पत्र सूचना कार्यालय

ಒಂದು ಕಾಲದಲ್ಲಿ ಹಳ್ಳಿಯಲ್ಲಿ ತಿರುಗುತ್ತಿದ್ದ ಚರಕವು ರಾಷ್ಟ್ರೀಯತೆಯ ಮಾತನಾಡುತ್ತಿತ್ತು. ಇಂದು, ಆ ಸ್ಫೂರ್ತಿಯು ಬೆಳೆಯುತ್ತಿರುವ ಗ್ರಾಮೀಣ ಉದ್ಯಮಗಳ ಪರಿಸರ ವ್ಯವಸ್ಥೆಯ ಮೂಲಕ ಹೊಸ ರೂಪವನ್ನು ಪಡೆಯುತ್ತಿದೆ. ಜೇನುತುಪ್ಪ, ಗಿಡಮೂಲಿಕೆ ಉತ್ಪನ್ನಗಳು, ಬಾಳೆ ನಾರು, ಜವಳಿ ಮತ್ತು ಇತರ ಗ್ರಾಮೋದ್ಯೋಗಗಳು ಸಾಂಪ್ರದಾಯಿಕ ಕೌಶಲ್ಯಗಳಿಗೆ ಹೊಸ ಸಾಧ್ಯತೆಗಳನ್ನು ಸೃಷ್ಟಿಸುತ್ತಿವೆ.

ಸ್ವಾವಲಂಬನೆಯ ಸ್ಫೂರ್ತಿಯು 'ವೋಕಲ್ ಫಾರ್ ಲೋಕಲ್' (ಸ್ಥಳೀಯರಿಗಾಗಿ ಧ್ವನಿ) ಮತ್ತು 'ಆತ್ಮನಿರ್ಭರ ಭಾರತ' (ಸ್ವಾವಲಂಬಿ ಭಾರತ) ದೃಷ್ಟಿಕೋನದೊಂದಿಗೆ ಪ್ರತಿಧ್ವನಿಸುವುದನ್ನು ಮುಂದುವರೆಸಿದೆ. ಹಣಕಾಸು, ತಂತ್ರಜ್ಞಾನ ಮತ್ತು ತರಬೇತಿಯ ಪ್ರವೇಶದ ಮೂಲಕ ಸಾಂಪ್ರದಾಯಿಕ ಕೌಶಲ್ಯಗಳು ಮತ್ತು ಸ್ಥಳೀಯ ಸಂಪನ್ಮೂಲಗಳು ಹೊಸ ಮಾರುಕಟ್ಟೆಗಳನ್ನು ಕಂಡುಕೊಳ್ಳುತ್ತಿವೆ.

ಸ್ಥಳೀಯ ಉದ್ಯಮ ಮತ್ತು ಗ್ರಾಹಕರ ನಡುವಿನ ಈ ಬೆಳೆಯುತ್ತಿರುವ ನಂಟು 'ಖಾದಿ ಮಹೋತ್ಸವ'ದಲ್ಲೂ ಪ್ರತಿಫಲಿಸುತ್ತದೆ. ಖಾದಿ ಮಹೋತ್ಸವವು ಪ್ರತಿವರ್ಷ ಅಕ್ಟೋಬರ್ 2 ರಿಂದ ಅಕ್ಟೋಬರ್ 31 ರವರೆಗೆ ನಡೆಯುತ್ತದೆ. ಯುವಕರ ಮೇಲೆ ವಿಶೇಷ ಗಮನಹರಿಸುವುದರೊಂದಿಗೆ, ಈ ಅಭಿಯಾನವು ಅವರನ್ನು ಖಾದಿ ಮತ್ತು 'ವೋಕಲ್ ಫಾರ್ ಲೋಕಲ್' ಕಡೆಗೆ ಸಂವೇದನಾಶೀಲರನ್ನಾಗಿ ಮಾಡುತ್ತದೆ ಮತ್ತು ಖಾದಿ ಹಾಗೂ ಸ್ಥಳೀಯ ಉತ್ಪನ್ನಗಳನ್ನು ಖರೀದಿಸಲು ಸಾರ್ವಜನಿಕರನ್ನು ಉತ್ತೇಜಿಸುತ್ತದೆ.

ಈ ಪರಿವರ್ತನೆಯ ಕೇಂದ್ರಬಿಂದು 'ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ' ಆಗಿದೆ. ಇದು 1956 ರ ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ ಕಾಯ್ದೆಯಡಿಯಲ್ಲಿ ಸ್ಥಾಪಿಸಲಾದ ಒಂದು ಶಾಸನಬದ್ಧ ಸಂಸ್ಥೆಯಾಗಿದೆ. ಗ್ರಾಮೋದ್ಯೋಗಗಳನ್ನು ಯೋಜಿಸಲು, ಉತ್ತೇಜಿಸಲು, ಸುಲಭಗೊಳಿಸಲು, ಸಂಘಟಿಸಲು ಮತ್ತು ಸಹಾಯ ಮಾಡಲು ಕೆವಿಐಸಿ ಗೆ ಈ ಕಾಯಿದೆಯು ಅಧಿಕಾರ ನೀಡುತ್ತದೆ. ಇದು ತರಬೇತಿ, ಕಚ್ಚಾ ವಸ್ತುಗಳು, ಮಾರುಕಟ್ಟೆ, ಸಂಶೋಧನೆ ಮತ್ತು ಗುಣಮಟ್ಟ ಸುಧಾರಣೆಗೆ ಸಂಬಂಧಿಸಿದ ಕ್ರಮಗಳನ್ನು ಒಳಗೊಂಡಿದೆ. ಇದು ಖಾದಿ ಮತ್ತು ಗ್ರಾಮೋದ್ಯೋಗಗಳಿಗೆ ಸಂಬಂಧಿಸಿದ ತಾಂತ್ರಿಕ ಮಾಹಿತಿ ಮತ್ತು ಸೌಲಭ್ಯಗಳನ್ನು ಒದಗಿಸುವುದರ ಜೊತೆಗೆ ಕೌಶಲ್ಯ ಅಭಿವೃದ್ಧಿ ಮತ್ತು ಸಂಶೋಧನೆಗೂ ಬೆಂಬಲ ನೀಡುತ್ತದೆ.

2025-26 ರಲ್ಲಿ, ಖಾದಿ ಮತ್ತು ಗ್ರಾಮೋದ್ಯೋಗ ಉತ್ಪನ್ನಗಳ ಮಾರಾಟವು ದಾಖಲೆಯ 1.82 ಲಕ್ಷ ಕೋಟಿ ರೂ. ತಲುಪಿದೆ, ಇದು ದಾಖಲಾದ ಅತ್ಯಧಿಕ ಮಟ್ಟವಾಗಿದೆ (ಮೇ 2026 ರಂತೆ). 2013-14 ಗೆ ಹೋಲಿಸಿದರೆ, ಮಾರಾಟವು ಶೇಕಡಾ 501 ರಷ್ಟು ಬೆಳೆದರೆ, ಉತ್ಪಾದನೆಯು ಶೇಕಡಾ 380 ರಷ್ಟು ಹೆಚ್ಚಾಗಿ 1,25,296 ಕೋಟಿ ರೂ. ತಲುಪಿದೆ. ಈ ವಲಯದಲ್ಲಿ ಉದ್ಯೋಗವು ಶೇಕಡಾ ೫೬ ರಷ್ಟು ಹೆಚ್ಚಾಗಿ 2.04 ಕೋಟಿಗಳಿಗೆ ತಲುಪಿದೆ. ಕುಶಲಕರ್ಮಿಗಳಿಗೆ ನೀಡಲಾಗುವ ಸಂಭಾವನೆಯೂ ಹೆಚ್ಚಾಗಿದೆ. ಇದು 2013-14 ರಲ್ಲಿ ಪ್ರತಿ ಪೋಳಿಗೆ 4 ರೂ. ಇದ್ದದ್ದು ಪ್ರಸ್ತುತ ೧೫ ರೂ.ಗೆ ಏರಿದೆ, ಇದು ಸುಮಾರು ಶೇಕಡಾ 275 ರಷ್ಟು ಹೆಚ್ಚಳವಾಗಿದೆ.

ಗ್ರಾಮೀಣ ವ್ಯವಹಾರಗಳನ್ನು ನಿರ್ಮಿಸುವುದು, ಏಕಕಾಲಕ್ಕೆ ಒಬ್ಬ ಕುಶಲಕರ್ಮಿಯಂತೆ

ಕೌಶಲ್ಯಗಳನ್ನು ಪಡೆದುಕೊಳ್ಳುವುದರಿಂದ ಹಿಡಿದು ಮಾರುಕಟ್ಟೆಗಳನ್ನು ತಲುಪುವವರೆಗೆ, ಹಲವಾರು ಹಸ್ತಕ್ಷೇಪಗಳು ಕುಶಲಕರ್ಮಿಗಳು ಮತ್ತು ಗ್ರಾಮೋದ್ಯೋಗಗಳನ್ನು ಬೆಂಬಲಿಸುತ್ತಿವೆ.

ಕೆವಿಐಸಿಯು 35 ಸಾಂಸ್ಥಿಕ ಮತ್ತುೇತರ ತರಬೇತಿ ಕೇಂದ್ರಗಳ ಜಾಲವನ್ನು ಹೊಂದಿದೆ. ಈ ತರಬೇತಿಯು ಆಹಾರ ಉತ್ಪನ್ನಗಳು, ಬೇಕರಿ, ಜೇನುಸಾಕಣೆ, ಅಗರ್‌ಬತ್ತಿ, ಮೇಣದಬತ್ತಿಗಳು, ಮೋಟಾರ್ ದುರಸ್ತಿ ಮತ್ತು ಇತರ ಹಲವಾರು ಚಟುವಟಿಕೆಗಳನ್ನು ಒಳಗೊಂಡಿದೆ. 2025-26 ನೇ ಸಾಲಿನಲ್ಲಿ, ವಿವಿಧ ಕೆವಿಐಸಿ ತರಬೇತಿ ಕಾರ್ಯಕ್ರಮಗಳ ಅಡಿಯಲ್ಲಿ 79,682 ತರಬೇತಿದಾರರು ತರಬೇತಿ ಪಡೆದಿದ್ದಾರೆ.

ಖಾದಿ ವಲಯದಲ್ಲಿರುವ ಸುಮಾರು ಐದು ಲಕ್ಷ ಕುಶಲಕರ್ಮಿಗಳಲ್ಲಿ ಶೇಕಡಾ 80 ಕ್ಕಿಂತ ಹೆಚ್ಚು ಮಹಿಳೆಯರಿದ್ದಾರೆ. 2025-26 ರಲ್ಲಿ, 47,382 ಮಹಿಳೆಯರು ವಿವಿಧ ಕೆವಿಐಸಿ ಕಾರ್ಯಕ್ರಮಗಳ ಅಡಿಯಲ್ಲಿ ತರಬೇತಿ ಪಡೆದಿದ್ದಾರೆ, ಇದು ಒಟ್ಟು ತರಬೇತಿದಾರರ ಸುಮಾರು ಶೇಕಡಾ 59 ರಷ್ಟಿದೆ.

ತರಬೇತಿಯ ಜೊತೆಗೆ ಟೂಲ್‌ಕಿಟ್‌ಗಳು ಮತ್ತು ಉಪಕರಣಗಳ ವಿತರಣೆ, ಮಾರುಕಟ್ಟೆ ಬೆಂಬಲ ಮತ್ತು ಇತರ ಕ್ರಮಗಳು ಪೂರಕವಾಗಿವೆ.

2008 ರ ಮಾರ್ಚ್‌ನಿಂದ, ಪ್ರಧಾನ ಮಂತ್ರಿಯವರ ಉದ್ಯೋಗ ಸೃಷ್ಟಿ ಕಾರ್ಯಕ್ರಮವು (ಪಿಎಂಇಜಿಪಿ) ಕೆವಿಐಸಿ ಮೂಲಕ ಸುಮಾರು 97.95 ಲಕ್ಷ ಜನರಿಗೆ ಉದ್ಯೋಗ ಅವಕಾಶಗಳನ್ನು ಒದಗಿಸಿದೆ.

ಅಂತಹ ಒಬ್ಬ ಫಲಾನುಭವಿ ಶ್ರೀ ಜಿತೇಂದ್ರ ಬೈಠಾ ಅವರು, 2020 ರಲ್ಲಿ ಬಿಹಾರದಲ್ಲಿ ಬೇಕರಿ ಉತ್ಪನ್ನಗಳ ತಯಾರಿಕಾ ಘಟಕವನ್ನು ಸ್ಥಾಪಿಸಿದರು. ಅವರ ಉದ್ಯಮವು ವಾರ್ಷಿಕ 72 ಲಕ್ಷ ರೂ. ವಹಿವಾಟು ಹೊಂದಿದೆ ಮತ್ತು ಪ್ರಸ್ತುತ ಸ್ಥಳೀಯ ಸಮುದಾಯದ 20 ಜನರಿಗೆ ಉದ್ಯೋಗ ನೀಡುತ್ತಿದೆ.

ಬೆಂಬಲವು ಉದ್ಯಮದ ಹಣಕಾಸು ಹಾಗೂ ಉತ್ಪಾದನೆಗೆ ಅಗತ್ಯವಿರುವ ಉಪಕರಣಗಳು ಮತ್ತು ತಂತ್ರಜ್ಞಾನವನ್ನೂ ಒಳಗೊಂಡಿದೆ.

ಗ್ರಾಮೋದ್ಯೋಗ ವಿಕಾಸ ಯೋಚನೆಯು ಆಧುನಿಕ ಯಂತ್ರಗಳು, ಟೂಲ್‌ಕಿಟ್‌ಗಳು ಮತ್ತು ಉಪಕರಣಗಳನ್ನು ಒದಗಿಸುವ ಮೂಲಕ ಕುಶಲಕರ್ಮಿಗಳನ್ನು ಸಬಲೀಕರಣಗೊಳಿಸುತ್ತದೆ. 2025-26 ರ ಅವಧಿಯಲ್ಲಿ, ಇಂತಹ 37,769 ಯಂತ್ರಗಳು, ಟೂಲ್‌ಕಿಟ್‌ಗಳು ಮತ್ತು ಉಪಕರಣಗಳನ್ನು ವಿತರಿಸಲಾಗಿದೆ. ಕೆವಿಐಸಿ, ಈ ಯೋಜನೆಯಡಿಯಲ್ಲಿ 3.23 ಲಕ್ಷಕ್ಕೂ ಹೆಚ್ಚು ಯಂತ್ರಗಳು, ಟೂಲ್‌ಕಿಟ್‌ಗಳು ಮತ್ತು ಉಪಕರಣಗಳನ್ನು ವಿತರಿಸಿದೆ (ಮೇ 2026 ರಂತೆ).

ಈ ಪ್ರಯತ್ನಗಳಿಗೆ, ಖಾದಿ ಸಂಸ್ಥೆಗಳು ಮತ್ತು ಕುಶಲಕರ್ಮಿಗಳು ಕಾರ್ಯನಿರ್ವಹಿಸುವ ವಿಶಾಲವಾದ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವ ಕ್ರಮಗಳು ಪೂರಕವಾಗಿವೆ.

ಖಾದಿ ವಿಕಾಸ ಯೋಚನೆಯು ಖಾದಿ ಸಂಸ್ಥೆಗಳಿಗೆ ಉತ್ಪನ್ನಗಳನ್ನು ಸುಧಾರಿಸಲು, ಮೌಲ್ಯವರ್ಧನೆ ಮಾಡಲು ಮತ್ತು ಬದಲಾಗುತ್ತಿರುವ ಮಾರುಕಟ್ಟೆಯ ಬೇಡಿಕೆಗೆ ತಕ್ಕಂತೆ ಸ್ಪಂದಿಸಲು ಸಹಾಯ ಮಾಡುತ್ತದೆ. ಇದರ ಮಾರ್ಪಡಿಸಿದ ಮಾರುಕಟ್ಟೆ ಅಭಿವೃದ್ಧಿ ಸಹಾಯವು ಮೌಲ್ಯವರ್ಧನೆ ಮತ್ತು ಮಾರುಕಟ್ಟೆ ಆಧಾರಿತ ಬೆಲೆ ನಿರ್ಣಯಕ್ಕಾಗಿ ಹೆಚ್ಚಿನ ನಮ್ಯತೆಯನ್ನು ಒದಗಿಸುತ್ತದೆ. 2024-25 ರ ಅವಧಿಯಲ್ಲಿ, 1,097 ಖಾದಿ ಸಂಸ್ಥೆಗಳಿಗೆ 245 ಕೋಟಿ ರೂ.ಗಳನ್ನು ವಿತರಿಸಲಾಗಿದ್ದು, 1,45,484 ಕುಶಲಕರ್ಮಿಗಳಿಗೆ ಪ್ರಯೋಜನವಾಗಿದೆ.

ಕೈಗೆಟುಕುವ ಸಾಲದ ಲಭ್ಯತೆಯು ಮತ್ತೊಂದು ಹಂತದ ಬೆಂಬಲವನ್ನು ನೀಡುತ್ತದೆ. ಬಡ್ಡಿ ಸಹಾಯಧನ ಅರ್ಹತಾ ಪ್ರಮಾಣಪತ್ರ ಯೋಜನೆಯಡಿಯಲ್ಲಿ, ಅರ್ಹ ಖಾದಿ ಸಂಸ್ಥೆಗಳು ವಾರ್ಷಿಕ ಶೇಕಡಾ 4 ರ ರಿಯಾಯಿತಿ ಬಡ್ಡಿ ದರದಲ್ಲಿ ಸಾಲವನ್ನು ಪಡೆಯಬಹುದು.

ಕುಶಲಕರ್ಮಿಗಳಿಗೆ, ಅವರ ಕೆಲಸ ಮಾಡುವ ಸ್ಥಳವು ಸಹ ಮುಖ್ಯವಾಗಿದೆ. ವರ್ಕ್‌ಶೆಡ್ ಯೋಜನೆಯು ಸುಧಾರಿತ ಉತ್ಪಾದನಾ ಸ್ಥಳಗಳು ಮತ್ತು ಹೆಚ್ಚು ಅನುಕೂಲಕರವಾದ ಕೆಲಸದ ವಾತಾವರಣವನ್ನು ಒದಗಿಸುತ್ತದೆ. 2025-26 ರಲ್ಲಿ, ಡಿಸೆಂಬರ್ 2025 ರವರೆಗೆ, 1,309 ಕುಶಲಕರ್ಮಿಗಳು ಈ ಯೋಜನೆಯಡಿಯಲ್ಲಿ ಪ್ರಯೋಜನ ಪಡೆದಿದ್ದಾರೆ.

ಈ ಕ್ರಮಗಳು ಕುಶಲಕರ್ಮಿಗಳಿಗೆ ಸುಧಾರಿತ ಕೆಲಸದ ಪರಿಸ್ಥಿತಿಗಳು ಮತ್ತು ಉತ್ಪಾದನೆಗೆ ಸಂಪನ್ಮೂಲಗಳ ಪ್ರವೇಶದೊಂದಿಗೆ ಬೆಂಬಲ ನೀಡುತ್ತವೆ.

ಗ್ರಾಮೀಣ ಉದ್ಯಮಗಳಿಂದ ವಿಶಾಲ ಮಾರುಕಟ್ಟೆಗಳವರೆಗೆ

ಗ್ರಾಮೀಣ ಉದ್ಯಮಗಳಾದ್ಯಂತ, ತಂತ್ರಜ್ಞಾನ, ತರಬೇತಿ ಮತ್ತು ಮಾರುಕಟ್ಟೆ ಸಂಪರ್ಕಗಳಿಂದ ಬೆಂಬಲಿತವಾಗಿ, ಸಾಂಪ್ರದಾಯಿಕ ಕೌಶಲ್ಯಗಳು ಮತ್ತು ಸ್ಥಳೀಯ ಸಂಪನ್ಮೂಲಗಳನ್ನು ಹೊಸ ವ್ಯವಹಾರಗಳು ಮತ್ತು ಉತ್ಪನ್ನಗಳಾಗಿ ಅಭಿವೃದ್ಧಿಪಡಿಸಲಾಗುತ್ತಿದೆ. ಸಂಶೋಧನೆ ಮತ್ತು ಅಭಿವೃದ್ಧಿ ಪ್ರಯತ್ನಗಳು ಉತ್ಪಾದಕತೆ, ಗುಣಮಟ್ಟ ಮತ್ತು ಸ್ಪರ್ಧಾತ್ಮಕತೆಯನ್ನು ಬಲಪಡಿಸುತ್ತಿವೆ.

ಶ್ರೀ ಎಸ್.ಪಿ. ಸಿಂಗ್ ಅವರು ಕೆವಿಐಸಿ ಮೂಲಕ ಪಿಎಂಇಜಿಪಿ ಯೋಜನೆಯ ಬೆಂಬಲದೊಂದಿಗೆ ಜೇನುತುಪ್ಪ ಮತ್ತು ಕುಕೀಸ್ ಸುತ್ತ ತಮ್ಮ ಉದ್ಯಮವನ್ನು ನಿರ್ಮಿಸಿದರು. ಪಂಜಾಬ್‌ನಲ್ಲಿರುವ ಅವರ ವ್ಯವಹಾರವು ಈಗ ಸುಮಾರು 200 ಕಾರ್ಮಿಕರಿಗೆ ಉದ್ಯೋಗ ನೀಡುತ್ತಿದೆ ಮತ್ತು ತನ್ನ ಉತ್ಪನ್ನಗಳನ್ನು ಅಂತರರಾಷ್ಟ್ರೀಯ ಮಾರುಕಟ್ಟೆಗಳಿಗೆ ರಫ್ತು ಮಾಡುತ್ತಿದೆ. ಜೇನುತುಪ್ಪ ಮತ್ತು ಕುಕೀಸ್ ಇದರ ಪ್ರಮುಖ ಉತ್ಪನ್ನಗಳಾಗಿವೆ, ರಫ್ತಿನಲ್ಲಿ ಅಮೆರಿಕ ಸಂಯುಕ್ತ ಸಂಸ್ಥಾನವು ದೊಡ್ಡ ಪಾಲನ್ನು ಹೊಂದಿದೆ.

2010 ರಲ್ಲಿ ಬೆಂಬಲವನ್ನು ಪಡೆದ ನಂತರ, ಉದ್ಯಮವು ಅಂತರರಾಷ್ಟ್ರೀಯ ಪ್ರದರ್ಶನಗಳಲ್ಲಿ ಭಾಗವಹಿಸುವ ಮೂಲಕ ಕ್ರಮೇಣ ತನ್ನ ರಫ್ತು ಉಪಸ್ಥಿತಿಯನ್ನು ವಿಸ್ತರಿಸಿತು. ದುಬೈ, ಅಮೆರಿಕ ಮತ್ತು ಮಧ್ಯಪ್ರಾಚ್ಯದಾದ್ಯಂತದ ಪ್ರದರ್ಶನಗಳಲ್ಲಿ ಭಾಗವಹಿಸಲು ಕೆವಿಐಸಿ ಅನುಕೂಲ ಕಲ್ಪಿಸಿತು, ಇದು ಉದ್ಯಮಕ್ಕೆ ಸಾಗರೋತ್ತರ ಖರೀದಿದಾರರೊಂದಿಗೆ ಸಂಪರ್ಕ ಸಾಧಿಸಲು ಸಹಾಯ ಮಾಡಿತು. ಇಂದು, ಈ ವ್ಯವಹಾರವು 36 ದೇಶಗಳಿಗೆ ರಫ್ತು ಮಾಡುತ್ತದೆ ಮತ್ತು ಯುರೋಪಿಯನ್ ಮಾರುಕಟ್ಟೆಗಳಿಗೆ ಜೇನುತುಪ್ಪದ ರಫ್ತನ್ನು ವಿಸ್ತರಿಸಲು ಪಂಜಾಬ್‌ನ ರಾಜ್‌ಪುರದಲ್ಲಿ ಎರಡನೇ ಘಟಕವನ್ನು ಅಭಿವೃದ್ಧಿಪಡಿಸುತ್ತಿದೆ.

ಶ್ರೀ ಬಿ. ಸುಂದರರಾಜ್ ಅವರಿಗೆ, ನೈಸರ್ಗಿಕವಾಗಿ ಪರಿಮಳಯುಕ್ತ ಸಸ್ಯವೊಂದು ಗ್ರಾಮ ಉದ್ಯಮಕ್ಕೆ ಬುನಾದಿಯಾಯಿತು. ತಮ್ಮ ಅಗರ್‌ಬತ್ತಿ ಘಟಕದ ಮೂಲಕ, ಅವರು ಅಗರ್‌ಬತ್ತಿ, ಗಿಡಮೂಲಿಕೆ ಉತ್ಪನ್ನಗಳು, ವೆಟಿವರ್ (ಲಾವಂಚ) ಅಗರ್‌ಬತ್ತಿ ಮತ್ತು ವೆಟಿವರ್ ಸಾಂಬ್ರಾಣಿಯನ್ನು ಉತ್ಪಾದಿಸುತ್ತಾರೆ. 2024-25 ರ ಅವಧಿಯಲ್ಲಿ ಗ್ರಾಮೋದ್ಯೋಗ ವಿಕಾಸ ಯೋಚನೆಯ ಅಡಿಯಲ್ಲಿ ಸಿಕ್ಕ ಬೆಂಬಲದೊಂದಿಗೆ, ಅವರು ತಮ್ಮ ಉತ್ಪಾದನಾ ಸಾಮರ್ಥ್ಯಗಳನ್ನು ಬಲಪಡಿಸಿಕೊಂಡರು ಮತ್ತು ತಮ್ಮ ಉತ್ಪನ್ನಗಳ ಶ್ರೇಣಿಯನ್ನು ವೈವಿಧ್ಯಗೊಳಿಸಿದರು. ಇದು ಸ್ಥಳೀಯವಾಗಿ ಲಭ್ಯವಿರುವ ಸಂಪನ್ಮೂಲದಿಂದ ಬಹು ಮೌಲ್ಯವರ್ಧಿತ ಉತ್ಪನ್ನಗಳನ್ನು ಅಭಿವೃದ್ಧಿಪಡಿಸಲು ಅವರಿಗೆ ಸಹಾಯ ಮಾಡುತ್ತದೆಕೆವಿಐಸಿ ಬೆಂಬಲವು ಸಾಂಪ್ರದಾಯಿಕ ಜ್ಞಾನ ಮತ್ತು ಸ್ಥಳೀಯ ಸಂಪನ್ಮೂಲಗಳನ್ನು ಮಾರುಕಟ್ಟೆಯಲ್ಲಿ ಮಾರಾಟ ಮಾಡಬಹುದಾದ ಗ್ರಾಮ ಉದ್ಯಮ ಉತ್ಪನ್ನಗಳಾಗಿ ಹೇಗೆ ಪರಿವರ್ತಿಸಬಹುದು ಎಂಬುದಕ್ಕೆ ಅವರ ಉದ್ಯಮವು ಉದಾಹರಣೆಯಾಗಿದೆ.

ಹಿಮಾಚಲ ಪ್ರದೇಶದ ಸೋಲಾನ್ ಜಿಲ್ಲೆಯ ಜಟ್ಟಿ ಮಜ್ರಾ ಗ್ರಾಮದಲ್ಲಿ, ಶ್ರೀ ಸಾಹಿಲ್ ಚೌಧರಿ ಅವರು ಮೊನೊ-ಕಾರ್ಟನ್ ತಯಾರಿಕಾ ಘಟಕವನ್ನು ನಡೆಸುತ್ತಿದ್ದಾರೆ. ಈ ಉದ್ಯಮವು ಈ ಪ್ರದೇಶದಲ್ಲಿನ ನಿರ್ಮಾಣ ಮತ್ತು ಪ್ಯಾಕೇಜಿಂಗ್ ಅವಶ್ಯಕತೆಗಳನ್ನು ಪೂರೈಸುತ್ತದೆ. 25 ಲಕ್ಷ ರೂ. ಯೋಜನಾ ವೆಚ್ಚದೊಂದಿಗೆ ಸ್ಥಾಪಿಸಲಾದ ಈ ಘಟಕವು ಕೆವಿಐಸಿ-ಬೆಂಬಲಿತ ಪಿಎಂಇಜಿಪಿ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತದೆ.

ಈ ಉದ್ಯಮವು ಈಗ ಸುಮಾರು 45 ಲಕ್ಷ ರೂ.ಗಳ ವಾರ್ಷಿಕ ವಹಿವಾಟನ್ನು ದಾಖಲಿಸುತ್ತಿದೆ ಮತ್ತು 23 ಜನರಿಗೆ ಉದ್ಯೋಗ ಒದಗಿಸುತ್ತಿದೆ. ಈ ಹಣಕಾಸಿನ ನೆರವು ಚೌಧರಿಯವರ ಉದ್ಯಮಶೀಲತೆಯ ಕಲ್ಪನೆಯನ್ನು ಕಾರ್ಯನಿರ್ವಹಿಸುವ ಉತ್ಪಾದನಾ ಉದ್ಯಮವಾಗಿ ಪರಿವರ್ತಿಸಲು ಸಹಾಯ ಮಾಡಿತು. ಸ್ಥಳೀಯ ಉದ್ಯಮಶೀಲತೆಯು ಸ್ವಾವಲಂಬನೆ, ಉದ್ಯೋಗ ಮತ್ತು 'ಆತ್ಮನಿರ್ಭರ ಭಾರತ'ದ ವಿಶಾಲ ದೃಷ್ಟಿಕೋನಕ್ಕೆ ಹೇಗೆ ಕೊಡುಗೆ ನೀಡಬಹುದು ಎಂಬುದನ್ನು ಅವರ ಪ್ರಯಾಣವು ವಿವರಿಸುತ್ತದೆ.

ಗ್ರಾಮೀಣ ಉದ್ಯಮಗಳಿಗೆ ಹೊಸ ಮಾರುಕಟ್ಟೆಗಳನ್ನು ತೆರೆಯುವುದು

ಗ್ರಾಹಕರನ್ನು ತಲುಪಲು ಕೆವಿಐಸಿ ಡಿಜಿಟಲ್ ಮತ್ತು ಭೌತಿಕ ಎರಡೂ ಚಾನಲ್‌ಗಳನ್ನು ವಿಸ್ತರಿಸಿದೆ. ಇದು ಆನ್‌ಲೈನ್ ಖಾದಿ ಇಂಡಿಯಾ ಮಳಿಗೆಯನ್ನು (www.khadiindia.gov.in) ಹೊಂದಿದೆ, ಇದು ಬಟ್ಟೆ ಮತ್ತು ಫ್ಯಾಬ್ರಿಕ್‌ಗಳು, ದಿನಸಿ, ಸೌಂದರ್ಯ ಉತ್ಪನ್ನಗಳು, ಸಾರಭೂತ ತೈಲಗಳು, ಸುಗಂಧ ದ್ರವ್ಯಗಳು ಮತ್ತು ಧೂಪದ್ರವ್ಯಗಳನ್ನು ಒಳಗೊಂಡಂತೆ ವಿವಿಧ ಉತ್ಪನ್ನಗಳನ್ನು ನೀಡುತ್ತದೆ.

ಖಾದಿ ಇಂಡಿಯಾ ಬ್ರ್ಯಾಂಡ್‌ಗೆ ಮೀಸಲಾದ ಪ್ರಚಾರ ಮತ್ತು ಮಾರುಕಟ್ಟೆ ಉಪಕ್ರಮಗಳು ಮೂಲಕ ಬೆಂಬಲ ನೀಡಲಾಗುತ್ತದೆ. ಈ ಪ್ರಯತ್ನಗಳು ಸಾಂಪ್ರದಾಯಿಕ ಉತ್ಪನ್ನಗಳನ್ನು ಇಂದಿನ ಆಧುನಿಕ ಗ್ರಾಹಕರೊಂದಿಗೆ ಸಂಪರ್ಕಿಸುತ್ತವೆ. ಮಾರುಕಟ್ಟೆ ಜಾಲವು ದೇಶಾದ್ಯಂತ ಹಬ್ಬಿದೆ. ಇದು 8 ಇಲಾಖಾ ಖಾದಿ ಇಂಡಿಯಾ ಮಾರಾಟ ಮಳಿಗೆಗಳು ಮತ್ತು 15 ಕೆವಿಐಸಿ ಶಾಖೆಗಳನ್ನು ಒಳಗೊಂಡಿದೆ. ಖಾದಿ ಸಂಸ್ಥೆಗಳು ದೇಶಾದ್ಯಂತ ಮತ್ತೊಂದು 8,035 ಮಾರಾಟ ಮಳಿಗೆಗಳನ್ನು ನಿರ್ವಹಿಸುತ್ತವೆ.

ರಾಷ್ಟ್ರೀಯ, ವಲಯ, ರಾಜ್ಯ ಮತ್ತು ಜಿಲ್ಲಾ ಮಟ್ಟದ ಪ್ರದರ್ಶನಗಳು ಹೆಚ್ಚುವರಿ ಮಾರುಕಟ್ಟೆ ಅವಕಾಶಗಳನ್ನು ಒದಗಿಸುತ್ತವೆ. ಕೆವಿಐಸಿ ದೇಶೀಯ ಮತ್ತು ಅಂತರರಾಷ್ಟ್ರೀಯ ವ್ಯಾಪಾರ ಮೇಳಗಳಲ್ಲಿ ಭಾಗವಹಿಸುವಿಕೆಯನ್ನೂ ಉತ್ತೇಜಿಸುತ್ತದೆ.

ಪರಂಪರೆಯಿಂದ ಅವಕಾಶದವರೆಗೆ

ಖಾದಿ ಮತ್ತು ಗ್ರಾಮೋದ್ಯೋಗಗಳ ಬೆಳವಣಿಗೆಯು ಹೆಚ್ಚಿನ ಉತ್ಪಾದನೆ ಮತ್ತು ಮಾರಾಟ, ವಿಸ್ತರಿಸುತ್ತಿರುವ ಉದ್ಯೋಗ, ಕುಶಲಕರ್ಮಿಗಳ ಹೆಚ್ಚಿದ ಸಂಭಾವನೆ ಮತ್ತು ಹೊಸ ಗ್ರಾಮೀಣ ಉದ್ಯಮಗಳಲ್ಲಿ ಪ್ರತಿಫಲಿಸುತ್ತದೆ. ಸಾಂಪ್ರದಾಯಿಕ ಕೌಶಲ್ಯಗಳು ತಂತ್ರಜ್ಞಾನ, ಹಣಕಾಸು ಮತ್ತು ಮಾರುಕಟ್ಟೆಗಳೊಂದಿಗೆ ಸಂಪರ್ಕ ಸಾಧಿಸುತ್ತಿದ್ದಂತೆ, ಈ ವಲಯವು ಗ್ರಾಮೀಣ ಭಾರತದಾದ್ಯಂತ ಉದ್ಯಮಗಳಿಗೆ ಹೊಸ ಮಾರ್ಗಗಳನ್ನು ತೆರೆಯುವುದನ್ನು ಮುಂದುವರೆಸಿದೆ.

References

Ministry of Micro, Small and Medium Enterprise

https://www.msme.gov.in/static/uploads/2026/05/1bfda06b460e72543530b40817573495.pdf?_gl=1*ijpb14*_ga*ODgwMjkyOTQyLjE3ODI2NTg1OTM.*_ga_4858QHF08F*czE3ODI5NzE5MzUkbzIkZzEkdDE3ODI5NzIzNzgkajUzJGwwJGgw

https://www.kvic.gov.in/kvicres/aboutkvic.php

https://www.pib.gov.in/PressReleasePage.aspx?PRID=2265369&reg=48&lang=2

https://www.pib.gov.in/PressReleaseDetail.aspx?PRID=2307332&reg=3&lang=1

https://x.com/kvicindia/

https://www.pib.gov.in/PressReleasePage.aspx?PRID=2224092&reg=3&lang=1

Others

https://www.coek.in/events

https://innovateindia.mygov.in/khadi-mahotsav/

https://www.facebook.com/kvicindia/posts/from-a-young-entrepreneur-in-himachal-pradesh-to-a-thriving-business-ownersahil-/1519536520217135/

https://www.youtube.com/watch?v=QzwX93saslI

Click here for pdf file. 

*****