पत्र सूचना कार्यालय

ആമുഖം

ഇന്ത്യയുടെ ഇലക്ട്രോണിക്സ് നിർമ്മാണ മേഖല വളർച്ചയുടെ നിർണ്ണായക ഘട്ടത്തിലേക്ക് കടന്നിരിക്കുന്നു. ആഭ്യന്തര ഉൽപ്പാദന ശേഷി വർദ്ധിപ്പിക്കുന്നതിനുള്ള ശക്തമായ നയപരമായ നീക്കം പ്രഖ്യാപിച്ചുകൊണ്ട്, 2026–27 ലെ കേന്ദ്ര ബജറ്റ് ഇലക്ട്രോണിക്സ് ഘടക നിർമ്മാണ പദ്ധതിയുടെ (ECMS) വിഹിതം 40,000 കോടി രൂപയായി വർദ്ധിപ്പിച്ചു. കഴിഞ്ഞ പതിനൊന്ന് വർഷത്തിനിടയിൽ, ഉൽപ്പാദനത്തിൽ ഏകദേശം ആറിരട്ടി വർദ്ധനവ് കൈവരിച്ചുകൊണ്ട് ഇന്ത്യ ഒരു പ്രധാന ഇലക്ട്രോണിക്സ് നിർമ്മാണ കേന്ദ്രമായി അതിവേഗം മാറി. ഈ മേഖല അതിന്റെ വ്യവസായ അടിത്തറ വിപുലീകരിക്കുകയും 25 ലക്ഷം തൊഴിലവസരങ്ങൾ സൃഷ്ടിക്കുകയും തൊഴിലവസരങ്ങളുടെയും സാമ്പത്തിക വളർച്ചയുടെയും പ്രധാന ചാലകശക്തിയായി മാറുകയും ചെയ്തു.

ഇന്ത്യയുടെ കയറ്റുമതി പ്രകടനത്തിലും ആഗോള മൂല്യശൃംഖലകളുമായുള്ള വർദ്ധിച്ചുവരുന്ന സംയോജനത്തിലും ഈ പുരോഗതി പ്രതിഫലിക്കുന്നു. ഗവൺമെന്റിന്റെ തന്ത്രപരമായ ഇടപെടലുകളും നിരന്തര നയ പിന്തുണയും പ്രാദേശിക ഉൽപ്പാദനം ശക്തിപ്പെടുത്തുന്നതിനും കയറ്റുമതി വിപുലീകരണത്തെ പിന്തുണയ്ക്കുന്നതിനും ഗണ്യമായ ആഗോള നിക്ഷേപം ആകർഷിക്കുന്നതിനും സഹായിച്ചു.

ആഭ്യന്തര ഘടക നിർമ്മാണ മേഖലയെ ശക്തിപ്പെടുത്തുന്നതിലൂടെയും ഇന്ത്യയെ അത്യാധുനിക ഇലക്ട്രോണിക്സ് നിർമ്മാണത്തിനുള്ള വിശ്വസനീയമായ ആഗോള കേന്ദ്രമായി മാറ്റുന്നതിലൂടെയും ഈ മുന്നേറ്റം നിലനിർത്താനാണ് ECMS ലക്ഷ്യമിടുന്നത്.

2030–31 ഓടെ 500 ബില്യൺ ഡോളറിന്റെ ആഭ്യന്തര ഇലക്ട്രോണിക്സ് നിർമ്മാണ ശൃംഖല കെട്ടിപ്പടുക്കുക എന്ന ലക്ഷ്യത്തോടെ, ലോകത്തിനായി നൂതനമായവ കണ്ടെത്തുകയും അതേസമയം തന്നെ രാജ്യത്തിനുള്ളിൽ വലിയ അവസരങ്ങൾ സൃഷ്ടിക്കുകയും ചെയ്യുന്ന ഒരു ആഗോള സാങ്കേതിക നേതൃത്വമായി മാറാൻ ഇന്ത്യ ഒരുങ്ങുകയാണ്.

മേഖലാ വീക്ഷണം: ഇന്ത്യയുടെ മുൻനിര കയറ്റുമതി വിഭാഗമായി ഇലക്ട്രോണിക്സ്

2025-26 ലെ സാമ്പത്തിക സർവ്വേയിൽ ചൂണ്ടിക്കാട്ടിയതുപോലെ, 2021–22 ൽ ഏഴാം സ്ഥാനത്തായിരുന്ന ഇലക്ട്രോണിക്സ്, 2024–25 ൽ ഇന്ത്യയുടെ മൂന്നാമത്തെ വലിയതും അതിവേഗം വളരുന്നതുമായ കയറ്റുമതി വിഭാഗമായി മാറി. 2025–26 സാമ്പത്തിക വർഷത്തിന്റെ ആദ്യ പകുതിയിൽ ഇലക്ട്രോണിക്സ് കയറ്റുമതി 22.2 ബില്യൺ ഡോളറിലെത്തി; ശക്തമായ വളർച്ചാ നിരക്ക് നിലനിർത്തുന്നതിലൂടെ ഈ മേഖല രാജ്യത്തെ രണ്ടാമത്തെ വലിയ കയറ്റുമതി ഇനമായി മാറാനുള്ള പാതയിലാണ്.

രാജ്യത്തെ ഇലക്ട്രോണിക്സ് ഉൽപ്പാദനം 2014–15 ലെ 1.9 ലക്ഷം കോടി രൂപയിൽ നിന്ന് 2024–25 ൽ 11.3 ലക്ഷം കോടി രൂപയായി വർദ്ധിച്ചു, ഇത് ആറിരട്ടി വളർച്ചയാണ് അടയാളപ്പെടുത്തുന്നത്. അതേ കാലയളവിൽ കയറ്റുമതി 38,000 കോടി രൂപയിൽ നിന്ന് 3.27 ലക്ഷം കോടി രൂപയായി ഉയർന്നു, ഇത് എട്ടിരട്ടി വർദ്ധനവാണ് കാണിക്കുന്നത്. കഴിഞ്ഞ ദശകത്തിൽ, ഇലക്ട്രോണിക്സ് നിർമ്മാണ മേഖല രാജ്യത്തുടനീളം ഏകദേശം 25 ലക്ഷം തൊഴിലവസരങ്ങൾ സൃഷ്ടിച്ചു.

ഈ മാറ്റത്തിൽ മൊബൈൽ നിർമ്മാണ മേഖല ഒരു പ്രധാന പങ്ക് വഹിച്ചിട്ടുണ്ട്. ഈ വിഭാഗത്തിലെ ഉൽപ്പാദനം 2014–15 ലെ 18,000 കോടി രൂപയിൽ നിന്ന് 2024–25 ൽ 5.45 ലക്ഷം കോടി രൂപയായി വർദ്ധിച്ചു, ഇത് 28 മടങ്ങ് വർദ്ധനവാണ്. 2014-ൽ വെറും രണ്ട് യൂണിറ്റുകൾ മാത്രമുണ്ടായിരുന്ന സ്ഥാനത്ത് ഇപ്പോൾ 300-ലധികം യൂണിറ്റുകൾ പ്രവർത്തിക്കുന്നതോടെ, ഇന്ത്യ ഇന്ന് ലോകത്തിലെ രണ്ടാമത്തെ വലിയ മൊബൈൽ ഫോൺ നിർമ്മാതാക്കളാണ്.

മൊബൈൽ ഫോൺ കയറ്റുമതി ശ്രദ്ധേയമായ പുരോഗതി കൈവരിച്ചു; 2014–15 ലെ 1,500 കോടി രൂപയിൽ നിന്ന് 2024–25 ൽ 2 ലക്ഷം കോടി രൂപയായി ഇത് 127 മടങ്ങ് വർദ്ധിച്ചു. 2025–26 ലെ ആദ്യ അഞ്ച് മാസങ്ങളിൽ സ്മാർട്ട്‌ഫോൺ കയറ്റുമതി 1 ലക്ഷം കോടി രൂപയിലെത്തി, ഇത് കഴിഞ്ഞ വർഷം ഇതേ കാലയളവിനെ അപേക്ഷിച്ച് 55 ശതമാനം വർദ്ധനവാണ്.

ഒരു ദശകം മുമ്പ് ആവശ്യമായ മിക്ക ഉപകരണങ്ങളും ഇറക്കുമതി ചെയ്തിരുന്ന സ്ഥാനത്ത് നിന്ന്, ഇന്ന് ഏതാണ്ട് എല്ലാ ഉപകരണങ്ങളും ആഭ്യന്തരമായി നിർമ്മിച്ചുകൊണ്ട് ഇന്ത്യ മൊബൈൽ ഉൽപ്പാദനത്തിൽ ഏതാണ്ട് സ്വയംപര്യാപ്തത കൈവരിച്ചിരിക്കുന്നു. ഈ മാറ്റം ഇന്ത്യയുടെ നയപരമായ ചുറ്റുപാടിന്റെ കരുത്തിനെയും ആഗോള ഇലക്ട്രോണിക്സ് നിർമ്മാണത്തിനും കയറ്റുമതിക്കുമുള്ള വിശ്വസനീയമായ കേന്ദ്രമായി ഇന്ത്യ വളർന്നതിനെയും എടുത്തുകാട്ടുന്നു.

ECMS-ന്റെ അവലോകനം

ഇലക്ട്രോണിക്സ് ഘടക നിർമ്മാണ പദ്ധതി 2025 ഏപ്രിൽ 8-നാണ് വിജ്ഞാപനം ചെയ്തത്.  22,919 കോടി രൂപയായിരുന്നു ഇതിന്റെ പ്രാരംഭ വിഹിതം (ഏകദേശം 2.7 ബില്യൺ യുഎസ് ഡോളർ). ആറ് വർഷമാണ് ഈ പദ്ധതിയുടെ കാലാവധി, ഒപ്പം ഒരു വർഷത്തെ അധിക തയ്യാറെടുപ്പ് കാലയളവും ലഭ്യമാണ്. രാജ്യത്ത് ഇലക്ട്രോണിക്സ് ഘടക നിർമ്മാണത്തിനായി ശക്തവും സ്വയംപര്യാപ്തവുമായ ഒരു സംവിധാനം കെട്ടിപ്പടുക്കുക എന്നതാണ് ഈ പദ്ധതി ലക്ഷ്യമിടുന്നത്. മൂല്യശൃംഖലയിലുടനീളം ആഭ്യന്തര-ആഗോള നിക്ഷേപങ്ങൾ ആകർഷിക്കുന്നതിനും ആഭ്യന്തര മൂല്യവർദ്ധനവ് പ്രോത്സാഹിപ്പിക്കുന്നതിനും ആഗോള ഇലക്ട്രോണിക്സ് വ്യാപാരത്തിൽ ഇന്ത്യയെ ഒരു പ്രധാന ശക്തിയായി മാറ്റുന്നതിനുമാണ് പദ്ധതി ശ്രദ്ധ കേന്ദ്രീകരിക്കുന്നത്. ഈ പദ്ധതി ഇന്ത്യ സെമികണ്ടക്ടർ മിഷന് (ISM) പൂരകമായി പ്രവർത്തിക്കുകയും ആഭ്യന്തര സെമികണ്ടക്ടർ-ഇലക്ട്രോണിക്സ് സംവിധാനത്തെ ശക്തിപ്പെടുത്താൻ ഒപ്പം ചേർന്നു നിൽക്കുകയും ചെയ്യുന്നു.

ആവശ്യമായ ഘടകങ്ങൾ, ഉപഭാഗങ്ങൾ, അസംസ്‌കൃത വസ്തുക്കൾ എന്നിവ രാജ്യത്തിനകത്ത് തന്നെ ഉൽപ്പാദിപ്പിക്കാൻ പ്രോത്സാഹിപ്പിക്കുന്നതിലൂടെ ഇന്ത്യയുടെ ഇലക്ട്രോണിക്സ് വ്യവസായത്തെ ആഗോള മൂല്യശൃംഖലകളുമായി സംയോജിപ്പിക്കാൻ ഇലക്ട്രോണിക്സ് ഘടക നിർമ്മാണ പദ്ധതി (ECMS) ശ്രമിക്കുന്നു.

2025 ഡിസംബറിലെ കണക്കനുസരിച്ച്, പദ്ധതിക്ക് കീഴിൽ പ്രതീക്ഷിക്കുന്ന നിക്ഷേപം 1,15,351 കോടി രൂപയാണ്; ഇത് പ്രാരംഭ ലക്ഷ്യമായ 59,350 കോടി രൂപയുടെ ഇരട്ടിയോളമാണ്. അടുത്ത ആറ് വർഷത്തിനുള്ളിൽ 10,34,751 കോടി രൂപയുടെ ഉൽപ്പാദനം നടക്കുമെന്ന് പ്രതീക്ഷിക്കുന്നു, ഇത് ആദ്യകാല കണക്കുകൂട്ടലുകളേക്കാൾ 2.2 മടങ്ങ് കൂടുതലാണ്. പ്രോത്സാഹന വിഹിതം 41,468 കോടി രൂപയായിരിക്കുമെന്ന് കണക്കാക്കുന്നു, ഇത് യഥാർത്ഥ എസ്റ്റിമേറ്റായ 22,805 കോടി രൂപയുടെ ഏകദേശം 1.8 മടങ്ങാണ്. പദ്ധതിയിലൂടെ 1,41,801 നേരിട്ടുള്ള തൊഴിലവസരങ്ങൾ സൃഷ്ടിക്കുമെന്നും 91,600 എന്ന ലക്ഷ്യത്തെ മറികടക്കുമെന്നും, കൂടാതെ ധാരാളം പരോക്ഷ തൊഴിലവസരങ്ങളും സൃഷ്ടിക്കുമെന്നും പ്രതീക്ഷിക്കുന്നു.

ECMS-ന് കീഴിൽ അംഗീകരിച്ച അപേക്ഷകൾ

ഈ പദ്ധതി വിജ്ഞാപനം ചെയ്തത് മുതൽ, ഇന്ത്യയിലുടനീളമുള്ള വ്യവസായ മേഖലയിൽ നിന്ന് വലിയ താൽപ്പര്യമാണ് ലഭിച്ചുകൊണ്ടിരിക്കുന്നത്. ഇതുവരെ പദ്ധതിക്ക് കീഴിൽ 11 സംസ്ഥാനങ്ങളിലായി ആകെ 46 അപേക്ഷകൾക്ക് അംഗീകാരം നൽകിക്കഴിഞ്ഞു. ഈ അംഗീകാരങ്ങളിലൂടെ ആകെ 54,567 കോടി രൂപയുടെ നിക്ഷേപവും 3,67,343 കോടി രൂപയുടെ ഉൽപ്പാദന മൂല്യവുമാണ് പ്രതീക്ഷിക്കുന്നത്. ഏകദേശം 51,000 പേർക്ക് നേരിട്ടുള്ള തൊഴിലവസരങ്ങൾ സൃഷ്ടിക്കാൻ ഇതിലൂടെ സാധിക്കുമെന്ന് കരുതപ്പെടുന്നു.

അംഗീകാരം ലഭിച്ച സ്ഥാപനങ്ങൾ മൾട്ടി-ലെയർ പിസിബികൾ (PCB), ക്യാമറ മോഡ്യൂളുകൾ, കണക്റ്ററുകൾ, ഓസിലേറ്ററുകൾ, ഒപ്റ്റിക്കൽ ട്രാൻസീവറുകൾ, മൊബൈൽ-ഐടി ഹാർഡ്‌വെയർ ഉൽപ്പന്നങ്ങൾക്കും അനുബന്ധ ഉപകരണങ്ങൾക്കുമുള്ള എൻക്ലോഷറുകൾ എന്നിങ്ങനെ വൈവിധ്യമാർന്ന ഇലക്ട്രോണിക്സ് ഘടകങ്ങൾ നിർമ്മിക്കും.

മൂന്ന് ഘട്ടങ്ങളിലായാണ് ഈ അംഗീകാരങ്ങൾ നൽകിയിട്ടുള്ളത്; ഓരോ ഘട്ടവും ഉൽപ്പാദന ശേഷിക്കും തൊഴിൽസൃഷ്ടിക്കും ഗണ്യമായ സംഭാവന നൽകുന്നു.

രാജ്യത്തുടനീളം ഇലക്ട്രോണിക്സ് ഘടകങ്ങളുടെ ഉൽപ്പാദനവും വൻതോതിലുള്ള തൊഴിലവസരങ്ങളും ഉറപ്പാക്കുന്നതോടൊപ്പം വലിയ തോതിലുള്ള നിക്ഷേപം ആകർഷിക്കാനുള്ള പദ്ധതിയുടെ കഴിവാണ് ഈ അംഗീകാരങ്ങൾ വ്യക്തമാക്കുന്നത്.

2026–27 സാമ്പത്തിക വർഷത്തിൽ പ്രതീക്ഷിക്കുന്ന ഫലങ്ങൾ

അംഗീകരിക്കപ്പെട്ട പദ്ധതികളുടെ വിപുലീകരണവും വ്യവസായ മേഖലയുടെ തുടർച്ചയായ പങ്കാളിത്തവും വഴി 2026–27 സാമ്പത്തിക വർഷത്തിൽ ഈ പദ്ധതിയിൽ നിന്ന് വ്യക്തമായ ഫലങ്ങൾ ലഭിക്കുമെന്ന് പ്രതീക്ഷിക്കുന്നു. ഈ പദ്ധതിക്ക് കീഴിലുള്ള നിക്ഷേപങ്ങൾ ഇലക്ട്രോണിക്സ് ഘടക നിർമ്മാണ ശൃംഖലയിലുടനീളം ഉയർന്ന ഉൽപ്പാദന ശേഷിയും സുസ്ഥിരമായ തൊഴിലവസരങ്ങളുമായി മാറുമെന്ന് കണക്കാക്കപ്പെടുന്നു.

ശക്തവും മൂല്യവത്തായതുമായ ഒരു ഇലക്ട്രോണിക്സ് നിർമ്മാണ അടിത്തറയിലേക്കുള്ള രാജ്യത്തിന്റെ സുസ്ഥിരമായ പുരോഗതിയെയാണ് ഈ ഫലങ്ങൾ സൂചിപ്പിക്കുന്നത്.

ഇലക്ട്രോണിക്സ് നിർമ്മാണം പ്രോത്സാഹിപ്പിക്കുന്നതിനുള്ള മറ്റ് പ്രധാന ​ഗവൺമെന്റ് പദ്ധതികൾ

ശക്തമായ നയപിന്തുണയുടെയും കൃത്യമായ ലക്ഷ്യങ്ങളോടെയുള്ള ഗവൺമെന്റ് പദ്ധതികളുടെയും കരുത്തിലാണ് ഇന്ത്യയുടെ ഇലക്ട്രോണിക്സ് വ്യവസായം വളർന്നത്. ആഗോള മൂല്യശൃംഖലയിൽ ഇന്ത്യയുടെ പങ്ക് ശക്തിപ്പെടുത്തുന്നതിനൊപ്പം ആഗോളതലത്തിൽ മത്സരക്ഷമതയുള്ള ഒരു നിർമ്മാണ ശൃംഖല കെട്ടിപ്പടുക്കാനും നിക്ഷേപം ആകർഷിക്കാനും വൻതോതിൽ തൊഴിലവസരങ്ങൾ സൃഷ്ടിക്കാനുമാണ് ഈ പരിപാടികൾ ലക്ഷ്യമിടുന്നത്. നിലവിലുള്ള നിയമങ്ങൾക്കും നിയന്ത്രണങ്ങൾക്കും വിധേയമായി ഇലക്ട്രോണിക്സ് നിർമ്മാണ മേഖലയിൽ 100 ശതമാനം നേരിട്ടുള്ള വിദേശ നിക്ഷേപം (FDI) അനുവദിച്ചത് ഈ മേഖലയ്ക്ക് വലിയ ഗുണം ചെയ്തിട്ടുണ്ട്.

ഉൽപ്പാദന-ബന്ധിത പ്രോത്സാഹന (പിഎൽഐ) പദ്ധതി

1.97 ലക്ഷം കോടി രൂപയുടെ ഉൽപ്പാദന-ബന്ധിത പ്രോത്സാഹന പദ്ധതി ഇലക്ട്രോണിക്സ്, ഐടി ഹാർഡ്‌വെയർ എന്നിവയുൾപ്പെടെ 14 പ്രധാന മേഖലകളെ ഉൾക്കൊള്ളുന്നു. ഉൽപ്പാദനം വർദ്ധിപ്പിക്കാനും പുതിയ സാങ്കേതികവിദ്യകൾ സ്വീകരിക്കാനും കയറ്റുമതി വിപുലീകരിക്കാനും ഈ പദ്ധതി കമ്പനികളെ പ്രോത്സാഹിപ്പിക്കുന്നു.

2020-21 സാമ്പത്തിക വർഷം മുതൽ ഇലക്ട്രോണിക്സ് നിർമ്മാണ മേഖലയിൽ 4 ബില്യൺ യുഎസ് ഡോളറിലധികം നേരിട്ടുള്ള വിദേശ നിക്ഷേപം (FDI) ഇന്ത്യ ആകർഷിച്ചിട്ടുണ്ട്. ഈ വിദേശ നിക്ഷേപത്തിന്റെ ഏകദേശം 70 ശതമാനവും പിഎൽഐ (PLI) പദ്ധതിയുടെ ഗുണഭോക്താക്കളുടെ സംഭാവനയാണ്.

മോഡിഫൈഡ് ഇലക്ട്രോണിക്സ് മാനുഫാക്ചറിംഗ് ക്ലസ്റ്ററുകൾ (EMC 2.0)

EMC 2.0 എന്നറിയപ്പെടുന്ന മോഡിഫൈഡ് ഇലക്ട്രോണിക്സ് മാനുഫാക്ചറിംഗ് ക്ലസ്റ്ററുകൾ 2020 ഏപ്രിലിൽ ഇന്ത്യാ ​ഗവൺമെന്റ് വിജ്ഞാപനം ചെയ്തു. പൊതു സൗകര്യങ്ങളോടു കൂടിയ പ്രത്യേക ക്ലസ്റ്ററുകൾക്ക് ധനസഹായം നൽകിക്കൊണ്ട് ഇലക്ട്രോണിക്സ് നിർമ്മാണത്തിനായി ലോകോത്തര നിലവാരത്തിലുള്ള അടിസ്ഥാന സൗകര്യങ്ങൾ ഒരുക്കുകയാണ് ഈ പദ്ധതി ലക്ഷ്യമിടുന്നത്. നിർമ്മാണ പ്രവർത്തനങ്ങൾ വേഗത്തിലാക്കുന്നതിനായി സജ്ജമായ വ്യവസായ പ്ലോട്ടുകൾ, റെഡി-ബിൽറ്റ് ഫാക്ടറി ഷെഡുകൾ, പ്ലഗ് ആൻഡ് പ്ലേ സൗകര്യങ്ങൾ തുടങ്ങിയ പൊതുവായ സേവനങ്ങൾ ഈ ക്ലസ്റ്ററുകൾ നൽകുന്നു.

2025 ഡിസംബർ വരെയുള്ള കണക്കനുസരിച്ച്, 11 EMC പ്രോജക്റ്റുകൾക്കും 2 കോമൺ ഫെസിലിറ്റി സെന്റർ പ്രോജക്റ്റുകൾക്കും അംഗീകാരം നൽകിയിട്ടുണ്ട്. ഇവയെല്ലാം ചേർന്ന് 4,399.68 ഏക്കറിലായി വ്യാപിച്ചു കിടക്കുന്നു; 2,492.74 കോടി രൂപയുടെ കേന്ദ്ര സാമ്പത്തിക സഹായം ഉൾപ്പെടെ ആകെ 5,226.49 കോടി രൂപയാണ് ഇതിന്റെ പദ്ധതി ചെലവ്. 1,46,846 കോടി രൂപയുടെ നിക്ഷേപവും ഏകദേശം 1.80 ലക്ഷം പേർക്ക് തൊഴിലവസരവും പ്രതീക്ഷിക്കുന്ന ഈ പദ്ധതികൾ 10 സംസ്ഥാനങ്ങളിലായി വ്യാപിച്ചു കിടക്കുന്നു.

കസ്റ്റംസ്, സർചാർജ് ഇളവുകൾ

മൈക്രോവേവ് ഓവനുകളുടെ നിർമ്മാണത്തിന് ഉപയോഗിക്കുന്ന ചില അസംസ്കൃത വസ്തുക്കളുടെ അടിസ്ഥാന കസ്റ്റംസ് ഡ്യൂട്ടിയിലുള്ള ഇളവുകൾ 2026 ഫെബ്രുവരി 2 മുതൽ പ്രാബല്യത്തിൽ വരുമെന്ന് 2026-27-ലെ കേന്ദ്ര ബജറ്റ് പ്രഖ്യാപിച്ചു.

അതോടൊപ്പം ഇലക്ട്രോണിക് കളിപ്പാട്ടങ്ങളുടെ നിർമ്മാണത്തിനുള്ള ഭാഗങ്ങളെ സോഷ്യൽ വെൽഫെയർ സർചാർജിൽ നിന്നും ഒഴിവാക്കി, ഇതും അതേ തീയതി മുതൽ പ്രാബല്യത്തിൽ വരും

ഇലക്ട്രോണിക് ഘടകങ്ങളുടെയും സെമി കണ്ടക്ടറുകളുടെയും നിർമ്മാണം പ്രോത്സാഹിപ്പിക്കുന്നതിനുള്ള പദ്ധതി (SPECS)

പ്രധാന ഇലക്ട്രോണിക് ഉൽപ്പന്നങ്ങൾ നിർമ്മിക്കുന്നതിനുള്ള മൂലധനച്ചെലവിന് 25 ശതമാനം സാമ്പത്തികാനുകൂല്യം സ്‌പെക്സ് പദ്ധതി വാഗ്ദാനം ചെയ്യുന്നു. വിതരണ ശൃംഖലയിലെ നിർണ്ണായക വിടവുകൾ നികത്താനും പ്രാദേശിക ഉൽപ്പാദനം പ്രോത്സാഹിപ്പിക്കാനും കേവലം അസംബ്ലിംഗ് മാത്രമായ നിർമ്മാണ രീതിയിൽ നിന്ന് ഉയർന്ന മൂല്യമുള്ള ഘടകഭാഗങ്ങളുടെ നിർമ്മാണത്തിലേക്ക് മാറാൻ ഇന്ത്യയെ സഹായിക്കുകയും ചെയ്യുന്നു.

ദേശീയ ഇലക്ട്രോണിക്സ് നയം (NPE) 2019

ഇലക്ട്രോണിക്സ് സിസ്റ്റം ഡിസൈൻ ആൻഡ് മാനുഫാക്ചറിംഗ് (ESDM) മേഖലയിലെ ആഗോള കേന്ദ്രമായി ഇന്ത്യയെ മാറ്റുകയാണ് ദേശീയ ഇലക്ട്രോണിക്സ് നയം ലക്ഷ്യമിടുന്നത്. ഈ നയം നൂതനാശയങ്ങളെ പ്രോത്സാഹിപ്പിക്കുകയും ഡിസൈൻ അധിഷ്ഠിത നിർമ്മാണത്തിന് മുൻഗണന നൽകുകയും വ്യവസായത്തിന്റെ ദീർഘകാല വളർച്ച ഉറപ്പാക്കുന്നതിനായി ഗവേഷണ വികസന പ്രവർത്തനങ്ങളെ (R&D) പിന്തുണയ്ക്കുകയും ചെയ്യുന്നു.

ആഗോള മൂല്യശൃംഖലയിൽ ഇന്ത്യയുടെ സ്ഥാനം മെച്ചപ്പെടുത്തുന്നതോടൊപ്പം ശക്തമായ ഒരു ഇലക്ട്രോണിക്സ് നിർമ്മാണ ശൃംഖല കെട്ടിപ്പടുക്കാനും നിക്ഷേപം ആകർഷിക്കാനും തൊഴിലവസരങ്ങൾ സൃഷ്ടിക്കാനുമുള്ള സർക്കാരിന്റെ പ്രതിജ്ഞാബദ്ധതയെയാണ് ഈ നടപടികൾ കാണിക്കുന്നത്.

ഉപസംഹാരം

ഇന്ത്യയുടെ ഇലക്ട്രോണിക്സ് നിർമ്മാണ തന്ത്രത്തിന്റെ അടിസ്ഥാന ശിലയായി ഇലക്ട്രോണിക്സ് ഘടക നിർമ്മാണ പദ്ധതി മാറിയിരിക്കുന്നു. ഉഭയകക്ഷി ഉൽപ്പാദന ശേഷി വർദ്ധിപ്പിക്കുന്നതിനുള്ള ശക്തമായ നയപരമായ താൽപ്പര്യം വ്യക്തമാക്കിക്കൊണ്ട്, 2026-27- ലെ കേന്ദ്ര ബജറ്റിൽ ഇതിനായുള്ള വിഹിതം 40,000 കോടി രൂപയായി ഉയർത്തി. ECMS വലിയ തോതിലുള്ള നിക്ഷേപം സമാഹരിക്കുകയും ഉൽപ്പാദനം വർദ്ധിപ്പിക്കുകയും ഗണ്യമായ തൊഴിലവസരങ്ങൾ സൃഷ്ടിക്കുകയും ചെയ്തു. പ്രാദേശിക നിർമ്മാണ ശൃംഖലയെ ശക്തിപ്പെടുത്തുന്നതിലൂടെയും ഇന്ത്യയെ ആഗോള മൂല്യശൃംഖലയുമായി ബന്ധിപ്പിക്കുന്നതിലൂടെയും നൂതന ഇലക്ട്രോണിക്സ് നിർമ്മാണത്തിനുള്ള വിശ്വസനീയമായ കേന്ദ്രമെന്ന നിലയിൽ രാജ്യത്തിന്റെ സ്ഥാനം ഈ പദ്ധതി ഉറപ്പിക്കുന്നു.

References:

PIB Backgrounders:

• https://www.pib.gov.in/PressReleasePage.aspx?PRID=2183028&reg=3&lang=2
• https://www.pib.gov.in/PressReleasePage.aspx?PRID=2177755&reg=3&lang=2

Ministry of Electronics & IT:

• https://www.pib.gov.in/PressReleasePage.aspx?PRID=2221522&reg=3&lang=1
• https://www.pib.gov.in/PressReleasePage.aspx?PRID=2205046&reg=3&lang=2
• https://www.pib.gov.in/PressReleasePage.aspx?PRID=2182986&reg=3&lang=2
• https://www.pib.gov.in/PressReleasePage.aspx?PRID=2190872&reg=3&lang=2
• https://www.pib.gov.in/PressReleasePage.aspx?PRID=2210864&reg=3&lang=1
• https://www.pib.gov.in/PressReleasePage.aspx?PRID=2221894&reg=3&lang=1
• https://sansad.in/getFile/annex/269/AU2292_RkXPlb.pdf?source=pqars
• https://sansad.in/getFile/annex/268/AU684_xkz7hb.pdf?source=pqars

Union Budget:

• https://www.indiabudget.gov.in/doc/cen/dojstru1.pdf
• https://www.indiabudget.gov.in/doc/OutcomeBudgetE2026_2027.pdf
• https://www.indiabudget.gov.in/economicsurvey/doc/echapter.pdf

Click here to see PDF

***

SK