पत्र सूचना कार्यालय

ಪೀಠಿಕೆ

ಕೃತಕ ಬುದ್ಧಿಮತ್ತೆಯು ಭಾರತದ ಅಭಿವೃದ್ಧಿಯ ಪಯಣದಲ್ಲಿ ಪ್ರಮುಖ ಶಕ್ತಿಯಾಗಿದ್ದು, ಆಡಳಿತವನ್ನು ಬಲಪಡಿಸಲು ಮತ್ತು ಸಾರ್ವಜನಿಕ ಸೇವೆಗಳ ವಿತರಣೆಯನ್ನು ಸುಧಾರಿಸಲು ಸಹಕಾರಿಯಾಗಿದೆ. ಭಾರತದ ಪಾಲಿಗೆ, ಎಐ ತಂತ್ರಜ್ಞಾನವು ದೊಡ್ಡ ಮಟ್ಟದಲ್ಲಿ ಒಳಗೊಳ್ಳುವಿಕೆಯ ಬೆಳವಣಿಗೆಯನ್ನು ಬೆಂಬಲಿಸುತ್ತದೆ ಮತ್ತು 2047ರ ವೇಳೆಗೆ 'ವಿಕಸಿತ ಭಾರತ'ದ ದೂರದೃಷ್ಟಿಯೊಂದಿಗೆ ಹೊಂದಿಕೆಯಾಗುತ್ತದೆ. ಭಾರತದ ಭಾಷಾವಾರು ಮತ್ತು ಸಾಂಸ್ಕೃತಿಕ ವೈವಿಧ್ಯತೆಯು, ವೈವಿಧ್ಯಮಯ ಸಾರ್ವಜನಿಕ ಅಗತ್ಯಗಳಿಗೆ ತಕ್ಕಂತೆ ಬಹು-ಭಾಷಾ ಮತ್ತು ಬಹು-ಮಾದರಿಯ ಎಐ ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸಲು ಪೂರಕವಾದ ಬಲವಾದ ಸ್ಥಾನವನ್ನು ನೀಡಿದೆ.

ಎಐ ಕುರಿತಾದ ಭಾರತದ ಅಭಿವೃದ್ಧಿ-ಕೇಂದ್ರಿತ ಧೋರಣೆಯನ್ನು ಆಧರಿಸಿ, 'ಭಾರತ-ಎಐ ಪ್ರಭಾವ ಶೃಂಗಸಭೆ 2026' ಅನ್ನು 2026 ರ ಫೆಬ್ರವರಿ 16-20 ರವರೆಗೆ ನವದೆಹಲಿಯ ಭಾರತ್ ಮಂಟಪದಲ್ಲಿ ನಡೆಸಲು ನಿರ್ಧರಿಸಲಾಗಿದೆ. ಈ ಶೃಂಗಸಭೆಯು 'ಗ್ಲೋಬಲ್ ಸೌತ್'ನಲ್ಲಿ (ಜಾಗತಿಕ ದಕ್ಷಿಣದ ರಾಷ್ಟ್ರಗಳು) ಆಯೋಜಿಸಲಾಗುತ್ತಿರುವ ಮೊದಲ ಜಾಗತಿಕ ಎಐ ಶೃಂಗಸಭೆಯಾಗಿದೆ. ಇದು ಜಾಗತಿಕ ನಾಯಕರು, ನೀತಿ ನಿರೂಪಕರು, ತಂತ್ರಜ್ಞಾನ ಕಂಪನಿಗಳು, ನಾವೀನ್ಯಕಾರರು ಮತ್ತು ತಜ್ಞರನ್ನು ಒಂದೆಡೆ ಸೇರಿಸಿ ಆಡಳಿತ, ನಾವೀನ್ಯತೆ ಮತ್ತು ಸುಸ್ಥಿರ ಅಭಿವೃದ್ಧಿಯಲ್ಲಿ ಎಐ ತಂತ್ರಜ್ಞಾನದ ಪರಿವರ್ತಕ ಸಾಮರ್ಥ್ಯವನ್ನು ಪ್ರದರ್ಶಿಸಲು ಮತ್ತು ಚರ್ಚಿಸಲು ವೇದಿಕೆ ಕಲ್ಪಿಸುತ್ತದೆ.

ಪ್ರಮುಖ ಅಂತರಾಷ್ಟ್ರೀಯ ಎಐ ವೇದಿಕೆಗಳ ಫಲಿತಾಂಶಗಳನ್ನು ಮುಂದುವರಿಸುತ್ತಾ, ಭಾರತದ ಈ ಶೃಂಗಸಭೆಯು ಜಾಗತಿಕ ಚರ್ಚೆಗಳನ್ನು 'ಇಂಡಿಯಾ ಎಐ ಮಿಷನ್' ಮತ್ತು 'ಡಿಜಿಟಲ್ ಇಂಡಿಯಾ' ಉಪಕ್ರಮಗಳ ಅಡಿಯಲ್ಲಿ ರಾಷ್ಟ್ರೀಯ ಆದ್ಯತೆಗಳಿಗೆ ಅನುಗುಣವಾಗಿ ಅಭಿವೃದ್ಧಿ ಫಲಿತಾಂಶಗಳನ್ನಾಗಿ ಪರಿವರ್ತಿಸುವತ್ತ ಗಮನ ಹರಿಸುತ್ತದೆ. ಇದು ಭಾರತದ ಆಡಳಿತ, ಆರ್ಥಿಕತೆ ಮತ್ತು ಸಮಾಜಕ್ಕೆ ಪ್ರಸ್ತುತವಾದ ಪ್ರಾಯೋಗಿಕ ಹಾಗೂ ಜನ-ಕೇಂದ್ರಿತ ಎಐ ಚೌಕಟ್ಟುಗಳನ್ನು ಉತ್ತೇಜಿಸುವುದರ ಜೊತೆಗೆ ಬಹುಪಕ್ಷೀಯ ಸಹಕಾರವನ್ನು ಬಲಪಡಿಸಲಿದೆ.

ಭಾರತಕ್ಕೆ ಎಐನ ಮಹತ್ವ

ಕೃತಕ ಬುದ್ಧಿಮತ್ತೆಯು ಭಾರತದ ಆರ್ಥಿಕ ಬೆಳವಣಿಗೆಯನ್ನು ವೇಗಗೊಳಿಸಲು, ಆಡಳಿತವನ್ನು ಬಲಪಡಿಸಲು ಮತ್ತು ನಾಗರಿಕರ ಜೀವನಮಟ್ಟವನ್ನು ಸುಧಾರಿಸಲು ಒಂದು ಪರಿವರ್ತಕ ಶಕ್ತಿಯಾಗಿ ಹೊರಹೊಮ್ಮಿದೆ. ಇದು ಮುಖ್ಯವಾಗಿ ಜನ, ಭೂಮಿ ಮತ್ತು ಪ್ರಗತಿ ಎಂಬ ತತ್ವಗಳ ಮೇಲೆ ಆಧಾರಿತವಾಗಿದೆ. ಜನರಿಗಾಗಿ, ಎಐ-ಚಾಲಿತ ಪರಿಹಾರಗಳು ಟೆಲಿಮೆಡಿಸಿನ್ ಮತ್ತು ರೋಗನಿರ್ಣಯದ ಮೂಲಕ ಆರೋಗ್ಯ ಸೇವೆಯ ಲಭ್ಯತೆಯನ್ನು ವಿಸ್ತರಿಸುತ್ತಿವೆ, ಹೊಂದಾಣಿಕೆಯ ಕಲಿಕೆಯ ಮೂಲಕ ಶಿಕ್ಷಣವನ್ನು ವೈಯಕ್ತೀಕರಿಸುತ್ತಿವೆ ಮತ್ತು ವಂಚನೆ ಪತ್ತೆಹಚ್ಚುವ ಮೂಲಕ ಹಣಕಾಸು ವ್ಯವಸ್ಥೆಗಳನ್ನು ಸುರಕ್ಷಿತಗೊಳಿಸಿ ನಾಗರಿಕರನ್ನು ಸಬಲೀಕರಣಗೊಳಿಸುತ್ತಿವೆ. ಭೂಮಿಗಾಗಿ, ಎಐ ತಂತ್ರಜ್ಞಾನವು ಕೃಷಿಯಲ್ಲಿ ಬೆಳೆ ಮುನ್ಸೂಚನೆ, ನಿಖರ ಬೇಸಾಯ ಮತ್ತು ಡ್ರೋನ್-ಆಧಾರಿತ ಮೇಲ್ವಿಚಾರಣೆಯ ಮೂಲಕ ಹೆಚ್ಚು ಸ್ಮಾರ್ಟ್ ಮತ್ತು ಸುಸ್ಥಿರ ಪದ್ಧತಿಗಳನ್ನು ಅಳವಡಿಸಲು ಅನುವು ಮಾಡಿಕೊಡುತ್ತಿದೆ. ಪ್ರಗತಿಗಾಗಿ, ನ್ಯಾಯಾಲಯದ ತೀರ್ಪುಗಳ ಭಾಷಾ ಅನುವಾದದ ಮೂಲಕ ಎಐ ಆಡಳಿತವನ್ನು ಬಲಪಡಿಸುತ್ತಿದೆ, ಸೇವಾ ವಿತರಣೆಯನ್ನು ಸುಧಾರಿಸುತ್ತಿದೆ ಮತ್ತು ಆಹಾರ ವಿತರಣೆ, ಸಂಚಾರ ವ್ಯವಸ್ಥೆ ಹಾಗೂ ವೈಯಕ್ತೀಕರಿಸಿದ ಡಿಜಿಟಲ್ ಸೇವೆಗಳ ಮೂಲಕ ದೈನಂದಿನ ದಕ್ಷತೆಯನ್ನು ಹೆಚ್ಚಿಸುತ್ತಿದೆ. ಇದು ಗ್ರಾಮೀಣ ಮತ್ತು ನಗರ ಭಾರತಕ್ಕೆ ತಂತ್ರಜ್ಞಾನವು ಒಳಗೊಳ್ಳುವಿಕೆಯ ಮತ್ತು ಸುಲಭ ಲಭ್ಯತೆಯತ್ತ ಸಾಗುತ್ತಿರುವುದನ್ನು ಪ್ರತಿಬಿಂಬಿಸುತ್ತದೆ.

1. ಆರೋಗ್ಯ ಸೇವೆಯಲ್ಲಿ ಎಐ: ಎಐ ತಂತ್ರಜ್ಞಾನವು ಆರೋಗ್ಯ ಸೇವೆಯ ಲಭ್ಯತೆ ಮತ್ತು ಫಲಿತಾಂಶಗಳನ್ನು ಸುಧಾರಿಸುತ್ತಿದೆ, ವಿಶೇಷವಾಗಿ ಗ್ರಾಮೀಣ ಮತ್ತು ಸೌಲಭ್ಯ ವಂಚಿತ ಪ್ರದೇಶಗಳಲ್ಲಿ ಇದು ವರದಾನವಾಗಿದೆ. ವೈದ್ಯರ ಕೊರತೆಯಿರುವ ಕಡೆಗಳಲ್ಲಿ ಎಐ-ಚಾಲಿತ ದೂರಸ್ಥ ರೋಗನಿರ್ಣಯ ಮತ್ತು ಪೋರ್ಟಬಲ್ ಉಪಕರಣಗಳು ರೋಗ ಪತ್ತೆಗೆ ಸಹಾಯ ಮಾಡುತ್ತಿವೆ. ಸ್ವಯಂಚಾಲಿತ ರಕ್ತ ಮತ್ತು ಮೂತ್ರ ಪರೀಕ್ಷೆಗಳು ರೋಗನಿರ್ಣಯ ಮತ್ತು ಚಿಕಿತ್ಸೆಯನ್ನು ವೇಗಗೊಳಿಸುತ್ತವೆ. ಚಾಟ್‌ಬಾಟ್‌ಗಳು ಮತ್ತು ರೋಗಲಕ್ಷಣ ಪರೀಕ್ಷಕಗಳನ್ನು ಒಳಗೊಂಡ ಎಐ-ಚಾಲಿತ ಟೆಲಿಮೆಡಿಸಿನ್ ಗ್ರಾಮೀಣ ರೋಗಿಗಳನ್ನು ವೈದ್ಯರೊಂದಿಗೆ ಸಂಪರ್ಕಿಸುತ್ತದೆ, ಇದರಿಂದ ಪ್ರಯಾಣದ ಸಮಯ ಮತ್ತು ಕಾಯುವಿಕೆ ಕಡಿಮೆಯಾಗುತ್ತದೆ. ಎಐ-ಆಧಾರಿತ ವೈದ್ಯಕೀಯ ಚಿತ್ರ ವಿಶ್ಲೇಷಣೆಯು ಕ್ಷಯ, ಕ್ಯಾನ್ಸರ್ ಮತ್ತು ಇತರ ಕಾಯಿಲೆಗಳನ್ನು ದೂರದ ಪ್ರದೇಶಗಳಲ್ಲಿ ವೇಗವಾಗಿ ಪತ್ತೆಹಚ್ಚಲು ಅನುವು ಮಾಡಿಕೊಡುತ್ತದೆ.

2. ಕೃಷಿ ಮತ್ತು ಗ್ರಾಮೀಣ ಆರ್ಥಿಕತೆಯಲ್ಲಿ ಎಐ: ಉತ್ಪಾದಕತೆ ಮತ್ತು ರೈತರ ಆದಾಯವನ್ನು ಹೆಚ್ಚಿಸಲು ಎಐ ತಂತ್ರಜ್ಞಾನವು ದತ್ತಾಂಶ ಆಧಾರಿತ ಕೃಷಿ ಪದ್ಧತಿಗಳನ್ನು ಶಕ್ತಗೊಳಿಸುತ್ತಿದೆ. ಎಐ ಹವಾಮಾನ, ಕೀಟಗಳ ಹಾವಳಿ ಮತ್ತು ನೀರಾವರಿ ಅಗತ್ಯಗಳನ್ನು ಮುನ್ಸೂಚಿಸುತ್ತದೆ ಮತ್ತು ಮೊಬೈಲ್ ಮೂಲಕ ರೈತರಿಗೆ ಸಲಹೆಗಳನ್ನು ನೀಡುತ್ತದೆ. ಎಐ-ಚಾಲಿತ ಡ್ರೋನ್‌ಗಳು ಬೆಳೆಗಳ ಆರೋಗ್ಯವನ್ನು ಮೇಲ್ವಿಚಾರಣೆ ಮಾಡಿ ವ್ಯರ್ಥವಾಗುವುದನ್ನು ತಡೆಯುತ್ತವೆ. 'ಮೌಸಮ್ ಜಿಪಿಟಿ' ಮತ್ತು 'ಕಿಸಾನ್ ಇ-ಮಿತ್ರ'ದಂತಹ ಉಪಕರಣಗಳು ಪ್ರಾದೇಶಿಕ ಭಾಷೆಗಳಲ್ಲಿ ನೈಜ-ಸಮಯದ ಕೃಷಿ ಮಾಹಿತಿಯನ್ನು ಒದಗಿಸುತ್ತವೆ.

3. ಶಿಕ್ಷಣ ಮತ್ತು ಕಲಿಕೆಯಲ್ಲಿ ಎಐ: ಎಐ ಶಿಕ್ಷಣವನ್ನು ಹೆಚ್ಚು ವೈಯಕ್ತೀಕರಿಸಿದ, ಒಳಗೊಳ್ಳುವಿಕೆಯ ಮತ್ತು ಸುಲಭವಾಗಿ ಲಭ್ಯವಾಗುವಂತೆ ಮಾಡುತ್ತಿದೆ. ಎಐ-ಚಾಲಿತ ವೇದಿಕೆಗಳು ಪ್ರತಿಯೊಬ್ಬ ವಿದ್ಯಾರ್ಥಿಯ ಅಗತ್ಯಕ್ಕೆ ತಕ್ಕಂತೆ ಕಲಿಕಾ ವಿಷಯವನ್ನು ಬದಲಾಯಿಸುತ್ತವೆ. ಎಐ-ಆಧಾರಿತ ಭಾಷಾ ಅನುವಾದವು ಪಠ್ಯಗಳನ್ನು ಪ್ರಾದೇಶಿಕ ಭಾಷೆಗಳಿಗೆ ಪರಿವರ್ತಿಸುವ ಮೂಲಕ ಭಾಷಾ ಅಡೆತಡೆಗಳನ್ನು ನಿವಾರಿಸುತ್ತದೆ. 'ದೀಕ್ಷಾ' ದಂತಹ ವೇದಿಕೆಗಳು ವಿವಿಧ ವಿದ್ಯಾರ್ಥಿ ಸಮೂಹಗಳಿಗೆ ಸೂಕ್ತವಾದ ಶೈಕ್ಷಣಿಕ ವಿಷಯವನ್ನು ತಲುಪಿಸಲು ಎಐ ಬಳಸುತ್ತವೆ.

4. ಹಣಕಾಸು ಮತ್ತು ವಾಣಿಜ್ಯದಲ್ಲಿ ಎಐ: ಎಐ ಆರ್ಥಿಕ ಭದ್ರತೆ, ಒಳಗೊಳ್ಳುವಿಕೆ ಮತ್ತು ಸೇವೆಯ ದಕ್ಷತೆಯನ್ನು ಬಲಪಡಿಸುತ್ತಿದೆ. ಎಐ-ಚಾಲಿತ ವ್ಯವಸ್ಥೆಗಳು ವಂಚನೆಗಳನ್ನು ಪತ್ತೆಹಚ್ಚುತ್ತವೆ ಮತ್ತು ಡಿಜಿಟಲ್ ವಹಿವಾಟುಗಳನ್ನು ಸುರಕ್ಷಿತಗೊಳಿಸುತ್ತವೆ. ಎಐ-ಆಧಾರಿತ ಕ್ರೆಡಿಟ್ ಸ್ಕೋರಿಂಗ್ ಬ್ಯಾಂಕಿಂಗ್ ಸೌಲಭ್ಯವಿಲ್ಲದ ಜನರಿಗೆ ಸಾಲದ ಲಭ್ಯತೆಯನ್ನು ವಿಸ್ತರಿಸುತ್ತದೆ. ಬ್ಯಾಂಕಿಂಗ್ ಚಾಟ್‌ಬಾಟ್‌ಗಳು ಬ್ಯಾಲೆನ್ಸ್ ಚೆಕ್ ಮತ್ತು ಹಣ ವರ್ಗಾವಣೆಯಂತಹ ಸೇವೆಗಳಿಗೆ 24/7 ನೆರವು ನೀಡುತ್ತವೆ.

5. ಆಡಳಿತ ಮತ್ತು ಸಾರ್ವಜನಿಕ ಸೇವೆಗಳಲ್ಲಿ ಎಐ: ಸಾರ್ವಜನಿಕ ಸೇವೆಗಳ ದಕ್ಷತೆ, ಲಭ್ಯತೆ ಮತ್ತು ಪಾರದರ್ಶಕತೆಯನ್ನು ಎಐ ಹೆಚ್ಚಿಸುತ್ತಿದೆ. ನ್ಯಾಯಾಲಯದ ತೀರ್ಪುಗಳನ್ನು ಪ್ರಾದೇಶಿಕ ಭಾಷೆಗಳಿಗೆ ಅನುವಾದಿಸಲು ಎಐ ನೆರವು ನೀಡುತ್ತಿದ್ದು, ಇದರಿಂದ ನ್ಯಾಯದ ಲಭ್ಯತೆ ಸುಧಾರಿಸುತ್ತಿದೆ. ಸ್ಮಾರ್ಟ್ ಸಿಟಿ ನಿರ್ವಹಣೆಯಲ್ಲಿ ಸಂಚಾರ ವ್ಯವಸ್ಥ, ತ್ಯಾಜ್ಯ ವಿಲೇವಾರಿ ಮತ್ತು ಸಾರ್ವಜನಿಕ ಸುರಕ್ಷತೆಯನ್ನು ಉತ್ತಮಗೊಳಿಸಲು ಎಐ ಸಹಾಯ ಮಾಡುತ್ತದೆ. ಸರ್ಕಾರದ ವಿವಿಧ ಯೋಜನೆಗಳು ಮತ್ತು ಅರ್ಜಿಗಳ ಪ್ರಕ್ರಿಯೆಯ ಸಮಯವನ್ನು ಇದು ಕಡಿಮೆ ಮಾಡುತ್ತದೆ.

ಎಐ ನ ಆಯಕಟ್ಟಿನ ಪ್ರಾಮುಖ್ಯತೆಯನ್ನು ಗುರುತಿಸಿ, ಭಾರತ ಸರ್ಕಾರವು ಸದೃಢ ಮತ್ತು ಒಳಗೊಳ್ಳುವಿಕೆಯ ಎಐ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ಹೆಚ್ಚಿನ ಆದ್ಯತೆ ನೀಡಿದೆ. ಇಂಡಿಯಾ ಎಐ ಮಿಷನ್, ಎಐ ಕಂಪ್ಯೂಟ್ ಮೂಲಸೌಕರ್ಯದ ಅಭಿವೃದ್ಧಿ, ಸ್ವದೇಶಿ ಎಐ ಮಾದರಿಗಳ ಪ್ರೋತ್ಸಾಹ ಮತ್ತು ಬೃಹತ್ ಪ್ರಮಾಣದ ಸಾಮರ್ಥ್ಯ ವೃದ್ಧಿ ಕಾರ್ಯಕ್ರಮಗಳಂತಹ ಉಪಕ್ರಮಗಳು ದೇಶದಲ್ಲಿ ಜವಾಬ್ದಾರಿಯುತ ಮತ್ತು ವಿಶ್ವಾಸಾರ್ಹ ಎಐ ಅಳವಡಿಕೆಗೆ ಬಲವಾದ ಅಡಿಪಾಯ ಹಾಕುತ್ತಿವೆ.

ಇದಲ್ಲದೆ, ಭಾರತ-ಎಐ ಪ್ರಭಾವ ಶೃಂಗಸಭೆ 2026 ಜಾಗತಿಕ ಸಹಯೋಗವನ್ನು ಬಲಪಡಿಸುವುದು, ಜವಾಬ್ದಾರಿಯುತ ಮತ್ತು ನೈತಿಕ ಎಐ ಅನ್ನು ಉತ್ತೇಜಿಸುವುದು ಮತ್ತು ಆರ್ಥಿಕತೆಯ ಆದ್ಯತೆಯ ವಲಯಗಳಲ್ಲಿ ಎಐ ಅಳವಡಿಕೆಯನ್ನು ವೇಗಗೊಳಿಸುವತ್ತ ಗಮನ ಹರಿಸಲಿದೆ. ಈ ಶೃಂಗಸಭೆಯು ಡಿಜಿಟಲ್ ಸಬಲೀಕರಣಗೊಂಡ ಮತ್ತು ತಂತ್ರಜ್ಞಾನ ಚಾಲಿತ ಭಾರತದ ದೂರದೃಷ್ಟಿಗೆ ಅನುಗುಣವಾಗಿ, ಭಾರತವನ್ನು ಎಐ ನಾವೀನ್ಯತೆ ಮತ್ತು ನಿಯೋಜನೆಯ ಜಾಗತಿಕ ಕೇಂದ್ರವಾಗಿ ರೂಪಿಸುವಲ್ಲಿ ಪ್ರೇರಕ ಪಾತ್ರ ವಹಿಸುವ ನಿರೀಕ್ಷೆಯಿದೆ.

ಮೂಲಭೂತ ಸ್ತಂಭಗಳು: ಎಐ ಪ್ರಭಾವದ ಜಾಗತಿಕ ಸಹಯೋಗವನ್ನು ಮುನ್ನಡೆಸುವ 'ಮೂರು ಸೂತ್ರಗಳು' ಮತ್ತು 'ಏಳು ಚಕ್ರಗಳು'

ಭಾರತ-ಎಐ ಪ್ರಭಾವ ಶೃಂಗಸಭೆ 2026, ಕೃತಕ ಬುದ್ಧಿಮತ್ತೆಯ ವಿಷಯದಲ್ಲಿ ಪ್ರಭಾವ-ಆಧಾರಿತ ಮತ್ತು ಜನ-ಕೇಂದ್ರಿತ ವಿಧಾನವನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿದೆ. ಇದು ಅಳೆಯಬಹುದಾದ ಸಾಮಾಜಿಕ ಮತ್ತು ಆರ್ಥಿಕ ಫಲಿತಾಂಶಗಳನ್ನು ನೀಡುವತ್ತ ವಿಶೇಷ ಒತ್ತು ನೀಡುತ್ತದೆ. ಈ ಶೃಂಗಸಭೆಯು 'ಸೂತ್ರಗಳು' ಎಂದು ಕರೆಯಲ್ಪಡುವ ಮೂರು ಮೂಲಭೂತ ಸ್ತಂಭಗಳ ಮೇಲೆ ಆಧಾರಿತವಾಗಿದೆ— 'ಸೂತ್ರ' ಎಂಬುದು ಸಂಸ್ಕೃತ ಪದವಾಗಿದ್ದು, ಜ್ಞಾನ ಮತ್ತು ಕ್ರಿಯೆಯನ್ನು ಒಟ್ಟಾಗಿ ಬೆಸೆಯುವ 'ಮಾರ್ಗದರ್ಶಿ ತತ್ವಗಳು' ಅಥವಾ 'ಅಗತ್ಯ ಎಳೆಗಳು' ಎಂಬ ಅರ್ಥವನ್ನು ನೀಡುತ್ತದೆ. ಸಾಮೂಹಿಕ ಪ್ರಯೋಜನಕ್ಕಾಗಿ ಬಹುಪಕ್ಷೀಯ ಸಹಕಾರದ ಮೂಲಕ ಎಐ ಅನ್ನು ಹೇಗೆ ಬಳಸಿಕೊಳ್ಳಬಹುದು ಎಂಬುದನ್ನು ಈ ಸೂತ್ರಗಳು ವ್ಯಾಖ್ಯಾನಿಸುತ್ತವೆ.

ಈ ಮೂರು ಮೂಲಭೂತ ಸೂತ್ರಗಳ ಆಧಾರದ ಮೇಲೆ, ಎಐ ಪ್ರಭಾವ ಶೃಂಗಸಭೆಯ ಚರ್ಚೆಗಳನ್ನು '7 ಚಕ್ರಗಳ' ಸುತ್ತ ರೂಪಿಸಲಾಗಿದೆ. ಈ ಚಕ್ರಗಳು ಬಹುಪಕ್ಷೀಯ ಸಹಕಾರದ ಪ್ರಮುಖ ಕ್ಷೇತ್ರಗಳನ್ನು ಪ್ರತಿನಿಧಿಸುತ್ತವೆ, ಇವು ಒಳಗೊಳ್ಳುವಿಕೆಯ ಮತ್ತು ಸುಸ್ಥಿರ ಸಾಮಾಜಿಕ ಫಲಿತಾಂಶಗಳತ್ತ ಸಾಮೂಹಿಕ ಪ್ರಯತ್ನಗಳನ್ನು ಮುನ್ನಡೆಸುತ್ತವೆ.

1. ಮಾನವ ಬಂಡವಾಳ: ಈ ಚಕ್ರವು ಉದ್ದೇಶಿತ ಕೌಶಲ್ಯ ಅಭಿವೃದ್ಧಿಯ ಮೂಲಕ ಸಮಾನವಾದ ಎಐ ಮರು-ಕೌಶಲ್ಯ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವತ್ತ ಗಮನಹರಿಸುತ್ತದೆ. ಭಾರತದ ಪಾಲಿಗೆ, ಇದು ರಾಷ್ಟ್ರೀಯ ಅಭಿವೃದ್ಧಿಯ ಆದ್ಯತೆಗಳಿಗೆ ಅನುಗುಣವಾಗಿ ಎಐ ಆರ್ಥಿಕತೆಗೆ ಕಾರ್ಯಪಡೆಯನ್ನು ಸಜ್ಜುಗೊಳಿಸುತ್ತದೆ.

2. ಸಾಮಾಜಿಕ ಸಬಲೀಕರಣಕ್ಕಾಗಿ ಒಳಗೊಳ್ಳುವಿಕೆ : ಹಂಚಿಕೆಯ ಎಐ ಪರಿಹಾರಗಳು ಮತ್ತು ವಿಸ್ತರಿಸಬಹುದಾದ ಮಾದರಿಗಳ ಮೂಲಕ ಎಲ್ಲರ ಒಳಗೊಳ್ಳುವಿಕೆಯನ್ನು ಈ ಚಕ್ರವು ಕೇಂದ್ರೀಕರಿಸುತ್ತದೆ. ಇದು ಭಾರತದಲ್ಲಿ ನಾಗರಿಕ-ಕೇಂದ್ರಿತ ಎಐ ಪರಿಹಾರಗಳ ವಿತರಣೆಯನ್ನು ಬೆಂಬಲಿಸುತ್ತದೆ ಮತ್ತು ಕಟ್ಟಕಡೆಯ ವ್ಯಕ್ತಿಗೂ ಸೇವೆಗಳು ತಲುಪುವಂತೆ ಬಲಪಡಿಸುತ್ತದೆ.

3. ಸುರಕ್ಷಿತ ಮತ್ತು ವಿಶ್ವಾಸಾರ್ಹ ಎಐ: ಜವಾಬ್ದಾರಿಯುತ ಎಐಗಾಗಿ ಜಾಗತಿಕ ತತ್ವಗಳನ್ನು ಪ್ರಾಯೋಗಿಕ, ಪರಸ್ಪರ ಕಾರ್ಯನಿರ್ವಹಿಸಬಲ್ಲ ಸುರಕ್ಷತೆ ಮತ್ತು ಆಡಳಿತ ಚೌಕಟ್ಟುಗಳಾಗಿ ಪರಿವರ್ತಿಸುವತ್ತ ಈ ಚಕ್ರವು ಗಮನಹರಿಸುತ್ತದೆ. ಇದು ಭಾರತದ ಆಂತರಿಕ ಎಐ ಆಡಳಿತವನ್ನು ಬಲಪಡಿಸುತ್ತದೆ, ಸಾರ್ವಜನಿಕ ವೇದಿಕೆಗಳಲ್ಲಿ ಎಐನ ಸುರಕ್ಷಿತ ಬಳಕೆಯನ್ನು ಬೆಂಬಲಿಸುತ್ತದೆ ಮತ್ತು ನಾವೀನ್ಯತೆಗೆ ಪೂರಕವಾಗಿ ಸಾರ್ವಜನಿಕ ವಿಶ್ವಾಸವನ್ನು ಬೆಳೆಸುತ್ತದೆ.

4. ಸ್ಥಿತಿಸ್ಥಾಪಕತ್ವ, ನಾವೀನ್ಯತೆ ಮತ್ತು ದಕ್ಷತೆ: ಬೃಹತ್ ಪ್ರಮಾಣದ ಎಐ ವ್ಯವಸ್ಥೆಗಳಿಂದ ಎದುರಾಗುವ ಪರಿಸರ ಮತ್ತು ಸಂಪನ್ಮೂಲ ಸವಾಲುಗಳನ್ನು ಎದುರಿಸುವತ್ತ ಈ ಚಕ್ರವು ಗಮನಹರಿಸುತ್ತದೆ. ಭಾರತಕ್ಕೆ ಇದು ಸುಸ್ಥಿರ ಎಐ ಅಳವಡಿಕೆಯನ್ನು ಬೆಂಬಲಿಸುತ್ತದೆ, ಎಐ ಬೆಳವಣಿಗೆಯು ಪರಿಸರಕ್ಕೆ ಹಾನಿಯಾಗದಂತೆ ಮತ್ತು ಸಾಮಾಜಿಕವಾಗಿ ಸಮಾನವಾಗಿರುವುದನ್ನು ಖಚಿತಪಡಿಸುತ್ತದೆ.

5. ವಿಜ್ಞಾನ: ದತ್ತಾಂಶ, ಕಂಪ್ಯೂಟ್ ಮತ್ತು ಸಂಶೋಧನಾ ಸಾಮರ್ಥ್ಯದ ಲಭ್ಯತೆಯಲ್ಲಿರುವ ಅಸಮಾನತೆಗಳನ್ನು ಸರಿಪಡಿಸುವ ಮೂಲಕ ಹೊಸ ಸಂಶೋಧನೆಗಳನ್ನು ವೇಗಗೊಳಿಸಲು ಎಐ ಬಳಸುವತ್ತ ಈ ಚಕ್ರವು ಗಮನಹರಿಸುತ್ತದೆ. ಇದು ಭಾರತದ ಸಂಶೋಧನಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುತ್ತದೆ, ಆರೋಗ್ಯ, ಕೃಷಿ ಮತ್ತು ಹವಾಮಾನ ಕ್ಷೇತ್ರಗಳಲ್ಲಿನ ಪರಿಹಾರಗಳನ್ನು ವೇಗಗೊಳಿಸುತ್ತದೆ ಮತ್ತು ಜಾಗತಿಕ ವೈಜ್ಞಾನಿಕ ಪ್ರಗತಿಯಲ್ಲಿ ಭಾರತವನ್ನು ಸಕ್ರಿಯ ಕೊಡುಗೆದಾರನಾಗಿ ರೂಪಿಸುತ್ತದೆ.

6. ಎಐ ಸಂಪನ್ಮೂಲಗಳ ಪ್ರಜಾಪ್ರಭುತ್ವೀಕರಣ: ಎಐ ಅಭಿವೃದ್ಧಿಯ ಮೂಲಭೂತ ಸೌಲಭ್ಯಗಳು ಎಲ್ಲರಿಗೂ ಸಮಾನವಾಗಿ ಮತ್ತು ಕೈಗೆಟುಕುವ ದರದಲ್ಲಿ ಲಭ್ಯವಿರುವ ಜಾಗತಿಕ ಎಐ ಪರಿಸರ ವ್ಯವಸ್ಥೆಯನ್ನು ಇದು ಕಲ್ಪಿಸುತ್ತದೆ. ಭಾರತದ ಸ್ಟಾರ್ಟ್‌ಅಪ್‌ಗಳು, ಸಂಶೋಧಕರು ಮತ್ತು ಸಾರ್ವಜನಿಕ ಸಂಸ್ಥೆಗಳಿಗೆ ಹೆಚ್ಚಿನ ಲಭ್ಯತೆಯನ್ನು ಒದಗಿಸುವುದರ ಜೊತೆಗೆ ಜಾಗತಿಕ ಎಐ ಮೌಲ್ಯ ಸರಪಳಿಯಲ್ಲಿ ಸಮಾನ ಭಾಗವಹಿಸುವಿಕೆಯನ್ನು ಇದು ಖಚಿತಪಡಿಸುತ್ತದೆ.

7. ಆರ್ಥಿಕ ಬೆಳವಣಿಗೆ ಮತ್ತು ಸಾಮಾಜಿಕ ಒಳಿತಿಗಾಗಿ ಎಐ: ಒಳಗೊಳ್ಳುವಿಕೆಯ ಬೆಳವಣಿಗೆಗಾಗಿ ಎಐ ಸಾಮರ್ಥ್ಯವನ್ನು ಬಳಸಿಕೊಳ್ಳುವ ವಿಧಾನಗಳನ್ನು ಈ ಚಕ್ರವು ಅನ್ವೇಷಿಸುತ್ತದೆ. ಆರ್ಥಿಕ ಬೆಳವಣಿಗೆ ಮತ್ತು ಸಾಮಾಜಿಕ ಒಳಿತು ಎರಡಕ್ಕೂ ಮಾದರಿಯಾಗಬಲ್ಲ ಉನ್ನತ ಪ್ರಭಾವದ ಬಳಕೆಯ ಪ್ರಕರಣಗಳನ್ನು ಇದು ಗುರುತಿಸುತ್ತದೆ ಮತ್ತು ಬೆಂಬಲಿಸುತ್ತದೆ.

ಒಟ್ಟಾರೆಯಾಗಿ, ಈ 'ಚಕ್ರಗಳು' ವಿವಿಧ ದೇಶಗಳು, ಅಂತರರಾಷ್ಟ್ರೀಯ ಸಂಸ್ಥೆಗಳು ಮತ್ತು ಪಾಲುದಾರರಿಗೆ ತಮ್ಮ ಎಐ ಕಾರ್ಯತಂತ್ರಗಳನ್ನು ರೂಪಿಸಲು, ಹಂಚಿಕೆಯ ಕಲಿಕೆಯನ್ನು ಉತ್ತೇಜಿಸಲು ಮತ್ತು ಸಾಮಾನ್ಯ ಸವಾಲುಗಳನ್ನು ಎದುರಿಸುವ ಜೊತೆಗೆ ಸಾಮೂಹಿಕ ಪ್ರಯೋಜನಗಳನ್ನು ಗರಿಷ್ಠಗೊಳಿಸುವ ಎಐ ಪರಿಹಾರಗಳನ್ನು ನಿಯೋಜಿಸಲು ಒಂದು ಸಮಗ್ರ ಚೌಕಟ್ಟನ್ನು ಒದಗಿಸುತ್ತವೆ."

ಶೃಂಗಸಭೆಯಲ್ಲಿನ ಎಐ ಪ್ರಭಾವದ ಕಾರ್ಯಕ್ರಮಗಳು

ಭಾರತ-ಎಐ ಪ್ರಭಾವ ಶೃಂಗಸಭೆ 2026ರ ಉದ್ದೇಶಗಳನ್ನು 'ಎಐ ಪ್ರಭಾವ ಕಾರ್ಯಕ್ರಮಗಳ' ಮೂಲಕ ಕಾರ್ಯಗತಗೊಳಿಸಲಾಗುತ್ತದೆ. ಈ ಕಾರ್ಯಕ್ರಮಗಳು ಭಾರತೀಯ ಎಐ ಉಪಕ್ರಮಗಳು, ವಿವಿಧ ವಲಯಗಳ ಬಳಕೆಯ ಪ್ರಕರಣಗಳು ಮತ್ತು ಸಾಂಸ್ಥಿಕ ಚೌಕಟ್ಟುಗಳನ್ನು ಪ್ರಸ್ತುತಪಡಿಸಲು ವ್ಯವಸ್ಥಿತ ವೇದಿಕೆಗಳನ್ನು ಒದಗಿಸುತ್ತವೆ. ಜೊತೆಗೆ, ಇದು ಪ್ರತಿಕ್ರಿಯೆ ಪಡೆಯಲು, ಸಹಭಾಗಿತ್ವದ ಕಲಿಕೆ ಮತ್ತು ಅಂತರರಾಷ್ಟ್ರೀಯ ಮಾನದಂಡಗಳನ್ನು ತುಲನೆ ಮಾಡಲು ಸಹಕಾರಿಯಾಗಿದೆ.

ಶೃಂಗಸಭೆಯ ಪೂರ್ವಭಾವಿ ಕಾರ್ಯಕ್ರಮಗಳು ಆರಂಭಿಕ ಸಮಾಲೋಚನೆಗಳು ಮತ್ತು ನಿರ್ದಿಷ್ಟ ವಿಷಯಾಧಾರಿತ ಚರ್ಚೆಗಳಿಗೆ ಅನುವು ಮಾಡಿಕೊಡಲು ಶೃಂಗಸಭೆಯ ಪೂರ್ವಭಾವಿ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ. ಭಾರತ ಮತ್ತು ವಿದೇಶಗಳಲ್ಲಿ ನಡೆಯುವ ಈ ಕಾರ್ಯಕ್ರಮಗಳು ಸರ್ಕಾರಗಳು, ಶೈಕ್ಷಣಿಕ ಮತ್ತು ಸಂಶೋಧನಾ ಸಂಸ್ಥೆಗಳು, ಉದ್ಯಮಗಳು, ಸ್ಟಾರ್ಟ್‌ಅಪ್‌ಗಳು ಮತ್ತು ನಾಗರಿಕ ಸಮಾಜವನ್ನು ಒಂದೆಡೆ ಸೇರಿಸುತ್ತವೆ.

ಪ್ರಾದೇಶಿಕ ಎಐ ಸಮ್ಮೇಳನಗಳು ರಾಷ್ಟ್ರೀಯ ಎಐ ಆದ್ಯತೆಗಳನ್ನು ಪ್ರಾದೇಶಿಕ ಅಗತ್ಯಗಳೊಂದಿಗೆ ಸಂಯೋಜಿಸಲು ಪ್ರಾದೇಶಿಕ ಎಐ ಸಮ್ಮೇಳನಗಳನ್ನು ಆಯೋಜಿಸಲಾಗುತ್ತಿದೆ. ಅಕ್ಟೋಬರ್ 2025 ಮತ್ತು ಜನವರಿ 2026 ರ ನಡುವೆ ಮೇಘಾಲಯ, ಗುಜರಾತ್, ಒಡಿಶಾ, ಮಧ್ಯಪ್ರದೇಶ, ಉತ್ತರ ಪ್ರದೇಶ, ರಾಜಸ್ಥಾನ, ಕೇರಳ ಮತ್ತು ತೆಲಂಗಾಣ ರಾಜ್ಯಗಳಲ್ಲಿ ಆಯೋಜಿಸಲಾದ ಎಂಟು ಸಮ್ಮೇಳನಗಳು ಆಯಾ ರಾಜ್ಯ ಸರ್ಕಾರಗಳ ಸಹಭಾಗಿತ್ವದಲ್ಲಿ ಪ್ರಾದೇಶಿಕ ಎಐ ಬಳಕೆಯ ಪ್ರಕರಣಗಳು, ನೀತಿ ಅಗತ್ಯಗಳು ಮತ್ತು ಕೌಶಲ್ಯದ ಕೊರತೆಗಳನ್ನು ಗುರುತಿಸುತ್ತವೆ. ಈ ಚರ್ಚೆಗಳು ಮುಖ್ಯ ಶೃಂಗಸಭೆಯ ಕಾರ್ಯಸೂಚಿ ಮತ್ತು ಫಲಿತಾಂಶಗಳಿಗೆ ಪೂರಕವಾಗಲಿವೆ.

ಮುಖ್ಯ ಶೃಂಗಸಭೆ ಮುಖ್ಯ ಶೃಂಗಸಭೆಯನ್ನು ಶೃಂಗಸಭೆಯ 'ಏಳು ಚಕ್ರಗಳ' ಆಧಾರದ ಮೇಲೆ ಆಯೋಜಿಸಲಾಗುತ್ತದೆ. ಈ ಅಧಿವೇಶನಗಳು ಉದ್ಯಮ, ಶೈಕ್ಷಣಿಕ ಕ್ಷೇತ್ರ ಮತ್ತು ಅಂತರರಾಷ್ಟ್ರೀಯ ಪಾಲುದಾರರನ್ನು ಒಟ್ಟುಗೂಡಿಸಿ ಬಳಕೆಯ ಪ್ರಕರಣಗಳನ್ನು ಪರಿಶೀಲಿಸಲು, ನೀತಿ ಅನುಭವಗಳನ್ನು ಹಂಚಿಕೊಳ್ಳಲು ಮತ್ತು ಅಭಿವೃದ್ಧಿ-ಕೇಂದ್ರಿತ ಎಐ ಬಳಕೆಗೆ ಪ್ರಾಯೋಗಿಕ ವಿಧಾನಗಳನ್ನು ಗುರುತಿಸಲು ಸಹಾಯ ಮಾಡುತ್ತವೆ. ಈ ಶೃಂಗಸಭೆಗೆ ಜಾಗತಿಕ ಮಟ್ಟದಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಈಗಾಗಲೇ 700ಕ್ಕೂ ಹೆಚ್ಚು ಪ್ರಸ್ತಾವನೆಗಳು ಸ್ವೀಕೃತವಾಗಿವೆ.

ಎಐ ಸಂಕಲನ ಎಐ ಸಂಕಲನವು ಈ ಶೃಂಗಸಭೆಯ ಪ್ರಮುಖ ಜ್ಞಾನದ ಔಟ್‌ಪುಟ್ ಆಗಿದ್ದು, ಇದನ್ನು 17 ಫೆಬ್ರವರಿ 2026 ರಂದು ಬಿಡುಗಡೆ ಮಾಡಲಾಗುವುದು. ಇದು ಆದ್ಯತೆಯ ವಲಯಗಳಲ್ಲಿ ಕೃತಕ ಬುದ್ಧಿಮತ್ತೆಯ ನೈಜ-ಪ್ರಪಂಚದ ಅನ್ವಯಗಳನ್ನು ದಾಖಲಿಸುವ ವಿಷಯಾಧಾರಿತ ಕೇಸ್‌ಬುಕ್‌ಗಳನ್ನು ಒಳಗೊಂಡಿರುತ್ತದೆ. ಇದು ತಜ್ಞರು ಮತ್ತು ಪಾಲುದಾರರಿಗೆ ಉಲ್ಲೇಖಿತ ಸಂಪನ್ಮೂಲವಾಗಿ ಕಾರ್ಯನಿರ್ವಹಿಸುತ್ತದೆ ಮತ್ತು ಶೃಂಗಸಭೆಯ ನಂತರವೂ ಜವಾಬ್ದಾರಿಯುತ ಎಐ ಪರಿಹಾರಗಳ ಅಳವಡಿಕೆಗೆ ಬೆಂಬಲ ನೀಡುತ್ತದೆ.

ಪ್ರಮುಖ ಕಾರ್ಯಕ್ರಮಗಳು

1. ಎಲ್ಲರಿಗಾಗಿ ಎಐ: ಜಾಗತಿಕ ಪ್ರಭಾವದ ಸವಾಲು: ದೊಡ್ಡ ಮಟ್ಟದ ಪ್ರಭಾವ ಬೀರುವ ಸಾಮರ್ಥ್ಯವಿರುವ ಎಐ ಪರಿಹಾರಗಳನ್ನು ಗುರುತಿಸುವುದು ಈ ಸವಾಲಿನ ಉದ್ದೇಶವಾಗಿದೆ. ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನಾ ಇಲಾಖೆ ಅಡಿಯಲ್ಲಿನ 'ಸ್ಟಾರ್ಟ್ಅಪ್ ಇಂಡಿಯಾ' ಮತ್ತು 'ಡಿಜಿಟಲ್ ಇಂಡಿಯಾ ಭಾಷಿಣಿ' ವಿಭಾಗದ ಸಹಯೋಗದೊಂದಿಗೆ ಇದನ್ನು ಜಾರಿಗೊಳಿಸಲಾಗುತ್ತಿದೆ. ವಿದ್ಯಾರ್ಥಿಗಳು, ಉದ್ಯೋಗಿಗಳು, ಸಂಶೋಧಕರು ಮತ್ತು ಸ್ಟಾರ್ಟ್‌ಅಪ್‌ಗಳಿಗೆ ಈ ಸ್ಪರ್ಧೆಯಲ್ಲಿ ಭಾಗವಹಿಸಲು ಅವಕಾಶವಿದೆ. ಇದು ನಗರ ಮೂಲಸೌಕರ್ಯ ಮತ್ತು ಸಂಚಾರದಂತಹ ಕ್ಷೇತ್ರಗಳಲ್ಲಿ ವ್ಯಾಪಕವಾಗಿ ಬಳಸಬಹುದಾದ ಎಐ ಪರಿಹಾರಗಳ ಮೇಲೆ ಕೇಂದ್ರೀಕರಿಸುತ್ತದೆ. ಆಯ್ಕೆಯಾದ ಪರಿಹಾರಗಳನ್ನು ಶೃಂಗಸಭೆಯಲ್ಲಿ ಪ್ರದರ್ಶಿಸಲಾಗುತ್ತದೆ ಮತ್ತು ಇವುಗಳಿಗೆ ₹2.50 ಕೋಟಿ ವರೆಗೆ ಬಹುಮಾನ ನೀಡಲಾಗುವುದು.

2. ಅವಳಿಂದ ಎಐ: ಜಾಗತಿಕ ಪ್ರಭಾವದ ಸವಾಲು: ಎಐ ಕ್ಷೇತ್ರದಲ್ಲಿ ಮಹಿಳಾ ನೇತೃತ್ವದ ನಾವೀನ್ಯತೆಯನ್ನು ಉತ್ತೇಜಿಸುವುದು ಇದರ ಗುರಿಯಾಗಿದೆ. ನೀತಿ ಆಯೋಗದ 'ಮಹಿಳಾ ಉದ್ಯಮಶೀಲತೆ ವೇದಿಕೆ'ಯ ಸಹಯೋಗದೊಂದಿಗೆ ಇದನ್ನು ಜಾರಿಗೊಳಿಸಲಾಗುತ್ತಿದ್ದು, ಮಹಿಳಾ ತಂತ್ರಜ್ಞರು ಸಾರ್ವಜನಿಕ ಸವಾಲುಗಳಿಗೆ ಎಐ ಪರಿಹಾರಗಳನ್ನು ನೀಡಲು ಆಹ್ವಾನಿಸಲಾಗಿದೆ. ಆಯ್ಕೆಯಾದ ಪರಿಹಾರಗಳಿಗೆ ₹2.50 ಕೋಟಿ ವರೆಗೆ ಬಹುಮಾನ ನೀಡಲಾಗುವುದು.

3. ಯುವೈ: ಜಾಗತಿಕ ಯುವ ಸವಾಲು : ನೈಜ ಪ್ರಪಂಚದ ಸವಾಲುಗಳಿಗೆ ಎಐ ಪರಿಹಾರಗಳನ್ನು ಅಭಿವೃದ್ಧಿಪಡಿಸಲು ಯುವ ನಾವೀನ್ಯಕಾರರನ್ನು ಪ್ರೋತ್ಸಾಹಿಸುವುದು ಇದರ ಉದ್ದೇಶ. 13 ರಿಂದ 21 ವರ್ಷದೊಳಗಿನ ಯುವಕರು ಮತ್ತು ತಂಡಗಳು ಇದರಲ್ಲಿ ಭಾಗವಹಿಸಬಹುದು. 'ಮೈ ಭಾರತ್' ಮತ್ತು ರಾಷ್ಟ್ರೀಯ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಂಸ್ಥೆ ಸಹಯೋಗದೊಂದಿಗೆ ಇದನ್ನು ಆಯೋಜಿಸಲಾಗುತ್ತಿದೆ. ಆಯ್ಕೆಯಾದ ಸ್ಪರ್ಧಿಗಳಿಗೆ ₹85 ಲಕ್ಷದವರೆಗಿನ ಬಹುಮಾನಗಳನ್ನು ನೀಡಲಾಗುವುದು.

4. ಸಂಶೋಧನಾ ವಿಚಾರಗೋಷ್ಠಿ : ಎಐ ಮತ್ತು ಅದರ ಪ್ರಭಾವದ ಕುರಿತಾದ ಸಂಶೋಧನಾ ವಿಚಾರಗೋಷ್ಠಿಯನ್ನು 18 ಫೆಬ್ರವರಿ 2026 ರಂದು ನವದೆಹಲಿಯ ಭಾರತ್ ಮಂಟಪದಲ್ಲಿ ಆಯೋಜಿಸಲಾಗಿದೆ. ಐಐಐಟಿ ಹೈದರಾಬಾದ್ ಇದರ ಜ್ಞಾನ ಪಾಲುದಾರ ಸಂಸ್ಥೆಯಾಗಿದೆ. ಈ ಗೋಷ್ಠಿಯು ಸಂಶೋಧಕರು, ಗ್ಲೋಬಲ್ ಸೌತ್ ಮತ್ತು ಅಂತರರಾಷ್ಟ್ರೀಯ ಸಮುದಾಯವನ್ನು ಒಂದೆಡೆ ಸೇರಿಸಿ ಅತ್ಯಾಧುನಿಕ ಸಂಶೋಧನೆಗಳನ್ನು ಪ್ರಸ್ತುತಪಡಿಸಲು ಮತ್ತು ಸಹಯೋಗವನ್ನು ಬೆಳೆಸಲು ವೇದಿಕೆ ನೀಡುತ್ತದೆ.

5. ಭಾರತ ಎಐ ಪ್ರಭಾವ ಪ್ರದರ್ಶನ 2026: ಇದನ್ನು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಆಯೋಜಿಸುತ್ತಿದ್ದು, 'ಸಾಫ್ಟ್‌ವೇರ್ ಟೆಕ್ನಾಲಜಿ ಪಾರ್ಕ್ಸ್ ಆಫ್ ಇಂಡಿಯಾ' ಇದರ ಉಸ್ತುವಾರಿ ವಹಿಸಿದೆ. 70,000 ಚದರ ಮೀಟರ್‌ಗಳಿಗಿಂತ ಹೆಚ್ಚು ವಿಸ್ತೀರ್ಣದಲ್ಲಿ ನಡೆಯಲಿರುವ ಈ ಪ್ರದರ್ಶನವು 1,50,000ಕ್ಕೂ ಹೆಚ್ಚು ಸಂದರ್ಶಕರನ್ನು ಮತ್ತು 400ಕ್ಕೂ ಹೆಚ್ಚು ಪ್ರದರ್ಶಕರನ್ನು ನಿರೀಕ್ಷಿಸುತ್ತಿದೆ. ಇದು ಎಐ ಸಂಶೋಧನೆಯಿಂದ ಬೃಹತ್ ಮಟ್ಟದ ಬಳಕೆಗೆ ಹೇಗೆ ರೂಪಾಂತರಗೊಂಡಿದೆ ಎಂಬುದನ್ನು ತೋರಿಸುವ ವ್ಯಾಪಾರ-ಕೇಂದ್ರಿತ ವೇದಿಕೆಯಾಗಿದೆ.

6. ಇಂಡಿಯಾ ಎಐ ಟಿಂಕರ್‌ಪ್ರೆನ್ಯೂರ್ : ಇದು 6 ರಿಂದ 12 ನೇ ತರಗತಿಯ ಶಾಲಾ ವಿದ್ಯಾರ್ಥಿಗಳಲ್ಲಿ ಎಐ ಮತ್ತು ಉದ್ಯಮಶೀಲತೆಯ ಸಾಮರ್ಥ್ಯಗಳನ್ನು ಬೆಳೆಸುವ ಗುರಿಯನ್ನು ಹೊಂದಿರುವ ರಾಷ್ಟ್ರಮಟ್ಟದ ಬೇಸಿಗೆ ಶಿಬಿರವಾಗಿದೆ. ಇದು ವಿದ್ಯಾರ್ಥಿಗಳಿಗೆ ಎಐ ಉಪಕರಣಗಳ ಪ್ರಾಯೋಗಿಕ ಜ್ಞಾನವನ್ನು ನೀಡುತ್ತದೆ ಮತ್ತು ಸಾಮಾಜಿಕ ಪ್ರಭಾವ ಬೀರುವ ಉತ್ಪನ್ನಗಳನ್ನು ಅಭಿವೃದ್ಧಿಪಡಿಸಲು ಪ್ರೋತ್ಸಾಹಿಸುತ್ತದೆ. ಆನ್‌ಲೈನ್ ಅಧಿವೇಶನಗಳು ಮತ್ತು ತಜ್ಞರ ಮಾರ್ಗದರ್ಶನದ ಮೂಲಕ ವಿದ್ಯಾರ್ಥಿಗಳಲ್ಲಿ ಚಿಕ್ಕ ವಯಸ್ಸಿನಲ್ಲೇ ನಾವೀನ್ಯತೆ ಮತ್ತು ಸಮಸ್ಯೆ ಬಿಡಿಸುವ ಚಿಂತನೆಯನ್ನು ಬೆಳೆಸುತ್ತದೆ.

ಭಾರತ-ಎಐ ಪ್ರಭಾವ ಶೃಂಗಸಭೆಯ ಕಾರ್ಯಕ್ರಮಗಳ ಪಟ್ಟಿ ಮತ್ತು ಗಣ್ಯ ಅಭ್ಯಾಗತರು

'ಇಂಡಿಯಾ ಇನ್ನೋವೇಶನ್ ಫೆಸ್ಟಿವಲ್' (ಭಾರತ ನಾವೀನ್ಯತೆ ಉತ್ಸವ) ನೊಂದಿಗೆ ಪ್ರಾರಂಭವಾಗುವ ಈ ಕಾರ್ಯಕ್ರಮವು, ನೀತಿ ನಿರೂಪಣಾ ಚರ್ಚೆಗಳು, ಜ್ಞಾನದ ವರದಿಗಳ ಬಿಡುಗಡೆ, ಸಂಶೋಧನೆ ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಅಧಿವೇಶನಗಳ ಮೂಲಕ ವೇಗವನ್ನು ಪಡೆದುಕೊಳ್ಳುತ್ತದೆ. ಅಂತಿಮವಾಗಿ ಇದು ನಾಯಕರ ಮಟ್ಟದ ಸಮಾಲೋಚನೆಗಳು ಮತ್ತು 'ಕೃತಕ ಬುದ್ಧಿಮತ್ತೆಯ ಜಾಗತಿಕ ಪಾಲುದಾರಿಕೆ' ಕೌನ್ಸಿಲ್ ಸಭೆಗಳೊಂದಿಗೆ ಮುಕ್ತಾಯಗೊಳ್ಳುತ್ತದೆ.

(ಕಾರ್ಯಸೂಚಿ 16 ಜನವರಿ, 2026 ರಲ್ಲಿದ್ದಂತೆ) - ಈ ಕಾರ್ಯಸೂಚಿಯು ತಾತ್ಕಾಲಿಕವಾಗಿದ್ದು, ಬದಲಾವಣೆಗಳಿಗೆ ಒಳಪಟ್ಟಿರುತ್ತದೆ.

ಶೃಂಗಸಭೆಯಲ್ಲಿ ಭಾಗಿಯಾಗಿರುವ ಪ್ರಮುಖ ಸಾಂಸ್ಥಿಕ ಚೌಕಟ್ಟುಗಳು

ಭಾರತ-ಎಐ ಪ್ರಭಾವ ಶೃಂಗಸಭೆ 2026 ಅನ್ನು ನೀತಿ ನಿರೂಪಣೆ, ಕಾರ್ಯಕ್ರಮ ಅನುಷ್ಠಾನ, ಪರಿಸರ ವ್ಯವಸ್ಥೆಯ ಅಭಿವೃದ್ಧಿ ಮತ್ತು ಡಿಜಿಟಲ್ ಮೂಲಸೌಕರ್ಯದ ಜವಾಬ್ದಾರಿಯನ್ನು ಹೊಂದಿರುವ ಪ್ರಮುಖ ಸರ್ಕಾರಿ ಸಂಸ್ಥೆಗಳು ಬೆಂಬಲಿಸುತ್ತಿವೆ. ಇವುಗಳ ಪಾಲ್ಗೊಳ್ಳುವಿಕೆಯು ಆಡಳಿತಾತ್ಮಕ ನಾಯಕತ್ವ, ತಾಂತ್ರಿಕ ಬೆಂಬಲ ಮತ್ತು ಸಾಂಸ್ಥಿಕ ನಿರಂತರತೆಯನ್ನು ಒದಗಿಸುತ್ತದೆ. ಶೃಂಗಸಭೆಯು ಅಸ್ತಿತ್ವದಲ್ಲಿರುವ ರಾಷ್ಟ್ರೀಯ ಉಪಕ್ರಮಗಳ ಅಡಿಯಲ್ಲಿ ಕಾರ್ಯನಿರ್ವಹಿಸುವುದನ್ನು ಮತ್ತು ಇಲ್ಲಿ ನಡೆಯುವ ಚರ್ಚೆಗಳನ್ನು ಕಾರ್ಯಗತಗೊಳಿಸಬಹುದಾದ ಫಲಿತಾಂಶಗಳನ್ನಾಗಿ ಪರಿವರ್ತಿಸುವುದನ್ನು ಈ ಸಂಸ್ಥೆಗಳು ಖಚಿತಪಡಿಸುತ್ತವೆ.

• ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ

 ಭಾರತದಲ್ಲಿ ಎಐ ಮತ್ತು ಡಿಜಿಟಲ್ ತಂತ್ರಜ್ಞಾನಗಳಿಗೆ ಸಂಬಂಧಿಸಿದ ಒಟ್ಟಾರೆ ನೀತಿ ನಿರ್ದೇಶನವನ್ನು ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞನಾ ಸಚಿವಾಲಯವು ಒದಗಿಸುತ್ತದೆ. ಕೃತಕ ಬುದ್ಧಿಮತ್ತೆ, ಎಲೆಕ್ಟ್ರಾನಿಕ್ಸ್, ಡಿಜಿಟಲ್ ಆಡಳಿತ ಮತ್ತು ವಿಶ್ವಾಸಾರ್ಹ ತಂತ್ರಜ್ಞಾನ ಅಳವಡಿಕೆಯ ರಾಷ್ಟ್ರೀಯ ಆದ್ಯತೆಗಳ ಚೌಕಟ್ಟಿನೊಳಗೆ ಈ ಶೃಂಗಸಭೆಯನ್ನು ಸಚಿವಾಲಯವು ರೂಪಿಸುತ್ತದೆ. ಇದರ ಪಾತ್ರವು ವಿವಿಧ ಸಚಿವಾಲಯಗಳ ನಡುವಿನ ಸಮನ್ವಯ, ರಾಜ್ಯ ಸರ್ಕಾರಗಳೊಂದಿಗಿನ ಒಕ್ಕೂಟ ಮತ್ತು ಶೃಂಗಸಭೆಯ ಫಲಿತಾಂಶಗಳನ್ನು ಪ್ರಸ್ತುತ ರಾಷ್ಟ್ರೀಯ ಕಾರ್ಯಕ್ರಮಗಳು ಹಾಗೂ ನಿಯಂತ್ರಕ ಚೌಕಟ್ಟುಗಳೊಂದಿಗೆ ಸಂಯೋಜಿಸುವುದನ್ನು ಖಚಿತಪಡಿಸುತ್ತದೆ.

• ಇಂಡಿಯಾ ಎಐ ಮಿಷನ್

ಇಂಡಿಯಾ ಎಐ ಮಿಷನ್ ಭಾರತದಲ್ಲಿ ಎಐ ಅಭಿವೃದ್ಧಿಯನ್ನು ಬೆಂಬಲಿಸುವ ಒಂದು ಪ್ರಮುಖ ಯೋಜನೆಯಾಗಿದೆ. ಈ ಮಿಷನ್ ಶೃಂಗಸಭೆಯ ಪ್ರಮುಖ ವಿಷಯಗಳಾದ ಎಐ ಕಂಪ್ಯೂಟ್ ಮೂಲಸೌಕರ್ಯ, ದತ್ತಾಂಶ ಸಂಗ್ರಹಗಳು, ಸ್ವದೇಶಿ ಎಐ ಮಾದರಿಗಳು, ಕೌಶಲ್ಯ ಅಭಿವೃದ್ಧಿ ಮತ್ತು ಸ್ಟಾರ್ಟ್‌ಅಪ್‌ಗಳಿಗೆ ಬೆಂಬಲವನ್ನು ನೀಡುತ್ತದೆ. ಕೃತಕ ಬುದ್ಧಿಮತ್ತೆಯ ಸುರಕ್ಷಿತ, ಜವಾಬ್ದಾರಿಯುತ ಮತ್ತು ಒಳಗೊಳ್ಳುವಿಕೆಯ ಬಳಕೆಯನ್ನು ಉತ್ತೇಜಿಸಲು ಸರ್ಕಾರವು ಕೈಗೊಳ್ಳುತ್ತಿರುವ ನಿರಂತರ ಪ್ರಯತ್ನಗಳನ್ನು ಇದು ಎತ್ತಿ ತೋರಿಸುತ್ತದೆ.

• ಸಾಫ್ಟ್‌ವೇರ್ ಟೆಕ್ನಾಲಜಿ ಪಾರ್ಕ್ಸ್ ಆಫ್ ಇಂಡಿಯಾ (ಎಸ್‌ಟಿಪಿಐ)

ಎಸ್‌ಟಿಪಿಐ ಶೃಂಗಸಭೆಯಲ್ಲಿ ಸ್ಟಾರ್ಟ್‌ಅಪ್‌ಗಳು, ಎಂಎಸ್‌ಎಂಇಗಳು ಮತ್ತು ನಾವೀನ್ಯಕಾರರ ಪಾಲ್ಗೊಳ್ಳುವಿಕೆ ಹಾಗೂ ನಾವೀನ್ಯತೆಯನ್ನು ಬೆಂಬಲಿಸುತ್ತದೆ. ಇದು ಇನ್ಕ್ಯುಬೇಶನ್ ಸೌಲಭ್ಯಗಳು, ತಾಂತ್ರಿಕ ಮೂಲಸೌಕರ್ಯ ಮತ್ತು ಉದ್ಯಮದ ಸಂಪರ್ಕಗಳನ್ನು ಒದಗಿಸುತ್ತದೆ. ದೇಶಾದ್ಯಂತ ಇರುವ ಇದರ ಕೇಂದ್ರಗಳ ಜಾಲವು ವ್ಯಾಪಕ ಪ್ರಾದೇಶಿಕ ಭಾಗವಹಿಸುವಿಕೆಗೆ ಅನುವು ಮಾಡಿಕೊಡುತ್ತದೆ ಮತ್ತು ಎಐ-ಚಾಲಿತ ಉದ್ಯಮಗಳ ಬೆಳವಣಿಗೆಯನ್ನು ಬೆಂಬಲಿಸುತ್ತದೆ. ಇದು ಎಐ ನಾವೀನ್ಯಕಾರರನ್ನು ಉದ್ಯಮಗಳು, ಜಾಗತಿಕ ಮಾರುಕಟ್ಟೆಗಳು ಮತ್ತು ರಫ್ತು ಅವಕಾಶಗಳೊಂದಿಗೆ ಸಂಪರ್ಕಿಸುವ ಮೂಲಕ ಜಾಗತಿಕ ಡಿಜಿಟಲ್ ಆರ್ಥಿಕತೆಯಲ್ಲಿ ಭಾರತದ ಸ್ಥಾನಮಾನವನ್ನು ಬಲಪಡಿಸುತ್ತದೆ.

• ಡಿಜಿಟಲ್ ಇಂಡಿಯಾ ಉಪಕ್ರಮ

 ಭಾರತದಲ್ಲಿ ದೊಡ್ಡ ಮಟ್ಟದ ಎಐ ಅಳವಡಿಕೆಗೆ ಡಿಜಿಟಲ್ ಇಂಡಿಯಾ ಮೂಲಭೂತ ಚೌಕಟ್ಟನ್ನು ಒದಗಿಸುತ್ತದೆ. ಡಿಜಿಟಲ್ ಸಾರ್ವಜನಿಕ ವೇದಿಕೆಗಳು, ಒಳಗೊಳ್ಳುವಿಕೆ ಮತ್ತು ನಾಗರಿಕ-ಕೇಂದ್ರಿತ ಆಡಳಿತಕ್ಕೆ ಇದು ನೀಡುವ ಒತ್ತು ಶೃಂಗಸಭೆಯ ವಿಷಯಗಳಲ್ಲಿ ಪ್ರತಿಫಲಿಸುತ್ತದೆ. ಶೃಂಗಸಭೆಯಲ್ಲಿ ಪ್ರದರ್ಶಿಸಲಾದ ಎಐ ಪರಿಹಾರಗಳು ರಾಷ್ಟ್ರೀಯ ಮಟ್ಟದಲ್ಲಿ ಸೇವಾ ವಿತರಣೆ, ಸುಲಭ ಲಭ್ಯತೆ, ಪಾರದರ್ಶಕತೆ ಮತ್ತು ಸಾರ್ವಜನಿಕ ವಿಶ್ವಾಸಕ್ಕೆ ಅನುಗುಣವಾಗಿರುವುದನ್ನು ಡಿಜಿಟಲ್ ಇಂಡಿಯಾ ಖಚಿತಪಡಿಸುತ್ತದೆ.

'ಶೃಂಗಸಭೆಯ ನಿರೀಕ್ಷಿತ ಫಲಿತಾಂಶಗಳು

 ಭಾರತ-ಎಐ ಪ್ರಭಾವ ಶೃಂಗಸಭೆ 2026 ರಾಷ್ಟ್ರೀಯ ಆದ್ಯತೆಗಳಿಗೆ ಅನುಗುಣವಾಗಿ ನಿರ್ದಿಷ್ಟ ಮತ್ತು ಫಲಿತಾಂಶ-ಆಧಾರಿತ ಗುರಿಗಳನ್ನು ತಲುಪುವ ನಿರೀಕ್ಷೆಯಿದೆ. ಸರ್ಕಾರ ಮತ್ತು ಉದ್ಯಮದಾದ್ಯಂತ ಪರಿಣಾಮಕಾರಿ ಅನುಷ್ಠಾನವನ್ನು ಬೆಂಬಲಿಸಲು ಈ ಶೃಂಗಸಭೆಯು ಪ್ರಾಯೋಗಿಕ ಎಐ ನಿಯೋಜನೆ, ನೀತಿ ಸಮನ್ವಯ ಮತ್ತು ಸಾಂಸ್ಥಿಕ ಸಹಯೋಗಕ್ಕೆ ಒತ್ತು ನೀಡುತ್ತದೆ. ಇದು ಆಡಳಿತ ಮತ್ತು ನಿಯಂತ್ರಕ ಚೌಕಟ್ಟುಗಳನ್ನು ಬಲಪಡಿಸುತ್ತದೆ, ಎಐ-ಚಾಲಿತ ಕೈಗಾರಿಕಾ ಬೆಳವಣಿಗೆಗೆ ಪ್ರಾದೇಶಿಕ ಸಿದ್ಧತೆಯನ್ನು ಮೌಲ್ಯಮಾಪನ ಮಾಡುತ್ತದೆ ಮತ್ತು ಕೌಶಲ್ಯ ಅಭಿವೃದ್ಧಿ ಹಾಗೂ ಕಾರ್ಯಪಡೆಯ ಪರಿವರ್ತನೆಯನ್ನು ಉತ್ತೇಜಿಸುತ್ತದೆ. ಶೃಂಗಸಭೆಯು ಎಐ ಅನ್ವಯಗಳ ಬಗ್ಗೆ ಅರಿವು ಮತ್ತು ತಿಳುವಳಿಕೆಯನ್ನು ವಿಸ್ತರಿಸುವುದಲ್ಲದೆ, ಎಐ ಪರಿಸರ ವ್ಯವಸ್ಥೆಯ ಜವಾಬ್ದಾರಿಯುತ ಮತ್ತು ಒಳಗೊಳ್ಳುವಿಕೆಯ ಬೆಳವಣಿಗೆಯನ್ನು ಸಕ್ರಿಯಗೊಳಿಸಲು ಸರ್ಕಾರ, ಶೈಕ್ಷಣಿಕ ಕ್ಷೇತ್ರ, ಸ್ಟಾರ್ಟ್‌ಅಪ್‌ಗಳು ಮತ್ತು ಉದ್ಯಮಗಳ ನಡುವೆ ಸುಸ್ಥಿರ ಪಾಲುದಾರಿಕೆಯನ್ನು ಬೆಳೆಸುತ್ತದೆ.

ಉಪಸಂಹಾರ

ಭಾರತ-ಎಐ ಪ್ರಭಾವ ಶೃಂಗಸಭೆ 2026 ಕೃತಕ ಬುದ್ಧಿಮತ್ತೆಯನ್ನು ಭಾರತದ ಅಭಿವೃದ್ಧಿ ಆದ್ಯತೆಗಳ ಆಯಕಟ್ಟಿನ ಶಕ್ತಿಯನ್ನಾಗಿ ರೂಪಿಸುತ್ತದೆ. ಆಡಳಿತ, ಸಾರ್ವಜನಿಕ ಸೇವಾ ವಿತರಣೆ, ಸಂಶೋಧನೆ ಮತ್ತು ಉದ್ಯಮದಲ್ಲಿ ಎಐ ಅನ್ವಯಿಸಲು ಪ್ರಾಯೋಗಿಕ ಮಾರ್ಗಗಳನ್ನು ಗುರುತಿಸಲು ರಾಷ್ಟ್ರೀಯ ಮತ್ತು ಪ್ರಾದೇಶಿಕ ಸಮಾಲೋಚನೆಗಳ ಕಲಿಕೆಯನ್ನು ಈ ಶೃಂಗಸಭೆಯು ಒಟ್ಟುಗೂಡಿಸುತ್ತದೆ. ಇದು ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ, ವೇದಿಕೆ-ಆಧಾರಿತ ಸೇವಾ ವಿತರಣೆ ಮತ್ತು ವಿವಿಧ ವಲಯಗಳಲ್ಲಿ ದತ್ತಾಂಶ-ಚಾಲಿತ ನಿರ್ಧಾರ ಕೈಗೊಳ್ಳುವಲ್ಲಿ ಎಐ ಪಾತ್ರವನ್ನು ಬಲಪಡಿಸುವ ಮೂಲಕ 'ಡಿಜಿಟಲ್ ಇಂಡಿಯಾ' ಗುರಿಗಳನ್ನು ಬೆಂಬಲಿಸುತ್ತದೆ. ಅದೇ ಸಮಯದಲ್ಲಿ, ಕಂಪ್ಯೂಟ್ ಮೂಲಸೌಕರ್ಯ, ದತ್ತಾಂಶ ಸಂಗ್ರಹಗಳು, ಪ್ರತಿಭಾ ವಿಕಸನ ಮತ್ತು ಸ್ವದೇಶಿ ನಾವೀನ್ಯತೆಗಳಲ್ಲಿ ದೇಶೀಯ ಸಾಮರ್ಥ್ಯಗಳಿಗೆ ಒತ್ತು ನೀಡುವ ಮೂಲಕ ರಾಷ್ಟ್ರೀಯ ಸ್ವಾವಲಂಬನೆಯನ್ನು ಇದು ಉತ್ತೇಜಿಸುತ್ತದೆ.

References

• https://impact.indiaai.gov.in/

Click here to see PDF

*****