पत्र सूचना कार्यालय

ಪೀಠಿಕೆ: ವುಮನಿಯಾ - ಪ್ರತಿ ಮಹಿಳೆಗೂ ಅವಕಾಶದ ಬಾಗಿಲು ತೆರೆಯುತ್ತಿದೆ

ಭಾರತದಲ್ಲಿ ಸರ್ಕಾರಿ ಖರೀದಿ ಪ್ರಕ್ರಿಯೆಯು ಒಂದು ಪ್ರಮುಖ ಸಂಘಟಿತ ಮಾರುಕಟ್ಟೆಯಾಗಿದೆ. ಜೆಮ್ ಮೂಲಕ ಡಿಜಿಟಲ್ ಖರೀದಿ ಪ್ರಕ್ರಿಯೆಯು ವಿಸ್ತರಣೆಯಾದಂತೆ, ವ್ಯವಸ್ಥೆಯು ಹೆಚ್ಚು ಪಾರದರ್ಶಕ, ಪ್ರಮಾಣೀಕೃತ ಮತ್ತು ವಿಶಾಲವಾದ ಪೂರೈಕೆದಾರರ ವರ್ಗಕ್ಕೆ ಸುಲಭವಾಗಿ ಲಭ್ಯವಾಗುವಂತೆ ಬದಲಾಗಿದೆ. ಮಹಿಳಾ ನೇತೃತ್ವದ ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳು ಹಾಗೂ ಸ್ವಸಹಾಯ ಸಂಘಗಳ ಭಾಗವಹಿಸುವಿಕೆಯನ್ನು ಉತ್ತೇಜಿಸುವ ಸಲುವಾಗಿ, ಸರ್ಕಾರವು 2019 ರಲ್ಲಿ ಜೆಮ್‌ ವೇದಿಕೆಯಲ್ಲಿ 'ವುಮನಿಯಾ' ಉಪಕ್ರಮವನ್ನು ಪರಿಚಯಿಸಿತು.

ಈ ಉಪಕ್ರಮವು ಮಹಿಳಾ ಉದ್ಯಮಿಗಳು ಮತ್ತು ಸ್ವಸಹಾಯ ಸಂಘಗಳಿಗೆ ಸರ್ಕಾರಿ ಖರೀದಿದಾರರೊಂದಿಗೆ ಸಂಪರ್ಕ ಸಾಧಿಸಲು ಒಂದು ನಿರ್ದಿಷ್ಟ ಡಿಜಿಟಲ್ ಇಂಟರ್ಫೇಸ್ ಒದಗಿಸುವುದು, ಪ್ರವೇಶದ ಅವಶ್ಯಕತೆಗಳನ್ನು ಸರಳಗೊಳಿಸುವುದು ಮತ್ತು ವ್ಯವಸ್ಥಿತ ಮಾರ್ಗಗಳನ್ನು ರೂಪಿಸುವ ಮೂಲಕ ಸರ್ಕಾರಿ ಖರೀದಿ ಪ್ರಕ್ರಿಯೆಯಲ್ಲಿ ಮಹಿಳಾ ಉದ್ಯಮಿಗಳ ಒಳಗೊಳ್ಳುವಿಕೆಯನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ.

ವುಮನಿಯಾ ಉಪಕ್ರಮ: ಮಹಿಳಾ ಉದ್ಯಮಿಗಳಿಗಾಗಿ ಒಂದು ಸಮರ್ಪಿತ ವೇದಿಕೆ

ವುಮನಿಯಾ ಎಂಬುದು ಜೆಮ್ ಪೋರ್ಟಲ್‌ನಲ್ಲಿರುವ ಒಳಗೊಳ್ಳುವಿಕೆ-ಆಧಾರಿತ ಉಪಕ್ರಮವಾಗಿದ್ದು, ಇದು ಸರ್ಕಾರಿ ಮಾರುಕಟ್ಟೆಗಳನ್ನು ಪ್ರವೇಶಿಸುವಲ್ಲಿ ಮಹಿಳೆಯರಿಗಿದ್ದ ಅಡೆತಡೆಗಳನ್ನು ನಿವಾರಿಸಲು ಸಹಾಯ ಮಾಡುತ್ತದೆ. ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಅಡಿಯಲ್ಲಿ ಬರುವ ಈ ಯೋಜನೆಯು ಒಂದು ಸಮರ್ಪಿತ ಡಿಜಿಟಲ್ ಇಂಟರ್ಫೇಸ್ ಅನ್ನು ಒದಗಿಸುತ್ತದೆ. ಇದರ ಮೂಲಕ ಮಹಿಳಾ ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳು ಹಾಗೂ ಸ್ವಸಹಾಯ ಸಂಘಗಳು ತಮ್ಮ ಉತ್ಪನ್ನಗಳಾದ ಕೈಮಗ್ಗ, ಸೆಣಬು, ತೆಂಗಿನ ನಾರು ಮತ್ತು ಮನೆ ಅಲಂಕಾರಿಕ ವಸ್ತುಗಳು ಮುಂತಾದವುಗಳನ್ನು ನೋಂದಾಯಿಸಬಹುದು ಮತ್ತು ಪಟ್ಟಿ ಮಾಡಬಹುದು. ಈ ಉತ್ಪನ್ನಗಳನ್ನು ಭಾರತದಾದ್ಯಂತ ಇರುವ ಕೇಂದ್ರ ಸಚಿವಾಲಯಗಳು ಮತ್ತು ಸಾರ್ವಜನಿಕ ವಲಯದ ಉದ್ಯಮಗಳು ನೇರವಾಗಿ ಖರೀದಿಸಬಹುದಾಗಿದೆ.

ಈ ಉಪಕ್ರಮವು ಮಾರುಕಟ್ಟೆಯಲ್ಲಿ ಹೆಚ್ಚಿನ ಗೋಚರತೆಯನ್ನು ಸುಧಾರಿಸುವ ಮೂಲಕ, ಖರೀದಿದಾರ ಮತ್ತು ಮಾರಾಟಗಾರರ ನಡುವೆ ಪಾರದರ್ಶಕ ಸಂವಹನಕ್ಕೆ ಅವಕಾಶ ಮಾಡಿಕೊಡುವ ಮೂಲಕ ಮತ್ತು ಮಧ್ಯವರ್ತಿಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವ ಮೂಲಕ ಮಹಿಳಾ ಉದ್ಯಮಿಗಳಿಗೆ ಬೆಂಬಲ ನೀಡುತ್ತದೆ. ಇದು ಸರ್ಕಾರದ ವಿಶಾಲವಾದ ಒಳಗೊಳ್ಳುವಿಕೆಯ ಆದ್ಯತೆಗಳಿಗೆ ಅನುಗುಣವಾಗಿದ್ದು, ಈ ಕೆಳಗಿನ ರಾಷ್ಟ್ರೀಯ ಉದ್ದೇಶಗಳನ್ನು ಬೆಂಬಲಿಸುತ್ತದೆ:

• ಪೂರೈಕೆದಾರರ ವೈವಿಧ್ಯತೆಯನ್ನು ವಿಸ್ತರಿಸುವುದು.
• ಮಹಿಳಾ ನೇತೃತ್ವದ ಉದ್ಯಮಶೀಲತೆಯನ್ನು ಬಲಪಡಿಸುವುದು.
• ಪ್ರಾತಿನಿಧ್ಯದ ಕೊರತೆ ಇರುವ ಗುಂಪುಗಳನ್ನು ಸಂಘಟಿತ ಖರೀದಿ ಪ್ರಕ್ರಿಯೆಯ ಚಾನಲ್‌ಗಳೊಂದಿಗೆ ಸಂಯೋಜಿಸುವುದು.

ವುಮನಿಯಾ ಉಪಕ್ರಮವು ಸ್ವಾಯತ್ತ್‌  (ಸ್ವಾಯತ್ತ) ಕಾರ್ಯಕ್ರಮದ ಅಡಿಯಲ್ಲಿನ ವಿಶಾಲವಾದ ಒಳಗೊಳ್ಳುವಿಕೆಯ ಕಾರ್ಯಸೂಚಿಗೆ ಪೂರಕವಾಗಿದೆ.

ವುಮನಿಯಾ ಅಡಿಯಲ್ಲಿನ ಉತ್ಪನ್ನ ವರ್ಗಗಳು:

ವುಮನಿಯಾ ಯೋಜನೆಯು ಮಹಿಳಾ ನೇತೃತ್ವದ ಉದ್ಯಮಗಳು ಮತ್ತು ಸ್ವಸಹಾಯ ಸಂಘಗಳು ಈಗಾಗಲೇ ಬಲವಾದ ಉತ್ಪಾದನಾ ಸಾಮರ್ಥ್ಯವನ್ನು ಹೊಂದಿರುವ ಉತ್ಪನ್ನ ವಿಭಾಗಗಳನ್ನು ಗುಂಪು ಮಾಡುತ್ತದೆ. ಈ ವರ್ಗಗಳನ್ನು ಉಪಕ್ರಮದ ಅಡಿಯಲ್ಲಿ ಅಧಿಕೃತವಾಗಿ ಗುರುತಿಸಲಾಗಿದೆ ಮತ್ತು ಸರ್ಕಾರಿ ಖರೀದಿದಾರರಿಗಾಗಿ ಜೆಮ್‌ ಪೋರ್ಟಲ್‌ನಲ್ಲಿ ಪ್ರತ್ಯೇಕ ವಿಭಾಗಗಳಲ್ಲಿ  ಹುಡುಕಲು ಸುಲಭವಾಗುವಂತೆ ಮಾಡಲಾಗಿದೆ. ಅವುಗಳೆಂದರೆ:

• ವುಮನಿಯಾ ಕರಕುಶಲ ವಸ್ತುಗಳು
• ವುಮನಿಯಾ ದಿನಸಿ ಮತ್ತು ಅಡುಗೆಮನೆ ವಸ್ತುಗಳು
• ವುಮನಿಯಾ ಕಚೇರಿ ಪರಿಕರಗಳು
• ವುಮನಿಯಾ ಕೈಮಗ್ಗದ ಬಟ್ಟೆಗಳು
• ವುಮನಿಯಾ ವೈಯಕ್ತಿಕ ನೈರ್ಮಲ್ಯ ಮತ್ತು ಆರೈಕೆ

ಈ ವಸ್ತುಗಳನ್ನು ಒಂದು ಏಕೀಕೃತ ವರ್ಗದ ಚೌಕಟ್ಟಿನಡಿ ಪಟ್ಟಿ ಮಾಡುವುದರಿಂದ, ಜೆಮ್‌ ಉತ್ಪನ್ನಗಳ ಹುಡುಕಾಟವನ್ನು ಸುಲಭಗೊಳಿಸುತ್ತದೆ ಮತ್ತು ಸರ್ಕಾರಿ ಇಲಾಖೆಗಳು ಮಹಿಳಾ ನೇತೃತ್ವದ ಉತ್ಪಾದಕರಿಂದ ದೊಡ್ಡ ಪ್ರಮಾಣದಲ್ಲಿ ವಸ್ತುಗಳನ್ನು ಖರೀದಿಸುವುದನ್ನು ಸರಳಗೊಳಿಸುತ್ತದೆ.

ವುಮನಿಯಾ ಉಪಕ್ರಮದ ಪ್ರಮುಖ ವೈಶಿಷ್ಟ್ಯಗಳು:

ಈ ಉಪಕ್ರಮವು ಮಹಿಳಾ ನೇತೃತ್ವದ ಉದ್ಯಮಗಳು ಮತ್ತು ಸ್ವಸಹಾಯ ಸಂಘಗಳಿಗೆ ಹೊಸ ಮಾರ್ಗಗಳನ್ನು ತೆರೆಯಲು ಜೆಮ್‌ನಲ್ಲಿನ ವಿಶೇಷ ವೇದಿಕೆಯ ವೈಶಿಷ್ಟ್ಯಗಳನ್ನು ಬಳಸಿಕೊಳ್ಳುತ್ತದೆ. ಇದು ಅವರು ಸರ್ಕಾರಿ ಮಾರುಕಟ್ಟೆಗಳನ್ನು ಪ್ರವೇಶಿಸಲು, ತಮ್ಮ ಉತ್ಪನ್ನಗಳನ್ನು ಪ್ರದರ್ಶಿಸಲು ಮತ್ತು ಪಾರದರ್ಶಕ ಹಾಗೂ ಪೂರಕವಾದ ಡಿಜಿಟಲ್ ವ್ಯವಸ್ಥೆಯೊಳಗೆ ತಮ್ಮ ವ್ಯವಹಾರಗಳನ್ನು ಸ್ಥಿರವಾಗಿ ವಿಸ್ತರಿಸಲು ಅನುವು ಮಾಡಿಕೊಡುತ್ತದೆ.

ಮಹಿಳಾ ಉದ್ಯಮಿಗಳು ಮತ್ತು ಸ್ವಸಹಾಯ ಗುಂಪುಗಳ ಡಿಜಿಟಲ್ ನೋಂದಣಿ

ಮಹಿಳಾ ನೇತೃತ್ವದ ಅತಿಸಣ್ಣ ಮತ್ತು ಸಣ್ಣ ಉದ್ಯಮಗಳನ್ನು ಉದ್ಯಮ್ ಪರಿಶೀಲನೆ ಮತ್ತು ಅಗತ್ಯ ದಾಖಲಾತಿಗಳ ಮೂಲಕ ಡಿಜಿಟಲ್ ಪ್ರಕ್ರಿಯೆಯ ಅಡಿಯಲ್ಲಿ ನೋಂದಾಯಿಸಿಕೊಳ್ಳಲಾಗುತ್ತದೆ. GeM ನಡೆಸುವ ಆಫ್‌ಲೈನ್ ಮತ್ತು ಆನ್‌ಲೈನ್ ತರಬೇತಿ ಕಾರ್ಯಾಗಾರಗಳ ಮೂಲಕ ಈ ಉದ್ಯಮಗಳ ಸಜ್ಜುಗೊಳಿಸುವಿಕೆ ಮತ್ತು ಸಾಮರ್ಥ್ಯ ವೃದ್ಧಿಯನ್ನು ಮತ್ತಷ್ಟು ಬಲಪಡಿಸಲಾಗುತ್ತದೆ.

ಪ್ರಮಾಣಿತ ಕ್ಯಾಟಲಾಗ್ ಪಟ್ಟಿ

ಉತ್ಪನ್ನಗಳನ್ನು ನಿಗದಿತ ತಾಂತ್ರಿಕ ವಿಶೇಷಣಗಳು ಮತ್ತು ಗುಣಲಕ್ಷಣಗಳನ್ನು ಹೊಂದಿರುವ ಏಕರೂಪದ ಕ್ಯಾಟಲಾಗ್ ಟೆಂಪ್ಲೇಟ್‌ಗಳನ್ನು ಬಳಸಿ ಪಟ್ಟಿ ಮಾಡಲಾಗುತ್ತದೆ. ಇದು ಮಾರಾಟಗಾರರ ನಡುವಿನ ಹೋಲಿಕೆಯನ್ನು ಖಚಿತಪಡಿಸುತ್ತದೆ ಮತ್ತು ಖರೀದಿದಾರರ ಮೌಲ್ಯಮಾಪನ ಪ್ರಕ್ರಿಯೆಯನ್ನು ಸರಳಗೊಳಿಸುತ್ತದೆ.

ಪಾರದರ್ಶಕ ಮತ್ತು ಸಂಪೂರ್ಣ ಡಿಜಿಟಲ್ ಖರೀದಿ ಪ್ರಕ್ರಿಯೆಗಳು

ಟೆಂಡರ್, ಆರ್ಡರ್ ನೀಡುವುದು, ಸ್ವೀಕೃತಿ, ಇನ್ವಾಯ್ಸಿಂಗ್ ಮತ್ತು ಪಾವತಿ ಸೇರಿದಂತೆ ಎಲ್ಲಾ ಖರೀದಿ ಚಟುವಟಿಕೆಗಳನ್ನು ಡಿಜಿಟಲ್ ರೂಪದಲ್ಲಿ ನಿರ್ವಹಿಸಲಾಗುತ್ತದೆ. ಇದು ಮಧ್ಯವರ್ತಿಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ ಮತ್ತು ಮಹಿಳಾ ನೇತೃತ್ವದ ಉದ್ಯಮಗಳು ಹಾಗೂ ಸರ್ಕಾರಿ ಖರೀದಿದಾರರ ನಡುವೆ ನೇರ ಸಂಪರ್ಕವನ್ನು ಏರ್ಪಡಿಸುತ್ತದೆ.

ಸಮಯಬದ್ಧ ಸ್ವೀಕೃತಿ ಮತ್ತು ಪಾವತಿ ವ್ಯವಸ್ಥೆ

ಡಿಜಿಟಲೀಕರಿಸಿದ ಕೆಲಸದ ಹರಿವು ಸಕಾಲದಲ್ಲಿ ಪಾವತಿಗಳಾಗುವುದನ್ನು ಖಚಿತಪಡಿಸುತ್ತದೆ. ಇದು ಸೀಮಿತ ದುಡಿಯುವ ಬಂಡವಾಳದೊಂದಿಗೆ ಕಾರ್ಯನಿರ್ವಹಿಸುವ ಅತಿಸಣ್ಣ ಮತ್ತು ಸಣ್ಣ ಪೂರೈಕೆದಾರರಿಗೆ ನಿರ್ಣಾಯಕ ಬೆಂಬಲವಾಗಿದೆ.

ತರಬೇತಿ, ತಲುಪುವಿಕೆ ಮತ್ತು ಬೆಂಬಲ ಸೇವೆಗಳು

ಸ್ವಾಯತ್ತ್‌ ಮತ್ತು ವುಮನಿಯಾ ಅಡಿಯಲ್ಲಿ ಕೇಂದ್ರೀಕೃತ ಕಾರ್ಯಕ್ರಮಗಳ ಮೂಲಕ, ಜೆಮ್‌ ವಿವಿಧ ರಾಜ್ಯಗಳಲ್ಲಿ ನೋಂದಣಿ ಕಾರ್ಯಾಗಾರಗಳು, ಪ್ರಾದೇಶಿಕ ಭಾಷೆಗಳಲ್ಲಿ ತರಬೇತಿ ಮತ್ತು ಖರೀದಿದಾರ-ಮಾರಾಟಗಾರರ ಸಭೆಗಳಂತಹ ಸಾಮರ್ಥ್ಯ ವೃದ್ಧಿ ಚಟುವಟಿಕೆಗಳನ್ನು ನಡೆಸುತ್ತದೆ.

ಭಾಗವಹಿಸುವಿಕೆಯಿಂದ ಸಮೃದ್ಧಿಯತ್ತ: 'ವುಮನಿಯಾ' ಪ್ರಭಾವ

“ಜೆಮ್‌ ನಲ್ಲಿ ವುಮನಿಯಾ” ಜಾರಿಯು ಲಿಂಗ-ಅಂತರ್ಗತ ಖರೀದಿ ಪೋರ್ಟಲ್ ನಿರ್ಮಿಸುವತ್ತ ಇಟ್ಟ ಒಂದು ಪ್ರಮುಖ ಹೆಜ್ಜೆಯಾಗಿದೆ. ಸರ್ಕಾರಿ ಖರೀದಿದಾರರು ವುಮನಿಯಾ-ಪಟ್ಟಿ ಮಾಡಲಾದ ಉತ್ಪನ್ನಗಳಿಗೆ ಬೇಡಿಕೆಯನ್ನು ಸೃಷ್ಟಿಸುವ ಮೂಲಕ ಮಹಿಳಾ ಉತ್ಪಾದಕರನ್ನು ಸಾರ್ವಜನಿಕ ಖರೀದಿ ಪ್ರಕ್ರಿಯೆಯಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳುತ್ತಿದ್ದಾರೆ.

ತಳಮಟ್ಟದಲ್ಲಿ, ಜಿಲ್ಲಾಡಳಿತಗಳು, ಉದ್ಯಮ ಬೆಂಬಲ ಕೇಂದ್ರಗಳು ಮತ್ತು ತರಬೇತಿ ಸಂಸ್ಥೆಗಳು ಮಹಿಳಾ ಮಾರಾಟಗಾರರ ಸನ್ನದ್ಧತೆಯನ್ನು ಹೆಚ್ಚಿಸಲು ನೋಂದಣಿ ಅಭಿಯಾನಗಳು, ತರಬೇತಿ ಕಾರ್ಯಕ್ರಮಗಳು ಮತ್ತು ಉತ್ಪನ್ನ ಕ್ಯಾಟಲಾಗ್ ಕಾರ್ಯಾಗಾರಗಳನ್ನು ಆಯೋಜಿಸುತ್ತಿವೆ.

ಗಮನಾರ್ಹವಾಗಿ, ವುಮನಿಯಾ ಉಪಕ್ರಮವು ಪ್ರಾರಂಭವಾದಾಗಿನಿಂದ ಗಣನೀಯವಾಗಿ ವಿಸ್ತರಿಸಿದೆ. ಹಣಕಾಸು ವರ್ಷ 2025-26 ರಲ್ಲಿ:

• 2.1 ಲಕ್ಷಕ್ಕೂ ಹೆಚ್ಚು ಮಹಿಳಾ ಅತಿಸಣ್ಣ ಮತ್ತು ಸಣ್ಣ ಉದ್ಯಮಗಳು ಜೆಮ್‌ ನಲ್ಲಿ ನೋಂದಾಯಿಸಿಕೊಂಡಿವೆ ಮತ್ತು ಒಟ್ಟು 13.7 ಲಕ್ಷ ಆರ್ಡರ್‌ಗಳನ್ನು ಪಡೆದಿವೆ.
• ಮಹಿಳಾ ಉದ್ಯಮಗಳಿಗೆ ₹ 28,000 ಕೋಟಿಗೂ ಅಧಿಕ ಮೌಲ್ಯದ ಗುತ್ತಿಗೆಗಳನ್ನು ನೀಡಲಾಗಿದ್ದು, ಇದು ಕಳೆದ ವರ್ಷಕ್ಕೆ ಹೋಲಿಸಿದರೆ 27.60% ಬೆಳವಣಿಗೆಯನ್ನು ದಾಖಲಿಸಿದೆ.
• GeM ನ ಒಟ್ಟು ಆರ್ಡರ್‌ಗಳಲ್ಲಿ 5.6% ರಷ್ಟು ಮಹಿಳಾ ಉದ್ಯಮಗಳಿಗೆ ಲಭಿಸಿದೆ, ಇದು ಸರ್ಕಾರ ನಿಗದಿಪಡಿಸಿದ 3% ಖರೀದಿ ಗುರಿಯನ್ನು ಗಮನಾರ್ಹವಾಗಿ ಮೀರಿದೆ.

ಈ ಉಪಕ್ರಮವು ಒಂದು ವಿಶೇಷ ಅಂತರ್ಗತ ಪ್ರಯತ್ನವಾಗಿ ಆರಂಭವಾಗಿ, ಇಂದು ದೇಶದ ಮಹಿಳಾ ನೇತೃತ್ವದ ಉದ್ಯಮಗಳಿಗೆ ಅತಿ ದೊಡ್ಡ ಸಂಘಟಿತ ಸಾರ್ವಜನಿಕ ಖರೀದಿ ಚಾನಲ್‌ಗಳಲ್ಲಿ ಒಂದಾಗಿ ವಿಕಸನಗೊಂಡಿದೆ. ಡಿಜಿಟಲ್ ಮೂಲಸೌಕರ್ಯ, ಕ್ಷೇತ್ರ ಮಟ್ಟದ ಸಜ್ಜುಗೊಳಿಸುವಿಕೆ, ಸಾಮರ್ಥ್ಯ ವೃದ್ಧಿ ಮತ್ತು ಸಾಂಸ್ಥಿಕ ಬೇಡಿಕೆಗಳ ಪರಸ್ಪರ ಸಂಬಂಧಿತ ಪಾತ್ರಗಳು ಒಟ್ಟಾಗಿ, ಮಹಿಳೆಯರ ಆರ್ಥಿಕ ಭಾಗವಹಿಸುವಿಕೆಯನ್ನು ದೊಡ್ಡ ಮಟ್ಟದಲ್ಲಿ ಬೆಂಬಲಿಸುವ ಒಂದು ಪೂರಕ ವಾತಾವರಣವನ್ನು ನಿರ್ಮಿಸುತ್ತವೆ.

ಉಪಸಂಹಾರ: ಸಮಾಜದ ಅರ್ಧಭಾಗವನ್ನು ಪ್ರತಿನಿಧಿಸುವ ಮಾರುಕಟ್ಟೆ

ಮಹಿಳಾ ನೇತೃತ್ವದ ಉದ್ಯಮಗಳು ಮತ್ತು ಸ್ವಸಹಾಯ ಗುಂಪುಗಳಿಗೆ ಭಾರತದ ಅತಿದೊಡ್ಡ ಸಾರ್ವಜನಿಕ ಮಾರುಕಟ್ಟೆಗಳಲ್ಲಿ ಒಂದಕ್ಕೆ ನೇರ ಪ್ರವೇಶವನ್ನು ನೀಡುವ ಮೂಲಕ,  ಜೆಮ್‌ ನಲ್ಲಿನ 'ವುಮನಿಯಾ' ಉಪಕ್ರಮವು ಅಸ್ತಿತ್ವದಲ್ಲಿರುವ ಉತ್ಪಾದನಾ ಸಾಮರ್ಥ್ಯವನ್ನು ಔಪಚಾರಿಕ ಮತ್ತು ಸುಸ್ಥಿರ ಉದ್ಯಮ ಭಾಗವಹಿಸುವಿಕೆಯಾಗಿ ಪರಿವರ್ತಿಸುತ್ತದೆ. ಹೆಚ್ಚು ಮಹಿಳೆಯರು ಮಾರುಕಟ್ಟೆಯಲ್ಲಿ ಗುರುತಿಸಿಕೊಳ್ಳುತ್ತಿದ್ದಂತೆ, ತಮ್ಮ ಸಾಮರ್ಥ್ಯವನ್ನು ವೃದ್ಧಿಸಿಕೊಳ್ಳುತ್ತಾ ಮತ್ತು ಸರ್ಕಾರಿ ಖರೀದಿದಾರರೊಂದಿಗೆ ಸಂಪರ್ಕ ಸಾಧಿಸುತ್ತಿದ್ದಂತೆ, 'ವುಮನಿಯಾ' ಕೇವಲ ಒಂದು ಖರೀದಿ ಪ್ರಕ್ರಿಯೆಯಾಗಿ ಉಳಿಯದೆ ಆರ್ಥಿಕ ಸ್ವಾತಂತ್ರ್ಯ ಮತ್ತು ವ್ಯಾಪಕ ಪ್ರಾತಿನಿಧ್ಯದ ಮಾರ್ಗವಾಗುತ್ತದೆ. ಇದು ಸಾರ್ವಜನಿಕ ಖರೀದಿಯು ಸಮಾಜದ ಅರ್ಧಭಾಗವಾದ ಮಹಿಳೆಯರ ಸಾಮರ್ಥ್ಯಗಳು ಮತ್ತು ಆಕಾಂಕ್ಷೆಗಳನ್ನು ಪ್ರತಿಬಿಂಬಿಸುವುದನ್ನು ಖಚಿತಪಡಿಸುತ್ತದೆ.

PIB Research

References

MINISTRY OF COMMERCE & INDUSTRY

https://www.pib.gov.in/PressReleasePage.aspx?PRID=2215001&reg=3&lang=2

https://www.pib.gov.in/PressReleasePage.aspx?PRID=2192297&reg=3&lang=2

https://www.pib.gov.in/PressReleaseIframePage.aspx?PRID=2106076&reg=3&lang=2

https://www.pib.gov.in/PressReleasePage.aspx?PRID=1559864&reg=3&lang=2

https://www.pib.gov.in/PressReleaseIframePage.aspx?PRID=2106076&reg=3&lang=2

https://www.pib.gov.in/PressReleaseIframePage.aspx?PRID=1891303&reg=3&lang=2

https://www.pib.gov.in/PressReleasePage.aspx?PRID=1565237&reg=3&lang=2#:~:text=Ceremonial%20lamp%20being%20lit%20to,Marketplace%20the%20national%20procurement%20portal.

MINISTRY OF EXTERNAL AFFAIRS

https://indbiz.gov.in/govt-e-marketplace-launches-womaniya-initiative/

MINISTRY OF RURAL DEVELOPMENT

https://www.pib.gov.in/PressReleseDetailm.aspx?PRID=1620881&reg=3&lang=2

https://nrlm.gov.in/outerReportAction.do?methodName=showIndex#gsc.tab=0

SANSAD: LOK SABHA

https://www.commerce.gov.in/wp-content/uploads/2020/03/MOC_636848992668198129_LS-04-02-2019.pdf

WORLD BANK

https://documents1.worldbank.org/curated/en/099060425063724348/pdf/P177653-7547fc12-cde0-46aa-b682-8fd13b237aa2.pdf

OTHERS

https://gem.gov.in/resources/pdf/womaniya-flyer.pdf

https://mkp.gem.gov.in/search?q=womaniya

https://gem.gov.in/aboutus

https://gem.gov.in/womaniya

https://mkp.gem.gov.in/exclusive-estore-unique-seller-groups-womaniya-womaniya-handicrafts/search#/?q=womaniya

https://mkp.gem.gov.in/exclusive-estore-unique-seller-groups-womaniya-womaniya-grocery-and-pantry/search#/?q=womaniya

https://mkp.gem.gov.in/exclusive-estore-unique-seller-groups-womaniya-womaniya-office-accessories/search#/?q=womaniya

https://mkp.gem.gov.in/exclusive-estore-unique-seller-groups-womaniya-womaniya-handloom-textiles/search#/?q=womaniya

https://mkp.gem.gov.in/exclusive-estore-unique-seller-groups-womaniya-womaniya-personal-hygiene-and-care/search#/?q=womaniya

https://www.newsonair.gov.in/gem-promotes-transparency-inclusiveness-in-public-procurement-records-%E2%82%B94-lakh-crore-transactions/

https://gem.gov.in/training/training_module

https://wep.gov.in/

https://mpsrlm.mp.gov.in/uploads/files/SVEP.pdf

https://www.serp.telangana.gov.in/AboutUs/Serp_About.jsp

https://employmentnews.gov.in/newemp/MoreContentNew.aspx?n=Editorial&k=90385#:~:text=Self%2DHelp%20Groups%20or%20SHGs,carrying%20out%20social%20welfare%20programmes.

PRESS INFORMATION BUREAU
https://static.pib.gov.in/WriteReadData/specificdocs/documents/2025/mar/doc202532511101.pdf

https://www.pib.gov.in/factsheetdetails.aspx?id=148586&reg=3&lang=1

https://www.pib.gov.in/PressReleasePage.aspx?PRID=2227484&reg=3&lang=1

Click here to see pdf 

*****