पत्र सूचना कार्यालय

ದೇಶೀಯ ಕಂಟೇನರ್ ಉತ್ಪಾದನೆಯ ಅವಶ್ಯಕತೆ

ಇಂದಿನ ಜಾಗತಿಕ ವ್ಯಾಪಾರವು ಹೆಚ್ಚಾಗಿ ಕಂಟೇನರೀಕೃತ ಲಾಜಿಸ್ಟಿಕ್ಸ್‌ನಿಂದ ನಡೆಸಲ್ಪಡುತ್ತಿದೆ. ವಿಶ್ವಸಂಸ್ಥೆಯ ವ್ಯಾಪಾರ ಮತ್ತು ಅಭಿವೃದ್ಧಿ ಸಮ್ಮೇಳನದ (ಯುಎನ್‌ಸಿಟಿಎಡಿ) ಪ್ರಕಾರ, ಪರಿಮಾಣದ ಮೂಲಕ ಜಾಗತಿಕ ಸರಕು ವ್ಯಾಪಾರದ ಸುಮಾರು 80% ರಷ್ಟು ಭಾಗವು ಸಮುದ್ರದ ಮೂಲಕ ಸಾಗಿಸಲ್ಪಡುತ್ತದೆ. ಕಡಲ ಸಾರಿಗೆಯು ಅಂತರರಾಷ್ಟ್ರೀಯ ವಾಣಿಜ್ಯದ ಬೆನ್ನೆಲುಬಾಗಿದೆ. ಏತನ್ಮಧ್ಯೆ, ಕಂಟೇನರೀಕೃತ ಸರಕುಗಳು ಅಂತಾರಾಷ್ಟ್ರೀಯ ವ್ಯಾಪಾರದ ಮೌಲ್ಯದ ಸುಮಾರು ಮೂರನೇ ಎರಡರಷ್ಟು ಭಾಗವನ್ನು ಹೊಂದಿವೆ. ಈ ಪ್ರವೃತ್ತಿಗಳು ಜಾಗತಿಕ ಪೂರೈಕೆ ಸರಪಳಿಗಳನ್ನು ಬೆಂಬಲಿಸುವಲ್ಲಿ ಸಮರ್ಥ ಕಂಟೇನರ್ ಲಾಜಿಸ್ಟಿಕ್ಸ್‌ಗಳ ಕಾರ್ಯತಂತ್ರದ ಪ್ರಾಮುಖ್ಯತೆಯನ್ನು ಉಲ್ಲೇಖಿಸುತ್ತವೆ.

ಇತ್ತೀಚಿನ ವರ್ಷಗಳಲ್ಲಿ, ಭೌಗೋಳಿಕ ರಾಜಕೀಯ ಬಿಕ್ಕಟ್ಟುಗಳು, ಪೂರೈಕೆ-ಸರಪಳಿ ಅಡಚಣೆಗಳು ಮತ್ತು ಬದಲಾಗುತ್ತಿರುವ ಸಾಗಣೆ ಮಾರ್ಗಗಳು ಸರಕುಗಳ ಜಾಗತಿಕ ಚಲನೆಯಲ್ಲಿನ ದುರ್ಬಲತೆಗಳನ್ನು ಬಹಿರಂಗಪಡಿಸಿವೆ. ಈ ಅಡಚಣೆಗಳು ಸರಕು ಸಾಗಣೆ ದರಗಳ ಏರಿಳಿತಕ್ಕೆ ಮತ್ತು ಕಡಲ ಸಾರಿಗೆ ಜಾಲಗಳ ಮೇಲಿನ ಹೆಚ್ಚಿದ ಒತ್ತಡಕ್ಕೆ ಕಾರಣವಾಗಿವೆ ಎಂದು ಯುಎನ್‌ಸಿಟಿಎಡಿ ಗಮನಿಸಿದೆ. ಇದರ ಪರಿಣಾಮವಾಗಿ, ಅನೇಕ ದೇಶಗಳು ಶಿಪ್ಪಿಂಗ್ ಕಂಟೇನರ್‌ಗಳು ಸೇರಿದಂತೆ ಪ್ರಮುಖ ಲಾಜಿಸ್ಟಿಕ್‌ ಆಸ್ತಿಗಳಿಗಾಗಿ ದೇಶೀಯ ಉತ್ಪಾದನಾ ಸಾಮರ್ಥ್ಯಗಳನ್ನು ಹೆಚ್ಚಿಸಲು ಹೆಚ್ಚಿನ ಪ್ರಾಮುಖ್ಯತೆಯನ್ನು ನೀಡುತ್ತಿವೆ.

ಜಾಗತಿಕ ಉತ್ಪಾದನೆ ಮತ್ತು ಅಂತಾರಾಷ್ಟ್ರೀಯ ವ್ಯಾಪಾರದಲ್ಲಿ ಭಾರತದ ಬೆಳೆಯುತ್ತಿರುವ ಪಾತ್ರವು ಕಂಟೇನರೀಕೃತ ಸರಕುಗಳ ಚಲನೆಯ ಬೇಡಿಕೆಯನ್ನು ಗಣನೀಯವಾಗಿ ಹೆಚ್ಚಿಸಿದೆ. ಆದಾಗ್ಯೂ, ವಿಸ್ತರಿಸುತ್ತಿರುವ ರಫ್ತು-ಆಮತು ವ್ಯಾಪಾರ ಮತ್ತು ಕ್ಷಿಪ್ರ ಲಾಜಿಸ್ಟಿಕ್ಸ್ ಅಭಿವೃದ್ಧಿಯ ಹೊರತಾಗಿಯೂ, ಭಾರತವು ಹೆಚ್ಚಾಗಿ ಆಮದು ಮಾಡಿಕೊಂಡ ಖಾಲಿ ಕಂಟೇನರ್‌ಗಳನ್ನು ಅವಲಂಬಿಸಿದೆ. ದೇಶೀಯ ಬೇಡಿಕೆಯನ್ನು ಪೂರೈಸಲು ಮತ್ತು ಮರುಸ್ಥಾಪನೆ ಉದ್ದೇಶಗಳಿಗಾಗಿ ಭಾರತವು ಪ್ರತಿವರ್ಷ ಸುಮಾರು 2 ಮಿಲಿಯನ್ ಖಾಲಿ ಕಂಟೇನರ್‌ಗಳನ್ನು ಆಮದು ಮಾಡಿಕೊಳ್ಳುತ್ತದೆ. ಇದು ಜಾಗತಿಕ ಮಾರುಕಟ್ಟೆ ಏರಿಳಿತಗಳು, ಸರಕು ಸಾಗಣೆ ಅಸ್ಥಿರತೆ ಮತ್ತು ಪೂರೈಕೆ-ಸರಪಳಿ ಅಡಚಣೆಗಳಿಗೆ ಕಂಟೇನರ್ ಲಭ್ಯತೆಯನ್ನು ದುರ್ಬಲಗೊಳಿಸಿದೆ.

ಈ ಉದಯೋನ್ಮುಖ ಸವಾಲುಗಳನ್ನು ಗುರುತಿಸಿ, ಸರ್ಕಾರವು ಕಂಟೇನರ್ ಉತ್ಪಾದನಾ ನೆರವು ಯೋಜನೆಯನ್ನು ಘೋಷಿಸಿದೆ. ಇದು ದೇಶೀಯ ಉತ್ಪಾದನೆಯನ್ನು ಉತ್ತೇಜಿಸುವ ಮೂಲಕ ಮತ್ತು ಮೌಲ್ಯ ಸರಪಳಿಯಾದ್ಯಂತ ಹೂಡಿಕೆಯನ್ನು ಪ್ರೋತ್ಸಾಹಿಸುವ ಮೂಲಕ ಭಾರತದಲ್ಲಿ ಜಾಗತಿಕವಾಗಿ ಸ್ಪರ್ಧಾತ್ಮಕ ಕಂಟೇನರ್ ಉತ್ಪಾದನಾ ಪರಿಸರ ವ್ಯವಸ್ಥೆಯನ್ನು ಸ್ಥಾಪಿಸುವ ಗುರಿಯನ್ನು ಹೊಂದಿದೆ. ಈ ಉಪಕ್ರಮವು ಆಮದು ಅವಲಂಬನೆಯನ್ನು ಕಡಿಮೆ ಮಾಡಲು ಮತ್ತು ಪೂರೈಕೆ-ಸರಪಳಿ ಸ್ಥಿತಿಸ್ಥಾಪಕತ್ವವನ್ನು ಬಲಪಡಿಸಲು ಪ್ರಯತ್ನಿಸುತ್ತದೆ. ಇದಲ್ಲದೆ, ಇದು ಮೇಕ್ ಇನ್ ಇಂಡಿಯಾ, ಮಾರಿಟೈಮ್ ಅಮೃತ್ ಕಾಲ್ ವಿಷನ್ 2047 ಮತ್ತು ಮಲ್ಟಿಮೋಡಲ್ ಲಾಜಿಸ್ಟಿಕ್ಸ್ ಅಭಿವೃದ್ಧಿಯಡಿಯಲ್ಲಿ ಸರ್ಕಾರದ ಉಪಕ್ರಮಗಳನ್ನು ಪೂರೈಸುತ್ತದೆ, ಇದು ಭಾರತದ ದೀರ್ಘಕಾಲೀನ ಕಡಲ ಮತ್ತು ವ್ಯಾಪಾರ ಮಹತ್ವಾಕಾಂಕ್ಷೆಗಳಿಗೆ ಕೊಡುಗೆ ನೀಡುತ್ತದೆ.

ಕಂಟೇನರ್ ಉತ್ಪಾದನಾ ನೆರವು ಯೋಜನೆ ಎಂದರೇನು?

ಕಂಟೇನರ್ ಉತ್ಪಾದನಾ ನೆರವು ಯೋಜನೆಯನ್ನು ಕೇಂದ್ರ ಬಜೆಟ್ 2026-27 ರಲ್ಲಿ ಘೋಷಿಸಲಾಯಿತು. ಇದು ಹಣಕಾಸು ಮತ್ತು ಸಾಂಸ್ಥಿಕ ಬೆಂಬಲದ ಮೂಲಕ ಸ್ಪರ್ಧಾತ್ಮಕ ದೇಶೀಯ ಕಂಟೇನರ್ ಉತ್ಪಾದನಾ ಉದ್ಯಮವನ್ನು ಸ್ಥಾಪಿಸುವ ಗುರಿಯನ್ನು ಹೊಂದಿರುವ ಒಂದು ನಿರ್ದಿಷ್ಟ ಉಪಕ್ರಮವಾಗಿದೆ.

ಐದು ವರ್ಷಗಳ ಅವಧಿಗೆ 10,000 ಕೋಟಿ ರೂ.ಗಳ ಅನುದಾನದೊಂದಿಗೆ, ಪ್ರಸ್ತಾವಿತ ಯೋಜನೆಯು ಹೊಸ ಉತ್ಪಾದನಾ ಘಟಕಗಳ ಸ್ಥಾಪನೆ ಮತ್ತು ಅಸ್ತಿತ್ವಮಾನವಿರುವ ಘಟಕಗಳ ವಿಸ್ತರಣೆಯನ್ನು ಬೆಂಬಲಿಸುತ್ತದೆ. ಇದು ಶಿಪ್ಪಿಂಗ್ ಕಂಟೇನರ್‌ಗಳ ಭಾರತದ ಬೆಳೆಯುತ್ತಿರುವ ಬೇಡಿಕೆಯನ್ನು ಪೂರೈಸಲು ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ.

ಈ ಉಪಕ್ರಮವು ಅಸ್ತಿತ್ವಮಾನವಿರುವ ಕಂಟೇನರ್ ಉತ್ಪಾದನಾ ಸಾಮರ್ಥ್ಯದ ಸುಮಾರು 10 ರಷ್ಟು ವಾರ್ಷಿಕ ದೇಶೀಯ ಉತ್ಪಾದನಾ ಸಾಮರ್ಥ್ಯವನ್ನು ಗುರಿಯಾಗಿರಿಸಿಕೊಂಡಿದೆ (ಇಪ್ಪತ್ತು ಅಡಿಗೆ ಸಮಾನವಾದ ಘಟಕಗಳಲ್ಲಿ - ಟಿಇಯುಗಳು 7.5 ಲಕ್ಷದವರೆಗೆ). ಇದು ಭಾರತವನ್ನು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸ್ಪರ್ಧಾತ್ಮಕ ಶಿಪ್ಪಿಂಗ್ ಕಂಟೇನರ್‌ಗಳ ವಿಶ್ವಾಸಾರ್ಹ ಉತ್ಪಾದಕರನ್ನಾಗಿ ನೆಲೆಗೊಳಿಸುವ ಜೊತೆಗೆ ಬೃಹತ್ ಮಾರುಕಟ್ಟೆ ಅವಕಾಶವನ್ನು ಸೃಷ್ಟಿಸುವ ನಿರೀಕ್ಷೆಯಿದೆ.

ಕಂಟೇನರ್ ಉತ್ಪಾದನಾ ಮೌಲ್ಯ ಸರಪಳಿಯನ್ನು ಬಲಪಡಿಸಲು ಈ ಯೋಜನೆಯು ಈ ಕೆಳಗಿನವುಗಳನ್ನು ಒದಗಿಸುತ್ತದೆ:

• ಹೊಸ ಗ್ರೀನ್‌ಫೀಲ್ಡ್ ಉತ್ಪಾದನಾ ಸೌಲಭ್ಯಗಳನ್ನು ಸ್ಥಾಪಿಸಲು ಬಂಡವಾಳ ನೆರವು.
• ಅಸ್ತಿತ್ವದಲ್ಲಿರುವ ಬ್ರೌನ್‌ಫೀಲ್ಡ್ ಉತ್ಪಾದನಾ ಘಟಕಗಳ ವಿಸ್ತರಣೆಗೆ ಬೆಂಬಲ.
• ದೇಶೀಯ ಕಂಟೇನರ್ ಉತ್ಪಾದನೆಯ ಸ್ಪರ್ಧಾತ್ಮಕತೆಯನ್ನು ಸುಧಾರಿಸಲು ಕಾರ್ಯಾಚರಣೆಯ ಬೆಂಬಲ.
• ಪರೀಕ್ಷಾ ಮೂಲಸೌಕರ್ಯ, ಕೌಶಲ್ಯ ಉಪಕ್ರಮಗಳು ಮತ್ತು ಸಾಮರ್ಥ್ಯ ವರ್ಧನೆಗೆ ಬೆಂಬಲ.

ಸಮಗ್ರ ಕಡಲ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವುದು

ಕಂಟೇನರ್ ಉತ್ಪಾದನಾ ನೆರವು ಯೋಜನೆಯು ಸಮಗ್ರವಾದ ಮತ್ತು ದೇಶೀಯವಾಗಿ ನೆಲೆಗೊಂಡಿರುವ ಕಂಟೇನರ್ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ವಿಶಾಲವಾದ ಕಾರ್ಯತಂತ್ರದ ಒಂದು ಅಂಶವಾಗಿದೆ. ಫೆಬ್ರವರಿ 2026 ರಲ್ಲಿ, ಬಂದರು, ಸಾಗಾಣಿಕೆ ಮತ್ತು ಜಲಮಾರ್ಗಗಳ ಸಚಿವಾಲಯವು 'ಭಾರತ್ ಕಂಟೇನರ್ ಶಿಪ್ಪಿಂಗ್ ಲೈನ್' ಅನ್ನು ಸ್ಥಾಪಿಸಲು ಒಡಂಬಡಿಕೆಗೆ ಸಹಿ ಹಾಕಿತು. ಇದು ಭಾರತೀಯ ಶಿಪ್ಪಿಂಗ್ ಕಾರ್ಪೊರೇಷನ್, ಕಂಟೇನರ್ ಕಾರ್ಪೊರೇಷನ್ ಆಫ್ ಇಂಡಿಯಾ ಜವಾಹರಲಾಲ್ ನೆಹರು ಪೋರ್ಟ್ ಅಥಾರಿಟಿ, ವಿ.ಒ. ಚಿದಂಬರನಾರ್ ಪೋರ್ಟ್ ಅಥಾರಿಟಿ ಮತ್ತು ಸಾಗರಮಾಲಾ ಫೈನಾನ್ಸ್ ಕಾರ್ಪೊರೇಷನ್ ಲಿಮಿಟೆಡ್ ಗಳನ್ನು ಒಂದೆಡೆ ತರುತ್ತದೆ. ಈ ಉಪಕ್ರಮವು ವಿವಿಧ ಗಾತ್ರದ 51 ಕಂಟೇನರ್ ನೌಕೆಗಳ ಫ್ಲೀಟ್ ಅಭಿವೃದ್ಧಿ ಮತ್ತು ದೇಶೀಯ ಕಂಟೇನರ್ ಖರೀದಿಯಲ್ಲಿ ಸುಮಾರು ರೂ. 99,149 ಕೋಟಿಗಳ ಹೂಡಿಕೆಯನ್ನು ಕಲ್ಪಿಸುತ್ತದೆ.

ಈ ಸಮನ್ವಯದ ವಿಧಾನವು ಸರ್ಕಾರದ ವಿಶಾಲವಾದ ಲಾಜಿಸ್ಟಿಕ್ಸ್ ಉಪಕ್ರಮಗಳನ್ನು ಪೂರೈಸುತ್ತದೆ. ಇವುಗಳು ಈ ಕೆಳಗಿನವುಗಳನ್ನು ಒಳಗೊಂಡಿವೆ:
 

• ಪ್ರಧಾನ ಮಂತ್ರಿ ಗತಿ ಶಕ್ತಿ: ಬಂದರುಗಳು, ರೈಲ್ವೆಗಳು, ಹೆದ್ದಾರಿಗಳು ಮತ್ತು ಕೈಗಾರಿಕಾ ಕೇಂದ್ರಗಳ ನಡುವಿನ ಸಂಪರ್ಕವನ್ನು ಹೆಚ್ಚಿಸುವುದು;

• ರಾಷ್ಟ್ರೀಯ ಲಾಜಿಸ್ಟಿಕ್ಸ್ ನೀತಿ: ಕಾರ್ಯಾಚರಣೆಯ ದಕ್ಷತೆಯನ್ನು ಬೆಂಬಲಿಸುವುದು; ಮತ್ತು

• ಸಾಗರಮಾಲಾ ಕಾರ್ಯಕ್ರಮ: ಬಂದರು-ನೇತೃತ್ವದ ಅಭಿವೃದ್ಧಿಯನ್ನು ಉತ್ತೇಜಿಸುವುದು.

ಈ ಉಪಕ್ರಮಗಳು ಭಾರತದ ಬೆಳೆಯುತ್ತಿರುವ ವ್ಯಾಪಾರ ಪ್ರಮಾಣಕ್ಕಾಗಿ ಸ್ಥಿತಿಸ್ಥಾಪಕ ಮತ್ತು ಸಂಯೋಜಿತ ಲಾಜಿಸ್ಟಿಕ್ಸ್ ಜಾಲವನ್ನು ಬೆಂಬಲಿಸುತ್ತವೆ.

ಉದ್ಯೋಗ ಮತ್ತು ಉತ್ಪಾದನಾ ಅವಕಾಶಗಳು

ಲಾಜಿಸ್ಟಿಕ್ಸ್ ಸ್ಥಿತಿಸ್ಥಾಪಕತ್ವವನ್ನು ಸುಧಾರಿಸುವುದರ ಜೊತೆಗೆ, ಸಿಎಂಎಎಸ್‌ಗಣನೀಯ ಉದ್ಯೋಗವನ್ನು ಸೃಷ್ಟಿಸುವ ಮತ್ತು ಕೈಗಾರಿಕಾ ಅಭಿವೃದ್ಧಿಯನ್ನು ಉತ್ತೇಜಿಸುವ ನಿರೀಕ್ಷೆಯಿದೆ.

ಇದು ಕಂಟೇನರ್ ಉತ್ಪಾದನೆ ಮತ್ತು ಅದಕ್ಕೆ ಸಂಬಂಧಿಸಿದ ಕೈಗಾರಿಕೆಗಳಲ್ಲಿ ಸುಮಾರು 3,000 ನೇರ ಉದ್ಯೋಗಗಳನ್ನು ಮತ್ತು 50,000 ಕ್ಕಿಂತ ಹೆಚ್ಚು ಪರೋಕ್ಷ ಉದ್ಯೋಗಗಳನ್ನು ಸೃಷ್ಟಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಈ ಉಪಕ್ರಮವು ಹಲವಾರು ಸಹವರ್ತಿ ಕೈಗಾರಿಕೆಗಳಲ್ಲಿ ಬೆಳವಣಿಗೆಯನ್ನು ಉತ್ತೇಜಿಸುವ ನಿರೀಕ್ಷೆಯಿದೆ, ಅವುಗಳೆಂದರೆ:

• ಕಾರ್ನರ್ ಕ್ಯಾಸ್ಟಿಂಗ್‌ಗಳು
• ಮರದ ಚೌಕಟ್ಟುಗಳು
• ಕೋರ್ಟನ್ ಸ್ಟೀಲ್ (ಹವಾಮಾನ ನಿರೋಧಕ ಉಕ್ಕು)

ಇತ್ತೀಚಿನ ಪ್ರಗತಿ ಮತ್ತು ಉದ್ಯಮದ ಪ್ರತಿಕ್ರಿಯೆ

ಜಾಗತಿಕ ಶಿಪ್ಪಿಂಗ್ ಕಂಪನಿಯಾದ ಎ.ಪಿ. ಮೊಲ್ಲರ್-ಮರ್ಸ್ಕ್ ಗಾಗಿ ಭಾರತದಲ್ಲಿ ತಯಾರಿಸಿದ ತನ್ನ ಮೊದಲ ರಫ್ತು-ಆಮತು ಶಿಪ್ಪಿಂಗ್ ಕಂಟೇನರ್ ಅನ್ನು ಹೊರತರುವ ಮೂಲಕ ಜುಲೈ 2026 ರಲ್ಲಿ ಭಾರತವು ಕಡಲ ಉತ್ಪಾದನೆಯಲ್ಲಿ ಮಹತ್ವದ ಮೈಲಿಗಲ್ಲನ್ನು ಸಾಧಿಸಿತು. ಉತ್ತರ ಪ್ರದೇಶದ ದಾದ್ರಿಯಲ್ಲಿರುವ ಮರ್ಸ್ಕ್-ಕಾನ್ಕೋರ್ ಒಳನಾಡಿನ ಕಂಟೇನರ್ ಡಿಪೋದಲ್ಲಿ ಈ ಕಂಟೇನರ್ ಅನ್ನು ಅನಾವರಣಗೊಳಿಸಲಾಯಿತು.

ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಲ್ಪಟ್ಟ ಐಎಸ್‌ಒ ಮಾನದಂಡಗಳು ಮತ್ತು ಸುರಕ್ಷಿತ ಕಂಟೇನರ್‌ಗಳಿಗಾಗಿ ಅಂತರರಾಷ್ಟ್ರೀಯ ಒಪ್ಪಂದಕ್ಕೆ ಅನುಗುಣವಾಗಿ ಈ ಕಂಟೇನರ್ ಅನ್ನು ತಯಾರಿಸಲಾಗಿದೆ. ಇದು ಜಾಗತಿಕ ಶಿಪ್ಪಿಂಗ್ ನೆಟ್‌ವರ್ಕ್‌ಗಳಲ್ಲಿ ನಿಯೋಜನೆಗೆ ಸೂಕ್ತವಾಗಿದೆ. ಈ ಬಿಡುಗಡೆಯು ಜಾಗತಿಕವಾಗಿ ಅನುಸರಣೆಯಾಗುವ ಶಿಪ್ಪಿಂಗ್ ಕಂಟೇನರ್‌ಗಳನ್ನು ತಯಾರಿಸುವ ಭಾರತದ ಸಾಮರ್ಥ್ಯವನ್ನು ಪ್ರದರ್ಶಿಸುತ್ತದೆ.

ಮತ್ತೊಂದು ಗಮನಾರ್ಹ ಮೈಲಿಗಲ್ಲು ಎಂದರೆ ಡಿಸಿಎಂ ಶ್ರೀರಾಮ್ ಗ್ರೂಪ್‌ನಿಂದ 1,000 ಹೆಚ್ಚುವರಿ ಮೇಡ್ ಇನ್ ಇಂಡಿಯಾ ಶಿಪ್ಪಿಂಗ್ ಕಂಟೇನರ್‌ಗಳಿಗಾಗಿ ಮರ್ಸ್ಕ್ ನೀಡಿದ ಆದೇಶವಾಗಿದೆ. ಈ ಆದೇಶವು ಭಾರತದ ಉದಯೋನ್ಮುಖ ಉತ್ಪಾದನಾ ಸಾಮರ್ಥ್ಯಕ್ಕೆ ಸಿಕ್ಕ ಆರಂಭಿಕ ವಾಣಿಜ್ಯ ಅನುಮೋದನೆಯಾಗಿದೆ. ಇದು ಉನ್ನತ ಗುಣಮಟ್ಟದ ಶಿಪ್ಪಿಂಗ್ ಕಂಟೇನರ್‌ಗಳನ್ನು ಉತ್ಪಾದಿಸುವ ಭಾರತದ ಸಾಮರ್ಥ್ಯದ ಬಗ್ಗೆ ಜಾಗತಿಕ ಶಿಪ್ಪಿಂಗ್ ಕಂಪನಿಗಳಲ್ಲಿ ಬೆಳೆಯುತ್ತಿರುವ ವಿಶ್ವಾಸವನ್ನು ಸೂಚಿಸುತ್ತದೆ.

ಸರ್ಕಾರದ ನೀತಿ ಹಸ್ತಕ್ಷೇಪಗಳು ವಾಣಿಜ್ಯ ಫಲಿತಾಂಶಗಳಾಗಿ ಪರಿವರ್ತನೆಗೊಳ್ಳಲು ಪ್ರಾರಂಭಿಸಿವೆ ಎಂಬುದನ್ನು ಈ ಬೆಳವಣಿಗೆಗಳು ಸೂಚಿಸುತ್ತವೆ. ಜಾಗತಿಕ ಕಡಲ ಮೌಲ್ಯ ಸರಪಳಿಯಲ್ಲಿ ಪ್ರಮುಖ ಉತ್ಪಾದನಾ ಕೇಂದ್ರವಾಗಿ ಹೊರಹೊಮ್ಮುವ ಭಾರತದ ಮಹತ್ವಾಕಾಂಕ್ಷೆಯನ್ನು ಇವು ಬಲಪಡಿಸುತ್ತವೆ.
 

ವಿಶಾಲವಾದ ಕಡಲ ರೂಪಾಂತರದ ಒಂದು ಭಾಗ

ಭಾರತದ ಕಡಲ ಕ್ಷೇತ್ರವನ್ನು ಬಲಪಡಿಸುವ ವಿಶಾಲವಾದ ಸುಧಾರಣೆಗಳ ಒಂದು ಭಾಗವಾಗಿದೆ ಸಿಎಂಎಎಸ್‌ ದೇಶೀಯ ಕಂಟೇನರ್ ಉತ್ಪಾದನೆಯನ್ನು ಉತ್ತೇಜಿಸುವುದರ ಜೊತೆಗೆ, ಸರ್ಕಾರವು ಶಾಸಕಾಂಗ, ಸಾಂಸ್ಥಿಕ ಮತ್ತು ಮೂಲಸೌಕರ್ಯ ಉಪಕ್ರಮಗಳ ಸರಣಿಯನ್ನು ಪರಿಚಯಿಸಿದೆ. ಒಟ್ಟಾರೆಯಾಗಿ, ಈ ಕ್ರಮಗಳು ವ್ಯಾಪಾರ ಮಾಡುವ ಸುಲಭತೆಯನ್ನು ಸುಧಾರಿಸುವ ಜೊತೆಗೆ ಭಾರತದ ಕಡಲ ಪರಿಸರ ವ್ಯವಸ್ಥೆಯನ್ನು ಆಧುನೀಕರಿಸಲು ಪ್ರಯತ್ನಿಸುತ್ತವೆ.

ಇವುಗಳಲ್ಲಿ ಮರ್ಚೆಂಟ್ ಶಿಪ್ಪಿಂಗ್ ಆಕ್ಟ್ 2025, ಕರಾವಳಿ ಸಾಗಾಣಿಕೆ ಕಾಯ್ದೆ 2025 ಮತ್ತು ಭಾರತೀಯ ಬಂದರುಗಳ ಕಾಯ್ದೆ 2025 ಜಾರಿಗೆ ಬಂದಿರುವುದು ಸೇರಿದೆ. ಈ ಕಾನೂನುಗಳು ಸಾಗಾಣಿಕೆ, ಕರಾವಳಿ ವ್ಯಾಪಾರ ಮತ್ತು ಬಂದರು ಆಡಳಿತಕ್ಕಾಗಿ ನವೀಕರಿಸಿದ ಕಾನೂನು ಚೌಕಟ್ಟನ್ನು ಒದಗಿಸುತ್ತವೆ. ಈ ಸುಧಾರಣೆಗಳಿಗೆ ಪೂರಕವಾಗಿ ಒನ್ ನೇಷನ್ ಒನ್ ಪೋರ್ಟ್ ಪ್ರೊಸೆಸ್, ಮಾರಿಟೈಮ್ ಸಿಂಗಲ್ ವಿಂಡೋ ಮತ್ತು ಇ-ಸಮುದ್ರದಂತಹ ಡಿಜಿಟಲ್ ಉಪಕ್ರಮಗಳಿವೆ. ಈ ಉಪಕ್ರಮಗಳು ನಿಯಂತ್ರಣ ಪ್ರಕ್ರಿಯೆಗಳನ್ನು ಸರಳಗೊಳಿಸುತ್ತವೆ, ದಾಖಲಾತಿಯನ್ನು ಕಡಿಮೆ ಮಾಡುತ್ತವೆ ಮತ್ತು ಬಂದರುಗಳು ಹಾಗೂ ಸಾಗಾಣಿಕೆ ಸೇವೆಗಳಲ್ಲಿ ಕಾರ್ಯಾಚರಣೆಯ ದಕ್ಷತೆಯನ್ನು ಸುಧಾರಿಸುತ್ತವೆ.

ಸರ್ಕಾರವು 70,000 ಕೋಟಿ ರೂ.ಗಳ ಹಡಗು ನಿರ್ಮಾಣ ಹಣಕಾಸು ನೆರವು ಪ್ಯಾಕೇಜ್ ಅನ್ನು ಸಹ ಘೋಷಿಸಿದೆ. ಈ ಪ್ಯಾಕೇಜ್ ದೇಶೀಯ ಹಡಗು ನಿರ್ಮಾಣ ಸಾಮರ್ಥ್ಯಗಳನ್ನು ಹೆಚ್ಚಿಸಲು ಮತ್ತು ಕಡಲ ಉತ್ಪಾದನಾ ಖಾತೆ ಹೆಚ್ಚಿನ ಹೂಡಿಕೆಗಳನ್ನು ಪ್ರೋತ್ಸಾಹಿಸುವ ಗುರಿಯನ್ನು ಹೊಂದಿದೆ. ಪ್ರಸ್ತಾವಿತ 'ಭಾರತ್ ಕಂಟೇನರ್ ಶಿಪ್ಪಿಂಗ್ ಲೈನ್' ನೊಂದಿಗೆ, ಈ ಕ್ರಮಗಳು ಹಡಗು ನಿರ್ಮಾಣ, ಕಂಟೇನರ್ ಉತ್ಪಾದನೆ, ಸಾಗಾಣಿಕೆ ಸೇವೆಗಳು, ಬಂದರುಗಳು ಮತ್ತು ಮಲ್ಟಿಮೋಡಲ್ ಲಾಜಿಸ್ಟಿಕ್ಸ್ ಅನ್ನು ವ್ಯಾಪಿಸಿರುವ ಸಮಗ್ರ ಕಡಲ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ಪ್ರಯತ್ನಿಸುತ್ತವೆ.

ವಾದ್ರವನ್ ಬಂದರು, ಗಲಾಥೆಯ ಕೊಲ್ಲಿಯಲ್ಲಿರುವ ಅಂತಾರಾಷ್ಟ್ರೀಯ ಕಂಟೇನರ್ ಟ್ರಾನ್ಸ್‌ಶಿಪ್‌ಮೆಂಟ್ ಬಂದರು, ತುನಾ ಟೆಕ್ರಾ ಕಂಟೇನರ್ ಟರ್ಮಿನಲ್ ಮತ್ತು ವಿ.ಒ. ಚಿದಂಬರನಾರ್ ಬಂದರಿನ ಹೊರ ಹಾರ್ಬರ್ ಕಂಟೇನರ್ ಟರ್ಮಿನಲ್ ಸೇರಿದಂತೆ ಪ್ರಮುಖ ಮೂಲಸೌಕರ್ಯ ಯೋಜನೆಗಳು ವೇಗವಾಗಿ ಪ್ರಗತಿಯಲ್ಲಿವೆ. ಈ ಯೋಜನೆಗಳು ಭಾರತದ ಕಡಲ ಮೂಲಸೌಕರ್ಯವನ್ನು ವಿಸ್ತರಿಸಲು ಮತ್ತು ಸರಕು ನಿರ್ವಹಣಾ ಸಾಮರ್ಥ್ಯವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿವೆ.

ಕಂಟೇನರ್ ಪೋರ್ಟ್ ಕಾರ್ಯಕ್ಷಮತೆ ಸೂಚ್ಯಂಕ 2025 ರಲ್ಲಿ ಈಗ ಮೂರು ಭಾರತೀಯ ಬಂದರುಗಳು ವಿಶ್ವದ ಅಗ್ರ 30 ರಲ್ಲಿ ಸ್ಥಾನ ಪಡೆದಿವೆ, ಇದು ಬಂದರು ದಕ್ಷತೆಯಲ್ಲಿ ಮುಂದುವರಿದ ಸುಧಾರಣೆಗಳನ್ನು ಪ್ರತಿಬಿಂಬಿಸುತ್ತದೆ ಮತ್ತು ಜಾಗತಿಕ ಕಡಲ ವ್ಯಾಪಾರದಲ್ಲಿ ಭಾರತದ ಸ್ಥಾನವನ್ನು ಬಲಪಡಿಸುತ್ತದೆ.

ಮುಂದಿನ ಹಾದಿ

ಜಾಗತಿಕವಾಗಿ ಸ್ಪರ್ಧಾತ್ಮಕ ಕಡಲ ಉತ್ಪಾದನಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ದಿಶೆಯಲ್ಲಿ ಸಿಎಂಎಎಸ್‌ ಒಂದು ಮಹತ್ವಪೂರ್ಣ ಹೆಜ್ಜೆಯಾಗಿದೆ. ಕಂಟೇನರ್ ಉತ್ಪಾದನೆಯನ್ನು ಉತ್ತೇಜಿಸುವ ಮತ್ತು ಆಮದುಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವ ಮೂಲಕ, ಈ ಯೋಜನೆಯು ಪೂರೈಕೆ-ಸರಪಳಿ ಸ್ಥಿತಿಸ್ಥಾಪಕತ್ವವನ್ನು ಬಲಪಡಿಸುತ್ತದೆ, ಉದ್ಯೋಗವನ್ನು ಸೃಷ್ಟಿಸುತ್ತದೆ ಮತ್ತು ಜಾಗತಿಕ ವ್ಯಾಪಾರದಲ್ಲಿ ಭಾರತದ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ. ವಿಶಾಲವಾದ ಕಡಲ ಸುಧಾರಣೆಗಳಿಂದ ಪೂರಕವಾಗಿರುವ ಸಿಎಂಎಎಸ್‌, ಭಾರತವನ್ನು ಪ್ರಮುಖ ಕಡಲ ಉತ್ಪಾದನಾ ಮತ್ತು ಲಾಜಿಸ್ಟಿಕ್ಸ್ ಕೇಂದ್ರವಾಗಿ ನೆಲೆಗೊಳಿಸುವ ಸಾಮರ್ಥ್ಯವನ್ನು ಹೊಂದಿದೆ.

References

Ministry of Ports, Shipping and Waterways

https://sansad.in/getFile/annex/270/AU2875_nAmH3t.pdf?source=pqars&utm

https://www.pib.gov.in/PressReleasePage.aspx?PRID=2221817&reg=48&lang=2

https://dgma.gov.in/download/1775649151_69d6417f46b3f_dgs-nmdc-address-01042026.pdf?utm

https://www.pib.gov.in/PressReleasePage.aspx?PRID=2222805&lang=1&reg=3&utm

https://www.pib.gov.in/PressReleasePage.aspx?PRID=2280831&lang=1&reg=3&utm

UNCTAD
https://unctad.org/topic/transport-and-trade-logistics/review-of-maritime-transport?utm

https://unctad.org/publication/review-maritime-transport-2025?utm

Click here to see pdf 

******