-bharat-pradhan-mantri-jan-arogya-yojana

https://www.pib.gov.in/PressReleasePage.aspx?PRID=2281466&reg=3&lang=1

myScheme

https://www.myscheme.gov.in/schemes/ab-pmjay

World Bank

https://www.worldbank.org/ext/en/topic/health/universal-health-coverage

World Health Organisation

https://www.who.int/data/gho/data/themes/theme-details/GHO/universal-health-coverage

Click here to see pdf

******