पत्र सूचना कार्यालय

ಪೀಠಿಕೆ

ಭಾರತದ ಆಹಾರ ಸಂಸ್ಕರಣಾ ವಲಯವು ಕೃಷಿ ಮತ್ತು ಉತ್ಪಾದನಾ ಪರಿಸರ ವ್ಯವಸ್ಥೆಯ ನಿರ್ಣಾಯಕ ಸ್ತಂಭವಾಗಿ ಹೊರಹೊಮ್ಮಿದೆ. ಇದು ಮೌಲ್ಯವರ್ಧನೆಯನ್ನು ಉತ್ತೇಜಿಸುವುದು, ಮಾರುಕಟ್ಟೆ ಸಂಪರ್ಕಗಳನ್ನು ಬಲಪಡಿಸುವುದು ಮತ್ತು ಸಂಸ್ಕರಿಸಿದ ಆಹಾರಗಳ ಲಭ್ಯತೆಯನ್ನು ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ. ಈ ವಲಯವು ಇತ್ತೀಚಿನ ವರ್ಷಗಳಲ್ಲಿ ಸ್ಥಿರ ಬೆಳವಣಿಗೆಯನ್ನು ಕಂಡಿದ್ದು, ಮೊದಲ ಪರಿಷ್ಕೃತ ಅಂದಾಜಿನ ಪ್ರಕಾರ, ಇದರ ಒಟ್ಟು ಮೌಲ್ಯವರ್ಧನೆ 2014-15ರಲ್ಲಿ ಇದ್ದ ₹1.34 ಲಕ್ಷ ಕೋಟಿಯಿಂದ 2023-24ರಲ್ಲಿ ₹2.24 ಲಕ್ಷ ಕೋಟಿಗೆ ಏರಿಕೆಯಾಗಿದೆ. ಕೃಷಿ ರಫ್ತಿನಲ್ಲಿ ಸಂಸ್ಕರಿಸಿದ ಆಹಾರ ಉತ್ಪನ್ನಗಳ ಪಾಲು 2014-15ರಲ್ಲಿ ಶೇಕಡಾ 13.7 ರಷ್ಟಿದ್ದು, 2024-25ರ ವೇಳೆಗೆ ಶೇಕಡಾ 20.4 ಕ್ಕೆ ಏರಿರುವುದು ಈ ವಲಯದ ಜಾಗತಿಕ ಹೆಜ್ಜೆಗುರುತನ್ನು ಪ್ರತಿಬಿಂಬಿಸುತ್ತದೆ.

ಹಣ್ಣು ಮತ್ತು ತರಕಾರಿಗಳ ಉತ್ಪಾದನೆಯಲ್ಲಿ ವಿಶ್ವದ ಎರಡನೇ ಅತಿದೊಡ್ಡ ಉತ್ಪಾದಕ ರಾಷ್ಟ್ರವಾಗಿರುವ ಭಾರತವು, ಆಹಾರ ಸಂಸ್ಕರಣೆಯ ಜಾಗತಿಕ ಕೇಂದ್ರವಾಗಿ ಹೊರಹೊಮ್ಮುವ ಗಣನೀಯ ಸಾಮರ್ಥ್ಯವನ್ನು ಹೊಂದಿದೆ. ಆದರೆ, ಈ ಸಾಮರ್ಥ್ಯವನ್ನು ಸಾಕಾರಗೊಳಿಸಲು ಉತ್ಪಾದನಾ ಪ್ರಮಾಣ, ಉತ್ಪಾದಕತೆ, ಮೌಲ್ಯವರ್ಧನೆ ಮತ್ತು ಜಾಗತಿಕ ಮೌಲ್ಯ ಸರಪಳಿಗಳೊಂದಿಗೆ ಏಕೀಕರಣಗೊಳ್ಳುವ ವಿಷಯದಲ್ಲಿ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸಿಕೊಳ್ಳುವ ಅಗತ್ಯವಿದೆ. ಈ ಅವಶ್ಯಕತೆಗಳನ್ನು ಗುರುತಿಸಿ, ಬೆಳವಣಿಗೆಯನ್ನು ವೇಗಗೊಳಿಸಲು ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ಭಾರತವನ್ನು ಮತ್ತಷ್ಟು ಬಲವಾಗಿ ಸ್ಥಾಪಿಸಲು ಸರ್ಕಾರವು ಆಹಾರ ಸಂಸ್ಕರಣಾ ಉದ್ಯಮಕ್ಕಾಗಿ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆ (ಪಿಎಲ್‌ಐಎಸ್‌ಎಫ್‌ಪಿಐ ) ಯನ್ನು ಜಾರಿಗೆ ತಂದಿದೆ.

ಪಿಎಲ್‌ಐಎಸ್‌ಎಫ್‌ಪಿಐ  ನ ಪರಿಕಲ್ಪನೆ ಮತ್ತು ನೀತಿ ಚೌಕಟ್ಟನ್ನು ಅರ್ಥಮಾಡಿಕೊಳ್ಳುವುದು

ಕೇಂದ್ರ ಸಚಿವ ಸಂಪುಟವು 31 ಮಾರ್ಚ್ 2021 ರಂದು ಅನುಮೋದಿಸಿದ ಆಹಾರ ಸಂಸ್ಕರಣಾ ಉದ್ಯಮಕ್ಕಾಗಿ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆ (ಪಿಎಲ್‌ಐಎಸ್‌ಎಫ್‌ಪಿಐ ), ಸರ್ಕಾರದ ವಿಶಾಲವಾದ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆಯ ವ್ಯಾಪ್ತಿಗೆ ಬರುತ್ತದೆ.

ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆಯನ್ನು ಅರ್ಹ ಕಂಪನಿಗಳು ಸಾಧಿಸುವ ಹೆಚ್ಚಿನ ಮಾರಾಟದ ಆಧಾರದ ಮೇಲೆ ಆರ್ಥಿಕ ಪ್ರೋತ್ಸಾಹಕಗಳನ್ನು ನೀಡುವ ಮೂಲಕ, ದೇಶೀಯ ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸಲು ಏಪ್ರಿಲ್ 2020 ರಲ್ಲಿ ಪ್ರಾರಂಭಿಸಲಾಯಿತು. ಉತ್ಪಾದನಾ ವಲಯವನ್ನು ಬಲಪಡಿಸುವ ಮೂಲಕ ದೇಶವು ಹೆಚ್ಚು ಸಮತೋಲಿತ ಮತ್ತು ಚೇತರಿಸಿಕೊಳ್ಳುವ ಪ್ರಗತಿಯನ್ನು ಸಾಧಿಸಲು ಅನುವು ಮಾಡಿಕೊಡುವ ಉದ್ದೇಶದಿಂದ ಇದನ್ನು ಪರಿಚಯಿಸಲಾಯಿತು.

ಆತ್ಮನಿರ್ಭರ ಭಾರತ ಮತ್ತು ವಿಶಾಲವಾದ ಮೇಕ್ ಇನ್ ಇಂಡಿಯಾ ಉಪಕ್ರಮದ ದೃಷ್ಟಿಕೋನಕ್ಕೆ ಅನುಗುಣವಾಗಿ, ಪಿಎಲ್‌ಐ ಯೋಜನೆಯನ್ನು ಆರಂಭದಲ್ಲಿ ಮೊಬೈಲ್ ಉತ್ಪಾದನೆ ಮತ್ತು ನಿರ್ದಿಷ್ಟ ಎಲೆಕ್ಟ್ರಾನಿಕ್ ಘಟಕಗಳು, ನಿರ್ಣಾಯಕ ಔಷಧೀಯ ಮಧ್ಯವರ್ತಿಗಳು ಮತ್ತು ಸಕ್ರಿಯ ಔಷಧೀಯ ಪದಾರ್ಥಗಳು ಹಾಗೂ ವೈದ್ಯಕೀಯ ಉಪಕರಣಗಳ ಉತ್ಪಾದನೆಯಂತಹ ವಲಯಗಳಿಗಾಗಿ ಪರಿಚಯಿಸಲಾಯಿತು. ಕಾಲಾನಂತರದಲ್ಲಿ, ಪಿಎಲ್‌ಐ ಚೌಕಟ್ಟನ್ನು 14 ಆಯಕಟ್ಟಿನ ವಲಯಗಳಿಗೆ ವಿಸ್ತರಿಸಲಾಗಿದ್ದು, ಇದಕ್ಕಾಗಿ ₹1.97 ಲಕ್ಷ ಕೋಟಿ ಪ್ರೋತ್ಸಾಹಕ ವೆಚ್ಚವನ್ನು ನಿಗದಿಪಡಿಸಲಾಗಿದೆ. ಇದರಲ್ಲಿ ಆಹಾರ ಸಂಸ್ಕರಣೆಯೂ ಒಂದು ಪ್ರಮುಖ ವಲಯವಾಗಿದೆ.

₹10,900 ಕೋಟಿ ವೆಚ್ಚದ ಈ ಪಿಎಲ್‌ಐಎಸ್‌ಎಫ್‌ಪಿಐ  ಯೋಜನೆಯನ್ನು 2021-22 ರಿಂದ 2026-27 ರವರೆಗೆ ಜಾರಿಗೆ ತರಲಾಗುತ್ತಿದೆ. ಈ ಯೋಜನೆಯು 2026-27 ರ ವೇಳೆಗೆ ₹33,494 ಕೋಟಿ ಮೌಲ್ಯದ ಸಂಸ್ಕರಿಸಿದ ಆಹಾರ ಉತ್ಪಾದನೆಯನ್ನು ಮಾಡುವ ಮತ್ತು ಸುಮಾರು 2.5 ಲಕ್ಷ ಜನರಿಗೆ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುವ ಗುರಿಯನ್ನು ಹೊಂದಿದೆ.

ಉತ್ಪಾದನೆಯಿಂದ ಬ್ರ್ಯಾಂಡಿಂಗ್‌ವರೆಗೆ: ಪಿಎಲ್‌ಐಎಸ್‌ಎಫ್‌ಪಿಐ  ನ ಸಮಗ್ರ ಚೌಕಟ್ಟು

ಆಹಾರ ಸಂಸ್ಕರಣಾ ಉದ್ಯಮಕ್ಕಾಗಿ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆ (ಪಿಎಲ್‌ಐಎಸ್‌ಎಫ್‌ಪಿಐ ) ಯನ್ನು ಪ್ರಮುಖವಾಗಿ ಮೂರು ಪ್ರಮುಖ ಅಂಶಗಳ ಸುತ್ತ ರೂಪಿಸಲಾಗಿದೆ. ಇವು ಉತ್ಪಾದನೆಯನ್ನು ಉತ್ತೇಜಿಸಲು, ಸಣ್ಣ ಮತ್ತು ಮಧ್ಯಮ ಉದ್ಯಮಗಳಲ್ಲಿ (SMEs) ನಾವೀನ್ಯತೆಯನ್ನು ಪ್ರೋತ್ಸಾಹಿಸಲು ಮತ್ತು ಭಾರತೀಯ ಆಹಾರ ಉತ್ಪನ್ನಗಳ ಜಾಗತಿಕ ಬ್ರ್ಯಾಂಡಿಂಗ್‌ಗೆ ಬೆಂಬಲ ನೀಡಲು ವಿನ್ಯಾಸಗೊಳಿಸಲಾಗಿದೆ.

ಮೊದಲನೇ ಅಂಶ (ವರ್ಗ I): ನಾಲ್ಕು ಪ್ರಮುಖ ಆಹಾರ ಉತ್ಪನ್ನ ವಿಭಾಗಗಳ ಉತ್ಪಾದನೆಗೆ ಪ್ರೋತ್ಸಾಹ ನೀಡುವುದು. ಅವುಗಳೆಂದರೆ: ಸಿರಿಧಾನ್ಯ ಆಧಾರಿತ ಉತ್ಪನ್ನಗಳು ಸೇರಿದಂತೆ ಬೇಯಿಸಲು ಸಿದ್ಧವಿರುವ/ತಿನ್ನಲು ಸಿದ್ಧವಿರುವ ಆಹಾರಗಳು, ಸಂಸ್ಕರಿಸಿದ ಹಣ್ಣುಗಳು ಮತ್ತು ತರಕಾರಿಗಳು, ಸಮುದ್ರ ಉತ್ಪನ್ನಗಳು ಮತ್ತು ಮೊಝರೆಲ್ಲಾ ಚೀಸ್.

ಎರಡನೇ ಅಂಶ (ವರ್ಗ II): ಮುಕ್ತವಾಗಿ ಬೆಳೆದ ಕೋಳಿ ಮೊಟ್ಟೆಗಳು, ಕೋಳಿ ಮಾಂಸ ಮತ್ತು ಮೊಟ್ಟೆಯ ಉತ್ಪನ್ನಗಳು ಸೇರಿದಂತೆ ಎಲ್ಲಾ ನಾಲ್ಕು ಆಹಾರ ಉತ್ಪನ್ನ ವಿಭಾಗಗಳಲ್ಲಿನ ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ನವೀನ/ಸಾವಯವ ಉತ್ಪನ್ನಗಳಿಗೆ ಪ್ರೋತ್ಸಾಹ ನೀಡುವುದು.

ಮೂರನೇ ಅಂಶ (ವರ್ಗ III): ಬಲಿಷ್ಠ ಭಾರತೀಯ ಬ್ರ್ಯಾಂಡ್‌ಗಳ ಉದಯವನ್ನು ಉತ್ತೇಜಿಸಲು ವಿದೇಶಗಳಲ್ಲಿ ಬ್ರ್ಯಾಂಡಿಂಗ್ ಮತ್ತು ಮಾರುಕಟ್ಟೆ ಚಟುವಟಿಕೆಗಳಿಗೆ ಬೆಂಬಲ ನೀಡುವುದು. ಇದರಲ್ಲಿ ಇನ್-ಸ್ಟೋರ್ ಬ್ರ್ಯಾಂಡಿಂಗ್, ಶೆಲ್ಫ್ ಸ್ಪೇಸ್ ಬಾಡಿಗೆ ಮತ್ತು ಮಾರುಕಟ್ಟೆ ಪ್ರಚಾರಗಳು ಸೇರಿವೆ.

ಹೆಚ್ಚುವರಿಯಾಗಿ, ಪಿಎಲ್‌ಐಎಸ್‌ಎಫ್‌ಪಿಐ  ಅಡಿಯಲ್ಲಿನ ಉಳಿತಾಯದಿಂದ, 2022-23ರ ಹಣಕಾಸು ವರ್ಷದಲ್ಲಿ ₹800 ಕೋಟಿ ವೆಚ್ಚದೊಂದಿಗೆ ಸಿರಿಧಾನ್ಯ ಆಧಾರಿತ ಉತ್ಪನ್ನಗಳ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆ ಎಂಬ ಹೊಸ ಅಂಶವನ್ನು ರೂಪಿಸಲಾಯಿತು. ಇದು ಆರ್‌ಟಿಸಿ/ಆರ್‌ಟಿಇ ಉತ್ಪನ್ನಗಳಲ್ಲಿ ಸಿರಿಧಾನ್ಯಗಳ ಬಳಕೆಯನ್ನು ಉತ್ತೇಜಿಸುವ ಮತ್ತು ಅವುಗಳ ಉತ್ಪಾದನೆ, ಮೌಲ್ಯವರ್ಧನೆ ಹಾಗೂ ಮಾರಾಟವನ್ನು ಹೆಚ್ಚಿಸಲು ಯೋಜನೆಯಡಿ ಪ್ರೋತ್ಸಾಹ ನೀಡುವ ಗುರಿಯನ್ನು ಹೊಂದಿದೆ.

ಬೆಳವಣಿಗೆಗೆ ಪ್ರತಿಫಲ: ಪಿಎಲ್‌ಐಎಸ್‌ಎಫ್‌ಪಿಐ  ನ ಪ್ರೋತ್ಸಾಹಕ ರಚನೆ

ಆಹಾರ ಸಂಸ್ಕರಣಾ ಉದ್ಯಮಕ್ಕಾಗಿ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆ (ಪಿಎಲ್‌ಐಎಸ್‌ಎಫ್‌ಪಿಐ ) ಅಡಿಯಲ್ಲಿ, ಯೋಜನೆಯ ಉತ್ಪಾದನಾ ಅಂಶಗಳು (ವರ್ಗ I ಮತ್ತು ವರ್ಗ II) ನಿರ್ದಿಷ್ಟಪಡಿಸಿದ ಆಹಾರ ಉತ್ಪನ್ನಗಳ ಮಾರಾಟದ ಹೆಚ್ಚಳದ ಆಧಾರದ ಮೇಲೆ ಅರ್ಹ ಆಹಾರ ಸಂಸ್ಕರಣಾ ಕಂಪನಿಗಳಿಗೆ ಪ್ರೋತ್ಸಾಹಕಗಳನ್ನು ನೀಡುತ್ತವೆ. ಈ ಅಂಶಗಳ ಅಡಿಯಲ್ಲಿ, ಅರ್ಜಿದಾರರು ಮೂಲ ವರ್ಷದಲ್ಲಿ (2019-20) ಕನಿಷ್ಠ ಮಾರಾಟದ ಮಿತಿಯನ್ನು ತಲುಪಿರಬೇಕು ಮತ್ತು ತಿನ್ನಲು ಸಿದ್ಧವಿರುವ/ಬೇಯಿಸಲು ಸಿದ್ಧವಿರುವ ಆಹಾರಗಳು, ಸಂಸ್ಕರಿಸಿದ ಹಣ್ಣು ಮತ್ತು ತರಕಾರಿಗಳು, ಸಮುದ್ರ ಉತ್ಪನ್ನಗಳು ಮತ್ತು ಮೊಝರೆಲ್ಲಾ ಚೀಸ್ ವಿಭಾಗಗಳಲ್ಲಿ ಪ್ಲಾಂಟ್ ಮತ್ತು ಯಂತ್ರೋಪಕರಣಗಳು, ತಾಂತ್ರಿಕ ಸಿವಿಲ್ ಕೆಲಸಗಳು ಮತ್ತು ಸಂಬಂಧಿತ ಮೂಲಸೌಕರ್ಯಗಳಲ್ಲಿ ನಿಗದಿತ ಹೂಡಿಕೆಗಳನ್ನು ಮಾಡಿರಬೇಕು.

ವರ್ಗ III ಅಡಿಯಲ್ಲಿ, ಜಾಗತಿಕ ಮಾರುಕಟ್ಟೆಗಳಲ್ಲಿ ಭಾರತೀಯ ಬ್ರ್ಯಾಂಡೆಡ್ ಗ್ರಾಹಕ ಆಹಾರ ಉತ್ಪನ್ನಗಳ ಬ್ರ್ಯಾಂಡಿಂಗ್ ಮತ್ತು ಮಾರುಕಟ್ಟೆ ಚಟುವಟಿಕೆಗಳನ್ನು ಬೆಂಬಲಿಸಲು ಸರ್ಕಾರವು ಆರ್ಥಿಕ ಪ್ರೋತ್ಸಾಹವನ್ನು ನೀಡುತ್ತದೆ. ಅರ್ಜಿದಾರರ ವಿದೇಶಿ ಬ್ರ್ಯಾಂಡಿಂಗ್ ಮತ್ತು ಮಾರುಕಟ್ಟೆ ವೆಚ್ಚದ 50% ರಷ್ಟನ್ನು ಮರುಪಾವತಿಸಲಾಗುತ್ತದೆ. ಇದು ಅವರ ವಾರ್ಷಿಕ ಆಹಾರ ಉತ್ಪನ್ನಗಳ ಮಾರಾಟದ 3% ಅಥವಾ ವರ್ಷಕ್ಕೆ ₹50 ಕೋಟಿ, ಇವೆರಡರಲ್ಲಿ ಯಾವುದು ಕಡಿಮೆಯೋ ಅದಕ್ಕೆ ಸೀಮಿತವಾಗಿರುತ್ತದೆ. ಸಂಪೂರ್ಣವಾಗಿ ಭಾರತದಲ್ಲೇ ತಯಾರಾದ ಆಹಾರ ಉತ್ಪನ್ನಗಳನ್ನು ಮಾರಾಟ ಮಾಡುವ ಭಾರತೀಯ ಬ್ರ್ಯಾಂಡ್‌ಗಳನ್ನು ಮಾತ್ರ ಈ ಅಂಶದ ಅಡಿಯಲ್ಲಿ ಪರಿಗಣಿಸಲಾಗುತ್ತದೆ. ಈ ಸೌಲಭ್ಯ ಪಡೆಯಲು ಅರ್ಜಿದಾರರು ಐದು ವರ್ಷಗಳ ಅವಧಿಯಲ್ಲಿ ಕನಿಷ್ಠ ₹5 ಕೋಟಿ ವೆಚ್ಚ ಮಾಡಿರಬೇಕು.

ಪಿಎಲ್‌ಐಎಸ್‌ಎಫ್‌ಪಿಐ  ನ ಸಾಂಸ್ಥಿಕ ಕಾರ್ಯವಿಧಾನ ಮತ್ತು ಅನುಷ್ಠಾನ ಚೌಕಟ್ಟು

ಈ ಯೋಜನೆಯನ್ನು ಯೋಜನಾ ನಿರ್ವಹಣಾ ಸಂಸ್ಥೆ ಮೂಲಕ ಜಾರಿಗೆ ತರಲಾಗುತ್ತದೆ. ಭಾರತ ಸರ್ಕಾರದ ಉದ್ಯಮವಾದ ಇಂಡಸ್ಟ್ರಿಯಲ್ ಫೈನಾನ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ ಅನ್ನು ಆಹಾರ ಸಂಸ್ಕರಣಾ ಉದ್ಯಮಗಳ ಸಚಿವಾಲಯವು ಪಿಎಂಎ ಆಗಿ ನೇಮಿಸಿದೆ. ಪಿಎಲ್‌ಐಎಸ್‌ಎಫ್‌ಪಿಐ  ಅಡಿಯಲ್ಲಿನ ಅರ್ಜಿಗಳನ್ನು ಆಸಕ್ತಿ ಅಭಿವ್ಯಕ್ತಿ ಕಾರ್ಯವಿಧಾನದ ಮೂಲಕ ಆಹ್ವಾನಿಸಲಾಗುತ್ತದೆ ಮತ್ತು ಆನ್‌ಲೈನ್ ಪೋರ್ಟಲ್‌ನಲ್ಲಿ (https://plimofpi.ifciltd.com) ಸಲ್ಲಿಸಲಾಗುತ್ತದೆ. ಅಲ್ಲಿ ಪಿಎಂಎ ನಿಗದಿತ ಸಮಯದೊಳಗೆ ಅರ್ಜಿಗಳನ್ನು ಪರಿಶೀಲಿಸುತ್ತದೆ ಮತ್ತು ಮೌಲ್ಯಮಾಪನ ಮಾಡುತ್ತದೆ. ಯಶಸ್ವಿ ಸಲ್ಲಿಕೆಯ ನಂತರ, ಮುಂದಿನ ಎಲ್ಲಾ ಪತ್ರವ್ಯವಹಾರಗಳಿಗಾಗಿ ವಿಶಿಷ್ಟ ಅಪ್ಲಿಕೇಶನ್ ಐಡಿ ಅನ್ನು ನೀಡಲಾಗುತ್ತದೆ. ಯೋಜನೆಯ ಪ್ರಗತಿಯನ್ನು ನಿರಂತರವಾಗಿ ಆನ್‌ಲೈನ್‌ನಲ್ಲಿ ಮೇಲ್ವಿಚಾರಣೆ ಮಾಡಲು ಮತ್ತು ಅಗತ್ಯವಿರುವಲ್ಲಿ ಮಧ್ಯಂತರ ಸುಧಾರಣಾ ಕ್ರಮಗಳನ್ನು ತೆಗೆದುಕೊಳ್ಳಲು ವೆಬ್-ಆಧಾರಿತ ಎಂಐಎಸ್‌ ವ್ಯವಸ್ಥೆಯನ್ನು ಬಳಸಲಾಗುತ್ತದೆ.

ಪಿಎಲ್‌ಐಎಸ್‌ಎಫ್‌ಪಿಐ  ನ ಪರಿವರ್ತನಾಕಾರಿ ಪ್ರಭಾವ: ಉತ್ಪಾದನೆ, ಎಂಎಸ್‌ಎಂಇಗಳು ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಯ ಬಲವರ್ಧನೆ

ಈ ಯೋಜನೆಯು ಸುಧಾರಿತ ತಂತ್ರಜ್ಞಾನಗಳ ಅಳವಡಿಕೆ ಮತ್ತು ಬಹು ಉತ್ಪಾದನಾ ಮಾರ್ಗಗಳ ಸ್ಥಾಪನೆಗೆ ಅನುಕೂಲ ಮಾಡಿಕೊಟ್ಟಿದೆ. ಇದರ ಪರಿಣಾಮವಾಗಿ, ಫೆಬ್ರವರಿ 2026 ರ ವೇಳೆಗೆ ಪ್ರತಿ ವರ್ಷಕ್ಕೆ 34 ಲಕ್ಷ ಮೆಟ್ರಿಕ್ ಟನ್ ಸಂಸ್ಕರಣೆ ಮತ್ತು ಸಂರಕ್ಷಣಾ ಸಾಮರ್ಥ್ಯವು ಸೃಷ್ಟಿಯಾಗಿದೆ.

ಪಿಎಲ್‌ಐಎಸ್‌ಎಫ್‌ಪಿಐ  ಉದ್ಯಮದ ಬಲವಾದ ಭಾಗವಹಿಸುವಿಕೆ ಮತ್ತು ಹೂಡಿಕೆಯನ್ನು ಆಕರ್ಷಿಸಿದೆ:

• ಆಹಾರ ಸಂಸ್ಕರಣಾ ಉದ್ಯಮಗಳ ಸಚಿವಾಲಯವು ವಿವಿಧ ವರ್ಗಗಳ ಅಡಿಯಲ್ಲಿ ಒಟ್ಟು 165 ಅರ್ಜಿಗಳನ್ನು ಅನುಮೋದಿಸಿದೆ.

• ಈ ಅನುಮೋದನೆಗಳು 274 ಯೋಜನಾ ಸ್ಥಳಗಳಿಗೆ ಸಂಬಂಧಿಸಿವೆ.

• ಫಲಾನುಭವಿಗಳು ಈ ಯೋಜನೆಯಡಿ ₹9,207 ಕೋಟಿ ಹೂಡಿಕೆಯನ್ನು ವರದಿ ಮಾಡಿದ್ದಾರೆ.

• ಫೆಬ್ರವರಿ 2026ರ ವೇಳೆಗೆ ₹2,162.55 ಕೋಟಿ ಮೌಲ್ಯದ ಪ್ರೋತ್ಸಾಹಕ ಧನವನ್ನು ವಿತರಿಸಲಾಗಿದೆ.

ಒಟ್ಟಾರೆಯಾಗಿ, ಈ ಫಲಿತಾಂಶಗಳು ಸಾಮರ್ಥ್ಯ ವಿಸ್ತರಣೆಯನ್ನು ಉತ್ತೇಜಿಸುವಲ್ಲಿ, ಖಾಸಗಿ ಹೂಡಿಕೆಯನ್ನು ಕ್ರೋಢೀಕರಿಸುವಲ್ಲಿ ಮತ್ತು ಭಾರತದ ಆಹಾರ ಸಂಸ್ಕರಣಾ ವಲಯದ ತಾಂತ್ರಿಕ ಹಾಗೂ ಕಾರ್ಯಾಚರಣೆಯ ಸಾಮರ್ಥ್ಯಗಳನ್ನು ಬಲಪಡಿಸುವಲ್ಲಿ ಈ ಯೋಜನೆಯ ಪರಿಣಾಮಕಾರಿತ್ವವನ್ನು ಉಲ್ಲೇಖಿಸುತ್ತದೆ.

ಈ ಯೋಜನೆಯು ಎಂಎಸ್‌ಎಂಇ (ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮ) ವಲಯವನ್ನು ಉತ್ತೇಜಿಸುವಲ್ಲಿ ಮಹತ್ವದ ಪಾತ್ರ ವಹಿಸಿದೆ. ಫೆಬ್ರವರಿ 2026ರ ವೇಳೆಗೆ ಅನುಮೋದಿಸಲಾದ 165 ಅರ್ಜಿಗಳಲ್ಲಿ, 69 ಅರ್ಜಿದಾರರು ಎಂಎಸ್‌ಎಂಇಗಳಾಗಿದ್ದಾರೆ. ಹೆಚ್ಚುವರಿಯಾಗಿ, ಮುಖ್ಯ ಅರ್ಜಿದಾರರೊಂದಿಗೆ ಸಂಬಂಧ ಹೊಂದಿರುವ 40 ಕಾಂಟ್ರಾಕ್ಟ್ ಮ್ಯಾನುಫ್ಯಾಕ್ಚರಿಂಗ್ (ಗುತ್ತಿಗೆ ಉತ್ಪಾದನಾ) ಘಟಕಗಳು ಎಂಎಸ್‌ಎಂಇ ವರ್ಗಕ್ಕೆ ಸೇರಿವೆ, ಇದು ಮೌಲ್ಯ ಸರಪಳಿಯಾದ್ಯಂತ ಅವುಗಳ ಸಂಯೋಜನೆಯನ್ನು ಸೂಚಿಸುತ್ತದೆ. ಇದಲ್ಲದೆ, 28 ಫೆಬ್ರವರಿ 2025ರ ವೇಳೆಗೆ 20 ಅರ್ಹ ಎಂಎಸ್‌ಎಂಇಗಳಿಗೆ ₹13.266 ಕೋಟಿ ಮೊತ್ತದ ಪ್ರೋತ್ಸಾಹ ಧನವನ್ನು ವಿತರಿಸಲಾಗಿದೆ.

ಸಾಮರ್ಥ್ಯ ಮತ್ತು ಹೂಡಿಕೆಯಲ್ಲಿನ ಈ ವಿಸ್ತರಣೆಯು ಗಣನೀಯ ಉದ್ಯೋಗ ಸೃಷ್ಟಿಗೆ ಕಾರಣವಾಗಿದೆ. ಫೆಬ್ರವರಿ 2026ರ ವೇಳೆಗೆ ಸುಮಾರು 3.39 ಲಕ್ಷ ನೇರ ಮತ್ತು ಪರೋಕ್ಷ ಉದ್ಯೋಗಗಳು ಸೃಷ್ಟಿಯಾಗಿವೆ. ಇದು 2026-27ರ ವೇಳೆಗೆ 2.5 ಲಕ್ಷ ಉದ್ಯೋಗಗಳನ್ನು ಸೃಷ್ಟಿಸುವ ಯೋಜನೆಯ ಗುರಿಯನ್ನು ಗಣನೀಯವಾಗಿ ಮೀರಿದ ಸಾಧನೆಯಾಗಿದೆ.

ಜೊತೆಗೆ, ಜಾಗತಿಕ ಸಂಸ್ಕರಿಸಿದ ಆಹಾರ ಮಾರುಕಟ್ಟೆಗಳಲ್ಲಿ ಭಾರತದ ಉಪಸ್ಥಿತಿಯನ್ನು ಬಲಪಡಿಸಲು ಪಿಎಲ್‌ಐಎಸ್‌ಎಫ್‌ಪಿಐ  ಕೊಡುಗೆ ನೀಡಿದೆ:

• ಯೋಜನೆಯಡಿ ಅನುಮೋದಿಸಲಾದ ಕೃಷಿ ಸಂಸ್ಕರಿತ ಆಹಾರ ಉತ್ಪನ್ನಗಳ ರಫ್ತು 2019-20ಕ್ಕೆ ಹೋಲಿಸಿದರೆ 2024-25ರ ವೇಳೆಗೆ ಶೇ. 13.23ರಷ್ಟು ಚಕ್ರಬಡ್ಡಿ ವಾರ್ಷಿಕ ಬೆಳವಣಿಗೆ ದರದಲ್ಲಿ ವೃದ್ಧಿಯಾಗಿದೆ.

• ಏಪ್ರಿಲ್ 2021 ರಿಂದ ಸೆಪ್ಟೆಂಬರ್ 2025 ರ ಅವಧಿಯಲ್ಲಿ ಪಿಎಲ್‌ಐಎಸ್‌ಎಫ್‌ಪಿಐ  ಫಲಾನುಭವಿಗಳ ಒಟ್ಟು ರಫ್ತು ಮಾರಾಟವು ₹89,053.44 ಕೋಟಿಗಳನ್ನು ತಲುಪಿದೆ.

ಉಪಸಂಹಾರ

ಆಹಾರ ಸಂಸ್ಕರಣಾ ಉದ್ಯಮಕ್ಕಾಗಿ ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ ಯೋಜನೆ (ಪಿಎಲ್‌ಐಎಸ್‌ಎಫ್‌ಪಿಐ ), ಭಾರತದ ಆಹಾರ ಸಂಸ್ಕರಣಾ ವಲಯದ ಬೆಳವಣಿಗೆಯ ಪ್ರಮುಖ ಚಾಲಕಶಕ್ತಿಯಾಗಿ ಹೊರಹೊಮ್ಮಿದೆ. ಪ್ರೋತ್ಸಾಹಕಗಳನ್ನು ಮಾರಾಟದ ಹೆಚ್ಚಳಕ್ಕೆ ಜೋಡಿಸುವ ಮೂಲಕ, ಇದು ಹೂಡಿಕೆಯನ್ನು ಪ್ರೋತ್ಸಾಹಿಸಿದೆ, ಉತ್ಪಾದನಾ ಸಾಮರ್ಥ್ಯವನ್ನು ವಿಸ್ತರಿಸಿದೆ ಮತ್ತು ಭಾರತೀಯ ಆಹಾರ ಉತ್ಪನ್ನಗಳ ಜಾಗತಿಕ ಉಪಸ್ಥಿತಿಯನ್ನು ಬಲಪಡಿಸಿದೆ. ಮೌಲ್ಯವರ್ಧನೆ, ಎಂಎಸ್‌ಎಂಇಗಳ ಭಾಗವಹಿಸುವಿಕೆ ಮತ್ತು ಸಿರಿಧಾನ್ಯ ಆಧಾರಿತ ಉತ್ಪನ್ನಗಳ ಮೇಲಿನ ಅದರ ಒತ್ತು ಒಳಗೊಳ್ಳುವಿಕೆಯ ಬೆಳವಣಿಗೆಗೆ ಕೊಡುಗೆ ನೀಡಿದೆ.

ಈ ಯೋಜನೆಯು ಕೃಷಿ ಮತ್ತು ಉದ್ಯಮದ ನಡುವಿನ ಸಂಬಂಧವನ್ನು ಬಲಪಡಿಸಿದೆ ಮತ್ತು ಮೌಲ್ಯ ಸರಪಳಿಯಾದ್ಯಂತ ಉದ್ಯೋಗಗಳನ್ನು ಸೃಷ್ಟಿಸಿದೆ. ಒಟ್ಟಾರೆಯಾಗಿ, ಈ ಫಲಿತಾಂಶಗಳು  ಪಿಎಲ್‌ಐಎಸ್‌ಎಫ್‌ಪಿಐ ಪಿಎಲ್‌ಐಎಸ್‌ಎಫ್‌ಪಿಐ  ಯೋಜನೆಯನ್ನು ದೇಶದಲ್ಲಿ ಹೆಚ್ಚು ಸ್ಪರ್ಧಾತ್ಮಕ, ಚೇತರಿಸಿಕೊಳ್ಳುವ ಮತ್ತು ಸಮಗ್ರ ಆಹಾರ ಸಂಸ್ಕರಣಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ಒಂದು ಬಲವಾದ ಅಡಿಪಾಯವನ್ನಾಗಿ ರೂಪಿಸಿವೆ.

References

Ministry of Finance

• https://www.indiabudget.gov.in/economicsurvey/doc/echapter.pdf

Ministry of Commerce & Industry

• https://www.pib.gov.in/PressReleasePage.aspx?PRID=2086811&reg=3&lang=2

Ministry of Food Processing Industries

• https://www.mofpi.gov.in/en/PLISFPI/central-sector-scheme-production-linked-incentive-scheme-food-processing-industry-plisfpi
• https://www.pib.gov.in/PressReleaseIframePage.aspx?PRID=2081393&reg=3&lang=2
• https://plimofpi.ifciltd.com/
• https://www.mofpi.gov.in/sites/default/files/guidelines_plisfpiwithcoveringltr_0.pdf
• https://www.pib.gov.in/PressReleasePage.aspx?PRID=1946647&reg=3&lang=2
• https://www.pib.gov.in/PressReleseDetail.aspx?PRID=2220064&reg=6&lang=1
• https://www.pib.gov.in/PressReleasePage.aspx?PRID=2224157&reg=3&lang=2
• https://www.pib.gov.in/PressReleasePage.aspx?PRID=2224672&reg=3&lang=2
• https://www.pib.gov.in/PressReleasePage.aspx?PRID=2227153&reg=3&lang=1
• https://www.pib.gov.in/PressReleseDetailm.aspx?PRID=2224669&reg=3&lang=2
• https://www.pib.gov.in/PressReleasePage.aspx?PRID=2202291&reg=3&lang=1
• https://sansad.in/getFile/loksabhaquestions/annex/184/AU3237_vgjNlp.pdf?source=pqals#:~:text=Annexure%2DI.,2025

PIB Backgrounders

• https://www.pib.gov.in/PressNoteDetails.aspx?NoteId=155082&ModuleId=3&reg=3&lang=2
• https://www.pib.gov.in/PressNoteDetails.aspx?NoteId=154063&ModuleId=3&reg=3&lang=2

See PDF

*****