Press Note Details: Press Information Bureau

Economy

ಭಾರತದ ಮುಂದಿನ ತಂತ್ರಜ್ಞಾನದ ಹಂತಕ್ಕೆ ಬಲ ತುಂಬುವುದು

ಅಪರೂಪದ ಭೂಮಿಯ ಖನಿಜಗಳ ಶಾಶ್ವತ ಅಯಸ್ಕಾಂತ ತಯಾರಿಕಾ ಪರಿಸರ ವ್ಯವಸ್ಥೆಯ ಮೂಲಕ

Posted On: 27 DEC 2025 1:29PM

ಪ್ರಮುಖ ಮಾರ್ಗಸೂಚಿಗಳು

ದೇಶೀಯ ಸಮಗ್ರ ಅಪರೂಪದ ಭೂಮಿಯ ಖನಿಜಗಳ ಶಾಶ್ವತ ಅಯಸ್ಕಾಂತ (ಆರ್‌ಇಪಿಎಂ) ತಯಾರಿಕಾ ಪರಿಸರ ವ್ಯವಸ್ಥೆಯನ್ನು ಸ್ಥಾಪಿಸಲು ಸರ್ಕಾರವು ₹7,280 ಕೋಟಿ ಯೋಜನೆಗೆ ಅನುಮೋದನೆ ನೀಡಿದೆ.
ಅಪರೂಪದ ಭೂಮಿಯ ಆಕ್ಸೈಡ್‌ಗಳಿಂದ ಹಿಡಿದು ಸಿದ್ಧಪಡಿಸಿದ ಅಯಸ್ಕಾಂತಗಳವರೆಗೆ ಸಂಪೂರ್ಣ ಮೌಲ್ಯ ಸರಪಳಿಯನ್ನು ಒಳಗೊಂಡಂತೆ, ವಾರ್ಷಿಕ 6,000 ಮೆಟ್ರಿಕ್ ಟನ್ ದೇಶೀಯ ಉತ್ಪಾದನಾ ಸಾಮರ್ಥ್ಯವನ್ನು ಇದು ಸೃಷ್ಟಿಸುತ್ತದೆ.
ಎಲೆಕ್ಟ್ರಿಕ್ ವಾಹನಗಳು, ನವೀಕರಿಸಬಹುದಾದ ಇಂಧನ, ಎಲೆಕ್ಟ್ರಾನಿಕ್ಸ್, ಬಾಹ್ಯಾಕಾಶ ಮತ್ತು ರಕ್ಷಣೆಯಂತಹ ನಿರ್ಣಾಯಕ ವಲಯಗಳಲ್ಲಿ ಸ್ವಾವಲಂಬನೆಯನ್ನು ಇದು ಬಲಪಡಿಸುತ್ತದೆ.
ಅಪರೂಪದ ಭೂಮಿಯ ಖನಿಜ ಸಂಪನ್ಮೂಲಗಳ ಲಭ್ಯತೆ ಮತ್ತು ಎನ್‌ಸಿಎಂಎಂ ಹಾಗೂ ಎಂಎಂಡಿಆರ್‌ ಕಾಯ್ದೆ ಸುಧಾರಣೆಗಳಂತಹ ನೀತಿ ಉಪಕ್ರಮಗಳ ಬೆಂಬಲದೊಂದಿಗೆ ಈ ಯೋಜನೆ ಜಾರಿಯಾಗುತ್ತಿದೆ.
ಇದು ಆಮದು ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದಲ್ಲದೆ, ಜಾಗತಿಕ ಸುಧಾರಿತ-ವಸ್ತುಗಳ ಮೌಲ್ಯ ಸರಪಳಿಯಲ್ಲಿ ಭಾರತದ ಪಾಲ್ಗೊಳ್ಳುವಿಕೆಯನ್ನು ಹೆಚ್ಚಿಸುತ್ತದೆ ಮತ್ತು ದೀರ್ಘಾವಧಿಯ ಕೈಗಾರಿಕಾ ಬೆಳವಣಿಗೆಗೆ ದಾರಿಯಾಗುತ್ತದೆ.

ಪೀಠಿಕೆ

'ಸಿಂಟರ್ಡ್ ಅಪರೂಪದ ಭೂಮಿಯ ಶಾಶ್ವತ ಅಯಸ್ಕಾಂತ ( ಆರ್‌ಇಪಿಎಂ) ತಯಾರಿಕೆಯನ್ನು ಉತ್ತೇಜಿಸುವ ಯೋಜನೆ' ಗೆ ಸರ್ಕಾರವು ₹7,280 ಕೋಟಿ ಆರ್ಥಿಕ ವೆಚ್ಚದೊಂದಿಗೆ ಅನುಮೋದನೆ ನೀಡಿದೆ. ಈ ಯೋಜನೆಯು ಅಪರೂಪದ ಭೂಮಿಯ ಆಕ್ಸೈಡ್‌ಗಳಿಂದ ಹಿಡಿದು ಸಿದ್ಧಪಡಿಸಿದ ಅಯಸ್ಕಾಂತಗಳವರೆಗೆ ಸಂಪೂರ್ಣ ಮೌಲ್ಯ ಸರಪಳಿಯನ್ನು ಒಳಗೊಂಡಂತೆ, ಭಾರತದಲ್ಲಿ ವಾರ್ಷಿಕ 6,000 ಮೆಟ್ರಿಕ್ ಟನ್ ಸಮಗ್ರ ಆರ್‌ಇಪಿಎಂ ತಯಾರಿಕಾ ಸಾಮರ್ಥ್ಯವನ್ನು ಸ್ಥಾಪಿಸುವ ಗುರಿಯನ್ನು ಹೊಂದಿದೆ.

ದೇಶೀಯ ಸಮಗ್ರ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ಮೂಲಕ, ಎಲೆಕ್ಟ್ರಿಕ್ ವಾಹನಗಳು, ನವೀಕರಿಸಬಹುದಾದ ಇಂಧನ ವ್ಯವಸ್ಥೆಗಳು, ಎಲೆಕ್ಟ್ರಾನಿಕ್ಸ್, ಬಾಹ್ಯಾಕಾಶ ಮತ್ತು ರಕ್ಷಣಾ ವಲಯದಂತಹ ನಿರ್ಣಾಯಕ ಕ್ಷೇತ್ರಗಳಿಗೆ ಅಗತ್ಯವಿರುವ ಈ ಪ್ರಮುಖ ಕಚ್ಚಾವಸ್ತುವಿನ ಉತ್ಪಾದನೆಯಲ್ಲಿ ಸ್ವಾವಲಂಬನೆಯನ್ನು ಹೆಚ್ಚಿಸುವ ಉದ್ದೇಶವನ್ನು ಈ ಉಪಕ್ರಮ ಹೊಂದಿದೆ. ಅಲ್ಲದೆ, ಜಾಗತಿಕ ಆರ್‌ಇಪಿಎಂ ಮಾರುಕಟ್ಟೆಯಲ್ಲಿ ಭಾರತವನ್ನು ಪ್ರಮುಖ ರಾಷ್ಟ್ರವನ್ನಾಗಿ ರೂಪಿಸುವ ಗುರಿಯನ್ನೂ ಇದು ಹೊಂದಿದೆ. ಇದು ಆತ್ಮನಿರ್ಭರ ಭಾರತ, ಆಯಕಟ್ಟಿನ ವಲಯಗಳಿಗೆ ಸ್ಥಿತಿಸ್ಥಾಪಕ ಪೂರೈಕೆ ಸರಪಳಿ ಮತ್ತು ದೇಶದ ದೀರ್ಘಕಾಲೀನ 'ನೆಟ್ ಝೀರೋ 2070' ವಿಷನ್ ಸೇರಿದಂತೆ ರಾಷ್ಟ್ರೀಯ ಉದ್ದೇಶಗಳಿಗೆ ಬೆಂಬಲ ನೀಡುತ್ತದೆ.

ಅಪರೂಪದ ಭೂಮಿಯ ಶಾಶ್ವತ ಅಯಸ್ಕಾಂತ (ಆರ್‌ಇಪಿಎಂ) ಎಂದರೇನು?

ಆರ್‌ಇಪಿಎಂಗಳು ಅತ್ಯಂತ ಶಕ್ತಿಯುತವಾದ ಶಾಶ್ವತ ಅಯಸ್ಕಾಂತಗಳ ವಿಧಗಳಲ್ಲಿ ಒಂದಾಗಿವೆ. ಇವುಗಳನ್ನು ಕಾಂಪ್ಯಾಕ್ಟ್ (ಸಣ್ಣ ಗಾತ್ರದ) ಮತ್ತು ಹೆಚ್ಚಿನ ಕಾರ್ಯಕ್ಷಮತೆಯ ಅಯಸ್ಕಾಂತೀಯ ಘಟಕಗಳ ಅಗತ್ಯವಿರುವ ತಂತ್ರಜ್ಞಾನಗಳಲ್ಲಿ ವ್ಯಾಪಕವಾಗಿ ಬಳಸಲಾಗುತ್ತದೆ. ಇವುಗಳ ಹೆಚ್ಚಿನ ಅಯಸ್ಕಾಂತೀಯ ಬಲ ಮತ್ತು ಸ್ಥಿರತೆಯು ಈ ಕೆಳಗಿನ ಕ್ಷೇತ್ರಗಳಲ್ಲಿ ಇವುಗಳನ್ನು ಅವಿಭಾಜ್ಯ ಅಂಗವನ್ನಾಗಿ ಮಾಡಿದೆ:

ಎಲೆಕ್ಟ್ರಿಕ್ ವಾಹನಗಳ ಮೋಟಾರ್‌ಗಳು
ವಿಂಡ್ ಟರ್ಬೈನ್ ಜನರೇಟರ್‌ಗಳು (ಗಾಳಿ ಯಂತ್ರಗಳು)
ಗ್ರಾಹಕ ಮತ್ತು ಕೈಗಾರಿಕಾ ಎಲೆಕ್ಟ್ರಾನಿಕ್ಸ್
ಬಾಹ್ಯಾಕಾಶ ಮತ್ತು ರಕ್ಷಣಾ ವ್ಯವಸ್ಥೆಗಳು
ನಿಖರವಾದ ಸಂವೇದಕಗಳು ಮತ್ತು ಆಕ್ಚುಯೇಟರ್‌ಗಳು

ಸಣ್ಣ ಗಾತ್ರದಲ್ಲೂ ಪ್ರಬಲವಾದ ಅಯಸ್ಕಾಂತೀಯ ಕಾರ್ಯಕ್ಷಮತೆಯನ್ನು ನೀಡುವ ಆರ್‌ಇಪಿಎಂಗಳ ಸಾಮರ್ಥ್ಯವು ಅವುಗಳನ್ನು ಸುಧಾರಿತ ಎಂಜಿನಿಯರಿಂಗ್ ಅನ್ವಯಿಕೆಗಳಿಗೆ ಅತ್ಯಗತ್ಯವಾಗಿಸಿದೆ. ಭಾರತವು ಹಸಿರು ಇಂಧನ , ಸುಧಾರಿತ ಚಲನಶೀಲತೆ ಮತ್ತು ರಕ್ಷಣೆಯಂತಹ ಆದ್ಯತೆಯ ವಲಯಗಳಲ್ಲಿ ಉತ್ಪಾದನೆಯನ್ನು ವಿಸ್ತರಿಸುತ್ತಿರುವಾಗ, ದೀರ್ಘಕಾಲೀನ ಸ್ಪರ್ಧಾತ್ಮಕತೆ ಮತ್ತು ಪೂರೈಕೆ ಸರಪಳಿಯ ಸ್ಥಿತಿಸ್ಥಾಪಕತ್ವಕ್ಕಾಗಿ ಹೆಚ್ಚಿನ ಕಾರ್ಯಕ್ಷಮತೆಯ ಅಯಸ್ಕಾಂತಗಳ ವಿಶ್ವಾಸಾರ್ಹ ದೇಶೀಯ ಪೂರೈಕೆಯನ್ನು ಸ್ಥಾಪಿಸುವುದು ಹೆಚ್ಚು ಮುಖ್ಯವಾಗುತ್ತದೆ.

ಭಾರತದ ಪ್ರಸ್ತುತ ಪರಿಸ್ಥಿತಿ ಮತ್ತು ಯೋಜನೆಯ ಅಗತ್ಯತೆ

ಭಾರತವು ಅಪರೂಪದ ಭೂಮಿಯ ಖನಿಜಗಳ ಗಣನೀಯ ಸಂಗ್ರಹವನ್ನು ಹೊಂದಿದೆ, ವಿಶೇಷವಾಗಿ ಹಲವಾರು ಕರಾವಳಿ ಮತ್ತು ಒಳನಾಡು ಪ್ರದೇಶಗಳಲ್ಲಿ ಹರಡಿರುವ ಮೊನಾಜೈಟ್ ನಿಕ್ಷೇಪಗಳನ್ನು ಹೊಂದಿದೆ. ಈ ನಿಕ್ಷೇಪಗಳು ಸುಮಾರು 13.15 ಮಿಲಿಯನ್ ಟನ್ ಮೊನಾಜೈಟ್ ಅನ್ನು ಹೊಂದಿದ್ದು, ಅಂದಾಜು 7.23 ಮಿಲಿಯನ್ ಟನ್ ಅಪರೂಪದ ಭೂಮಿಯ ಆಕ್ಸೈಡ್‌ಗಳನ್ನು ಒಳಗೊಂಡಿವೆ. ಇವು ಕರಾವಳಿ ತೀರದ ಮರಳು, ಕೆಂಪು ಮರಳು ಮತ್ತು ಒಳನಾಡಿನ ಹೂಳು ಮಣ್ಣಿನಲ್ಲಿ ಕಂಡುಬರುತ್ತವೆ. ಇವು ಪ್ರಮುಖವಾಗಿ ಆಂಧ್ರಪ್ರದೇಶ, ಒಡಿಶಾ, ತಮಿಳುನಾಡು, ಕೇರಳ, ಪಶ್ಚಿಮ ಬಂಗಾಳ, ಜಾರ್ಖಂಡ್, ಗುಜರಾತ್ ಮತ್ತು ಮಹಾರಾಷ್ಟ್ರ ರಾಜ್ಯಗಳಲ್ಲಿ ಹರಡಿಕೊಂಡಿವೆ. ಈ ಆಕ್ಸೈಡ್‌ಗಳು ಶಾಶ್ವತ ಅಯಸ್ಕಾಂತ ತಯಾರಿಕೆ ಸೇರಿದಂತೆ ಅಪರೂಪದ ಭೂಮಿಯ ಆಧಾರಿತ ಕೈಗಾರಿಕೆಗಳಿಗೆ ಪ್ರಾಥಮಿಕ ಕಚ್ಚಾ ವಸ್ತುವಾಗಿ ಕಾರ್ಯನಿರ್ವಹಿಸುತ್ತವೆ.

ಇದರ ಜೊತೆಗೆ, ಗುಜರಾತ್ ಮತ್ತು ರಾಜಸ್ಥಾನದ ಗಟ್ಟಿಯಾದ ಬಂಡೆಗಳ ಪ್ರದೇಶಗಳಲ್ಲಿ 1.29 ಮಿಲಿಯನ್ ಟನ್ REO ಸಂಪನ್ಮೂಲಗಳನ್ನು ಗುರುತಿಸಲಾಗಿದೆ. ಹಾಗೆಯೇ, ಭಾರತೀಯ ಭೂವೈಜ್ಞಾನಿಕ ಸಮೀಕ್ಷೆಯು (GSI) ವ್ಯಾಪಕ ಅನ್ವೇಷಣೆಯ ಮೂಲಕ 482.6 ಮಿಲಿಯನ್ ಟನ್ ಅಪರೂಪದ ಭೂಮಿಯ ಅದಿರು ಸಂಪನ್ಮೂಲಗಳನ್ನು ಪತ್ತೆಹಚ್ಚಿದೆ. ಈ ಎಲ್ಲಾ ಮೌಲ್ಯಮಾಪನಗಳು ಆರ್‌ಇಪಿಎಂ ತಯಾರಿಕೆಯಂತಹ ಕೈಗಾರಿಕೆಗಳನ್ನು ಬೆಂಬಲಿಸಲು ಭಾರತದಲ್ಲಿ ಗಣನೀಯ ಪ್ರಮಾಣದ ಕಚ್ಚಾ ಸಾಮಗ್ರಿ ಲಭ್ಯವಿರುವುದನ್ನು ಸಾಬೀತುಪಡಿಸುತ್ತವೆ.

ಭಾರತವು ಬಲವಾದ ಸಂಪನ್ಮೂಲ ಮೂಲವನ್ನು ಹೊಂದಿದ್ದರೂ, ದೇಶೀಯವಾಗಿ ಶಾಶ್ವತ ಅಯಸ್ಕಾಂತಗಳ ಉತ್ಪಾದನೆಯು ಇನ್ನೂ ಅಭಿವೃದ್ಧಿ ಹಂತದಲ್ಲಿದೆ ಮತ್ತು ಪ್ರಸ್ತುತ ಅವಶ್ಯಕತೆಗಳ ಬಹುಪಾಲು ಭಾಗವನ್ನು ಆಮದುಗಳ ಮೂಲಕವೇ ಪೂರೈಸಲಾಗುತ್ತಿದೆ. ಅಧಿಕೃತ ವ್ಯಾಪಾರ ದತ್ತಾಂಶದ ಪ್ರಕಾರ, 2022-23 ರಿಂದ 2024-25ರ ಅವಧಿಯಲ್ಲಿ ಭಾರತವು ತನ್ನ ಶಾಶ್ವತ ಅಯಸ್ಕಾಂತ ಆಮದಿನ ಬಹುಪಾಲು ಪಾಲನ್ನು ಚೀನಾದಿಂದ ಪಡೆದಿದೆ. ಮೌಲ್ಯದ ದೃಷ್ಟಿಯಿಂದ ಆಮದು ಅವಲಂಬನೆಯು ಶೇ. 59.6 ರಿಂದ ಶೇ. 81.3 ರಷ್ಟಿದ್ದರೆ, ಪ್ರಮಾಣದ ದೃಷ್ಟಿಯಿಂದ ಶೇ. 84.8 ರಿಂದ ಶೇ. 90.4 ರಷ್ಟಿದೆ.

ಮತ್ತೊಂದೆಡೆ, ಮುಂದಿನ ದಿನಗಳಲ್ಲಿ ಬೇಡಿಕೆಯು ಹೆಚ್ಚಾಗುವ ಮುನ್ಸೂಚನೆ ಇರುವುದರಿಂದ ದೇಶೀಯ ಸಾಮರ್ಥ್ಯವನ್ನು ಹೆಚ್ಚಿಸುವ ಅಗತ್ಯವಿದೆ. ಎಲೆಕ್ಟ್ರಿಕ್ ವಾಹನಗಳು, ನವೀಕರಿಸಬಹುದಾದ ಇಂಧನ ಬಳಕೆ, ಎಲೆಕ್ಟ್ರಾನಿಕ್ಸ್ ಉತ್ಪಾದನೆ ಮತ್ತು ಆಯಕಟ್ಟಿನ ವಲಯಗಳ ಬೆಳವಣಿಗೆಯಿಂದಾಗಿ ಭಾರತದ ಆರ್‌ಇಪಿಎಂ ಬಳಕೆ 2030 ರ ವೇಳೆಗೆ ದುಪ್ಪಟ್ಟಾಗುವ ನಿರೀಕ್ಷೆಯಿದೆ. ಆದ್ದರಿಂದ, ಹೆಚ್ಚುತ್ತಿರುವ ದೇಶೀಯ ಅವಶ್ಯಕತೆಗಳನ್ನು ಪೂರೈಸಲು ಮತ್ತು ಪೂರೈಕೆ ಸರಪಳಿಯ ಸ್ಥಿತಿಸ್ಥಾಪಕತ್ವವನ್ನು ಬಲಪಡಿಸಲು ಸಮಗ್ರ ಆರ್‌ಇಪಿಎಂ ತಯಾರಿಕಾ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸುವುದು ಅತ್ಯಗತ್ಯವಾಗಿದೆ.

ಯೋಜನೆಯ ಪ್ರಮುಖ ಅಂಶಗಳು

ಈ ಯೋಜನೆಯು ಭಾರತದಲ್ಲಿ ಮೊದಲಿನಿಂದ ಕೊನೆಯವರೆಗೆ ಸಮಗ್ರ ಆರ್‌ಇಪಿಎಂ ತಯಾರಿಕೆಗೆ ಒಂದು ವ್ಯಾಪಕ ಚೌಕಟ್ಟನ್ನು ರೂಪಿಸುತ್ತದೆ. ಇದು ಆರಂಭಿಕ ಉತ್ಪಾದನಾ ಸಾಮರ್ಥ್ಯದ ಸೃಷ್ಟಿ ಮತ್ತು ದೀರ್ಘಕಾಲೀನ ಸ್ಪರ್ಧಾತ್ಮಕತೆ ಎರಡನ್ನೂ ಬೆಂಬಲಿಸುತ್ತದೆ.

ಇದು ಆಕ್ಸೈಡ್ ಕಚ್ಚಾವಸ್ತುವಿನಿಂದ ಅಂತಿಮ ಉತ್ಪನ್ನದವರೆಗೆ, ಹೆಚ್ಚಿನ ಕಾರ್ಯಕ್ಷಮತೆಯ ಅಯಸ್ಕಾಂತೀಯ ವಸ್ತುಗಳಿಗಾಗಿ ಸಂಪೂರ್ಣ ಸಮಗ್ರ ಉತ್ಪಾದನಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ಗುರಿಯನ್ನು ಹೊಂದಿದೆ. ಈ ಮೂಲಕ ದೇಶದಲ್ಲಿ ವಾರ್ಷಿಕ 6,000 ಮೆಟ್ರಿಕ್ ಟನ್ ಉತ್ಪಾದನಾ ಸಾಮರ್ಥ್ಯವನ್ನು ಸೃಷ್ಟಿಸಲಾಗುತ್ತದೆ.
ಜಾಗತಿಕ ಸ್ಪರ್ಧಾತ್ಮಕ ಬಿಡ್ಡಿಂಗ್ ಪ್ರಕ್ರಿಯೆಯ ಮೂಲಕ ಒಟ್ಟು ಸಾಮರ್ಥ್ಯವನ್ನು ಗರಿಷ್ಠ ಐವರು ಫಲಾನುಭವಿಗಳಿಗೆ ಹಂಚಿಕೆ ಮಾಡಲಾಗುತ್ತದೆ. ಪ್ರತಿಯೊಬ್ಬ ಫಲಾನುಭವಿಯು 1,200 MTPA ವರೆಗೆ ಉತ್ಪಾದನಾ ಸಾಮರ್ಥ್ಯಕ್ಕೆ ಅರ್ಹರಾಗಿರುತ್ತಾರೆ, ಇದು ವೈವಿಧ್ಯತೆಯ ಜೊತೆಗೆ ಸಾಕಷ್ಟು ಪ್ರಮಾಣದ ಉತ್ಪಾದನೆಯನ್ನು ಖಚಿತಪಡಿಸುತ್ತದೆ.
ಯೋಜನೆಯು ಬಲವಾದ ಪ್ರೋತ್ಸಾಹಕ ರಚನೆಯನ್ನು ಒಳಗೊಂಡಿದೆ. ಐದು ವರ್ಷಗಳ ಕಾಲ ಆರ್‌ಇಪಿಎಂ ಉತ್ಪಾದನೆಗಾಗಿ ₹6,450 ಕೋಟಿ ಮೊತ್ತವನ್ನು 'ಮಾರಾಟ-ಸಂಯೋಜಿತ ಪ್ರೋತ್ಸಾಹಕ'ವಾಗಿ ಮೀಸಲಿಡಲಾಗಿದೆ.
ಸುಧಾರಿತ ಮತ್ತು ಸಮಗ್ರ ಆರ್‌ಇಪಿಎಂ ತಯಾರಿಕಾ ಘಟಕಗಳ ಸ್ಥಾಪನೆಗೆ ಬೆಂಬಲ ನೀಡಲು ₹750 ಕೋಟಿ ಬಂಡವಾಳ ಸಬ್ಸಿಡಿಯನ್ನು ನೀಡಲಾಗುತ್ತದೆ.
ಈ ಯೋಜನೆಯನ್ನು ಒಟ್ಟು ಏಳು ವರ್ಷಗಳ ಕಾಲ ಜಾರಿಗೆ ತರಲಾಗುವುದು. ಇದರಲ್ಲಿ ಮೊದಲ ಎರಡು ವರ್ಷಗಳು ಸಮಗ್ರ ಆರ್‌ಇಪಿಎಂ ಘಟಕಗಳನ್ನು ಸ್ಥಾಪಿಸಲು ಮತ್ತು ನಂತರದ ಐದು ವರ್ಷಗಳು ಮಾರಾಟಕ್ಕೆ ಅನುಗುಣವಾಗಿ ಪ್ರೋತ್ಸಾಹಕ ಧನವನ್ನು ವಿತರಿಸಲು ಮೀಸಲಾಗಿವೆ. ಈ ಸಮಯದ ಚೌಕಟ್ಟು ಸಾಮರ್ಥ್ಯ ಸೃಷ್ಟಿ ಮತ್ತು ಆರಂಭಿಕ ಉತ್ಪಾದನಾ ಹಂತದಲ್ಲಿ ಸ್ಥಿರತೆಯನ್ನು ನೀಡುವ ಉದ್ದೇಶವನ್ನು ಹೊಂದಿದೆ.

ರಾಷ್ಟ್ರೀಯ ಆದ್ಯತೆಗಳು ಮತ್ತು ಇತರ ಸರ್ಕಾರಿ ಉಪಕ್ರಮಗಳೊಂದಿಗೆ ಸಮನ್ವಯ

ದೇಶೀಯ ಆರ್‌ಇಪಿಎಂ ತಯಾರಿಕಾ ಸಾಮರ್ಥ್ಯದ ಸ್ಥಾಪನೆಯು ಹಲವಾರು ರಾಷ್ಟ್ರೀಯ ಆದ್ಯತೆಗಳನ್ನು ಬೆಂಬಲಿಸುತ್ತದೆ. ಈ ಅಯಸ್ಕಾಂತಗಳು ಭಾರತದ ಕೈಗಾರಿಕಾ ಮತ್ತು ತಾಂತ್ರಿಕ ಪ್ರಗತಿಗೆ ಕೇಂದ್ರವಾಗಿರುವ ಆಯಕಟ್ಟಿನ ಮತ್ತು ಉನ್ನತ ತಂತ್ರಜ್ಞಾನದ ವಲಯಗಳಿಗೆ ಅತ್ಯಗತ್ಯವಾಗಿವೆ. ಸರ್ಕಾರದ ಈ ಉಪಕ್ರಮವು ದೇಶೀಯ ಉತ್ಪಾದನೆಯನ್ನು ಬಲಪಡಿಸಲು, ವೇಗವಾಗಿ ಬೆಳೆಯುತ್ತಿರುವ ಕೈಗಾರಿಕೆಗಳಿಗೆ ಪೂರೈಕೆ ಸರಪಳಿಯ ಸ್ಥಿತಿಸ್ಥಾಪಕತ್ವವನ್ನು ಹೆಚ್ಚಿಸಲು ಮತ್ತು ಭಾರತದ ದೀರ್ಘಕಾಲೀನ ಸುಸ್ಥಿರ ಗುರಿಗಳಿಗೆ ಕೊಡುಗೆ ನೀಡುವ ಗುರಿಯನ್ನು ಹೊಂದಿದೆ.

ಅಪರೂಪದ ಭೂಮಿಯ ಅಯಸ್ಕಾಂತಗಳನ್ನು ಇಂಧನ-ಸಕ್ಷಮ ಮೋಟಾರ್‌ಗಳು, ಪವನ ಶಕ್ತಿ ವ್ಯವಸ್ಥೆಗಳು ಮತ್ತು ಇತರ ಹಸಿರು ತಂತ್ರಜ್ಞಾನಗಳಲ್ಲಿ ವ್ಯಾಪಕವಾಗಿ ಬಳಸಲಾಗುತ್ತದೆ. ಆದ್ದರಿಂದ, ಈ ಉಪಕ್ರಮವು ದೇಶದ ಶುದ್ಧ ಇಂಧನ ಪರಿವರ್ತನೆ ಮತ್ತು 'ನೆಟ್ ಝೀರೋ 2070' ವಿಷನ್‌ನೊಂದಿಗೆ ನಿಕಟವಾಗಿ ಹೊಂದಿಕೆಯಾಗುತ್ತದೆ.
ಆರ್‌ಇಪಿಎಂಗಳ ದೇಶೀಯ ಉತ್ಪಾದನೆಯನ್ನು ಉತ್ತೇಜಿಸುವುದು ರಾಷ್ಟ್ರೀಯ ಭದ್ರತೆ ಮತ್ತು ಸ್ವಾವಲಂಬನೆಗೆ ಅಷ್ಟೇ ಮಹತ್ವದ್ದಾಗಿದೆ. ಈ ಅಯಸ್ಕಾಂತಗಳನ್ನು ರಕ್ಷಣಾ ಮತ್ತು ಬಾಹ್ಯಾಕಾಶ ವ್ಯವಸ್ಥೆಗಳಲ್ಲಿ ಬಳಸುವುದರಿಂದ, ದೇಶದೊಳಗೆ ಸಮಗ್ರ ಉತ್ಪಾದನಾ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸುವುದು ನಿರ್ಣಾಯಕ ಅನ್ವಯಿಕೆಗಳಿಗೆ ಸುಲಭ ಪ್ರವೇಶವನ್ನು ನೀಡುತ್ತದೆ ಮತ್ತು ನಡೆಯುತ್ತಿರುವ ಸ್ವದೇಶೀಕರಣ ಪ್ರಯತ್ನಗಳನ್ನು ಬೆಂಬಲಿಸುತ್ತದೆ.
ಇದು ರಾಷ್ಟ್ರೀಯ ನಿರ್ಣಾಯಕ ಖನಿಜಗಳ ಮಿಷನ್ ಮೂಲಕ ನಿರ್ಣಾಯಕ ಖನಿಜಗಳ ಮೌಲ್ಯ ಸರಪಳಿಯನ್ನು ಬಲಪಡಿಸುವ ಭಾರತದ ವಿಶಾಲ ಗುರಿಗೆ ಪೂರಕವಾಗಿದೆ. ಸುಧಾರಿತ ವಲಯಗಳಲ್ಲಿ ಬಳಸಲಾಗುವ ಅಪರೂಪದ ಭೂಮಿಯ ಧಾತುಗಳ ಲಭ್ಯತೆ ಮತ್ತು ಸಂಸ್ಕರಣಾ ಸಾಮರ್ಥ್ಯವನ್ನು ಸುಧಾರಿಸುವ ಗುರಿಯನ್ನು ಎನ್‌ಸಿಎಂಎಂ ಹೊಂದಿದೆ.

ಭಾರತದ ಮೊದಲಿನಿಂದ ಕೊನೆಯವರೆಗಿನ ಮೌಲ್ಯ ಸರಪಳಿ ಕಾರ್ಯತಂತ್ರ

ನಿರ್ಣಾಯಕ ಖನಿಜಗಳು ನೈಸರ್ಗಿಕವಾಗಿ ದೊರೆಯುವ ಮೂಲಧಾತುಗಳು ಮತ್ತು ಸಂಯುಕ್ತಗಳಾಗಿದ್ದು, ಇವು ವೈವಿಧ್ಯಮಯ ಹಾಗೂ ಅನಿವಾರ್ಯವಾದ ಕೈಗಾರಿಕಾ ಅನ್ವಯಿಕೆಗಳನ್ನು ಹೊಂದಿವೆ.

ಸಮಕಾಲೀನ ಕೈಗಾರಿಕಾ ಆರ್ಥಿಕತೆಯಲ್ಲಿ ಇವುಗಳ ಪ್ರಮುಖ ಪಾತ್ರ, ತಾಂತ್ರಿಕ ಪ್ರಗತಿ ಮತ್ತು ಆರ್ಥಿಕತೆಯನ್ನು ಉತ್ತೇಜಿಸುವ ಸಾಮರ್ಥ್ಯವನ್ನು ಪರಿಗಣಿಸಿ, ನಿರ್ಣಾಯಕ ಖನಿಜಗಳ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳುವುದು ಭಾರತಕ್ಕೆ ಒಂದು ಆಯಕಟ್ಟಿನ ಆದ್ಯತೆಯಾಗಿದೆ.

ಜನವರಿ 2025 ರಲ್ಲಿ ಅಂಗೀಕರಿಸಲ್ಪಟ್ಟ ರಾಷ್ಟ್ರೀಯ ನಿರ್ಣಾಯಕ ಖನಿಜಗಳ ಮಿಷನ್, ನಿರ್ಣಾಯಕ ಖನಿಜಗಳ ದೀರ್ಘಕಾಲೀನ ಸುಸ್ಥಿರ ಪೂರೈಕೆಯನ್ನು ಖಚಿತಪಡಿಸುವ ಗುರಿಯನ್ನು ಹೊಂದಿದೆ. ಇದು ಖನಿಜ ಅನ್ವೇಷಣೆ ಮತ್ತು ಗಣಿಗಾರಿಕೆಯಿಂದ ಹಿಡಿದು ಸಂಸ್ಕರಣೆ ಮತ್ತು ಬಳಕೆಯಲ್ಲಿಲ್ಲದ ಉತ್ಪನ್ನಗಳಿಂದ ಖನಿಜಗಳನ್ನು ಮರುಪಡೆಯುವವರೆಗಿನ ಎಲ್ಲಾ ಹಂತಗಳನ್ನು ಒಳಗೊಂಡಂತೆ ಭಾರತದ ಮೌಲ್ಯ ಸರಪಳಿಯನ್ನು ಬಲಪಡಿಸುತ್ತದೆ.

ದೇಶೀಯವಾಗಿ ಆರ್‌ಇಪಿಎಂ ತಯಾರಿಕಾ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸುವುದು ಕೇವಲ ತಾಂತ್ರಿಕ ಅನಿವಾರ್ಯತೆಯಷ್ಟೇ ಅಲ್ಲದೆ, ಸ್ವಾವಲಂಬನೆಯನ್ನು ಮುನ್ನಡೆಸುವ, ಶುದ್ಧ ಇಂಧನ ಅಳವಡಿಕೆಯನ್ನು ವೇಗಗೊಳಿಸುವ, ಸುಧಾರಿತ ಚಲನಶೀಲತೆಯನ್ನು ಬೆಂಬಲಿಸುವ ಮತ್ತು ರಕ್ಷಣಾ ಹಾಗೂ ಆಯಕಟ್ಟಿನ ಉತ್ಪಾದನಾ ಪರಿಸರ ವ್ಯವಸ್ಥೆಗಳನ್ನು ಬಲಪಡಿಸುವ ಭಾರತದ ಕಾರ್ಯತಂತ್ರದ ಪ್ರಮುಖ ಭಾಗವಾಗಿದೆ ಎಂದು ಈ ಕೊಂಡಿಗಳು ಸಾಬೀತುಪಡಿಸುತ್ತವೆ.

ಆರ್‌ಇಪಿಎಂ ಯೋಜನೆಯು ಭಾರತದ ನಿರ್ಣಾಯಕ ಖನಿಜ ಮತ್ತು ಸುಧಾರಿತ ಉತ್ಪಾದನಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವ ಉದ್ದೇಶ ಹೊಂದಿರುವ ಸರ್ಕಾರದ ವಿವಿಧ ಚಾಲ್ತಿಯಲ್ಲಿರುವ ಉಪಕ್ರಮಗಳೊಂದಿಗೆ ಮತ್ತಷ್ಟು ಹೊಂದಿಕೆಯಾಗುತ್ತದೆ.

ನೀತಿ ಸುಧಾರಣೆಗಳು, ವಿಶೇಷವಾಗಿ ಗಣಿ ಮತ್ತು ಖನಿಜಗಳ (ಅಭಿವೃದ್ಧಿ ಮತ್ತು ನಿಯಂತ್ರಣ) ಕಾಯ್ದೆ, 1957 ಕ್ಕೆ ತಂದ ತಿದ್ದುಪಡಿಗಳು, ನಿರ್ಣಾಯಕ ಮತ್ತು ಆಯಕಟ್ಟಿನ ಖನಿಜಗಳ ಪ್ರತ್ಯೇಕ ಪಟ್ಟಿಯನ್ನು ಪರಿಚಯಿಸಿವೆ ಮತ್ತು ಗಣಿಗಾರಿಕೆ ಗುತ್ತಿಗೆ ಹಾಗೂ ಸಂಯೋಜಿತ ಪರವಾನಗಿಗಳನ್ನು ಹರಾಜು ಮಾಡಲು ಸರ್ಕಾರಕ್ಕೆ ಅಧಿಕಾರ ನೀಡುವ ಮೂಲಕ ಖಾಸಗಿ ಮತ್ತು ಸಾರ್ವಜನಿಕ ವಲಯದ ಸಹಭಾಗಿತ್ವಕ್ಕೆ ಹೆಚ್ಚಿನ ಅವಕಾಶಗಳನ್ನು ಕಲ್ಪಿಸಿವೆ.

ನಿರ್ಣಾಯಕ ಖನಿಜಗಳಿಗಾಗಿ ಗಣಿಗಾರಿಕೆ ಸುಧಾರಣೆಗಳು

ಗಣಿಗಳ ನಿಯಂತ್ರಣ ಮತ್ತು ಖನಿಜಗಳ ಅಭಿವೃದ್ಧಿಗಾಗಿ ಎಂಎಂಡಿಆರ್‌ ಕಾಯ್ದೆ, 1957 ಅನ್ನು ಜಾರಿಗೆ ತರಲಾಗಿತ್ತು. ಭಾರತದ ನಿರ್ಣಾಯಕ ಖನಿಜ ಪರಿಸರ ವ್ಯವಸ್ಥೆಯನ್ನು ಬಲಪಡಿಸಲು ಎಂಎಂಡಿಆರ್‌ ತಿದ್ದುಪಡಿ ಕಾಯ್ದೆ, 2023 ರ ಅಡಿಯಲ್ಲಿ ಇದನ್ನು ಸುಧಾರಿಸಲಾಗಿದೆ. ಇದು ಖನಿಜ ಅನ್ವೇಷಣೆಯ ಎಲ್ಲಾ ಕ್ಷೇತ್ರಗಳಲ್ಲಿ ಖಾಸಗಿ ಸಹಭಾಗಿತ್ವಕ್ಕೆ ಅವಕಾಶ ನೀಡುತ್ತದೆ, ಖನಿಜ ರಿಯಾಯಿತಿಗಳನ್ನು ಹರಾಜು ಮಾಡಲು ಸರ್ಕಾರಕ್ಕೆ ಅಧಿಕಾರ ನೀಡುತ್ತದೆ ಮತ್ತು ಹೊಸ ಅನ್ವೇಷಣಾ ಪರವಾನಗಿ ವ್ಯವಸ್ಥೆಯನ್ನು ಪರಿಚಯಿಸುತ್ತದೆ.

ಒಟ್ಟಾರೆಯಾಗಿ, ಎನ್‌ಸಿಎಂಎಂ, ನಿಯಂತ್ರಕ ಸುಧಾರಣೆಗಳು ಮತ್ತು ಆರ್‌ಇಪಿಎಂ ತಯಾರಿಕಾ ಯೋಜನೆ ಸೇರಿದಂತೆ ಈ ಎಲ್ಲಾ ಉಪಕ್ರಮಗಳು ಆರ್‌ಇಪಿಎಂ ಸಾಮರ್ಥ್ಯವನ್ನು ವಿಸ್ತರಿಸಲು ಮತ್ತು ಅದನ್ನು ಭಾರತದ ವಿಶಾಲವಾದ ಕೈಗಾರಿಕಾ, ಶುದ್ಧ ಇಂಧನ ಮತ್ತು ಆಯಕಟ್ಟಿನ ಆದ್ಯತೆಗಳೊಂದಿಗೆ ಸಂಯೋಜಿಸಲು ಬಲವಾದ ದೇಶೀಯ ಅಡಿಪಾಯವನ್ನು ಸೃಷ್ಟಿಸುತ್ತವೆ.

ಜಾಗತಿಕ ಸನ್ನಿವೇಶ ಮತ್ತು ಭಾರತದ ಅವಕಾಶ

ಅಪರೂಪದ ಭೂಮಿಯ ಖನಿಜಗಳು ಮತ್ತು ಶಾಶ್ವತ ಅಯಸ್ಕಾಂತಗಳ ಜಾಗತಿಕ ಪೂರೈಕೆ ಸರಪಳಿಗಳು ಹಲವಾರು ಅಡೆತಡೆಗಳನ್ನು ಅನುಭವಿಸಿವೆ. ಇದು ಈ ಸಂಪನ್ಮೂಲಗಳ ಸುರಕ್ಷಿತ ಮತ್ತು ವೈವಿಧ್ಯಮಯ ಲಭ್ಯತೆಯ ಮಹತ್ವವನ್ನು ಎತ್ತಿ ತೋರಿಸಿದೆ. ಭಾರತವು ದೀರ್ಘಕಾಲೀನ ಪೂರೈಕೆ ಭದ್ರತೆಯನ್ನು ಬೆಂಬಲಿಸಲು ನೀತಿ ಸುಧಾರಣೆಗಳು ಮತ್ತು ಉದ್ದೇಶಿತ ದೇಶೀಯ ಸಾಮರ್ಥ್ಯ-ನಿರ್ಮಾಣ ಪ್ರಯತ್ನಗಳು ಸೇರಿದಂತೆ ಹಲವಾರು ಕ್ರಮಗಳನ್ನು ಕೈಗೊಂಡಿದೆ.

ಗಣಿ ಸಚಿವಾಲಯವು ಆಸ್ಟ್ರೇಲಿಯಾ, ಅರ್ಜೆಂಟೀನಾ, ಜಾಂಬಿಯಾ, ಪೆರು, ಜಿಂಬಾಬ್ವೆ, ಮೊಜಾಂಬಿಕ್, ಮಲಾವಿ ಮತ್ತು ಕೋಟ್ ಡಿ ಐವರಿ ಸೇರಿದಂತೆ ಖನಿಜ ಸಮೃದ್ಧ ದೇಶಗಳೊಂದಿಗೆ ದ್ವಿಪಕ್ಷೀಯ ಒಪ್ಪಂದಗಳನ್ನು ಮಾಡಿಕೊಂಡಿದೆ. ಭಾರತವು ಮಿನರಲ್ಸ್ ಸೆಕ್ಯುರಿಟಿ ಪಾರ್ಟ್‌ನರ್‌ಶಿಪ್, ಇಂಡೋ-ಪೆಸಿಫಿಕ್ ಎಕನಾಮಿಕ್ ಫ್ರೇಮ್‌ವರ್ಕ್ ಮತ್ತು ಕ್ರಿಟಿಕಲ್ ಅಂಡ್ ಎಮರ್ಜಿಂಗ್ ಟೆಕ್ನಾಲಜೀಸ್ ನಂತಹ ಬಹುಪಕ್ಷೀಯ ವೇದಿಕೆಗಳಲ್ಲಿಯೂ ಭಾಗವಹಿಸುತ್ತಿದೆ, ಇವು ಒಟ್ಟಾಗಿ ಸ್ಥಿತಿಸ್ಥಾಪಕತ್ವವುಳ್ಳ ನಿರ್ಣಾಯಕ ಖನಿಜಗಳ ಪೂರೈಕೆ ಸರಪಳಿಗಳನ್ನು ನಿರ್ಮಿಸುವ ಪ್ರಯತ್ನಗಳನ್ನು ಬೆಂಬಲಿಸುತ್ತವೆ.

ಈ ಪ್ರಯತ್ನಗಳಿಗೆ ಪೂರಕವಾಗಿ, ಖನಿಜ್ ಬಿದೇಶ್ ಇಂಡಿಯಾ ಲಿಮಿಟೆಡ್, ಅರ್ಜೆಂಟೀನಾದಂತಹ ದೇಶಗಳಲ್ಲಿನ ಪಾಲುದಾರಿಕೆಯ ಮೂಲಕ ಲಿಥಿಯಂ ಮತ್ತು ಕೋಬಾಲ್ಟ್ ಸೇರಿದಂತೆ ಆಯಕಟ್ಟಿನ ಖನಿಜ ಆಸ್ತಿಗಳ ಸಾಗರೋತ್ತರ ಅನ್ವೇಷಣೆ ಮತ್ತು ಸ್ವಾಧೀನದಲ್ಲಿ ತೊಡಗಿಸಿಕೊಂಡಿದೆ. ಈ ಉಪಕ್ರಮಗಳು ಎಲೆಕ್ಟ್ರಿಕ್ ಚಲನಶೀಲತೆ, ನವೀಕರಿಸಬಹುದಾದ ಇಂಧನ ವ್ಯವಸ್ಥೆಗಳು, ಎಲೆಕ್ಟ್ರಾನಿಕ್ಸ್ ಮತ್ತು ರಕ್ಷಣಾ ಅನ್ವಯಿಕೆಗಳಿಗೆ ಅಗತ್ಯವಿರುವ ನಿರ್ಣಾಯಕ ಖನಿಜಗಳನ್ನು ಸುರಕ್ಷಿತವಾಗಿ ಪಡೆಯುವ ಭಾರತದ ಕಾರ್ಯತಂತ್ರದ ಪ್ರಮುಖ ಅಂಶಗಳಾಗಿವೆ.

ಖನಿಜ್ ಬಿದೇಶ್ ಇಂಡಿಯಾ ಲಿಮಿಟೆಡ್ ಎಂಬುದು ಗಣಿ ಸಚಿವಾಲಯದ ಅಡಿಯಲ್ಲಿರುವ ನ್ಯಾಷನಲ್ ಅಲ್ಯೂಮಿನಿಯಂ ಕಂಪನಿ ಲಿಮಿಟೆಡ್, ಹಿಂದೂಸ್ತಾನ್ ಕಾಪರ್ ಲಿಮಿಟೆಡ್ ಮತ್ತು ಮಿನರಲ್ ಎಕ್ಸ್‌ಪ್ಲೋರೇಶನ್ ಅಂಡ್ ಕನ್ಸಲ್ಟೆನ್ಸಿ ಲಿಮಿಟೆಡ್ ಗಳ ಜಂಟಿ ಉದ್ಯಮವಾಗಿದೆ. ವಿದೇಶಗಳಲ್ಲಿ ಖನಿಜ ಆಸ್ತಿಗಳನ್ನು ಗುರುತಿಸುವ, ಅನ್ವೇಷಿಸುವ, ಸ್ವಾಧೀನಪಡಿಸಿಕೊಳ್ಳುವ ಮತ್ತು ಅಭಿವೃದ್ಧಿಪಡಿಸುವ ಮೂಲಕ ಭಾರತಕ್ಕೆ ನಿರ್ಣಾಯಕ ಮತ್ತು ಆಯಕಟ್ಟಿನ ಖನಿಜಗಳ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳಲು ಇದನ್ನು ಸ್ಥಾಪಿಸಲಾಗಿದೆ. ಉದಯೋನ್ಮುಖ ತಂತ್ರಜ್ಞಾನಗಳು ಮತ್ತು ಹಸಿರು ಇಂಧನ ಕೈಗಾರಿಕೆಗಳಿಗಾಗಿ ದೇಶೀಯ ಮೌಲ್ಯ ಸರಪಳಿಯನ್ನು ಬಲಪಡಿಸುವುದು ಇದರ ಗುರಿಯಾಗಿದ್ದು, ಇದು 'ಮೇಕ್ ಇನ್ ಇಂಡಿಯಾ' ಉಪಕ್ರಮಕ್ಕೆ ಬಲವಾದ ಉತ್ತೇಜನ ನೀಡುತ್ತದೆ.

ಈ ಹಿನ್ನೆಲೆಯಲ್ಲಿ, ದೇಶೀಯ ಆರ್‌ಇಪಿಎಂ ತಯಾರಿಕಾ ಸಾಮರ್ಥ್ಯದ ಅಭಿವೃದ್ಧಿಯು ಭಾರತಕ್ಕೆ ತನ್ನ ದೇಶೀಯ ಕೈಗಾರಿಕಾ ಬೆಳವಣಿಗೆಯನ್ನು ಬೆಂಬಲಿಸುವುದರ ಜೊತೆಗೆ, ಸುಧಾರಿತ ವಸ್ತುಗಳ ಜಾಗತಿಕ ಮೌಲ್ಯ ಸರಪಳಿಯಲ್ಲಿ ತನ್ನ ಸ್ಥಾನವನ್ನು ಬಲಪಡಿಸಿಕೊಳ್ಳಲು ಸಕಾಲಿಕ ಅವಕಾಶವನ್ನು ನೀಡುತ್ತದೆ.

ಉಪಸಂಹಾರ

ಸಿಂಟರ್ಡ್ ಅಪರೂಪದ ಭೂಮಿಯ ಶಾಶ್ವತ ಅಯಸ್ಕಾಂತಗಳ ತಯಾರಿಕೆಯನ್ನು ಉತ್ತೇಜಿಸುವ ಯೋಜನೆಯನ್ನು ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸಲು, ತಂತ್ರಜ್ಞಾನ ಆಧಾರಿತ ಹೂಡಿಕೆಯನ್ನು ಆಕರ್ಷಿಸಲು ಮತ್ತು ದೀರ್ಘಕಾಲೀನ ಉತ್ಪಾದನಾ ಸಾಮರ್ಥ್ಯವನ್ನು ಬೆಂಬಲಿಸಲು ವಿನ್ಯಾಸಗೊಳಿಸಲಾಗಿದೆ. ಉನ್ನತ-ದಕ್ಷತೆಯ ವ್ಯವಸ್ಥೆಗಳಲ್ಲಿ ಈ ವಸ್ತುಗಳ ಪಾತ್ರವಿರುವುದರಿಂದ, ಇದು ಭಾರತದ ಇಂಧನ-ಪರಿವರ್ತನೆಯ ಗುರಿಗಳಿಗೂ ಕೊಡುಗೆ ನೀಡುತ್ತದೆ. ದೇಶೀಯ ಸಾಮರ್ಥ್ಯವನ್ನು ಸ್ಥಾಪಿಸುವ ಮೂಲಕ ಮತ್ತು ಮೌಲ್ಯ ಸರಪಳಿಯ ಮುಂದಿನ ಕೊಂಡಿಗಳನ್ನು ಬಲಪಡಿಸುವ ಮೂಲಕ, ಸರ್ಕಾರದ ಈ ಉಪಕ್ರಮವು ಉದ್ಯೋಗ ಸೃಷ್ಟಿಸಲು, ಕೈಗಾರಿಕಾ ಸಾಮರ್ಥ್ಯವನ್ನು ಹೆಚ್ಚಿಸಲು ಮತ್ತು ಆತ್ಮನಿರ್ಭರ ಭಾರತ ಹಾಗೂ ವಿಕಸಿತ ಭಾರತ @2047ರ ದೃಷ್ಟಿಕೋನವನ್ನು ಬೆಂಬಲಿಸಲು ಸಹಾಯ ಮಾಡುತ್ತದೆ.