Press Information Bureau

പ്രധാന വസ്തുതകൾ

2026–27 റാബി മാർക്കറ്റിംഗ് സീസണിലെ (RMS) മിനിമം താങ്ങുവില (MSP) അംഗീകരിച്ചു. ഏകദേശം 297 ലക്ഷം മെട്രിക് ടൺ ധാന്യ സംഭരണവും കർഷകർക്ക് മിനിമം താങ്ങുവിലയായി ഏകദേശം 84,263 കോടി രൂപയും പ്രതീക്ഷിക്കുന്നു.

2026–27 ലെ റാബി മാർക്കറ്റിംഗ് സീസണിൽ ഗോതമ്പ് ഉൽപാദന ചെലവിന്റെ ഏകദേശം 109% ലാഭവിഹിതം കർഷകർക്ക് ലഭിക്കും.

ഭക്ഷ്യധാന്യങ്ങളുടെ MSP പേയ്‌മെന്റുകൾ ₹1.06 ലക്ഷം കോടി (2014-15)യിൽ നിന്ന് ₹3.33 ലക്ഷം കോടി (ജൂലൈ 2024–ജൂൺ 2025)യായി മൂന്നിരട്ടിയിലധികം വർദ്ധിച്ചു, ഇതേ കാലയളവിൽ സംഭരണം 761.40 ലക്ഷം മെട്രിക് ടണ്ണിൽ നിന്ന് 1,175 ലക്ഷം മെട്രിക് ടൺ ആയി വർദ്ധിച്ചു, ഇത് 1.84 കോടി കർഷകർക്ക് പ്രയോജനം ചെയ്തു.

പയർവർഗ്ഗങ്ങളിൽ സ്വയംപര്യാപ്തത കൈവരിക്കുന്നതിന്, 2028–29 വരെ തുവര, ഉഴുന്ന്, മസൂർ (പരിപ്പ്) എന്നിവയുടെ ഉത്പാദനത്തിന്റെ 100% സംഭരിക്കും; 2025 മാർച്ച് വരെ 2.46 LMT തുവര സംഭരിച്ചുകഴിഞ്ഞു.

ആമുഖം

ഓരോ വിള സീസണിലും ഇന്ത്യയിലെ കർഷകർ അവരുടെ വയലുകളിൽ അക്ഷീണം പ്രവർത്തിക്കുന്നു. എന്നാൽ കാലാവസ്ഥയിലും വിപണിയിലുമുള്ള അനിശ്ചിതത്വങ്ങൾ അവരുടെ നേട്ടങ്ങളെല്ലാം ‌തകർത്തെറിയുന്നു. നിനച്ചിരിക്കാത്ത നേരത്തെത്തുന്ന മഴയും വരൾച്ചയും വെള്ളപ്പൊക്കവുമെല്ലാം മാസങ്ങളുടെ കഠിനാധ്വാനത്തെ ഏതാനും ദിവസങ്ങൾക്കുള്ളിൽ ഇല്ലാതാക്കുന്നു. ഒടുവിൽ വിളവെടുപ്പ് പൂർത്തിയാക്കുമ്പോഴാകട്ടെ ഉൽ‌പന്നങ്ങൾ ഉൽ‌പാദനച്ചെലവിലും കുറഞ്ഞ വിലയ്ക്ക് വിൽക്കാൻ അസ്ഥിരമായ വിപണി കർഷകരെ നിർബന്ധിതരാക്കുന്നു. ഉപജീവനത്തിനായി കൃഷിയെ മാത്രം ആശ്രയിക്കുന്ന ചെറുകിട, നാമമാത്ര കർഷകർ ഇത്തരം സാഹചര്യങ്ങൾ കാരണം കടക്കെണിയിൽ കുടുങ്ങുന്നു. വരുമാനനഷ്ടത്തിനും കൃഷി ഉപേക്ഷിക്കുന്നതിനും പോലും കാരണമാകുന്നു. 

ഇവിടെയാണ് കുറഞ്ഞ താങ്ങുവില (MSP) ഒരു ജീവനാഡിയായി മാറുന്നത്. മുൻകൂട്ടി നിശ്ചയിച്ച വിലയ്ക്ക് ഗവൺമെന്റ് വിളകൾ വാങ്ങുന്നതിലൂടെ ​കർഷകരെ പിന്തുണയ്ക്കുന്ന ഒരു നിർണായക സംവിധാനമാണ് കുറഞ്ഞ താങ്ങുവില (MSP). ഉദാഹരണത്തിന്, ഒരു ഗോതമ്പുകർഷകന് ഓപ്പൺ മാർക്കറ്റിൽ വില കുറഞ്ഞാലും തന്റെ വിളയ്ക്ക് ക്വിന്റലിന് ₹2,585 (2026‑27 ലെ MSP) ഉറപ്പാക്കാൻ കഴിയും. അതുപോലെ, ഒരു നെൽകർഷകന് നെല്ല് ക്വിന്റലിന് ₹2,369 (2025‑26 ലെ MSP) എന്ന നിരക്കിൽ ഗവൺമെന്റ് ഏജൻസികൾക്ക് വിൽക്കാൻ കഴിയും. ഗുണനിലവാരമുള്ള വിത്തുകളിലും സാങ്കേതികവിദ്യകളിലും കൂടുതൽ നിക്ഷേപം നടത്താൻ ഈ സുനിശ്ചിത വില കർഷകരെ പ്രോത്സാഹിപ്പിക്കുന്നു.

മിനിമം താങ്ങുവില നയവും അതിന്റെ നിർണ്ണയവും

കമ്മീഷൻ ഫോർ അഗ്രികൾച്ചറൽ കോസ്റ്റ്സ് & പ്രൈസസിന്റെ (CACP) ശുപാർശകളുടെ അടിസ്ഥാനത്തിൽ 22 കാർഷിക വിളകൾക്ക് ​ഗവൺമെന്റ് വർഷം തോറും മിനിമം താങ്ങുവില (MSP) പ്രഖ്യാപിക്കുന്നു. ഇതിനായി കേന്ദ്ര മന്ത്രാലയങ്ങളുടെയും/വകുപ്പുകളുടെയും സംസ്ഥാന ​ഗവൺമെന്റുകളുടെയും അഭിപ്രായങ്ങളും പരിഗണിക്കുന്നു. ഒപ്പം തോറിയയ്ക്കും പൊതിച്ച തേങ്ങയ്ക്കുമുള്ള MSP യഥാക്രമം റാപ്സീഡ്, കടുക്, കൊപ്ര എന്നിവയുടെ MSPയുടെ അടിസ്ഥാനത്തിൽ നിശ്ചയിക്കുന്നു. 

മിനിമം താങ്ങുവില നിശ്ചയിക്കുമ്പോൾ ഉൽ‌പാദനച്ചെലവ്, ആഭ്യന്തര, ആ​ഗോള വിപണികളിലെ വിവിധ വിളകൾക്കുള്ള ഡിമാൻഡ്-വിതരണ സാഹചര്യങ്ങൾ, ആഭ്യന്തര, അന്തർദേശീയ വിലകൾ, വിളകൾക്കിടയിലുള്ള വില തുല്യത, കാർഷിക, കാർഷികേതര മേഖലകൾ തമ്മിലുള്ള വ്യാപാര വ്യവസ്ഥകൾ, കാർഷിക വില നയം സമ്പദ്‌വ്യവസ്ഥയുടെ ബാക്കി ഭാഗങ്ങളിൽ ചെലുത്തുന്ന സ്വാധീനം, ഉൽപ്പാദനച്ചെലവിനേക്കാൾ 50 ശതമാനം കുറഞ്ഞ ലാഭം എന്നിങ്ങനെ നിരവധി ഘടകങ്ങൾ CACP പരിഗണിക്കുന്നു.

കൂടാതെ, ഉൽപാദനച്ചെലവ് കണക്കാക്കുമ്പോൾ മനുഷ്യാധ്വാനത്തിനുള്ള കൂലി, കാളകളുടെയോ യന്ത്രങ്ങളുടെയോ വില, പാട്ടത്തിനെടുത്ത ഭൂമിക്ക് നൽകിയ വാടക, വിത്തുകൾ, രാസ, ജൈവ വളങ്ങൾ എന്നിവയ്‌ക്കുള്ള ചെലവുകൾ, ജലസേചന ചാർജുകൾ, കാർഷിക ഉപകരണങ്ങളുടെ തേയ്മാനം, വായ്പകളുടെ പലിശ, പമ്പ് സെറ്റുകൾക്കാവശ്യമായ വൈദ്യുതി അല്ലെങ്കിൽ ഡീസൽ, കുടുംബാധ്വാനം എന്നിവയുൾപ്പെടെയുള്ള എല്ലാ ചെലവുകളും കമ്മീഷൻ പരിഗണിക്കുന്നു. 

22 വിളകൾക്കും സംസ്ഥാനങ്ങൾക്കും MSP നിശ്ചയിക്കാനുള്ള ചെലവ് കണക്കാക്കുന്നതിനുള്ള ഫോർമുല ഏകീകൃതമാണ്. ഓരോ കർഷക കുടുംബത്തിന്റെയും മൊത്തത്തിലുള്ള അധ്വാനം ഈ കണക്കുകൂട്ടലിൽ ഉൾപ്പെടുത്തിയിട്ടുണ്ട് എന്നതും ശ്രദ്ധേയമാണ്. വ്യക്തിഗത കർഷകരിൽ മാത്രം ശ്രദ്ധ കേന്ദ്രീകരിക്കുന്നതിനുപകരം മുഴുവൻ കർഷക കുടുംബങ്ങളുടെയും കൂട്ടായ പരിശ്രമങ്ങളെ ഇത് അംഗീകരിക്കുന്നു.

2018-19 മുതൽ, വിളകൾക്കുള്ള കുറഞ്ഞ താങ്ങുവില (MSP) ​ഗവൺമെന്റ് തുടർച്ചയായി വർദ്ധിപ്പിച്ചുകൊണ്ടിരിക്കുന്നു എന്നത് ശ്രദ്ധേയമാണ്. 2018-19 ലെ കേന്ദ്ര ബജറ്റിലെ ഏതൊരു വിളയ്ക്കും MSP നിരക്ക് ചെലവിന്റെ ഒന്നര ഇരട്ടിയായിരിക്കുമെന്ന പ്രഖ്യാപനത്തിന്റെ അടിസ്ഥാനത്തിലാണ് ഈ വർധന. ഇത് കർഷകർക്ക് ശരാശരി 50 ശതമാനം ലാഭം ഉറപ്പാക്കുന്നു.

MSP ഡാറ്റ: 2026-27 റാബി മാർക്കറ്റിംഗ് സീസണിലേക്കും 2025-26 ഖാരിഫ് മാർക്കറ്റിംഗ് സീസണിലേക്കും നിശ്ചയിച്ച MSP നിരക്കുകൾ

2025 ഒക്ടോബർ 1 ന് 2026-27 മാർക്കറ്റിംഗ് സീസണിലെ എല്ലാ റാബി വിളകൾക്കും MSP വർദ്ധിപ്പിക്കാൻ കേന്ദ്ര മന്ത്രിസഭ അംഗീകാരം നൽകി. കൂടാതെ, കർഷകർക്ക് ലാഭകരമായ വില ഉറപ്പാക്കുന്നതിനായി നിലവിലെ 2025-26 മാർക്കറ്റിംഗ് സീസണിലെ എല്ലാ ഖാരിഫ് വിളകൾക്കും MSP നിരക്കുകൾ വർദ്ധിപ്പിച്ചിട്ടുണ്ട്. 

2026-27 മാർക്കറ്റിംഗ് സീസണിലെ ഖാരിഫ് വിളകൾക്ക്:

കഴിഞ്ഞ വർഷത്തെ അപേക്ഷിച്ച് ഏറ്റവും ഉയർന്ന MSP വർദ്ധന ലഭിച്ചത് നൈജർ വിത്തിനാണ് (ക്വിന്റലിന് ₹820). റാഗി (ക്വിന്റലിന് ₹596), പരുത്തി (ക്വിന്റലിന് ₹589), എള്ള് (ക്വിന്റലിന് ₹579) എന്നിവയ്ക്കും വർദ്ധനവുണ്ടായി.

കർഷകരുടെ ലാഭവിഹിതം സംബന്ധിച്ച്, അവർ ഏറ്റവും കൂടുതൽ ലാഭം നേടുന്നത് ബജ്റയിലാണ്, ഇത് ഉൽപാദനച്ചെലവിനേക്കാൾ 63 ശതമാനം കൂടുതലാണ്. തുടർന്ന് ചോളത്തിനും (59 ശതമാനം) ഉഴുന്നിനുമാണ് (53 ശതമാനം). മറ്റ് വിളകളിൽ കർഷകരുടെ ലാഭവിഹിതം ശരാശരി 50 ശതമാനമാണ്. സമീപ വർഷങ്ങളിൽ ഭക്ഷ്യധാന്യങ്ങൾക്ക് പുറമെ പയർവർഗ്ഗങ്ങൾ, എണ്ണക്കുരുക്കൾ, പോഷക ധാന്യങ്ങൾ/ ശ്രീ അന്ന തുടങ്ങിയവയ്ക്ക് ഉയർന്ന MSP വാഗ്ദാനം ചെയ്തുകൊണ്ട് ഇവയുടെ ഉൽപാദനത്തെ ​ഗവൺമെന്റ് പ്രോത്സാഹിപ്പിക്കുന്നു. 

2026-27 മാർക്കറ്റിംഗ് സീസണിലെ റാബി വിളകൾക്ക്:

ഈ സീസണിൽ ഏറ്റവും കൂടുതൽ MSP വർദ്ധന രേഖപ്പെടുത്തിയ റാബി വിള കുങ്കുമപ്പൂവാണ് (ക്വിന്റലിന് ₹600). മസൂറിന് ക്വിന്റലിന് ₹300 വില വർദ്ധനയുമുണ്ടായി. റാപ്സീഡ്, കടുക്, കടല, ബാർലി, ഗോതമ്പ് എന്നിവയുടെ ഏറ്റവും കുറഞ്ഞ താങ്ങുവിലകൾ യഥാക്രമം ക്വിന്റലിന് ₹250, ₹225, ₹170, ₹160 എന്നിങ്ങനെ വർദ്ധിച്ചു.

അഖിലേന്ത്യാ ശരാശരി ഉൽപാദനച്ചെലവിനേക്കാൾ ഏറ്റവും ഉയർന്ന മാർജിൻ ഗോതമ്പിന് 109% ആണ്, തുടർന്ന് റാപ്സീഡിനും കടുകിനും (93%); പയറിന് 89%; പയറിന് 59%; ബാർലിക്ക് 58%; കുങ്കുമപ്പൂവിന് 50%. റാബി വിളകളുടെ ഈ വർദ്ധിച്ച MSP കർഷകർക്ക് ആദായകരമായ വില ഉറപ്പാക്കുകയും വിള വൈവിധ്യവൽക്കരണത്തെ പ്രോത്സാഹിപ്പിക്കുകയും ചെയ്യുന്നു.

2026-27 ലെ റാബി മാർക്കറ്റിംഗ് സീസണിൽ ഭക്ഷ്യധാന്യങ്ങളുടെ മൊത്തം സംഭരണം 297 ലക്ഷം മെട്രിക് ടൺ ആയിരിക്കുമെന്ന് കണക്കാക്കപ്പെടുന്നു, കൂടാതെ ഈ നിർദ്ദിഷ്ട MSPയിൽ നിന്ന് കർഷകർക്ക് ഏകദേശം ₹84,263 കോടി ലഭിക്കുമെന്നും പ്രതീക്ഷിക്കുന്നു.

സംഭരണ ​​സംവിധാനങ്ങൾ

​ഗവൺമെന്റിന്റെ മുൻകരുതൽ നടപടികൾ ഓരോ വർഷവും സംഭരിക്കുന്ന അളവ് വർദ്ധിപ്പിക്കുകയും കർഷകർക്ക് സമയബന്ധിതമായി പണം നൽകുകയും ചെയ്തുവെന്ന് ഉറപ്പാക്കുന്നു. MSP നിരക്കുകളിലെ തുടർച്ചയായ വർദ്ധന കർഷകർക്ക് ഗണ്യമായ സാമ്പത്തിക ഉത്തേജനം നൽകുന്നുവെന്ന് ഇത് തെളിയിക്കുന്നു. വർഷങ്ങളായി, ധാന്യ സംഭരണ ​​സംവിധാനങ്ങൾ ​ഗണ്യമായി ശക്തിപ്പെടുത്തിയിട്ടുണ്ട്, ഇത് സംസ്ഥാനങ്ങളിലുടനീളവും വിവിധ വിളകളിലുമായി കർഷകരുടെ പങ്കാളിത്തം വർദ്ധിപ്പിക്കുന്നതിന് കാരണമായി.

ധാന്യങ്ങളും നാടൻ ധാന്യങ്ങളും ഫുഡ് കോർപ്പറേഷൻ ഓഫ് ഇന്ത്യയും (FCI) നിയുക്ത സംസ്ഥാന ഏജൻസികളും സംഭരിക്കുന്നു. ഓരോ വിപണന സീസണിനും ​മുമ്പ് ഫുഡ് കോർപ്പറേഷൻ ഓഫ് ഇന്ത്യയുമായും സംസ്ഥാന ​ഗവൺമെന്റുകളുമായും കൂടിയാലോചിച്ച്, കർഷകരിൽ നിന്ന് സംഭരിക്കേണ്ട ഗോതമ്പിന്റെയും നെല്ലിന്റെയും അളവ് ഇന്ത്യാ ഗവൺമെന്റ് നിർണ്ണയിക്കുന്നു. കണക്കാക്കിയ ഉൽപാദനം, കർഷകർക്ക് ലഭ്യമായ ധാന്യത്തിന്റെ വിപണി മിച്ചം, വിള രീതികൾ തുടങ്ങിയ ഘടകങ്ങളെ ​ഗവൺമെന്റ് പരി​ഗണിക്കുന്നു.

പ്രധാൻമന്ത്രി അന്നദാതാ ആയ് സംരക്ഷൺ അഭിയാൻ (PM ASHA)

ലക്ഷ്യം:

കർഷകരുടെ ഉൽപ്പന്നങ്ങൾക്ക് ആദായകരമായ വില ഉറപ്പാക്കുകയും അവശ്യവസ്തുക്കൾ ഉപഭോക്താക്കൾക്ക് ന്യായമായ വിലയിൽ ലഭ്യമാക്കുകയും ചെയ്യുക എന്നതാണ് PM-AASHA ലക്ഷ്യമിടുന്നത്.

പ്രധാന ഘടകങ്ങളും പ്രവർത്തനവും:

PM ASHA ക്യാമ്പയ്‌നിന്റെ പ്രധാന ലക്ഷ്യങ്ങളിലൊന്ന് താങ്ങുവില പദ്ധതി (PSS) കാര്യക്ഷമമാക്കുക എന്നതാണ്. പയർവർഗ്ഗങ്ങൾ, എണ്ണക്കുരുക്കൾ, കൊപ്ര തുടങ്ങിയ ഉൽപ്പന്നങ്ങളുടെ വിപണി വില MSP-യേക്കാൾ താഴെയാകുമ്പോൾ, നാഷണൽ അഗ്രികൾച്ചറൽ കോപ്പറേറ്റീവ് മാർക്കറ്റിംഗ് ഫെഡറേഷൻ ഓഫ് ഇന്ത്യ ലിമിറ്റഡ് (NAFED), നാഷണൽ കോപ്പറേറ്റീവ് കൺസ്യൂമേഴ്‌സ് ഫെഡറേഷൻ ഓഫ് ഇന്ത്യ ലിമിറ്റഡ് (NCCF) എന്നിവ വഴി സാധുവായ ഭൂമിരേഖകൾ കൈവശമുള്ള, മുൻകൂട്ടി രജിസ്റ്റർ ചെയ്ത കർഷകരിൽ നിന്ന് ന്യായമായ ശരാശരി ഗുണനിലവാരം (FAQ) മാനദണ്ഡങ്ങൾ പാലിക്കുന്ന, യോഗ്യമായ ഉൽപ്പന്നങ്ങൾ നേരിട്ട് സംഭരിക്കുന്നു. ഇത് ഇടനിലക്കാരില്ലാതെ ന്യായമായ വിലയ്ക്ക് കർഷകരെ അവരുടെ ഉൽപ്പന്നങ്ങൾ വിൽക്കാൻ പ്രാപ്തമാക്കുന്നു.

തുടർച്ച:

15-ാം ധനകാര്യ കമ്മീഷന്റെ കാലത്ത്, 2025-26 വരെ PM-AASHA പദ്ധതി തുടരാൻ ഇന്ത്യാ ഗവൺമെന്റ് അംഗീകാരം നൽകിയിട്ടുണ്ട്.

പയർവർഗ്ഗങ്ങൾ, എണ്ണക്കുരുക്കൾ, കൊപ്ര എന്നിവ സാധാരണയായി കർഷകർക്കുള്ള താങ്ങുവില പദ്ധതിയായ പ്രധാൻമന്ത്രി അന്നദാതാ ആയ് സംരക്ഷൺ അഭിയാൻ (PM ASHA) വഴിയാണ് സംഭരിക്കുന്നത്. ഈ കാർഷിക ഉൽപ്പന്നങ്ങളുടെ വിപണി വില നിശ്ചിത MSPയേക്കാൾ കുറവാണെന്ന് ബന്ധപ്പെട്ട സംസ്ഥാന ​ഗവൺമെന്റുകൾ റിപ്പോർട്ട് ചെയ്യുമ്പോൾ ഇത് സംഭരിക്കുന്നു. PM-AASHA പ്രകാരം സംഭരണത്തിനുള്ള പ്രധാന ഏജൻസികൾ നാഷണൽ അഗ്രികൾച്ചറൽ കോപ്പറേറ്റീവ് മാർക്കറ്റിംഗ് ഫെഡറേഷൻ ഓഫ് ഇന്ത്യ ലിമിറ്റഡ് (NAFED), നാഷണൽ കോ-ഓപ്പറേറ്റീവ് കൺസ്യൂമേഴ്‌സ് ഫെഡറേഷൻ ഓഫ് ഇന്ത്യ ലിമിറ്റഡ് (NCCF) എന്നിവയാണ്.

പരുത്തിയും ചണവും MSP നിരക്കിൽ കോട്ടൺ കോർപ്പറേഷൻ ഓഫ് ഇന്ത്യ (CCI) യും ജൂട്ട് കോർപ്പറേഷൻ ഓഫ് ഇന്ത്യ (JCCI) യും സംഭരിക്കുന്നു. കർഷകരിൽ നിന്ന് സംഭരിക്കുന്ന ഈ രണ്ട് ഉൽപ്പന്നങ്ങളുടെയും അളവിന് പരമാവധി പരിധി നിശ്ചയിച്ചിട്ടില്ല എന്നത് ശ്രദ്ധേയമാണ്.

MSPയിൽ നിന്ന് സ്വയംപര്യാപ്തതയിലേക്ക്

ഇന്ത്യ പയർവർഗ്ഗങ്ങളുടെ ഉൽപാദനത്തിൽ ഗണ്യമായ വളർച്ച കൈവരിച്ചു. എന്നിരുന്നാലും, 2027 ഓടെ പയർവർഗ്ഗങ്ങളിൽ സ്വയംപര്യാപ്തത കൈവരിക്കുക, അതുവഴി ഇറക്കുമതിയുടെ ആവശ്യകത ഇല്ലാതാക്കുക എന്ന അഭിലാഷകരമായ ലക്ഷ്യം പ്രധാനമന്ത്രി നരേന്ദ്ര മോദി നിശ്ചയിച്ചുറപ്പിച്ചിട്ടുണ്ട്. കർഷകരുടെ സഹകരണത്തോടെ 2027 ഡിസംബറോടെ ഇന്ത്യ പയർവർഗ്ഗ ഉൽപാദനത്തിൽ പൂർണ്ണമായും സ്വയംപര്യാപ്തമാകുമെന്ന് അദ്ദേഹം ഊന്നിപ്പറയുന്നു. 

ഇത് കൈവരിക്കുന്നതിനായി, 2025 ലെ ബജറ്റിൽ, 2028–29 വരെ നാല് വർഷത്തേക്ക്, സംസ്ഥാനങ്ങളിൽ ഉൽപ്പാദിപ്പിക്കുന്ന തുവര, ഉഴുന്ന്, മസൂർ എന്നിവയുടെ ഉത്പാദനത്തിന്റെ 100%വും കർഷകരിൽ നിന്ന് സംഭരിക്കുമെന്ന് ​ഗവൺമെന്റ് പ്രഖ്യാപിച്ചു. ഈ വാഗ്ദാനം നിറവേറ്റുന്നതിനായി MSPയിൽ പയർവർഗ്ഗങ്ങൾ വാങ്ങുന്നതിനുള്ള പിഎം-ആശ ഗ്യാരണ്ടി ₹45,000 കോടിയിൽ നിന്ന് ₹60,000 കോടിയായി വർദ്ധിപ്പിച്ചു.

2025 മാർച്ച് 25 ആയപ്പോഴേക്കും, അഞ്ച് സംസ്ഥാനങ്ങളിലെ (ആന്ധ്രാപ്രദേശ്, ഗുജറാത്ത്, കർണാടക, മഹാരാഷ്ട്ര, തെലങ്കാന) കർഷകരിൽ നിന്ന് ആകെ 2.46 ലക്ഷം മെട്രിക് ടൺ തുവര സംഭരിച്ചു, ഇത് 1.71 ലക്ഷം കർഷകർക്ക് പ്രയോജനം ചെയ്തു.

MSP സംഭരണത്തിന്റെ സ്വാധീനം

പയർവർഗ്ഗങ്ങളും എണ്ണക്കുരുക്കളും

കഴിഞ്ഞ 11 വർഷത്തിനിടയിൽ രാജ്യം പയർവർഗ്ഗ ഉൽപാദനത്തിൽ ശ്രദ്ധേയമായ മാറ്റത്തിന് സാക്ഷ്യം വഹിച്ചു. ഒരുകാലത്ത് കുറഞ്ഞ കൃഷി, പരിമിതമായ സംഭരണം, ഉയർന്ന ഇറക്കുമതി ആശ്രയത്വം, ഉയർന്ന വിപണി വില എന്നിവയാൽ അടയാളപ്പെടുത്തിയിരുന്ന ഈ മേഖല ഇപ്പോൾ ഉയർന്ന ഉൽപാദനം, ഉയർന്ന MSPയിൽ കൂടുതൽ സംഭരണം, കുറഞ്ഞ ഇറക്കുമതി ആശ്രയത്വം, മെച്ചപ്പെട്ട വില സ്ഥിരത എന്നിവ പ്രതിഫലിപ്പിക്കുന്നു. MSPയിൽ പയർവർഗ്ഗങ്ങളുടെ സംഭരണം 7,350% വർദ്ധിച്ചു, 2009–14 കാലയളവിൽ 1.52 ലക്ഷം മെട്രിക് ടണ്ണിൽ നിന്ന് 2020–25 ൽ 82.98 ലക്ഷം മെട്രിക് ടണ്ണായി.

അതുപോലെ, കഴിഞ്ഞ 11 വർഷത്തിനിടെ MSPയിൽ എണ്ണക്കുരുക്കളുടെ സംഭരണം 1,500% ൽ അധികം വർദ്ധിച്ചു, ഇത് എണ്ണക്കുരു കർഷകർക്ക് ​ഗവൺമെന്റ് നൽകുന്ന ശക്തമായ പിന്തുണ വ്യക്തമാക്കുന്നു.

നെൽകൃഷിയും ഖാരിഫ് വിളകളും

നെല്ലിന്റെ സംഭരണവും ഗണ്യമായി വർദ്ധിച്ചു. 2004–14 കാലയളവിൽ, സംഭരണം 4,590 ലക്ഷം മെട്രിക് ടണ്ണായിരുന്നു, ഇത് 2014–25 ൽ 7,608 ലക്ഷം മെട്രിക് ടണ്ണായി ഉയർന്നു. 14 ഖാരിഫ് വിളകളുടെ സംയോജിത സംഭരണം 2004–14 ൽ 4,679 ലക്ഷം മെട്രിക് ടണ്ണിൽ നിന്ന് 2014–25 ൽ 7,871 ലക്ഷം മെട്രിക് ടണ്ണായി വർദ്ധിച്ചു.

കർഷകർക്ക് നൽകിയ MSP പേയ്‌മെന്റുകളിൽ ഈ വളർച്ച പ്രതിഫലിക്കുന്നു, നെല്ലിന് മാത്രം MSP പേയ്‌മെന്റുകൾ 2004–14 ൽ ₹4.44 ലക്ഷം കോടിയിൽ നിന്ന് 2014–25 ൽ ₹14.16 ലക്ഷം കോടിയായി വർദ്ധിച്ചു. അതുപോലെ, 14 ഖാരിഫ് വിളകളുടെയും പേയ്‌മെന്റുകളിൽ ഇതേ കാലയളവിൽ ₹4.75 ലക്ഷം കോടിയിൽ നിന്ന് ₹16.35 ലക്ഷം കോടിയായി ഉയർന്നു.

ഗോതമ്പ്

2024-25 ലെ റാബി മാർക്കറ്റിംഗ് സീസണിൽ (RMS) ഫുഡ് കോർപ്പറേഷൻ ഓഫ് ഇന്ത്യ (FCI) 266 ലക്ഷം മെട്രിക് ടൺ (LMT) ഗോതമ്പ് സംഭരിച്ചു, ഇത് മുൻ വർഷത്തെ 262 LMT സംഭരണത്തെ മറികടന്നു, കൂടാതെ RMS 2022-23 ൽ രേഖപ്പെടുത്തിയ 188 LMT യെക്കാൾ വളരെ കൂടുതലുമാണ്. ഈ നേട്ടം രാജ്യത്തിന്റെ ഭക്ഷ്യധാന്യ സ്വയംപര്യാപ്തത ഉറപ്പാക്കാൻ സഹായിച്ചു.

22 ലക്ഷത്തിലധികം കർഷകർക്ക് സംഭരണത്തിൽ നിന്ന് പ്രയോജനം ലഭിച്ചു, മിനിമം താങ്ങുവിലയിൽ (MSP) വാങ്ങിയ ഗോതമ്പിനുള്ള പേയ്‌മെന്റായി ഏകദേശം ₹0.61 ലക്ഷം കോടി നേരിട്ട് അവരുടെ ബാങ്ക് അക്കൗണ്ടുകളിലേക്ക് എത്തി.

ഭക്ഷ്യധാന്യങ്ങൾ (മൊത്തത്തിൽ)

മൊത്തത്തിൽ, ഭക്ഷ്യധാന്യങ്ങളുടെ സംഭരണം ക്രമാനുഗതമായി വർദ്ധിച്ചു. 2014–15 ൽ 761.40 ലക്ഷം മെട്രിക് ടണ്ണിൽ നിന്ന് 2024-25 ൽ (ജൂലൈ മുതൽ ജൂൺ വരെ) 1,175 ലക്ഷം മെട്രിക് ടണ്ണായി വർദ്ധിച്ചു. ഈ വർദ്ധന 1.84 കോടി കർഷകർക്ക് പ്രയോജനം ചെയ്തു. എം‌എസ്‌പി പേയ്‌മെന്റുകൾക്കുള്ള ചെലവ് മൂന്നിരട്ടിയിലധികം വർദ്ധിച്ചു, ₹1.06 ലക്ഷം കോടിയിൽ നിന്ന് ₹3.33 ലക്ഷം കോടിയായി.

കർഷക ആനുകൂല്യങ്ങൾ

MSPയിൽ സംഭരണം വർദ്ധിപ്പിച്ചതിന്റെ നേട്ടങ്ങൾ കർഷകരുടെ സാമ്പത്തിക സുരക്ഷ വർദ്ധിപ്പിക്കുന്നതിനും അവരുടെ വരുമാനം വർദ്ധിപ്പിക്കുന്നതിനും നേരിട്ട് കാരണമായി. MSP സംഭരണത്തിൽ നിന്ന് പ്രയോജനം നേടുന്ന കർഷകരുടെ എണ്ണം 2021–22 ൽ 1.63 കോടിയിൽ നിന്ന് 2024-25 (ജൂലൈ മുതൽ ജൂൺ വരെ) 1.84 കോടിയായി വർദ്ധിച്ചു. അതേ കാലയളവിൽ, കർഷകർക്ക് വിതരണം ചെയ്ത MSP തുകയും ഗണ്യമായി വർദ്ധിച്ചു, ₹2.25 ലക്ഷം കോടിയിൽ നിന്ന് ₹3.33 ലക്ഷം കോടിയായി. കർഷക പങ്കാളിത്തത്തിലും സംഭരണ ​​ചെലവിലുമുള്ള ഈ സുസ്ഥിര വർദ്ധനവ് കർഷകർക്ക് ന്യായമായ വരുമാനം ഉറപ്പാക്കുന്നതിനും അവരുടെ സാമ്പത്തിക സുരക്ഷ ശക്തിപ്പെടുത്തുന്നതിനുമുള്ള ​ഗവൺമെന്റിന്റെ പ്രതിബദ്ധതയെ പ്രതിഫലിപ്പിക്കുന്നു.

MSP സംഭരണത്തിലെ സാങ്കേതികവിദ്യയും സുതാര്യതയും

സുതാര്യത, കാര്യക്ഷമത, സുഗമമായ നടപ്പാക്കൽ എന്നിവ മെച്ചപ്പെടുത്തുന്നതിന് ​ഗവൺമെന്റ് നിരവധി ഡിജിറ്റൽ പ്ലാറ്റ്‌ഫോമുകൾ അവതരിപ്പിച്ചു:

താങ്ങുവില പ​ദ്ധതിക്ക് കീഴിൽ

ഇ-സമൃദ്ധി (NAFED വികസിപ്പിച്ചെടുത്തത്) ഇ-സംയുക്തി (NCCF വികസിപ്പിച്ചെടുത്തത്):

കർഷക രജിസ്ട്രേഷൻ മുതൽ പണമടയ്ക്കൽ വരെയുള്ള ​​പ്രക്രിയ സുഗമമാക്കുന്നു. കർഷകർ ആധാർ, ഭൂരേഖകൾ, ബാങ്ക് വിശദാംശങ്ങൾ, വിള വിവരങ്ങൾ എന്നിവ ഉപയോഗിച്ച് ഓൺലൈനായി രജിസ്റ്റർ ചെയ്യുന്നു. രജിസ്ട്രേഷന് ശേഷം, പദ്ധതിക്ക് കീഴിൽ കർഷകർക്ക് അവരുടെ വിളകൾ സംഭരിക്കുന്നതിന് അടുത്തുള്ള ഒരു സംഭരണ ​​കേന്ദ്രം തിരഞ്ഞെടുക്കാം, സന്ദർശനത്തിനായി ഡിജിറ്റൽ രീതിയിൽ ഷെഡ്യൂൾ ചെയ്ത സ്ലോട്ടുകൾ സ്വീകരിക്കാനും, അവരുടെ ബാങ്ക് അക്കൗണ്ടുകളിലേക്ക് നേരിട്ട് MSP പേയ്‌മെന്റുകൾ ക്രെഡിറ്റ് ചെയ്യാനും കഴിയും. അതുവഴി ഇടനിലക്കാരെയും കാലതാമസങ്ങളും ഇല്ലാതാക്കാം.

പരുത്തി സംഭരണത്തിന്

കപാസ് കിസാൻ ആപ്പ് (കോട്ടൺ കോർപ്പറേഷൻ ഓഫ് ഇന്ത്യ, ടെക്സ്റ്റൈൽസ് മന്ത്രാലയം വികസിപ്പിച്ചെടുത്തത്):

MSP പ്രകാരം പരുത്തി കർഷകർക്കായുള്ള മൊബൈൽ ആപ്പ്. ഇത് കർഷകർക്ക് സ്വയം രജിസ്റ്റർ ചെയ്യാനും സമയ സ്ലോട്ടുകൾ ബുക്ക് ചെയ്യാനും ഗുണനിലവാരം വിലയിരുത്താനും പേയ്‌മെന്റുകൾ പ്രോസസ്സ് ചെയ്യാനും, ബഹുഭാഷാ പിന്തുണ തിരഞ്ഞെടുക്കാനും സഹായിക്കുന്നു. വേഗതയേറിയതും സുതാര്യവുമായ സംഭരണം ഉറപ്പാക്കുന്നതിനൊപ്പം ഇത് ത് കാത്തിരിപ്പ് സമയവും പേപ്പർ വർക്കുകളും കുറയ്ക്കുകയും ചെയ്യുന്നു. 

ഉപസംഹാരം

018-19 മുതൽ കാർഷിക ഉൽപാദനച്ചെലവിന്റെ 50 ശതമാനമെങ്കിലും ലാഭം നൽകുകയെന്ന ലക്ഷ്യം ഉറപ്പാക്കിക്കൊണ്ട് കർഷകർക്ക് വരുമാന സുരക്ഷ നൽകുന്നത് MSP ഘടന തുടരുന്നു. കാലക്രമേണ, MSP പ്രകാരം കാർഷിക ഉൽപ്പന്നങ്ങളുടെ സംഭരണ ​​അളവ് വർദ്ധിപ്പിച്ചതിലൂടെയും MSP നിരക്കുകൾ വർദ്ധിപ്പിച്ചതിലൂടെ കർഷകർക്കുള്ള പേയ്‌മെന്റുകൾ വർദ്ധിപ്പിച്ചതിലൂടെയും കർഷകരുടെ MSP കവറേജ് വർദ്ധിപ്പിച്ചതിലൂടെയും ഇത് കൂടുതൽ ശക്തിപ്പെടുത്തിയിട്ടുണ്ട്. പയർവർഗ്ഗങ്ങൾ, എണ്ണക്കുരുക്കൾ, പോഷകസമൃദ്ധമായ ധാന്യങ്ങൾ എന്നിവയിലെ ഊന്നൽ, ലക്ഷ്യബോധമുള്ള സംഭരണം, ഡിജിറ്റൽ പരിഷ്കാരങ്ങൾ എന്നിവ ഇന്ത്യൻ കൃഷിയെ വികസിപ്പിക്കുകയും ഈ ഉൽപ്പന്നങ്ങളുടെ ഇറക്കുമതിയെ ആശ്രയിക്കുന്നത് കുറയ്ക്കുകയും ചെയ്തു. കർഷകർക്ക് സാമ്പത്തിക സുരക്ഷാ വലയം നൽകുന്നതിന് മാത്രമല്ല, എല്ലാ പ്രധാന വിളകളിലും ദേശീയ സ്വയംപര്യാപ്തത കൈവരിക്കുന്നതിനുള്ള ഒരു പ്രചോദനാത്മക ഘടകമായും ​ഗവൺമെന്റ് MSPയെ ഒരു ദീർഘകാല ഉപായമായും ഉപയോഗിക്കുന്നതിലേക്ക് ഇത് വിരൽ ചൂണ്ടുന്നു.

References:

Lok Sabha

• https://sansad.in/getFile/loksabhaquestions/annex/185/AU244_Z2R9zf.pdf?source=pqals

Rajya Sabha

• https://sansad.in/getFile/annex/267/AU510_fx52zx.pdf?source=pqars

Ministry of Agriculture and Farmers Welfare

• https://desagri.gov.in/wp-content/uploads/2025/08/MSP-Statement_English.pdf#:~:text=15%20Wheat%201975%202015%202125,4650%205050%205450%205650%205950
• https://www.agriwelfare.gov.in/Documents/HomeWhatsNew/AR_Eng_2024_25.pdf

APEDA

• https://apeda.gov.in/sites/default/files/study_reports/CRISIL_Agri_Dashboard_September_2025.pdf

PIB Press Releases

• https://www.pib.gov.in/Pressreleaseshare.aspx?PRID=1848719
• https://www.pib.gov.in/PressReleasePage.aspx?PRID=2148518
• https://www.pib.gov.in/PressReleasePage.aspx?PRID=2131986
• https://www.pib.gov.in/PressReleasePage.aspx?PRID=2065310
• https://www.pib.gov.in/PressReleasePage.aspx?PRID=2152556
• https://www.pib.gov.in/PressReleasePage.aspx?PRID=2112407
• https://www.pib.gov.in/PressReleasePage.aspx?PRID=2155528
• https://www.pib.gov.in/PressReleasePage.aspx?PRID=2104121
• https://www.pib.gov.in/PressReleasePage.aspx?PRID=1993155
• https://www.pib.gov.in/Pressreleaseshare.aspx?PRID=2115693
• https://www.pib.gov.in/PressReleasePage.aspx?PRID=2030483
• https://www.pib.gov.in/PressReleaseIframePage.aspx?PRID=2003184
• https://www.pib.gov.in/PressReleasePage.aspx?PRID=2158026
• https://www.pib.gov.in/PressReleasePage.aspx?PRID=2155528
• https://www.pib.gov.in/PressReleasePage.aspx?PRID=2163101
• https://www.pib.gov.in/PressReleasePage.aspx?PRID=2173567

PIB Backgrounder

• https://www.pib.gov.in/PressNoteDetails.aspx?NoteId=151901&ModuleId=3
• https://www.pib.gov.in/PressNoteDetails.aspx?ModuleId=3&NoteId=154580&utm_

PIB Factsheet

• https://www.pib.gov.in/FactsheetDetails.aspx?Id=149064#:~:text=The%20Minimum%20Support%20Price%20(MSP,more%20than%201.6%20crore%20farmers

Click here to see pdf

***