पत्र सूचना कार्यालय

Technology

ഇന്ത്യയുടെ വളർന്നുവരുന്ന സാങ്കേതിക ആവാസവ്യവസ്ഥ

ഇന്ത്യയുടെ വളർന്നുവരുന്ന സാങ്കേതിക ആവാസവ്യവസ്ഥ

ഇന്ത്യയുടെ ഭാവിയെ രൂപപ്പെടുത്തുന്ന സാങ്കേതികവിദ്യകൾ

കുതിച്ചുചാട്ടത്തിന് മുമ്പ്

പന്ത്രണ്ട് വർഷങ്ങൾക്ക് മുമ്പ് സാങ്കേതികവിദ്യയെ വികസിത ഭാരതത്തിന്റെ ഒരു പ്രധാന ചാലകശക്തിയാക്കി മാറ്റുന്നതിനുള്ള ദൃഢനിശ്ചയത്തോടെയുള്ള ഒരു യാത്രയ്ക്ക് ഇന്ത്യ തുടക്കം കുറിച്ചു. ഇതിനെത്തുടർന്ന് ഡിജിറ്റൽ അടിസ്ഥാന സൗകര്യങ്ങൾ നിർമ്മിക്കുന്നതിനും നവീനാശയം ശക്തിപ്പെടുത്തുന്നതിനും ഓരോ പൗരനും സാങ്കേതികവിദ്യ ലഭ്യമാക്കുന്നത് വ്യാപിപ്പിക്കുന്നതിനുമുള്ള സുസ്ഥിരമായ ഒരു ദേശീയ ശ്രമമുണ്ടായി. സെമികണ്ടക്ടറുകൾ, നിർമിത ബുദ്ധി, ക്വാണ്ടം സാങ്കേതികവിദ്യകൾ, സൂപ്പർകമ്പ്യൂട്ടിംഗ്, ബ്ലോക്ക്‌ചെയിൻ, ക്ലൗഡ് അടിസ്ഥാന സൗകര്യങ്ങൾ തുടങ്ങിയ വളർന്നുവരുന്ന സാങ്കേതികവിദ്യകളിലെ പ്രത്യേക മിഷൻ-മോഡ് (ലക്ഷ്യാധിഷ്ഠിത) പരിപാടികളിലൂടെ ഗവൺമെന്റ് ദേശീയ സാങ്കേതിക ശേഷി ശക്തിപ്പെടുത്തി. ദീർഘകാല നയപിന്തുണയും തന്ത്രപരമായ നിക്ഷേപങ്ങളും തദ്ദേശീയ സാങ്കേതികവിദ്യകളുടെയും സുരക്ഷിതമായ ഡിജിറ്റൽ സംവിധാനങ്ങളുടെയും ആഗോളതലത്തിൽ മത്സരശേഷിയുള്ള നവീനാശയ ആവാസവ്യവസ്ഥകളുടെയും വികസനം സാധ്യമാക്കി.

വ്യാപകമായ നൈപുണ്യ വികസന സംരംഭങ്ങൾ, വിപുലമായ ഗവേഷണ അടിസ്ഥാന സൗകര്യങ്ങൾ, സ്റ്റാർട്ടപ്പ് പിന്തുണ, വ്യവസായ-അക്കാദമിക സഹകരണം എന്നിവയിലൂടെ ദേശീയ ശേഷി വർധിപ്പിക്കുന്നതിലൂടെയുള്ള വലിയ നിക്ഷേപങ്ങൾ ഈ പരിവർത്തനത്തിന് പിന്തുണയേകി. കൂടാതെ രാജ്യത്തുടനീളം മികവിന്റെ കേന്ദ്രങ്ങൾ, ഗവേഷണ ഹബ്ബുകൾ, സെമികണ്ടക്ടർ ലബോറട്ടറികൾ, വളർന്നുവരുന്ന സാങ്കേതികവിദ്യാ സ്ഥാപനങ്ങൾ എന്നിവ സ്ഥാപിക്കപ്പെട്ടു. ഈ സംരംഭങ്ങൾ വളർന്നുവരുന്ന മേഖലകളിൽ ഭാവിസജ്ജമായ ഒരു തൊഴിൽ ശക്തിയുടെ വികസനത്തിനുള്ള അവസരങ്ങൾ സൃഷ്ടിച്ചു.

മെച്ചപ്പെട്ട ശേഷിയും വിപുലീകരിച്ച കപ്പാസിറ്റിയും ഇന്ത്യയുടെ ആഗോള സാങ്കേതിക വിശ്വാസ്യതയെ കൂടുതൽ ശക്തമായി നിലയുറപ്പിച്ചു. രാജ്യം വിശ്വസനീയമായ ഡിജിറ്റൽ പൊതു അടിസ്ഥാന സൗകര്യങ്ങളും (DPI) സുരക്ഷിത ഡിജിറ്റൽ ഭരണ സംവിധാനങ്ങളും ശക്തമായ അന്താരാഷ്ട്ര സാങ്കേതിക പങ്കാളിത്തങ്ങളും കെട്ടിപ്പടുത്തു. എല്ലാവരെയും ഉൾക്കൊള്ളൽ, ലഭ്യത, കുറഞ്ഞ ചെലവ് എന്നിവ ഉറപ്പാക്കിക്കൊണ്ട് ജനസംഖ്യാ തലത്തിൽ സാങ്കേതികവിദ്യ എങ്ങനെ വിന്യസിക്കാമെന്ന് ഇന്ത്യ ലോകത്തിന് കാണിച്ചുകൊടുത്തു. ഇന്ന് ഇന്ത്യ ആഗോള സാങ്കേതികവിദ്യകൾ സ്വീകരിക്കുക മാത്രമല്ല, വിശ്വസനീയവും എല്ലാവരെയും ഉൾക്കൊള്ളുന്നതും മനുഷ്യകേന്ദ്രീകൃതവുമായ സാങ്കേതിക വികസനത്തെക്കുറിച്ചുള്ള ആഗോള ചർച്ചകൾക്ക് രൂപം നൽകുകയും ചെയ്യുന്നു.

ഡിജിറ്റൽ ഇന്ത്യ പദ്ധതി: വളർന്നുവരുന്ന കഴിവുകളുടെ നട്ടെല്ല്

2015-ൽ ആരംഭിച്ച ഡിജിറ്റൽ ഇന്ത്യ പദ്ധതി രാജ്യത്തുടനീളമുള്ള ഡിജിറ്റൽ അടിസ്ഥാന സൗകര്യങ്ങൾ ശക്തിപ്പെടുത്തിക്കൊണ്ട് ഇന്ത്യയുടെ വളർന്നുവരുന്ന സാങ്കേതിക ആവാസവ്യവസ്ഥയ്ക്ക് അടിത്തറയിട്ടു. ഒപ്റ്റിക്കൽ ഫൈബർ ശൃംഖലകളുടെ ദ്രുതഗതിയിലുള്ള വിപുലീകരണം അതിവേഗ കണക്റ്റിവിറ്റിക്കുള്ള നട്ടെല്ല് സൃഷ്ടിച്ചു. ഒപ്റ്റിക്കൽ ഫൈബർ കവറേജ് 2019-ലെ 19.35 ലക്ഷം റൂട്ട് കിലോമീറ്ററിൽ നിന്ന് 2025-ൽ 42.36 ലക്ഷം റൂട്ട് കിലോമീറ്ററായി വർധിച്ചു. ഈ വിപുലീകരണം ഇന്ത്യയിലെ നഗര-ഗ്രാമ പ്രദേശങ്ങളിലുടനീളം ഇന്റർനെറ്റ് ലഭ്യതയും ശൃംഖലയുടെ വിശ്വസനീയതയും ഡിജിറ്റൽ കണക്റ്റിവിറ്റിയും മെച്ചപ്പെടുത്തി. 99.9% ജില്ലകളിലും സേവനങ്ങൾ എത്തിച്ചുകൊണ്ട് ലോകത്തിലെ ഏറ്റവും വേഗതയേറിയ 5G വിന്യാസങ്ങളിലൊന്ന് ഇന്ത്യ കൈവരിക്കുകയും ചെയ്തു. മെച്ചപ്പെട്ട ഡിജിറ്റൽ അടിസ്ഥാന സൗകര്യങ്ങൾ രാജ്യവ്യാപകമായി ഇന്റർനെറ്റ് സ്വീകാര്യതയ്ക്ക് വേഗത കൂട്ടി.

ഇന്റർനെറ്റ് കണക്ഷനുകൾ 2014-ലെ 25.15 കോടിയിൽ നിന്ന് 2026-ൽ 102.86 കോടിയായി വർധിച്ചു. വർധിച്ചുവരുന്ന ഇന്റർനെറ്റ് വ്യാപനം ബ്രോഡ്‌ബാൻഡ് ലഭ്യതയെ കൂടുതൽ വിപുലീകരിച്ചു. ബ്രോഡ്‌ബാൻഡ് കണക്ഷനുകൾ 2014-ലെ 6.1 കോടിയിൽ നിന്ന് 2025 ഡിസംബറിൽ 99.56 കോടിയായി ഉയർന്നു.

ഈ ഡിജിറ്റൽ വിപുലീകരണം പൗരന്മാരെയും സ്റ്റാർട്ടപ്പുകളെയും ബിസിനസ്സുകളെയും വിദ്യാഭ്യാസ സ്ഥാപനങ്ങളെയും ആരോഗ്യ പരിപാലന സംവിധാനങ്ങളെയും ഗവൺമെന്റ് സേവനങ്ങളെയും ഡിജിറ്റൽ സമ്പദ്‌വ്യവസ്ഥയുമായി ബന്ധിപ്പിച്ചു. വേഗതയേറിയതും കൂടുതൽ വിശ്വസനീയവുമായ കണക്റ്റിവിറ്റി നിർമിത ബുദ്ധി (AI), ക്ലൗഡ് കമ്പ്യൂട്ടിംഗ്, ബ്ലോക്ക്‌ചെയിൻ, ഫിൻടെക്, മറ്റ് ഡാറ്റാ അധിഷ്ഠിത സാങ്കേതികവിദ്യകൾ എന്നിവയുടെ വളർച്ചയ്ക്കും കാരണമായി.

കുറഞ്ഞ ചെലവിലുള്ള ഇന്റർനെറ്റ് സൗകര്യം വലിയ തോതിലുള്ള സാങ്കേതികവിദ്യാ സ്വീകാര്യതയ്ക്ക് വീണ്ടും വേഗത കൂട്ടി. ശരാശരി പ്രതിമാസ ഡാറ്റാ ഉപഭോഗം 2014-ലെ 61.66 MB ആയിരുന്നതിൽ നിന്ന് 2025 ഡിസംബറിൽ 24.01 GB ആയി വർധിച്ചു. ഇതേ കാലയളവിൽ ഡാറ്റാ നിരക്കുകൾ ഒരു ജിബിക്ക് 269 രൂപയായിരുന്നതിൽ നിന്ന് 8-10 രൂപയായി കുത്തനെ കുറഞ്ഞു. കുറഞ്ഞ ഇന്റർനെറ്റ് ചെലവുകൾ ടെലിമെഡിസിൻ, ഓൺലൈൻ വിദ്യാഭ്യാസം, ഡിജിറ്റൽ പേയ്‌മെന്റുകൾ, ഇ-കോമേഴ്‌സ്, ഇ-ഗവേണൻസ് സേവനങ്ങൾ എന്നിവയിലേക്കുള്ള പ്രവേശനത്തെ വിപുലീകരിച്ചു. ഈ വ്യാപകമായ ഡിജിറ്റൽ സ്വീകാര്യത നവീനാശയത്തിനും സ്റ്റാർട്ടപ്പുകൾക്കും ഡിജിറ്റൽ സംരംഭകത്വത്തിനും ശക്തമായ ഒരു ഉപഭോക്തൃ ആവാസവ്യവസ്ഥ സൃഷ്ടിച്ചു.

കഴിഞ്ഞ 12 വർഷത്തിനിടയിൽ ഡിജിറ്റൽ ഇന്ത്യ പദ്ധതി ഇന്ത്യയുടെ ഡിജിറ്റൽ പരിവർത്തനത്തിന്റെ നട്ടെല്ലായി പരിണമിച്ചു. ഈ പരിപാടി ഡിജിറ്റൽ അടിസ്ഥാന സൗകര്യങ്ങൾ ശക്തിപ്പെടുത്തുകയും കണക്റ്റിവിറ്റി വിപുലീകരിക്കുകയും വിവിധ മേഖലകളിലുടനീളം സാങ്കേതികവിദ്യാ സ്വീകാര്യതയ്ക്ക് വേഗത കൂട്ടുകയും ചെയ്തു. ഈ ശ്രമങ്ങൾ ഇന്ത്യയെ ആഗോളതലത്തിൽ മത്സരശേഷിയുള്ള ഒരു ഡിജിറ്റൽ സമ്പദ്‌വ്യവസ്ഥയായി നിലയുറപ്പിക്കുന്നതോടൊപ്പം ഭാവി സജ്ജതയ്ക്കുള്ള ശക്തമായ അടിത്തറ പാകുകയും വളർന്നുവരുന്ന സാങ്കേതികവിദ്യകളിൽ ദേശീയ ശേഷി വികസിപ്പിക്കുകയും ചെയ്യുന്നു.

ഭാവിസജ്ജമാക്കാൻ ശേഷികൾ വികസിപ്പിക്കുന്നു

നിർമിത ബുദ്ധി, സെമികണ്ടക്ടറുകൾ, ക്വാണ്ടം സാങ്കേതികവിദ്യകൾ, സൂപ്പർ കമ്പ്യൂട്ടിംഗ് തുടങ്ങിയവയിലെ സുസ്ഥിര നിക്ഷേപങ്ങളിലൂടെ ഇന്ത്യ ഭാവിസജ്ജമായ ഒരു സാങ്കേതിക ആവാസവ്യവസ്ഥ കെട്ടിപ്പടുക്കുകയാണ്. ലക്ഷ്യാധിഷ്ഠിത പരിപാടികൾ വിവിധ മേഖലകളിലുടനീളം തദ്ദേശീയമായ നവീനാശയങ്ങളെയും ഗവേഷണ ശേഷികളെയും ഡിജിറ്റൽ അടിസ്ഥാന സൗകര്യങ്ങളെയും ശക്തിപ്പെടുത്തുന്നു. ഈ സംരംഭങ്ങൾ വിപുലമായ ഉൽപ്പാദനത്തെയും തന്ത്രപ്രധാനമായ സാങ്കേതിക വികസനത്തെയും പ്രോത്സാഹിപ്പിക്കുന്നു. അതേസമയം വളർന്നുവരുന്ന സാങ്കേതികവിദ്യകൾക്കായുള്ള വിശ്വസനീയവും ആഗോളതലത്തിൽ മത്സരശേഷിയുള്ളതുമായ ഒരു കേന്ദ്രമെന്ന നിലയിൽ ഇന്ത്യയുടെ സ്ഥാനത്തെ ഇത് കൂടുതൽ ഉറപ്പിക്കുകയും ചെയ്യുന്നു.

ഹൈ-പെർഫോമൻസ് കമ്പ്യൂട്ടിംഗിനായുള്ള സൂപ്പർകമ്പ്യൂട്ടറുകൾ

ഓരോ സെക്കൻഡിലും കോടിക്കണക്കിന് കണക്കുകൂട്ടലുകൾ നടത്തുന്നതിനായി രൂപകൽപ്പന ചെയ്തിട്ടുള്ള അതിശക്തമായ കമ്പ്യൂട്ടറുകളാണ് സൂപ്പർകമ്പ്യൂട്ടറുകൾ. സാധാരണ കമ്പ്യൂട്ടറുകൾക്ക് കാര്യക്ഷമമായി കൈകാര്യം ചെയ്യാൻ കഴിയാത്ത സങ്കീർണ്ണമായ പ്രശ്നങ്ങൾ പരിഹരിക്കാനാണ് അവ ഉപയോഗിക്കുന്നത്. ഇന്ന് കാലാവസ്ഥാ പ്രവചനം, കാലാവസ്ഥാ വ്യതിയാന പഠനങ്ങൾ, നിർമിത ബുദ്ധി, ഡ്രഗ് ഡിസ്കവറി തുടങ്ങിയവയ്ക്ക് അവ അത്യന്താപേക്ഷിതമാണ്. ഡാറ്റയുടെ അളവും കമ്പ്യൂട്ടേഷണൽ ആവശ്യങ്ങളും വർധിച്ചുവരുമ്പോൾ ശാസ്ത്രീയ നവീനാശയങ്ങൾക്ക് വേഗത കൂട്ടാനും തെളിവുകളുടെ അടിസ്ഥാനത്തിൽ വേഗത്തിലുള്ള തീരുമാനങ്ങൾ എടുക്കാനും സൂപ്പർകമ്പ്യൂട്ടറുകൾ സഹായിക്കുന്നു. സാങ്കേതിക നേതൃത്വത്തിനും സാമ്പത്തിക മത്സരശേഷിക്കും ഇവ അത്യാവശ്യമായ ഒരു അടിസ്ഥാന സൗകര്യമായി മാറിയിരിക്കുന്നു.

4,500 കോടി രൂപ ചെലവിൽ 2015-ൽ ആരംഭിച്ച നാഷണൽ സൂപ്പർകമ്പ്യൂട്ടിംഗ് മിഷന് (NSM) കീഴിൽ പ്രമുഖ സ്ഥാപനങ്ങളിലുടനീളമായി ആകെ 47 പെറ്റാഫ്ലോപ്സ് കമ്പ്യൂട്ടിംഗ് ശേഷിയുള്ള 38 സൂപ്പർകമ്പ്യൂട്ടറുകൾ ഇന്ത്യ വിന്യസിച്ചിട്ടുണ്ട്. ഇന്ത്യയിൽ തന്നെ രൂപകൽപ്പന ചെയ്ത ഹാർഡ്‌വെയറും സോഫ്റ്റ്‌വെയറും ഉപയോഗിച്ച് നിർമ്മിച്ച തദ്ദേശീയ പരം രുദ്ര (PARAM Rudra) ശ്രേണിയുടെ വികസനമാണ് ഇതിലെ ഒരു പ്രധാന നേട്ടം. ഹൈ-പെർഫോമൻസ് കമ്പ്യൂട്ടിംഗിൽ സ്വയംപര്യാപ്തത ശക്തിപ്പെടുത്തുന്നതിലേക്കുള്ള സുപ്രധാനമായ ഒരു ചുവടുവെപ്പാണിത്. കൂടുതൽ വായിക്കാൻ ഇവിടെ ക്ലിക്ക് ചെയ്യുക.

ഇന്ത്യയുടെ സെമികണ്ടക്ടർ ആവാസവ്യവസ്ഥ

ആധുനിക ഡിജിറ്റൽ, വളർന്നുവരുന്ന സാങ്കേതികവിദ്യകളുടെ അടിത്തറയാണ് സെമികണ്ടക്ടറുകൾ. ആശയവിനിമയം, മൊബിലിറ്റി, പ്രതിരോധം, ഉൽപ്പാദനം തുടങ്ങിയ മേഖലകളിൽ ഉപയോഗിക്കുന്ന ഉപകരണങ്ങൾക്ക് അവ ഊർജ്ജം പകരുന്നു. നിർമിത ബുദ്ധി, ക്ലൗഡ് കമ്പ്യൂട്ടിംഗ്, IoT, 5G, വിപുലമായ ഇലക്ട്രോണിക്സ് തുടങ്ങിയ സാങ്കേതികവിദ്യകൾ സെമികണ്ടക്ടർ ശേഷിയെയാണ് ഏറെയും ആശ്രയിക്കുന്നത്.

സാങ്കേതിക പരമാധികാരം ശക്തിപ്പെടുത്തുന്നതിനായി ഗവൺമെന്റ് 2021 ഡിസംബറിൽ 76,000 കോടി രൂപാ ചെലവിൽ സെമികോൺ ഇന്ത്യ പദ്ധതിക്ക് തുടക്കം കുറിച്ചു. ഈ പരിപാടി സെമികണ്ടക്ടർ നിർമ്മാണം, ഡിസ്‌പ്ലേ ഫാബ്രിക്കേഷൻ, ചിപ്പ് ഡിസൈൻ, പാക്കേജിംഗ്, ടെസ്റ്റിംഗ്, പ്രതിഭാശേഷി വികസനം, ഗവേഷണ സഹകരണങ്ങൾ എന്നിവയെ പ്രോത്സാഹിപ്പിച്ചു. ആത്മനിർഭർ ഭാരത്, മേയ്ക്ക് ഇൻ ഇന്ത്യ എന്നിവയിലധിഷ്ഠിതമായ ഇത് ഇന്ത്യയെ ആഗോള ഇലക്ട്രോണിക്സ് മൂല്യശൃംഖലകളിലേക്ക് സംയോജിപ്പിക്കാൻ ലക്ഷ്യമിട്ടു. ഈ മുന്നേറ്റത്തിന്റെ ചുവടുപിടിച്ച് 2026-27-ലെ കേന്ദ്ര ബജറ്റിൽ 2026-27 സാമ്പത്തിക വർഷത്തേക്ക് 1,000 കോടി രൂപയുടെ പ്രാരംഭ വിഹിതത്തോടെ ഇന്ത്യ സെമികണ്ടക്ടർ മിഷൻ (ISM) 2.0 പ്രഖ്യാപിച്ചു. ISM 2.0 സെമികണ്ടക്ടർ ഉപകരണങ്ങൾ, സാമഗ്രികൾ, തദ്ദേശീയ ബൗദ്ധിക സ്വത്ത്, പ്രതിരോധശേഷിയുള്ള വിതരണ ശൃംഖലകൾ, ഗവേഷണം, പരിശീലനം, വിപുലമായ ഉൽപ്പാദന ശേഷികൾ എന്നിവയിൽ ശ്രദ്ധ കേന്ദ്രീകരിക്കുന്നു. ഇത് ഇന്ത്യയെ ആഗോളതലത്തിൽ മത്സരശേഷിയുള്ള ഒരു സെമികണ്ടക്ടർ ഹബായി നിലയുറപ്പിക്കുന്നു.

2026 ജൂണിലെ കണക്കനുസരിച്ച് ISM-ന് കീഴിൽ ഏകദേശം 1.64 ലക്ഷം കോടി രൂപ വിലമതിക്കുന്ന 12 പദ്ധതികൾക്ക് അംഗീകാരം ലഭിച്ചിട്ടുണ്ട്. ഇതിൽ ഒരു സെമികണ്ടക്ടർ ഫാബ്, രണ്ട് കോമ്പൗണ്ട് സെമികണ്ടക്ടർ ഫാബുകൾ, ഒമ്പത് പാക്കേജിംഗ് യൂണിറ്റുകൾ എന്നിവ ഉൾപ്പെടുന്നു. ഇത് ഒരു ആഭ്യന്തര സെമികണ്ടക്ടർ നിർമ്മാണ ആവാസവ്യവസ്ഥ സൃഷ്ടിക്കുകയും ഇറക്കുമതി ആശ്രയത്വം കുറയ്ക്കുകയും ചെയ്യുന്നു. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ക്വാണ്ടം ഭാവി രൂപീകരിക്കുന്നു

ഇരുപത്തിയൊന്നാം നൂറ്റാണ്ടിന്റെ നിർണ്ണായക അതിരുകളിലൊന്നായി ക്വാണ്ടം സാങ്കേതികവിദ്യകൾ ഉയർന്നുവരുകയാണ്. ഈ സാങ്കേതികവിദ്യകൾ ക്വാണ്ടം മെക്കാനിക്സ് അല്ലെങ്കിൽ സബ് ആറ്റോമിക് കണികകൾക്ക് ബാധകമാകുന്ന ഭൗതികശാസ്ത്ര നിയമങ്ങളെ അടിസ്ഥാനമാക്കിയുള്ളതാണ്. ഈ മേഖല സാധ്യതകളാൽ നിയന്ത്രിക്കപ്പെടുന്നു. ഇവിടെ വസ്തുക്കൾക്ക് ഒരേ സമയം ഒന്നിലധികം അവസ്ഥകളിൽ നിലനിൽക്കാൻ കഴിയും. ഈ സാങ്കേതികവിദ്യയെ അടിസ്ഥാനമാക്കിയുള്ള ടൂളുകൾക്ക് ശക്തമായ കമ്പ്യൂട്ടിംഗ് ശേഷിയുണ്ട്. കൂടാതെ അവ സാധാരണയേക്കാൾ കൂടുതൽ സെൻസിറ്റീവും സുരക്ഷിതവുമാണ്. അത്യന്തം സുരക്ഷിതമായ ആശയവിനിമയങ്ങളും വിപുലമായ ഡാറ്റാ പ്രോസസ്സിംഗും സാധ്യമാക്കുന്നതോടൊപ്പം ആരോഗ്യ സംരക്ഷണം, ധനകാര്യം, ലോജിസ്റ്റിക്സ്, ക്ലൈമറ്റ് മോഡലിംഗ് തുടങ്ങിയവയെ മാറ്റിമറിക്കാനുള്ള ശേഷി അവയ്ക്കുണ്ട്. ഈ ശേഷികൾ പ്രയോജനപ്പെടുത്താൻ രാജ്യങ്ങൾ മത്സരിക്കുമ്പോൾ ക്വാണ്ടം സാങ്കേതികവിദ്യകൾ സാമ്പത്തിക വളർച്ചയുടെയും സാങ്കേതിക നേതൃത്വത്തിന്റെയും ദേശീയ സുരക്ഷയുടെയും ഒരു നിർണ്ണായക ചാലകശക്തിയായി മാറിക്കൊണ്ടിരിക്കുകയാണ്.

ക്വാണ്ടം സാങ്കേതികവിദ്യയുടെ തന്ത്രപ്രധാനമായ പ്രാധാന്യം തിരിച്ചറിഞ്ഞ് ഗവൺമെന്റ് 2023 ഏപ്രിലിൽ 6,003.65 കോടി രൂപ ചെലവിൽ ദേശീയ ക്വാണ്ടം ദൗത്യത്തിന് അംഗീകാരം നൽകി. ഈ ദൗത്യം നാല് പ്രധാന മേഖലകളിൽ ശ്രദ്ധ കേന്ദ്രീകരിക്കുന്നു - ക്വാണ്ടം കമ്പ്യൂട്ടിംഗ്, ക്വാണ്ടം കമ്മ്യൂണിക്കേഷൻ, ക്വാണ്ടം സെൻസിംഗ് ആൻഡ് മെട്രോളജി, ക്വാണ്ടം മെറ്റീരിയൽസ് ആൻഡ് ഡിവൈസസ്. തദ്ദേശീയ ക്വാണ്ടം സാങ്കേതികവിദ്യകൾ വികസിപ്പിക്കുക, ഗവേഷണ അടിസ്ഥാന സൗകര്യങ്ങൾ ശക്തിപ്പെടുത്തുക, നൈപുണ്യമുള്ള പ്രതിഭകളെ വാർത്തെടുക്കുക, സ്റ്റാർട്ടപ്പുകളെ പിന്തുണയ്ക്കുക, വ്യവസായ-അക്കാദമിക സഹകരണം വളർത്തുക, ലോകത്തിലെ മുൻനിര ക്വാണ്ടം സാങ്കേതിക രാജ്യങ്ങൾക്കിടയിൽ ഇന്ത്യയെ നിലയുറപ്പിക്കുക എന്നിവയാണ് ഈ ദൗത്യം ലക്ഷ്യമിടുന്നത്.

ഇതിന്റെ ഫലങ്ങൾ ഇപ്പോൾത്തന്നെ ദൃശ്യമായിത്തുടങ്ങിയിട്ടുണ്ട്. മുൻനിര സ്ഥാപനങ്ങളിലായി നാല് പ്രത്യേക തീമാറ്റിക് ഹബ്ബുകൾ സ്ഥാപിക്കപ്പെട്ടിട്ടുണ്ട്. ഇത് 43 സ്ഥാപനങ്ങളിലായി 152-ലധികം ഗവേഷകരെ ഉൾപ്പെടുത്തുന്നു. ഈ ദൗത്യം ഒമ്പത് ഡീപ്-ടെക് സംരംഭങ്ങൾ ഉൾപ്പെടെ 17 സ്റ്റാർട്ടപ്പുകളെ പിന്തുണയ്ക്കുകയും ഇന്ത്യയുടെ നവീനാശയ ആവാസവ്യവസ്ഥയെ ശക്തിപ്പെടുത്തുകയും ചെയ്തു. ഇന്ത്യ 1,000 കിലോമീറ്റർ നീളമുള്ള സുരക്ഷിതമായ ക്വാണ്ടം കമ്മ്യൂണിക്കേഷൻ ശൃംഖല വിജയകരമായി പ്രദർശിപ്പിക്കുകയും നിശ്ചയിച്ച സമയപ്പട്ടികയേക്കാൾ ആറ് വർഷം മുൻപേ തന്നെ ഈ നാഴികക്കല്ല് കൈവരിക്കുകയും ചെയ്തു. ഈ കാഴ്ചപ്പാട് കൂടുതൽ മുന്നോട്ട് കൊണ്ടുപോയിക്കൊണ്ട് ഇന്ത്യയിലെ ആദ്യത്തെ ക്വാണ്ടം വാലിയുടെ തറക്കല്ലിടൽ 2026 ഫെബ്രുവരിയിൽ അമരാവതിയിൽ നിർവ്വഹിച്ചു. ഇത് ഭാവിയിലെ ക്വാണ്ടം ഗവേഷണം, നവീനാശയം, തന്ത്രപരമായ ശേഷികൾ എന്നിവയ്ക്കായി സമർപ്പിതമായ ഒരു ആവാസവ്യവസ്ഥ സൃഷ്ടിക്കും. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ഇന്ത്യയുടെ നിർമിത ബുദ്ധി (AI) പരിവർത്തനം

കാര്യക്ഷമമായ ഓട്ടോമേഷൻ, വർധിച്ച ഉൽപ്പാദനക്ഷമത, ആധുനിക വ്യവസായ നവീകരണം എന്നിവയിലൂടെ AI സമ്പദ്‌വ്യവസ്ഥകളെ പരിവർത്തനം ചെയ്തുകൊണ്ടിരിക്കുകയാണ്. ശക്തമായ ഡിജിറ്റൽ ഇൻഫ്രാസ്ട്രക്ചറിന്റെയും വലിയൊരു സാങ്കേതിക തൊഴിൽസേനയുടെയും പിന്തുണയോടെ ഇന്ത്യയും ഒരു പ്രധാന ആഗോള എഐ ആവാസവ്യവസ്ഥയായി ഉയർന്നുവന്നിട്ടുണ്ട്.

ഈ പുരോഗതിക്ക് വേഗം കൂട്ടുന്നതിനായി 10,300 കോടിയിലധികം രൂപയുടെ സാമ്പത്തിക വിഹിതത്തോടെ 2024-ൽ ഗവൺമെന്റ് ഇന്ത്യാ എഐ മിഷന് അംഗീകാരം നൽകി. തദ്ദേശീയമായ എഐ കമ്പ്യൂട്ടിംഗ് ഇൻഫ്രാസ്ട്രക്ചർ നിർമ്മിക്കുന്നതിലും ഹൈ-എൻഡ് ജിപിയു (GPU) സൗകര്യങ്ങളിലേക്കുള്ള പ്രവേശനം വ്യാപിപ്പിക്കുന്നതിലുമാണ് ഈ മിഷൻ ശ്രദ്ധ കേന്ദ്രീകരിക്കുന്നത്. എഐ ഗവേഷണം, സ്റ്റാർട്ടപ്പുകളുടെ വികസനം, യുവാക്കളുടെ നൈപുണ്യ വികസനം, പൊതുജനസേവനങ്ങളിലെ നൂതനാശയം എന്നിവയെയും ഈ മിഷൻ പിന്തുണയ്ക്കുന്നു. സാങ്കേതിക വളർച്ചയ്‌ക്കൊപ്പം സുരക്ഷിതവും എല്ലാവരെയും ഉൾക്കൊള്ളുന്നതുമായ ഉത്തരവാദിത്തമുള്ള എഐ സംവിധാനങ്ങളെയും ഈ മിഷൻ പ്രോത്സാഹിപ്പിക്കുന്നു. നിർമിത ബുദ്ധി രംഗത്ത് ആഗോളതലത്തിൽ വിശ്വസനീയമായ ഒരു കേന്ദ്രമായി ഇന്ത്യയെ മാറ്റാനാണ് ഈ ശ്രമങ്ങൾ ലക്ഷ്യമിടുന്നത്.

ആരംഭിച്ച് രണ്ട് വർഷത്തിനുള്ളിൽ തന്നെ ഇന്ത്യയുടെ എഐ ആവാസവ്യവസ്ഥയെ ശക്തിപ്പെടുത്താൻ ഈ മിഷൻ സഹായിച്ചിട്ടുണ്ട്. 2026 മാർച്ചിലെ കണക്കനുസരിച്ച് ഇന്ത്യയിൽ ഏകദേശം 1.8 ലക്ഷം സ്റ്റാർട്ടപ്പുകളുണ്ട്, പുതിയ സ്റ്റാർട്ടപ്പുകളിൽ 89 ശതമാനത്തോളവും എഐ സൊല്യൂഷനുകൾ ഉപയോഗിക്കുന്നു. നൂതനമായ എഐ ഇൻഫ്രാസ്ട്രക്ചറിലേക്കുള്ള പ്രവേശനം എല്ലാവർക്കും ലഭ്യമാക്കുന്നതിനായി 38,000-ത്തിലധികം GPU-കളുള്ള ഒരു പൊതു കമ്പ്യൂട്ടിംഗ് സൗകര്യം സ്ഥാപിക്കുന്നു. 'എഐ കോശ്' (AI Kosh) പ്ലാറ്റ്‌ഫോം 20 മേഖലകളിലായി 12,115 ഡാറ്റാസെറ്റുകളും 306 എഐ മോഡലുകളും ഹോസ്റ്റ് ചെയ്യുന്നു. ഇത് വലിയ തോതിലുള്ള നവീകരണവും ഗവേഷണവും സാധ്യമാക്കുന്നു. ഈ സംരംഭങ്ങൾ കമ്പ്യൂട്ടിംഗ് പവർ, ഡാറ്റ, എഐ ടൂളുകൾ എന്നിവയിലേക്കുള്ള പ്രവേശനം വ്യാപിപ്പിക്കുകയും എഐ വികസനത്തിന്റെ മുൻനിര കേന്ദ്രമായി ഇന്ത്യയെ മാറ്റാൻ സഹായിക്കുകയും ചെയ്യുന്നു. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ക്ലൗഡ് കമ്പ്യൂട്ടിംഗിലൂടെ ഭാവിയെ മുന്നോട്ട് നയിക്കുന്നു

ഭരണനിർവഹണം, ബിസിനസ്സ്, ധനകാര്യം തുടങ്ങിയ മേഖലകളിൽ ഉടനീളം വിപുലീകരിക്കാവുന്നതും ചെലവ് കുറഞ്ഞതും സുരക്ഷിതവുമായ പ്രവേശനം സാധ്യമാക്കിക്കൊണ്ട് ഇൻ്റർനെറ്റിലൂടെ സ്റ്റോറേജ്, സെർവറുകൾ, സോഫ്റ്റ്‌വെയർ, ഡാറ്റാ പ്രോസസിംഗ് തുടങ്ങിയ കമ്പ്യൂട്ടിംഗ് സേവനങ്ങൾ ക്ലൗഡ് നൽകുന്നു. ഇന്ത്യയുടെ ഡിജിറ്റൽ ആവാസവ്യവസ്ഥ വികസിക്കുന്നതിനനുസരിച്ച് ഡാറ്റാ പരമാധികാരത്തിനും ഡിജിറ്റൽ ഭരണനിർവഹണത്തിനും പൊതുജനസേവന വിതരണത്തിനും ക്ലൗഡ് ഇൻഫ്രാസ്ട്രക്ചർ ഒരു അനിവാര്യമായ ആവശ്യകതയായി മാറിയിരിക്കുന്നു.

ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം (MeitY) ഗവൺമെന്റിന്റെ ദേശീയ ക്ലൗഡ് പ്ലാറ്റ്‌ഫോമായി 2014-ൽ മേഘ്‌രാജ് (MeghRaj) ആരംഭിച്ചതോടെയാണ് ഇന്ത്യയുടെ തദ്ദേശീയ ക്ലൗഡ് ആവാസവ്യവസ്ഥയ്ക്ക് തുടക്കമായത്. കൂടാതെ ഹൈബ്രിഡ് ക്ലൗഡ് ആർക്കിടെക്ചറിലൂടെയും ശക്തമായ സൈബർ സുരക്ഷയിലൂടെയും മേഘ്‌രാജ് 2.0 ഈ ആവാസവ്യവസ്ഥയെ കൂടുതൽ ശക്തിപ്പെടുത്തി. തന്ത്രപ്രധാനമായ ഡാറ്റയുടെ മേൽ നിയന്ത്രണം നിലനിർത്തിക്കൊണ്ടുതന്നെ അത്യാധുനിക ക്ലൗഡ് സേവനങ്ങൾ സുരക്ഷിതമായി ഉപയോഗിക്കാൻ ഇത് ഗവൺമെന്റ് വകുപ്പുകളെ പ്രാപ്തമാക്കി.

2026 ജൂണിലെ കണക്കനുസരിച്ച് മേഘ്‌രാജ് ക്ലൗഡ് പ്ലാറ്റ്‌ഫോം ഉപയോഗിക്കുന്ന ഗവൺമെന്റ് വകുപ്പുകളുടെ എണ്ണം 2015-16-ലെ 342-ൽ നിന്ന് 2,323 വകുപ്പുകളായി വർധിച്ചു, ഇത് ഡിജിലോക്കർ, MyGov, നാഷണൽ സ്കോളർഷിപ്പ് പോർട്ടൽ തുടങ്ങിയ പ്രധാന പ്ലാറ്റ്‌ഫോമുകൾക്ക് കരുത്ത് പകരുന്നു.

ഡിജിറ്റൽ നൂതനാശയത്തിന്റെ അടുത്ത തരംഗത്തിന് കരുത്തേകുന്ന ബ്ലോക്ക്‌ചെയിൻ

ഇടനിലക്കാരില്ലാതെ ഒരു വികേന്ദ്രീകൃത ശൃംഖലയിലുടനീളം ഇടപാടുകൾ രേഖപ്പെടുത്തുന്ന, സുരക്ഷിതവും തിരുത്തലുകൾ വരുത്താൻ സാധിക്കാത്തതുമായ ഒരു ഡിജിറ്റൽ ലെഡ്ജറാണ് ബ്ലോക്ക്‌ചെയിൻ. സുതാര്യത, മാറ്റമില്ലായ്മ, കണ്ടെത്താനുള്ള കഴിവ്, വികേന്ദ്രീകരണം എന്നിവയാണ് ഇതിന്റെ പ്രധാന കരുത്ത്. ഇത് ഭരണനിർവഹണം, ധനകാര്യം, വിതരണ ശൃംഖലകൾ, നീതിന്യായ വ്യവസ്ഥ, ഡിജിറ്റൽ സേവന വിതരണം എന്നിവയിൽ ഇതിനെ സുപ്രധാനമാക്കുന്നു. ഈ സാധ്യത തിരിച്ചറിഞ്ഞ് പൗരകേന്ദ്രീകൃതമായ ഭരണത്തിനും ഡിജിറ്റൽ വിശ്വാസത്തിനുമായി സുരക്ഷിതവും വിപുലീകരിക്കാവുന്നതും പരസ്പരം ബന്ധിപ്പിക്കാൻ സാധിക്കുന്നതുമായ ഒരു ബ്ലോക്ക്‌ചെയിൻ ആവാസവ്യവസ്ഥ സൃഷ്ടിക്കുക എന്ന ലക്ഷ്യത്തോടെ 64.76 കോടി രൂപയുടെ സാമ്പത്തിക വിഹിതവുമായി 2021-ൽ MeitY നാഷണൽ ബ്ലോക്ക്‌ചെയിൻ ഫ്രെയിംവർക്കിന് (NBF) തുടക്കമിട്ടു.

അനുകൂലമായ ഗവൺമെന്റ് നയങ്ങളുടെ പിന്തുണയോടെ വിശ്വാസ്യ ബ്ലോക്ക്‌ചെയിൻ സ്റ്റാക്ക്, NBFLite സാൻഡ്‌ബോക്സ്, പ്രാമാണിക് ആപ്പ് വെരിഫിക്കേഷൻ സിസ്റ്റം, നാഷണൽ ബ്ലോക്ക്‌ചെയിൻ പോർട്ടൽ തുടങ്ങിയ തദ്ദേശീയ പ്ലാറ്റ്‌ഫോമുകളിലൂടെ ഇന്ത്യയുടെ ബ്ലോക്ക്‌ചെയിൻ ആവാസവ്യവസ്ഥ വികസിച്ചു. ഭുവനേശ്വർ, പൂനെ, ഹൈദരാബാദ് എന്നിവിടങ്ങളിലെ എൻ.ഐ.സി (NIC) ഡാറ്റാ സെന്ററുകൾ വഴി ഈ ഫ്രെയിംവർക്ക് ബ്ലോക്ക്‌ചെയിൻ-ആസ്-എ-സർവീസ് (BaaS) പിന്തുണയ്ക്കുന്നു. സുരക്ഷിതമായ രേഖാ പരിശോധന, നീതിന്യായ റെക്കോർഡുകൾ, മരുന്ന് വിതരണ ശൃംഖല ട്രാക്കിംഗ്, വസ്തു മാനേജ്മെന്റ് എന്നിവയിലൂടെ ബ്ലോക്ക്‌ചെയിൻ ആപ്ലിക്കേഷനുകൾ ഇതിനകം തന്നെ ഭരണരംഗത്ത് മാറ്റങ്ങൾ വരുത്തിക്കൊണ്ടിരിക്കുകയാണ്. ഇത് സുതാര്യത ശക്തിപ്പെടുത്തുകയും തട്ടിപ്പുകൾ കുറയ്ക്കുകയും ഡിജിറ്റൽ ഇന്ത്യ, ആത്മനിർഭർ ഭാരത് എന്നീ കാഴ്ചപ്പാടുകളെ പിന്തുണയ്ക്കുകയും ചെയ്യുന്നു.

2025 ഒക്ടോബർ വരെയുള്ള കണക്കനുസരിച്ച് ബ്ലോക്ക്‌ചെയിൻ പ്ലാറ്റ്‌ഫോമുകൾ വഴി 3 കോടിയിലധികം വസ്തുരേഖകൾ പരിശോധിച്ചുറപ്പിച്ചു. ഇത് തിരുത്തലുകൾ വരുത്താനാകാത്ത രേഖകൾ സൃഷ്ടിക്കുന്നതിനും ഭൂമി സംബന്ധമായ തർക്കങ്ങൾ കുറയ്ക്കുന്നതിനും കാരണമായി. ബ്ലോക്ക്‌ചെയിൻ സാങ്കേതികവിദ്യയിലെ ഗവേഷണവും നൂതനാശയവും പ്രോത്സാഹിപ്പിക്കുന്നതിനായി എൻ.ഐ.സി ഒരു സെന്റർ ഓഫ് എക്സലൻസ് സ്ഥാപിച്ചു. റിസർവ് ബാങ്ക് ഓഫ് ഇന്ത്യ ഡിജിറ്റൽ റുപ്പി (e₹) പൈലറ്റ് പ്രോജക്ടുകൾ ആരംഭിച്ചപ്പോൾ ടെലികോം റെഗുലേറ്ററി അതോറിറ്റി ഓഫ് ഇന്ത്യ (TRAI) വ്യാജ സന്ദേശങ്ങൾ തടയുന്നതിനായി ബ്ലോക്ക്‌ചെയിൻ അധിഷ്ഠിത ഡിസ്ട്രിബ്യൂട്ടഡ് ലെഡ്ജർ ടെക്‌നോളജി (DLT) നടപ്പിലാക്കി. നാഷണൽ സെക്യൂരിറ്റീസ് ഡിപ്പോസിറ്ററി ലിമിറ്റഡും (NSDL) സുരക്ഷിതമായ ഓഡിറ്റ് ട്രയലുകൾക്കായി ബ്ലോക്ക്‌ചെയിൻ ഉപയോഗിക്കുന്നുണ്ട്. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ഇന്ത്യയുടെ ഡിജിറ്റൽ സമ്പദ്‌വ്യവസ്ഥയുടെ നട്ടെല്ലായി ഡാറ്റാ സെന്ററുകൾ

ഡിജിറ്റൽ വിവരങ്ങളുടെ സംഭരണം, പ്രോസസ്സിംഗ്, കൈമാറ്റം എന്നിവയ്ക്ക് കരുത്ത് പകരുന്ന സുരക്ഷിതമായ സൗകര്യങ്ങളാണ് ഡാറ്റാ സെന്ററുകൾ. ക്ലൗഡ് സേവനങ്ങൾ, എഐ, ബ്ലോക്ക്‌ചെയിൻ ആപ്ലിക്കേഷനുകൾ, ക്വാണ്ടം കമ്പ്യൂട്ടിംഗ് പോലുള്ള ഭാവി സാങ്കേതികവിദ്യകൾ എന്നിവയ്ക്ക് അവ അടിത്തറയേകുന്നു. വിശ്വസനീയമായ ഡാറ്റാ സെന്റർ ഇൻഫ്രാസ്ട്രക്ചർ ഉയർന്ന ശേഷിയുള്ള കമ്പ്യൂട്ടിംഗും സുരക്ഷിതമായ ഡിജിറ്റൽ സേവനങ്ങളും തത്സമയ ഡാറ്റാ പ്രവേശനവും സാധ്യമാക്കുന്നു. ഇന്ത്യയെ സംബന്ധിച്ചിടത്തോളം ഇത് സാങ്കേതിക സ്വയംപര്യാപ്തത ശക്തിപ്പെടുത്തുകയും ഡിജിറ്റൽ പൊതു ഇൻഫ്രാസ്ട്രക്ചറിനെ പിന്തുണയ്ക്കുകയും നിക്ഷേപങ്ങൾ ആകർഷിക്കുകയും വൈദഗ്ധ്യമുള്ള തൊഴിലവസരങ്ങൾ സൃഷ്ടിക്കുകയും ആഗോള ഡിജിറ്റൽ സമ്പദ്‌വ്യവസ്ഥയിൽ രാജ്യത്തിന്റെ പങ്ക് വർധിപ്പിക്കുകയും ചെയ്യുന്നു. ഇന്ത്യയുടെ ഡാറ്റാ സെന്റർ മേഖല അതിവേഗത്തിലുള്ള വികാസത്തിനാണ് സാക്ഷ്യം വഹിച്ചത്. ഇതിന്റെ ശേഷി 2020-ലെ ഏകദേശം 375 മെഗാവാട്ടിൽ (MW) നിന്ന് 2025 ആകുമ്പോഴേക്കും ഏകദേശം 1,500 മെഗാവാട്ടായി ഉയർന്നു. മുംബൈ, നവി മുംബൈ, ഹൈദരാബാദ്, ബെംഗളൂരു, നോയിഡ, ജാംനഗർ എന്നിവിടങ്ങളിൽ പ്രധാന ഡാറ്റാ സെന്റർ ഹബ്ബുകൾ ഉയർന്നുവന്നിട്ടുണ്ട്. അതേസമയം ആന്ധ്രാപ്രദേശ്, ഗുജറാത്ത്, മഹാരാഷ്ട്ര, ഉത്തർപ്രദേശ് എന്നിവിടങ്ങളിലുടനീളം വൻകിട ഹൈപ്പർസ്കെയിൽ, എഐ അധിഷ്ഠിത ഡാറ്റാ സെന്ററുകൾ വികസിപ്പിച്ചുവരുന്നു. ഇത് ഇന്ത്യയുടെ ഭാവിസജ്ജമായ ഡിജിറ്റൽ ഇൻഫ്രാസ്ട്രക്ചർ ആവാസവ്യവസ്ഥയെ കൂടുതൽ ശക്തിപ്പെടുത്തുന്നു. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ബയോടെക്‌നോളജി: നൂതനാശയത്തിലൂന്നിയുള്ള വളർച്ചയുടെ അടുത്ത ഘട്ടം

സാങ്കേതികവിദ്യാധിഷ്ഠിത വ്യവസായ ആപ്ലിക്കേഷനുകളിൽ നൂതനാശയത്തിന് നേതൃത്വം നൽകുന്ന തന്ത്രപ്രധാനമായ ഒരു സാങ്കേതിക മേഖലയായി ബയോടെക്നോളജി ഉയർന്നുവരുകയാണ്. ജീനോമിക്സ്, പ്രിസിഷൻ തെറാപ്യൂട്ടിക്സ്, സിന്തറ്റിക് ബയോളജി, ഡിജിറ്റൽ ബയോടെക്നോളജി എന്നിവയിലെ പുരോഗതി സമ്പദ്‌വ്യവസ്ഥകളെ പരിവർത്തനം ചെയ്യുകയും ആരോഗ്യ-ഭക്ഷ്യ സുരക്ഷാ സംവിധാനങ്ങളെ ശക്തിപ്പെടുത്തുകയും ചെയ്യുന്നു. ആഗോള സമ്പദ്‌വ്യവസ്ഥകൾ ബയോ-ഇക്കോണമിയിൽ (ജൈവ സമ്പദ്‌വ്യവസ്ഥ) ഊന്നിയുള്ള വളർച്ചയ്ക്കായി കൂടുതൽ നിക്ഷേപം നടത്തുമ്പോൾ ഭാവിയിലെ വ്യവസായ മത്സരക്ഷമതയുടെയും ശാസ്ത്രീയ നൂതനാശയത്തിന്റെയും സാമ്പത്തിക പ്രതിരോധശേഷിയുടെയും ഒരു പ്രധാന സ്തംഭമായി ബയോടെക്നോളജി മാറിക്കൊണ്ടിരിക്കുകയാണ്.

കഴിഞ്ഞ ദശകത്തിൽ ഇന്ത്യാ ഗവൺമെന്റ് മിഷൻ അധിഷ്ഠിത നയങ്ങളിലൂടെയും തന്ത്രപ്രധാനമായ നിക്ഷേപങ്ങളിലൂടെയും ബയോടെക്നോളജി ആവാസവ്യവസ്ഥയെ പിന്തുണച്ചിട്ടുണ്ട്. നൂതനാശയം, സംരംഭകത്വം, ബയോ-മാനുഫാക്ചറിംഗ് എന്നിവയ്ക്ക് വേഗം കൂട്ടുന്നതിനായി ഡിപ്പാർട്ട്‌മെന്റ് ഓഫ് ബയോടെക്‌നോളജിയും (DBT) ബയോടെക്‌നോളജി ഇൻഡസ്ട്രി റിസർച്ച് അസിസ്റ്റൻസ് കൗൺസിലും (BIRAC) ലക്ഷ്യാധിഷ്ഠിത ഇടപെടലുകൾ നടപ്പിലാക്കി. 1,500 കോടി രൂപയുടെ സാമ്പത്തിക വിഹിതത്തോടെ 2017-ൽ അംഗീകാരം നൽകിയ നാഷണൽ ബയോഫാർമ മിഷൻ (NBM), 2023-ൽ ആരംഭിച്ച ബയോE3 നയം, ബയോനെസ്റ്റ് (BioNEST) ഇൻകുബേറ്ററുകൾ, കൂടാതെ ഇന്റൻസിഫൈയിംഗ് ദി ഇംപാക്ട് ഓഫ് ഇൻഡസ്ട്രിയൽ ഇന്നൊവേഷൻ (i4), പ്രൊമോട്ടിംഗ് അക്കാദമിക് റിസർച്ച് കൺവേർഷൻ ടു എന്റർപ്രൈസ് (PACE) തുടങ്ങിയ നൂതനാശയ പദ്ധതികളും ഇതിലെ പ്രധാന സംരംഭങ്ങളിൽ ഉൾപ്പെടുന്നു. തദ്ദേശീയമായ നൂതനാശയവും ആഗോളതലത്തിൽ മത്സരക്ഷമതയുള്ള ബയോടെക്നോളജി ആവാസവ്യവസ്ഥയും ശക്തിപ്പെടുത്തുന്നതിനായി ഗവൺമെന്റ് ട്രാൻസ്ലേഷണൽ റിസർച്ച് ഇൻഫ്രാസ്ട്രക്ചർ, സാങ്കേതികവിദ്യാ കൈമാറ്റ പിന്തുണ, ബയോടെക്നോളജി ഇൻകുബേഷൻ സൗകര്യങ്ങൾ എന്നിവയും വിപുലീകരിച്ചു.

കഴിഞ്ഞ ദശകത്തിൽ ഇന്ത്യയുടെ ബയോടെക്നോളജി മേഖല ഗണ്യമായ വളർച്ചയാണ് രേഖപ്പെടുത്തിയത്. 2021-ലെ നാഷണൽ ബയോടെക് ഡെവലപ്‌മെന്റ് സ്ട്രാറ്റജിയിലെ ലക്ഷ്യം നിശ്ചയിച്ചതിലും രണ്ട് വർഷം മുമ്പേ കൈവരിച്ചുകൊണ്ട് 2023-ൽ ഇത് 150 ബില്യൺ യുഎസ് ഡോളർ എന്ന നാഴികക്കല്ല് മറികടക്കുകയും 2026 ജൂണിലെ കണക്കനുസരിച്ച് 190 ബില്യൺ യുഎസ് ഡോളറിൽ എത്തുകയും ചെയ്തു. നൂതനാശയ ശേഷി ശക്തിപ്പെടുത്തുന്നതിനായി DBT-BIRAC 25 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 94 ബയോഇൻകുബേറ്ററുകൾ സ്ഥാപിക്കുകയും സ്റ്റാർട്ടപ്പുകൾക്കും ഗവേഷണധിഷ്ഠിത സംരംഭങ്ങൾക്കുമായി 50 ലക്ഷം രൂപ മുതൽ 10.5 കോടി രൂപ വരെയുള്ള സാമ്പത്തിക സഹായം നൽകുകയും ചെയ്തിട്ടുണ്ട്.

നൂതന സാങ്കേതിക ആവാസവ്യവസ്ഥകളിൽ തുടർച്ചയായ ഗവൺമെന്റ് നിക്ഷേപങ്ങളിലൂടെയും മിഷൻ-മോഡ് പ്രോഗ്രാമുകളിലൂടെയും ഇന്ത്യ ഭാവി സജ്ജത ശക്തിപ്പെടുത്തുകയാണ്. തന്ത്രപ്രധാനമായ നയപിന്തുണയും വ്യവസായ പങ്കാളിത്തവും തദ്ദേശീയ സാങ്കേതികവിദ്യാ വികസനത്തിനും നൂതനാശയത്തിലൂന്നിയുള്ള വളർച്ചയ്ക്കും കൂടുതൽ വേഗം കൂട്ടുന്നു. ഈ സംരംഭങ്ങൾ ശക്തമായ ഒരു ദേശീയ നൂതനാശയ ആവാസവ്യവസ്ഥ സൃഷ്ടിക്കുകയും അടുത്ത തലമുറ സാങ്കേതികവിദ്യകൾക്കായുള്ള വിശ്വസനീയമായ ഒരു ആഗോള ഹബ്ബായി ഇന്ത്യയെ മാറ്റുകയും ചെയ്യുന്നു. ഗവൺമെന്റിന്റെ നേതൃത്വത്തിൽ, വികസിത ഭാരതം എന്ന കാഴ്ചപ്പാടിന് അനുസൃതമായി ഇന്ത്യ ഒരു ആഗോള സാങ്കേതിക ശക്തിയായി ഉയർന്നുവരുകയാണ്.

ശേഷി വർധിപ്പിക്കൽ, വിദ്യാഭ്യാസം, ഗവേഷണം, നൈപുണ്യം എന്നിവയിൽ ഇന്ത്യയുടെ പുതുയുഗം

ഭാവിയെ രൂപപ്പെടുത്തുന്ന സാങ്കേതികവിദ്യകൾക്ക് അടിസ്ഥാന സൗകര്യങ്ങളും നിക്ഷേപവും മാത്രം പോരാ. അവയ്ക്ക് വൈദഗ്ധ്യമുള്ള ഒരു തൊഴിൽസേനയും ശക്തമായ ഗവേഷണ സ്ഥാപനങ്ങളും നൂതനാശയത്തിന്റെ ഒരു സംസ്കാരവും ആവശ്യമാണ്. ഇത് തിരിച്ചറിഞ്ഞ് മനുഷ്യവിഭവശേഷി കെട്ടിപ്പടുക്കുന്നതിനും ഗവേഷണ ആവാസവ്യവസ്ഥകളെ ശക്തിപ്പെടുത്തുന്നതിനും സാങ്കേതികവിദ്യാധിഷ്ഠിതമായ ഒരു നാളേക്ക് വേണ്ടി അടുത്ത തലമുറയെ സജ്ജമാക്കുന്നതിനുമായി ഇന്ത്യ സമഗ്രമായ ഒരു ശ്രമത്തിന് തുടക്കം കുറിച്ചിട്ടുണ്ട്. ഗവേഷണം, നൈപുണ്യ വികസനം, ഉന്നത വിദ്യാഭ്യാസം, വ്യവസായ പങ്കാളിത്തം എന്നിവയിലെ നിക്ഷേപങ്ങളിലൂടെ, ഉയർന്നുവരുന്ന സാങ്കേതികവിദ്യാ യുഗത്തിൽ മത്സരിക്കുന്നതിന് ആവശ്യമായ അടിത്തറ ഇന്ത്യാ ഗവൺമെന്റ് സൃഷ്ടിക്കുകയാണ്.

ഗവേഷണ, വികസന ആവാസവ്യവസ്ഥയെ ശക്തിപ്പെടുത്തൽ

ഈ ദിശയിലുള്ള ഒരു പ്രധാന ചുവടുവെപ്പായിരുന്നു 2024-ൽ അനുസന്ധാൻ നാഷണൽ റിസർച്ച് ഫൗണ്ടേഷൻ (ANRF) പ്രവർത്തനക്ഷമമാക്കിയത്. ഉയർന്ന സ്വാധീനമുള്ള ഗവേഷണങ്ങൾക്കും നൂതനാശയങ്ങൾക്കും വേഗം കൂട്ടുന്നതിനായി അക്കാദമിക രംഗം, വ്യവസായം, സ്റ്റാർട്ടപ്പുകൾ, ഗവൺമെന്റ് സ്ഥാപനങ്ങൾ എന്നിവ തമ്മിലുള്ള സഹകരണം ANRF പ്രോത്സാഹിപ്പിക്കുന്നു. എഐ, സെമികണ്ടക്ടറുകൾ, നൂതന പദാർത്ഥങ്ങൾ, മറ്റ് അതിവേഗം വളരുന്ന സാങ്കേതികവിദ്യകൾ എന്നിവ ഇതിന്റെ ശ്രദ്ധാകേന്ദ്രങ്ങളിൽ ഉൾപ്പെടുന്നു. മിഷൻ ഫോർ അഡ്വാൻസ്മെന്റ് ഇൻ ഹൈ-ഇംപാക്ട് ഏരിയാസ് (MAHA), പാർട്ണർഷിപ്സ് ഫോർ ആക്സിലറേറ്റഡ് ഇന്നൊവേഷൻ ആൻഡ് റിസർച്ച് (PAIR), എഎൻആർഎഫ് ട്രാൻസ്ലേഷണൽ റിസർച്ച് ആൻഡ് ഇന്നൊവേഷൻ (ATRI) തുടങ്ങിയ പ്രോഗ്രാമുകളിലൂടെ ലബോറട്ടറി ഗവേഷണങ്ങളെ പ്രായോഗിക തലത്തിലേക്ക് മാറ്റാൻ ഈ ഫൗണ്ടേഷൻ സഹായിക്കുന്നു.

യുവ ഗവേഷകർ, പോസ്റ്റ്-ഡോക്ടറൽ സ്കോളർമാർ, വിദേശത്തുള്ള ഇന്ത്യൻ ശാസ്ത്രജ്ഞർ എന്നിവർക്കായി എഎൻആർഎഫ് ഫെലോഷിപ്പുകളും ഗ്രാന്റുകളും അവതരിപ്പിച്ചിട്ടുണ്ട്. 2026 മാർച്ചിലെ കണക്കനുസരിച്ച് വലിയ സ്വാധീനമുള്ള സാങ്കേതിക മേഖലകളിൽ 264.70 കോടി രൂപയുടെ ഗ്രാന്റുകൾ അനുവദിച്ചുകഴിഞ്ഞു. ഡീപ്-ടെക് നൂതനാശയങ്ങളെ കൂടുതൽ ശക്തിപ്പെടുത്തുന്നതിനായി 1 ലക്ഷം കോടി രൂപയുടെ ഫണ്ടോടെ 2025 ജൂലൈയിൽ ഗവൺമെന്റ് റിസർച്ച് ഡെവലപ്‌മെന്റ് ആൻഡ് ഇന്നൊവേഷൻ (RDI) പദ്ധതിക്ക് അംഗീകാരം നൽകി. എഎൻആർഎഫിന് കീഴിൽ പ്രവർത്തിക്കുകയും DST നടപ്പിലാക്കുകയും ചെയ്യുന്ന ഈ പദ്ധതി സ്വകാര്യ മേഖലയിലെ ഗവേഷണങ്ങളെയും നൂതനാശയങ്ങളെയും പിന്തുണയ്ക്കുന്നതിനായി ദീർഘകാലത്തേക്കുള്ളതും കുറഞ്ഞ ചെലവിലുള്ളതുമായ ധനസഹായം നൽകുന്നു. എഐ, നൂതന ഉൽപ്പാദനം, നിർണായക സാങ്കേതികവിദ്യകൾ, ഡീപ്-ടെക് സ്റ്റാർട്ടപ്പുകൾ, തന്ത്രപ്രധാന വ്യവസായങ്ങൾ എന്നിവയാണ് ഇതിന്റെ ശ്രദ്ധാകേന്ദ്രങ്ങൾ.

ശാസ്ത്രീയ ഗവേഷണം, വ്യവസായ നൂതനാശയം, സാമ്പത്തിക വളർച്ച എന്നിവ തമ്മിൽ കൂടുതൽ ശക്തമായ ഒരു ബന്ധം എഎൻആർഎഫും ആർഡിഐയും (RDI) ചേർന്ന് സൃഷ്ടിക്കുന്നു.

ഉയർന്നുവരുന്ന സാങ്കേതികവിദ്യകൾക്കായി ഇന്ത്യയെ നൈപുണ്യമുള്ളതാക്കുന്നു

ഇന്ത്യയുടെ സാങ്കേതികവിദ്യാ ലക്ഷ്യങ്ങൾക്ക് ഉയർന്നുവരുന്ന ഡിജിറ്റൽ കഴിവുകളുള്ള ഒരു തൊഴിൽസേന ആവശ്യമാണ്. ഈ ആവശ്യം പരിഹരിക്കുന്നതിനായി നാസ്കോമുമായി (NASSCOM) പങ്കാളിത്തത്തോടെ MeitY 2018-ൽ ഫ്യൂച്ചർസ്കിൽസ് പ്രൈം പ്രോഗ്രാം ആരംഭിച്ചു. എഐ, ബിഗ് ഡാറ്റാ അനലിറ്റിക്സ്, ഇന്റർനെറ്റ് ഓഫ് തിങ്സ് (IoT), സൈബർ സെക്യൂരിറ്റി, ബ്ലോക്ക്‌ചെയിൻ, ഓഗ്‌മെന്റഡ് ആൻഡ് വെർച്വൽ റിയാലിറ്റി (AR/VR) തുടങ്ങിയ മേഖലകളിലെ നൈപുണ്യ വികസനം, പുനർ-നൈപുണ്യം, നൈപുണ്യ നവീകരണം എന്നിവയിലാണ് ഈ പദ്ധതി ശ്രദ്ധ കേന്ദ്രീകരിക്കുന്നത്. പഠിതാക്കൾക്ക് വ്യവസായ മേഖലയ്ക്ക് അനുയോജ്യമായ കോഴ്സുകൾ ഓൺലൈനായി ലഭ്യമാക്കാനും അംഗീകൃത സർട്ടിഫിക്കറ്റുകൾ നേടാനും ഇതിലൂടെ സാധിക്കും.

ഇന്ത്യയിലെ ഏറ്റവും വലിയ ഡിജിറ്റൽ നൈപുണ്യ സംരംഭങ്ങളിൽ ഒന്നായി ഫ്യൂച്ചർസ്കിൽസ് പ്രൈം ഉയർന്നുവന്നിട്ടുണ്ട്. 2026 മാർച്ചിലെ കണക്കനുസരിച്ച് 27.53 ലക്ഷത്തിലധികം ഉദ്യോഗാർത്ഥികൾ ഈ പ്ലാറ്റ്‌ഫോമിൽ രജിസ്റ്റർ ചെയ്തിട്ടുണ്ട്. കൂടാതെ 17.14 ലക്ഷത്തിലധികം പഠിതാക്കൾ എൻറോൾമെന്റോ പരിശീലനമോ പൂർത്തിയാക്കിയിട്ടുമുണ്ട്. ശ്രദ്ധേയമായ ഒരു കാര്യം പഠിതാക്കളിൽ ഏകദേശം 80 ശതമാനവും ടിയർ-2, ടിയർ-3 നഗരങ്ങളിൽ നിന്നുള്ളവരാണ് എന്നതാണ്. ഇത് പ്രധാന നഗര കേന്ദ്രങ്ങൾക്കപ്പുറത്തേക്ക് അവസരങ്ങൾ വ്യാപിപ്പിക്കാൻ സഹായിക്കുന്നു. വിപുലമായ അടിത്തറയുള്ള ഈ പങ്കാളിത്തം ഇന്ത്യയുടെ ഡിജിറ്റൽ പ്രതിഭകളുടെ ശൃംഖലയെ ശക്തിപ്പെടുത്തുകയും സാങ്കേതിക സമ്പദ്‌വ്യവസ്ഥയിലെ പങ്കാളിത്തം മെച്ചപ്പെടുത്തുകയും ചെയ്യുന്നു.

സാങ്കേതിക പ്രതിഭകളെ വളർത്തിയെടുക്കുന്നതിൽ നാഷണൽ ഇൻസ്റ്റിറ്റ്യൂട്ട് ഓഫ് ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജിയും (NIELIT) നിർണായക പങ്ക് വഹിച്ചിട്ടുണ്ട്. 56 കേന്ദ്രങ്ങൾ, 750 അഫിലിയേറ്റഡ് സ്ഥാപനങ്ങൾ, 9,000-ത്തിലധികം ഫെസിലിറ്റേഷൻ കേന്ദ്രങ്ങൾ എന്നിവയിലൂടെ പ്രവർത്തിക്കുന്ന NIELIT എഐ, സൈബർ സെക്യൂരിറ്റി, ബ്ലോക്ക്‌ചെയിൻ, ഐഒടി, ക്ലൗഡ് കമ്പ്യൂട്ടിംഗ്, ഇലക്ട്രോണിക്സ് സിസ്റ്റം ഡിസൈൻ ആൻഡ് മാനുഫാക്ചറിംഗ് എന്നിവയിൽ പരിശീലനം നൽകുന്നു. 2024 ജൂലൈയിൽ ഇതൊരു കൽപ്പിത സർവകലാശാലയായി മാറുകയും രാജ്യവ്യാപകമായി ഒരു കോടിയിലധികം ഉദ്യോഗാർത്ഥികൾക്കായി പരീക്ഷകൾ നടത്തുകയും ചെയ്തിട്ടുണ്ട്. NIELIT 27 കേന്ദ്രങ്ങളിലായി ഇന്ത്യാ എഐ ഡാറ്റാ ലാബുകൾ സ്ഥാപിക്കുകയും അഭിലാഷ ജില്ലകളിൽ ഡിജിറ്റൽ നൈപുണ്യ പരിപാടികൾ നടപ്പിലാക്കുകയും ചെയ്തിട്ടുണ്ട്. ഈ ശ്രമങ്ങൾ ഭൂമിശാസ്ത്രപരമായി വൈവിധ്യമുള്ളതും ഭാവിസജ്ജവുമായ ഒരു തൊഴിൽസേനയെ സൃഷ്ടിക്കാൻ സഹായിക്കുന്നു.

NIELIT വിപുലീകരണം: അഗർത്തല, ഐസോൾ, അജ്മീർ, ഔറംഗബാദ്, ബാലസോർ, ഭുവനേശ്വർ, ബിക്കാനീർ, ബക്സർ, കോഴിക്കോട്, ചണ്ഡീഗഡ്, ചെന്നൈ, ചിത്രദുർഗ്ഗ, ചുചുയിംലാംഗ്, ചുരാചന്ദ്പൂർ, ദാമൻ, ഡൽഹി, ഈസ്റ്റ് ഡൽഹി, സൗത്ത് വെസ്റ്റ് ഡൽഹി, ദിബ്രുഗഡ്, ദിമാപൂർ, ഗാങ്‌ടോക്ക്, ഗോരഖ്പൂർ, ഗുവാഹത്തി, ഹരിദ്വാർ, ഹൈദരാബാദ്, ഇംഫാൽ, ഇറ്റാനഗർ, ജമ്മു, ജോർഹട്ട്, കാർഗിൽ, കോഹിമ, കൊൽക്കത്ത, കൊക്രജാഹർ, കുരുക്ഷേത്ര, ലേ, ലഖ്‌നൗ, ലങ്‌ലൈ, മാജുലി, മാണ്ഡി, മുസാഫർപൂർ, നോയിഡ, പാസിഘട്ട്, പട്‌ന, പാലി, പിലിഭിത്, റാഞ്ചി, റോപ്പാർ, സേനാപതി, ഷില്ലോങ്, ഷിംല, സിൽചാർ, ശ്രീനഗർ, തേജ്പൂർ, തേജു, തിരുപ്പതി, തുറ എന്നിവിടങ്ങളിലാണ് ഈ കേന്ദ്രങ്ങൾ.

നിർമ്മിത ബുദ്ധി ശേഷി മെച്ചപ്പെടുത്തൽ

എഐ മേഖലയിൽ നേതൃത്വം കെട്ടിപ്പടുക്കുന്നതിനായി ഇന്ത്യ പ്രത്യേക സ്ഥാപനങ്ങളിലും നിക്ഷേപം നടത്തുന്നുണ്ട്. "മെയ്ക്ക് എഐ ഇൻ ഇന്ത്യ, മെയ്ക്ക് എഐ വർക്ക് ഫോർ ഇന്ത്യ" എന്ന കാഴ്ചപ്പാടിന് കീഴിൽ ആകെ 1,490 കോടി രൂപയുടെ വിഹിതത്തോടെ നിർമ്മിത ബുദ്ധിയിൽ നാല് മികവിന്റെ കേന്ദ്രങ്ങൾ ഗവൺമെന്റ് സ്ഥാപിച്ചു. വിദ്യാഭ്യാസം, ആരോഗ്യം, സുസ്ഥിര നഗരങ്ങൾ, കൃഷി എന്നിവയിലാണ് ഈ കേന്ദ്രങ്ങൾ ശ്രദ്ധ കേന്ദ്രീകരിക്കുന്നത്. ഇവയ്ക്ക് യഥാക്രമം ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി മദ്രാസ്, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ബംഗളൂരു, ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി കാൺപൂർ, ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി റോപ്പാർ എന്നിവ നേതൃത്വം നൽകുന്നു.

കേന്ദ്ര നൈപുണ്യ വികസന സംരംഭകത്വ മന്ത്രാലയം 2025 ജൂലൈയിൽ ആരംഭിച്ച 'സ്കില്ലിംഗ് ഫോർ എഐ റെഡിനസ്' (SOAR) പ്രോഗ്രാം ഈ ശ്രമങ്ങൾക്ക് പൂരകമാകുന്നു. 6-ാം ക്ലാസ് മുതൽ 12-ാം ക്ലാസ് വരെയുള്ള സ്കൂൾ വിദ്യാർത്ഥികളെ ലക്ഷ്യമിട്ടുള്ള SOAR പദ്ധതി പ്രത്യേകം തയ്യാറാക്കിയ മൂന്ന് 15 മണിക്കൂർ മൊഡ്യൂളുകൾ ഉൾക്കൊള്ളുന്നതാണ്. കൂടാതെ സ്കിൽ ഇന്ത്യ ഡിജിറ്റൽ ഹബ്ബിൽ ലഭ്യമായ സ്വന്തം വേഗതയിൽ പഠിക്കാനാകുന്ന കോഴ്സുകളിലൂടെ ഇത് എഐ സാക്ഷരത പ്രോത്സാഹിപ്പിക്കുന്നു. ഈ പ്രോഗ്രാം വ്യവസായ മേഖലയ്ക്ക് അനുയോജ്യമായി രൂപകൽപ്പന ചെയ്ത പാഠ്യപദ്ധതികളും നാഷണൽ സ്കിൽസ് ക്വാളിഫിക്കേഷൻസ് ഫ്രെയിംവർക്ക് (NSQF)-ന് അനുസൃതമായ മൈക്രോ ക്രെഡൻഷ്യലുകളും അധ്യാപകർക്കും വിദ്യാർത്ഥികൾക്കുമായി പ്രത്യേകം നീക്കിവെച്ച മൊഡ്യൂളുകളും വാഗ്ദാനം ചെയ്യുന്നു.

2026 ഫെബ്രുവരിയിലെ കണക്കനുസരിച്ച് ”എഐ ടു ബി അവെയർ” എന്നതിന് കീഴിൽ 15,643 സർട്ടിഫിക്കറ്റുകളും “എഐ ടു ആസ്പയർ” എന്നതിന് കീഴിൽ 5,885 സർട്ടിഫിക്കറ്റുകളും “എഐ ടു അക്വയർ” എന്നതിന് കീഴിൽ 4,065 സർട്ടിഫിക്കറ്റുകളും നൽകിയിട്ടുണ്ട്. കൂടാതെ “എഐ ഫോർ എഡ്യൂക്കേറ്റേഴ്സ്” പ്രോഗ്രാമിന് കീഴിൽ 4,178 സർട്ടിഫിക്കറ്റുകളും വിതരണം ചെയ്തു. ഈ പദ്ധതി ഇപ്പോൾ മൈക്രോസോഫ്റ്റ്, നാസ്കോം (NASSCOM), CII, മറ്റ് വ്യവസായ പങ്കാളികൾ എന്നിവരുടെ പിന്തുണയോടെ വികസിപ്പിച്ച 50 എഐ, എഐ-ആപ്ലിക്കേഷൻ കോഴ്സുകൾ വാഗ്ദാനം ചെയ്യുന്നു. ഇത് എഐ നൈപുണ്യങ്ങളിലേക്കുള്ള പ്രവേശനം ജനാധിപത്യവൽക്കരിക്കാൻ സഹായിക്കുന്നു.

ഇന്ത്യയുടെ സെമികണ്ടക്ടർ പ്രതിഭാ ശൃംഖല കെട്ടിപ്പടുക്കൽ

ആധുനിക സാങ്കേതികവിദ്യയുടെ കേന്ദ്രബിന്ദുവാണ് സെമികണ്ടക്ടറുകൾ. ഇത് പ്രതിഭകളെ വികസിപ്പിച്ചെടുക്കുന്നതിനെ ഒരു ദേശീയ മുൻഗണനയാക്കി മാറ്റുന്നു. ഈ ആവശ്യകത പരിഹരിക്കുന്നതിനായി അഞ്ച് വർഷത്തെ കാലയളവിലേക്ക് 250  കോടി രൂപ ചിലവ് കണക്കാക്കിക്കൊണ്ട് 2022-ൽ കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം ചിപ്സ് ടു സ്റ്റാർട്ട്-അപ്പ് പദ്ധതി ആരംഭിച്ചു.

സെമികണ്ടക്ടർ, ചിപ്പ് രൂപകൽപ്പന മേഖലകളിൽ ബിരുദ, ബിരുദാനന്തര, ഗവേഷണ തലങ്ങളിലായി വ്യവസായ ലോകത്തിന് അനുയോജ്യരായ 80,000ത്തിലധികം പ്രൊഫഷണലുകളെ വളർത്തിയെടുക്കുകയാണ് ഈ പദ്ധതി ലക്ഷ്യമിടുന്നത്.

ഇതിനുപുറമേ നവസംരംഭങ്ങളുടെ വളർച്ച, പേറ്റന്റ് നിർമ്മാണം, സാങ്കേതികവിദ്യാ കൈമാറ്റം, വെരി ലാർജ്-സ്കെയിൽ ഇന്റഗ്രേഷൻ, ആപ്ലിക്കേഷൻ-സ്പെസിഫിക് ഇന്റഗ്രേറ്റഡ് സർക്യൂട്ട്സ്, സിസ്റ്റം-ഓൺ-ചിപ്പ് രൂപകൽപ്പന, എംബഡഡ് സിസ്റ്റംസ് എന്നിവയിലെ വിപുലമായ ഗവേഷണങ്ങൾക്കും ഇത് പിന്തുണ നൽകുന്നു. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ഈ പദ്ധതി ഇതിനകം തന്നെ ശ്രദ്ധേയമായ ഫലങ്ങൾ കൈവരിച്ചിട്ടുണ്ട്. 300 വിദ്യാഭ്യാസ സ്ഥാപനങ്ങളും തൊണ്ണൂറ്റഞ്ചു നവസംരംഭങ്ങളും ഉൾപ്പെടെ 400 സ്ഥാപനങ്ങളിലായി ഏകദേശം ഒരു ലക്ഷത്തോളം വ്യക്തികൾ പങ്കിട്ട ദേശീയ ഇലക്ട്രോണിക് ഡിസൈൻ ഓട്ടോമേഷൻ അടിസ്ഥാന സൗകര്യങ്ങൾ പ്രയോജനപ്പെടുത്തിയിട്ടുണ്ട്. വ്യവസായ പ്രമുഖരുടെ നേതൃത്വത്തിൽ നടന്ന 265ലധികം പരിശീലന പരിപാടികൾ ചിപ്പ് രൂപകൽപ്പന ചെയ്യാനുള്ള കഴിവുകളെ കൂടുതൽ ശക്തമാക്കിയിട്ടുണ്ട്. മൊഹാലിയിലെ സെമികണ്ടക്ടർ ലബോറട്ടറിയിലുള്ള ചിപ്പ്ഇൻ സെന്റർ ആറ് പങ്കിട്ട വേഫർ റണ്ണുകൾ നടത്തുകയും ഇതുവഴി 46 സ്ഥാപനങ്ങളിൽ നിന്നായി 122 ചിപ്പ് രൂപകൽപ്പനകൾ സമർപ്പിക്കാൻ അവസരമൊരുക്കുകയും ചെയ്തു. പങ്കെടുത്ത സ്ഥാപനങ്ങൾ 75ലധികം പേറ്റന്റുകൾ ഫയൽ ചെയ്തിട്ടുണ്ട്. കൂടാതെ 500ലധികം ഐപി കോറുകളും എഎസ്ഐസികളും എസ്ഒസി രൂപകൽപ്പനകളും നിലവിൽ വികസന ഘട്ടത്തിലാണ്.

ഈ ശ്രമങ്ങൾ ശക്തമായ ഒരു സെമികണ്ടക്ടർ പ്രതിഭകളുടെ ആവാസവ്യവസ്ഥ സൃഷ്ടിക്കുകയും ചിപ്പ് രൂപകൽപ്പനയിലും ഉൽപ്പാദനത്തിലും ഒരു ആഗോള കേന്ദ്രമായി മാറാനുള്ള ഇന്ത്യയുടെ ആഗ്രഹത്തിന് പിന്തുണ നൽകുകയും ചെയ്യുന്നു.

ഇന്ത്യയുടെ വളർന്നുവരുന്ന സാങ്കേതിക അഭിലാഷങ്ങൾ ഒരു ലളിതമായ അടിത്തറയിലാണ് നിലകൊള്ളുന്നത്, അതായത് ജനങ്ങൾ. ഗവേഷണം, നൂതനാശയം, വിദ്യാഭ്യാസം, ഡിജിറ്റൽ വൈദഗ്ധ്യം എന്നിവയിലെ നിരന്തര നിക്ഷേപങ്ങളിലൂടെ അടുത്ത സാങ്കേതിക വിപ്ലവത്തിന് ആവശ്യമായ മനുഷ്യവിഭവശേഷി രാജ്യം കെട്ടിപ്പടുക്കുകയാണ്. നിർമ്മിത ബുദ്ധിയും സെമികണ്ടക്ടറുകളും മുതൽ ക്വാണ്ടം സാങ്കേതികവിദ്യകളും വിപുലമായ ഉൽപ്പാദന മേഖലകളും വരെ ഈ സംരംഭങ്ങൾ ഗവേഷകർ, സംരംഭകർ, എഞ്ചിനീയർമാർ, നൂതനാശയ ചിന്തകർ എന്നിവരുടെ ഒരു വലിയ ശൃംഖല സൃഷ്ടിക്കുന്നു. ഈ കഴിവുകൾ വികസിച്ചുകൊണ്ടിരിക്കുന്നതിലൂടെ ഇന്ത്യ അതിന്റെ തൊഴിൽ ശക്തിയെ ഭാവിസജ്ജമാക്കുക മാത്രമല്ല അറിവ്, നൂതനാശയം, സാങ്കേതിക നേതൃത്വം എന്നിവയുടെ ഒരു ആഗോള കേന്ദ്രമായി സ്വയം മാറുകയും ചെയ്യുന്നു.

ഇന്ത്യയുടെ വളരുന്ന ആഗോള സാങ്കേതിക വിശ്വാസ്യത

ഇന്ത്യയുടെ വളരുന്ന ആഗോള സാങ്കേതിക വിശ്വാസ്യത അതിന്റെ വിശ്വസനീയമായ ഡിജിറ്റൽ അടിസ്ഥാന സൗകര്യങ്ങളിലും വൻതോതിലുള്ള സാങ്കേതികവിദ്യാ വിന്യാസത്തിലും വിപുലീകരിക്കുന്ന അന്താരാഷ്ട്ര പങ്കാളിത്തങ്ങളിലും പ്രതിഫലിക്കുന്നു. എല്ലാവരെയും ഉൾക്കൊള്ളുന്നതും സുരക്ഷിതവും കുറഞ്ഞ ചെലവിലുള്ളതുമായ സാങ്കേതിക പരിഹാരങ്ങൾ എങ്ങനെ വലിയൊരു ജനസംഖ്യാടിസ്ഥാനത്തിൽ വിജയകരമായി നടപ്പിലാക്കാമെന്ന് രാജ്യം തെളിയിച്ചിട്ടുണ്ട്.

ശക്തമായ നയപിന്തുണയിലൂടെയും നൂതനാശയത്തിലധിഷ്ഠിതമായ വളർച്ചയിലൂടെയും അടുത്ത തലമുറ സാങ്കേതികവിദ്യകളുടെ വികസനത്തിൽ വിശ്വസനീയമായ ഒരു ആഗോള പങ്കാളിയായി ഇന്ത്യ കൂടുതൽ ഉയർന്നുവരികയാണ്.

ആഗോള നൂതനാശയ സൂചികയിലെ കുതിപ്പ്

2015-ലെ 81-ാം സ്ഥാനത്തുനിന്ന് 2025-ലെ ആഗോള നൂതനാശയ സൂചികയിൽ ഇന്ത്യ 38-ാം സ്ഥാനത്തേക്ക് ഉയർന്നു. ഒരു ആഗോള നൂതനാശയ കേന്ദ്രമെന്ന നിലയിലുള്ള ഇന്ത്യയുടെ ദ്രുതഗതിയിലുള്ള വളർച്ചയെയാണ് ഇത് പ്രതിഫലിപ്പിക്കുന്നത്. സ്റ്റാർട്ട്-അപ്പ് ഇന്ത്യ, ഡിജിറ്റൽ ഇന്ത്യ, അടൽ ഇന്നൊവേഷൻ മിഷൻ തുടങ്ങിയ സംരംഭങ്ങൾ സംരംഭകത്വം, ഡിജിറ്റൽ അടിസ്ഥാന സൗകര്യങ്ങൾ, ഗവേഷണം, സാങ്കേതിക വികസനം എന്നിവയ്ക്ക് വലിയ ഉത്തേജനം നൽകി. ശക്തമായ ഗവൺമെന്റ് പിന്തുണ, നവസംരംഭങ്ങളുടെ ആവാസവ്യവസ്ഥ, ബൗദ്ധിക സ്വത്തവകാശ ചട്ടക്കൂടുകൾ, വ്യവസായ-വിദ്യാഭ്യാസ മേഖലകൾ തമ്മിലുള്ള സഹകരണം എന്നിവ ഇന്ത്യയുടെ നൂതനാശയ ശേഷിയെയും ആഗോള മത്സരശേഷിയെയും കൂടുതൽ ശക്തിപ്പെടുത്തി.

നെറ്റ്‌വർക്ക് റെഡിനസ് സൂചിക

നെറ്റ്‌വർക്ക് റെഡിനസ് സൂചിക പോർട്ടുലൻസ് ഇൻസ്റ്റിറ്റ്യൂട്ടാണ് പ്രസിദ്ധീകരിക്കുന്നത്. സാമ്പത്തിക വളർച്ച, ഭരണനിർവഹണം, നൂതനാശയം എന്നിവയ്ക്കായി വിവിധ സമ്പദ്‌വ്യവസ്ഥകൾ വിവര-വിനിമയ സാങ്കേതികവിദ്യ എങ്ങനെ ഉപയോഗിക്കുന്നുവെന്ന് ഈ റിപ്പോർട്ട് വിലയിരുത്തുന്നു. കഴിഞ്ഞ ദശകത്തിൽ ഈ സൂചികയിൽ ഇന്ത്യയ്ക്കുണ്ടായ ക്രമാനുഗതമായ വളർച്ച ഡിജിറ്റൽ അടിസ്ഥാന സൗകര്യങ്ങൾ, ടെലികോം കണക്റ്റിവിറ്റി, സാങ്കേതിക സന്നദ്ധത എന്നിവയിലുണ്ടായ വലിയ പുരോഗതിയെ പ്രതിഫലിപ്പിക്കുന്നു. ഡിജിറ്റൽ ഇന്ത്യ, ഭാരത്‌നെറ്റ്, സ്റ്റാർട്ടപ്പ് ഇന്ത്യ, ടെലികോം പരിഷ്കാരങ്ങൾ, ഭാരത് സിക്സ്-ജി വിഷൻ തുടങ്ങിയ സംരംഭങ്ങൾ ഡിജിറ്റൽ ലഭ്യത, നൂതനാശയം, സുഗമമായ ബിസിനസ്സ് അന്തരീക്ഷം എന്നിവയെ ശക്തമാക്കി. ഈ സംഭവവികാസങ്ങൾ ഇന്ത്യയെ അതിവേഗം വളരുന്ന ഒരു ആഗോള ഡിജിറ്റൽ സമ്പദ്‌വ്യവസ്ഥയായും ഭാവി സാങ്കേതികവിദ്യകളിൽ ഉയർന്നുവരുന്ന ഒരു മുൻനിര ശക്തിയായും നിലനിർത്തിയിരിക്കുന്നു.

ആഗോള ശേഷി കേന്ദ്രങ്ങൾ

സോഫ്റ്റ്‌വെയർ വികസനം, നിർമ്മിത ബുദ്ധി, ഡാറ്റാ അനലിറ്റിക്സ്, സൈബർ സുരക്ഷ, ധനകാര്യം, ഗവേഷണം, ഡിജിറ്റൽ പ്രവർത്തനങ്ങൾ എന്നിവ കൈകാര്യം ചെയ്യുന്നതിനായി ബഹുരാഷ്ട്ര കമ്പനികൾ ഇന്ത്യ പോലുള്ള രാജ്യങ്ങളിൽ സ്ഥാപിക്കുന്ന പ്രത്യേക കേന്ദ്രങ്ങളാണ് ആഗോള ശേഷി കേന്ദ്രങ്ങൾ.

കാലക്രമേണ ഇന്ത്യയിലെ ഈ കേന്ദ്രങ്ങൾ കേവലം ബാക്ക്-ഓഫീസ് പിന്തുണാ യൂണിറ്റുകളിൽ നിന്ന് ആഗോള സംരംഭങ്ങൾക്കായുള്ള തന്ത്രപ്രധാനമായ നൂതനാശയത്തിന്റെയും മൂല്യവർദ്ധനവിന്റെയും കേന്ദ്രങ്ങളായി പരിണമിച്ചു. ഇന്ത്യയിൽ ഇപ്പോൾ 3728 യൂണിറ്റുകളിലായി 2100ലധികം ആഗോള ശേഷി കേന്ദ്രങ്ങളുണ്ട്. ഇവയിൽ ഏകദേശം 23 ലക്ഷത്തിലധികം പ്രൊഫഷണലുകൾ ജോലി ചെയ്യുന്നു. 2021-ന് ശേഷം സ്ഥാപിതമായ ഇത്തരം കേന്ദ്രങ്ങളിൽ പകുതിയോളം തുടക്കം മുതൽക്കേ നിർമ്മിത ബുദ്ധിയ്ക്ക് മുൻഗണന നൽകുന്നവയാണ്. വലിയൊരു പ്രതിഭകളുടെ കൂട്ടം, മികച്ച നൈപുണ്യ കേന്ദ്രങ്ങൾ, സർവ്വകലാശാലകളുമായും നവസംരംഭങ്ങളുമായുമുള്ള സഹകരണം എന്നിവ ഈ വളർച്ചയ്ക്ക് പിന്തുണ നൽകുന്നു. സേവന വിതരണ കേന്ദ്രങ്ങളിൽ നിന്നും സംരംഭങ്ങളുടെ നാഡീകേന്ദ്രങ്ങളായുള്ള ഈ മാറ്റം ഇന്ത്യയുടെ വൈദഗ്ധ്യമുള്ള തൊഴിൽ ശക്തിയിലും നൂതനാശയ ആവാസവ്യവസ്ഥയിലും ഡിജിറ്റൽ ശേഷിയിലുമുള്ള ആഗോള വിശ്വാസത്തെയാണ് പ്രതിഫലിപ്പിക്കുന്നത്. ഇത് ഇന്ത്യയെ അത്യാധുനിക സാങ്കേതികവിദ്യകളുടെയും ഭാവിയുടെ സാമ്പത്തിക വളർച്ചയുടെയും ഒരു പ്രധാന ചാലകശക്തിയായി അടയാളപ്പെടുത്തുകയും ചെയ്യുന്നു. കൂടുതൽ വായിക്കാൻ ഇവിടെ ക്ലിക്ക് ചെയ്യുക

ഭാരത് 6G സഖ്യം (B6GA)

ടെലികോം സേവന ദാതാക്കൾ, വിദ്യാഭ്യാസ സ്ഥാപനങ്ങൾ, ഗവേഷണ സ്ഥാപനങ്ങൾ, മാനദണ്ഡ നിർണ്ണയ സംഘടനകൾ എന്നിവരെ ഒന്നിപ്പിക്കുന്ന, വ്യവസായ പ്രമുഖർ നയിക്കുന്നതും ഗവൺമെന്റ് സൗകര്യമൊരുക്കുന്നതുമായ ഒരു സംരംഭമാണ് 2023-ൽ രൂപീകരിച്ച ഭാരത് 6G സഖ്യം. മൾട്ടി-ചിപ്പ് മോഡ്യൂളുകൾ, സിസ്റ്റം-ഓൺ-ചിപ്പ്, വിപുലമായ ഇന്റർനെറ്റ് ഓഫ് തിങ്സ് ആപ്ലിക്കേഷനുകൾ എന്നിവയിൽ ശ്രദ്ധ കേന്ദ്രീകരിച്ച്, സ്വയംപര്യാപ്തവും ആഗോളതലത്തിൽ മത്സരശേഷിയുള്ളതുമായ ഒരു നൂതന ആശയവിനിമയ ആവാസവ്യവസ്ഥ കെട്ടിപ്പടുക്കുന്നതിനായി ഇത് തദ്ദേശീയ 6G ഗവേഷണ-വികസന പ്രവർത്തനങ്ങൾക്ക് നേതൃത്വം നൽകുന്നു. പൊതു-സ്വകാര്യ പങ്കാളികൾക്കായി ഒരു സഹകരണ വേദി ഭാരത് 6G സഖ്യം ഒരുക്കുന്നു. തരംഗദൈർഘ്യം, സാങ്കേതികവിദ്യ, പ്രായോഗിക ഉപയോഗങ്ങൾ, ഹരിത-സുസ്ഥിരത, ഉപയോഗസാധ്യതകൾ എന്നിവ ഉൾക്കൊള്ളുന്ന ഏഴ് കർമ്മ സമിതികൾക്ക് ഇത് രൂപം നൽകിയിട്ടുണ്ട്. കൂടുതൽ വായിക്കാൻ ഇവിടെ ക്ലിക്ക് ചെയ്യുക.

സെമികോൺ 2025

2025-ലെ സെമികോൺ ഇന്ത്യ വിശ്വസനീയമായ ഒരു ആഗോള സെമികണ്ടക്ടർ കേന്ദ്രമെന്ന നിലയിലുള്ള ഇന്ത്യയുടെ വളർച്ചയെ പ്രദർശിപ്പിച്ചു. ഈ പരിപാടി 48 രാജ്യങ്ങളിൽ നിന്നും പ്രദേശങ്ങളിൽ നിന്നുമുള്ള 350-ലധികം പ്രദർശന കമ്പനികളെ ഒന്നിപ്പിച്ചു. സെമികണ്ടക്ടർ രൂപകൽപ്പന, ഉൽപ്പാദനം, പാക്കേജിംഗ്, നിർമ്മാണം എന്നിവയിലുടനീളം നിക്ഷേപം, തന്ത്രപരമായ പങ്കാളിത്തം, ഗവേഷണ സഹകരണം, തൊഴിൽ ശക്തി വികസനം എന്നിവയ്ക്ക് ഈ സമ്മേളനം സൗകര്യമൊരുക്കി. 13 ധാരണാപത്രങ്ങളിൽ ഒപ്പുവെച്ചതും പ്രധാന ആഗോള സെമികണ്ടക്ടർ കമ്പനികളുടെ ചീഫ് എക്സിക്യൂട്ടീവ് ഓഫീസർമാരുടെ പങ്കാളിത്തവും ഇന്ത്യയുടെ നയപരമായ ചട്ടക്കൂടിലും ദീർഘകാല കാഴ്ചപ്പാടിലുമുള്ള വർധിച്ചുവരുന്ന അന്താരാഷ്ട്ര വിശ്വാസത്തെ എടുത്തുകാണിച്ചു. ആഗോള സെമികണ്ടക്ടർ വിതരണ ശൃംഖലയിൽ വിശ്വസനീയമായ ഒരു പങ്കാളിയെന്ന നിലയിലുള്ള ഇന്ത്യയുടെ വിശ്വാസ്യതയെ ഈ പരിപാടി ഉറപ്പിച്ചുനിർത്തി.

എ.ഐ ഇംപാക്ട് ഉച്ചകോടി 2026

2026-ലെ ഇന്ത്യ എ.ഐ ഇംപാക്ട് ഉച്ചകോടി ഉത്തരവാദിത്തമുള്ളതും എല്ലാവരെയും ഉൾക്കൊള്ളുന്നതുമായ നിർമ്മിത ബുദ്ധിയിലെ ഒരു ആഗോള നേതാവെന്ന നിലയിൽ ഇന്ത്യയുടെ വിശ്വാസ്യതയെ ഗണ്യമായി വർധിപ്പിച്ചു. ഈ ഉച്ചകോടി നൂറിലധികം രാജ്യങ്ങളിൽ നിന്നുള്ള പ്രതിനിധി സംഘങ്ങളെയും 20 അന്താരാഷ്ട്ര സംഘടനകളെയും ഒന്നിപ്പിച്ചു. കൂടാതെ നേരിട്ടും അല്ലാതെയും ഏകദേശം 15 ലക്ഷത്തോളം പങ്കാളികളെ ആകർഷിക്കുകയും ചെയ്തു. ഇന്ത്യയുടെ വിശ്വസനീയവും വികസനോന്മുഖവുമായ നിർമ്മിത ബുദ്ധി കാഴ്ചപ്പാടിന് വിപുലമായ അന്താരാഷ്ട്ര പിന്തുണ പ്രതിഫലിപ്പിച്ചുകൊണ്ട് 92 രാജ്യങ്ങളും സംഘടനകളും ഇന്ത്യ എ.ഐ ഇംപാക്ട് ഉച്ചകോടി പ്രഖ്യാപനം അംഗീകരിച്ചത് ഒരു ചരിത്ര നേട്ടമായിരുന്നു. ഈ പരിപാടി നിർമ്മിത ബുദ്ധിയുമായി ബന്ധപ്പെട്ട 200 ബില്യൺ യുഎസ് ഡോളറിലധികം നിക്ഷേപ വാഗ്ദാനങ്ങൾക്ക് വഴിയൊരുക്കുകയും ഇന്ത്യയുടെ വളർന്നുവരുന്ന പരമാധികാര നിർമ്മിത ബുദ്ധി അടിസ്ഥാന സൗകര്യങ്ങൾ പ്രദർശിപ്പിക്കുകയും ചെയ്തു. ഈ ഫലങ്ങൾ വിശ്വസനീയമായ ഒരു ആഗോള സംഘാടകൻ, നൂതനാശയ പങ്കാളി, ഒപ്പം നിർമ്മിത ബുദ്ധി ഗവേഷണം, അടിസ്ഥാന സൗകര്യങ്ങൾ, ഡിജിറ്റൽ പൊതു സ്വത്തുക്കൾ എന്നിവയുടെ ഉയർന്നുവരുന്ന കേന്ദ്രം എന്ന നിലയിലുള്ള ഇന്ത്യയുടെ സ്ഥാനത്തെ കൂടുതൽ ശക്തിപ്പെടുത്തി.

ഡിജിറ്റൽ പൊതു അടിസ്ഥാന സൗകര്യങ്ങളിലെ (DPI) ആഗോള നേതൃത്വവും ഇന്ത്യ സ്റ്റാക്ക് നയതന്ത്രവും

ഗവൺമെന്റുകൾക്ക് സേവനങ്ങൾ കാര്യക്ഷമമായും സുരക്ഷിതമായും വൻതോതിലും എത്തിക്കാൻ സഹായിക്കുന്ന ഡിജിറ്റൽ സംവിധാനങ്ങളെയാണ് ഡിജിറ്റൽ പൊതു അടിസ്ഥാന സൗകര്യങ്ങളെന്ന് സൂചിപ്പിക്കുന്നത്. ഇന്ത്യയുടെ ഇത്തരം ഡിജിറ്റൽ പൊതു അടിസ്ഥാന സൗകര്യ വ്യൂഹം ഇന്ത്യ സ്റ്റാക്ക് എന്ന പേരിൽ അറിയപ്പെടുന്നു. 2014-ന് ശേഷം ആധാർ, UPI, ഡിജിലോക്കർ, CoWIN, UMANG, GeM തുടങ്ങിയ പ്ലാറ്റ്‌ഫോമുകളിലൂടെ ഇത് വലിയ മുന്നേറ്റം കൈവരിച്ചു.

ഡിജിറ്റൽ തിരിച്ചറിയൽ, തൽക്ഷണ പേയ്‌മെന്റുകൾ, ഓൺലൈൻ രേഖകൾ, ആരോഗ്യ സംരക്ഷണം, ഭരണനിർവഹണ സേവനങ്ങൾ എന്നിവയിലൂടെ ഈ പ്ലാറ്റ്‌ഫോമുകൾ സേവന വിതരണത്തിൽ വലിയ മാറ്റം വരുത്തി. ഡിജിറ്റൽ പൊതു അടിസ്ഥാന സൗകര്യങ്ങളിലെ സഹകരണത്തിനായി ഇന്ത്യ 23 രാജ്യങ്ങളുമായി കരാറുകളിൽ ഒപ്പുവെച്ചിട്ടുണ്ട്. സിംഗപ്പൂർ, യുണൈറ്റഡ് അറബ് എമിറേറ്റ്സ്, ഫ്രാൻസ്, നേപ്പാൾ, ശ്രീലങ്ക തുടങ്ങിയ രാജ്യങ്ങളിൽ യുപിഐ നിലവിൽ പ്രവർത്തനക്ഷമമാണ്. ഇത് ഡിജിറ്റൽ ഭരണത്തിലും ഫിൻടെക് നൂതനാശയത്തിലും വിശ്വസനീയമായ ഒരു ആഗോള നേതാവെന്ന നിലയിലുള്ള ഇന്ത്യയുടെ ഖ്യാതി ശക്തമാക്കി. കൂടുതൽ വായിക്കാൻ ഇവിടെ ക്ലിക്ക് ചെയ്യുക.

നൂതനാശയം, എല്ലാവരെയും ഉൾച്ചേർക്കൽ, സ്വയംപര്യാപ്തത എന്നിവയാൽ നയിക്കപ്പെടുന്ന ഒരു സാങ്കേതിക ആവാസവ്യവസ്ഥയാണ് ഇന്ത്യ കെട്ടിപ്പടുക്കുന്നത്. വർധിച്ചുവരുന്ന നിക്ഷേപങ്ങൾ, ശക്തമായ ഡിജിറ്റൽ അടിസ്ഥാന സൗകര്യങ്ങൾ, ലക്ഷ്യബോധത്തോടെയുള്ള പരിഷ്കാരങ്ങൾ എന്നിവ സാങ്കേതികവിദ്യയുടെ കേവലമൊരു ഉപഭോക്താവ് എന്ന നിലയിൽ നിന്ന് ഇന്ത്യയെ ഒരു ആഗോള സാങ്കേതിക സ്രഷ്ടാവായി മാറാൻ പ്രാപ്തമാക്കുന്നു. ഈ ശ്രമങ്ങൾ വികസിത ഭാരതത്തിലേക്കുള്ള ഇന്ത്യയുടെ പ്രയാണത്തിന് വേഗത കൂട്ടുകയും ലോകമെമ്പാടുമുള്ള വളർന്നുവരുന്ന സാങ്കേതികവിദ്യകളുടെ ഭാവി രൂപപ്പെടുത്തുന്നതിൽ രാജ്യത്തിന്റെ പങ്ക് കൂടുതൽ ശക്തമാക്കുകയും ചെയ്യുന്നു.

ഇന്ത്യയുടെ കാലം, ഇന്ത്യയുടെ നിർമ്മാണം

പന്ത്രണ്ട് വർഷം മുമ്പ് ഇന്ത്യ ഒരു വലിയ ഡിജിറ്റൽ വിപണി മാത്രമായിരുന്നു. ഇന്ന് രാജ്യം ഒരു ആഗോള ഡിജിറ്റൽ ശക്തിയായി ഉയർന്നുവരുകയാണ്. തന്ത്രപ്രധാന സാങ്കേതിക മേഖലകളിലുടനീളം നടത്തിയ നിരന്തരമായ പൊതു നിക്ഷേപം, ദീർഘകാല നയപരമായ കാഴ്ചപ്പാട്, ലക്ഷ്യബോധത്തോടെയുള്ള പ്രവർത്തനങ്ങൾ എന്നിവയാണ് ഈ പരിവർത്തനത്തിന് കാരണമായത്.

ഈ പ്രയാണം പരസ്പരം ബന്ധപ്പെട്ടിരിക്കുന്ന മൂന്ന് പ്രധാന സ്തംഭങ്ങളിലാണ് കെട്ടിപ്പടുത്തിരിക്കുന്നത്. ദേശീയ ശേഷി വികസിപ്പിക്കുക, സാങ്കേതിക വിദ്യ ശക്തിപ്പെടുത്തുക, ആഗോള വിശ്വാസ്യത വളർത്തുക എന്നിവയാണവ. ഡിജിറ്റൽ അടിസ്ഥാന സൗകര്യങ്ങൾ എല്ലാവരെയും ഉൾക്കൊള്ളുന്ന വളർച്ചയ്ക്ക് അടിത്തറയിട്ടു. കുറഞ്ഞ ചെലവിലുള്ള കണക്റ്റിവിറ്റി, ഡിജിറ്റൽ പൊതു അടിസ്ഥാന സൗകര്യങ്ങൾ, ക്ലൗഡ് സംവിധാനങ്ങൾ, ഡാറ്റാ നെറ്റ്‌വർക്കുകൾ എന്നിവ പൗരന്മാരെയും ബിസിനസ്സുകളെയും സ്ഥാപനങ്ങളെയും അഭൂതപൂർവ്വമായ തോതിൽ പരസ്പരം ബന്ധിപ്പിച്ചു. നഗര-ഗ്രാമ വ്യത്യാസമില്ലാതെ ഇന്ത്യയിലുടനീളം ഡിജിറ്റൽ സേവനങ്ങൾ, നൂതനാശയം, സംരംഭകത്വം എന്നിവ അതിവേഗം വ്യാപിപ്പിക്കാൻ ഇത് ഇന്ത്യയെ പ്രാപ്തമാക്കി.

ഉയർന്നുവരുന്ന സാങ്കേതികവിദ്യകളിൽ പ്രത്യേക ശ്രദ്ധ കേന്ദ്രീകരിച്ചുള്ള സംരംഭങ്ങളിലൂടെ ഗവൺമെന്റ് തദ്ദേശീയ സാങ്കേതിക ശേഷി ശക്തമാക്കി. ഗവേഷണ അടിസ്ഥാന സൗകര്യങ്ങൾ, മികച്ച നൈപുണ്യ കേന്ദ്രങ്ങൾ, നവസംരംഭങ്ങൾ, വൈദഗ്ധ്യ ആവാസവ്യവസ്ഥകൾ, വ്യവസായ-വിദ്യാഭ്യാസ മേഖലകൾ തമ്മിലുള്ള സഹകരണം എന്നിവയിലെ വൻതോതിലുള്ള നിക്ഷേപങ്ങൾ നൂതനാശയത്തിനും ഭാവി സന്നദ്ധതയ്ക്കും വേഗത കൂട്ടി. വിശ്വസനീയമായ ഭരണ ചട്ടക്കൂടുകൾ, സുരക്ഷിതമായ ഡിജിറ്റൽ സംവിധാനങ്ങൾ, സുതാര്യമായ നിയന്ത്രണങ്ങൾ, വിശ്വസനീയമായ സാങ്കേതിക പങ്കാളിത്തങ്ങൾ എന്നിവയിൽ നിന്നാണ് ഇന്ത്യയുടെ വളരുന്ന വിശ്വാസ്യത രൂപപ്പെട്ടത്. ആഗോള നിക്ഷേപകരും സാങ്കേതിക കമ്പനികളും തന്ത്രപ്രധാന പങ്കാളികളും നവീകരണം, നിർമ്മാണം, പ്രതിഭകൾ, ഡിജിറ്റൽ പരിവർത്തനം എന്നിവയ്ക്കായുള്ള ഒരു വിശ്വസ്ത കേന്ദ്രമായി ഇന്ത്യയെ കൂടുതൽ കൂടുതലായി വീക്ഷിക്കുന്നു.

കഴിഞ്ഞ 12 വർഷത്തെ നേട്ടങ്ങൾ ഒറ്റപ്പെട്ട നാഴികക്കല്ലുകളല്ല. അവ വികസിത ഭാരതം 2047-ന്റെ സാങ്കേതിക അടിത്തറയെയാണ് പ്രതിഫലിപ്പിക്കുന്നത്. ഇന്ത്യ ഇപ്പോൾ ആഗോള സാങ്കേതികവിദ്യകൾ വെറുതെ സ്വീകരിക്കുക മാത്രമല്ല ചെയ്യുന്നത്. മറിച്ച് എല്ലാവരെയും ഉൾക്കൊള്ളുന്നതും വിശ്വസനീയവും മനുഷ്യകേന്ദ്രീകൃതവുമായ സാങ്കേതിക വികസനത്തെക്കുറിച്ചുള്ള ആഗോള ചർച്ചകൾക്ക് രാജ്യം കൂടുതൽ നേതൃത്വം നൽകുകയും ചെയ്യുന്നു.

അവലംബം

Ministry of Electronics and Information Technology

• https://sansad.in/getFile/annex/270/AU865_2GaGCa.pdf?source=pqars
• https://www.pib.gov.in/PressReleaseIframePage.aspx?PRID=2148393&reg=6&lang=1
• https://www.pib.gov.in/PressReleaseIframePage.aspx?PRID=2202897&reg=3&lang=2
• https://www.pib.gov.in/PressReleasePage.aspx?PRID=2239616&reg=3&lang=1
• https://futureskills.nasscom.in/about-futureskill.html
• https://www.nielit.gov.in/NielitMain/DAM
• https://sansad.in/getFile/annex/270/AU2473_9cvHYc.pdf?source=pqars
• https://www.pib.gov.in/PressReleasePage.aspx?PRID=2230648&reg=3&lang=1
• https://www.pib.gov.in/PressReleseDetailm.aspx?PRID=2173529&reg=48&lang=2
• https://www.pib.gov.in/PressReleasePage.aspx?PRID=2227612&reg=3&lang=2

Ministry of Communications

• https://www.pib.gov.in/PressReleasePage.aspx?PRID=2235044&reg=3&lang=1
• https://www.pib.gov.in/PressReleasePage.aspx?PRID=2158853&reg=48&lang=2

PIB Backgrounders

• https://www.pib.gov.in/PressNoteDetails.aspx?NoteId=157237&ModuleId=3&reg=3&lang=1
• https://www.pib.gov.in/PressNoteDetails.aspx?NoteId=157352&ModuleId=3&reg=48&lang=2
• https://www.pib.gov.in/PressReleasePage.aspx?PRID=2182023&reg=3&lang=2

Cabinet

• https://www.pib.gov.in/PressReleasePage.aspx?PRID=2258116&reg=3&lang=1

Ministry of Science and Technology

• https://www.pib.gov.in/PressReleasePage.aspx?PRID=1940458&reg=3&lang=2
• https://sansad.in/getFile/loksabhaquestions/annex/186/AU499_H7srwI.pdf?source=pqals
• https://www.pib.gov.in/PressReleasePage.aspx?PRID=2225097&reg=48&lang=2
• https://www.pib.gov.in/PressReleasePage.aspx?PRID=2121845&reg=3&lang=2
• https://www.pib.gov.in/PressReleasePage.aspx?PRID=2250162&reg=3&lang=1
• https://www.pib.gov.in/PressReleasePage.aspx?PRID=2238915&reg=3&lang=1
• https://www.pib.gov.in/PressReleasePage.aspx?PRID=2238346&reg=3&lang=2

Ministry of Defence

• https://www.pib.gov.in/PressReleasePage.aspx?PRID=2049356&reg=48&lang=2

Ministry of External Affairs

• https://www.mea.gov.in/Images/CPV/BriefNestDivision.pdf

Department of Higher Education (Ministry of Education)

• https://sansad.in/getFile/loksabhaquestions/annex/187/AU2622_O4tdFi.pdf?source=pqals

Ministry of Skill Development and Entrepreneurship

• https://www.pib.gov.in/PressReleasePage.aspx?PRID=2236967&reg=3&lang=2

Prime Minister’s Office

• https://www.pib.gov.in/PressReleseDetailm.aspx?PRID=1827885&reg=3&lang=2
• https://www.pib.gov.in/PressReleasePage.aspx?PRID=2162043&reg=3&lang=2

Ministry of Finance

• https://www.pib.gov.in/PressReleasePage.aspx?PRID=2219992&reg=3&lang=2 
• https://www.pib.gov.in/PressReleaseIframePage.aspx?PRID=1955516&reg=3&lang=2

Network Readiness Index

• https://networkreadinessindex.org/

NASSCOM

• https://community.nasscom.in/communities/nasscom-insights/gcc-value-orbit-delivery-engine-enterprise-nerve-centre

Click Here To See PDF

***

SK