पत्र सूचना कार्यालय

ഡാറ്റാ സെന്ററുകളിലൂടെ ഇന്ത്യയുടെ ഡിജിറ്റൽ അടിസ്ഥാന സൗകര്യങ്ങൾ ശക്തിപ്പെടുത്തുന്നു

ഇന്ത്യയുടെ ഡിജിറ്റൽ സമ്പദ്‌വ്യവസ്ഥ വേഗത്തിലുള്ള വളർച്ചയുടെയും സാങ്കേതിക പരിവർത്തനത്തിന്റെയും ഒരു പുതിയ ഘട്ടത്തിലേക്ക് കടക്കുകയാണ്. ഡിജിറ്റലൈസേഷൻ വിവിധ മേഖലകളിലുടനീളം ഉൽപ്പാദനക്ഷമത, മത്സരശേഷി, സേവന വിതരണം എന്നിവയെ പുനർനിർമ്മിക്കുന്നു. ഡിജിറ്റൽ സേവനങ്ങൾ വികസിക്കുമ്പോൾ, അവ കമ്പ്യൂട്ടിംഗ് ശേഷി, ഡാറ്റ സംഭരണം, അതിവേഗ കണക്റ്റിവിറ്റി എന്നിവയ്ക്കായി മുമ്പെങ്ങുമില്ലാത്തവിധം ആവശ്യകത സൃഷ്ടിക്കുന്നു. ഈ ആവശ്യകത നിറവേറ്റുന്നതിന് തുടർച്ചയായും സുരക്ഷിതമായും വൻതോതിലും പ്രവർത്തിക്കാൻ കഴിയുന്ന അടിസ്ഥാന സൗകര്യങ്ങൾ ആവശ്യമാണ്. ഇന്ത്യയുടെ സമ്പദ്‌വ്യവസ്ഥയെയും ഭരണത്തെയും വൻതോതിൽ നയിക്കുന്ന ഡിജിറ്റൽ സേവനങ്ങൾക്ക് കരുത്തുപകർന്നുകൊണ്ട് ഡാറ്റാ സെന്ററുകൾ ഈ നിർണ്ണായക അടിത്തറ നൽകുന്നു.

കമ്പ്യൂട്ടിംഗ്, സംഭരണം, നെറ്റ്‌വർക്കിംഗ് ഉപകരണങ്ങൾ എന്നിവ സൂക്ഷിക്കുന്ന സുരക്ഷിതമായ ഒരു കേന്ദ്രമാണ് ഡാറ്റാ സെന്റർ. ഇത് വൻതോതിലുള്ള ഡിജിറ്റൽ വിവരങ്ങൾ സംഭരിക്കുകയും പ്രോസസ്സ് ചെയ്യുകയും കൈകാര്യം ചെയ്യുകയും വിതരണം ചെയ്യുകയും ചെയ്യുന്നു. ഈ ശേഷികൾ ഓൺലൈൻ ബാങ്കിംഗ്, ഇ-ഗവേണൻസ്, ഡിജിറ്റൽ പേയ്‌മെന്റുകൾ, ക്ലൗഡ് കമ്പ്യൂട്ടിംഗ്, മറ്റ് പുതിയ സാങ്കേതികവിദ്യകൾ എന്നിവയ്ക്ക് പിന്തുണ നൽകുന്നു.

ആധുനിക ഡാറ്റാ സെന്ററുകൾ കമ്പ്യൂട്ടിംഗ്, നെറ്റ്‌വർക്കിംഗ്, വൈദ്യുതി, കൂളിംഗ് സംവിധാനങ്ങൾ, സുരക്ഷ, മാനേജ്‌മെന്റ് സംവിധാനങ്ങൾ എന്നിവയെ സംയോജിപ്പിക്കുന്നു. വിശ്വസനീയമായ പ്രവർത്തനങ്ങൾ, ഡാറ്റാ സുരക്ഷ, തടസ്സമില്ലാത്ത ഡിജിറ്റൽ സേവനങ്ങൾ എന്നിവ നിലനിർത്തുന്നതിന് ഈ സംവിധാനങ്ങൾ തുടർച്ചയായി പ്രവർത്തിക്കുന്നു. ഇന്ത്യയുടെ ഡിജിറ്റൽ സമ്പദ്‌വ്യവസ്ഥ വികസിക്കുമ്പോൾ ശക്തമായ ഡാറ്റാ സെന്ററുകൾ നവീനാശയം, മത്സരക്ഷമത, സുസ്ഥിരമായ ഡിജിറ്റൽ വളർച്ച എന്നിവയ്ക്കുള്ള തന്ത്രപ്രധാനമായ ഒരു അടിസ്ഥാന സൗകര്യമായി മാറിക്കൊണ്ടിരിക്കുകയാണ്.

ഡാറ്റാ സെന്ററിനുള്ളിൽ: ഡിജിറ്റൽ സേവനങ്ങൾക്ക് കരുത്തുപകരുന്ന സാങ്കേതികവിദ്യകൾ

നിർണ്ണായക ഉപകരണങ്ങളുടെ തടസ്സമില്ലാത്ത പ്രവർത്തനം ഉറപ്പാക്കാൻ ഒരു ഡാറ്റാ സെന്റർ വിശ്വസനീയമായ ഒരു പവർ ഇൻഫ്രാസ്ട്രക്ചറിനെ ആശ്രയിക്കുന്നു. ഡാറ്റാ സെന്റർ കമ്പ്യൂട്ടറുകൾ ഒരിക്കലും ഓഫ് ചെയ്യാൻ കഴിയില്ല—ഒരു മില്ലിസെക്കൻഡിലേക്ക് പോലും. വൈദ്യുതി തടസ്സങ്ങൾ ഉണ്ടാകുന്ന സമയത്ത് അൺഇന്ററപ്റ്റബിൾ പവർ സപ്ലൈസ് (UPS) ഉടനടി ബാക്കപ്പ് നൽകുന്നു. ദീർഘനേരമുള്ള വൈദ്യുതി തടസ്സങ്ങളിൽ ബാക്കപ്പ് ജനറേറ്ററുകളും ഇലക്ട്രിക്കൽ ഡിസ്ട്രിബ്യൂഷൻ സിസ്റ്റങ്ങളും കൂടുതൽ പ്രതിരോധശേഷി നൽകുന്നു. ഈ തോതിലുള്ള തുടർച്ചയായ പ്രവർത്തനങ്ങൾക്ക് കമ്പ്യൂട്ടിംഗ് ഉപകരണങ്ങൾക്ക് അനുയോജ്യമായ പ്രവർത്തന അന്തരീക്ഷം നിലനിർത്താൻ കൂളിംഗ് സംവിധാനങ്ങൾ ആവശ്യമാണ്. ഹീറ്റിംഗ്, വെന്റിലേഷൻ, എയർ കണ്ടീഷനിംഗ് (HVAC) സംവിധാനങ്ങൾ കെട്ടിടത്തിനുള്ളിലെ താപനിലയും വായുസഞ്ചാരവും ക്രമീകരിക്കുന്നു. അത്യാധുനിക വായുസഞ്ചാര മാനേജ്‌മെന്റും ലിക്വിഡ് കൂളിംഗും താപക്ഷമതയും വിശ്വാസ്യതയും കൂടുതൽ മെച്ചപ്പെടുത്തുന്നു.

തുടർന്ന് ഇൻഫർമേഷൻ ടെക്നോളജി (IT) ഇൻഫ്രാസ്ട്രക്ചർ പ്രധാന കമ്പ്യൂട്ടിംഗ് പ്രവർത്തനങ്ങൾ നിർവ്വഹിക്കുന്നു. സെർവറുകൾ വിവരങ്ങൾ പ്രോസസ്സ് ചെയ്യുകയും ഡിജിറ്റൽ ആപ്ലിക്കേഷനുകൾ പ്രവർത്തിപ്പിക്കുകയും ചെയ്യുന്നു. സ്റ്റോറേജ് സിസ്റ്റങ്ങൾ ഹാർഡ് ഡിസ്ക് ഡ്രൈവുകളും (HDD) സോളിഡ്-സ്റ്റേറ്റ് ഡ്രൈവുകളും (SSD) ഉപയോഗിച്ച് വൻതോതിലുള്ള ഡാറ്റ സുരക്ഷിതമായി സൂക്ഷിക്കുന്നു. സുരക്ഷാ സംവിധാനങ്ങൾ ഉപകരണങ്ങളെയും നെറ്റ്‌വർക്കുകളെയും ഡാറ്റയെയും ഭൗതികവും ഡിജിറ്റലുമായ ഭീഷണികളിൽ നിന്ന് സംരക്ഷിക്കുന്നു. റൂട്ടറുകളും അതിവേഗ സ്വിച്ചുകളും ഉൾപ്പെടെയുള്ള നെറ്റ്‌വർക്കിംഗ് ഉപകരണങ്ങൾ, കെട്ടിടത്തിനകത്തും പുറത്തുമുള്ള ഡാറ്റാ കൈമാറ്റം സാധ്യമാക്കുന്നു. ഫെബർ-ഓപ്റ്റിക് കണക്ഷനുകൾ ഡാറ്റാ സെന്ററും ബാഹ്യ നെറ്റ്‌വർക്കുകളും തമ്മിൽ അതിവേഗ ആശയവിനിമയം നൽകുന്നു.

അവസാനമായി മാനേജ്‌മെന്റ് സോഫ്റ്റ്‌വെയറുകൾ സിസ്റ്റങ്ങളെ നിരീക്ഷിക്കുകയും കമ്പ്യൂട്ടിംഗ് വിഭവങ്ങളുടെ കാര്യക്ഷമമായ ഉപയോഗം ഒപ്റ്റിമൈസ് ചെയ്യാൻ സഹായിക്കുകയും ചെയ്യുന്നു. വെർച്വലൈസേഷൻ ഒരൊറ്റ ഫിസിക്കൽ സെർവറിൽ ഒന്നിലധികം വെർച്വൽ മെഷീനുകൾ പ്രവർത്തിപ്പിക്കാൻ അനുവദിക്കുന്നു. ഇത് വിഭവങ്ങളുടെ ഉപയോഗം മെച്ചപ്പെടുത്തുന്നു. ഒരു വലിയ വീടെടുത്ത് അതിനെ ഓരോ പ്രത്യേക അപ്പാർട്ടുമെന്റുകളായി തിരിക്കുന്നത് സങ്കൽപ്പിക്കുക. വെർച്വലൈസേഷൻ ഒരു ഫിസിക്കൽ കമ്പ്യൂട്ടറിനുള്ളിൽ തന്നെ ഒന്നിലധികം വെർച്വൽ "മിനി-കമ്പ്യൂട്ടറുകൾ" പ്രവർത്തിപ്പിക്കാൻ അനുവദിക്കുന്നു. ഇത് വിഭവങ്ങളുടെ കാര്യക്ഷമത പരമാവധിയാക്കുന്നു. ഓട്ടോമേഷൻ ടൂളുകൾ ജോലിഭാരം നിയന്ത്രിക്കുകയും പരിപാലനത്തെ പിന്തുണയ്ക്കുകയും പ്രവർത്തനപരമായ പ്രശ്നങ്ങൾ തിരിച്ചറിയാൻ സഹായിക്കുകയും ചെയ്യുന്നു.

ഓരോ ഡിജിറ്റൽ അഭ്യർത്ഥനയും ഒരു ആപ്പ് തുറക്കുക, ബാങ്ക് ബാലൻസ് പരിശോധിക്കുക, അല്ലെങ്കിൽ ഒരു ഡോക്യുമെന്റ് തുറക്കുക തുടങ്ങിയ ലളിതമായ പ്രവർത്തനത്തിലൂടെയാണ് ആരംഭിക്കുന്നത്. ക്ഷണനേരത്തിലുള്ള ഈ പ്രതികരണത്തിന് പിന്നിൽ അഭ്യർത്ഥന ഒരു നെറ്റ്‌വർക്കിലൂടെ ഒരു ഡാറ്റാ സെന്ററിലേക്ക് യാത്ര ചെയ്യുന്നു, അവിടെ ഒന്നിലധികം സംവിധാനങ്ങൾ ഒന്നിച്ച് പ്രവർത്തിച്ച് അത് സുരക്ഷിതമായും കാര്യക്ഷമമായും പ്രോസസ്സ് ചെയ്യുന്നു.

സുരക്ഷാ പാളി ആദ്യം ഈ അഭ്യർത്ഥനയെ പരിശോധിക്കുകയും സൈബർ ഭീഷണികളിൽ നിന്ന് സിസ്റ്റത്തെ സംരക്ഷിക്കുകയും ചെയ്യുന്നു. തുടർന്ന് ലോഡ് ബാലൻസർ ഈ അഭ്യർത്ഥനയെ ലഭ്യമായ ഒരു സെർവറിലേക്ക് തിരിച്ചുവിടുകയും ജോലിഭാരം കാര്യക്ഷമമായി വീതിച്ചുനൽകാൻ സഹായിക്കുകയും ചെയ്യുന്നു.

ആപ്ലിക്കേഷൻ സെർവർ അഭ്യർത്ഥനയെ പ്രോസസ്സ് ചെയ്യുകയും ഏത് വിവരമോ സേവനമോ ആണ് വേണ്ടതെന്ന് നിർണ്ണയിക്കുകയും ചെയ്യുന്നു. ആവശ്യമെങ്കിൽ മറ്റ് ആപ്ലിക്കേഷനുകളുമായോ സേവനങ്ങളുമായോ ആശയവിനിമയം നടത്തുന്നതിന് ഇത് ഒരു ആപ്ലിക്കേഷൻ പ്രോഗ്രാമിംഗ് ഇന്റർഫേസ് (API) ഉപയോഗിക്കുന്നു.

തുടർന്ന് ഡാറ്റാബേസ് സെർവർ ആവശ്യമായ വിവരങ്ങൾ വീണ്ടെടുക്കുകയും അത് ആപ്ലിക്കേഷൻ സെർവറിലേക്ക് തിരികെ അയയ്ക്കുകയും ചെയ്യുന്നു. പ്രോസസ്സിംഗ് പൂർത്തിയായിക്കഴിഞ്ഞാൽ വിവരങ്ങൾ നെറ്റ്‌വർക്കിലൂടെ തിരികെ യാത്ര ചെയ്ത് ഉപഭോക്താവിന്റെ ഉപകരണത്തിൽ എത്തുന്നു.

ഈ മുഴുവൻ പ്രക്രിയയ്ക്കും വെറും 1–2 സെക്കൻഡുകൾ മാത്രമേ എടുക്കുന്നുള്ളൂ. ഇത് വേഗമേറിയതും തടസ്സമില്ലാത്തതുമായ ഡിജിറ്റൽ സേവനങ്ങൾ സാധ്യമാക്കുന്നു. ബന്ധിപ്പിക്കുക → സ്വീകരിക്കുക → നെറ്റ്‌വർക്ക് → പ്രോസസ്സ് ചെയ്യുക → സംഭരിക്കുക → സുരക്ഷിതമാക്കുക → പ്രതികരിക്കുക എന്ന പരസ്പരബന്ധിതമായ ഈ ശൃംഖല ക്ലൗഡ് സേവനങ്ങൾ, ഇ-ഗവേണൻസ് പ്ലാറ്റ്‌ഫോമുകൾ, ആർട്ടിഫിഷ്യൽ ഇന്റലിജൻസ് (AI) ആപ്ലിക്കേഷനുകൾ എന്നിവയ്ക്ക് വിവരങ്ങൾ വിശ്വസനീയമായും വൻതോതിലും ലഭ്യമാക്കാൻ സൗകര്യമൊരുക്കുന്നു. ആധുനിക ഡാറ്റാ സെന്ററുകൾ വെറുമൊരു സംഭരണ കേന്ദ്രങ്ങൾ മാത്രമല്ലെന്ന് ഇത് കാണിക്കുന്നു; ദൈനംദിന ഓൺലൈൻ സേവനങ്ങൾ സാധ്യമാക്കുന്ന ഡിജിറ്റൽ അടിസ്ഥാന സൗകര്യങ്ങളാണ് അവ.

ഇന്ത്യയിലെ ഡാറ്റാ സെന്ററുകളുടെ നിലവിലെ അവസ്ഥ

ഇ-ഗവേണൻസിന്റെയും ഡിജിറ്റൽ സേവനങ്ങളുടെയും വേഗത്തിലുള്ള വികാസത്തിനൊപ്പം ഇന്ത്യയുടെ ഡാറ്റാ സെന്റർ പ്രയാണവും പരിണമിച്ചു. ഓൺലൈൻ സേവനങ്ങൾക്കായുള്ള പൗരന്മാരുടെ ഉയർന്നുവരുന്ന പ്രതീക്ഷകൾ, ശക്തമായ ഡാറ്റാ സെന്റർ അടിസ്ഥാന സൗകര്യങ്ങൾക്കായുള്ള ആവശ്യം വർധിപ്പിക്കുന്നു. നാഷണൽ ഇൻഫോർമാറ്റിക്‌സ് സെന്റർ (NIC) രാജ്യത്തുടനീളം അത്യാധുനിക ദേശീയ ഡാറ്റാ സെന്ററുകൾ സ്ഥാപിച്ചിട്ടുണ്ട്. ഡൽഹി, പൂനെ, ഹൈദരാബാദ്, ഭുവനേശ്വർ എന്നിവിടങ്ങളിലെ NIC ആസ്ഥാനത്തുള്ള സൗകര്യങ്ങൾ ഇതിൽ ഉൾപ്പെടുന്നു. വിവിധ സംസ്ഥാന തലസ്ഥാനങ്ങളിലായി 37 ചെറിയ ഡാറ്റാ സെന്ററുകളും NIC സ്ഥാപിച്ചിട്ടുണ്ട്. ഈ സൗകര്യങ്ങൾ വിവിധ തലങ്ങളിലുള്ള ഗവൺമെന്റ് സ്ഥാപനങ്ങൾക്ക് വിശ്വസനീയമായ ഡിജിറ്റൽ സേവനങ്ങൾ നൽകുന്നു. അവ 24 മണിക്കൂറും പ്രവർത്തിക്കുന്ന പ്രവർത്തനങ്ങൾ, സിസ്റ്റം മാനേജ്‌മെന്റ്, വിദഗ്ധരായ ഓൺസൈറ്റ് ജീവനക്കാർ എന്നിവയ്ക്ക് പിന്തുണ നൽകുന്നു.

ഇന്ത്യയുടെ വേഗത്തിൽ വികസിക്കുന്ന ഡിജിറ്റൽ സമ്പദ്‌വ്യവസ്ഥ, സുരക്ഷിതവും വിശ്വസനീയവുമായ ഡാറ്റാ അടിസ്ഥാന സൗകര്യങ്ങൾക്കായുള്ള ആവശ്യകതയെ കൂടുതൽ ശക്തിപ്പെടുത്തുന്നു. സ്ഥാപിത ഡാറ്റാ സെന്റർ ഊർജ്ജ ശേഷി 2020-ൽ ഏകദേശം 375 മെഗാവാട്ട് (MW) ആയിരുന്നു. അത് 2026 ഓഗസ്റ്റ് ആയപ്പോഴേക്കും 1.57 ഗിഗാവാട്ട് (GW) ആയി ഉയർന്നു. 2030-ഓടെ ഈ ശേഷി ഏകദേശം 8 ഗിഗാവാട്ടിലേക്ക് കൂടുതൽ വികസിക്കുമെന്ന് പ്രവചിക്കപ്പെടുന്നു. ഇന്ത്യയുടെ ഡാറ്റാ സെന്റർ മേഖലയിൽ ഏകദേശം 70 ശതകോടി യുഎസ് ഡോളറിന്റെ നിക്ഷേപങ്ങൾ നിലവിൽ നടന്നുകൊണ്ടിരിക്കുന്നു. ഒപ്പം പ്രഖ്യാപിക്കപ്പെട്ട പദ്ധതികളിലായി 90 ശതകോടി യുഎസ് ഡോളറിന്റെ അധിക നിക്ഷേപവുമുണ്ട്. ഇത് വികസനത്തിന്റെ വ്യാപ്തി വ്യക്തമാക്കുകയും നിക്ഷേപകരുടെ ശക്തമായ വിശ്വാസത്തെ പ്രതിഫലിപ്പിക്കുകയും ചെയ്യുന്നു.

ഡാറ്റാ സെന്ററുകൾക്കായി അനുയോജ്യമായ നയപരമായ അന്തരീക്ഷം സജ്ജമാക്കൽ

ലക്ഷ്യാധിഷ്ഠിത നയങ്ങളിലൂടെയും സാമ്പത്തിക നടപടികളിലൂടെയും ഗവൺമെന്റ് ഡാറ്റാ സെന്റർ അന്തരീക്ഷത്തെ ശക്തിപ്പെടുത്തിയിട്ടുണ്ട്. 2022-23-ലെ കേന്ദ്ര ബജറ്റിൽ ഡാറ്റാ സെന്ററുകളെ അടിസ്ഥാന സൗകര്യങ്ങളുടെ ഏകീകൃത പട്ടികയിൽ ഉൾപ്പെടുത്തി. ഇത് ഡാറ്റാ സെന്ററുകൾക്ക് അടിസ്ഥാന സൗകര്യ പദവി (infrastructure status) നൽകുകയും ഡിജിറ്റൽ അടിസ്ഥാന സൗകര്യങ്ങൾക്കായി വായ്പകൾ കൂടുതൽ എളുപ്പത്തിൽ ലഭ്യമാക്കാൻ സഹായിക്കുകയും ചെയ്തു. ഈ നടപടി ഇന്ത്യയിലെ ഡാറ്റാ സെന്റർ ശേഷിയുടെ നിക്ഷേപത്തെയും വികാസത്തെയും പിന്തുണയ്ക്കുകയും ചെയ്തു.

2026-27-ലെ കേന്ദ്ര ബജറ്റിൽ അർഹരായ വിദേശ ക്ലൗഡ് സേവന ദാതാക്കൾക്ക് 2047 വരെ നികുതി ഒഴിവാക്കൽ (tax holiday) അവതരിപ്പിച്ചു. ഇന്ത്യ അധിഷ്ഠിത ഡാറ്റാ സെന്റർ അടിസ്ഥാന സൗകര്യങ്ങൾ ഉപയോഗിക്കുന്ന ആഗോള പ്രവർത്തനങ്ങൾക്കാണ് ഈ ആനുകൂല്യം ലഭിക്കുന്നത്. വിജ്ഞാപനം ചെയ്ത വിദേശ കമ്പനികൾക്ക് 2026-27 മുതൽ 2046-47 വരെയുള്ള നികുതി വർഷങ്ങളിൽ ഇത് ബാധകമാണ്. ഈ നടപടികൾ ഡാറ്റാ സെന്ററുകൾക്കും ക്ലൗഡ് അടിസ്ഥാന സൗകര്യങ്ങൾക്കുമായുള്ള ഇന്ത്യയിലെ നിക്ഷേപ അന്തരീക്ഷത്തെ ശക്തമാക്കുന്നു.

ഡാറ്റാ സെന്റർ മേഖല നിലനിർത്തൽ: ഊർജ്ജ, ജല ആസൂത്രണം

ഡാറ്റാ സെന്റർ ശേഷി വേഗത്തിൽ വികസിച്ചുകൊണ്ടിരിക്കുകയാണ്. ഇത് ഊർജ്ജ-വിഭവ കാര്യക്ഷമതയെ കൂടുതൽ പ്രധാനപ്പെട്ടതാക്കുന്നു. തുടർച്ചയായ പ്രവർത്തനങ്ങൾക്ക് ഡാറ്റാ സെന്ററുകൾക്ക് വിശ്വസനീയമായ വൈദ്യുതിയും കാര്യക്ഷമമായ കൂളിംഗ് സംവിധാനങ്ങളും ആവശ്യമാണ്. കേന്ദ്ര ഊർജ്ജ മന്ത്രാലയത്തിന് കീഴിലുള്ള സെൻട്രൽ ഇലക്‌ട്രിസിറ്റി അതോറിറ്റിയുടെ (CEA) കണക്കനുസരിച്ച് 2031-32 ഓടെ ഈ ആവശ്യകത 17 ഗിഗാവാട്ട് (GW) വരെ എത്തിയേക്കാം. ഈ മേഖല വികസിക്കുന്നതിനനുസരിച്ച് സുസ്ഥിരമായ മേഖല വളർച്ചയെ പിന്തുണയ്ക്കുന്നതിനായി ഗവൺമെന്റ് ഹരിതോർജ്ജവും കാര്യക്ഷമമായ വിഭവ വിനിയോഗവും പ്രോത്സാഹിപ്പിക്കുന്നു.

നിരവധി പ്രധാന സംരംഭങ്ങളിലൂടെ ഗവൺമെന്റ് പുനരുപയോഗ ഊർജ്ജത്തെ പ്രോത്സാഹിപ്പിക്കുന്നു. ഗ്രീൻ എനർജി ഓപ്പൺ ആക്സസ് റൂൾസ്, ഗ്രീൻ എനർജി കോറിഡോർ സ്കീം, നാഷണൽ ഗ്രീൻ ഹൈഡ്രജൻ മിഷൻ എന്നിവ ഇതിൽ ഉൾപ്പെടുന്നു. ഹൈ എഫിഷ്യൻസി സോളാർ പിവി മോഡ്യൂളുകൾക്കായുള്ള നാഷണൽ പ്രോഗ്രാമും സോളാർ പാർക്ക് സ്കീമും ഹരിത ഊർജ്ജ വിന്യാസത്തെ കൂടുതൽ പിന്തുണയ്ക്കുന്നു. ഈ നടപടികൾ ഊർജ്ജ ഉപഭോഗം കൂടുതലുള്ള ഡിജിറ്റൽ അടിസ്ഥാന സൗകര്യങ്ങൾക്ക് കൂടുതൽ വൃത്തിയുള്ളതും വിശ്വസനീയവുമായ വൈദ്യുതി ലഭ്യത ഉറപ്പാക്കുന്നു.

സുസ്ഥിരമായ ആണവോർജ്ജ ഉപയോഗത്തിനായുള്ള ശാന്തി (Sustainable Harnessing and Advancement of Nuclear Energy for Transforming India - SHANTI) നിയമം ഹരിതോർജ്ജ അന്തരീക്ഷത്തെ ശക്തമാക്കുന്നു. ഇത് നിർമിത ബുദ്ധി, ഡാറ്റാ സെന്ററുകൾ എന്നിവയുൾപ്പെടെയുള്ള പുതിയ മേഖലകൾക്ക് വിശ്വസനീയമായ ആണവോർജ്ജ പിന്തുണ നൽകുന്നു. സ്മോൾ മോഡുലാർ റിയാക്ടറുകൾ, മൈക്രോ ന്യൂക്ലിയർ റിയാക്ടറുകൾ എന്നിവയുടെ ഭാവി വിന്യാസത്തിനും ഈ ചട്ടക്കൂട് സൗകര്യമൊരുക്കുന്നു.

ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (BIS) ഡാറ്റാ സെന്ററുകളുടെ കാര്യക്ഷമതയ്ക്കുള്ള മാനദണ്ഡങ്ങൾ വികസിപ്പിച്ചെടുത്തിട്ടുണ്ട്. ഇതിന്റെ ടെക്നിക്കൽ കമ്മിറ്റിയായ LITD 31, ക്ലൗഡ് കമ്പ്യൂട്ടിംഗ്, ഇൻഫർമേഷൻ ടെക്നോളജി, ഡാറ്റാ സെന്ററുകൾ എന്നിവയെ ഉൾക്കൊള്ളുന്നു. പവർ യൂസേജ് ഇഫക്റ്റീവ്നസ് (PUE), കാർബൺ യൂസേജ് ഇഫക്റ്റീവ്നസ് (CUE) എന്നിവ ഉൾക്കൊള്ളുന്ന മാനദണ്ഡങ്ങൾ BIS പ്രസിദ്ധീകരിച്ചിട്ടുണ്ട്. ഈ മാനദണ്ഡങ്ങൾ കൂളിംഗ് എഫിഷ്യൻസി റേഷ്യോ (CER), വാട്ടർ യൂസേജ് ഇഫക്റ്റീവ്നസ് (WUE) എന്നിവയും കൈകാര്യം ചെയ്യുന്നു.

ബ്യൂറോ ഓഫ് എനർജി എഫിഷ്യൻസി (BEE) എനർജി കൺസർവേഷൻ ബിൽഡിംഗ് കോഡ് (ECBC) 2017 വിജ്ഞാപനം ചെയ്തിട്ടുണ്ട്. എനർജി കൺസർവേഷൻ ആൻഡ് സസ്റ്റൈനബിൾ ബിൽഡിംഗ് കോഡ് (ECSBC) 2024-ഉം ഇത് വിജ്ഞാപനം ചെയ്തു. ഈ കോഡുകൾ കെട്ടിടങ്ങൾക്കായുള്ള ഊർജ്ജ കാര്യക്ഷമതയുടെയും ജലസംരക്ഷണത്തിന്റെയും മാനദണ്ഡങ്ങൾ നിർദ്ദേശിക്കുന്നു. ഡാറ്റാ സെന്റർ അടിസ്ഥാന സൗകര്യങ്ങൾക്ക് അനുയോജ്യമായ വ്യവസ്ഥകളും ഇവയിൽ ഉൾപ്പെടുന്നു.

ഡാറ്റാ സെന്ററുകളുടെ ജല ആവശ്യകതകൾ ഉപയോഗിക്കുന്ന കൂളിംഗ് സാങ്കേതികവിദ്യകളെ ആശ്രയിച്ചിരിക്കുന്നു. വ്യാവസായിക ആവശ്യങ്ങൾ ഉൾപ്പെടെയുള്ള ഭൂഗർഭ ജല വിനിയോഗം കേന്ദ്ര ജൽശക്തി മന്ത്രാലയം പുറപ്പെടുവിച്ച മാർഗ്ഗനിർദ്ദേശങ്ങൾക്ക് കീഴിലാണ് നിയന്ത്രിക്കപ്പെടുന്നത്. AI അടിസ്ഥാന സൗകര്യങ്ങൾ ഡാറ്റാ സെന്ററുകളിൽ അത്യാധുനിക കൂളിംഗ് സാങ്കേതികവിദ്യകൾ സ്വീകരിക്കുന്നതിന് വഴിയൊരുക്കുന്നു. ഡയറക്ട്-ടു-ചിപ്പ് ലിക്വിഡ് കൂളിംഗ്, അഡിയാബാറ്റിക് കൂളിംഗ്, ഇമേഴ്ഷൻ കൂളിംഗ് എന്നിവ ഇതിൽ ഉൾപ്പെടുന്നു. ക്ലോസ്ഡ്-ലൂപ്പ് ലിക്വിഡ് കൂളിംഗ് സംവിധാനങ്ങളും വിഭവ കാര്യക്ഷമതയുള്ള പരിഹാരങ്ങളായി ഉയർന്നുവരുന്നു.

മുന്നോട്ടുള്ള പാത

ഇന്ത്യയുടെ ഡാറ്റാ സെന്റർ വളർച്ച പ്രതിരോധശേഷിയുള്ളതും പരമാധികാരമുള്ളതുമായ ഒരു ഡിജിറ്റൽ അടിസ്ഥാന സൗകര്യത്തിലേക്കുള്ള സ്ഥിരതയുള്ളതും നയപരമായതുമായ പ്രയാണത്തെ പ്രതിഫലിപ്പിക്കുന്നു. ഡാറ്റാ പരമാധികാരം, ഡിജിറ്റൽ വിശ്വാസ്യത, സാമ്പത്തിക മത്സരക്ഷമത, സാങ്കേതിക സ്വയംപര്യാപ്തത എന്നിവയ്ക്ക് ഇത് കൂടുതൽ പ്രധാനപ്പെട്ടതായി മാറിക്കൊണ്ടിരിക്കുകയാണ്. ക്ലൗഡ്, ആർട്ടിഫിഷ്യൽ ഇന്റലിജൻസ് അടിസ്ഥാന സൗകര്യങ്ങളുടെ വികാസം നവീനാശയത്തിനും സാമ്പത്തിക വളർച്ചയ്ക്കും പുതിയ അവസരങ്ങൾ സൃഷ്ടിക്കുന്നു.

എന്നിരുന്നാലും ഈ വളർച്ചയ്ക്ക് ഡാറ്റ, സാങ്കേതികവിദ്യ, ഊർജ്ജം, ഡിജിറ്റൽ അടിസ്ഥാന സൗകര്യങ്ങൾ എന്നിവയുടെ ഉത്തരവാദിത്തമുള്ള ഭരണനിർവഹണവും ആവശ്യമാണ്. സുരക്ഷ, സുസ്ഥിരത, ഉത്തരവാദിത്തം, പൊതുതാൽപ്പര്യം എന്നിവയ്‌ക്കൊപ്പം നവീനാശയത്തെ സന്തുലിതമാക്കാൻ ഒരു സാങ്കേതിക ഭരണ സമീപനം സഹായിക്കും. ഇതിന് ശക്തമായ മാനദണ്ഡങ്ങൾ, ഉറപ്പുള്ള സൈബർ സുരക്ഷ, ഉത്തരവാദിത്തമുള്ള ഡാറ്റാ രീതികൾ, കാര്യക്ഷമമായ വിഭവ മാനേജ്‌മെന്റ് എന്നിവ ആവശ്യമാണ്. കമ്പ്യൂട്ടിംഗ്, സെമികണ്ടക്ടറുകൾ, ഊർജ്ജം, നിർണ്ണായക ഡിജിറ്റൽ അടിസ്ഥാന സൗകര്യങ്ങൾ എന്നിവയിലുടനീളം വലിയ ആഭ്യന്തര ശേഷിയും ഇത് ആവശ്യപ്പെടുന്നു. 2047-ഓടെ വികസിത് ഭാരതത്തിലേക്ക് ഇന്ത്യ കുതിക്കുമ്പോൾ ഡാറ്റാ സെന്ററുകൾക്ക് ഡിജിറ്റൽ സമ്പദ്‌വ്യവസ്ഥയുടെ അടിസ്ഥാന പാളിയായി പ്രവർത്തിക്കാൻ കഴിയും.

അവലംബം

Niti Aayog

• https://www.nitiforstates.gov.in/public-assets/Policy/policy_files/PNC510C000384.pdf
• https://nitiforstates.gov.in/policy-viewer?id=PNC510C000384
• https://icemf.niti.gov.in/sites/default/files/inline-files/Energy%20and%20AI%20(IEA).pdf

Ministry of Electronics & IT

• https://www.pib.gov.in/PressReleasePage.aspx?PRID=2298108&reg=3&lang=1
• https://www.pib.gov.in/PressReleasePage.aspx?PRID=2241783&reg=48&lang=2
• https://www.pib.gov.in/PressReleasePage.aspx?PRID=2202897&reg=3&lang=1

Ministry of Finance

• https://www.pib.gov.in/PressReleasePage.aspx?PRID=2219981&reg=6&lang=1
• https://www.pib.gov.in/PressReleasePage.aspx?PRID=1794165&reg=48&lang=2

Ministry of Communications

• https://www.pib.gov.in/PressReleasePage.aspx?PRID=1877179&reg=48&lang=2

Press Information Bureau

• https://www.pib.gov.in/PressReleasePage.aspx?PRID=2227953&reg=48&lang=2
• https://static.pib.gov.in/WriteReadData/specificdocs/documents/2022/dec/doc2022128141601.pdf
• https://www.pib.gov.in/PressNoteDetails.aspx?NoteId=157352&ModuleId=3&reg=3&lang=3

Others:

• https://www.nic.gov.in/service/data-centre/
• https://sathee.iitk.ac.in/sathee-bank-exam/student-corner/ncert-books/class-11/information-practices/chapter-02-emerging-trends/
• https://d2p5j06zete1i7.cloudfront.net/Cms/admin/PressRelease/1784110792.pdf

Click here to see pdf

***

SK