पत्र सूचना कार्यालय

ഇന്ത്യ-നോർഡിക് സഖ്യത്തോടെ ഇന്ത്യയും നോർഡിക് രാജ്യങ്ങളും തമ്മിലുള്ള ഉഭയകക്ഷി സഹകരണം ഒരു പുതിയ രൂപം കൈവരിച്ചു. ഒരു ദീർഘകാല തന്ത്രപ്രധാന പങ്കാളിത്തം കെട്ടിപ്പടുക്കുകയെന്ന ലക്ഷ്യത്തോടെയുള്ള, ചിട്ടയായ ഉന്നതതല ഇടപെടലുകൾക്ക് തുടക്കം കുറിച്ചുകൊണ്ട് 2018-ലാണ് ആദ്യത്തെ ഇന്ത്യ-നോർഡിക് ഉച്ചകോടി നടന്നത്. മെയ് 19-ന് നോർവേയിലെ ഓസ്ലോയിൽ വെച്ച് നടന്ന മൂന്നാമത് നോർഡിക് ഉച്ചകോടിക്കായി പ്രധാനമന്ത്രി നരേന്ദ്ര മോദിയും നോർഡിക് രാജ്യങ്ങളിലെ പ്രധാനമന്ത്രിമാരും ഒത്തുചേർന്നു. ഈ യോഗം ഇന്ത്യ-നോർഡിക് ബന്ധത്തെ ഹരിത സാങ്കേതികവിദ്യയും നൂതനാശയവും മുൻനിർത്തിയുള്ള തന്ത്രപ്രധാന പങ്കാളിത്തത്തിലേക്ക് ഉയർത്തി. ഉഭയകക്ഷി വ്യാപാരവും നിക്ഷേപപ്രവാഹവും ശക്തിപ്പെടുത്തുന്നതിന് പുറമെ കാലാവസ്ഥാ വ്യതിയാനത്തിനെതിരെയുള്ള പ്രവർത്തനങ്ങൾ, STEM മേഖലയിലെ സഹകരണം, സമുദ്ര സമ്പദ്‌വ്യവസ്ഥ, വിദ്യാഭ്യാസം, പ്രതിരോധ സഹകരണം, ആർട്ടിക് മേഖലയിലെ ഇടപെടലുകൾ എന്നിവയിലെ സംയുക്ത നീക്കങ്ങൾക്ക് ഈ ഉച്ചകോടി ഊർജ്ജം പകർന്നു.

ആമുഖം

2018-ൽ നടന്ന ഒന്നാമത് ഇന്ത്യ-നോർഡിക് ഉച്ചകോടിയിലാണ് ഇന്ത്യയും നോർഡിക് രാജ്യങ്ങളും തമ്മിൽ ഒരു ബഹുമുഖ പങ്കാളിത്തത്തിന് തുടക്കം കുറിച്ചത്. നൂതനാശയം, ഹരിത സാങ്കേതികവിദ്യകൾ, ശുദ്ധോർജ്ജം, സുസ്ഥിര വികസനം എന്നിവയിലാണ് ഈ പങ്കാളിത്തം പ്രധാനമായും ശ്രദ്ധ കേന്ദ്രീകരിക്കുന്നത്. ഇന്ത്യയുടെ സാമ്പത്തിക വളർച്ചയെ പിന്തുണയ്ക്കുക, സുസ്ഥിര വികസന പാതകളെ പ്രോത്സാഹിപ്പിക്കുക, നൈപുണ്യ വികസനവും പ്രതിഭകളെ വളർത്തിയെടുക്കലും ശക്തിപ്പെടുത്തുക, ഊർജ്ജസ്വലമായ ഒരു നൂതനാശയ ആവാസവ്യവസ്ഥയെ വളർത്തിയെടുക്കുക എന്നിവയാണ് ഇത് ലക്ഷ്യമിടുന്നത്. പുനരുപയോഗ ഊർജ്ജം, കാലാവസ്ഥാ വ്യതിയാനത്തിനെതിരെയുള്ള പ്രവർത്തനങ്ങൾ എന്നിവയിലെ സഹകരണത്തിലൂടെ നോർഡിക് രാജ്യങ്ങളുടെ വൈദഗ്ധ്യവും സാങ്കേതികവിദ്യാ കൈമാറ്റവും പ്രയോജനപ്പെടുത്താൻ ഇന്ത്യക്ക് സാധിക്കും. 2026 മെയ് 19-ന് ഓസ്ലോയിൽ വെച്ച് നടന്ന മൂന്നാമത് ഇന്ത്യ-നോർഡിക് ഉച്ചകോടി ഈ തന്ത്രപ്രധാന പങ്കാളിത്തത്തെ കൂടുതൽ മുന്നോട്ട് നയിച്ചു. ഈ ഉച്ചകോടി വ്യാപാരം, നിക്ഷേപം, ഡിജിറ്റൽ നവീകരണം, വളർന്നുവരുന്ന പുതിയ സാങ്കേതികവിദ്യകൾ എന്നിവയിലെ സഹകരണം ശക്തിപ്പെടുത്തി. സമുദ്ര സമ്പദ്‌വ്യവസ്ഥ, സമുദ്രമേഖലയിലെ സഹകരണം, STEM ഗവേഷണം, പ്രതിരോധശേഷിയുള്ള വിതരണ ശൃംഖലകൾ, പ്രതിരോധ പങ്കാളിത്തം എന്നിവയിലെ സഹകരണവും ഇരുപക്ഷവും വിപുലീകരിച്ചു. സാമ്പത്തിക പങ്കാളിത്തത്തിന് പുറമെ നയതന്ത്രത്തിന്റെ 'സോഫ്റ്റ് പവർ' മാർഗ്ഗങ്ങളിലൂടെയും ഇന്ത്യ നോർഡിക് രാജ്യങ്ങളുമായി സജീവമായി ഇടപെടുന്നു.

നോർഡിക് രാജ്യങ്ങളുമായി ഇന്ത്യ വികസിപ്പിച്ചെടുക്കുന്ന ബന്ധങ്ങൾ

നോർഡിക് മേഖലയുമായുള്ള ഇന്ത്യയുടെ ഇടപെടലുകൾ പരമ്പരാഗത നയതന്ത്രത്തിനപ്പുറം ഭാവി ലക്ഷ്യം വെച്ചുള്ള ഒരു തന്ത്രപ്രധാന പങ്കാളിത്തമായി വികസിച്ചിരിക്കുന്നു. ഹരിത വളർച്ച, ശുദ്ധമായ സാങ്കേതികവിദ്യകൾ, നവീകരണം, സുസ്ഥിര വികസനം എന്നിവയിലുള്ള പൊതുവായ മുൻഗണനകളാണ് ഈ മാറ്റത്തിന് ചുക്കാൻ പിടിക്കുന്നത്. നോർഡിക് രാജ്യങ്ങൾ അത്യാധുനിക സാങ്കേതിക വൈദഗ്ധ്യം നൽകുമ്പോൾ വിപുലമായ വ്യാപ്തി, വിപണികൾ, പ്രതിഭകൾ, ഉത്പാദന ശേഷി എന്നിവയാണ് ഇന്ത്യ മുന്നോട്ടുവെക്കുന്നത്. ഇരുപക്ഷവും ഒത്തുചേരുന്നതിലൂടെ ഈ പങ്കാളിത്തം ഇന്ത്യയുടെ ഹരിത പരിവർത്തനം, ഡിജിറ്റൽ വിപുലീകരണം, ആർട്ടിക് മേഖലയിലെ ഇടപെടലുകൾ, പ്രതിരോധശേഷിയുള്ള സാമ്പത്തിക വളർച്ചാ തന്ത്രം എന്നിവയുടെ ഒരു പ്രധാന സ്തംഭമായി ഉയർന്നുവരുകയാണ്.

ഡെന്മാർക്ക്:

• 2025-ൽ ഇന്ത്യയും ഡെന്മാർക്കും തമ്മിലുള്ള ഉഭയകക്ഷി ചരക്കുവ്യാപാരം 2.05 ബില്യൺ യുഎസ് ഡോളറായിരുന്നു.
• അതേ വർഷം ഡെന്മാർക്കിലേക്കുള്ള ഇന്ത്യയുടെ ചരക്ക് കയറ്റുമതി 1.06 ബില്യൺ യുഎസ് ഡോളറും ഇറക്കുമതി 0.98 ബില്യൺ യുഎസ് ഡോളറുമായി കണക്കാക്കപ്പെട്ടിരിക്കുന്നു.
• 2025-ൽ സേവന മേഖലയിലെ ഉഭയകക്ഷി വ്യാപാരം 4.25 ബില്യൺ യുഎസ് ഡോളറിലെത്തി. ഇതിൽ ഇന്ത്യയിൽ നിന്നുള്ള കയറ്റുമതി 1.9 ബില്യൺ യുഎസ് ഡോളറും ഇറക്കുമതി 2.3 ബില്യൺ യുഎസ് ഡോളറുമായിരുന്നു.
• ഡെന്മാർക്കിലെ ഇന്ത്യൻ നിക്ഷേപങ്ങളുടെ ആകെ മൂല്യം ഏകദേശം 560 മില്യൺ യുഎസ് ഡോളറാണ്.
• ഐടി, പുനരുപയോഗ ഊർജ്ജം, എഞ്ചിനീയറിംഗ് എന്നിവയുൾപ്പെടെ വിവിധ മേഖലകളിലായി നാൽപ്പതോളം ഇന്ത്യൻ കമ്പനികൾ ഡെന്മാർക്കിൽ പ്രവർത്തിക്കുന്നു.
• ഷിപ്പിംഗ്, പുനരുപയോഗ ഊർജ്ജം, പരിസ്ഥിതി, കൃഷി, ഭക്ഷ്യസംസ്കരണം, സ്മാർട്ട് നഗര വികസനം തുടങ്ങിയ മേഖലകളിലായി ഇരുനൂറോളം ഡാനിഷ് കമ്പനികൾ ഇന്ത്യയിൽ നിക്ഷേപം നടത്തിയിട്ടുണ്ട്.
• 2024 വരെ ഡെന്മാർക്കിൽ നിന്ന് ഇന്ത്യയിലേക്കുള്ള സഞ്ചിത നേരിട്ടുള്ള വിദേശ നിക്ഷേപത്തിന്റെ വരവ് 1.413 ബില്യൺ യുഎസ് ഡോളറായിരുന്നു.
• സാംസ്കാരിക കൈമാറ്റ പരിപാടി (2022) “സിൽവർ ട്രഷേഴ്‌സ് ഫ്രം ഇന്ത്യ ആൻഡ് ഡെന്മാർക്ക്” എക്സിബിഷൻ പോലുള്ള സംരംഭങ്ങൾ എന്നിവയിലൂടെ ഇന്ത്യയും ഡെന്മാർക്കും തമ്മിലുള്ള സാംസ്കാരിക സഹകരണം ശക്തിപ്പെടുത്തി.
• ആസാദി കാ അമൃത് മഹോത്സവത്തിന്റെ ഭാഗമായി ഡെന്മാർക്കിലുടനീളം നടന്ന പതാക ഉയർത്തൽ, ആഘോഷങ്ങൾ, സ്കൂൾ പരിപാടികൾ, കായിക ശിൽപ്പശാലകൾ, ഇന്ത്യൻ സമൂഹത്തിന്റെ വിപുലമായ പങ്കാളിത്തം എന്നിവയുൾപ്പെടെയുള്ള പ്രമുഖ സാംസ്കാരിക സമ്പർക്ക പരിപാടികൾ നയതന്ത്രത്തിന്റെ 'സോഫ്റ്റ് പവർ' സമീപനത്തെ പ്രതിഫലിപ്പിക്കുന്നു.
• ഡെന്മാർക്കിലെ നഗരങ്ങളിൽ അന്താരാഷ്ട്ര യോഗാ ദിനം വിപുലമായി ആഘോഷിക്കപ്പെടുന്നു. കോപ്പൻഹേഗനിലെ “യോഗ ഫോർ ഓൾ” പോലുള്ള പ്രമുഖ പരിപാടികളിൽ വൻതോതിലുള്ള പങ്കാളിത്തമാണ് ഉണ്ടാകാറുള്ളത്.
• ഡെന്മാർക്കിലുള്ള ഏകദേശം 21,000-ത്തോളം വരുന്ന ഇന്ത്യൻ സമൂഹം വിവിധ തൊഴിൽ മേഖലകളിൽ സജീവമായി സംഭാവന നൽകുന്നു.
• ഗാന്ധി പ്ലീൻ, ഇൻഡിയാകാജ്, ആർഹസിലെ ആർഹസ് സർവ്വകലാശാലയ്ക്ക് സമീപമുള്ള നെഹ്റു റോഡ് തുടങ്ങിയ പൊതുസ്ഥലങ്ങൾ ഇരുരാജ്യങ്ങളും തമ്മിലുള്ള ശക്തമായ ജനങ്ങൾ തമ്മിലുള്ള ബന്ധത്തിന്റെയും സാംസ്കാരിക ബന്ധത്തിന്റെയും പ്രതീകങ്ങളാണ്.
• 2026-ൽ ഇന്ത്യയിലെയും ഡെന്മാർക്കിലെയും നേതാക്കൾ പരസ്പരമുള്ള യാത്രാ സൗകര്യങ്ങൾ, പങ്കാളിത്തം എന്നിവ ശക്തിപ്പെടുത്തുന്നതിനെക്കുറിച്ചും ജനങ്ങൾ തമ്മിലുള്ള സമ്പർക്കങ്ങൾ വിപുലീകരിക്കുന്നതിനെക്കുറിച്ചും ചർച്ച നടത്തി.

ഫിൻലൻഡ്:

• 2024-25 വർഷത്തിൽ ഫിൻലൻഡുമായുള്ള ഉഭയകക്ഷി ചരക്കുവ്യാപാരത്തിന്റെ അളവ് 1.017 ബില്യൺ യുഎസ് ഡോളർ ആയിരുന്നു.
• അതേ വർഷം ഫിൻലൻഡിലേക്കുള്ള ഇന്ത്യയുടെ കയറ്റുമതി 356.37 മില്യൺ യുഎസ് ഡോളറും ഇറക്കുമതി 660.70 മില്യൺ യുഎസ് ഡോളറുമായി കണക്കാക്കപ്പെട്ടിരിക്കുന്നു.
• 2025-ൽ സേവന മേഖലയിലെ ഉഭയകക്ഷി വ്യാപാരം 1.9 ബില്യൺ യുഎസ് ഡോളർ ആയിരുന്നു. പല സുപ്രധാനമായ ഏറ്റെടുക്കലുകളും പങ്കാളിത്തങ്ങളും വഴി ഇന്ത്യയിൽ നിന്ന് ഫിൻലൻഡിലേക്കുള്ള നിക്ഷേപ പ്രവാഹം 2 ബില്യൺ യുഎസ് ഡോളറിലധികമാണ്. നൂറിലധികം ഫിന്നിഷ് കമ്പനികൾ ഇന്ത്യയിൽ പ്രവർത്തിക്കുന്നു. ഇന്ത്യയിലെ ഫിൻലൻഡിന്റെ നിക്ഷേപം 4 ബില്യൺ യുഎസ് ഡോളറായി ഉയർന്നിട്ടുണ്ട്.
• ഇന്ത്യൻ എംബസിയുടെ പിന്തുണയോടെ യോഗാ കേന്ദ്രങ്ങൾ, പെർഫോമിംഗ് ആർട്സ്, ഇന്ത്യൻ നൃത്ത വിദ്യാലയങ്ങൾ, സാംസ്കാരിക സംഘടനകൾ എന്നിവ വഴി ഫിൻലൻഡിൽ ഇന്ത്യൻ സംഗീതവും നൃത്തവും ആഘോഷങ്ങളും ഉൾപ്പെടുന്ന പതിവുപരിപാടികൾ പ്രോത്സാഹിപ്പിക്കപ്പെടുന്നു. ഇതുവഴി അവിടെ ഇന്ത്യൻ സംസ്കാരത്തിന് ശക്തമായ ദൃശ്യപരതയുണ്ട്.
• ‘തെർവെ-നമസ്തേ’ പരമ്പരയ്ക്ക് കീഴിൽ ഇന്ത്യൻ എംബസി അവിടുത്തെ ഇന്ത്യൻ വിദ്യാർത്ഥികളുമായി പതിവായി ആശയവിനിമയം നടത്താറുണ്ട്.
• ഫിൻലൻഡിലെ ഇന്ത്യൻ സമൂഹം ഏകദേശം 33,000-ത്തോളം വരും. ഐടി മേഖലയിൽ ശക്തമായ സാന്നിധ്യമുള്ള ഇവർക്ക് പുറമെ 2,400-ഓളം വിദ്യാർത്ഥികൾ അവിടെ ഉന്നതവിദ്യാഭ്യാസത്തിൽ ഏർപ്പെട്ടിരിക്കുന്നു.
• ഇ-വിസ സൗകര്യങ്ങളും ഹെൽസിങ്കിക്കും ന്യൂഡൽഹിക്കും ഇടയിലുള്ള നേരിട്ടുള്ള വിമാന സർവീസുകളും ലഭ്യമായതോടെ ഫിന്നിഷ് വിനോദസഞ്ചാരികൾ ഗോവ, കേരളം, സുവർണ്ണ ക്ഷേത്രം തുടങ്ങിയ സ്ഥലങ്ങൾ കൂടുതലായി സന്ദർശിക്കുന്നു. ഇത് ടൂറിസം, യാത്രാ ബന്ധങ്ങൾ വളരുന്നതിന് കാരണമാകുന്നു.
• 2026-ൽ ഫിൻലൻഡിന്റെ സാങ്കേതികവിദ്യയിലും നൂതനാശയ ആവാസവ്യവസ്ഥയിലും ഇന്ത്യൻ പ്രൊഫഷണലുകൾ നൽകുന്ന സുപ്രധാനമായ സംഭാവനകളെ ഇന്ത്യയും ഫിൻലൻഡും അംഗീകരിക്കുകയുണ്ടായി.

ഐസ്‌ലൻഡ്:

• 2024-25 വർഷത്തിൽ ഐസ്‌ലൻഡുമായുള്ള ഉഭയകക്ഷി വ്യാപാരത്തിന്റെ അളവ് 77.06 മില്യൺ യുഎസ് ഡോളറായിരുന്നു.

• അതേ വർഷം ഐസ്‌ലൻഡിലേക്കുള്ള ഇന്ത്യയുടെ കയറ്റുമതി 66.01 മില്യൺ യുഎസ് ഡോളറും ഇറക്കുമതി 11.05 മില്യൺ യുഎസ് ഡോളറുമായി കണക്കാക്കപ്പെട്ടിരിക്കുന്നു.
• ഇന്ത്യൻ സംസ്കാരം, പ്രത്യേകിച്ച് യോഗ, ശാസ്ത്രീയ സംഗീതം, നൃത്തം, ചിത്രകലകൾ, സിനിമകൾ, ഭക്ഷണം എന്നിവ ഐസ്‌ലൻഡിൽ ഏറെ ജനപ്രിയമാണ്. ഏകദേശം 600 ഇന്ത്യൻ പൗരന്മാർ ഐസ്‌ലൻഡിൽ താമസിക്കുന്നുണ്ട്.
• 2026-ൽ ഇന്ത്യയും ഐസ്‌ലൻഡും തമ്മിലുള്ള സഹകരണം ഇരുരാജ്യങ്ങളും അവലോകനം ചെയ്യുകയും ജനങ്ങൾ തമ്മിലുള്ള സമ്പർക്കം ശക്തിപ്പെടുത്തുക, സാംസ്കാരിക-വിനോദസഞ്ചാര കൈമാറ്റങ്ങൾ വിപുലീകരിക്കുക, ആർട്ടിക് ഗവേഷണത്തിലെ സഹകരണം വർധിപ്പിക്കുക എന്നിവയ്ക്ക് ഊന്നൽ നൽകുകയും ചെയ്തു.

നോർവേ:

• 2024-25 വർഷത്തിൽ ഇന്ത്യയും നോർവേയും തമ്മിലുള്ള ഉഭയകക്ഷി വ്യാപാരം 1.05 ബില്യൺ യുഎസ് ഡോളറായിരുന്നു.
• അതേ കാലയളവിൽ ഇന്ത്യ 630 മില്യൺ യുഎസ് ഡോളർ മൂല്യമുള്ള ചരക്കുകൾ കയറ്റുമതി ചെയ്യുകയും 420 മില്യൺ യുഎസ് ഡോളർ മൂല്യമുള്ള ചരക്കുകൾ ഇറക്കുമതി ചെയ്യുകയും ചെയ്തു.
• സേവന മേഖലയിലെ വ്യാപാരം ഏകദേശം 1 ബില്യൺ യുഎസ് ഡോളറോളമാണ്.
• നോർവേയുടെ ഗവൺമെന്റ് പെൻഷൻ ഫണ്ട് ഗ്ലോബൽ (GPFG) 2025 ഡിസംബർ വരെയുള്ള കണക്കനുസരിച്ച് ഇന്ത്യൻ ഓഹരിവിപണിയിൽ ഏകദേശം 28 ബില്യൺ യുഎസ് ഡോളറോളം നിക്ഷേപിച്ചിട്ടുണ്ട്.
• ഇതിനുപുറമെ 2000 ഏപ്രിൽ മുതൽ 2025 സെപ്റ്റംബർ വരെയുള്ള കാലയളവിൽ നോർവേയിൽ നിന്നുള്ള നേരിട്ടുള്ള വിദേശ നിക്ഷേപത്തിന്റെ (FDI) വരവ് 764 മില്യൺ യുഎസ് ഡോളറായിരുന്നു.
• ഏകദേശം 30,000 പേരടങ്ങുന്ന ഇന്ത്യൻ സമൂഹത്തിലൂടെ ഇന്ത്യയും നോർവേയും ശക്തമായ ജനങ്ങൾ തമ്മിലുള്ള ബന്ധം പങ്കിടുന്നു.
• ഇന്ത്യൻ വിദ്യാർത്ഥികളും ഗവേഷകരും നാൽപ്പതിലധികം വരുന്ന ഇന്ത്യൻ സംഘടനകളും നോർവേയിലെ സാംസ്കാരികവും സാമൂഹികവുമായ ജീവിതത്തിന് സജീവമായ സംഭാവനകൾ നൽകുന്നുണ്ട്.
• ടർബൻദാഗൻ, ഓസ്ലോ കളർ ഫെസ്റ്റിവൽ തുടങ്ങിയ പരിപാടികൾ നോർവേയിൽ ഇന്ത്യൻ സംസ്കാരത്തിന്റെയും നയതന്ത്രത്തിന്റെ സോഫ്റ്റ് പവർ മാർഗ്ഗങ്ങളുടെയും വളർന്നുവരുന്ന സ്വാധീനത്തെ പ്രതിഫലിപ്പിക്കുന്നു.

സ്വീഡൻ:

• 2024-ൽ ഇന്ത്യയും സ്വീഡനും തമ്മിലുള്ള ഉഭയകക്ഷി വ്യാപാരം 6.96 ബില്യൺ യുഎസ് ഡോളറായിരുന്നു.
• 2000 ഏപ്രിൽ മുതൽ 2024 ഡിസംബർ വരെയുള്ള കാലയളവിൽ സ്വീഡനിൽ നിന്നുള്ള സഞ്ചിത നേരിട്ടുള്ള വിദേശ നിക്ഷേപ ഇക്വിറ്റി വരവ് 2.596 ബില്യൺ യുഎസ് ഡോളറായിരുന്നു.
• 280-ഓളം സ്വീഡിഷ് കമ്പനികൾക്ക് ഇന്ത്യയിൽ ബിസിനസ്സ് സാന്നിധ്യമുണ്ട്. അതേസമയം അവിടെ ബിസിനസ്സ് സാന്നിധ്യമുള്ള ഇന്ത്യൻ കമ്പനികളുടെ എണ്ണം 2024-ൽ 75 ആയി ഉയർന്നു.
• ഇന്ത്യൻ ശാസ്ത്രീയ സംഗീതവും നൃത്തവും, യോഗ, ആയുർവേദം, ഇന്ത്യൻ ഉത്സവങ്ങൾ, സിനിമ തുടങ്ങിയ ഇന്ത്യൻ സാംസ്കാരിക പാരമ്പര്യങ്ങൾ സ്വീഡനിൽ വ്യാപകമായി പ്രശംസിക്കപ്പെടുന്നുണ്ട്.
• സ്വീഡിഷ് നഗരങ്ങളിലുടനീളം അന്താരാഷ്ട്ര യോഗാ ദിനം ആഘോഷിക്കുന്നത് ഇന്ത്യയുടെ വളർന്നുവരുന്ന സാംസ്കാരിക സ്വാധീനത്തെയാണ് കാണിക്കുന്നത്.
• 'നമസ്തേ സ്റ്റോക്ക്ഹോം' എന്ന വാർഷിക സാംസ്കാരിക ആഘോഷം ആയിരക്കണക്കിന് സന്ദർശകരെ ആകർഷിക്കുകയും ഇന്ത്യൻ കലകളെയും അന്തർ-സാംസ്കാരിക കൈമാറ്റങ്ങളെയും പ്രോത്സാഹിപ്പിക്കുകയും ചെയ്യുന്നു.
• ഇന്ത്യൻ, സ്വീഡിഷ് സർവ്വകലാശാലകൾ തമ്മിൽ സജീവമായ പങ്കാളിത്തമുണ്ട്.
• ഉപ്സലയിലെ ഇൻഡോളജി പഠനങ്ങൾക്ക് ഏകദേശം 200 വർഷത്തെ പഴക്കമുണ്ട്. ഇത് ഇന്ത്യൻ സംസ്കാരവുമായുള്ള അവിടുത്തെ ആഴത്തിലുള്ള പണ്ഡിതോചിതമായ ഇടപെടലിനെ കാണിക്കുന്നു.
• കായികരംഗവും സിനിമയും ഉഭയകക്ഷിബന്ധങ്ങൾക്ക് സംഭാവന നൽകുന്നു.
• 2021-ൽ ഇന്ത്യൻ വനിതാ ഫുട്ബോൾ ടീം സ്വീഡൻ സന്ദർശിച്ചു. 2024-ൽ ഇന്ത്യൻ ഡേവിസ് കപ്പ് ടീം സന്ദർശനം നടത്തി. 2024-ൽ ഇന്ത്യയുടെ അന്താരാഷ്ട്ര ചലച്ചിത്രമേളയിൽ സ്വീഡിഷ് ചലച്ചിത്ര സംവിധായകൻ ലെവൻ അകിന് ICFT-UNESCO ഗാന്ധി മെഡൽ ലഭിച്ചു.

• ഏകദേശം 88,000 വരുന്ന ഇന്ത്യൻ സമൂഹം ഇന്ത്യൻ സംസ്കാരം നിലനിർത്തുന്നതിനും പ്രോത്സാഹിപ്പിക്കുന്നതിനും വലിയൊരു പങ്ക് വഹിക്കുന്നു.

നൂതനാശയം, സുസ്ഥിരത, തന്ത്രപ്രധാന വിശ്വാസം എന്നിവയാൽ രൂപപ്പെടുത്തിയ ഒരു പങ്കാളിത്തമാണ് ഇന്ത്യയും നോർഡിക് രാജ്യങ്ങളും ചേർന്ന് കെട്ടിപ്പടുക്കുന്നത്. ഈ ബന്ധം ഇപ്പോൾ ശുദ്ധോർജ്ജം, ഡിജിറ്റൽ പരിവർത്തനം, പ്രതിരോധശേഷിയുള്ള വിതരണ ശൃംഖലകൾ, ഗവേഷണം, സമുദ്രമേഖലയിലെ സഹകരണം എന്നിവയിലേക്ക് വ്യാപിച്ചുകിടക്കുന്നു. നോർഡിക് രാജ്യങ്ങളുടെ വൈദഗ്ധ്യവും ഇന്ത്യയുടെ വിപുലമായ വ്യാപ്തിയും പ്രതിഭയും ഒത്തുചേരുമ്പോൾ അത് ദീർഘകാല സഹകരണത്തിനുള്ള ശക്തമായ അവസരങ്ങൾ സൃഷ്ടിക്കുന്നു. വളർന്നുവരുന്ന സ്ഥാപനപരവും സാമ്പത്തികവും സാംസ്കാരികവുമായ ബന്ധങ്ങളോടെ ഈ പങ്കാളിത്തം എല്ലാവരെയും ഉൾക്കൊള്ളുന്നതും സാങ്കേതികവിദ്യയിൽ അധിഷ്ഠിതമായതും സുസ്ഥിരവുമായ ആഗോള സഹകരണത്തിനുള്ള ഒരു സുപ്രധാന മാതൃകയായി ക്രമേണ ഉയർന്നുവരുകയാണ്.

മൂന്നാമത് നോർഡിക് ഉച്ചകോടി: ദീർഘകാല തന്ത്രപ്രധാന പങ്കാളിത്തത്തിലേക്കുള്ള ഭാവി ചുവടുകൾ

മൂന്നാമത് നോർഡിക് ഉച്ചകോടി ഇന്ത്യയും നോർഡിക് രാജ്യങ്ങളും തമ്മിലുള്ള സുപ്രധാന ചർച്ചകൾക്ക് സാക്ഷ്യം വഹിച്ചു. കഴിഞ്ഞ ദശകത്തിൽ ഉഭയകക്ഷിവ്യാപാരത്തിലുണ്ടായ നാലിരട്ടി വർധനവും നിക്ഷേപപ്രവാഹത്തിലുണ്ടായ ഏകദേശം 200 ശതമാനത്തോളം വളർച്ചയും ഇത് ഇന്ത്യയുടെ സാമ്പത്തിക വളർച്ചയിലുണ്ടാക്കിയ നല്ല സ്വാധീനവും അംഗീകരിച്ചുകൊണ്ട് ഇന്ത്യയും നോർഡിക് രാജ്യങ്ങളും തമ്മിലുള്ള ബന്ധത്തെ ഹരിത സാങ്കേതികവിദ്യയും നൂതനാശയവും മുൻനിർത്തിയുള്ള തന്ത്രപ്രധാന പങ്കാളിത്തത്തിലേക്ക് മാറ്റാൻ സമ്മതിച്ചു. ഈ സംരംഭത്തിന് കീഴിൽ, ഇന്ത്യ താഴെ പറയുന്നവ ലക്ഷ്യമിടുന്നു:

• ഭൂതാപ ഊർജ്ജ, മത്സ്യബന്ധന മേഖലകളിൽ ഐസ്‌ലൻഡുമായി സഹകരിക്കുക
• സമുദ്ര സമ്പദ്‌വ്യവസ്ഥ, ആർട്ടിക് മേഖലയിലെ സഹകരണം എന്നിവയിൽ നോർവേയുമായി പങ്കാളിത്തത്തിലേർപ്പെടുക
• ഒപ്പം സമുദ്ര, സുസ്ഥിരതാ മേഖലകളിൽ നോർഡിക് രാജ്യങ്ങളുമായി ചേർന്ന് പ്രവർത്തിക്കുക

ഇതിനുപുറമെ അത്യാധുനിക ഉത്പാദനം, പ്രതിരോധം, ടെലികോം, ഡിജിറ്റൽ സാങ്കേതികവിദ്യകൾ, സൈബർ സുരക്ഷ, ഹെൽത്ത് ടെക്, ഗവേഷണവും നൂതനാശയവും, ആർട്ടിക്-ധ്രുവ പ്രദേശങ്ങളിലെ ഗവേഷണം എന്നിവയിലെ സഹകരണവും ചർച്ച ചെയ്യപ്പെട്ടു. ഈ പങ്കാളിത്തം സുസ്ഥിര വികസനത്തെ പിന്തുണയ്ക്കുന്നതോടൊപ്പം തന്നെ ഇന്ത്യയിലും നോർഡിക് മേഖലയിലും സാമ്പത്തിക വിപുലീകരണം, സാങ്കേതിക പുരോഗതി, തൊഴിലവസരങ്ങൾ സൃഷ്ടിക്കൽ എന്നിവയ്ക്കുള്ള അവസരങ്ങൾ ഒരുക്കുകയും ചെയ്യുന്നു. ബഹുമുഖ സ്ഥാപനങ്ങളിൽ അടിയന്തര പരിഷ്കരണങ്ങൾ വരുത്തേണ്ടതിന്റെ ആവശ്യകത രാജ്യങ്ങൾ അടിവരയിട്ടുപറയുകയും ഭീകരവാദത്തിനെതിരെയുള്ള സംയുക്ത നിലപാട് ആവർത്തിക്കുകയും ചെയ്തു. അടുത്തിടെ ഒപ്പുവെച്ച ഇന്ത്യ - യൂറോപ്യൻ ഫ്രീ ട്രേഡ് അസോസിയേഷൻ (EFTA) വ്യാപാര സാമ്പത്തിക പങ്കാളിത്ത കരാർ (TEPA), ഇന്ത്യ-നോർഡിക് ബന്ധങ്ങളിൽ ഒരു "പുതിയ സുവർണ്ണ കാലഘട്ടത്തിന്" തുടക്കം കുറിക്കും.

ഉച്ചകോടിയുടെ പ്രധാന നേട്ടങ്ങൾ

പുനരുപയോഗ ഊർജ്ജം, ഗ്രീൻ ഹൈഡ്രജൻ, ഡിജിറ്റൽ നൂതനാശയം, സുസ്ഥിര ഉത്പാദനം, കാലാവസ്ഥാ വ്യതിയാനത്തിനെതിരെയുള്ള പ്രവർത്തനങ്ങൾ എന്നിവയിൽ ശ്രദ്ധ കേന്ദ്രീകരിച്ചുകൊണ്ട് തങ്ങളുടെ ബന്ധത്തെ ഒരു 'ഹരിത സാങ്കേതികവിദ്യയും നൂതനാശയവും മുൻനിർത്തിയുള്ള തന്ത്രപ്രധാന പങ്കാളിത്തത്തിലേക്ക്' ഉയർത്താൻ ഉച്ചകോടിയിൽ ഇന്ത്യയും നോർഡിക് രാജ്യങ്ങളും സമ്മതിച്ചു.

നിയമാധിഷ്ഠിതമായ ഒരു അന്താരാഷ്ട്ര വ്യവസ്ഥിതിയെയും സുസ്ഥിര വികസന ലക്ഷ്യങ്ങളെയും പിന്തുണയ്ക്കുന്നതോടൊപ്പം തന്നെ വ്യാപാരം, നിക്ഷേപം, ഗവേഷണ സഹകരണം, പ്രതിരോധശേഷിയുള്ള വിതരണ ശൃംഖലകൾ, ജനങ്ങൾ തമ്മിലുള്ള സമ്പർക്കം എന്നിവ വിപുലീകരിക്കാനും അവർ പ്രതിജ്ഞാബദ്ധത പങ്കുവെച്ചു.

നേട്ടം 1: ഇന്ത്യ-നോർഡിക് ഹരിത സാങ്കേതികവിദ്യയും നൂതനാശയവും മുൻനിർത്തിയുള്ള തന്ത്രപ്രധാന പങ്കാളിത്തം

ഹരിത സാങ്കേതികവിദ്യയും നവീകരണവും മുൻനിർത്തിയുള്ള തന്ത്രപരമായ പങ്കാളിത്തം ഭാവിയിൽ സുസ്ഥിര സാങ്കേതികവിദ്യകളുടെ ഉപയോഗത്തിനും അവ സ്വീകരിക്കുന്നതിനും, സുസ്ഥിരമായ വളർച്ചയ്ക്കും മാനേജ്‌മെന്റിനും, വിഭവങ്ങളുടെ പരമാവധി അനുയോജ്യമായ ഉപയോഗത്തിനും നൂതനാശയത്തിനും വഴിതുറക്കും. ഡിജിറ്റൽ ഇൻഫ്രാസ്ട്രക്ചർ (ഡിജിറ്റൽ അടിസ്ഥാന സൗകര്യങ്ങൾ) ശക്തിപ്പെടുത്തുന്നത് ഭരണനിർവ്വഹണത്തെയും തടസ്സമില്ലാത്ത സേവന വിതരണത്തെയും കൂടുതൽ സ്വാധീനിക്കും. ഈ നേട്ടം രാജ്യത്തിന്റെ കാലാവസ്ഥാ വ്യതിയാന ലഘൂകരണത്തിലും ഊർജ്ജ സുരക്ഷയിലും നല്ലൊരു സ്വാധീനം ചെലുത്തും. ഇതിനുപുറമെ ഇത് ഹരിത തൊഴിലവസരങ്ങൾ സൃഷ്ടിക്കുകയും ഭരണം ശക്തിപ്പെടുത്തുകയും നോർഡിക് രാജ്യങ്ങളുമായുള്ള വ്യാപാര-നിക്ഷേപ ബന്ധങ്ങൾ വർദ്ധിപ്പിക്കുകയും ചെയ്യും. ജലത്തിന്റെ സുസ്ഥിരമായ ഉപയോഗം, അതിന്റെ പുനരുപയോഗം, മെച്ചപ്പെട്ട ജല പരിപാലനം എന്നിവയിലുള്ള സഹകരണം ജീവിതനിലവാരം ഉയർത്തുകയും ദീർഘകാല സാമ്പത്തിക വളർച്ചയെ പിന്തുണയ്ക്കുകയും ചെയ്യും. കൂട്ടായ ഗവേഷണവും വിദ്യാഭ്യാസവും ഇന്ത്യൻ വിദ്യാർത്ഥികൾക്കും ഗവേഷകർക്കും ഫാക്കൽറ്റികൾക്കും കൂടുതൽ മികച്ച അവസരങ്ങളും അനുഭവങ്ങളും നൽകുന്നതിനൊപ്പം ഗവേഷണത്തിന്റെ ഗുണനിലവാരം വർധിപ്പിക്കുകയും ചെയ്യും.

നേട്ടം 2: ഇന്ത്യ-EFTA TEPA: ഇന്ത്യ-നോർഡിക് ബന്ധങ്ങളിലെ സ്വാധീനം

ഇന്ത്യ-EFTA TEPA വിപണി പ്രവേശനക്ഷമത മെച്ചപ്പെടുത്തുന്നതിനും വ്യാപാര തടസ്സങ്ങൾ കുറയ്ക്കുന്നതിനും വ്യാപാര-നിക്ഷേപ പ്രവാഹങ്ങളെ പ്രോത്സാഹിപ്പിക്കുന്നതിനും മൂല്യ ശൃംഖലകളെ സംയോജിപ്പിക്കുന്നതിനും സഹായിക്കും. നോർഡിക് രാജ്യങ്ങളുമായുള്ള ശക്തമായ സഖ്യത്തോടൊപ്പം ഈ സ്വതന്ത്ര വ്യാപാര കരാർ തൊഴിലവസരങ്ങൾ സൃഷ്ടിക്കൽ, നൂതനാശയം, സുസ്ഥിര വികസനം എന്നിവയെ പിന്തുണയ്ക്കും.

നേട്ടം 3: കാലാവസ്ഥാ പ്രവർത്തനങ്ങളിലെ ഉദ്യമങ്ങൾ

കാലാവസ്ഥാ വ്യതിയാന മേഖലയിലെ ഈ ഉദ്യമം പ്രധാനമായും ലഘൂകരണത്തിൽ കേന്ദ്രീകരിച്ചുള്ളതാണ്. ഈ രംഗത്തെ സഹകരണം കാലാവസ്ഥയുമായി ബന്ധപ്പെട്ട വെല്ലുവിളികളെ നേരിടാൻ സഹായിക്കുക മാത്രമല്ല, ഹരിത തൊഴിലവസരങ്ങൾ സൃഷ്ടിക്കുകയും ഉഭയകക്ഷി വ്യാപാരം വർധിപ്പിക്കുകയും കൂടുതൽ നിക്ഷേപങ്ങളെ ആകർഷിക്കുകയും ചെയ്യും. തത്ഫലമായി ഇത് കൂടുതൽ സുസ്ഥിരമായ ഒരു സമ്പദ്‌വ്യവസ്ഥ കെട്ടിപ്പടുക്കുന്നതിന് സംഭാവന നൽകുകയും ദീർഘകാല സാമ്പത്തിക വളർച്ചയെ പിന്തുണയ്ക്കുകയും ചെയ്യും.

നേട്ടം 4: ആർട്ടിക് മേഖലയിലെ ഇന്ത്യ-നോർഡിക് സഹകരണം

ഈ സഹകരണ സംരംഭം ഇന്ത്യയുടെ ആർട്ടിക് നയത്തിന്റെ ഭാഗമാണ്. ധ്രുവപ്രദേശങ്ങളിലെ ഗവേഷണത്തിലുള്ള സഹകരണത്തിന് കാലാവസ്ഥാ വ്യവസ്ഥകൾ, പരിസ്ഥിതി സംരക്ഷണം, സുസ്ഥിരത, കൂടാതെ ദ്വീപുകൾ എന്നിവയിൽ ദീർഘകാല സ്വാധീനമുണ്ട്. കാലാവസ്ഥാ വ്യതിയാനത്തെ നേരിടുന്നതും സുസ്ഥിരമായ ഒരു ആർട്ടിക് പ്രദേശം ഉറപ്പാക്കുന്നതും ഇന്ത്യയുടെ മൺസൂൺ ഘടന, പരിസ്ഥിതി സന്തുലിതാവസ്ഥ, സുസ്ഥിരത, കൂടാതെ ഏറ്റവും പ്രധാനമായി കാർഷിക ഉൽപ്പാദനക്ഷമത എന്നിവ സംരക്ഷിക്കുന്നതിന് നിർണായകമാണ്.

നേട്ടം 5: STEM മേഖലകളിലെ ഗവേഷണ സഹകരണം

ഈ ഗവേഷണ സംരംഭം പുതിയ തൊഴിലവസരങ്ങൾ സൃഷ്ടിക്കുന്നതിനും ഗവേഷണ-വികസന (R&D) പ്രവർത്തനങ്ങളുടെ വിപുലീകരണത്തിനും സാങ്കേതികവിദ്യാ കൈമാറ്റം പ്രോത്സാഹിപ്പിക്കുന്നതിനും അക്കാദമിക സഹകരണവും ഗവേഷണ ഗുണനിലവാരവും ശക്തിപ്പെടുത്തുന്നതിനും സംഭാവന നൽകും. 6G ഉൾപ്പെടെയുള്ള അടുത്ത തലമുറാ ആശയവിനിമയ സാങ്കേതികവിദ്യകളിലെ ഗവേഷണം മുന്നോട്ടുകൊണ്ടുപോകുന്നത് ഡിജിറ്റൽ സമ്പദ്‌വ്യവസ്ഥയ്ക്ക് കൂടുതൽ കരുത്ത് പകരുകയും രാജ്യത്തിന്റെ ഡിജിറ്റൽ അടിസ്ഥാന സൗകര്യങ്ങൾ മെച്ചപ്പെടുത്തുകയും ചെയ്യും.

നേട്ടം 6: സമുദ്ര സമ്പദ്‌വ്യവസ്ഥയിലെ സഹകരണം

ശക്തമായ ഒരു സമുദ്ര സമ്പദ്‌വ്യവസ്ഥയിലെ സഹകരണം സുസ്ഥിരത ഉറപ്പാക്കുന്നതോടൊപ്പം തന്നെ സാമ്പത്തിക വളർച്ച ശക്തിപ്പെടുത്തുകയും തൊഴിലവസരങ്ങൾ സൃഷ്ടിക്കുകയും വ്യാപാരം വർധിപ്പിക്കുകയും, ദീർഘകാല പരിസ്ഥിതി-കാലാവസ്ഥാ പ്രതിരോധശേഷിയെ പിന്തുണയ്ക്കുകയും ചെയ്യുന്നു. സമുദ്ര-കടൽ വിഭവങ്ങളുടെ സുസ്ഥിരമായ ഉപയോഗത്തിലാണ് സമുദ്ര സമ്പദ്‌വ്യവസ്ഥ പ്രധാനമായും ശ്രദ്ധ കേന്ദ്രീകരിക്കുന്നത്. സമുദ്രവിഭവങ്ങളുടെ സുസ്ഥിര ഉപയോഗം പ്രോത്സാഹിപ്പിക്കുന്നതിലൂടെയും സമുദ്രമേഖലയിലെ കണക്റ്റിവിറ്റി ശക്തിപ്പെടുത്തുന്നതിലൂടെയും പങ്കാളിത്ത രാജ്യങ്ങൾക്കിടയിൽ പ്രാദേശിക സമുദ്ര സുരക്ഷ വർധിപ്പിക്കുന്നതിലൂടെയും ഇൻഡോ-പസഫിക് പ്രദേശം സുസ്ഥിരവും സുരക്ഷിതവുമായി ഉറപ്പാക്കുന്നതിനും സമുദ്ര സമ്പദ്‌വ്യവസ്ഥയിലെ സഹകരണം സംഭാവന നൽകുന്നു.

നേട്ടം 7: പ്രതിഭകളുടെ മൊബിലിറ്റി

ഗവേഷണത്തിലും വിദ്യാഭ്യാസത്തിലുമുള്ള സഹകരണം ഇന്ത്യൻ വിദ്യാർത്ഥികൾക്കും അക്കാദമിക് വിദഗ്ധർക്കും ഗവേഷകർക്കും പുതിയ കാഴ്ചപ്പാടുകളും ആഗോള പഠനാന്തരീക്ഷങ്ങളിൽ കൂടുതൽ മികച്ച അവസരങ്ങളും അനുഭവങ്ങളും നൽകും. ഗവേഷണത്തിലെ വർധിച്ച സഹകരണം ഗവേഷണ ഫലങ്ങളുടെ ഗുണനിലവാരവും അളവും വർധിപ്പിക്കും. ഇത് കഴിവുകൾ വർധിപ്പിക്കുന്നതിനും സാമ്പത്തിക വളർച്ചയ്ക്ക് വേഗം കൂട്ടുന്നതിനും നൂതനാശയത്തെയും ബിസിനസ്സുകളെയും സ്റ്റാർട്ടപ്പുകളെയും പ്രോത്സാഹിപ്പിക്കുന്നതിനും സഹായിക്കും.

നേട്ടം 8: പ്രതിരോധ ഉത്പാദനത്തിലെ സഹകരണം

ഇന്ത്യൻ പ്രതിരോധ വ്യവസായ മേഖലയിൽ 100% നേരിട്ടുള്ള വിദേശ നിക്ഷേപം (FDI) അനുവദിച്ചുകൊണ്ട് പ്രതിരോധ വ്യവസായ സഹകരണം വികസിപ്പിക്കുന്നത് സാങ്കേതികവിദ്യാ കൈമാറ്റം, ഗവേഷണം, നൂതനാശയം എന്നിവയെ സഹായിക്കുകയും ആഭ്യന്തര പ്രതിരോധ ഉത്പാദനം വർധിപ്പിക്കുകയും കൂടുതൽ തൊഴിലവസരങ്ങൾ സൃഷ്ടിക്കുകയും കയറ്റുമതിയും പ്രതിരോധ ഉത്പാദനത്തിന്റെ കാര്യക്ഷമതയും കൂട്ടുകയും ചെയ്യും. അതിലുപരിയായി ഇത് പ്രതിരോധ സജ്ജത ശക്തിപ്പെടുത്തുന്നതിനും സഹായിക്കും.

കരുത്തുറ്റ ഇന്ത്യ-നോർഡിക് പങ്കാളിത്തത്തിലേക്ക്

ഇന്ത്യയും നോർഡിക് രാജ്യങ്ങളും തമ്മിലുള്ള ബന്ധം ക്രമാനുഗതമായി വികസിക്കുകയും ശക്തിപ്പെടുകയും ചെയ്തുകൊണ്ടിരിക്കുകയാണ്. സമീപ വർഷങ്ങളിലെ നിരവധി ഉഭയകക്ഷി സംരംഭങ്ങളിലൂടെ ഇത് കൂടുതൽ ശക്തമാക്കപ്പെട്ടിട്ടുണ്ട്. ഉച്ചകോടിയുടെ നേട്ടങ്ങൾ ഈ പങ്കാളിത്തത്തെ ഒരു 'ഹരിത സാങ്കേതികവിദ്യയും നൂതനാശയവും മുൻനിർത്തിയുള്ള തന്ത്രപ്രധാന പങ്കാളിത്തത്തിലേക്ക്' കൂടുതൽ ഉയർത്താൻ ലക്ഷ്യമിടുന്നു. ദീർഘകാല ഊർജ്ജ പങ്കാളിത്തം, കാലാവസ്ഥാ വ്യതിയാന ലഘൂകരണം, വ്യാപാര-നിക്ഷേപ ബന്ധങ്ങൾ, ഡിജിറ്റൽ നവീകരണം, സമുദ്ര സമ്പദ്‌വ്യവസ്ഥ, സമുദ്രമേഖലയിലെ സഹകരണം, STEM മേഖലകളിലെ സഹകരണം, പ്രതിരോധം തുടങ്ങിയ മേഖലകളിൽ സഹകരണം ആഴത്തിലാക്കാൻ ഈ ഉച്ചകോടി ശക്തമായ ഒരു പ്രേരണ നൽകിയിട്ടുണ്ട്. വളർന്നുവരുന്ന ഈ ഇടപെടൽ ഇന്ത്യ - EFTA വ്യാപാര സാമ്പത്തിക പങ്കാളിത്ത കരാറിലൂടെ (TEPA) കൂടുതൽ ശക്തിപ്പെടുന്നു. ഇത് സുസ്ഥിര സാമ്പത്തിക വികസനം പ്രോത്സാഹിപ്പിക്കുന്നതോടൊപ്പം തന്നെ ഇന്ത്യയും നോർഡിക് മേഖലയും തമ്മിലുള്ള ഉഭയകക്ഷി സാമ്പത്തിക ബന്ധങ്ങളെ മെച്ചപ്പെടുത്തുമെന്നും പ്രതീക്ഷിക്കുന്നു. സാമ്പത്തിക പങ്കാളിത്തം ശക്തിപ്പെടുത്തുന്നതിനുള്ള സംരംഭങ്ങൾക്ക് പുറമെ 'സോഫ്റ്റ് പവർ' സമീപനവും ബന്ധങ്ങൾ കൂടുതൽ ആഴത്തിലാക്കുന്നതിനും ദൃഢമാക്കുന്നതിനും സഹായിച്ചിട്ടുണ്ട്.

അവലംബം

1. Ministry of External Affairs

• https://www.indianembassycopenhagen.gov.in/page/india-denmark-relations-india/
•  https://www.indembhelsinki.gov.in/india-finland-bilateral-relation-2025.php
• https://indianembassyreykjavik.gov.in/pages/NTI,
• https://www.mea.gov.in/Portal/ForeignRelation/NorwayMay26Brief.pdf
• https://www.indembassysweden.gov.in/page/india-sweden-relations/
• https://www.mea.gov.in/Portal/ForeignRelation/India-Denmark-2025.pdf
• https://www.mea.gov.in/press-releases.htm?dtl/41185/Prime_Ministers_meeting_with_Acting_Prime_Minister_of_Denmark_on_the_margins_of_the_3rd_IndiaNordic_Summit
• https://www.mea.gov.in/press-releases.htm?dtl/41186/Prime_Ministers_meeting_with_Prime_Minister_of_Finland_on_the_margins_of_the_3rd_IndiaNordic_Summit
• https://www.mea.gov.in/press-releases.htm?dtl/41187/Prime_Ministers_meeting_with_Prime_Minister_of_Iceland_on_the_margins_of_the_3rd_IndiaNordic_Summit

2. Press Information Bureau

• https://www.pib.gov.in/PressReleasePage.aspx?PRID=1806993&reg=3&lang=2

3. Ministry of Earth Sciences

• https://www.moes.gov.in/static/uploads/2025/07/23b232e6d6a8a7d2f1d9b187a2855330.pdf

4. DD News

• https://ddnews.gov.in/en/india-nordic-ties-entering-new-golden-era-with-trade-agreements-pm-modi/

See In PDF

***

SK