पत्र सूचना कार्यालय

ভাৰত–ইউ.এ.ই.ৰ কৌশলগত অংশীদাৰিত্ব ৰাজনৈতিক আস্থা, অৰ্থনৈতিক সহযোগিতা, আৰু জনসাধাৰণৰ মাজত সংযোগৰ নিৰ্ভৰশীল। ভাৰতৰ প্ৰধানমন্ত্ৰী নৰেন্দ্ৰ মোডীৰ ২০২৬ চনৰ ১৫ মে’ৰ ইউ.এ.ই. ভ্ৰমণে শক্তি সুৰক্ষা, প্ৰতিৰক্ষা, সামুদ্ৰিক আন্তঃগাঁথনি, কৃত্ৰিম বুদ্ধিমত্তা, ছুপাৰ কম্পিউটিং, বিনিয়োগ আৰু দক্ষতা বিকাশৰ ক্ষেত্ৰত সহযোগিতা আৰু অধিক শক্তিশালী কৰে। কৌশলগত, প্ৰযুক্তিগত আৰু অৰ্থনৈতিক খণ্ডত দুয়োখন দেশৰ মাজত ক্ৰমাৎ বৃদ্ধি পোৱা অভিসৰণে দীৰ্ঘম্যাদী উন্নয়ন, আঞ্চলিক স্থিতিশীলতা, উদ্ভাৱন আৰু ভৱিষ্যতৰ বাবে সাজু উন্নয়নৰ দিশত এক অংশীদাৰিত্বৰ দায়বদ্ধতাক প্ৰতিফলিত কৰে।

ঐতিহাসিক সম্পৰ্কৰ পৰা এক ব্যাপক কৌশলগত অংশীদাৰিত্বলৈ

ভাৰত আৰু সংযুক্ত আৰব আমিৰশ্বাহীৰ মাজত বাণিজ্য, সাংস্কৃতিক বিনিময় আৰু আৰব সাগৰৰ শক্তিশালী সম্প্ৰদায়ৰ সংযোগৰ দ্বাৰা গঢ় লৈ উঠা দীৰ্ঘদিনীয়া সম্পৰ্ক আছে। মুকুতা, খেজুৰ, মছলা, বস্ত্ৰ, মৎস্যৰ ব্যৱসায়ে পশ্চিম ভাৰতক উপসাগৰীয় অঞ্চলৰ সৈতে যুগ যুগ ধৰি সংযোগ কৰি ৰাখিছিল। ১৯৭২ চনত দুয়োখন দেশৰ মাজত আনুষ্ঠানিক কূটনৈতিক সম্পৰ্ক স্থাপন কৰা হয় আৰু তাৰ পিছতেই আবুধাবি আৰু নতুন দিল্লীত দূতাবাস মুকলি কৰা হয়।

২০১৫ চনত প্ৰধানমন্ত্ৰী নৰেন্দ্ৰ মোদীয়ে ইউ.এ.ই. ভ্ৰমণ কৰাৰ পিছতে দ্বিপাক্ষিক সম্পৰ্কই এক নতুন গতি লাভ কৰে। এই ভ্ৰমণ আছিল ৩৪ বছৰৰ পিছত ভাৰতৰ প্ৰধানমন্ত্ৰীৰ প্ৰথম ভ্ৰমণ। ২০১৪ চনৰ পৰা প্ৰধানমন্ত্ৰী মোদীয়ে ৭ বাৰ ইউ.এ.ই. ভ্ৰমণ কৰিছে। ইউ.এ.ই.ৰ ৰাষ্ট্ৰপতি শ্বেখ মহম্মদ বিন জায়েদ আল নাহিয়ানেও এইপৰ্যন্ত ৫ বাৰ ভাৰত ভ্ৰমণ কৰিছে। এই সময়ছোৱাত বাণিজ্য, বিনিয়োগ, শক্তি, প্ৰযুক্তি, প্ৰতিৰক্ষা আৰু ডিজিটেল অৰ্থনীতিৰ ক্ষেত্ৰত সহযোগিতা সম্প্ৰসাৰিত হৈছে। ইউ.এ.ই. বৰ্তমান ভাৰতৰ অন্যতম বৃহৎ বাণিজ্যিক অংশীদাৰ, শক্তি যোগানকাৰী প্ৰধান, আন্তঃগাঁথনি আৰু নবীকৰণযোগ্য শক্তিৰ মূল বিনিয়োগকাৰী।

বাণিজ্য আৰু বিনিয়োগৰ সম্পৰ্ক: দুয়োখন দেশৰ মাজত দ্বিপাক্ষিক ব্যৱসায়িক সামগ্ৰীৰ বাণিজ্যই প্ৰথমবাৰৰ বাবে ১০০ বিলিয়ন মাৰ্কিন ডলাৰ অতিক্ৰম কৰি ২০২৫-২৬ বিত্তীয় বৰ্ষত ১০১.২৫ বিলিয়ন মাৰ্কিন ডলাৰত উপনীত হয়। দুয়োপক্ষই ২০৩২ চনৰ ভিতৰত দ্বিপাক্ষিক বাণিজ্য দুগুণ কৰি ২০০ বিলিয়ন মাৰ্কিন ডলাৰলৈ বৃদ্ধি কৰাৰ প্ৰতিশ্ৰুতি দিছে।

বিনিয়োগো এই দ্বিপাক্ষিক সম্পৰ্কৰ এক উল্লেখযোগ্য উপাদান হৈ পৰিছে। ২০২৪ চনৰ ফেব্ৰুৱাৰী মাহত দুয়োখন ৰাষ্ট্ৰই দ্বিপাক্ষিক বিনিয়োগ চুক্তি স্বাক্ষৰ কৰে যিখন ২০২৪ চনৰ ৩১ আগষ্টৰ পৰা কাৰ্যকৰী হয়।২০০০ চনৰ এপ্ৰিলৰ পৰা ২০২৫ চনৰ মাৰ্চলৈকে ইউ.এ.ই.ৰ পৰা ভাৰতলৈ ক্ৰমবৰ্ধমান প্ৰত্যক্ষ বিদেশী বিনিয়োগৰ পৰিমাণ আছিল ২৫.১৯ বিলিয়ন মাৰ্কিন ডলাৰ, যাৰ ফলত ইউ.এ.ই. ভাৰতৰ সপ্তম বৃহত্তম বহিঃৰাষ্ট্ৰ বিনিয়োগকাৰী হিচাপে পৰিগণিত হয়। ইউ.এ.ই.ৰ বিনিয়োগসমূহ বিশেষ বৈচিত্ৰ্যময় যিয়ে ৰিয়েল এষ্টেট, আন্তঃগাঁথনি, শক্তি, ব্যক্তিগত ইকুইটি আৰু বিত্তীয় সেৱাৰ দৰে খণ্ডৰ ওপৰত গুৰুত্ব আৰোপ কৰে। ভাৰতত ইউ.এ.ই.ৰ ছ’ভাৰেইন ৱেলথ ফাণ্ড (SWF)ৰ শক্তিশালী উপস্থিতি আছে। ভাৰত আৰু ইউ.এ.ই.ৰ মাজত স্থানীয় মুদ্ৰা নিষ্পত্তি (L.C.S.) প্ৰণালী বাহাল আছে যাৰ ফলত দ্বিপাক্ষিক বাণিজ্য আৰু প্ৰেৰণবোৰ ভাৰতীয় টকা আৰু এ.ই.ডি.-ত নিষ্পত্তি কৰিব পাৰি, যাৰ ফলত ডলাৰৰ নিৰ্ভৰশীলতা আৰু লেনদেনৰ ব্যয় হ্ৰাস হয়।

শক্তি বাণিজ্যঃ ভাৰত আৰু ইউ.এ.ই.ৰ মাজত বিশেষকৈ হাইড্ৰ’কাৰ্বন খণ্ডৰ ক্ষেত্ৰত ঘনিষ্ঠ আৰু গতিশীল অংশীদাৰিত্ব আছে। ২০২৪-২৫ বিত্তীয় বৰ্ষত ইউ.এ.ই.এ খাৰুৱা তেলৰ চতুৰ্থ বৃহত্তম উৎস, এল এন জিৰ তৃতীয় বৃহত্তম উৎস, এল পি জিৰ সৰ্ববৃহৎ যোগানকাৰী আৰু ভাৰতৰ সম্পূৰ্ণ পেট্ৰলিয়াম সামগ্ৰীৰ দ্বিতীয় বৃহত্তম ৰপ্তানি গন্তব্যস্থান হিচাপে থিয় দিছিল। বৰ্তমান ভাৰতৰ ষ্ট্ৰেটেজিক পেট্ৰলিয়াম ৰিজাৰ্ভ কাৰ্যসূচীত অংশগ্ৰহণ কৰা একমাত্ৰ দেশ হ'ব ইউ.এ.ই.।

দ্বিপাক্ষিক সংযোগ: শক্তি আৰু বাণিজ্যৰ উপৰিও সংযোগ আৰু লজিষ্টিক সহযোগিতাও দ্বিপাক্ষিক অংশীদাৰিত্বৰ গুৰুত্বপূৰ্ণ স্তম্ভ হিচাপে আত্মপ্ৰকাশ কৰিছে। দুয়োখন দেশে সামুদ্ৰিক সংযোগ শক্তিশালী কৰাৰ বাবে কাম কৰি আছে।

প্ৰতিৰক্ষা সহযোগিতাঃ ভাৰত আৰু ইউ.এ.ই.ৰ মাজত দ্বিপাক্ষিক প্ৰতিৰক্ষা সহযোগিতা দ্বিপাক্ষিক সম্পৰ্কৰ অন্যান্য ক্ষেত্ৰসমূহৰ সৈতে সামঞ্জস্যপূৰ্ণভাৱে ক্ৰমাগতভাৱে বৃদ্ধি পাইছে। ২০০৩ চনৰ জুন মাহত প্ৰতিৰক্ষা সহযোগিতাৰ বুজাবুজি চুক্তি স্বাক্ষৰৰ জৰিয়তে ইয়াক মন্ত্ৰালয় পৰ্যায়ত যুটীয়া প্ৰতিৰক্ষা সহযোগিতা সমিতি (JDCC)ৰ জৰিয়তে পৰিচালিত কৰা হয়।সেৱা মুখ্য কাৰ্যালয় পৰ্যায়ত প্ৰতি বছৰে সেৱা (সেনা, নৌ আৰু বায়ু) কৰ্মচাৰীৰ আলোচনা অনুষ্ঠিত হয় যাতে নিৰাপত্তা আৰু প্ৰতিৰক্ষা সহযোগিতাৰ পথসমূহৰ বিষয়ে আলোচনা কৰা হয়।

জনসাধাৰণৰ মাজত সম্পৰ্ক: ভাৰতীয়ই ইউ.এ.ই.ত প্ৰবাসীৰ সৰ্ববৃহৎ গোট গঠন কৰে। ইউ.এ.ই.ৰ অৰ্থনীতি আৰু সমাজৰ মেৰুদণ্ড গঠন কৰে। দুয়োখন দেশৰ বাবে তেওঁলোকৰ মংগল গুৰুত্বপূৰ্ণ। বিশ্ব অৰ্থনীতিৰ প্ৰত্যাহ্বানৰ মাজতো প্ৰব্ৰজনকাৰীসকল ভাৰতলৈ ধন প্ৰেৰণৰ এক ধাৰাবাহিক উৎস হৈয়েই আছে, যাৰ ফলত বৈদেশিক ধনৰ মজুতত ইতিবাচক প্ৰভাৱ পৰিছে।

১৫ মে ’ ২০২৬: প্ৰধানমন্ত্ৰীৰ ইউ.এ.ই. ভ্ৰমণ

প্ৰধানমন্ত্ৰী নৰেন্দ্ৰ মোদীয়ে ২০২৬ চনৰ ১৫ মে’ত সংযুক্ত আৰব আমিৰশ্বাহী ভ্ৰমণ কৰি ইউ.এ.ই.ৰ ৰাষ্ট্ৰপতি শ্বেইখ মহম্মদ বিন জায়েদ আল নাহিয়ানৰ সৈতে আলোচনাত মিলিত হয়। এই ভ্ৰমণে দ্বিপাক্ষিক কৌশলগত অংশীদাৰিত্বৰ শক্তিশালী গতিৰ পুনৰ দৃঢ়তা প্ৰদান কৰে। দুয়োখন দেশেই কৌশলগত, অৰ্থনৈতিক, প্ৰযুক্তিগত, আৰু সামাজিক খণ্ডত সহযোগিতা সম্প্ৰসাৰণৰ প্ৰতিশ্ৰুতি প্ৰদান কৰে। আলোচনাত স্থিতিস্থাপক যোগান শৃংখল, দীৰ্ঘম্যাদী অৰ্থনৈতিক সহযোগিতা আৰু আঞ্চলিক তথা বিশ্বব্যাপী অগ্ৰাধিকাৰৰ ওপৰত ক্ৰমবৰ্ধমান অভিসৰণৰ ওপৰতো গুৰুত্ব আৰোপ কৰা হয়।

মূল ফলাফল আৰু ইয়াৰ কৌশলগত গুৰুত্ব

প্ৰধানমন্ত্ৰী ভ্ৰমণে ভাৰত–ইউ.এ.ই.ৰ দ্বিপাক্ষিক অংশীদাৰিত্বৰ সম্প্ৰসাৰণৰ আন এক উল্লেখযোগ্য পদক্ষেপ হিচাপে চিহ্নিত কৰিছে। ফলাফলসমূহে জটিল খণ্ডসমূহক সামৰি লৈছে যিয়ে দুয়োখন দেশৰ মাজত ক্ৰমবৰ্ধমান কৌশলগত অভিসৰণক প্ৰতিফলিত কৰিছে। এইবোৰে দীৰ্ঘম্যাদী অৰ্থনৈতিক স্থিতিস্থাপকতা, প্ৰযুক্তিগত সহযোগিতা, আৰু আঞ্চলিক সংযোগ শক্তিশালী কৰিব।

ফলাফল ১: ভাৰতীয় কৌশলগত পেট্ৰলিয়াম ৰিজাৰ্ভ লিমিটেড (ISPRL) আৰু আবুধাবি নেচনেল অইল কোম্পানী (ADNOC)ৰ মাজত কৌশলগত সহযোগিতাৰ বুজাবুজি চুক্তি

এই চুক্তিয়ে হাইড্ৰ’কাৰ্বন খণ্ডত গভীৰ সহযোগিতাৰ জৰিয়তে ভাৰতৰ শক্তি সুৰক্ষা শক্তিশালী কৰিব। ইয়াৰ দ্বাৰা জটিল শক্তি সম্পদৰ নিৰ্ভৰযোগ্য প্ৰৱেশ নিশ্চিত কৰা হ’ব। এই অংশীদাৰিত্বই ভাৰতৰ ষ্ট্ৰেটেজিক পেট্ৰলিয়াম ৰিজাৰ্ভৰ কাঠামোকো বৰ্ধিত কৰিব। ইয়াৰ ফলত বিশ্বব্যাপী যোগানৰ ব্যাঘাত আৰু শক্তি বজাৰৰ অস্থিৰতাৰ বিৰুদ্ধে স্থিতিস্থাপকতা বৃদ্ধি পাব।

এই চুক্তিয়ে লিকুইফাইড নেচাৰেল গেছ (LNG) আৰু লিকুইফাইড পেট্ৰলিয়াম গেছ (LPG) সংৰক্ষণ আন্তঃগাঁথনিৰ ক্ষেত্ৰত নতুন সুযোগৰ সৃষ্টি কৰিব। ই ভাৰতৰ শক্তিৰ উৎসৰ বৈচিত্ৰ্য আৰু সংৰক্ষণ ক্ষমতা সম্প্ৰসাৰণৰ প্ৰচেষ্টাক সহায় কৰিব। এই অংশীদাৰিত্বই সুৰক্ষিত আৰু ভৱিষ্যতৰ বাবে সাজু শক্তি পৰিৱেশ তন্ত্ৰ গঢ়ি তোলাতো সহায় কৰিব।

ফলাফল ২: লিকুইফাইড পেট্ৰলিয়াম গেছ (LPG) যোগানৰ ক্ষেত্ৰত ইণ্ডিয়ান অইল লিমিটেড (IOCL) কোম্পানী আৰু আবুধাবি নেচনেল অইল কোম্পানী (ADNOC)ৰ মাজত কৌশলগত সহযোগিতা চুক্তি

এই সহযোগিতাই ভাৰতৰ দীৰ্ঘম্যাদী এল পি জি যোগানৰ সুৰক্ষা শক্তিশালী কৰিব। ইয়াৰ জৰিয়তে ঘৰুৱা চাহিদাৰ বাবে এক সুস্থিৰ আৰু নিৰ্ভৰযোগ্য শক্তিৰ উৎস নিশ্চিত হ’ব। এই পদক্ষেপে দুয়োখন দেশৰ মাজত কৌশলগত শক্তি সহযোগিতাও গভীৰ কৰি তুলিব। ই ভাৰতৰ অন্যতম বিশ্বাসযোগ্য শক্তি অংশীদাৰ হিচাপে ইউ.এ.ই.ৰ স্থিতি আৰু অধিক শক্তিশালী কৰিব।

ফলাফল ৩: কৌশলগত প্ৰতিৰক্ষা অংশীদাৰিত্বৰ কাঠামো

এই কাঠামোৰ জৰিয়তে দুয়োখন দেশৰ মাজত প্ৰতিৰক্ষা ঔদ্যোগিক সহযোগিতা শক্তিশালী হ’ব। ই যৌথ অংশীদাৰিত্ব, সহ-উন্নয়ন, আৰু অধিক উদ্যোগৰ সংযোগক উৎসাহিত কৰিব। এই চুক্তিয়ে কৌশলগত খণ্ডসমূহত উদ্ভাৱন আৰু প্ৰযুক্তিৰ ভাগ-বতৰাকো প্ৰসাৰিত কৰিব। ইয়াৰ দ্বাৰা উন্নত প্ৰতিৰক্ষা উৎপাদন আৰু সামৰ্থ্যৰ ক্ষেত্ৰত সহযোগিতাৰ সহায়ক হ’ব। বহল পৰ্যায়ত এই অংশীদাৰিত্বই ৰাষ্ট্ৰীয় আৰু আঞ্চলিক নিৰাপত্তা সহযোগিতা বৃদ্ধি কৰিব বুলি আশা কৰা হৈছে।

ফলাফল ৪: গুজৰাটৰ ভাডিনাৰত জাহাজ মেৰামতি ক্লাষ্টাৰ স্থাপনৰ ক্ষেত্ৰত কোচিন শ্বিপয়াৰ্ড লিমিটেড (CSL) আৰু ড্ৰাইডক ৱৰ্ল্ড (DDW)ৰ মাজত বুজাবুজিৰ চুক্তি

এই পদক্ষেপে জাহাজ, বন্দৰ, আৰু উপকূলীয় আন্তঃগাঁথনি উন্নয়নত সহায় কৰিব। ই ভাৰতৰ ক্ৰমবৰ্ধমান সামুদ্ৰিক আৰু লজিষ্টিক কেন্দ্ৰ হিচাপে স্থিতি শক্তিশালী কৰিব। এই সহযোগিতাই সামুদ্ৰিক লজিষ্টিক পৰিৱেশতন্ত্ৰৰো উন্নতি সাধন কৰিব। ইয়াৰ জৰিয়তে জাহাজ মেৰামতি আৰু সংশ্লিষ্ট ঔদ্যোগিক ক্ষমতা বৃদ্ধি পাব। ইয়াৰ দ্বাৰা দক্ষ বাণিজ্য আৰু সংযোগত সহায়ক হ’ব। এই অংশীদাৰিত্বই মেক ইন ইণ্ডিয়া পদক্ষেপকো আগুৱাই নিব। ই ঘৰুৱা উৎপাদন, আন্তঃগাঁথনি উন্নয়ন, আৰু থলুৱা সামুদ্ৰিক সামৰ্থ্যক প্ৰসাৰিত কৰিব।

ফলাফল ৫: জাহাজ মেৰামতিৰ দক্ষতা বিকাশৰ ওপৰত কোচিন শ্বিপয়াৰ্ড লিমিটেড (CSL), ড্ৰাইডক ৱৰ্ল্ড (DDW) আৰু চেণ্টাৰ অৱ এক্সেলেন্স ইন মেৰিটাইম এণ্ড শ্বিপবিল্ডিং (CEMS)ৰ মাজত বুজাবুজিৰ চুক্তি

এই ব্যৱস্থাই ভাৰতীয় সামুদ্ৰিক কৰ্মশক্তিৰ সামৰ্থ্য শক্তিশালী কৰিব। ই জাহাজ নিৰ্মাণ আৰু জাহাজ মেৰামতিৰ ক্ষেত্ৰত বিশেষ প্ৰশিক্ষণ, কাৰিকৰী উন্নীতকৰণ, আৰু সামৰ্থ্য বৃদ্ধিত সহায় কৰিব। এই পদক্ষেপে ভাৰতক দক্ষ সামুদ্ৰিক পেছাদাৰীসকলৰ বাবে বিশ্বব্যাপী কেন্দ্ৰ হিচাপে আত্মপ্ৰকাশ কৰাত সহায় কৰিব। ই উদ্যোগ-প্ৰস্তুত বিশেষজ্ঞতাক শক্তিশালী কৰিব আৰু সামুদ্ৰিক খণ্ডত সুযোগ সম্প্ৰসাৰণ কৰিব। এই সহযোগিতাৰ স্কিল ইণ্ডিয়া মিছনৰ উদ্দেশ্যৰ সৈতেও মিল আছে। ই বিকশিত বিশ্ব সামুদ্ৰিক উদ্যোগৰ বাবে ভৱিষ্যতৰ বাবে সাজু কৰ্মশক্তি সৃষ্টি কৰাত সহায় কৰিব।

ফলাফল ৬: ভাৰতৰ চিডিএচি আৰু ইউ.এ.ই.ৰ জি-৪২ৰ মাজত অংশীদাৰিত্বৰে ৮ টা এক্সাফ্লপ ছুপাৰ কম্পিউটিং ক্লাষ্টাৰ স্থাপনৰ বাবে টাৰ্ম শ্বীট

এই অংশীদাৰিত্বই ভাৰতৰ সাৰ্বভৌম এআই আৰু উচ্চ কাৰ্যক্ষম কম্পিউটিং ক্ষমতাক ত্বৰান্বিত কৰিব। ই দেশৰ ছুপাৰ কম্পিউটিং আন্তঃগাঁথনি শক্তিশালী কৰিব। এই সহযোগিতাই ইণ্ডিয়াএআই মিছনকো সহায় কৰিব। ই ডিজিটেল উদ্ভাৱন, এআই গৱেষণা আৰু পৰৱৰ্তী প্ৰজন্মৰ প্ৰযুক্তিগত বিকাশত সহায় কৰিব।

ফলাফল ৭: ইউ.এ.ই.ৰ পৰা ভাৰতলৈ বিনিয়োগ

বিনিয়োগৰ প্ৰতিশ্ৰুতিসমূহে দুয়োখন দেশৰ মাজত অৰ্থনৈতিক আৰু বিত্তীয় সহযোগিতা শক্তিশালী কৰিব। ভাৰতৰ আন্তঃগাঁথনি আৰু বেংকিং খণ্ডত বিনিয়োগ বৃদ্ধি কৰিব। এই প্ৰতিশ্ৰুতিসমূহে দীৰ্ঘম্যাদী মূলধনৰ প্ৰবাহ আৰু বিনিয়োগকাৰীৰ আস্থাও বৃদ্ধি কৰিব। তেওঁলোকে ভাৰতৰ অৰ্থনৈতিক উন্নয়ন আৰু আন্তঃগাঁথনি সম্প্ৰসাৰণৰ লক্ষ্যত সহায় কৰিব।

সামগ্ৰিকভাৱে প্ৰধানমন্ত্ৰীৰ ভ্ৰমণৰ ফলাফলসমূহে দ্বিপাক্ষিক সম্পৰ্কক ভৱিষ্যতমুখী কৌশলগত অংশীদাৰিত্বলৈ ৰূপান্তৰিত কৰাটো প্ৰতিফলিত কৰে। সহযোগিতা বিশ্বাস, উদ্ভাৱন, আৰু ভাগ-বতৰা সমৃদ্ধিৰ ওপৰত নিৰ্ভৰশীল। এই চুক্তিসমূহে শক্তি, বাণিজ্য, আৰু প্ৰতিৰক্ষাৰ দৰে পৰম্পৰাগত খণ্ডসমূহৰ মাজত সহযোগিতাক গভীৰ কৰে। সীমান্ত প্ৰযুক্তি, লজিষ্টিক, ডিজিটেল আন্তঃগাঁথনি আৰু উন্নত উৎপাদনৰ ক্ষেত্ৰতো নতুন সুযোগ মুকলি কৰে।

ভৱিষ্যতলৈ ভাৰত–ইউ.এ.ই.ৰ অংশীদাৰিত্ব

ভাৰত আৰু ইউ.এ.ই.ৰ মাজৰ সম্পৰ্ক পৰম্পৰাগত বাণিজ্যিক সংযোগৰ পৰা এক ব্যাপক কৌশলগত অংশীদাৰিত্বলৈ ৰূপান্তৰিত হৈছে। স্থায়ী ৰাজনৈতিক সংযোগ আৰু অৰ্থনৈতিক সহযোগিতাই এই পৰিৱৰ্তনক আগুৱাই লৈ গৈছে। আজি এই অংশীদাৰিত্বই শক্তি সুৰক্ষা, বাণিজ্য, প্ৰযুক্তি, বিনিয়োগ আৰু প্ৰতিৰক্ষা সহযোগিতাক সামৰি লৈছে।

২০২৬ চনৰ প্ৰধানমন্ত্ৰীৰ ভ্ৰমণৰ ফলাফলে দ্বিপাক্ষিক সম্পৰ্ক আৰু অধিক শক্তিশালী কৰি তুলিছে। তেওঁলোকে উদীয়মান প্ৰযুক্তি, সামুদ্ৰিক আন্তঃগাঁথনি, কৃত্ৰিম বুদ্ধিমত্তা আৰু কৌশলগত উদ্যোগত সহযোগিতা সম্প্ৰসাৰণ কৰে। দুয়োখন দেশেই নিজৰ অৰ্থনৈতিক আৰু ভূ-ৰাজনৈতিক অগ্ৰাধিকাৰসমূহক একাকাৰ কৰাৰ লগে লগে অনাগত বছৰবোৰত এই অংশীদাৰিত্বই আঞ্চলিক স্থিতিশীলতা, অৰ্থনৈতিক বৃদ্ধি, আৰু প্ৰযুক্তিগত উন্নতিৰ ক্ষেত্ৰত বৃহৎ ভূমিকা গ্ৰহণ কৰিব বুলি আশা কৰা হৈছে।

তথ্যসূত্ৰ:

1. বৈদেশিক পৰিক্ৰমা মন্ত্ৰালয়

• https://www.mea.gov.in/Portal/ForeignRelation/India_UAE2024n.pdf
• Randhir Jaiswal, Official Spokesperson, Ministry of External Affairs (MEA) https://x.com/i/status/2055211070340641206

2. প্ৰেছ ইনফৰ্মেশ্যন ব্যুৰো

https://www.pib.gov.in/PressReleaseDetail.aspx?PRID=2261385&reg=3&lang=2