पत्र सूचना कार्यालय

CPGRAMS: সঁহাৰিমূলক শাসনৰ জৰিয়তে নাগৰিকক সবলীকৰণ

এক ফলপ্ৰসূ ৰাজহুৱা অভিযোগ নিষ্পত্তি ব্যৱস্থা সঁহাৰিমূলক শাসনৰ মূল ভেটি। ই নাগৰিকসকলক ৰাজহুৱা সেৱা প্ৰদানৰ সৈতে জড়িত উদ্বেগসমূহ প্ৰকাশ কৰাৰ বাবে এক মঞ্চ প্ৰদান কৰাৰ লগতে চৰকাৰী প্ৰতিষ্ঠানসমূহ যাতে জবাবদিহি, স্বচ্ছ আৰু সহজলভ্য হৈ থাকে সেয়া নিশ্চিত কৰে।

কেন্দ্ৰীভূত ৰাজহুৱা অভিযোগ নিষ্পত্তি আৰু নিৰীক্ষণ ব্যৱস্থা (CPGRAMS) হৈছে চৰকাৰৰ মুখ্য ডিজিটেল অভিযোগ নিষ্পত্তি মঞ্চ। নাগৰিকসকলৰ বাবে ২৪ ঘণ্টাই, সপ্তাহৰ সাতোটা দিনেই উপলব্ধ CPGRAMSৰ এটা একক পৰ্টেলৰ সৈতে সকলো কেন্দ্ৰীয় মন্ত্ৰালয়, বিভাগ, ৰাজ্য চৰকাৰ আৰু কেন্দ্ৰীয় শাসিত অঞ্চল সংযুক্ত হৈ আছে।

নাগৰিকসকলে ৰাজহুৱা সেৱা প্ৰদানৰ সৈতে জড়িত অভিযোগ দাখিল কৰিব পাৰে আৰু এক স্বচ্ছ তথা প্ৰযুক্তি-সক্ষম প্ৰক্ৰিয়াৰ জৰিয়তে সেই অভিযোগৰ নিষ্পত্তিৰ অগ্ৰগতি অনুসৰণ কৰিব পাৰে।

যোৱা দশকটোত CPGRAMS এটা অভিযোগ পঞ্জীয়ন পৰ্টেলৰ পৰা এক ব্যাপক শাসন মঞ্চলৈ বিকশিত হৈছে। ই ডিজিটেল উদ্ভাৱন, কৃত্ৰিম বুদ্ধিমত্তা-চালিত নিৰীক্ষণ আৰু নাগৰিকৰ মতামত ব্যৱহাৰ কৰি সমগ্ৰ দেশত ৰাজহুৱা সেৱা প্ৰদান ব্যৱস্থা শক্তিশালী আৰু নিৰন্তৰ উন্নত কৰি আহিছে।

CPGRAMSৰ ক্ৰমবিকাশ

২০১৪ চনৰ পৰা ভাৰতৰ ৰাজহুৱা অভিযোগ নিষ্পত্তি ব্যৱস্থাত এক বৃহৎ পৰিৱৰ্তন সংঘটিত হৈছে। ই এক খণ্ডিত আৰু বৃহৎ পৰিমাণে হাতেলিখা পদ্ধতিৰ পৰা দক্ষতা, স্বচ্ছতা আৰু নাগৰিক সন্তুষ্টিৰ ওপৰত গুৰুত্ব আৰোপ কৰা প্ৰযুক্তি-চালিত মঞ্চলৈ ৰূপান্তৰিত হৈছে।

প্ৰতি বছৰে নিষ্পত্তি কৰা অভিযোগৰ সংখ্যা প্ৰায় ন-গুণ বৃদ্ধি পাইছে (২০১৪ চনত প্ৰায় ৩.০১ লাখৰ পৰা ২০২৪ চনত প্ৰায় ২৭ লাখলৈ)। ই জনসাধাৰণৰ বৰ্ধিত আস্থাৰ প্ৰতিফলন।

অভিযোগ নিষ্পত্তি নেটৱৰ্কো যথেষ্ট সম্প্ৰসাৰিত হৈছে। অভিযোগ নিষ্পত্তি বিষয়াৰ সংখ্যা ২০১৪ চনত ১০,২৩২ৰ পৰা ২০২৫ চনত ১.১১ লাখতকৈ অধিকলৈ বৃদ্ধি পাইছে।

এই সংস্কাৰসমূহে সেৱা প্ৰদানৰ উন্নতি সাধন কৰিছে আৰু পলম হ্ৰাস কৰিছে। কেন্দ্ৰীয় মন্ত্ৰালয় আৰু বিভাগসমূহত গড় অভিযোগ নিষ্পত্তিৰ সময় ২০১৪ চনত ১৫৭ দিনৰ পৰা ২০২৫ চনত মাত্ৰ ১৫ দিনলৈ হ্ৰাস পাইছে।

CPGRAMS-এ কেনেদৰে কাম কৰে

কেন্দ্ৰীভূত ৰাজহুৱা অভিযোগ নিষ্পত্তি আৰু নিৰীক্ষণ ব্যৱস্থা (CPGRAMS)-এ এক ব্যাপক ডিজিটেল পৰিৱেশ হিচাপে কাম কৰে, যিয়ে প্ৰযুক্তি, জবাবদিহিতা আৰু নাগৰিক অংশগ্ৰহণক একত্ৰিত কৰি ফলপ্ৰসূ আৰু সহজলভ্য অভিযোগ নিষ্পত্তি নিশ্চিত কৰে।

• পঞ্জীয়ন(Registration): নাগৰিকসকলে https://pgportal.gov.in/ত এবাৰ পঞ্জীয়ন কৰি অনলাইনত অভিযোগ দাখিল কৰিব পাৰে। তেওঁলোকে CPGRAMS ম’বাইল এপৰ জৰিয়তেও অভিযোগ দাখিল কৰিব পাৰে, যিটো UMANG এপৰ সৈতে সংযুক্ত। ইয়াৰ উপৰি সমগ্ৰ দেশত ২.৫ লাখ গাঁও পৰ্যায়ৰ উদ্যোগীৰ সৈতে জড়িত ৫ লাখতকৈ অধিক সাধাৰণ সেৱা কেন্দ্ৰৰ জৰিয়তেও অভিযোগ দাখিল কৰিব পাৰি। ডাকযোগে লাভ কৰা অফলাইন অভিযোগসমূহ ডিজিটেল ৰূপলৈ ৰূপান্তৰ কৰি ব্যৱস্থাটোত আপলোড কৰা হয়।

• স্বয়ংক্ৰিয় পৰিচালনা আৰু শ্ৰেণীবিভাজন(Auto-Routing and Categorisation): ব্যৱস্থাটোৱে অন্তিম পৰ্যায়ৰ অভিযোগ নিষ্পত্তি বিষয়াৰ মানচিত্ৰ প্ৰস্তুত কৰি অভিযোগসমূহ উপযুক্ত কৰ্তৃপক্ষলৈ স্বয়ংক্ৰিয়ভাৱে প্ৰেৰণ কৰাৰ সুবিধা প্ৰদান কৰে। CPGRAMSত দাখিল কৰা অভিযোগৰ অৱস্থা অভিযোগকাৰীক পঞ্জীয়নৰ সময়ত প্ৰদান কৰা অনন্য অভিযোগ পঞ্জীয়ন পৰিচয় নম্বৰৰ জৰিয়তে অনুসৰণ কৰিব পাৰি।
• ২১ দিনৰ ভিতৰত নিষ্পত্তি: ২০২৪ চনৰ আগষ্ট মাহত জাৰি কৰা ৰাজহুৱা অভিযোগৰ ফলপ্ৰসূ নিষ্পত্তিৰ বাবে ব্যাপক নিৰ্দেশনাই অভিযোগ নিষ্পত্তিৰ সময়সীমা ৩০ দিনৰ পৰা ২১ দিনলৈ যুক্তিসংগতভাৱে হ্ৰাস কৰিছে। ইয়াত নিৰ্দিষ্ট অভিযোগ কোষ, মূল কাৰণ বিশ্লেষণ আৰু শক্তিশালী পৰ্যায়োন্নয়ন ব্যৱস্থা বাধ্যতামূলক কৰা হৈছে। কেন্দ্ৰীয় মন্ত্ৰালয়/বিভাগসমূহত গড় অভিযোগ নিষ্পত্তিৰ সময় ২০১৪ চনত ১৫৭ দিনৰ পৰা ২০২৫ চনত ১৫ দিনলৈ হ্ৰাস পাইছে।
• ফীডবেক আৰু আপীল: নিষ্পত্তিৰ পিছত এক নিৰ্দিষ্ট মতামত কল চেণ্টাৰে নাগৰিকসকলৰ সৈতে পোনপটীয়াকৈ যোগাযোগ কৰি তেওঁলোকৰ সন্তুষ্টি মূল্যায়ন কৰে। যদি নাগৰিক অসন্তুষ্ট হয়, তেন্তে তেওঁলোকে আপীল ব্যৱস্থাৰ জৰিয়তে বিষয়টো ওপৰলৈ নিব পাৰে—য’ত ন’ডেল আপীল কৰ্তৃপক্ষই ৩০ দিনৰ ভিতৰত আপীলৰ নিষ্পত্তি কৰিব লাগিব।

তলত উল্লেখ কৰা বিষয়সমূহ নিষ্পত্তিৰ বাবে গ্ৰহণ কৰা নহয়:

• তথ্য জনাৰ অধিকাৰ সম্পৰ্কীয় বিষয়
• আদালত-সম্পৰ্কীয় / বিচাৰাধীন বিষয়
• ধৰ্মীয় বিষয়
• চৰকাৰী কৰ্মচাৰীৰ সেৱা-সম্পৰ্কীয় বিষয়, যাৰ ভিতৰত শাস্তিমূলক কাৰ্যব্যৱস্থাও অন্তৰ্ভুক্ত

এক নজৰত কাৰ্যদক্ষতা

ৰাজহুৱা অভিযোগ নিষ্পত্তিৰ ৰূপান্তৰ: ১০-দফীয়া সংস্কাৰ কাৰ্যসূচী

২০২২ চনত প্ৰধানমন্ত্ৰীৰ পৰ্যালোচনাৰ পিছত ১০-দফীয়া সংস্কাৰ কাৰ্যসূচী প্ৰৱৰ্তনৰ লগে লগে CPGRAMSৰ ক্ৰমবিকাশত এক গুৰুত্বপূৰ্ণ পৰিৱৰ্তন আহে। তেতিয়াৰ পৰা নিৰন্তৰ নিৰীক্ষণ আৰু লক্ষ্যভিত্তিক সংস্কাৰৰ জৰিয়তে অভিযোগ নিষ্পত্তি ব্যৱস্থা অধিক দক্ষ, সহজলভ্য আৰু নাগৰিক-কেন্দ্ৰিক কৰি শক্তিশালী কৰা হৈছে।

সংস্কাৰ কাঠামোটোত দহটা মূল হস্তক্ষেপ অন্তৰ্ভুক্ত আছে:

CPGRAMS ৭.০ৰ সাৰ্বজনীনকৰণ

CPGRAMS ৭.০ (7.0)-ৰ সাৰ্বজনীনকৰণে অভিযোগসমূহ উপযুক্ত কৰ্তৃপক্ষলৈ স্বয়ংক্ৰিয়ভাৱে প্ৰেৰণ কৰাৰ সুবিধা প্ৰদান কৰে, যিয়ে পূৰ্বৰ হাতেলিখা প্ৰেৰণ প্ৰক্ৰিয়াৰ স্থান গ্ৰহণ কৰে। ২০২২ চনৰ ভিতৰত সকলো কেন্দ্ৰীয় মন্ত্ৰালয় আৰু বিভাগক মঞ্চটোৰ সৈতে সংযুক্ত কৰা হৈছিল, যাৰ ফলত অধিক দ্ৰুত আৰু দক্ষ অভিযোগ নিষ্পত্তি নিশ্চিত হয়।

প্ৰযুক্তিগত উন্নতি

কৃত্ৰিম বুদ্ধিমত্তা আৰু যন্ত্ৰ শিক্ষণ (মেচিন লাৰ্নিং)ৰ সংযুক্তিয়ে বাস্তৱ-সময়ৰ বিশ্লেষণ, ধাৰা চিনাক্তকৰণ আৰু ব্যৱস্থাগত সমস্যাসমূহ চিনাক্ত কৰাৰ জৰিয়তে অভিযোগ ব্যৱস্থাপনাক শক্তিশালী কৰিছে। উন্নত ডেশ্বব’ৰ্ড আৰু তথ্য বিশ্লেষণে প্ৰমাণ-ভিত্তিক সিদ্ধান্ত গ্ৰহণ আৰু ৰাজহুৱা সেৱা প্ৰদানৰ নিৰন্তৰ উন্নতিত সহায় কৰে। মূল কাৰণ চিনাক্ত কৰি নীতি পৰিৱৰ্তন ৰূপায়ণৰ জৰিয়তে ব্যৱস্থাটোৱে দক্ষ অভিযোগ নিষ্পত্তি আৰু নিৰন্তৰ শাসন ব্যৱস্থাৰ উন্নতি নিশ্চিত কৰে।

ভাষাগত অন্তৰ্ভুক্তি

অভিযোগ নিষ্পত্তি অধিক সহজলভ্য কৰি তুলিবলৈ চিপিগ্ৰামছে ইংৰাজীৰ উপৰি ২২টা অনুসূচীত ভাষাত অভিযোগ দাখিলৰ সুবিধা প্ৰদান কৰে। ভাষিণীৰ সৈতে সংযুক্তিৰ জৰিয়তে অভিযোগ নিষ্পত্তি বিষয়াসকলে নাগৰিকে ব্যৱহাৰ কৰা ভাষাতে উত্তৰ দিব পাৰে।

অভিযোগ নিষ্পত্তি মূল্যায়ন আৰু সূচক

এটা কাৰ্যদক্ষতা মানদণ্ড নিৰ্ধাৰণকাৰী কাঠামো হিচাপে প্ৰৱৰ্তিত অভিযোগ নিষ্পত্তি মূল্যায়ন আৰু সূচকে মন্ত্ৰালয় আৰু বিভাগসমূহৰ অভিযোগ নিষ্পত্তিৰ ফলপ্ৰসূতা মূল্যায়ন কৰে আৰু অধিক দক্ষতা, জবাবদিহিতা তথা সুস্থ প্ৰতিযোগিতাক উৎসাহিত কৰে।

ফীডবেক কল চেণ্টাৰ

ফীডবেক কল চেণ্টাৰে নিষ্পত্তি কৰা অভিযোগসমূহৰ ওপৰত নাগৰিকৰ মতামত সংগ্ৰহ কৰে, যিয়ে সেৱাৰ মানদণ্ড মূল্যায়ন আৰু অভিযোগ নিষ্পত্তিৰ ক্ষেত্ৰত উন্নতিৰ সুযোগ চিনাক্ত কৰাত সহায় কৰে।

এক ৰাষ্ট্ৰ–এক মঞ্চ

ৰাজ্যিক অভিযোগ পৰ্টেল আৰু অন্যান্য চৰকাৰী মঞ্চসমূহক CPGRAMSৰ সৈতে সংযুক্ত কৰাৰ ফলত সমগ্ৰ দেশজুৰি এক ঐক্যবদ্ধ আৰু সুশৃংখলিত অভিযোগ নিষ্পত্তি পৰিৱেশ সৃষ্টি হৈছে।

অন্তৰ্ভুক্তি আৰু প্ৰসাৰ

CPGRAMS-এ সাধাৰণ সেৱা কেন্দ্ৰসমূহৰ সৈতে সংযুক্তিৰ জৰিয়তে অভিযোগ নিষ্পত্তি সেৱাৰ প্ৰৱেশাধিকাৰ সম্প্ৰসাৰিত কৰিছে, যাৰ ফলত গ্ৰাম্য আৰু দূৰৱৰ্তী অঞ্চলৰ নাগৰিকসকলে নিজৰ অভিযোগ পঞ্জীয়ন কৰিব পাৰিছে।

প্ৰশিক্ষণ আৰু সামৰ্থ্য বৃদ্ধি

সেৱোত্তম কাঠামোৰ অধীনত নিয়মীয়া প্ৰশিক্ষণ কাৰ্যসূচীয়ে অভিযোগ বিষয়াসকলৰ সামৰ্থ্য শক্তিশালী কৰে আৰু অভিযোগ নিষ্পত্তিৰ মানদণ্ড উন্নত কৰে।

নিৰীক্ষণ আৰু পৰ্যালোচনা

মাহেকীয়া কাৰ্যদক্ষতা প্ৰতিবেদন, পৰ্যালোচনা বৈঠক আৰু ন’ডেল অভিযোগ বিষয়াসকল তথা আপীল কৰ্তৃপক্ষৰ সৈতে নিৰন্তৰ যোগাযোগে স্বচ্ছতা, জবাবদিহিতা আৰু সময়মতে অভিযোগ নিষ্পত্তি নিশ্চিত কৰে।

তথ্য কৌশল গোট

প্ৰশাসনিক সংস্কাৰ আৰু ৰাজহুৱা অভিযোগ বিভাগৰ অধীনত এটা নিৰ্দিষ্ট তথ্য কৌশল গোটে উন্নত তথ্য বিশ্লেষণ ব্যৱহাৰ কৰি ধাৰা চিনাক্ত কৰে, নীতি উন্নয়নত সহায় কৰে আৰু অভিযোগ নিষ্পত্তি প্ৰক্ৰিয়া অধিক অনুকূল কৰি তোলে।

সমাধান দিদি: কৃত্ৰিম বুদ্ধিমত্তাৰ জৰিয়তে অভিযোগ নিষ্পত্তিৰ গণতান্ত্ৰিকীকৰণ

এক গুৰুত্বপূৰ্ণ প্ৰযুক্তিগত অগ্ৰগতি হিচাপে চৰকাৰে ৩০ মে’ ২০২৬ তাৰিখে কৃত্ৰিম বুদ্ধিমত্তা-সক্ষম CPGRAMS কণ্ঠ চেটবট “সমাধান দিদি” মুকলি কৰে।

এই পদক্ষেপে ৰাজহুৱা অভিযোগ নিষ্পত্তিক অধিক সহজলভ্য আৰু অন্তৰ্ভুক্তিমূলক কৰি তোলাৰ জৰিয়তে ইয়াক গণতান্ত্ৰিকীকৰণৰ দিশত এক গুৰুত্বপূৰ্ণ পদক্ষেপ প্ৰতিনিধিত্ব কৰে। নাগৰিকসকলে জটিল প্ৰ-পত্ৰ বা প্ৰশাসনিক শ্ৰেণীবিভাজনৰ মাজেৰে নোযোৱাকৈ নিজৰ পছন্দৰ ভাষাত কেৱল কথা কৈয়ে অভিযোগ পঞ্জীয়ন কৰিব পাৰে।

চেটবটে কৃত্ৰিম বুদ্ধিমত্তাক ভাষিণীৰ কণ্ঠৰ পৰা লিখনীলৈ ৰূপান্তৰ, লিখনীৰ পৰা কণ্ঠলৈ ৰূপান্তৰ, অনুবাদ আৰু লিপ্যন্তৰকৰণৰ সুবিধাসমূহৰ সৈতে সংযুক্ত কৰে। নাগৰিকৰ উদ্বেগ বিশ্লেষণ কৰি ব্যৱস্থাটোৱে স্বয়ংক্ৰিয়ভাৱে সংশ্লিষ্ট মন্ত্ৰালয়, বিভাগ, শ্ৰেণী আৰু উপ-শ্ৰেণী চিনাক্ত কৰে আৰু প্ৰয়োজন অনুসৰি বুদ্ধিদীপ্ত পৰৱৰ্তী তথ্য বিচাৰে।

ভাষিণীৰ জৰিয়তে বৰ্তমান সমৰ্থিত ২২টা ভাষাৰ উপৰি আন কেইবাটাও আঞ্চলিক আৰু থলুৱা ভাষালৈ সমৰ্থন সম্প্ৰসাৰণৰ প্ৰচেষ্টা চলি আছে। ইয়াৰ ফলত চৰকাৰী সেৱা লাভৰ ক্ষেত্ৰত ভাষা যাতে আৰু কোনো বাধা হৈ নাথাকে সেয়া নিশ্চিত কৰা হৈছে।

পৰৱৰ্তী প্ৰজন্মৰ CPGRAMSৰ বিকাশ

প্ৰশাসনিক সংস্কাৰ আৰু ৰাজহুৱা অভিযোগ বিভাগে পৰৱৰ্তী প্ৰজন্মৰ CPGRAMS পদক্ষেপ আগবঢ়াই আছে। এইটো এক মুখ্য প্ৰকল্প, যাৰ লক্ষ্য হৈছে অত্যাধুনিক ডিজিটেল প্ৰযুক্তিৰ জৰিয়তে ভাৰতৰ ৰাজহুৱা অভিযোগ নিষ্পত্তি পৰিৱেশক আধুনিকীকৰণ কৰা। সহজলভ্যতা, দক্ষতা আৰু স্বচ্ছতা বৃদ্ধিৰ বাবে প্ৰস্তুত কৰা এই মঞ্চটোৱে অধিক নিৰৱচ্ছিন্ন আৰু নাগৰিক-কেন্দ্ৰিক অভিযোগ নিষ্পত্তিৰ অভিজ্ঞতা প্ৰদান কৰাৰ লক্ষ্য ৰাখিছে।

বিকাশ প্ৰক্ৰিয়াত ইতিমধ্যে উল্লেখযোগ্য অগ্ৰগতি লাভ কৰা হৈছে। কাৰ্যকৰী হোৱাৰ পিছত পৰৱৰ্তী প্ৰজন্মৰ CPGRAMSত কেইবাটাও উন্নত সুবিধা অন্তৰ্ভুক্ত থাকিব, যেনে:

• কণ্ঠ-সক্ষম অভিযোগ পঞ্জীয়ন আৰু চেটবট সহায়তা
• কৃত্ৰিম বুদ্ধিমত্তা-ভিত্তিক অভিযোগ শ্ৰেণীবিভাজন আৰু বুদ্ধিদীপ্ত পৰিচালনা
• ৰাজ্যিক অভিযোগ শ্ৰেণীসমূহক এটা ঐক্যবদ্ধ মঞ্চত সংযুক্ত কৰা
• ইংৰাজীৰ উপৰি ২২টা অনুসূচীত ভাষাত বহুভাষিক সমৰ্থন
• ই-মেইল, সামাজিক মাধ্যম আৰু ম’বাইল এপ্লিকেচনৰ জৰিয়তে সকলো মাধ্যমত অভিযোগ পঞ্জীয়নৰ সুবিধা
• সময়মতে অভিযোগ নিষ্পত্তিৰ বাবে স্বয়ংক্ৰিয় পৰ্যায়োন্নয়ন ব্যৱস্থা
• বিশেষভাৱে সক্ষম ব্যক্তিসকলৰ বাবে সহজলভ্যতা সুবিধা
• বাস্তৱ-সময়ৰ তথ্য বিশ্লেষণ আৰু প্ৰতিবেদন ডেশ্বব’ৰ্ড
• অভিযোগ নিষ্পত্তিৰ মানদণ্ড মূল্যায়ন কৰিবলৈ কৃত্ৰিম বুদ্ধিমত্তা-সক্ষম বৈধতা নিৰূপণ ব্যৱস্থা আৰু হস্তান্তৰ বা কাৰ্যকৰী নিষ্পত্তি নকৰাকৈ বন্ধ কৰি দিয়া গোচৰসমূহ চিনাক্তকৰণ

পৰৱৰ্তী প্ৰজন্মৰ চিপিগ্ৰামছে অভিযোগ নিষ্পত্তিক অধিক সহজলভ্য, সঁহাৰিমূলক আৰু স্বচ্ছ কৰি তুলিব বুলি আশা কৰা হৈছে, লগতে নাগৰিক-কেন্দ্ৰিক শাসন ব্যৱস্থা অধিক শক্তিশালী কৰিব।

নাগৰিক-কেন্দ্ৰিক শাসন শক্তিশালী কৰা

যোৱা দশকটোত CPGRAMS বিশ্বৰ অন্যতম বৃহৎ ডিজিটেল ৰাজহুৱা অভিযোগ নিষ্পত্তি মঞ্চ হিচাপে আত্মপ্ৰকাশ কৰিছে। নিৰন্তৰ সংস্কাৰ, প্ৰযুক্তিগত উদ্ভাৱন আৰু নাগৰিক সন্তুষ্টিৰ ওপৰত শক্তিশালী গুৰুত্বৰ জৰিয়তে এই মঞ্চই নাগৰিকসকলে চৰকাৰী প্ৰতিষ্ঠানসমূহৰ সৈতে যোগাযোগ কৰাৰ পদ্ধতিত পৰিৱৰ্তন সাধন কৰিছে।

সময়মতে অভিযোগ নিষ্পত্তি সক্ষম কৰি, জবাবদিহিতা বৃদ্ধি কৰি আৰু নাগৰিকৰ মতামতৰ জৰিয়তে সেৱা প্ৰদানৰ নিৰন্তৰ উন্নতি সাধন কৰি চিপিগ্ৰামছে সঁহাৰিমূলক আৰু নাগৰিক-কেন্দ্ৰিক শাসনৰ ভেটি শক্তিশালী কৰিছে। বিকশিত ভাৰত@২০৪৭ৰ দিশে আগবাঢ়ি যোৱাৰ সময়ত CPGRAMS-এ এক দক্ষ, স্বচ্ছ আৰু সহজলভ্য অভিযোগ নিষ্পত্তি ব্যৱস্থাৰ জৰিয়তে প্ৰতিজন নাগৰিকৰ কণ্ঠ যাতে শুনা যায় আৰু তাৰ ওপৰত ব্যৱস্থা গ্ৰহণ কৰা হয় সেয়া নিশ্চিত কৰাত এক গুৰুত্বপূৰ্ণ ভূমিকা পালন কৰি আহিছে।

তথ্যসূত্ৰঃ

কৰ্মচাৰী, ৰাজহুৱা অভিযোগ আৰু পেঞ্চন মন্ত্ৰালয়:

https://pgportal.gov.in/

DARPG_Monthly_Report_Central_April_2026.pdf

https://www.pib.gov.in/PressReleasePage.aspx?PRID=2266985&reg=3&lang=1

PDF চাবলৈ ইয়াত ক্লিক কৰক

***

পিআইবি গৱেষণা

RR