पत्र सूचना कार्यालय

মুম্বাই-আহমেদাবাদ হাই-স্পীড ৰে’ল (MAHSR) প্ৰকল্প ভাৰতৰ ৰে’ল আধুনিকীকৰণ যাত্ৰাৰ এক ডাঙৰ মাইলৰ খুঁটি। দেশৰ প্ৰথমটো দ্ৰুতবেগী ৰে’ল কৰিড’ৰ হিচাপে ইয়াৰ লক্ষ্য হৈছে আন্তঃনগৰ ভ্ৰমণত এক নতুন মাত্ৰা সংযোজন কৰাৰ লগতে দেশৰ ঘৰুৱা ৰে’ল ক্ষমতা আৰু অধিক শক্তিশালী কৰা। ৫০৮ কিলোমিটাৰ দৈৰ্ঘ্যৰ এই কৰিড’ৰটো মহাৰাষ্ট্ৰ, গুজৰাট আৰু দাদৰা আৰু নগৰ হাভেলীৰ মাজেৰে পাৰ হৈ গৈছে। ই দ্ৰুতবেগী যাত্ৰী পৰিবহনৰ সৈতে ব্যাপক আন্তঃগাঁথনি উন্নয়নৰ সংমিশ্ৰণ ঘটাইছে, য'ত ভায়াডাক্ট, সুৰংগ, দলং, ষ্টেচন আৰু সংকেত আৰু শক্তি ব্যৱস্থা অন্তৰ্ভুক্ত। মুম্বাই আৰু আহমেদাবাদৰ মাজত ভ্ৰমণৰ সময় হ্ৰাস কৰাৰ উপৰিও এই প্ৰকল্পটোৱে কাৰিকৰী বিশেষজ্ঞতা, ঔদ্যোগিক ক্ষমতা আৰু প্ৰতিষ্ঠানিক জ্ঞান গঢ়ি তুলিছে। এই সামৰ্থই সমগ্ৰ ভাৰতত দ্ৰুতবেগী ৰে’লৰ ভৱিষ্যত সম্প্ৰসাৰণত সহায় কৰিব।

গতানুগতিক ৰে’লৰ পৰা হাই-স্পীড সংযোগলৈকে

ভাৰতীয় ৰে’লৱে বিশ্বজুৰি সৰ্ববৃহৎ ৰে’লৱে নেটৱৰ্কৰ ভিতৰত অন্যতম আৰু যাত্ৰী আৰু সামগ্ৰী পৰিবহনৰ এক গুৰুত্বপূৰ্ণ পদ্ধতি হৈয়ে আছে। বিভিন্ন অঞ্চলক সংযোগ কৰি ই সমগ্ৰ দেশতে মানুহ আৰু সামগ্ৰীৰ চলাচলত সহায় কৰে। এই সংযোগে অৰ্থনৈতিক বৃদ্ধি আৰু বজাৰ, শিক্ষা, আৰু অত্যাৱশ্যকীয় সেৱাসমূহৰ উন্নত প্ৰৱেশত অৰিহণা যোগায়। বৰ্ধিত পৰিবহনৰ প্ৰয়োজনীয়তাক গ্ৰহণ কৰিবলৈ ৰে’ল নেটৱৰ্ক আৰু ইয়াৰ বহন ক্ষমতা বছৰৰ পিছত বছৰ ধৰি ক্ৰমাগতভাৱে সম্প্ৰসাৰিত হৈছে।

ভাৰতৰ পৰিৱৰ্তিত নগৰীয়া পৰিৱেশে মানুহৰ জীৱন-যাপন, কাম-কাজ আৰু ভ্ৰমণৰ ধৰণকো ৰূপান্তৰিত কৰিছে। প্ৰধান অৰ্থনৈতিক কেন্দ্ৰসমূহৰ উন্নয়নে দীৰ্ঘ দূৰত্ব আৰু আন্তঃনগৰ ভ্ৰমণৰ প্ৰয়োজনীয়তা বৃদ্ধি কৰিছে। এই বিকশিত গতিশীলতাৰ প্ৰয়োজনীয়তাৰ প্ৰতি সঁহাৰি জনাই ভাৰতে মুম্বাই–আহমেদাবাদ হাই-স্পীড ৰে’ল (MAHSR) কৰিড’ৰৰ সূচনা কৰে। ২০১৭ চনৰ ছেপ্টেম্বৰ মাহত আধাৰশিলা স্থাপনৰ লগে লগে এই প্ৰকল্পই ভাৰতৰ দ্ৰুতবেগী ৰে’ল যাত্ৰাৰ আৰম্ভণি ঘটালে। এই কৰিড’ৰৰ লক্ষ্য হৈছে যাত্ৰীৰ আৰাম, সুৰক্ষা আৰু নিৰ্ভৰযোগ্যতা বৃদ্ধি কৰাৰ লগতে যাত্ৰাৰ সময় বহু পৰিমাণে হ্ৰাস কৰা। ভাৰতৰ ৰে’ল আন্তঃগাঁথনি আধুনিকীকৰণ আৰু বহনক্ষম অৰ্থনৈতিক উন্নয়নত সহায় কৰাৰ দিশতো ই এক বৃহৎ পদক্ষেপক প্ৰতিনিধিত্ব কৰে।

MAHSR: দৃষ্টিভংগীক আন্তঃগাঁথনিলৈ ৰূপান্তৰ কৰা

হাই-স্পীড ৰে’ল (HSR) বুলিলে গতানুগতিক ৰে’লপথতকৈ যথেষ্ট বেছি বেগত চলাচল কৰিব পৰাকৈ ডিজাইন কৰা যাত্ৰীবাহী ৰে’ল ব্যৱস্থাক বুজায়। এই ব্যৱস্থাসমূহ সাধাৰণতে নিৰ্দিষ্ট কৰিড’ৰত চলে আৰু উন্নত ৰোলিং ষ্ট’ক, সংকেত, যোগাযোগ আৰু সুৰক্ষা প্ৰযুক্তিৰ ওপৰত নিৰ্ভৰ কৰে। এনে বৈশিষ্ট্যসমূহে উচ্চ পৰ্যায়ৰ কাৰ্য্যকৰী দক্ষতা আৰু নিৰ্ভৰযোগ্যতা সক্ষম কৰে। কাৰ্যকৰী উদ্দেশ্যৰ বাবে তীব্ৰবেগী ৰে’লক প্ৰতি ঘণ্টাত ২৫০ কিলোমিটাৰতকৈ অধিক বেগত চলাচল কৰা ৰে’ল ব্যৱস্থা হিচাপে সংজ্ঞায়িত কৰা হৈছে।

বৰ্তমান ভাৰতীয় ৰে’লৱে নেটৱৰ্কত সৰ্বোচ্চ ডিজাইন গতি প্ৰায় ১৮০ কিলোমিটাৰ প্ৰতি ঘণ্টাত, যিটো বন্দে ভাৰতৰ দৰে অৰ্ধ-উচ্চবেগী সেৱাৰ দ্বাৰা লাভ কৰা হৈছে। ইয়াৰ বিপৰীতে মুম্বাই–আহমেদাবাদ হাই স্পীড ৰে’ল (MAHSR) প্ৰকল্পৰ ডিজাইন গতি ঘণ্টাত ৩৫০ কিলোমিটাৰ আৰু কাৰ্যকৰী গতি ঘণ্টাত ৩২০ কিলোমিটাৰ। ই ভাৰতত গ্ৰহণ কৰা ৰে’ল আন্তঃগাঁথনিৰ অন্যতম বিস্তৃত কাৰ্যসূচী আৰু প্ৰায় ১ ঘণ্টা ৫৮ মিনিটত মুম্বাই আৰু আহমেদাবাদক সংযোগ কৰিব।

এই প্ৰকল্পই দ্ৰুতবেগী যাত্ৰী পৰিবহনৰ ব্যৱস্থা কৰাৰ উপৰিও প্ৰথমবাৰৰ বাবে ঘৰুৱা দ্ৰুতবেগী ৰে’ল পৰিৱেশ তন্ত্ৰও স্থাপন কৰিব। এই পৰিৱেশ তন্ত্ৰত ভায়াডাক্ট নিৰ্মাণ, বেলেষ্টলেছ ট্ৰেক স্থাপন, টানেলিং, দলং উৎক্ষেপণ আৰু ষ্টেচন-এলেকা পৰিকল্পনা আদি অন্তৰ্ভুক্ত। ইয়াত সংকেত আৰু শক্তি ব্যৱস্থাৰ লগতে ভাৰতীয় অভিযন্তা আৰু কাৰিকৰী বিদ্যাবিদসকলৰ বাবে বিশেষ প্ৰশিক্ষণো অন্তৰ্ভুক্ত কৰা হৈছে। প্ৰকল্পটোৰ জৰিয়তে বিকশিত হোৱা জ্ঞান, দক্ষতা আৰু সামৰ্থই সমগ্ৰ দেশতে ভৱিষ্যতে দ্ৰুতবেগী ৰে’ল কৰিড’ৰসমূহক সহায় কৰিব বুলি আশা কৰা হৈছে।

৫০৮ কিলোমিটাৰ দৈৰ্ঘ্যৰ এই MAHSR কৰিড’ৰটোৱে মহাৰাষ্ট্ৰ, গুজৰাট আৰু দাদৰা এণ্ড নগৰ হাভেলীৰ মাজেৰে পাৰ হৈ যায়। কৰিড’ৰটোত মুম্বাই (BKC), থানে, বিৰাৰ, বয়ছাৰ, বাপি, বিলিমোৰা, চুৰাট, ভাৰুচ, বদোদৰা, আনন্দ, আহমেদাবাদ, আৰু সাবৰমতীত ১২টা ষ্টেচন আছে। নিজ নিজ চহৰৰ বৈশিষ্ট্য আৰু সংস্কৃতি প্ৰদৰ্শনৰ লক্ষ্যৰে প্ৰতিটো ষ্টেচন নিৰ্মাণ কৰা হৈছে। আধুনিক স্থাপত্য, উন্নত যাত্ৰীৰ সুবিধা আৰু বহু-মডেল সংযোগ ইয়াৰ ডিজাইনৰ অবিচ্ছেদ্য অংগ। সাবৰমতী ষ্টেচনক মাল্টিমডেল হাব হিচাপে গঢ়ি তোলা হৈছে। ইয়াৰ লগত বুলেট ট্ৰেইন, মেট্ৰ’, বি.আৰ.টি.এছ. আৰু ৰে’ল নেটৱৰ্কৰ সৈতে সংযোগ থাকিব। ট্ৰেনজিট অৰিয়েণ্টেড ডেভেলপমেণ্ট পলিচিৰ ভিত্তিত কাষৰীয়া অঞ্চলসমূহৰ পৰিকল্পনা কৰা হৈছে। এই কৰিড’ৰত প্ৰথমটো দ্ৰুতবেগী ৰে’ল সেৱা ২০২৭ চনৰ আগষ্ট মাহত আৰম্ভ হোৱাৰ সম্ভাৱনা আছে।

এই পথটো প্ৰায় ৯০% উচ্চ, ইয়াৰ নিৰ্মাণ মূলতঃ ফুল স্পেন লঞ্চিং মেথ’ড (FSLM)ৰ জৰিয়তে কৰা হৈছে। এই কৌশল ভাৰতত প্ৰথমবাৰৰ বাবে ব্যৱহাৰ কৰা হৈছে আৰু ই প্ৰচলিত ছেগমেণ্টেল নিৰ্মাণতকৈ দহগুণ বেছি দ্ৰুত। কাৰ্যকৰী শব্দ কম কৰিবলৈ ভায়াডাক্টৰ দুয়োফালে শব্দ বাধা স্থাপন কৰা হৈছে। এই বৈশিষ্ট্যসমূহে একেলগে দক্ষ নিৰ্মাণ, কাৰ্যকৰী পৰিৱেশন আৰু সংহত নগৰ উন্নয়নৰ ওপৰত কৰিড’ৰৰ মনোনিৱেশক উজ্জ্বল কৰি তোলে।

কাৰিকৰী বৈশিষ্ট্য আৰু ব্যৱস্থাপ্ৰণালী

জাপানী শ্বিনকানচেন প্ৰযুক্তি আৰু কাৰ্যকৰী মানদণ্ড ব্যৱহাৰ কৰি MAHSR প্ৰকল্পটো প্ৰস্তুত কৰা হৈছে। কৰিড’ৰটোত ট্ৰেকচন, বৈদুতিকৰণ, ট্ৰেক আন্তঃগাঁথনি আৰু পৰিচালনাৰ বাবে উন্নত ব্যৱস্থা অন্তৰ্ভুক্ত কৰা হৈছে। চৰকাৰী প্ৰকল্পৰ ৰাজহুৱা পৰ্যালোচনাত তলত উল্লেখ কৰা মূল প্ৰযুক্তিগত উপাদানসমূহৰ কথা লিখা আছে:

• অভাৰহেড ইলেক্ট্ৰিফিকেশন (OHE): কৰিড’ৰৰ কাষেৰে ২০ হাজাৰতকৈ অধিক OHE মাষ্ট স্থাপনৰ পৰিকল্পনা কৰা হৈছে। ২×২৫ কে.ভি. অভাৰহেড ট্ৰেকচন চিষ্টেমত শ্বিনকানচেন ভিত্তিক OHE কেন্টিলিভাৰ ব্যৱহাৰ কৰা হয়।
• ট্ৰেকচন আৰু পাৱাৰ চাপ্লাই: এই প্ৰকল্পত ১২টা ট্ৰেকচন চাবষ্টেচন, ২টা ডিপো ট্ৰেকচন চাবষ্টেচন আৰু ১৬টা বিতৰণ চাবষ্টেচন অন্তৰ্ভুক্ত কৰা হৈছে।
• ট্ৰেক চিষ্টেম: জাপানী শ্বিনকানচেন প্ৰযুক্তিৰ আধাৰত জে-স্লেব বেলেষ্টলেছ ট্ৰেক ভাৰতত প্ৰথমবাৰৰ বাবে ব্যৱহাৰ কৰা হৈছে।
• ট্ৰেক নিৰ্মাণ ঘাটি: ৰে’ল, ট্ৰেক স্লেব, যন্ত্ৰপাতি আৰু সঁজুলি পৰিচালনাৰ বাবে নিৰ্দিষ্ট ট্ৰেক নিৰ্মাণ ঘাটি স্থাপন কৰা হৈছে।
• ৰোলিং ষ্টক ডিপো: গুজৰাটৰ সাবৰমতী,চুৰাট আৰু মহাৰাষ্ট্ৰৰ থানেত তিনিটা ডিপো নিৰ্মাণৰ কাম চলি আছে।

কৰিড’ৰৰ সিপাৰে অভিযান্ত্ৰিক অগ্ৰগতি

MAHSR নদী, ঘন জনবসতিপূৰ্ণ অঞ্চল আৰু জটিল ভূখণ্ডৰ মাজেৰে পাৰ হৈ যায়। ফলত বৃহৎ সংখ্যক দলং আৰু সুৰংগ নিৰ্মাণৰ প্ৰয়োজন হৈছে। এইবোৰ প্ৰকল্পটোৰ আটাইতকৈ জটিল অভিযান্ত্ৰিক উপাদানসমূহৰ ভিতৰত অন্যতম।

কৰিড’ৰৰ সিপাৰে দলং

ই কৰিড’ৰত মুঠ ২৫খন নদী দলং আছে। ইয়াৰে ২১টা গুজৰাটত আৰু ৪টা মহাৰাষ্ট্ৰত। মেশ্বৱা, ভট্ৰাক, মহৰ (শেধি), বিশ্বমিত্ৰী, ধধৰ, কিম, মিন্দোলা, পূৰ্ণা, অম্বিকা, ভেংগনিয়া, কাবেৰী, খৰেৰা, ঔৰংগা, পাৰ, কোলাক, দমন গংগা আৰু দৰোথা নদীৰ ওপৰত দলং নিৰ্মাণৰ কাম সম্পূৰ্ণ হৈছে।

• সাবৰমতী, নৰ্মদা, টাপি, জাগনি আৰু বৈতৰাণা নদীৰ ওপৰত দলং নিৰ্মাণৰ কাম দ্ৰুতগতিত আগবাঢ়িছে।
• মাহী নদীৰ দলঙৰ ১২টা কূপৰ ভিতৰত এঘাৰটা কূপৰ কাম সম্পূৰ্ণ হৈছে। পাঁচটা স্পেন স্থাপন কৰা হৈছে।
• টাপি নদী দলঙৰ ভেটি নিৰ্মাণৰ কাম চলি আছে। মুঠ ১২টা কূপৰ ভিতৰত ১০টা কূপৰ কাম সম্পূৰ্ণ হৈছে।
• সাবৰমতী নদী দলঙৰ উপগাঁথনি নিৰ্মাণৰ কাম সম্পূৰ্ণ হৈছে। অধিগাঁথনিৰ কাম চলি আছে।
• দেশাই খাদী পাৰ হোৱাৰ বাবে ভূ-কাৰিকৰী জৰীপ সম্পূৰ্ণ হৈছে। ডিজাইনৰ কাম চলি আছে।
• উলহাছ নদীৰ শাখাত এখন অস্থায়ী প্ৰৱেশ দলংও নিৰ্মাণ কৰা হৈছে।
• ইয়াৰ উপৰিও কৰিড’ৰৰ কাষেৰে ঘাইপথ, খাল, নদী, ৰে’লপথ পাৰ হ’বলৈ ২৮খন তীখাৰ দলং নিৰ্মাণ কৰা হৈছে।

এই সকলোবোৰ গঠন কৰিড’ৰৰ অভিযান্ত্ৰিক আন্তঃগাঁথনিৰ গুৰুত্বপূৰ্ণ অংশ।

ভাৰতৰ প্ৰথমটো সাগৰৰ তলৰ ৰে’ল সুৰংগ

এই কৰিড’ৰত মহাৰাষ্ট্ৰৰ প্ৰায় ২১ কিলোমিটাৰ সুৰংগ অংশ অন্তৰ্ভুক্ত কৰা হৈছে। এই অংশত থানে ক্ৰিকৰ তলত ভাৰতৰ প্ৰথমটো সাগৰৰ তলৰ ৰে’ল সুৰংগৰ বিষয়ে উল্লেখ কৰা হৈছে। সাগৰৰ তলৰ অংশটো প্ৰায় ৭ কিলোমিটাৰ বিস্তৃত। সুৰংগ নিৰ্মাণত নিউ অষ্ট্ৰিয়ান টানেলিং মেথড (NATM) আৰু টানেল ব’ৰিং মেচিন (TBM) প্ৰযুক্তিৰ সংমিশ্ৰণ ঘটিছে। এই এলাইনমেণ্টত ৫ কিলোমিটাৰ NATM অংশ আৰু ১৬ কিলোমিটাৰ TBM অংশ অন্তৰ্ভুক্ত কৰা হৈছে। দুয়োটা ট্ৰেক ১৩.১ মিটাৰ ব্যাসৰ একক সুৰংগ নলীৰ ভিতৰত ৰখা হ’ব। TBM কাটাৰ হেডৰ ব্যাস ১৩.৬ মিটাৰ, যিটো ভাৰতীয় ৰে’ল প্ৰকল্পত ব্যৱহাৰ কৰা আটাইতকৈ ডাঙৰ। নিৰ্মাণৰ কাম ক্ৰমাগতভাৱে আগবাঢ়িছে, ইতিমধ্যে ঘনছ’লি আৰু শিলফাটাৰ মাজৰ সাগৰৰ তলৰ সুৰংগটোৰ ৪.৮ কিলোমিটাৰ দৈৰ্ঘ্য সম্পূৰ্ণ হৈছে।

নিৰাপদ আৰু নিৰ্ভৰযোগ্য কাৰ্যকলাপ নিশ্চিত কৰা

বিভিন্ন পৰিৱেশৰ পৰিস্থিতিত নিৰ্ভৰযোগ্য ৰে’ল পৰিচালনা নিশ্চিত কৰিবলৈ MAHSR কৰিড’ৰত উন্নত সুৰক্ষা আৰু নিৰীক্ষণ ব্যৱস্থা সন্নিবিষ্ট কৰা হৈছে। ইয়াৰ ভিতৰত ভূমিকম্প ধৰা পেলোৱা, বৰষুণ নিৰীক্ষণ কৰা, আৰু বতাহৰ গতি নিৰীক্ষণ ব্যৱস্থা যিয়ে বাস্তৱ সময়ৰ মূল্যায়ন আৰু প্ৰয়োজন হ'লে তৎকালীন কাৰ্যকৰী সঁহাৰি সক্ষম কৰে।

বৰষুণৰ নিৰীক্ষণ ব্যৱস্থা

বুলেট ট্ৰেইন সেৱাৰ নিৰাপদ পৰিচালনা নিশ্চিত কৰিবলৈ স্বয়ংক্ৰিয় বৰষুণ নিৰীক্ষণ ব্যৱস্থা গ্ৰহণ কৰা হৈছে। এই ব্যৱস্থাই কৰিড’ৰৰ কাষৰ জটিল স্থানত স্থাপন কৰা যন্ত্ৰযুক্ত বৰষুণ গেজৰ জৰিয়তে বাস্তৱ সময়ৰ বৰষুণৰ তথ্য প্ৰদান কৰে। বৰষুণৰ তথ্য অবিৰতভাৱে অপাৰেচন কণ্ট্ৰল চেণ্টাৰ (OCC) লৈ প্ৰেৰণ কৰা হয়, য’ত ইয়াক অপাৰেচনেল সিদ্ধান্ত গ্ৰহণত সহায় কৰিবলৈ নিৰীক্ষণ কৰা হয়। দুটা মূল পৰিমাপ জুখিব পাৰি, যথা, ঘণ্টাৰ পিছত ঘণ্টা বৰষুণ আৰু পূৰ্বৰ ২৪ ঘণ্টাৰ সঞ্চিত বৰষুণ। এই জোখ-মাখবোৰে পৃথিৱীৰ গঠন, প্ৰাকৃতিক ঢাল, সুৰংগ পৰ্টেল আৰু অন্যান্য দুৰ্বল স্থানৰ চাৰিওফালে থকা অৱস্থাৰ মূল্যায়ন কৰাত সহায় কৰে। পূৰ্বনিৰ্ধাৰিত থ্ৰেছহ'ল্ড মান আৰু ৰক্ষণাবেক্ষণ দলৰ দ্বাৰা ক্ষেত্ৰ পৰীক্ষণৰ ওপৰত ভিত্তি কৰি প্ৰয়োজন সাপেক্ষে উপযুক্ত কাৰ্যকৰী ব্যৱস্থা ৰূপায়ণ কৰিব পাৰি। মুম্বাই–আহমেদাবাদ বুলেট ট্ৰেইন কৰিড’ৰত ছটা ইনষ্ট্ৰুমেণ্টেড ৰেইন গেজ ষ্টেচনৰ প্ৰস্তাৱ দিয়া হৈছে। প্ৰতিটো ষ্টেচনে প্ৰায় ১০ কিলোমিটাৰ ব্যাসাৰ্ধৰ এলেকা নিৰীক্ষণ কৰিব।

বতাহৰ গতি নিৰীক্ষণ ব্যৱস্থা

MAHSR কৰিড’ৰৰ কিছু অংশ উপকূলীয় অঞ্চল আৰু অন্যান্য স্থানৰ মাজেৰে পাৰ হৈছে য’ত প্ৰচণ্ড বতাহৰ সন্মুখীন হয়। এনে অঞ্চলত নিৰাপদ ৰে’ল পৰিচালনা নিশ্চিত কৰিবলৈ কৰিড’ৰৰ কাষেৰে এক নিৰ্দিষ্ট বতাহৰ গতি নিৰীক্ষণ ব্যৱস্থা সংযুক্ত কৰা হৈছে। এনিমোমিটাৰ স্থাপনৰ বাবে গুজৰাটৰ ৯টা আৰু মহাৰাষ্ট্ৰৰ ৫টাকে ধৰি ১৪টা স্থান চিনাক্ত কৰা হৈছে। এই যন্ত্ৰসমূহে বতাহৰ গতি আৰু দিশৰ বাস্তৱ সময়ৰ জোখ-মাখৰ সুবিধা প্ৰদান কৰে আৰু ঘণ্টাত ০ৰ পৰা ২৫২ কিলোমিটাৰ বেগত বতাহৰ গতি ৰেকৰ্ড কৰিব পাৰে। অপাৰেচন কণ্ট্ৰ’ল চেণ্টাৰ (OCC)ত এই তথ্যসমূহ অবিৰতভাৱে নিৰীক্ষণ কৰা হয়। যেতিয়া বতাহৰ গতিবেগে নিৰ্ধাৰিত থ্ৰেছহ'ল্ডত উপনীত হয়, তেতিয়া কাৰ্যকৰী প্ৰট'কল সক্ৰিয় কৰা হয়। ঘণ্টাত ৭২ কিলোমিটাৰৰ পৰা ১৩০ কিলোমিটাৰ প্ৰতি ঘণ্টাত বতাহৰ গতিবেগৰ বাবে ৰে’লৰ গতি নিয়ন্ত্ৰণ কৰি নিৰাপদ পৰিচালনা নিশ্চিত কৰা হ’ব।

আগতীয়াকৈ ভূমিকম্প ধৰা পেলোৱা ব্যৱস্থা

যাত্ৰীৰ সুৰক্ষা বৃদ্ধিৰ বাবে MAHSRত ২৮টা ভূমিকম্পমাপকৰে গঠিত আগতীয়াকৈ ভূমিকম্প ধৰা পেলোৱা ব্যৱস্থা থাকিব। এই ব্যৱস্থাই প্ৰাথমিক ভূমিকম্পৰ তৰংগ ধৰা পেলাব আৰু স্বয়ংক্ৰিয়ভাৱে শক্তি বন্ধ কৰাৰ সূচনা কৰিব। ইয়াৰ ফলত ক্ষতিগ্ৰস্ত অংশৰ ৰে’লসমূহে জৰুৰীকালীন ব্ৰেকিঙৰ জৰিয়তে নিৰাপদে ৰ’ব পাৰে। ২৮টা ছিছমোমিটাৰৰ ভিতৰত ২২টা কৰিড’ৰ এলাইনমেণ্টৰ কাষেৰে স্থাপন কৰা হ’ব। বাকী ৬টা বিশদ ভূমিকম্পীয় জৰীপ আৰু মাটিৰ উপযোগিতা অধ্যয়নৰ জৰিয়তে চিনাক্ত কৰা ভূমিকম্পপ্ৰৱণ অঞ্চলত অৱস্থিত হ’ব। এই স্থানসমূহ ঐতিহাসিক ভূমিকম্পৰ তথ্য আৰু মাইক্ৰ’ট্ৰেমৰ পৰীক্ষাৰ ভিত্তিত নিৰ্বাচন কৰা হৈছিল।

২০২৬ চনত প্ৰকল্পৰ উল্লেখযোগ্য মাইলৰ খুঁটি

২০২৬ চনৰ ভিতৰত কেইবাটাও উল্লেখযোগ্য মাইলৰ খুঁটি লিপিবদ্ধ কৰা হৈছে, যিয়ে কৰিড’ৰৰ বিভিন্ন উপাদানসমূহৰ মাজেৰে অগ্ৰগতি চিহ্নিত কৰিছে। তলত দিয়া উন্নয়নসমূহে প্ৰকল্পটোৰ ৰূপায়ণৰ গতি প্ৰদান কৰে-

অৰ্থনৈতিক আৰু সামাজিক পৰিৱৰ্তনক আগুৱাই নিয়া

সংযোগ বৃদ্ধিৰ উপৰিও বুলেট ট্ৰেইন প্ৰকল্পটোৱে নিয়োগ সৃষ্টি কৰিব, উদ্যোগ শক্তিশালী কৰিব, পৰ্যটনক সহায় কৰিব আৰু ঘৰুৱা উৎপাদনক আগুৱাই নিব বুলি আশা কৰা হৈছে।

দ্ৰুত সংযোগ

MAHSR প্ৰকল্পৰ জৰিয়তে মুম্বাই আৰু আহমেদাবাদৰ মাজত যাতায়তৰ সময় দুঘণ্টাৰ তললৈ হ্ৰাস পাব। বৰ্তমান একেটা যাত্ৰাতে বিমানবন্দৰৰ পদ্ধতিকে ধৰি পথেৰে ৮–৯ ঘণ্টা আৰু বিমানেৰে প্ৰায় ৪–৫ ঘণ্টা সময় লাগে। দ্ৰুত ভ্ৰমণে ব্যৱসায়িক দক্ষতা বৃদ্ধি কৰিব পাৰে আৰু যাত্ৰীসকলৰ বাবে মূল্যৱান সময় ৰাহি কৰিব পাৰে।

আঞ্চলিক অৰ্থনীতি শক্তিশালী কৰা

তীব্ৰবেগী ৰে’লযোগে উদ্যোগ কেন্দ্ৰ আৰু বজাৰসমূহক একাষৰীয়া কৰি তুলিব। ভাপি আৰু মুম্বাইৰ দৰে উৎপাদন কেন্দ্ৰৰ মাজত উন্নত সংযোগে যোগান শৃংখল শক্তিশালী কৰিব আৰু সমগ্ৰ কৰিড’ৰত ব্যৱসায়িক সুযোগ সম্প্ৰসাৰণ কৰিব।

পৰ্যটন আৰু স্থানীয় উন্নয়ন

প্ৰাকৃতিক, সাংস্কৃতিক আৰু ঐতিহাসিক আকৰ্ষণৰ বাবে পৰিচিত অঞ্চলসমূহৰ মাজেৰে এই কৰিড’ৰটো পাৰ হৈছে। উন্নত সুলভতাই পৰ্যটন, আতিথ্য আৰু আনুষংগিক সেৱাসমূহক সহায় কৰিব পাৰে। ষ্টেচনসমূহে বাণিজ্যিক কাৰ্যকলাপ আৰু স্থানীয় উন্নয়নকো উৎসাহিত কৰিব বুলি আশা কৰা হৈছে।

দক্ষতাৰ গঢ়ি তোলা, সুযোগ সৃষ্টি কৰা

এই প্ৰকল্পৰ জৰিয়তে প্ৰায় ৪,০০০ প্ৰত্যক্ষ চাকৰি আৰু ৩৫,০০০–৪০,০০০ পৰোক্ষ চাকৰিৰ সৃষ্টি হ’ব বুলি আশা কৰা হৈছে। নিৰ্মাণৰ সময়ত প্ৰায় ৪০ হাজাৰ শ্ৰমিক নিয়োজিত হোৱাৰ সম্ভাৱনা আছে। বদোদৰাৰ এটা নিবেদিত হাই-স্পীড ৰে’ল প্ৰশিক্ষণ প্ৰতিষ্ঠানে উন্নত ৰে’ল প্ৰযুক্তিৰ বিশেষজ্ঞতা বিকাশত সহায় কৰিব।

মেক-ইন-ইণ্ডিয়াক সমৰ্থন কৰা

এই প্ৰকল্পই প্ৰযুক্তি হস্তান্তৰ আৰু ঘৰুৱা উৎপাদনৰ জৰিয়তে মেক-ইন-ইণ্ডিয়া পদক্ষেপক সমৰ্থন কৰে। প্ৰকল্পৰ উপাদানসমূহত ভাৰতীয় কোম্পানীসমূহৰ অংশগ্ৰহণে ঔদ্যোগিক সামৰ্থ শক্তিশালী কৰিব আৰু তীখা, চিমেণ্ট আৰু বৈদ্যুতিক সঁজুলিৰ দৰে সংশ্লিষ্ট খণ্ডসমূহক সহায় কৰিব বুলি আশা কৰা হৈছে।

কেন্দ্ৰীয় বাজেট ২০২৬–২৭ত উচ্চ গতিৰ ৰে’ল কৰিড’ৰ

আধুনিক আৰু তীব্ৰবেগী ৰে’ল নেটৱৰ্ক গঢ়ি তোলাৰ লক্ষ্যক আগুৱাই নিবলৈ কেন্দ্ৰীয় বাজেট ২০২৬-২৭ত ৭টা তীব্ৰবেগী ৰে’ল কৰিড’ৰক বৃদ্ধিৰ কৰিড’ৰ হিচাপে ঘোষণা কৰা হৈছে। এই কৰিড’ৰসমূহে দেশৰ গুৰুত্বপূৰ্ণ চহৰ আৰু অঞ্চলসমূহক সংযোগ কৰিব। ইয়াৰ দ্বাৰা মানুহৰ দ্ৰুত গতিবিধি নিশ্চিত হ’ব। বিভিন্ন ৰাজ্যৰ মাজত অৰ্থনৈতিক সংযোগ আৰু অধিক সুদৃঢ় কৰিব।

প্ৰস্তাৱিত কৰিড’ৰসমূহৰ মুঠ দৈৰ্ঘ্য প্ৰায় ৪০০০ কিলোমিটাৰ। এই প্ৰকল্পসমূহে প্ৰায় ১৬ লাখ কোটি টকাৰ বিনিয়োগ আকৰ্ষণ কৰাৰ সম্ভাৱনা আছে। এই পদক্ষেপসমূহে ভাৰতৰ পৰিবহন আন্তঃগাঁথনিৰ এক গুৰুত্বপূৰ্ণ উপাদান হিচাপে তীব্ৰবেগী ৰে’ল স্থাপনৰ ইংগিত দিয়ে।

ৰে’ল পৰিবহনৰ ভৱিষ্যত গঢ়ি তোলা

মুম্বাই-আহমেদাবাদ হাই-স্পীড ৰে’ল প্ৰকল্পই ভাৰতীয় ৰে’লৱে উন্নয়নৰ ইতিহাসত এক পৰিৱৰ্তনশীল অধ্যায়ৰ সূচনা কৰিছে। দেশৰ প্ৰথমটো দ্ৰুতবেগী ৰে’ল কৰিডৰ হিচাপে ই গতি, সংযোগ আৰু আন্তঃগাঁথনি নিৰ্মাণৰ ক্ষেত্ৰত নতুন মাপকাঠী নিৰ্ধাৰণ কৰিছে। চিভিল ইঞ্জিনিয়াৰিং, দলং নিৰ্মাণ আৰু সুৰংগ খননৰ ক্ষেত্ৰত উল্লেখযোগ্য অগ্ৰগতিয়ে প্ৰকল্প ৰূপায়ণৰ অবিৰত গতিৰ ইংগিত দিয়ে। ইতিমধ্যে সম্পূৰ্ণ হোৱা নিৰ্মাণ কামৰ পৰিসৰই প্ৰকল্পটোৰ বিভিন্ন উপাদানৰ কঠিন অগ্ৰগতিৰ সাক্ষী। একে সময়তে উন্নত প্ৰযুক্তি আৰু আধুনিক অভিযান্ত্ৰিক পদ্ধতিৰ প্ৰয়োগে দেশৰ ঘৰুৱা দ্ৰুতবেগী ৰে’লৰ ক্ষমতা আৰু অধিক শক্তিশালী কৰি তুলিছে। MAHSR প্ৰকল্পটো কেৱল পৰিবহনৰ পদক্ষেপ নহয়, ই ভাৰতৰ দীৰ্ঘম্যাদী তীব্ৰবেগী ৰে’ল যাত্ৰাতো এক গুৰুত্বপূৰ্ণ চালিকা শক্তি।

তথ্যসূত্ৰঃ

প্ৰধানমন্ত্ৰীৰ কাৰ্যালয়

https://www.pib.gov.in/newsite/printrelease.aspx?relid=170771&reg=48&lang=2

ৰে’ল মন্ত্ৰালয়

https://www.pib.gov.in/PressReleasePage.aspx?PRID=2257831&reg=1&lang=1

https://www.pib.gov.in/PressReleasePage.aspx?PRID=2267962&reg=48&lang=1

https://sansad.in/getFile/loksabhaquestions/annex/187/AS538_MhnJmI.pdf?source=pqals

https://www.pib.gov.in/PressReleasePage.aspx?PRID=2176788&reg=48&lang=2

https://www.pib.gov.in/PressReleasePage.aspx?PRID=2221838&reg=48&lang=2

নেশ্যনেল হাই-স্পীড ৰে’ল কৰ্পৰেশ্যন লিমিটেড

https://www.nhsrcl.in/en/project/project-overview

https://www.nhsrcl.in/en/media/press-release

https://www.nhsrcl.in/en/project/safety-features

https://www.nhsrcl.in/en/media/blog/long-short-economic-prosperity-indias-first-hsr-project-expected-bring

pdf চাবলৈ ইয়াত ক্লিক কৰক