पत्र सूचना कार्यालय

ആമുഖം

ബയോഫാർമയ്ക്കും ബയോളജിക് മരുന്നുകൾക്കും ആരോഗ്യ സംരക്ഷണത്തിലും നിർമ്മാണ തന്ത്രത്തിലും പ്രധാന സ്ഥാനം നൽകിക്കൊണ്ട്, ഫാർമസ്യൂട്ടിക്കൽ മേഖലയോടുള്ള ഇന്ത്യയുടെ സമീപനത്തിൽ നിർണ്ണായകമായ ഒരു മാറ്റം 2026-27 ലെ കേന്ദ്ര ബജറ്റ് അടയാളപ്പെടുത്തുന്നു. ഇന്ത്യയെ ഒരു മുൻനിര ആഗോള ബയോഫാർമ വ്യവസായ കേന്ദ്രമാക്കി മാറ്റുന്നതിനും ആഗോള വിപണി വിഹിതത്തിന്റെ 5% പിടിച്ചെടുക്കുന്നതിനുമുള്ള ഇന്ത്യാ ​ഗവൺമെന്റിന്റെ കാഴ്ചപ്പാടിന് അനുസൃതമാണിത്.

സാംക്രമികേതര രോഗങ്ങളുടെ വർദ്ധിച്ചുവരുന്ന സമ്മർദവും ബയോളജിക്കുകളിലും ബയോസിമിലറുകളിലും ആഗോളതലത്തിൽ വർദ്ധിച്ചുവരുന്ന ആശ്രിതത്വവും കണക്കിലെടുത്ത് പൊതുജനാരോഗ്യത്തിനും സാമ്പത്തിക വളർച്ചയ്ക്കും നിർണ്ണായകമായ ഉയർന്ന മൂല്യമുള്ള ഭാവി വിഭാഗമായി ബയോഫാർമയെ ബജറ്റ് പ്രതിഷ്ഠിക്കുന്നു.

മനുഷ്യകോശങ്ങൾ, ഫംഗസുകൾ അല്ലെങ്കിൽ സൂക്ഷ്മാണുക്കൾ തുടങ്ങിയവയിലൂടെയുള്ള ചികിത്സാ രീതികളുടെ ഉൽപ്പാദനം, നിർമ്മാണം അല്ലെങ്കിൽ വേർതിരിച്ചെടുക്കൽ എന്നിവ ബയോഫാർമയിൽ ഉൾപ്പെടുന്നു. വാക്സിനുകൾ, ആന്റിബോഡി ചികിത്സകൾ, ജീൻ തെറാപ്പികൾ, സെൽ ഇംപ്ലാന്റുകൾ, ആധുനിക ഇൻസുലിൻ, റീകോമ്പിനന്റ് പ്രോട്ടീൻ മരുന്നുകൾ എന്നിവ ബയോഫാർമസ്യൂട്ടിക്കലുകളുടെ ചില ഉദാഹരണങ്ങളാണ്.

കേന്ദ്ര ബജറ്റ് 2026-27: ബയോഫാർമ ശക്തി സംരംഭം

ബയോഫാർമയ്ക്കായുള്ള പ്രധാന ബജറ്റ് പ്രഖ്യാപനങ്ങൾ:

• ബയോളജിക്സ്, ബയോസിമിലറുകൾ എന്നിവയ്ക്കായുള്ള ഇന്ത്യയുടെ സമഗ്ര ആവാസവ്യവസ്ഥയെ ശക്തിപ്പെടുത്തുന്നതിനായി അഞ്ച് വർഷത്തേക്ക് 10,000 കോടി രൂപ വകയിരുത്തിക്കൊണ്ട് ഒരു സമർപ്പിത ദേശീയ സംരംഭമായ ബയോഫാർമ ശക്തിയ്ക്ക് തുടക്കം. ഉയർന്ന മൂല്യമുള്ള ബയോഫാർമസ്യൂട്ടിക്കൽ ഉൽപ്പന്നങ്ങളുടെയും മരുന്നുകളുടെയും ആഭ്യന്തര വികസനവും നിർമ്മാണവും പിന്തുണയ്ക്കുന്നതിനും ഇറക്കുമതി ആശ്രിതത്വം കുറയ്ക്കുന്നതിനും ആഗോള ബയോളജിക്സ് വിതരണ ശൃംഖലയിൽ ഇന്ത്യയുടെ മത്സരക്ഷമത വർദ്ധിപ്പിക്കുന്നതിനുമായാണ് ഈ സംരംഭം രൂപകൽപ്പന ചെയ്തിരിക്കുന്നത്.
• മൂന്ന് പുതിയ നാഷണൽ ഇൻസ്റ്റിറ്റ്യൂട്ട് ഓഫ് ഫാർമസ്യൂട്ടിക്കൽ എഡ്യൂക്കേഷൻ ആൻഡ് റിസർച്ച് (NIPER) സ്ഥാപിക്കുന്നതിലൂടെയും നിലവിലുള്ള ഏഴ് NIPER-കൾ നവീകരിക്കുന്നതിലൂടെയും ബയോഫാർമ കേന്ദ്രീകൃത ശൃംഖലയുടെ വിപുലീകരണവും ശാക്തീകരണവും. ബയോഫാർമ ഗവേഷണം, വികസനം, നിർമ്മാണം, നിയന്ത്രണം എന്നിവയിൽ ഉയർന്ന വൈദഗ്ധ്യമുള്ള മനുഷ്യവിഭവശേഷിയുടെ വർദ്ധിച്ചുവരുന്ന ആവശ്യകത പരിഹരിക്കാൻ ഈ നടപടി ലക്ഷ്യമിടുന്നു.
• രാജ്യത്തുടനീളം 1,000-ത്തിലധികം അംഗീകൃത ക്ലിനിക്കൽ ട്രയൽ സൈറ്റുകൾ വികസിപ്പിക്കാനുള്ള നിർദ്ദേശത്തോടെ വലിയ തോതിലുള്ള ക്ലിനിക്കൽ ഗവേഷണ ആവാസവ്യവസ്ഥയുടെ സൃഷ്ടി. ഇത് ബയോളജിക്സിനും ബയോസിമിലറുകൾക്കുമായി വിപുലമായ ക്ലിനിക്കൽ പരീക്ഷണങ്ങൾ നടത്താനുള്ള ഇന്ത്യയുടെ ശേഷി വർദ്ധിപ്പിക്കുമെന്നും നവീകരണം ത്വരിതപ്പെടുത്തുമെന്നും, ധാർമ്മികവും ഉയർന്ന നിലവാരമുള്ളതും കാര്യക്ഷമവുമായ ക്ലിനിക്കൽ പരീക്ഷണങ്ങൾക്ക് ആഗോളതലത്തിൽ മുൻഗണന നൽകുന്ന ഒരു ലക്ഷ്യസ്ഥാനമായി രാജ്യത്തെ സ്ഥാപിക്കുമെന്നും പ്രതീക്ഷിക്കുന്നു.
• ബയോളജിക്‌സിനായുള്ള നിയന്ത്രണ ചട്ടക്കൂട് ശക്തിപ്പെടുത്തൽ സ്പെഷ്യലൈസ്ഡ് ശാസ്ത്ര-സാങ്കേതിക ഉദ്യോഗസ്ഥരെ നിയമിക്കുന്നതിലൂടെ സെൻട്രൽ ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷന്റെ (CDSCO) ശേഷി വർദ്ധിപ്പിക്കുന്നത് ഉൾപ്പെടെ ബയോളജിക്സിന്റെ നിയന്ത്രണ സംവിധാനം ശക്തിപ്പെടുത്തും. റെഗുലേറ്ററി കാര്യക്ഷമത മെച്ചപ്പെടുത്തുന്നതിനും അനുമതി നൽകുന്നതിനുള്ള സമയപരിധി ആഗോള നിലവാരത്തിലേക്ക് കൊണ്ടുവരുന്നതിനും സങ്കീർണ്ണമായ ബയോഫാർമസ്യൂട്ടിക്കൽ ഉൽപ്പന്നങ്ങളുടെ വേഗത്തിലുള്ള വിലയിരുത്തലിനും ഇതിലൂടെ മുൻഗണന നൽകുന്നു.

എന്തുകൊണ്ട് ഇത് പ്രാധാന്യമർഹിക്കുന്നു?

നിർമ്മാണ തോത്, വിദഗ്ധരായ മനുഷ്യവിഭവശേഷി, ക്ലിനിക്കൽ ഗവേഷണ ശേഷി, റെഗുലേറ്ററി വിശ്വാസ്യത എന്നിവയെ ബജറ്റ് ഒരൊറ്റ ചട്ടക്കൂടിന് കീഴിൽ കൊണ്ടുവരുന്നു. ജനറിക് മരുന്നുകളുടെ ചെലവ് കുറഞ്ഞ ഉൽപ്പാദക രാജ്യത്തിൽ നിന്നും ഉയർന്ന നിലവാരമുള്ള, നവീനാശയങ്ങളിൽ അധിഷ്ഠിതമായ ബയോഫാർമസ്യൂട്ടിക്കൽ ഉൽപ്പന്നങ്ങളുടെ ആഗോള ഹബ്ബായി ഇന്ത്യയെ ഉയർത്താനുള്ള വ്യക്തമായ ഉദ്ദേശ്യത്തെ ഇത് സൂചിപ്പിക്കുന്നു.

ആ​ഗോള ബയോഫാർമ വിപണിയിൽ മത്സരിക്കാൻ ഇന്ത്യയെ സജ്ജമാക്കുന്നതോടൊപ്പം അത്യാധുനിക ബയോളജിക് ചികിത്സകൾ മിതമായ നിരക്കിൽ രാജ്യത്ത് ലഭ്യമാക്കാനും ഈ ബജറ്റ് കരുത്തു പകരുന്നു.

എന്താണ് ബയോഫാർമ?

സമീപ വർഷങ്ങളിൽ, മരുന്നുകൾ പരമ്പരാഗത രാസ മരുന്നുകൾക്കപ്പുറം ജീവശാസ്ത്രത്തെ തന്നെ ഉപയോഗപ്പെടുത്തി വികസിപ്പിച്ചെടുക്കുന്ന ചികിത്സാ രീതികളിലേക്ക് മാറിക്കൊണ്ടിരിക്കുകയാണ്. ഈ മാറ്റം ബയോഫാർമയെ ആധുനിക ആരോഗ്യ സംരക്ഷണത്തിന്റെ മുൻനിരയിലേക്ക് എത്തിച്ചു. രാസ സംശ്ലേഷണത്തെ മാത്രം ആശ്രയിക്കാതെ, ജീവനുള്ള ജൈവ വ്യവസ്ഥകളെ ഉപയോഗിച്ച് മരുന്നുകൾ വികസിപ്പിക്കുകയും നിർമ്മിക്കുകയും ചെയ്യുന്ന ഫാർമസ്യൂട്ടിക്കൽ വ്യവസായത്തിന്റെ ഭാഗമാണ് ബയോഫാർമ അല്ലെങ്കിൽ ബയോഫാർമസ്യൂട്ടിക്കൽസ്.

ലളിതമായി പറഞ്ഞാൽ കോശങ്ങൾ, സൂക്ഷ്മാണുക്കൾ അല്ലെങ്കിൽ മറ്റ് ജൈവ വസ്തുക്കൾ എന്നിവ ഉപയോഗിച്ചാണ് ബയോഫാർമ മരുന്നുകൾ നിർമ്മിക്കുന്നത്. രോഗചികിത്സയ്ക്കുള്ള വസ്തുക്കൾ വളർത്തിയെടുക്കുന്നതിനോ ഉൽപ്പാദിപ്പിക്കുന്നതിനോ വേണ്ടി മനുഷ്യന്റെയോ മൃഗങ്ങളുടെയോ കോശങ്ങൾ, ബാക്ടീരിയകൾ, ഫംഗസുകൾ അല്ലെങ്കിൽ സമാനമായ ജൈവ പ്ലാറ്റ്‌ഫോമുകൾ ഇതിൽ ഉൾപ്പെട്ടേക്കാം. ബയോടെക്‌നോളജി അധിഷ്ഠിത ഗവേഷണ രീതികൾ ഉപയോഗിച്ച്, രോഗങ്ങൾ തടയാനോ രോഗനിർണ്ണയം നടത്താനോ ചികിത്സിക്കാനോ കഴിയുന്ന മരുന്നുകൾ നിർമ്മിക്കാൻ ഈ ജീവൽ വ്യവസ്ഥകളെ മുന്നോട്ടുനയിക്കുന്നു. ജൈവ പ്രക്രിയകളിലൂടെ സൃഷ്ടിക്കപ്പെടുന്നതിനാൽ ബയോഫാർമ ഉൽപ്പന്നങ്ങൾ പലപ്പോഴും പരമ്പരാഗത മരുന്നുകളേക്കാൾ സങ്കീർണ്ണവും കൃത്യമായ ലക്ഷ്യത്തിൽ പ്രവർത്തിക്കുന്നവയുമാണ്, ഇത് ജൈവ പാതകളുമായി കൂടുതൽ കൃത്യമായി സംവദിക്കാൻ അവയെ അനുവദിക്കുന്നു.

വാക്സിനുകൾ, തെറാപ്പിക് പ്രോട്ടീനുകൾ, ബയോസിമിലറുകൾ, മറ്റ് നൂതന ബയോളജിക് തെറാപ്പികൾ എന്നിവയുൾപ്പെടെ വ്യാപകമായി ഉപയോഗിക്കപ്പെടുന്ന പല ആധുനിക മരുന്നുകളും ബയോഫാർമയ്ക്ക് കീഴിലാണ് വരുന്നത്. പകർച്ചവ്യാധികൾ, വിട്ടുമാറാത്ത രോഗങ്ങൾ, പരമ്പരാഗത മരുന്നുകൾ ഫലപ്രദമല്ലാത്ത വൈകല്യങ്ങൾ എന്നിവയ്ക്ക് ഈ ഉൽപ്പന്നങ്ങൾ പൊതുജനാരോഗ്യ പരിപാടികളിലും ക്ലിനിക്കൽ പരിചരണത്തിലും അത്യന്താപേക്ഷിതമായി മാറിയിരിക്കുന്നു. ഈ വ്യവസായത്തിന്റെ വികസനത്തിനായി ഇന്ത്യാ ​ഗവൺമെന്റ് വിവിധ പരിപാടികൾ ആരംഭിച്ചിട്ടുണ്ട്. വികസിച്ചുകൊണ്ടിരിക്കുന്ന ഈ ബയോഫാർമ ആവാസവ്യവസ്ഥയും ലക്ഷ്യബോധമുള്ള നയപരമായ പിന്തുണയും ആഗോളതലത്തിൽ മത്സരക്ഷമതയുള്ള ഒരു ബയോഫാർമ ഹബ്ബായി ഉയരാനുള്ള ഇന്ത്യയുടെ ശ്രമങ്ങൾക്ക് അടിത്തറയിടുന്നു.

ഇന്ത്യയുടെ ബയോഫാർമ മേഖലയെ ശക്തിപ്പെടുത്തുന്നതിനുള്ള ​ഗവൺമെന്റ് സംരംഭങ്ങൾ

ഇന്ത്യൻ ഫാർമസ്യൂട്ടിക്കൽ വ്യവസായം ഇപ്പോൾ കുറഞ്ഞ ചെലവിൽ ജനറിക് മരുന്നുകൾ നിർമ്മിക്കുന്നതിൽ മാത്രം ഒതുങ്ങി നിൽക്കുന്നില്ല; ബയോഫാർമസ്യൂട്ടിക്കലുകൾ, ബയോസിമിലറുകൾ എന്നിവ പോലുള്ള സങ്കീർണ്ണവും ഉയർന്ന മൂല്യമുള്ളതുമായ ഉൽപ്പന്നങ്ങളുടെ ഗവേഷണത്തിലും വികസനത്തിലും ഇത് കൂടുതൽ നിക്ഷേപം നടത്തുന്നു. കുറഞ്ഞ ചെലവിൽ ലഭിക്കുന്ന ഉയർന്ന നിലവാരമുള്ള മരുന്നുകളുടെ ആഗോള കേന്ദ്രമായി രാജ്യം മാറിയിരിക്കുന്നു; ഉൽപ്പാദന അളവിൽ മൂന്നാം സ്ഥാനത്തും മൂല്യത്തിൽ 14-ാം സ്ഥാനത്തുമാണ് ഇന്ത്യ.

കഴിഞ്ഞ കുറച്ച് വർഷങ്ങളായി, ഗവേഷണം, പ്രാരംഭ ഘട്ട ഉൽപ്പന്ന വികസനം മുതൽ നിർമ്മാണം, നവീകരണം, വാണിജ്യവൽക്കരണം എന്നിവ വരെയുള്ള മുഴുവൻ മൂല്യശൃംഖലയിലും ബയോഫാർമസ്യൂട്ടിക്കൽ മേഖലയെ ശക്തിപ്പെടുത്തുന്നതിനായി ഇന്ത്യാ ​ഗവൺമെന്റ് നിരവധി നയപരമായ സംരംഭങ്ങളും പദ്ധതികളും നടപ്പിലാക്കിയിട്ടുണ്ട്.

ഗവൺമെന്റ്, അക്കാദമിക രംഗം, വ്യവസായം, സ്റ്റാർട്ടപ്പുകൾ എന്നിവയെ ഒരുമിച്ച് കൊണ്ടുവരുന്നതിലാണ് വിവിധ സംരംഭങ്ങൾ ശ്രദ്ധ കേന്ദ്രീകരിക്കുന്നത്. ഇന്ത്യയെ ഒരു ആഗോള ബയോഫാർമ, ബയോമാനുഫാക്ചറിംഗ് ഹബ്ബാക്കി മാറ്റുക എന്ന ലക്ഷ്യത്തോടെ പൊതുവായ അടിസ്ഥാന സൗകര്യങ്ങൾ നിർമ്മിക്കാനും നവീകരണത്തെ പ്രോത്സാഹിപ്പിക്കാനും ആഭ്യന്തര ഉൽപ്പാദനം ശക്തിപ്പെടുത്താനും അവ ലക്ഷ്യമിടുന്നു.

നാഷണൽ ബയോഫാർമ മിഷൻ (NBM) – “ഇന്നൊവേറ്റ് ഇൻ ഇന്ത്യ (i3)”

2025-ഓടെ ഇന്ത്യയെ 100 ബില്യൺ ഡോളർ മൂല്യമുള്ള മുൻനിര ആഗോള ബയോടെക് വ്യവസായമാക്കി മാറ്റുക എന്ന ലക്ഷ്യത്തോടെ 2017 മെയ് മാസത്തിലാണ് നാഷണൽ ബയോഫാർമ മിഷൻ (NBM) - ഇന്നൊവേറ്റ് ഇൻ ഇന്ത്യ (i3) ആരംഭിച്ചത്. പദ്ധതിയുടെ ആകെ ചെലവ് 1,500 കോടി രൂപയാണ്. ലോകബാങ്കിന്റെ സഹായത്തോടെ നടപ്പിലാക്കുന്ന ഈ പദ്ധതി ഡിപ്പാർട്ട്‌മെന്റ് ഓഫ് ബയോടെക്‌നോളജിക്ക് (DBT) കീഴിലുള്ള ബയോടെക്‌നോളജി ഇൻഡസ്ട്രി റിസർച്ച് അസിസ്റ്റൻസ് കൗൺസിൽ (BIRAC) ആണ് നിർവഹിക്കുന്നത്. രാജ്യത്ത് രോഗങ്ങളുമായി ബന്ധപ്പെട്ട് വർദ്ധിച്ചുവരുന്ന ആശങ്ക പരിഹരിക്കുന്നതിനായി പുതിയ വാക്സിനുകൾ, ബയോ-തെറാപ്പിറ്റിക്സ്, ഡയഗ്നോസ്റ്റിക്സ്, മെഡിക്കൽ ഉപകരണങ്ങൾ എന്നിവയുടെ വികസനത്തിലാണ് മിഷൻ ശ്രദ്ധ കേന്ദ്രീകരിക്കുന്നത്. മരുന്നുകൾ കൂടുതൽ താങ്ങാനാവുന്നതും പ്രാപ്യമാക്കുന്നതുമാക്കാൻ ഈ മിഷൻ ലക്ഷ്യമിടുന്നു.

150-ലധികം സ്ഥാപനങ്ങളും 30 MSME-കളും ഉൾപ്പെടുന്ന 101 പദ്ധതികളെ NBM പിന്തുണയ്ക്കുന്നു. 304 ശാസ്ത്രജ്ഞരും ഗവേഷകരും ഉൾപ്പെടെ 1,000-ത്തിലധികം തൊഴിലവസരങ്ങളും ഇത് സൃഷ്ടിച്ചു. കൂടാതെ, 10,000 ജീനോമുകൾ ക്രമീകരിക്കുന്ന 'ജീനോം ഇന്ത്യ പ്രോഗ്രാം', ചികിത്സയിലും പ്രതിരോധത്തിലും ഭാവിയിലെ ആഗോള ആരോഗ്യ സംരക്ഷണ തന്ത്രങ്ങളെ രൂപപ്പെടുത്തുമെന്ന് പ്രതീക്ഷിക്കുന്നു.

വ്യവസായത്തെയും അക്കാദമിക് ലോകത്തെയും ​ഗവൺമെന്റിനെയും ഒന്നിപ്പിച്ചാണ് ഇത് പ്രവർത്തിക്കുന്നത്. ഹ്യൂമൻ പാപ്പിലോമ വൈറസ് (HPV), ഡെങ്കിപ്പനി എന്നിവയ്ക്കുള്ള വാക്സിനുകൾ വികസിപ്പിക്കുന്നതിലും കാൻസർ, പ്രമേഹം, റൂമറ്റോയ്ഡ് ആർത്രൈറ്റിസ് എന്നിവയ്ക്കുള്ള ബയോസിമിലറുകളിലും മെഡിക്കൽ ഉപകരണങ്ങളിലും ഡയഗ്നോസ്റ്റിക്സിലുമാണ് മിഷന്റെ പ്രാരംഭ ശ്രദ്ധ.

ബിറാക് (BIRAC) നേതൃത്വം നൽകുന്ന ബയോടെക് ഇന്നൊവേഷൻ പിന്തുണ

ഡിപ്പാർട്ട്‌മെന്റ് ഓഫ് ബയോടെക്‌നോളജിക്ക് കീഴിൽ 2012-ൽ സ്ഥാപിതമായ ബിറാക് (BIRAC) ധനസഹായ പദ്ധതികൾ, ഇൻകുബേഷൻ അടിസ്ഥാന സൗകര്യങ്ങൾ, മാർഗനിർദ്ദേശം എന്നിവയിലൂടെ നവീകരണത്തെ പിന്തുണയ്ക്കുന്നു. രാജ്യത്തുടനീളം 95 ബയോ-ഇൻകുബേഷൻ സെന്ററുകൾ സ്ഥാപിച്ചിട്ടുണ്ട്. ഇതിന്റെ പരിപാടികൾ ദേശീയ ബയോടെക്‌നോളജി, നവീകരണ നയങ്ങളുമായി പൊരുത്തപ്പെടുന്നതും ദേശീയ പ്രാധാന്യമുള്ള ഉൽപ്പന്ന വികസന ആവശ്യങ്ങൾ പരിഹരിക്കുന്നതിൽ ശ്രദ്ധ കേന്ദ്രീകരിക്കുന്നതുമാണ്.

പ്രധാന പദ്ധതികൾ താഴെ പറയുന്നവയാണ്:

• ബയോടെക്‌നോളജി ഇഗ്നിഷൻ ഗ്രാന്റ് (BIG): പ്രാരംഭ ഘട്ടത്തിലുള്ള സ്റ്റാർട്ടപ്പുകളെ പിന്തുണയ്ക്കുന്നതിനായി 18 മാസത്തേക്ക് 50 ലക്ഷം രൂപ വരെ നൽകുന്നു; ഏകദേശം 1,000 നവീനാശയക്കാർക്ക് പിന്തുണ നൽകി.
• സീഡ് (SEED) ഫണ്ട്: പ്രൂഫ്-ഓഫ്-കൺസെപ്റ്റ് ഘട്ടത്തിലുള്ള സ്റ്റാർട്ടപ്പുകൾക്ക് 30 ലക്ഷം രൂപയുടെ ഇക്വിറ്റി പിന്തുണ.
• ലീപ്പ് (LEAP) ഫണ്ട്: വാണിജ്യവൽക്കരണത്തിന് തയ്യാറായ നൂതനാശയങ്ങൾക്ക് 100 ലക്ഷം രൂപയുടെ ഇക്വിറ്റി പിന്തുണ.
• जनCARE – അമൃത് ഗ്രാൻഡ് ചലഞ്ച്: ടയർ-II, ടയർ-III നഗരങ്ങളിലും ഗ്രാമപ്രദേശങ്ങളിലും ശ്രദ്ധ കേന്ദ്രീകരിച്ച് ആർട്ടിഫിഷ്യൽ ഇന്റലിജൻസ്, മെഷീൻ ലേണിംഗ്, ടെലിമെഡിസിൻ, ബ്ലോക്ക്ചെയിൻ എന്നിവയിലുള്ള 89 ഡിജിറ്റൽ ഹെൽത്ത് ടെക് ഇന്നൊവേഷനുകളെ പിന്തുണച്ചു.

നിർമ്മാണവും വ്യവസായവും ശക്തിപ്പെടുത്തുന്നതിനുള്ള നടപടികൾ

ആഭ്യന്തര ഫാർമസ്യൂട്ടിക്കൽ, ബയോഫാർമ നിർമ്മാണം ശക്തിപ്പെടുത്തുന്നതിനായി, ഫാർമസ്യൂട്ടിക്കലുകൾക്കായുള്ള ഉൽപാദന-ബന്ധിത പ്രോത്സാഹന (PLI) പദ്ധതി, സ്ട്രെങ്തനിംഗ് ഓഫ് ഫാർമസ്യൂട്ടിക്കൽ ഇൻഡസ്ട്രി (SPI) സ്കീം, ബൾക്ക് ഡ്രഗ് പാർക്ക്സ് സ്കീം തുടങ്ങിയ പദ്ധതികൾ ​ഗവൺമെന്റ് നടപ്പിലാക്കിയിട്ടുണ്ട്. ഉൽപ്പാദന ശേഷി വർദ്ധിപ്പിക്കുക, ആക്ടീവ് ഫാർമസ്യൂട്ടിക്കൽ ഇൻഗ്രീഡിയന്റുകൾക്കും (API) ഇടനില വസ്തുക്കൾക്കുമായി വിദേശങ്ങളെ ആശ്രയിക്കുന്നത് കുറയ്ക്കുക, എംഎസ്എംഇ സൗകര്യങ്ങൾ ലോകാരോഗ്യ സംഘടനയുടെ ഗുഡ് മാനുഫാക്ചറിംഗ് സ്റ്റാൻഡേർഡുകളിലേക്ക് ഉയർത്തുക, ഫാർമസ്യൂട്ടിക്കൽ ക്ലസ്റ്ററുകൾക്കുള്ളിൽ പൊതുവായ അടിസ്ഥാന സൗകര്യങ്ങൾ ഒരുക്കുക എന്നിവയിലാണ് ഈ സംരംഭങ്ങൾ ശ്രദ്ധ കേന്ദ്രീകരിക്കുന്നത്.

എസ്പിഐ (SPI) പദ്ധതിയിൽ ഫാർമസ്യൂട്ടിക്കൽ ക്ലസ്റ്ററുകളിലെ പൊതു സൗകര്യങ്ങൾക്കുള്ള സഹായം, എംഎസ്എംഇകളുടെ സാങ്കേതിക നവീകരണത്തിനുള്ള പിന്തുണ, ഫാർമസ്യൂട്ടിക്കൽസ്, മെഡിക്കൽ ഉപകരണങ്ങൾ എന്നിവയുടെ പ്രചരണ-വികസന പ്രവർത്തനങ്ങൾ എന്നിവ ഉൾപ്പെടുന്നു. പിഎൽഐ സ്കീമുകൾക്കും ബൾക്ക് ഡ്രഗ് പാർക്കുകൾക്കുമൊപ്പം ഈ നടപടികൾ വിതരണ ശൃംഖല ദൃഢമാക്കാനും ഗുണനിലവാര നിലവാരം മെച്ചപ്പെടുത്താനും ആഭ്യന്തരവും കയറ്റുമതി കേന്ദ്രീകൃതവുമായ മരുന്ന് ഉൽപ്പാദനത്തെ പിന്തുണയ്ക്കാനും ലക്ഷ്യമിടുന്നു.

ഫാർമ-മെഡ്‌ടെക് മേഖലയിലെ ഗവേഷണവും നവീകരണവും പ്രോത്സാഹിപ്പിക്കൽ (PRIP)

ഇന്ത്യയെ നവീകരണാധിഷ്ഠിതവും ആഗോളതലത്തിൽ മത്സരക്ഷമതയുള്ളതുമായ ഫാർമ-മെഡ്‌ടെക് മേഖലയാക്കി മാറ്റുന്നതിനായി 5,000 കോടി രൂപ വകയിരുത്തി, 2023-ൽ ഡിപ്പാർട്ട്‌മെന്റ് ഓഫ് ഫാർമസ്യൂട്ടിക്കൽസ് 'PRIP' പദ്ധതി ആരംഭിച്ചു. പുതിയ മരുന്നുകൾ, ബയോസിമിലറുകൾ, കോംപ്ലക്സ് ജനറിക്സ്, പ്രിസിഷൻ മെഡിസിൻ, നോവൽ മെഡിക്കൽ ഉപകരണങ്ങൾ എന്നിവയിലെ ഗവേഷണ വികസന പ്രവർത്തനങ്ങളെ ഈ പദ്ധതി പിന്തുണയ്ക്കുന്നു. കൂടാതെ, NIPER-കളിൽ സെന്റർ ഓഫ് എക്സലൻസ് സ്ഥാപിക്കുന്നതിലൂടെ വ്യവസായവും അക്കാദമികളും തമ്മിലുള്ള സഹകരണം ഇത് പ്രോത്സാഹിപ്പിക്കുന്നു.

BioE3 നയവും Bio-RIDE പദ്ധതിയും

BioE3 (സാമ്പത്തികത്തിനും പരിസ്ഥിതിക്കും തൊഴിലിനും വേണ്ടിയുള്ള ബയോടെക്‌നോളജി) നയത്തിന് 2024 ഓഗസ്റ്റിൽ കേന്ദ്ര മന്ത്രിസഭ അംഗീകാരം നൽകി. സുസ്ഥിരമായ വികസിത ഭാരതത്തിനായി ബയോമാനുഫാക്ചറിംഗ്, ബയോ-എഐ ഹബ്ബുകൾ, ബയോഫൗണ്ടറി എന്നിവ സ്ഥാപിക്കാൻ ഈ പദ്ധതി ലക്ഷ്യമിടുന്നു. ഗവേഷണം, വികസനം, സംരംഭകത്വം എന്നിവയ്ക്കുള്ള നവീകരണാധിഷ്ഠിത പിന്തുണ ഇതിന്റെ പ്രധാന സവിശേഷതയാണ്. ഈ നൂതനാശയങ്ങൾ രോഗങ്ങൾ, ഭക്ഷ്യസുരക്ഷ, കാലാവസ്ഥാ വ്യതിയാനം തുടങ്ങിയ നിർണ്ണായക സാമൂഹിക പ്രശ്നങ്ങൾ പരിഹരിക്കും.

BioE3 നയം താഴെ പറയുന്ന തന്ത്രപ്രധാന മേഖലകളിൽ ശ്രദ്ധ കേന്ദ്രീകരിക്കുന്നു:

• ജൈവാധിഷ്ഠിത രാസവസ്തുക്കൾ, പോളിമറുകൾ, എൻസൈമുകൾ
• ഫങ്ഷണൽ ഫുഡ്സ്, സ്മാർട്ട് പ്രോട്ടീനുകൾ
• പ്രിസിഷൻ ബയോതെറാപ്പിറ്റിക്സ്
• കാലാവസ്ഥാ പ്രതിരോധശേഷിയുള്ള കൃഷി
• കാർബൺ ക്യാപ്‌ചറും അതിന്റെ ഉപയോഗവും
• സമുദ്ര-ബഹിരാകാശ ഗവേഷണം

2024 സെപ്റ്റംബറിൽ ആരംഭിച്ച 'Bio-RIDE' പദ്ധതി, ഡിപ്പാർട്ട്‌മെന്റ് ഓഫ് ബയോടെക്‌നോളജിയുടെ (DBT) രണ്ട് പ്രധാന പദ്ധതികളെ ഒന്നിപ്പിച്ചു: ബയോടെക്‌നോളജി റിസർച്ച് ഇന്നൊവേഷനെയും എന്റർപ്രണർഷിപ്പ് ഡെവലപ്‌മെൻറിനെയും. ഇതിൽ ബയോമാനുഫാക്ചറിംഗ്, ബയോഫൗണ്ടറി എന്നീ പുതിയ ഘടകങ്ങൾ ഉൾപ്പെടുത്തിയിട്ടുണ്ട്. 2021-22 മുതൽ 2025-26 വരെയുള്ള കാലയളവിനായി 9,197 കോടി രൂപയാണ് ഇതിന് വകയിരുത്തിയിരിക്കുന്നത്. മറ്റ് പദ്ധതികളെപ്പോലെ, ആരോഗ്യ സംരക്ഷണം, കൃഷി, പരിസ്ഥിതി സുസ്ഥിരത, ശുദ്ധോർജം തുടങ്ങിയ മേഖലകളിലെ ദേശീയ-ആഗോള വെല്ലുവിളികളെ നേരിടാൻ ബയോ-ഇന്നൊവേഷൻ ഉപയോഗിക്കുക എന്നതാണ് ഇതിന്റെ ലക്ഷ്യം.

ഈ പദ്ധതിക്ക് മൂന്ന് പ്രധാന ഭാഗങ്ങളുണ്ട്:

• ബയോടെക്‌നോളജി ഗവേഷണവും വികസനവും (R&D)
• വ്യാവസായിക-സംരംഭകത്വ വികസനം (I&ED)
• ബയോമാനുഫാക്ചറിംഗും ബയോഫൗണ്ടറിയും

ബയോ-സംരംഭകത്വത്തെ പ്രോത്സാഹിപ്പിക്കുക, അത്യാധുനിക ഗവേഷണങ്ങളെ പിന്തുണയ്ക്കുക, വ്യവസായ-അക്കാദമിക് സഹകരണം സുഗമമാക്കുക, സുസ്ഥിരമായ ബയോമാനുഫാക്ചറിംഗ് പ്രോത്സാഹിപ്പിക്കുക, ഗവേഷകർക്ക് ധനസഹായം നൽകുക, ബയോടെക്‌നോളജി രംഗത്ത് പ്രവർത്തിക്കുന്ന വിദ്യാർത്ഥികൾക്കും യുവ ഗവേഷകർക്കും ശാസ്ത്രജ്ഞർക്കും പിന്തുണ നൽകുക എന്നിവയാണ് ഈ പദ്ധതി ലക്ഷ്യമിടുന്നത്.

ഉപസംഹാരം

ഗവേഷണം, നവീകരണം, നിർമ്മാണം, സംരംഭകത്വം എന്നിവ ഉൾക്കൊള്ളുന്ന ശക്തമായ ബയോഫാർമ ആവാസവ്യവസ്ഥ ഇന്ത്യയിൽ കെട്ടിപ്പടുക്കുന്നതിനുള്ള ​ഗവൺമെന്റിന്റെ ആസൂത്രിതവും ഏകോപിതവുമായ നയപരമായ സമീപനത്തെയാണ് ഈ നടപടികളെല്ലാം സൂചിപ്പിക്കുന്നത്. രോഗകാര്യങ്ങളിലെ ഇന്ത്യയുടെ ആശങ്കങ്ങൾ പ്രമേഹം, കാൻസർ, സ്വയംപ്രതിരോധ രോഗങ്ങൾ തുടങ്ങിയ സാംക്രമികേതര അവസ്ഥകളിലേക്ക് മാറിക്കൊണ്ടിരിക്കുന്ന സാഹചര്യത്തിൽ, ദീർഘകാല ആരോഗ്യ ഫലങ്ങൾക്കായി ബയോതെറാപ്പി ചികിത്സകൾ ലഭ്യമാക്കേണ്ടത് അത്യന്താപേക്ഷിതമാണ്.

അതുകൊണ്ട് തന്നെ, കേന്ദ്ര ബജറ്റ് 2026-27-ൽ പ്രഖ്യാപിച്ച 'ബയോഫാർമ ശക്തി' പദ്ധതി ഈ ദിശയിലുള്ള ഒരു പ്രധാന നയപരമായ ഇടപെടലാണ്. അഞ്ച് വർഷത്തിനുള്ളിൽ 10,000 കോടി രൂപയുടെ പിന്തുണയോടെ, വൈദഗ്ധ്യമുള്ള തൊഴിൽ സേനയെ വികസിപ്പിക്കുക, രാജ്യവ്യാപകമായി ക്ലിനിക്കൽ ട്രയൽ അടിസ്ഥാന സൗകര്യങ്ങൾ ഒരുക്കുക, നിയന്ത്രണ സംവിധാനങ്ങൾ മെച്ചപ്പെടുത്തുക എന്നിവയിലൂടെ ബയോളജിക്സുകളിലും ബയോസിമിലറുകളിലും ആഭ്യന്തര ശേഷി കൂടുതൽ ശക്തിപ്പെടുത്തുന്നതിനാണ് ഈ പദ്ധതി രൂപകൽപ്പന ചെയ്തിരിക്കുന്നത്. ഇത് ആഗോള ബയോഫാർമ നിർമ്മാണ കേന്ദ്രമായി മാറാനുള്ള ഇന്ത്യയുടെ അഭിലാഷത്തിന് കരുത്ത് പകരുന്നു.

References

• https://www.pib.gov.in/PressReleasePage.aspx?PRID=2115882&reg=3&lang=2  
• https://ocs.yale.edu/resources/biopharma/  
• https://birac.nic.in/nbm/
• https://birac.nic.in/webcontent/National_Biopharma_Mission_Document.pdf
• https://www.pib.gov.in/Pressreleaseshare.aspx?PRID=2115882&reg=3&lang=2
• https://www.mea.gov.in/Images/CPV/NBM-WEBSITE.pdf
• https://www.worldbank.org/en/news/feature/2025/11/24/india-s-biopharma-leap-the-world-bank-backed-national-biopharma-mission-is-transforming-health-innovation
• https://www.pib.gov.in/PressReleasePage.aspx?PRID=2110765&reg=3&lang=2
• https://www.pib.gov.in/Pressreleaseshare.aspx?PRID=2115882&reg=3&lang=2 
• https://sansad.in/getFile/loksabhaquestions/annex/184/AU4732_iEI6nD.pdf?source=pqals
• https://prip.pharma-dept.gov.in/
• https://www.pib.gov.in/PressReleasePage.aspx?PRID=2048568&reg=3&lang=2
• https://www.pib.gov.in/PressReleasePage.aspx?PRID=2056001&reg=3&lang=2
• https://www.pib.gov.in/PressNoteDetails.aspx?id=154488&NoteId=154488&ModuleId=3&reg=3&lang=2

Click here to see pdf 

***

SK