पत्र सूचना कार्यालय

ಕುಶಲಕರ್ಮಿಗಳು ಮತ್ತು ಗ್ರಾಮೀಣ ಉದ್ಯಮಗಳಿಂದ ಹಿಡಿದು ನವೀನ ಉತ್ಪಾದಕರವರೆಗೆ, ಎಂಎಸ್‌ಎಂಇಗಳು ಭಾರತದ ಬೆಳವಣಿಗೆಯ ಕಥೆಗೆ ಶಕ್ತಿ ತುಂಬುತ್ತಿವೆ. ನಿರಂತರ ಸುಧಾರಣೆಗಳು, ಡಿಜಿಟಲೀಕರಣ ಮತ್ತು ಉದ್ದೇಶಿತ ಬೆಂಬಲದ ಮೂಲಕ, ಲಕ್ಷಾಂತರ ಉದ್ಯಮಗಳು ಹಣಕಾಸು, ತಂತ್ರಜ್ಞಾನ, ಕೌಶಲ್ಯ ಮತ್ತು ಮಾರುಕಟ್ಟೆಗಳಿಗೆ ಹೆಚ್ಚಿನ ಪ್ರವೇಶವನ್ನು ಪಡೆಯುತ್ತಿವೆ. ಉದ್ಯೋಗ, ಉತ್ಪಾದನೆ ಮತ್ತು ರಫ್ತು ಕ್ಷೇತ್ರಗಳಿಗೆ ಈ ವಲಯದ ಹೆಚ್ಚುತ್ತಿರುವ ಕೊಡುಗೆಯು ಅದರ ಬೆಳೆಯುತ್ತಿರುವ ಪ್ರಾಮುಖ್ಯತೆಯನ್ನು ತೋರಿಸುತ್ತದೆ. ಭಾರತವು 'ವಿಕಸಿತ್ ಭಾರತ 2047' ರತ್ತ ಮುನ್ನಡೆಯುತ್ತಿರುವಾಗ, ಉದ್ಯೋಗ, ಉದ್ಯಮಶೀಲತೆ ಮತ್ತು ಸುಸ್ಥಿರ ಆರ್ಥಿಕ ಅಭಿವೃದ್ಧಿಯನ್ನು ಉತ್ತೇಜಿಸುವಲ್ಲಿ ಈ ವಲಯವು ಪ್ರಮುಖ ಪಾತ್ರವನ್ನು ವಹಿಸುವುದನ್ನು ಮುಂದುವರಿಸುತ್ತದೆ.

ಭಾರತದ ಎಂಎಸ್‌ಎಂಇಗಳು: ಸಮಗ್ರ ಆರ್ಥಿಕ ಬೆಳವಣಿಗೆಗೆ ಶಕ್ತಿ

ಭಾರತದ ಪ್ರತಿಯೊಂದು ಮೂಲೆಯಲ್ಲೂ ಉದ್ಯಮಗಳು ವಿಭಿನ್ನ ರೂಪವನ್ನು ಪಡೆದಿವೆ. ಅದು ತಲೆಮಾರುಗಳ ಕರಕುಶಲತೆಯನ್ನು ರಕ್ಷಿಸುವ ನೇಕಾರನಾಗಿರಬಹುದು, ಜಾಗತಿಕ ಮಾರುಕಟ್ಟೆಗಳಿಗೆ ಸೇವೆ ಸಲ್ಲಿಸುವ ಸಣ್ಣ ಉತ್ಪಾದಕನಾಗಿರಬಹುದು, ವ್ಯವಹಾರವನ್ನು ನಿರ್ಮಿಸುವ ಮಹಿಳಾ ಉದ್ಯಮಿಯಾಗಿರಬಹುದು ಅಥವಾ ಸ್ಟಾರ್ಟ್‌ಅಪ್ ರೂಪಿಸುವ ಯುವ ನಾವೀನ್ಯಕಾರನಾಗಿರಬಹುದು. ಗಾತ್ರ ಮತ್ತು ವಲಯದಲ್ಲಿ ವೈವಿಧ್ಯಮಯವಾಗಿದ್ದರೂ, ಉತ್ಸಾಹದಲ್ಲಿ ಒಂದಾಗಿರುವ ಈ ಲಕ್ಷಾಂತರ ಉದ್ಯಮಗಳು ಭಾರತದ ಎಂಎಸ್‌ಎಂಇ ಪರಿಸರ ವ್ಯವಸ್ಥೆಯ ಭದ್ರ ಬುನಾದಿಯಾಗಿವೆ.

ಇಂದು, ಎಂಎಸ್‌ಎಂಇಗಳು ಕೇವಲ ವ್ಯಾಪಾರ ಉದ್ಯಮಗಳಿಗಿಂತ ಮಿಗಿಲಾದದ್ದಾಗಿವೆ. ಅವು ಗ್ರಾಮೀಣ ಮತ್ತು ನಗರ ಭಾರತ ಎರಡರಲ್ಲೂ ಸಮಾನವಾಗಿ ಅವಕಾಶಗಳನ್ನು ಸೃಷ್ಟಿಸುತ್ತಾ, ಉದ್ಯೋಗ, ನಾವೀನ್ಯತೆ ಮತ್ತು ಸಮಗ್ರ ಬೆಳವಣಿಗೆಯ ವಾಹಕಗಳಾಗಿವೆ. ಔಪಚಾರಿಕತೆ, ಡಿಜಿಟಲ್ ರೂಪಾಂತರ ಮತ್ತು ನಿರಂತರ ನೀತಿ ಹಸ್ತಕ್ಷೇಪಗಳಿಂದ ಪ್ರೇರಿತವಾದ ಈ ವಲಯವು ನಿರಂತರವಾಗಿ ವಿಸ್ತರಿಸುತ್ತಿದೆ. ಇದು 'ಆತ್ಮನಿರ್ಭರ ಭಾರತ' ಮತ್ತು 'ವಿಕಸಿತ ಭಾರತ 2047' ರ ದೃಷ್ಟಿಕೋನವನ್ನು ಮುನ್ನಡೆಸುವ ಜೊತೆಗೆ ಆರ್ಥಿಕತೆಗೆ ತನ್ನ ಕೊಡುಗೆಯನ್ನು ಬಲಪಡಿಸುತ್ತಿದೆ. ಉದ್ಯಮದಿಂದ ಸಬಲೀಕರಣದವರೆಗೆ, ಎಂಎಸ್‌ಎಂಇ ಕಥೆಯು ಹೆಚ್ಚು ಹೆಚ್ಚಾಗಿ ಭಾರತದ ಬೆಳವಣಿಗೆ ಮತ್ತು ಪರಿವರ್ತನೆಯ ಕಥೆಯಾಗುತ್ತಿದೆ.

ಭಾರತದ ಎಂಎಸ್‌ಎಂಇ ಚಿತ್ರಣ: ಗಾತ್ರ, ವೈವಿಧ್ಯತೆ ಮತ್ತು ಪ್ರಭಾವ

ಇಂದು ಎಂಎಸ್‌ಎಂಇಗಳು ಭಾರತದ ಆರ್ಥಿಕ ಬೆಳವಣಿಗೆ ಮತ್ತು ಕೈಗಾರಿಕಾ ಅಭಿವೃದ್ಧಿಯನ್ನು ಮುನ್ನಡೆಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ. ಆರ್ಥಿಕತೆಯಲ್ಲಿ ಅವುಗಳ ವಿಸ್ತರಿಸುತ್ತಿರುವ ಪಾತ್ರವನ್ನು ಪ್ರತಿಬಿಂಬಿಸುವಂತೆ, ಸರ್ಕಾರವು 1 ಏಪ್ರಿಲ್ 2025 ರಿಂದ ಜಾರಿಗೆ ಬರುವಂತೆ ಎಂಎಸ್‌ಎಂಇಗಳ ವ್ಯಾಖ್ಯಾನವನ್ನು ಪರಿಷ್ಕರಿಸಿದೆ. ಹೂಡಿಕೆ ಮತ್ತು ವಾರ್ಷಿಕ ವಹಿವಾಟಿನ ಆಧಾರದ ಮೇಲಿರುವ ಈ ಹೊಸ ವ್ಯಾಖ್ಯಾನವು, ಉದ್ಯಮಗಳು ಸರ್ಕಾರದ ನೀತಿ ಬೆಂಬಲದ ಪ್ರಯೋಜನಗಳನ್ನು ಪಡೆಯುವುದನ್ನು ಮುಂದುವರಿಸುವುದರ ಜೊತೆಗೆ, ತಮ್ಮ ವ್ಯಾಪಾರವನ್ನು ವಿಸ್ತರಿಸಿಕೊಳ್ಳಲು ಹೆಚ್ಚಿನ ಅವಕಾಶವನ್ನು ಕಲ್ಪಿಸಿಕೊಡುತ್ತದೆ.

ಜನವರಿ 2026ರ ದತ್ತಾಂಶವು ಈ ವಲಯವು ಜಿಡಿಪಿಗೆ ಸುಮಾರು 31.1%, ಉತ್ಪಾದನಾ ಪ್ರಗತಿಗೆ 35.4% ಮತ್ತು ರಫ್ತುಗಳಲ್ಲಿ 48.58% ರಷ್ಟು ಕೊಡುಗೆ ನೀಡುತ್ತದೆ ಎಂದು ತೋರಿಸುತ್ತದೆ. 38.9 ಕೋಟಿಗೂ ಹೆಚ್ಚು ಜನರಿಗೆ ಉದ್ಯೋಗ ಒದಗಿಸಿರುವ ಎಂಎಸ್ಎಂಇಗಳು, ಕೃಷಿಯ ನಂತರ ಎರಡನೇ ಅತಿ ದೊಡ್ಡ ಉದ್ಯೋಗದ ಮೂಲವಾಗಿವೆ.

ಆರ್ಥಿಕ ಸೂಚಕಗಳ ಆಚೆಗೆ, ಎಂಎಸ್ಎಂಇಗಳು ದೇಶಾದ್ಯಂತ ರೋಮಾಂಚಕ ಉದ್ಯಮಶೀಲತಾ ಸಂಸ್ಕೃತಿಯನ್ನು ಪೋಷಿಸುತ್ತಿವೆ. ಈ ವಲಯವು ವಿಶೇಷವಾಗಿ ಪಟ್ಟಣ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಮೊದಲ ತಲೆಮಾರಿನ ಉದ್ಯಮಿಗಳು, ಮಹಿಳಾ ನೇತೃತ್ವದ ಉದ್ಯಮಗಳು ಮತ್ತು ಯುವಕರ ನೇತೃತ್ವದ ಉದ್ಯಮಗಳಿಗೆ ಹೆಬ್ಬಾಗಿಲಾಗಿ ಹೊರಹೊಮ್ಮಿದೆ. ಈ ಪರಿವರ್ತನೆಯನ್ನು ಸರಣಿ ಸುಧಾರಣೆಗಳ ಮೂಲಕ ಬಲಪಡಿಸಲಾಗುತ್ತಿದೆ. ಡಿಜಿಟಲ್ ಕ್ರೆಡಿಟ್ ಅಸೆಸ್ಮೆಂಟ್ ಮಾಡೆಲ್ ಮತ್ತು ಸಿಡ್ಬಿಗೆ ವರ್ಧಿತ ಇಕ್ವಿಟಿ ಬೆಂಬಲದಂತಹ ಉಪಕ್ರಮಗಳು ಔಪಚಾರಿಕ ಹಣಕಾಸು ವ್ಯವಸ್ಥೆಗೆ ಅವರ ಪ್ರವೇಶವನ್ನು ವಿಸ್ತರಿಸುತ್ತಿವೆ.

ಬದಲಾವಣೆಯ ವರ್ಷ

2025-26 ರ ವರ್ಷವು ಭಾರತದ ಎಂಎಸ್ಎಂಇ ಬೆಳವಣಿಗೆಯ ಕಥೆಯಲ್ಲಿ ಒಂದು ಮಹತ್ವದ ಅಧ್ಯಾಯವನ್ನು ದಾಖಲಿಸಿದೆ. ಇದು ಔಪಚಾರಿಕತೆ, ಸಾಲದ ಲಭ್ಯತೆ, ತಂತ್ರಜ್ಞಾನದ ಅಳವಡಿಕೆ, ಕುಂದುಕೊರತೆ ನಿವಾರಣೆ ಮತ್ತು ಮಾರುಕಟ್ಟೆ ಅಭಿವೃದ್ಧಿಯಾದ್ಯಂತ ಭಾರತದ ಎಂಎಸ್ಎಂಇ ಪರಿಸರ ವ್ಯವಸ್ಥೆಯನ್ನು ಬಲಪಡಿಸಿದ ಹಲವಾರು ಹೆಗ್ಗುರುತು ಸಾಧನೆಗಳಿಗೆ ಸಾಕ್ಷಿಯಾಯಿತು.

ಹೊಸ ಎತ್ತರಕ್ಕೆ ಉದ್ಯಮಗಳ ಔಪಚಾರಿಕತೆ

• ಉದ್ಯಮ್ ನೋಂದಣಿ ಪೋರ್ಟಲ್ ಮತ್ತು ಉದ್ಯಮ್ ಅಸಿಸ್ಟ್ ಪ್ಲಾಟ್‌ಫಾರ್ಮ್ ಅಡಿಯಲ್ಲಿನ ನೋಂದಣಿಗಳು ಜೂನ್ 2026 ರ ವೇಳೆಗೆ 8.7 ಕೋಟಿಯನ್ನು ದಾಟಿವೆ.
• ಔಪಚಾರಿಕ ಉದ್ಯಮಗಳ ನೆಲೆಯ ವಿಸ್ತರಣೆಯು ಲಕ್ಷಾಂತರ ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳಿಗೆ ಸಾಂಸ್ಥಿಕ ಹಣಕಾಸು, ಸರ್ಕಾರಿ ಯೋಜನೆಗಳು ಮತ್ತು ಮಾರುಕಟ್ಟೆ ಅವಕಾಶಗಳ ಪ್ರವೇಶವನ್ನು ಸುಧಾರಿಸಿತು.

ಸಾಲದ ಲಭ್ಯತೆಯ ವಿಸ್ತರಣೆ

• ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳಿಗಾಗಿನ ಕ್ರೆಡಿಟ್ ಗ್ಯಾರಂಟಿ ಫಂಡ್ ಟ್ರಸ್ಟ್ ತನ್ನ 25 ವರ್ಷಗಳ ಕಾರ್ಯಾಚರಣೆಯನ್ನು ಪೂರ್ಣಗೊಳಿಸಿದೆ.
• ಜನವರಿ 1 ರಿಂದ ನವೆಂಬರ್ 30, 2025ರ ವರೆಗಿನ ಅವಧಿಯಲ್ಲಿ ₹3.77 ಲಕ್ಷ ಕೋಟಿ ಮೌಲ್ಯದ 29.03 ಲಕ್ಷ ಗ್ಯಾರಂಟಿಗಳನ್ನು ಅನುಮೋದಿಸಲಾಗಿದೆ.
• ಸಾಲದ ಲಭ್ಯತೆಯನ್ನು ಸುಧಾರಿಸಲು, ಗ್ಯಾರಂಟಿ ಕವರೇಜ್ ಮಿತಿಯನ್ನು ₹5 ಕೋಟಿಯಿಂದ ₹10 ಕೋಟಿಗೆ ಹೆಚ್ಚಿಸಲಾಗಿದ್ದು, ಇದು ಎಂಎಸ್ಎಂಇಗಳಿಗೆ ಹೆಚ್ಚಿನ ಮೇಲೊರಟು-ಮುಕ್ತ ಬೆಂಬಲವನ್ನು ಸಕ್ರಿಯಗೊಳಿಸಿದೆ.

ಖಾದಿ, ಗ್ರಾಮೋದ್ಯೋಗ ಮತ್ತು ತೆಂಗಿನ ನಾರು ವಲಯದ ಉನ್ನತಿ

• ವರ್ಷದ ಅವಧಿಯಲ್ಲಿ ಖಾದಿ ಮತ್ತು ಗ್ರಾಮೋದ್ಯೋಗಗಳ ಮಾರಾಟವು ₹1.27 ಲಕ್ಷ ಕೋಟಿಯನ್ನು ದಾಟಿದೆ.
• ಈ ಸುಸ್ಥಿರ ಬೆಳವಣಿಗೆಯು ಸ್ಥಳೀಯವಾಗಿ ಉತ್ಪಾದಿಸುವ ಸರಕುಗಳಿಗೆ ಹೆಚ್ಚುತ್ತಿರುವ ಬೇಡಿಕೆಯನ್ನು ಮತ್ತು ಉದ್ಯೋಗ ಸೃಷ್ಟಿಯಲ್ಲಿ ಗ್ರಾಮೀಣ ಉದ್ಯಮಗಳ ಹೆಚ್ಚುತ್ತಿರುವ ಪಾತ್ರವನ್ನು ಪ್ರತಿಬಿಂಬಿಸುತ್ತದೆ.
• ತೆಂಗಿನ ನಾರು ವಲಯವು ಸಹ ಬಲವಾದ ರಫ್ತು ಬೆಳವಣಿಗೆ ಮತ್ತು ತಂತ್ರಜ್ಞಾನದ ಅಳವಡಿಕೆಗೆ ಸಾಕ್ಷಿಯಾಗಿದೆ. 2025-26 ರಲ್ಲಿ ತೆಂಗಿನ ನಾರು ರಫ್ತು ₹6614.40 ಕೋಟಿಯನ್ನು ತಲುಪಿದೆ.

ಸ್ಪಂದನಾಶೀಲ ಮತ್ತು ತಂತ್ರಜ್ಞಾನ ಆಧಾರಿತ ಆಡಳಿತ

• ಎಂಎಸ್ಎಂಇ ಸಮಾಧಾನ್ ಪೋರ್ಟಲ್ ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳು ಎದುರಿಸುತ್ತಿರುವ ವಿಳಂಬಿತ ಪಾವತಿ ವಿವಾದಗಳನ್ನು ಪರಿಹರಿಸುವುದನ್ನು ಮುಂದುವರೆಸಿದೆ. ಜೂನ್ 2026 ರ ವೇಳೆಗೆ, ಈ ಪೋರ್ಟಲ್ ₹55,244.29 ಕೋಟಿ ಮೌಲ್ಯದ ಕ್ಲೈಮ್‌ಗಳನ್ನು ಒಳಗೊಂಡ 2,56,892 ಅರ್ಜಿಗಳನ್ನು ಸ್ವೀಕರಿಸಿದೆ. ಇವುಗಳಲ್ಲಿ 58,148 ಪ್ರಕರಣಗಳನ್ನು ಎಂಎಸ್‌ಇ ಫೆಸಿಲಿಟೇಶನ್ ಕೌನ್ಸಿಲ್‌ಗಳು ಯಶಸ್ವಿಯಾಗಿ ಇತ್ಯರ್ಥಪಡಿಸಿವೆ.
• ಚಾಂಪಿಯನ್ಸ್ ಪೋರ್ಟಲ್ ಉದ್ಯಮಗಳ ಕುಂದುಕೊರತೆ ನಿವಾರಣೆಯನ್ನು ಬಲಪಡಿಸಿದೆ. 2025-26 ರ ಅವಧಿಯಲ್ಲಿ ಇದು 39,494 ಕುಂದುಕೊರತೆಗಳನ್ನು ಸ್ವೀಕರಿಸಿದ್ದು, ಅವುಗಳಲ್ಲಿ 39,387 ಕ್ಕೂ ಪರಿಹಾರ ಒದಗಿಸಲಾಗಿದೆ. ಈ ಮೂಲಕ 99.72% ರಷ್ಟು ವಿಲೇವಾರಿ ದರವನ್ನು ಸಾಧಿಸಿದೆ.
• ಸರ್ಕಾರವು ಆನ್‌ಲೈನ್ ವಿವಾದ ಪರಿಹಾರ ಪೋರ್ಟಲ್ ಸಹ ಪ್ರಾರಂಭಿಸಿದೆ. ಇದು ಎಂಎಸ್‌ಇಗಳಿಗೆ ವಿಳಂಬಿತ ಪಾವತಿಗಳ ಸಂಭವವನ್ನು ಕಡಿಮೆ ಮಾಡುವ ಮತ್ತು ತಂತ್ರಜ್ಞಾನ ಆಧಾರಿತ ಒಡಿಆರ್ ವ್ಯವಸ್ಥೆಯ ಪ್ರವೇಶವನ್ನು ವಿಸ್ತರಿಸುವ ಗುರಿ ಹೊಂದಿದೆ.

ಮಾರುಕಟ್ಟೆ ಪ್ರವೇಶದ ಸುಧಾರಣೆ

• ಕೇಂದ್ರ ಸಾರ್ವಜನಿಕ ವಲಯದ ಉದ್ಯಮಗಳು ಮತ್ತು ಸರ್ಕಾರಿ ಸಂಸ್ಥೆಗಳ ಮೂಲಕ ನಡೆಯುವ ಖರೀದಿಗಳನ್ನು ಎಂಎಸ್ಎಂಇ ಸಂಬಂಧ್ ಪೋರ್ಟಲ್ ಮೂಲಕ ಮೇಲ್ವಿಚಾರಣೆ ಮಾಡಲಾಗುತ್ತದೆ. ಜೂನ್ 2026 ರ ವೇಳೆಗೆ, 118 ಸಿಪಿಎಸ್‍ಇ ಗಳು ಹಣಕಾಸು ವರ್ಷ 2026-27 ರ ಅವಧಿಯಲ್ಲಿ ₹31,443.32 ಕೋಟಿ ಮೌಲ್ಯದ ಸರಕು ಮತ್ತು ಸೇವೆಗಳನ್ನು ಖರೀದಿಸಿವೆ. ಇದರಲ್ಲಿ 54.51% ರಷ್ಟನ್ನು ಎಂಎಸ್‌ಇಗಳಿಂದ ಪಡೆಯಲಾಗಿದ್ದು, ದೇಶಾದ್ಯಂತ 29,769 ಕ್ಕೂ ಹೆಚ್ಚು ಉದ್ಯಮಗಳು ಇದರ ಪ್ರಯೋಜನ ಪಡೆದಿವೆ.
• ಎಂಎಸ್ಎಂಇ, ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ, ರಾಷ್ಟ್ರೀಯ ಎಸ್‌ಸಿ-ಎಸ್‌ಟಿ ಕೇಂದ್ರ, ಮತ್ತು ತೆಂಗಿನ ನಾರು ಪೆವಿಲಿಯನ್‌ಗಳು 44ನೇ ಭಾರತ ಅಂತಾರಾಷ್ಟ್ರೀಯ ವ್ಯಾಪಾರ ಮೇಳ 2025 ರಲ್ಲಿ “ವೈಬ್ರೆಂಟ್ ಎಂಎಸ್ಎಂಇಗಳು, ವಿಕಸಿತ ಭಾರತ” ಎಂಬ ವಿಷಯ ವಸ್ತುವನ್ನು ಪ್ರದರ್ಶಿಸಿದವು. ಇವುಗಳ ಪ್ರಯತ್ನಗಳನ್ನು ಭಾರತದ ಸಬಲೀಕರಣ ವಿಭಾಗದ ಅಡಿಯಲ್ಲಿ ಬೆಳ್ಳಿ ಪದಕದೊಂದಿಗೆ ಗುರುತಿಸಲಾಗಿದೆ.
• 29 ರಾಜ್ಯಗಳು ಮತ್ತು ಒಕ್ಕೂಟ ಪ್ರದೇಶಗಳ ಎಂಎಸ್ಎಂಇಗಳು ಮತ್ತು ವಿಶ್ವಕರ್ಮರಿಗೆ ಒಟ್ಟು 292 ಮಳಿಗೆಗಳನ್ನು ಹಂಚಿಕೆ ಮಾಡಲಾಗಿತ್ತು. ಮಳಿಗೆಗಳಲ್ಲಿ 67% ಕ್ಕಿಂತ ಹೆಚ್ಚಿನದನ್ನು ಮಹಿಳಾ ಉದ್ಯಮಿಗಳಿಗೆ ಮತ್ತು 34% ಕ್ಕಿಂತ ಹೆಚ್ಚಿನದನ್ನು ಎಸ್‌ಸಿ/ಎಸ್‌ಟಿ ಉದ್ಯಮಿಗಳಿಗೆ ಹಂಚಿಕೆ ಮಾಡಲಾಗಿತ್ತು. ಹೆಚ್ಚುವರಿಯಾಗಿ, ವಿಕಲಚೇತನ ಉದ್ಯಮಿಗಳಿಗೆ 15 ಮಳಿಗೆಗಳನ್ನು ಒದಗಿಸಲಾಗಿತ್ತು.

ಒಟ್ಟಾರೆಯಾಗಿ, ಈ ಮೈಲಿಗಲ್ಲುಗಳು ಹೆಚ್ಚು ಸ್ಪರ್ಧಾತ್ಮಕ, ನವೀನ ಮತ್ತು ಭವಿಷ್ಯಕ್ಕೆ ಸಿದ್ಧವಾಗಿರುವ ಎಂಎಸ್ಎಂಇ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ನಡೆಯುತ್ತಿರುವ ನಿರಂತರ ಪ್ರಯತ್ನಗಳನ್ನು ಪ್ರತಿಬಿಂಬಿಸುತ್ತವೆ.

ನೀತಿಗಳು ಮತ್ತು ಉಪಕ್ರಮಗಳ ಮೂಲಕ ಉದ್ಯಮಿಗಳ ಸಬಲೀಕರಣ

ಭಾರತದ ಎಂಎಸ್ಎಂಇ ಯಶೋಗಾಥೆಯ ಕೇಂದ್ರಭಾಗದಲ್ಲಿ ನೀತಿ ಬೆಂಬಲ ಮತ್ತು ಸಾಂಸ್ಥಿಕ ಮಧ್ಯಸ್ಥಿಕೆಗಳ ಬಲವಾದ ಪರಿಸರ ವ್ಯವಸ್ಥೆಯಿದೆ. ಉದ್ಯಮಶೀಲತೆ ಮತ್ತು ಉದ್ಯಮದ ಅಭಿವೃದ್ಧಿಯ ಮೇಲೆ ಕೇಂದ್ರೀಕರಿಸಿದ ಉಪಕ್ರಮಗಳ ಮೂಲಕ, ಸರ್ಕಾರವು ಲಕ್ಷಾಂತರ ವ್ಯವಹಾರಗಳಿಗೆ ಹೊಸ ಅವಕಾಶಗಳನ್ನು ಮುಕ್ತಗೊಳಿಸಲು ಮತ್ತು ಆರ್ಥಿಕ ಬೆಳವಣಿಗೆಗೆ ಕೊಡುಗೆ ನೀಡಲು ಸಕ್ರಿಯಗೊಳಿಸುತ್ತಿದೆ.

ಪಿಎಂ ವಿಶ್ವಕರ್ಮ

ಪಿಎಂ ವಿಶ್ವಕರ್ಮ ಯೋಜನೆಯು 18 ಸಾಂಪ್ರದಾಯಿಕ ಕಸುಬುಗಳಲ್ಲಿ ತೊಡಗಿಸಿಕೊಂಡಿರುವ ಕುಶಲಕರ್ಮಿಗಳು ಮತ್ತು ಕರಕುಶಲ ಉದ್ಯಮಿಗಳಿಗೆ ಸಮಗ್ರವಾದ ಬೆಂಬಲವನ್ನು ಒದಗಿಸುತ್ತದೆ. ಕೌಶಲ್ಯ ತರಬೇತಿ, ಪರಿಕರಗಳ ಕಿಟ್ ಬೆಂಬಲ, ಡಿಜಿಟಲ್ ವಹಿವಾಟುಗಳು ಮತ್ತು ಮಾರುಕಟ್ಟೆ ಪ್ರೋತ್ಸಾಹದ ಮೂಲಕ ಈ ಯೋಜನೆಯು ಕುಶಲಕರ್ಮಿಗಳ ಸಬಲೀಕರಣಕ್ಕೆ ಪ್ರಮುಖ ಪ್ರೇರಕ ಶಕ್ತಿಯಾಗಿ ಹೊರಹೊಮ್ಮಿದೆ. ಮೂಲತಃ ನಾಲ್ಕು ವರ್ಷಗಳ ಅವಧಿಗೆ ಯೋಜಿಸಲಾಗಿದ್ದ 30 ಲಕ್ಷ ಫಲಾನುಭವಿಗಳ ನೋಂದಣಿಯ ಗುರಿಯನ್ನು ಕೇವಲ ಎರಡು ವರ್ಷಗಳಲ್ಲೇ ಸಾಧಿಸಲಾಗಿದೆ.

ಯೋಜನೆಯ ಪರಿವರ್ತನಾತ್ಮಕ ಬಹು ಆಯಾಮದ ಪ್ರಭಾವ

• ಕೌಶಲ್ಯ ಮೇಲ್ದರ್ಜೀಕರಣ: 24 ಲಕ್ಷ ಗೂ ಹೆಚ್ಚು ಫಲಾನುಭವಿಗಳು ಮೂಲಭೂತ ಕೌಶಲ್ಯ ತರಬೇತಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ.
• ಸಾಲದ ಬೆಂಬಲ: ರಿಯಾಯಿತಿ ಬಡ್ಡಿ ದರದಲ್ಲಿ ಮೇಲೊರಟು-ಮುಕ್ತ ಸಾಲದ ರೂಪದಲ್ಲಿ 5.98 ಲಕ್ಷ ಗೂ ಹೆಚ್ಚು ಫಲಾನುಭವಿಗಳಿಗೆ ₹5,133 ಕೋಟಿಗೂ ಅಧಿಕ ಮೊತ್ತವನ್ನು ಮಂಜೂರು ಮಾಡಲಾಗಿದೆ.
• ಡಿಜಿಟಲ್ ಪ್ರೋತ್ಸಾಹ: 7.91 ಲಕ್ಷ ಗೂ ಹೆಚ್ಚು ಫಲಾನುಭವಿಗಳನ್ನು ಡಿಜಿಟಲ್ ವ್ಯವಸ್ಥೆಗೆ ಒಳಪಡಿಸಲಾಗಿದೆ.

ಪಿಎಂ ವಿಶ್ವಕರ್ಮ: ನಾಗಾಲ್ಯಾಂಡ್‌ನ ಕುಶಲಕರ್ಮಿಗಳ ಜೀವನದಲ್ಲಿ ಪರಿವರ್ತನೆ

ನಾಗಾಲ್ಯಾಂಡ್‌ನ ಜುನ್ಹೆಬೊಟೊ ಮೂಲದ ಬುಟ್ಟಿ ಹೆಣೆಯುವ ಕುಶಲಕರ್ಮಿ ಶ್ರೀಮತಿ ವಿಲ್ಲಿ ಅವರು, ಪಿಎಂ ವಿಶ್ವಕರ್ಮ ಯೋಜನೆಯಡಿ ಕೌಶಲ್ಯ ತರಬೇತಿಯನ್ನು ಪಡೆಯುವ ಮೂಲಕ ತಮ್ಮ ಸಾಂಪ್ರದಾಯಿಕ ಕರಕುಶಲ ಕಲೆಯನ್ನು ಬಲಪಡಿಸಿಕೊಂಡಿದ್ದಾರೆ. ಇದರೊಂದಿಗೆ ಕಚ್ಚಾ ವಸ್ತುಗಳನ್ನು ಖರೀದಿಸಲು ಮತ್ತು ತಮ್ಮ ಉದ್ಯಮವನ್ನು ವಿಸ್ತರಿಸಲು ಅವರು ₹1 ಲಕ್ಷ ಮೊತ್ತದ ಜಾಮೀನು ರಹಿತ ಸಾಲದ ಸೌಲಭ್ಯವನ್ನು ಪಡೆದುಕೊಂಡಿದ್ದಾರೆ. ಇದರ ಪರಿಣಾಮವಾಗಿ, ಅವರ ಮಾಸಿಕ ಆದಾಯವು ಸುಮಾರು 40% ರಷ್ಟು ಹೆಚ್ಚಳ ಕಂಡು, ಹತ್ತಿರತ್ತಿರ ₹15,000 ತಲುಪಿದೆ. ಸಾಂಪ್ರದಾಯಿಕ ಕರಕುಶಲತೆಯನ್ನು ಸಂರಕ್ಷಿಸುವ ಜೊತೆಗೆ, ಕುಶಲಕರ್ಮಿಗಳು ತಮ್ಮ ಕೌಶಲ್ಯಗಳನ್ನು ಸುಧಾರಿಸಿಕೊಳ್ಳಲು, ಉದ್ಯಮವನ್ನು ಬೆಳೆಸಲು ಮತ್ತು ಉತ್ತಮ ಜೀವನೋಪಾಯವನ್ನು ಕಂಡುಕೊಳ್ಳಲು ಪಿಎಂ ವಿಶ್ವಕರ್ಮ ಯೋಜನೆ ಹೇಗೆ ಸಹಾಯ ಮಾಡುತ್ತಿದೆ ಎಂಬುದನ್ನು ಇವರ ಯಶೋಗಾಥೆಯು ತೋರಿಸುತ್ತದೆ.

ಆವಿಷ್ಕಾರ, ಗ್ರಾಮೀಣ ಉದ್ಯಮ ಮತ್ತು ಉದ್ಯಮಶೀಲತೆಯ ಉತ್ತೇಜನಕ್ಕಾಗಿನ ಯೋಜನೆ - ಆಸ್ಪೈರ್

ಆಸ್ಪೈರ್ ಯೋಜನೆಯು ಕೌಶಲ್ಯ ಅಭಿವೃದ್ಧಿ, ಇನ್‌ಕ್ಯುಬೇಶನ್ ಮತ್ತು ಸೂಕ್ಷ್ಮ ಉದ್ಯಮಗಳಿಗೆ ಬೆಂಬಲ ನೀಡುವ ಮೂಲಕ ಗ್ರಾಮೀಣ ಪ್ರದೇಶಗಳಲ್ಲಿ ಉದ್ಯಮಶೀಲತೆ ಮತ್ತು ಜೀವನೋಪಾಯದ ಸೃಷ್ಟಿಯನ್ನು ಉತ್ತೇಜಿಸುತ್ತದೆ. ಜೂನ್ 2026 ರ ವೇಳೆಗೆ 109 ಅನುಮೋದಿತ ಜೀವನೋಪಾಯ ವ್ಯವಹಾರ ಇನ್‌ಕ್ಯುಬೇಟರ್‌ಗಳೊಂದಿಗೆ, ಈ ಯೋಜನೆಯು ಗ್ರಾಮೀಣ ಉದ್ಯಮಶೀಲತೆ ಮತ್ತು ಅಂತರ್ಗತ ಬೆಳವಣಿಗೆಯನ್ನು ಬಲಪಡಿಸಿದೆ:

• 1.23+ ಲಕ್ಷಕ್ಕೂ ಹೆಚ್ಚು ಫಲಾನುಭವಿಗಳಿಗೆ ತರಬೇತಿ ನೀಡಲಾಗಿದೆ,
• ಇವರಲ್ಲಿ 32,085 ಫಲಾನುಭವಿಗಳಿಗೆ ಸೂಕ್ತ ಉದ್ಯೋಗ ದೊರೆತಿದೆ ಮತ್ತು;
• 1,000 ಕ್ಕೂ ಹೆಚ್ಚು ಸೂಕ್ಷ್ಮ ಉದ್ಯಮಗಳನ್ನು ಸ್ಥಾಪಿಸಲಾಗಿದೆ.

ಪ್ರಧಾನ ಮಂತ್ರಿಗಳ ಉದ್ಯೋಗ ಸೃಷ್ಟಿ ಯೋಜನೆ - ಪಿಎಂಇಜಿಪಿ

ಈ ಪ್ರಮುಖ ಕ್ರೆಡಿಟ್-ಲಿಂಕ್ಡ್ ಸಬ್ಸಿಡಿ ಯೋಜನೆಯು ಕೃಷಿಯೇತರ ವಲಯದಲ್ಲಿ ಸೂಕ್ಷ್ಮ ಉದ್ಯಮಗಳ ಸ್ಥಾಪನೆಯ ಮೂಲಕ ಸ್ವಯಂ ಉದ್ಯೋಗವನ್ನು ಉತ್ತೇಜಿಸುತ್ತದೆ. ಈ ಯೋಜನೆಯಡಿ, ಹೊಸ ಉದ್ಯಮಗಳನ್ನು ಸ್ಥಾಪಿಸಲು ಬ್ಯಾಂಕುಗಳಿಂದ ಸಾಲ ಪಡೆಯುವ ಫಲಾನುಭವಿಗಳಿಗೆ ಮಾರ್ಜಿನ್ ಮನಿ (ಸಬ್ಸಿಡಿ) ಒದಗಿಸಲಾಗುತ್ತದೆ.

ಜೂನ್ 2025 ರಿಂದ, ಇಂಗ್ಲಿಷ್ ಮತ್ತು ಹಿಂದಿ ಹೊರತುಪಡಿಸಿ 19 ಪ್ರಾದೇಶಿಕ ಭಾಷೆಗಳಲ್ಲಿ ಅರ್ಜಿ ಸಲ್ಲಿಸುವ ಸೌಲಭ್ಯಗಳನ್ನು ಪರಿಚಯಿಸುವ ಮೂಲಕ ಇದರ ವ್ಯಾಪ್ತಿಯನ್ನು ಮತ್ತಷ್ಟು ವಿಸ್ತರಿಸಲಾಗಿದೆ. ಯೋಜನೆ ಪ್ರಾರಂಭವಾದಾಗಿನಿಂದ (ಮೇ 2026 ರ ವೇಳೆಗೆ), ಇದು ಈ ಕೆಳಗಿನವುಗಳನ್ನು ಬೆಂಬಲಿಸಿದೆ:

• 10.84 ಲಕ್ಷ ಗೂ ಹೆಚ್ಚು ಸೂಕ್ಷ್ಮ ಉದ್ಯಮಗಳು,
• ₹29,623 ಕೋಟಿ ಮಾರ್ಜಿನ್ ಮನಿ ಸಬ್ಸಿಡಿಗಳೊಂದಿಗೆ ಮತ್ತು;
• 97 ಲಕ್ಷ ಗೂ ಹೆಚ್ಚು ಜನರಿಗೆ ಉದ್ಯೋಗ ಸೃಷ್ಟಿಸಿದೆ.

ಎಂಎಸ್ಎಂಇ ಚಾಂಪಿಯನ್ಸ್ ಯೋಜನೆ

ಎಂಎಸ್ಎಂಇ ಚಾಂಪಿಯನ್ಸ್ ಯೋಜನೆಯು ಉದ್ಯಮಗಳು ಹೆಚ್ಚು ನವೀನ, ಸುಸ್ಥಿರ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕವಾಗಲು ಬೆಂಬಲಿಸುತ್ತದೆ. ಇದು ಎಂಎಸ್ಎಂಇಗಳು ಉತ್ಪಾದಕತೆಯನ್ನು ಸುಧಾರಿಸಲು, ಜಾಗತಿಕ ಉತ್ತಮ ಪದ್ಧತಿಗಳನ್ನು ಅಳವಡಿಸಿಕೊಳ್ಳಲು ಮತ್ತು ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ತಮ್ಮ ಸ್ಥಾನವನ್ನು ಬಲಪಡಿಸಿಕೊಳ್ಳಲು ಸಕ್ರಿಯಗೊಳಿಸುತ್ತದೆ.

ಯೋಜನೆಯ ಪ್ರಭಾವವು ಅದರ ಮೂರು ಪ್ರಮುಖ ಸ್ತಂಭಗಳಲ್ಲಿ ಪ್ರತಿಫಲಿಸುತ್ತದೆ:

• ಎಂಎಸ್ಎಂಇ ಇನ್ನೋವೇಟಿವ್: ಇದು ಇನ್‌ಕ್ಯುಬೇಶನ್, ಐಪಿಆರ್ ಮತ್ತು ಡಿಸೈನ್ ಎಂಬ 3 ಘಟಕಗಳನ್ನು ಹೊಂದಿದೆ. ‘ಇನ್‌ಕ್ಯುಬೇಶನ್’ ಘಟಕದ ಅಡಿಯಲ್ಲಿ, ಹೊಸ ಆಲೋಚನೆಗಳು ಮತ್ತು ಸ್ಟಾರ್ಟ್‌ಅಪ್‌ಗಳನ್ನು ಪೋಷಿಸಲು 833 ಹೋಸ್ಟ್ ಸಂಸ್ಥೆಗಳನ್ನು ಅನುಮೋದಿಸಲಾಗಿದೆ. ‘ಡಿಸೈನ್’ ಘಟಕದ ಅಡಿಯಲ್ಲಿ, 21 ತಿಳಿವಳಿಕಾ ಪತ್ರಗಳಿಗೆ  ಸಹಿ ಹಾಕಲಾಗಿದ್ದು, 69 ವೃತ್ತಿಪರ ವಿನ್ಯಾಸ/ವಿದ್ಯಾರ್ಥಿ ಯೋಜನೆಗಳನ್ನು ಅನುಮೋದಿಸಲಾಗಿದೆ. ‘ಐಪಿಆರ್’ ಘಟಕದ ಅಡಿಯಲ್ಲಿ, ಬೌದ್ಧಿಕ ಆಸ್ತಿ ಸೌಲಭ್ಯ ಕೇಂದ್ರಗಳ ಮೂಲಕ 191 ಪೇಟೆಂಟ್‌ಗಳು, 807 ಟ್ರೇಡ್‌ಮಾರ್ಕ್‌ಗಳು, 99 ಡಿಸೈನ್‌ಗಳು ಮತ್ತು 6 ಜಿಐ ನೋಂದಣಿಗಳನ್ನು ಅನುಮೋದಿಸಲಾಗಿದೆ.
• ಎಂಎಸ್ಎಂಇ ಸಸ್ಟೈನಬಲ್ - ಝೆಡ್: ಝೀರೋ ಡಿಫೆಕ್ಟ್ ಝೀರೋ ಎಫೆಕ್ಟ್ ಎಂಬುದು ಕನಿಷ್ಠ ಪರಿಸರ ಪ್ರಭಾವದೊಂದಿಗೆ ಗುಣಮಟ್ಟದ ಉತ್ಪಾದನೆಯನ್ನು ಉತ್ತೇಜಿಸುವ ಒಂದು ಪ್ರಮಾಣೀಕರಣ ಚೌಕಟ್ಟಾಗಿದೆ. ಮೇ 2026 ರ ವೇಳೆಗೆ, 93.61 ಲಕ್ಷ ಗೂ ಹೆಚ್ಚು ಎಂಎಸ್ಎಂಇಗಳು ನೋಂದಾಯಿಸಿಕೊಂಡಿದ್ದು, 6.68 ಲಕ್ಷ ಗೂ ಹೆಚ್ಚು ಉದ್ಯಮಗಳು ಯಶಸ್ವಿಯಾಗಿ ಪ್ರಮಾಣೀಕರಿಸಲ್ಪಟ್ಟಿವೆ.
• ಎಂಎಸ್ಎಂಇ ಕಾಂಪಿಟಿಟಿವ್ - ಲೀನ್: ಲೀನ್ ಮ್ಯಾನುಫ್ಯಾಕ್ಚರಿಂಗ್ ಯೋಜನೆಯು ಕಾರ್ಯಾಚರಣೆಯ ದಕ್ಷತೆಯನ್ನು ಹೆಚ್ಚಿಸಲು ಮತ್ತು ವ್ಯರ್ಥವನ್ನು ಕಡಿಮೆ ಮಾಡಲು ಜಾಗತಿಕವಾಗಿ ಗುರುತಿಸಲ್ಪಟ್ಟ ಲೀನ್ ಪದ್ಧತಿಗಳ ಅಳವಡಿಕೆಯನ್ನು ಉತ್ತೇಜಿಸುತ್ತದೆ. ಮೇ 2026 ರ ವೇಳೆಗೆ, ಈ ಯೋಜನೆಯಡಿ 65,647 ಲಕ್ಷ ಗೂ ಹೆಚ್ಚು ಎಂಎಸ್ಎಂಇಗಳು ನೋಂದಾಯಿಸಿಕೊಂಡಿದ್ದು, ಸುಮಾರು 18,961 ಉದ್ಯಮಗಳು ಪ್ರಮಾಣೀಕರಿಸಲ್ಪಟ್ಟಿವೆ.

ಸ್ವಾವಲಂಬಿ ಭಾರತ ನಿಧಿ

ಅನೇಕ ಎಂಎಸ್ಎಂಇಗಳು ಬೆಳೆಯುವ ಸಾಮರ್ಥ್ಯವನ್ನು ಹೊಂದಿದ್ದರೂ, ಇಕ್ವಿಟಿ ಬಂಡವಾಳದ ಲಭ್ಯತೆಯು ಹೆಚ್ಚಾಗಿ ಒಂದು ಸವಾಲಾಗಿಯೇ ಉಳಿದಿದೆ.

ಆತ್ಮನಿರ್ಭರ ಭಾರತ ಪ್ಯಾಕೇಜ್ ಅಡಿಯಲ್ಲಿ ಪ್ರಾರಂಭಿಸಲಾದ ಎಸ್‌ಆರ್‌ಐ  ನಿಧಿಯು ಭರವಸೆಯ ಎಂಎಸ್ಎಂಇಗಳಿಗೆ ಇಕ್ವಿಟಿ ಬೆಂಬಲವನ್ನು ನೀಡುವ ಗುರಿಯನ್ನು ಹೊಂದಿರುವ ಒಂದು 'ಫಂಡ್ ಆಫ್ ಫಂಡ್ಸ್' ಉಪಕ್ರಮವಾಗಿದೆ. ಇದು ಹಣಕಾಸಿನ ಕೊರತೆಗಳನ್ನು ಜಯಿಸಲು, ಕಾರ್ಯಾಚರಣೆಗಳನ್ನು ವಿಸ್ತರಿಸಲು ಮತ್ತು ಹೆಚ್ಚಿನ ಹೂಡಿಕೆಯನ್ನು ಆಕರ್ಷಿಸಲು ಅವರಿಗೆ ಸಹಾಯ ಮಾಡುತ್ತಿದೆ. ಬಜೆಟ್ 2026-27 ಸ್ವಾವಲಂಬಿ ಭಾರತ ನಿಧಿಯನ್ನು ಹೆಚ್ಚಿಸಲು ಹೆಚ್ಚುವರಿಯಾಗಿ ₹2,000 ಕೋಟಿ ಒದಗಿಸಿದೆ. ಇದು ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳಿಗೆ ರಿಸ್ಕ್ ಬಂಡವಾಳದ ನಿರಂತರ ಲಭ್ಯತೆಯನ್ನು ಖಚಿತಪಡಿಸುವುದರ ಜೊತೆಗೆ ಅವರ ಬೆಳವಣಿಗೆ ಮತ್ತು ವಿಸ್ತರಣೆಯನ್ನು ಬೆಂಬಲಿಸುತ್ತದೆ. ಗಮನಾರ್ಹವಾಗಿ, ಎಸ್‌ಆರ್‌ಐ ನಿಧಿಯು ಮೇ 2026 ರ ವೇಳೆಗೆ ₹2,851 ಕೋಟಿ ಮೌಲ್ಯದ ಹೂಡಿಕೆಯ ಮೂಲಕ 761 ಎಂಎಸ್ಎಂಇಗಳಿಗೆ ಸಹಾಯ ಮಾಡಿದೆ.

ಈಶಾನ್ಯ ಪ್ರದೇಶ ಮತ್ತು ಸಿಕ್ಕಿಂನಲ್ಲಿ ಎಂಎಸ್ಎಂಇಗಳ ಉತ್ತೇಜನ

ಈಶಾನ್ಯ ಪ್ರದೇಶ ಮತ್ತು ಸಿಕ್ಕಿಂನಲ್ಲಿ ಎಂಎಸ್ಎಂಇಗಳ ಉತ್ತೇಜನಕ್ಕಾಗಿನ ಯೋಜನೆಯು ಈಶಾನ್ಯದಲ್ಲಿ ಎಂಎಸ್ಎಂಇ ಪರಿಸರ ವ್ಯವಸ್ಥೆಯನ್ನು ವಿಸ್ತರಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತಿದೆ. ಡಿಸೆಂಬರ್ 2025 ರ ವೇಳೆಗೆ, ಉತ್ಪಾದನೆ, ಪರೀಕ್ಷೆ, ಪ್ಯಾಕೇಜಿಂಗ್, ಕೌಶಲ್ಯ ಮತ್ತು ಆವಿಷ್ಕಾರದ ಮೂಲಸೌಕರ್ಯಗಳನ್ನು ಹೆಚ್ಚಿಸಲು 73 ಯೋಜನೆಗಳನ್ನು ಅನುಮೋದಿಸಲಾಗಿದೆ. 2025 ರ ಅವಧಿಯಲ್ಲಿ, ಅಸ್ಸಾಂ ಮತ್ತು ಮೇಘಾಲಯದಾದ್ಯಂತ ಎಂಟು ಹೊಸ ಮೂಲಸೌಕರ್ಯ ಯೋಜನೆಗಳನ್ನು ಅನುಮೋದಿಸಲಾಗಿದೆ. ಈ ಯೋಜನೆಯು ಒಟ್ಟು ₹114.37 ಕೋಟಿ ಯೋಜನಾ ವೆಚ್ಚವನ್ನು ಒಳಗೊಂಡಿದ್ದು, ಇದರಲ್ಲಿ ಸರ್ಕಾರದ ನೆರವು ₹89.60 ಕೋಟಿ ನಷ್ಟಿದೆ. ಈ ಹೂಡಿಕೆಗಳು ಕೈಗಾರಿಕಾ ಪ್ರದೇಶಗಳು ಮತ್ತು ಪ್ರವಾಸೋದ್ಯಮ ಮೂಲಸೌಕರ್ಯಗಳಲ್ಲಿ ಉದ್ಯಮ-ನೇತೃತ್ವದ ಬೆಳವಣಿಗೆಗೆ ಬಲವಾದ ಅಡಿಪಾಯವನ್ನು ನಿರ್ಮಿಸಲು ಸಹಾಯ ಮಾಡುತ್ತಿವೆ.

ರಾಷ್ಟ್ರೀಯ ಪರಿಶಿಷ್ಟ ಜಾತಿ-ಪರಿಶಿಷ್ಟ ಪಂಗಡ ಕೇಂದ್ರ

ಎನ್‌ಎಸ್ಎಸ್‌ಹೆಚ್ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ಸಮುದಾಯಗಳ ಉದ್ಯಮಿಗಳಿಗೆ ಮಾರುಕಟ್ಟೆಗಳನ್ನು ಪ್ರವೇಶಿಸಲು, ಸಾಮರ್ಥ್ಯಗಳನ್ನು ನಿರ್ಮಿಸಲು ಮತ್ತು ಸಾರ್ವಜನಿಕ ಖರೀದಿಯಲ್ಲಿ ಹೆಚ್ಚು ಸಕ್ರಿಯವಾಗಿ ಭಾಗವಹಿಸಲು ಸಹಾಯ ಮಾಡುತ್ತಿದೆ.

ಈ ಯೋಜನೆಯ ಪ್ರಭಾವವು ಹೆಚ್ಚಾಗಿ ಗೋಚರಿಸುತ್ತಿದೆ:

• 19,000+ ಕ್ಕೂ ಹೆಚ್ಚು ಪ.ಜಾತಿ/ಪ.ಪಂಗಡ ಉದ್ಯಮಿಗಳಿಗೆ ಬೆಂಬಲ ನೀಡಲಾಗುತ್ತಿದೆ (ಜನವರಿಯಿಂದ ಅಕ್ಟೋಬರ್ 2025)
• ಒಡಿಶಾ ಮತ್ತು ಬಿಹಾರದಲ್ಲಿ 111 ವಿಶೇಷ ವೆಂಡರ್ ಅಭಿವೃದ್ಧಿ ಕಾರ್ಯಕ್ರಮಗಳು ಮತ್ತು 3 ಪ್ರಮುಖ ಕಾನ್ಕ್ಲೇವ್‌ಗಳನ್ನು ಆಯೋಜಿಸಲಾಗಿದೆ
• ಪ.ಜಾತಿ/ಪ.ಪಂಗಡ ಒಡೆತನದ ಎಂಎಸ್‌ಇಗಳಿಂದ ಸಾರ್ವಜನಿಕ ಖರೀದಿಯು 2015-16 ರಲ್ಲಿ ಸುಮಾರು ₹99 ಕೋಟಿ ಇದ್ದದ್ದು 2024-25 ರಲ್ಲಿ ₹3,731 ಕೋಟಿ ಗಿಂತ ಅಧಿಕಕ್ಕೆ ಏರಿಕೆಯಾಗಿದೆ
• 230 ಅಭ್ಯರ್ಥಿಗಳಿಗೆ ಆತಿಥ್ಯ  ಕೌಶಲ್ಯಗಳಲ್ಲಿ ತರಬೇತಿ ನೀಡಲಾಗಿದೆ (2025-26)
• ಡಿಸೆಂಬರ್ 2025 ರ ವೇಳೆಗೆ ಒಟ್ಟು ಸಾರ್ವಜನಿಕ ಖರೀದಿಯಲ್ಲಿ ಪ.ಜಾತಿ/ಪ.ಪಂಗಡ ಒಡೆತನದ ಎಂಎಸ್‌ಇಗಳು 1.93% ರಷ್ಟನ್ನು ಹೊಂದಿವೆ.

ರಿಗ್ಟೆಕ್ ಇನ್‌ಫ್ರಾ ಸಂಸ್ಥೆಯ ಏಳಿಗೆ: ಆವಿಷ್ಕಾರ, ಬೆಂಬಲ ಮತ್ತು ಬೆಳವಣಿಗೆಯ ಕಥೆ

ರಾಷ್ಟ್ರೀಯ ಪರಿಶಿಷ್ಟ ಜಾತಿ-ಪರಿಶಿಷ್ಟ ಪಂಗಡ ಕೇಂದ್ರ ನೀಡಿದ ಬೆಂಬಲದೊಂದಿಗೆ, ರಾಂಚಿಯಲ್ಲಿರುವ ರಿಗ್ಟೆಕ್ ಇನ್‌ಫ್ರಾ (ಒಪಿಸಿ) ಪ್ರೈವೇಟ್  ಲಿಮಿಟೆಡ್ ಸಂಸ್ಥೆಯು ತನ್ನ ಉತ್ಪಾದನಾ ಸಾಮರ್ಥ್ಯಗಳನ್ನು ಮೇಲ್ದರ್ಜೆಗೆ ಏರಿಸಲು 2023 ರಲ್ಲಿ ₹25 ಲಕ್ಷ ಸಬ್ಸಿಡಿಯನ್ನು ಪಡೆದುಕೊಂಡಿತು. ಈ ಹೂಡಿಕೆಯು ಸಂಸ್ಥೆಯ ಉತ್ಪಾದಕತೆ ಮತ್ತು ಗುಣಮಟ್ಟವನ್ನು ಹೆಚ್ಚಿಸಿತು. ಇದು 2025 ರಲ್ಲಿ ರೈಲ್ ವಿಕಾಸ್ ನಿಗಮ್ ಲಿಮಿಟೆಡ್‌ನಿಂದ ₹15.75 ಲಕ್ಷ ಮೌಲ್ಯದ ಸರ್ಕಾರಿ ಟೆಂಡರ್‌ಗಳನ್ನು ಗೆಲ್ಲಲು ಈ ಉದ್ಯಮಕ್ಕೆ ಸಹಾಯ ಮಾಡಿತು. ಇಂದು, ಕಂಪನಿಯು ₹4–5 ಕೋಟಿ ವಾರ್ಷಿಕ ವಹಿವಾಟನ್ನು ದಾಖಲಿಸುತ್ತಿದೆ ಮತ್ತು 16 ಉದ್ಯೋಗಗಳಿಗೆ ಆಸರೆಯಾಗಿದೆ.

ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳ ಕ್ಲಸ್ಟರ್ ಅಭಿವೃದ್ಧಿ ಕಾರ್ಯಕ್ರಮ - ಎಂಎಸ್‌ಇ-ಸಿಡಿಪಿ

ಕೈಗಾರಿಕಾ ಪ್ರದೇಶಗಳು ಮತ್ತು ಕ್ಲಸ್ಟರ್‌ಗಳಲ್ಲಿ ಸಾಮಾನ್ಯ ಸೌಲಭ್ಯ ಕೇಂದ್ರಗಳನ್ನು ಸ್ಥಾಪಿಸಲು ಮತ್ತು ಮೂಲಸೌಕರ್ಯಗಳನ್ನು ಮೇಲ್ದರ್ಜೆಗೆ ಏರಿಸಲು ಸರ್ಕಾರಿ ಅನುದಾನವನ್ನು ಒದಗಿಸುವ ಮೂಲಕ, ಕ್ಲಸ್ಟರ್ ಆಧಾರಿತ ಅಭಿವೃದ್ಧಿಯ ರೇಖೆಯಲ್ಲಿ ಎಂಎಸ್‌ಇಗಳ ಉತ್ಪಾದಕತೆ ಮತ್ತು ಸ್ಪರ್ಧಾತ್ಮಕತೆಯನ್ನು ಬಲಪಡಿಸಲು ಈ ಯೋಜನೆ ಶ್ರಮಿಸುತ್ತದೆ.

ಕ್ಲಸ್ಟರ್ ಆಧಾರಿತ ಅಭಿವೃದ್ಧಿಯಲ್ಲಿ ಈ ಯೋಜನೆಯು ಗಮನಾರ್ಹ ಪ್ರಗತಿಯನ್ನು ಸಾಧಿಸಿದೆ:

• ಕೈಗಾರಿಕಾ ಕ್ಲಸ್ಟರ್‌ಗಳ ಬಲವರ್ಧನೆ: ಜೂನ್ 2026 ರ ವೇಳೆಗೆ, ಎಂಎಸ್ಎಂಇಗಳಿಗೆ ಉತ್ಪಾದಕತೆ, ತಂತ್ರಜ್ಞಾನದ ಲಭ್ಯತೆ ಮತ್ತು ಮೂಲಸೌಕರ್ಯಗಳನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿರುವ 612 ಯೋಜನೆಗಳನ್ನು ಈ ಯೋಜನೆಯಡಿ ಅನುಮೋದಿಸಲಾಗಿದೆ.
• ಸಾಮೂಹಿಕ ಮೂಲಸೌಕರ್ಯಗಳ ಸೃಷ್ಟಿ: ಅನುಮೋದಿತ ಯೋಜನೆಗಳಲ್ಲಿ 364 ಯೋಜನೆಗಳು ಪೂರ್ಣಗೊಂಡಿದ್ದು, ಉದ್ಯಮಗಳಿಗೆ ಸಾಮಾನ್ಯ ಸೌಲಭ್ಯ ಕೇಂದ್ರಗಳು ಮತ್ತು ಕೈಗಾರಿಕಾ ಪ್ರದೇಶಗಳ ಪ್ರವೇಶವನ್ನು ಒದಗಿಸಿವೆ.
• 2025-26 ರಲ್ಲಿ ನಿರಂತರ ವಿಸ್ತರಣೆ: 2025-26 ರ ಅವಧಿಯಲ್ಲಿ (20 ನವೆಂಬರ್ 2025 ರವರೆಗೆ), ಒಟ್ಟು ₹253.23 ಕೋಟಿ ವೆಚ್ಚದ 11 ಯೋಜನೆಗಳನ್ನು ಅನುಮೋದಿಸಲಾಗಿದ್ದು, ಅವುಗಳಲ್ಲಿ 2 ಪೂರ್ಣಗೊಂಡಿವೆ.

ಸಾಂಪ್ರದಾಯಿಕ ಕೈಗಾರಿಕೆಗಳ ಪುನರುಜ್ಜೀವನಕ್ಕಾಗಿನ ನಿಧಿ ಯೋಜನೆ - ಸ್ಫೂರ್ತಿ

ಭಾರತದ ಸಾಂಪ್ರದಾಯಿಕ ಕೈಗಾರಿಕೆಗಳು ಆಳವಾದ ಸಾಂಸ್ಕೃತಿಕ ಮತ್ತು ಆರ್ಥಿಕ ಮೌಲ್ಯವನ್ನು ಹೊಂದಿವೆ. ಆದಾಗ್ಯೂ, ಕುಶಲಕರ್ಮಿಗಳು ಆಧುನಿಕ ಉಪಕರಣಗಳ ಸೀಮಿತ ಲಭ್ಯತೆ ಮತ್ತು ದುರ್ಬಲ ಮಾರುಕಟ್ಟೆ ಸಂಪರ್ಕಗಳಂತಹ ಸವಾಲುಗಳನ್ನು ಎದುರಿಸುತ್ತಿದ್ದಾರೆ, ಇದು ಅವರ ಆದಾಯದ ಬೆಳವಣಿಗೆ ಮತ್ತು ಉದ್ಯಮ ವಿಸ್ತರಣೆಯನ್ನು ನಿರ್ಬಂಧಿಸುತ್ತದೆ.

ಕುಶಲಕರ್ಮಿಗಳನ್ನು ಉತ್ತಮ ಬೆಂಬಲ ಹೊಂದಿರುವ ಕ್ಲಸ್ಟರ್‌ಗಳಾಗಿ ಸಂಘಟಿಸುವ ಮೂಲಕ ಸ್ಫೂರ್ತಿ ಯೋಜನೆಯು ಈ ರಚನಾತ್ಮಕ ಕೊರತೆಗಳಿಗೆ ಸ್ಪಂದಿಸುತ್ತದೆ. ಇದು ಸುಧಾರಿತ ಸ್ಪರ್ಧಾತ್ಮಕತೆ, ಉತ್ಪನ್ನ ಅಭಿವೃದ್ಧಿ ಮತ್ತು ಸುಸ್ಥಿರ ಆದಾಯದ ಸೃಷ್ಟಿಗಾಗಿ ಸಾಂಪ್ರದಾಯಿಕ ಕುಶಲಕರ್ಮಿಗಳನ್ನು ಕ್ಲಸ್ಟರ್‌ಗಳಾಗಿ ಒಟ್ಟುಗೂಡಿಸುತ್ತದೆ.

ಕಾಲಾನಂತರದಲ್ಲಿ, ಈ ಯೋಜನೆಯು ದೇಶಾದ್ಯಂತ 513 ಅನುಮೋದಿತ ಕ್ಲಸ್ಟರ್‌ಗಳೊಂದಿಗೆ ಬಲವಾದ ರಾಷ್ಟ್ರೀಯ ಹೆಜ್ಜೆಯನ್ನು ಇಟ್ಟಿದ್ದು, 3.03 ಲಕ್ಷ ಸಾಂಪ್ರದಾಯಿಕ ಕುಶಲಕರ್ಮಿಗಳಿಗೆ ಪ್ರಯೋಜನವನ್ನು ನೀಡಿದೆ. ಜೂನ್ 2026 ರ ವೇಳೆಗೆ ಒಟ್ಟು 376 ಕ್ಲಸ್ಟರ್‌ಗಳು ಪ್ರಸ್ತುತ ಕಾರ್ಯನಿರ್ವಹಿಸುತ್ತಿವೆ. 2023-24 ರಲ್ಲೇ 18 ಹೊಸ ಕ್ಲಸ್ಟರ್‌ಗಳು ಕಾರ್ಯಾರಂಭ ಮಾಡಿದ್ದು, 11 ರಾಜ್ಯಗಳಾದ್ಯಂತ 11,810 ಕುಶಲಕರ್ಮಿಗಳಿಗೆ ಪ್ರಯೋಜನವನ್ನು ಒದಗಿಸಿವೆ.

ಎಂಎಸ್ಎಂಇ ಕಾರ್ಯಕ್ಷಮತೆಯನ್ನು ಹೆಚ್ಚಿಸುವ ಮತ್ತು ವೇಗಗೊಳಿಸುವ ಯೋಜನೆ - ರಾಂಪ್

ವಿಶ್ವಬ್ಯಾಂಕ್ ಬೆಂಬಲದೊಂದಿಗೆ, ರಾಂಪ್ ಯೋಜನೆಯು ಮಾರುಕಟ್ಟೆಗಳು, ಹಣಕಾಸು ಮತ್ತು ತಂತ್ರಜ್ಞಾನಕ್ಕೆ ಎಂಎಸ್ಎಂಇಗಳ ಪ್ರವೇಶವನ್ನು ಸುಧಾರಿಸುವ ಗುರಿಯನ್ನು ಹೊಂದಿದೆ. ಈ ಯೋಜನೆಯು ಸುಧಾರಣೆಗಳು, ಸಾಂಸ್ಥಿಕ ಸಾಮರ್ಥ್ಯ ವೃದ್ಧಿ ಮತ್ತು ಹೆಚ್ಚಿನ ಕೇಂದ್ರ-ರಾಜ್ಯ ಸಹಯೋಗದ ಮೂಲಕ ಎಂಎಸ್ಎಂಇ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುತ್ತಿದೆ:

• ರಾಜ್ಯ ಮಟ್ಟದ ಸುಧಾರಣೆಗಳ ಪ್ರೇರಣೆ: ಎಲ್ಲಾ 36 ರಾಜ್ಯಗಳು ಮತ್ತು ಒಕ್ಕೂಟ ಪ್ರದೇಶಗಳು ಸಲ್ಲಿಸಿದ ವ್ಯವಸ್ಥಿತ ಹೂಡಿಕೆ ಯೋಜನೆಗಳನ್ನು ಮೌಲ್ಯಮಾಪನ ಮಾಡಲಾಗಿದ್ದು, ₹3,211.75 ಕೋಟಿ ಮೌಲ್ಯದ 398 ಪ್ರಸ್ತಾವನೆಗಳ ಅನುಮೋದನೆಗೆ ಕಾರಣವಾಗಿದೆ.
• ಎಂಎಸ್ಎಂಇ ವ್ಯಾಪ್ತಿಯ ವಿಸ್ತರಣೆ: ಜೂನ್ 2026 ರ ವೇಳೆಗೆ, ಈ ಯೋಜನೆಯಡಿ ಕೈಗೊಳ್ಳಲಾದ ಉಪಕ್ರಮಗಳು ದೇಶಾದ್ಯಂತ 55 ಲಕ್ಷ ಗೂ ಹೆಚ್ಚು ಎಂಎಸ್ಎಂಇಗಳ ಮೇಲೆ ಸಕಾರಾತ್ಮಕ ಪ್ರಭಾವ ಬೀರಿದೆ.
• ಸ್ಥಿರ ಕಾರ್ಯಕ್ರಮ ಅನುಷ್ಠಾನ: ವಿತರಣೆಗಳ ಪೂರ್ಣಗೊಳಿಸುವಿಕೆಯ ಕಾರಣದಿಂದಾಗಿ, ಮರುಪಾವತಿಯನ್ನು ಕ್ಲೈಮ್ ಮಾಡುವ ವಿಷಯದಲ್ಲಿ ಸರ್ಕಾರವು ಕಾರ್ಯಕ್ರಮದ ಗುರಿಯ 50% ರಷ್ಟನ್ನು ಸಾಧಿಸಿದೆ.

ತಂತ್ರಜ್ಞಾನ ಕೇಂದ್ರಗಳು

ತಂತ್ರಜ್ಞಾನ ಕೇಂದ್ರಗಳು ಕೌಶಲ್ಯ ಅಭಿವೃದ್ಧಿ, ತಾಂತ್ರಿಕ ಬೆಂಬಲ ಮತ್ತು ಆವಿಷ್ಕಾರದ ಕೇಂದ್ರಗಳಾಗಿ ಕಾರ್ಯನಿರ್ವಹಿಸುತ್ತವೆ. ಪರಿಕರ ಕೊಠಡಿಗಳು, ತಂತ್ರಜ್ಞಾನ ಕೇಂದ್ರಗಳು ಮತ್ತು ವಿಸ್ತರಣಾ ಕೇಂದ್ರಗಳ ಜಾಲದ ಮೂಲಕ, ಅವು ಉದ್ಯಮಕ್ಕೆ ಸಿದ್ಧವಾಗಿರುವ ಪ್ರತಿಭೆಗಳನ್ನು ಪೋಷಿಸುತ್ತವೆ. ಉದಯೋನ್ಮುಖ ಉದ್ಯಮದ ಅವಶ್ಯಕತೆಗಳನ್ನು ಪೂರೈಸಲು ಉದ್ಯೋಗಿಗಳಿಗೆ ಕೌಶಲ್ಯ ಮೇಲ್ದರ್ಜೀಕರಣ ಮತ್ತು ಮರು-ಕೌಶಲ್ಯ ತರಬೇತಿಯನ್ನು ಬೆಂಬಲಿಸುವುದು ಇದರ ಕಾರ್ಯಸೂಚಿಯಾಗಿದೆ.

• 18 ತಂತ್ರಜ್ಞಾನ ಕೇಂದ್ರಗಳು ವ್ಯಾಪಕ ಶ್ರೇಣಿಯ ಉತ್ಪಾದನೆ ಮತ್ತು ತಂತ್ರಜ್ಞಾನ-ತೀವ್ರ ವಲಯಗಳಲ್ಲಿ ಎಂಎಸ್ಎಂಇಗಳನ್ನು ಬೆಂಬಲಿಸುತ್ತಿವೆ.
• ಈ ಪರಿಸರ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸಲು, ತಂತ್ರಜ್ಞಾನ ಕೇಂದ್ರಗಳು ಮತ್ತು ವಿಸ್ತರಣಾ ಕೇಂದ್ರಗಳ ಯೋಜನೆಯಡಿ 20 ಹೊಸ ತಂತ್ರಜ್ಞಾನ ಕೇಂದ್ರಗಳನ್ನು ಮತ್ತು 100 ವಿಸ್ತರಣಾ ಕೇಂದ್ರಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ.
• ನವೆಂಬರ್ 2025 ರ ವೇಳೆಗೆ, ದೇಶಾದ್ಯಂತ 25 ವಿಸ್ತರಣಾ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿದ್ದು, 53,963 ಯುವಕರಿಗೆ ತರಬೇತಿಯನ್ನು ನೀಡಿವೆ ಮತ್ತು 1,357 ಎಂಎಸ್ಎಂಇಗಳಿಗೆ ಬೆಂಬಲವನ್ನು ವಿಸ್ತರಿಸಿವೆ.
• ವಿಶ್ವಬ್ಯಾಂಕ್ ಬೆಂಬಲಿತ ತಂತ್ರಜ್ಞಾನ ಕೇಂದ್ರ ವ್ಯವಸ್ಥೆ ಕಾರ್ಯಕ್ರಮದ ಅಡಿಯಲ್ಲಿ ಒಂಬತ್ತು ಹೊಸ ಕೇಂದ್ರಗಳನ್ನು ಸಹ ಸ್ಥಾಪಿಸಲಾಗಿದೆ. ಈ ಕೇಂದ್ರಗಳು 59,357 ವ್ಯಕ್ತಿಗಳಿಗೆ ತರಬೇತಿ ನೀಡಿವೆ ಮತ್ತು 1,520 ಎಂಎಸ್ಎಂಇಗಳಿಗೆ ಸಹಾಯ ಮಾಡಿವೆ.

ತಂತ್ರಜ್ಞಾನ, ಕೌಶಲ್ಯ ಮತ್ತು ಉದ್ಯಮದ ಬೆಂಬಲವನ್ನು ಸಂಯೋಜಿಸುವ ಮೂಲಕ, ತಂತ್ರಜ್ಞಾನ ಕೇಂದ್ರಗಳ ಜಾಲವು ಎಂಎಸ್ಎಂಇಗಳಿಗೆ ಆವಿಷ್ಕಾರ ಅಳವಡಿಸಿಕೊಳ್ಳಲು, ಆಧುನೀಕರಣಗೊಳ್ಳಲು ಮತ್ತು ತಂತ್ರಜ್ಞಾನ ಆಧಾರಿತ ಆರ್ಥಿಕತೆಯಲ್ಲಿ ಸ್ಪರ್ಧಿಸಲು ಸಹಾಯ ಮಾಡುತ್ತಿದೆ.

ಉದ್ಯಮದ ಮೂಲಕ ಭವಿಷ್ಯದ ರೂಪಾಂತರ

ಭಾರತದ ಎಂಎಸ್ಎಂಇ ವಲಯದ ಪ್ರಗತಿಯು ದೇಶದಲ್ಲಿ ನಡೆಯುತ್ತಿರುವ ಒಂದು ದೊಡ್ಡ ರಾಷ್ಟ್ರೀಯ ರೂಪಾಂತರವನ್ನು ಪ್ರತಿಬಿಂಬಿಸುತ್ತದೆ. ಹಣಕಾಸು, ತಂತ್ರಜ್ಞಾನ, ಕೌಶಲ್ಯ, ಮೂಲಸೌಕರ್ಯ ಮತ್ತು ಮಾರುಕಟ್ಟೆಗಳ ಪ್ರವೇಶದ ವಿಸ್ತರಣೆಯು ಉದ್ಯಮಗಳನ್ನು ಹೆಚ್ಚು ಉತ್ಪಾದಕ, ಸ್ಪರ್ಧಾತ್ಮಕ ಮತ್ತು ಚೇತರಿಸಿಕೊಳ್ಳುವಂತೆ ಮಾಡುತ್ತಿದೆ. ಈ ವಲಯವು ವಿಕಸನಗೊಳ್ಳುತ್ತಾ ಸಾಗಿದಂತೆ, ಉದ್ಯೋಗ, ಆವಿಷ್ಕಾರ ಮತ್ತು ಆರ್ಥಿಕ ಬೆಳವಣಿಗೆಗೆ ಅದರ ಹೆಚ್ಚುತ್ತಿರುವ ಕೊಡುಗೆಯು ಭಾರತದ ಅಭಿವೃದ್ಧಿಯ ಪಯಣವನ್ನು ಮತ್ತಷ್ಟು ಬಲಪಡಿಸುತ್ತದೆ. ಇದು ಹೆಚ್ಚು ಅಂತರ್ಗತ, ಸ್ವಾವಲಂಬಿ ಮತ್ತು ಅಭಿವೃದ್ಧಿ ಹೊಂದಿದ ಭಾರತದ ಅಡಿಪಾಯವನ್ನು ಹಾಕಲು ಸಹಾಯ ಮಾಡುತ್ತದೆ.

References

Ministry of Finance

https://www.pib.gov.in/PressReleasePage.aspx?PRID=2216047&reg=3&lang=1

https://www.pib.gov.in/PressReleasePage.aspx?PRID=2110404&reg=3&lang=2#:~:text=Specific%20targets%20for%20lending%20to,registered%20under%20the%20GST%20regime

Ministry of Micro, Small & Medium Enterprises

https://msme.gov.in/sites/default/files/Scheme-booklet-Eng.pdf

https://msme.gov.in/sites/default/files/MSMEANNUALREPORT2025-26ENGLISH_0.pdf

https://msme.gov.in/sites/default/files/MSME-Connect.htm#:~:text=The%20engineering%20sector%20forms%20the,manufacturing%20across%20diverse%20engineering%20disciplines.

https://zed.msme.gov.in/

https://pmvishwakarma.gov.in/

https://www.india.gov.in/spotlight/pradhan-mantri-vishwakarma-scheme

https://udyamassist.gov.in/

https://aspire.msme.gov.in/ASPIRE/AFHome.aspx

https://www.kviconline.gov.in/pmegpeportal/pmegphome/dashboard.jsp

https://www.pib.gov.in/PressReleasePage.aspx?PRID=2089308

https://www.pib.gov.in/PressReleasePage.aspx?PRID=2204536&reg=3&lang=1

https://www.pib.gov.in/PressReleasePage.aspx?PRID=2209712&reg=3&lang=1

https://www.pib.gov.in/FactsheetDetails.aspx?id=150535&NoteId=150535&ModuleId=16&reg=37&lang=1

https://www.pib.gov.in/PressReleasePage.aspx?PRID=2087361&reg=3&lang=2

https://www.pib.gov.in/PressReleasePage.aspx?PRID=2265369&reg=3&lang=1

Ministry of Commerce & Industry

https://www.investindia.gov.in/team-india-blogs/growth-imperative-msme-sector#:~:text=The%20MSME%20sector%20accounts%20for,to%20more%20than%201000%20people.

United Nations

https://www.un.org/en/observances/micro-small-medium-businesses-day

Cabinet

https://www.pib.gov.in/PressReleasePage.aspx?PRID=2216720&reg=3&lang=1

Small Industries Development Bank of India (SIDBI)

https://www.sidbi.in/uploads/Understanding_Indian_MSME_sector_Progress_and_Challenges_13_05_25_Final.pdf

RBI

https://www.rbi.org.in/commonman/Upload/English/speeches/PDFs/MSME06032020.PDF

Niti Aayog

https://www.pib.gov.in/PressReleasePage.aspx?PRID=2214899&reg=3&lang=1

https://www.niti.gov.in/sites/default/files/2026-01/Achieving_Efficiencies_in_MSME_Sector_Through_Convergence_of_Schemes.pdf

IBEF

https://www.ibef.org/industry/msme

PIB Archives

https://www.pib.gov.in/PressNoteDetails.aspx?NoteId=154772&ModuleId=3&reg=3&lang=2

https://www.pib.gov.in/PressReleasePage.aspx?PRID=2192524&reg=3&lang=2

https://www.pib.gov.in/PressReleasePage.aspx?PRID=2226828&reg=48&lang=2

Click Here To See PDF

*****