पत्र सूचना कार्यालय

മഴ പെയ്യുന്നതിന് മുമ്പ് നഗരങ്ങൾ സജ്ജമാകുന്നു

മൺസൂൺ അടുത്തുവരികയും ആദ്യ മഴ പെയ്യുകയും ചെയ്യുമ്പോൾ വെള്ളക്കെട്ട്, മാലിന്യക്കൂമ്പാരം, ശുചിത്വമില്ലായ്മ എന്നിവയുമായി ബന്ധപ്പെട്ട കാലാനുസൃതമായ അപകടസാധ്യതകൾ പരിഹരിക്കുന്നതിനുള്ള തയ്യാറെടുപ്പുകൾ ഇന്ത്യയിലുടനീളമുള്ള നഗരങ്ങളിൽ ആരംഭിക്കുന്നു. ഓടകൾ ശുചീകരിക്കുകയും അപകടസാധ്യതയുള്ള സ്ഥലങ്ങൾ തിരിച്ചറിയുകയും ശുചിത്വവും പൊതുജനാരോഗ്യവും സംരക്ഷിക്കുന്നതിനുള്ള നടപടികൾ കൈക്കൊള്ളുകയും ചെയ്യുന്നു. കേന്ദ്ര ഭവന, നഗരകാര്യ മന്ത്രാലയം നയിക്കുന്ന 'സഫായി അപ്നാവോ, ബിമാരി ഭഗാവോ 2025' (SABB) പ്രചാരണത്തിന് കീഴിൽ നഗര പ്രാദേശിക ഭരണകൂടങ്ങൾ പ്രീ-മൺസൂൺ തയ്യാറെടുപ്പുകളെ ഏകോപിത ശുചിത്വ, പൊതുജനാരോഗ്യ പ്രവർത്തനങ്ങളാക്കി മാറ്റി. 2025 ജൂലൈ 1 മുതൽ ജൂലൈ 31 വരെ നഗരങ്ങൾ ഓട ശുചീകരണം, മാലിന്യ നിർമ്മാർജ്ജനം, ശുചിത്വ പ്രചാരണം എന്നിവ ഏറ്റെടുക്കുകയും സ്‌കൂളുകൾ, അയൽപക്കങ്ങൾ, മറ്റ് പൊതുയിടങ്ങൾ എന്നിവ വഴി പൊതുജനങ്ങളെ ഇതിൽ പങ്കാളികളാക്കുകയും ചെയ്തു.

ഈ പ്രചാരണത്തിന്റെ കേന്ദ്രബിന്ദു 6 സ്വച്ഛതാ മന്ത്രങ്ങളാണ്: കൈകൾ, വീടുകൾ, അയൽപക്കങ്ങൾ, ശൗചാലയങ്ങൾ, ഓടകൾ, പൊതുയിടങ്ങൾ എന്നിവ വൃത്തിയായി സൂക്ഷിക്കുക. ഈ ലളിതമായ ശീലങ്ങളെല്ലാം മൺസൂൺ കാലം കൂടുതൽ സുരക്ഷിതവും ആരോഗ്യകരവുമാക്കാൻ നഗരങ്ങളിലുടനീളം നടത്തുന്ന വലിയൊരു ശ്രമത്തിന്റെ ഭാഗമായി മാറുകയാണ്. രാജ്യത്തുടനീളം ഈ പ്രവർത്തനം വ്യത്യസ്തങ്ങളായ നിരവധി രൂപങ്ങൾ കൈക്കൊള്ളുന്നു.

ഡൽഹിയിൽ പ്രചാരണം അതിന്റെ സന്ദേശം തെരുവുകളിലേക്കും സ്‌കൂളുകളിലേക്കും എത്തിച്ചു. 400 NCC പെൺ കേഡറ്റുകൾ മൺസൂൺ ശുചിത്വവും പരിപാലനവും പ്രോത്സാഹിപ്പിക്കുന്ന 3 കിലോമീറ്റർ ദൈർഘ്യമുള്ള പിങ്കത്തോൺ വാക്കത്തോണിന് നേതൃത്വം നൽകി. 255 സ്‌കൂളുകളിൽ കൈ കഴുകൽ യജ്ഞങ്ങൾ ഉൾപ്പെടെയുള്ള കാര്യക്ഷമമായ ഫീൽഡ് തല പ്രവർത്തനങ്ങൾക്ക് ഈ പ്രചാരണം സാക്ഷ്യം വഹിച്ചു. അതേസമയം 206 ശുചീകരണ യജ്ഞങ്ങൾ ഇടവഴികളെയും മാലിന്യ നിക്ഷേപത്തിന് സാധ്യതയുള്ള ഇടങ്ങളെയും (GVP) ലക്ഷ്യമിട്ട് നടപ്പിലാക്കി. കമ്മ്യൂണിറ്റി, പബ്ലിക് ശൗചാലയങ്ങളിൽ 469 ശുചിത്വ യജ്ഞങ്ങൾ വേറെയും നടപ്പാക്കി. വേഗത്തിലുള്ള ഓൺ-സൈറ്റ് മാൻഹോൾ അറ്റകുറ്റപ്പണികളിലൂടെ നഗര സുരക്ഷയും ശുചിത്വവും വർധിപ്പിക്കുന്നതിനായി പട്ന മുനിസിപ്പൽ കോർപ്പറേഷൻ (PMC) മാൻഹോൾ ആംബുലൻസുകൾ അവതരിപ്പിച്ചു. ഓരോ ആംബുലൻസിലും മുൻകൂട്ടി നിർമ്മിച്ച മാൻഹോൾ അടപ്പുകൾ, അറ്റകുറ്റപ്പണിക്കുള്ള ഉപകരണങ്ങൾ, അടിയന്തര നടപടി സ്വീകരിക്കുന്നതിനായുള്ള പ്രത്യേക റെസ്‌പോൺസ് ടീം എന്നിവ സജ്ജീകരിച്ചിട്ടുണ്ട് (പ്രത്യേകിച്ച് മഴക്കാലത്ത്). പഴയതും ഉപയോഗിക്കാത്തതുമായ മുനിസിപ്പൽ വാഹനങ്ങളെ പട്ന മുനിസിപ്പൽ കോർപ്പറേഷൻ പ്രവർത്തനക്ഷമമായ യൂണിറ്റുകളാക്കി മാറ്റുകയായിരുന്നു. ഒരു മുനിസിപ്പൽ സോണിൽ ഒന്നുവീതം ആറ് ആംബുലൻസുകൾ ഇപ്പോൾ പ്രവർത്തനക്ഷമമാണ്. തത്സമയ പരാതി പരിഹാരത്തിനായി ഇവ പട്ന മുനിസിപ്പൽ കോർപ്പറേഷന്റെ സെൻട്രൽ കൺട്രോൾ റൂമുമായി ബന്ധിപ്പിച്ചിരിക്കുന്നു. ഈ സംരംഭം ജനകേന്ദ്രീകൃത പരാതി പരിഹാരം സാധ്യമാക്കുകയും മാൻഹോൾ സംബന്ധമായ പരാതികളിൽ വേഗത്തിലുള്ള മറുപടി ഉറപ്പാക്കുകയും ചെയ്യുന്നു.

നവി മുംബൈയിൽ 600-ലധികം വിദ്യാർത്ഥികൾ, രക്ഷിതാക്കൾ, അധ്യാപകർ, പൗരന്മാർ എന്നിവരുടെ പങ്കാളിത്തത്തോടെ ഒരു സ്വച്ഛതാ റാലി സംഘടിപ്പിച്ചു. അതേസമയം മലേറിയ, ഡെങ്കിപ്പനി തടയുന്നതിൽ ശ്രദ്ധ കേന്ദ്രീകരിച്ച് 26 അർബൻ പ്രൈമറി ഹെൽത്ത് സെന്ററുകളിലായി ആരോഗ്യ ബോധവൽക്കരണ ക്യാമ്പുകൾ നടത്തി. രണ്ട് ദിവസങ്ങളിലായി 52 ആരോഗ്യ ക്യാമ്പുകൾ സംഘടിപ്പിക്കുകയും 22,690-ലധികം പൗരന്മാരിലേക്ക് എത്താൻ സാധിക്കുകയും ചെയ്തു. തെലങ്കാനയിൽ ഈ പ്രചാരണം ഏകദേശം 13 ലക്ഷം വീടുകളിൽ എത്തിച്ചേർന്നു. 14,210 കിലോമീറ്ററോളം വരുന്ന ഓടകൾ വൃത്തിയാക്കുകയും 4,343 കിലോമീറ്റർ റോഡരികിലെ കാടുകൾ വെട്ടിത്തെളിക്കുകയും ചെയ്തു. ഡെങ്കിപ്പനി, മലേറിയ ബോധവൽക്കരണ യജ്ഞങ്ങളിലൂടെ ഏകദേശം 2.5 ലക്ഷം വീടുകൾ ഉൾപ്പെടുത്തി. ആരോഗ്യ ക്യാമ്പുകൾ 8,500-ലധികം മുൻനിര ശുചിത്വ തൊഴിലാളികൾക്കും പ്രയോജനം ചെയ്തു. അതേസമയം സ്‌കൂളുകളിൽ 140 കമ്പോസ്റ്റിംഗ് കുഴികൾ സ്ഥാപിച്ചു. ഇത് മാലിന്യത്തെ വളമാക്കി മാറ്റാൻ ചെറുപ്പക്കാരായ പൗരന്മാരെ പ്രോത്സാഹിപ്പിച്ചു.

ഛത്തീസ്ഗഡിൽ ഈ കഥ തുടങ്ങുന്നത് ജനങ്ങളിൽ നിന്നാണ്. പണ്ഡരിയയിൽ സ്വാശ്രയ സംഘാംഗങ്ങൾക്ക് ശുചിത്വ പരിശീലനം നൽകുകയും സ്വച്ഛത ആപ്പ് പരിചയപ്പെടുത്തുകയും ചെയ്തു. തുടർന്ന് അവർ ശുചിത്വ യജ്ഞത്തിലും പങ്കെടുത്തു. റായ്പൂരിൽ വാതിൽപടിയായുള്ള ബോധവൽക്കരണം കൈകളുടെ ശുചിത്വവും മാലിന്യ വേർതിരിക്കലും പ്രോത്സാഹിപ്പിച്ചു. അതേസമയം മാലിന്യ നിക്ഷേപത്തിന് സാധ്യതയുള്ള ഇടങ്ങൾ (GVP) വൃത്തിയാക്കുകയും മനോഹരമാക്കുകയും ചെയ്തു.

കൂടുതൽ വൃത്തിയും സുരക്ഷിതവുമായ ഒരു മൺസൂണിനായി വടക്കുകിഴക്കൻ സംസ്ഥാനങ്ങൾ ഒന്നിക്കുന്നു

മൺസൂൺ അടുത്തുവരുമ്പോൾ മഴയ്ക്കായി കാത്തിരിക്കുകയല്ല, മറിച്ച് അതിനായി തയ്യാറെടുക്കുകയാണ് വടക്കുകിഴക്കൻ സംസ്ഥാനങ്ങൾ ചെയ്യുന്നത്. അരുണാചൽ പ്രദേശ്, നാഗാലാൻഡ്, അസം, സിക്കിം, ത്രിപുര എന്നിവിടങ്ങളിലുടനീളം മന്ത്രാലയം (MoHUA) നയിക്കുന്ന SABB പ്രചാരണം കൂട്ടായ ശുചിത്വത്തിലൂടെയും രോഗ പ്രതിരോധത്തിലൂടെയും മൺസൂൺ തയ്യാറെടുപ്പുകൾ ശക്തമാക്കുന്നു.

നാഗാലൻഡിൽ ആറ് പട്ടണങ്ങളിലെ നഗര പ്രാദേശിക ഭരണകൂടങ്ങൾ (ULB) സ്‌കൂൾ ബോധവൽക്കരണ പ്രവർത്തനങ്ങൾ, ഓട ശുചീകരണം, ആരോഗ്യ ക്യാമ്പുകൾ, ശുചീകരണ ഡ്രൈവുകൾ എന്നിവയ്ക്ക് നേതൃത്വം നൽകി. 60 ശുചീകരണ ഡ്രൈവുകൾ, 30 മഴവെള്ള ശേഖരണ ഡ്രൈവുകൾ, 40 മൺസൂണാനന്തര ബോധവൽക്കരണ ഡ്രൈവുകൾ എന്നിവയിലൂടെ ഈ ശ്രമങ്ങൾ അയ്യായിരത്തോളം ആളുകളെ പങ്കാളികളാക്കി. സിക്കിമിലെ മലനിരകളിലുടനീളം മാലിന്യ നിക്ഷേപ സാധ്യതയുള്ള മേഖലകളെയും ജലജന്യ-വാഹകജന്യ രോഗങ്ങളുടെ അപകടസാധ്യതകളെയും ലക്ഷ്യമിട്ടാണ് പ്രചാരണം നടന്നത്. ഉറവിട മാലിന്യ വേർതിരിക്കലിനും മെച്ചപ്പെട്ട മാലിന്യ സംസ്കരണത്തിനുമായി വിദ്യാർത്ഥികളും ഉദ്യോഗസ്ഥരും സ്വാശ്രയ സംഘങ്ങളും (SHG) ഒന്നിച്ചുചേർന്നു. ബോധവൽക്കരണ റാലികൾക്കും PET ബോട്ടിൽ ഷ്രെഡ്ഡിംഗ് സംരംഭങ്ങൾക്കുമൊപ്പം 100 ശുചീകരണ ഡ്രൈവുകളിലും 100 മൺസൂണാനന്തര ഡ്രൈവുകളിലുമായി നാലായിരത്തോളം ആളുകൾ പങ്കെടുത്തു. അസമിലെ പട്ടണങ്ങളിൽ ഓട ശുചീകരണം, മാലിന്യ നിർമ്മാർജ്ജനം, സഫായിമിത്ര ആരോഗ്യ പരിശോധനകൾ, മാലിന്യ വേർതിരിക്കൽ എന്നിവയിൽ ശ്രദ്ധ കേന്ദ്രീകരിച്ചു. 160 സംഘടനകളുടെയും സന്നദ്ധ സംഘടനകളുടെയും (NGOs) പിന്തുണയോടെ നടപ്പാക്കിയ 200 ശുചീകരണ, 40 മഴവെള്ള ശേഖരണ പ്രവർത്തനങ്ങളിൽ 5,500-ഓളം ആളുകൾ പങ്കാളികളായി.

ത്രിപുരയിൽ നഗര പ്രാദേശിക ഭരണകൂടങ്ങൾ മാലിന്യ ശേഖരണം, വേർതിരിക്കൽ, പൊതു ശൗചാലയ പരിപാലനം എന്നിവ ശക്തമാക്കി. ആരോഗ്യ ക്യാമ്പുകൾ, സ്‌കൂൾ റാലികൾ, ശുചിത്വ സംരംഭങ്ങൾ എന്നിവയ്‌ക്കൊപ്പം 150 ശുചീകരണ, 30 മഴവെള്ള ശേഖരണ ഡ്രൈവുകളിൽ അയ്യായിരത്തോളം ആളുകൾ പങ്കെടുത്തു. അരുണാചൽ പ്രദേശിലെ 47 നോട്ടിഫൈഡ് അർബൻ ടൗണുകളിലുടനീളം മാലിന്യ സംസ്കരണം, ജല ഗുണനിലവാരം, പൊതു ശൗചാലയ പരിപാലനം എന്നിവ പ്രവർത്തനങ്ങൾ ഉൾക്കൊള്ളിച്ചു. ജല ശുദ്ധീകരണ പ്ലാന്റുകൾ പരിശോധിക്കുകയും മാലിന്യ നിക്ഷേപ സാധ്യതയുള്ള സ്ഥലങ്ങളെ ലക്ഷ്യമിട്ട് ബഹുജന ശുചീകരണ ഡ്രൈവുകൾ നടത്തുകയും ചെയ്തു. ശുചിത്വവും രോഗ പ്രതിരോധവും എങ്ങനെ ദൈനംദിന സാമൂഹിക പ്രവർത്തനങ്ങളിലേക്ക് സംയോജിപ്പിക്കാമെന്ന് ഈ ശ്രമങ്ങൾ തെളിയിക്കുന്നു.

ഇടവഴികൾ മുതൽ വൃത്തിയുള്ളതും ഊർജ്ജസ്വലവുമായ അയൽപക്കങ്ങൾ വരെ

അയൽപക്കത്തെ വീടുകൾക്ക് പിന്നിലെ കാൽനടയാത്രക്കാരുടെ സഞ്ചാരം കുറവുള്ള സ്ഥലത്തെയാണ് ഇടവഴി എന്നുവിളിക്കുന്നത്. ഇത്തരം പ്രദേശങ്ങളിൽ മാലിന്യക്കൂമ്പാരത്തിനും ക്രമരഹിതമായ മാലിന്യ നിക്ഷേപത്തിനും സാധ്യതയേറെയാണ്. ഇത് തിരിച്ചറിഞ്ഞ് മധ്യപ്രദേശിലുടനീളമുള്ള നഗരങ്ങൾ പൊതുജനങ്ങളുടെ സജീവ പങ്കാളിത്തത്തോടെ ഇടവഴി ശുചീകരണ ഡ്രൈവുകൾ സംഘടിപ്പിച്ചു. മൺസൂൺ കാലത്ത് മഴവെള്ളം സുഗമമായി ഒഴുകുന്നതിനായി കൈയേറ്റങ്ങൾ ഒഴിപ്പിക്കുന്നതും ഓടകൾ ശുചീകരിക്കുന്നതും ഈ സംരംഭങ്ങളിൽ ഉൾപ്പെട്ടിരുന്നു.

റേവയിൽ മുനിസിപ്പൽ കോർപ്പറേഷൻ എല്ലാ വാർഡുകളിലെയും പൊതുവഴികളുടെ ശുചിത്വവും കാഴ്ചയും മെച്ചപ്പെടുത്തുന്നതിനായി ഇടവഴികൾക്കുമപ്പുറത്തേക്ക് ഈ പ്രവർത്തനം വ്യാപിപ്പിച്ചു. 3R തത്ത്വങ്ങൾ (കുറയ്ക്കുക, പുനരുപയോഗിക്കുക, പുനരുൽപ്പാദിപ്പിക്കുക - Reduce, Reuse, Recycle) ഉപയോഗിച്ച് കളിയുപകരണങ്ങളും സംഗീതോപകരണങ്ങളും വികസിപ്പിച്ചെടുത്തപ്പോൾ ചുവർചിത്രങ്ങളും ചുമർചിത്രരചനകളും നിർമ്മിക്കപ്പെട്ടു. ചുവരുകളിൽ ഇംഗ്ലീഷ്, ഹിന്ദി സ്വരാക്ഷരങ്ങളും അക്ഷരമാലകളും സംഖ്യകളും ഗുണനപ്പട്ടികകളും പ്രദർശിപ്പിച്ചിരിക്കുന്നു. ശുചിത്വത്തെ പഠനത്തോടും വിനോദ ഘടകങ്ങളോടും സംയോജിപ്പിക്കുന്നതിലൂടെ സുരക്ഷിതവും കൂടുതൽ ആകർഷകവും കുട്ടികൾക്ക് അനുയോജ്യവുമായ അയൽപക്ക ഇടങ്ങൾ സൃഷ്ടിക്കാൻ ഈ സംരംഭം സഹായിച്ചു.

ആഗ്ര മുനിസിപ്പൽ കോർപ്പറേഷൻ നഗരത്തിലുടനീളമുള്ള ഒമ്പത് ഇടവഴികൾ വിജയകരമായി ശുചീകരിക്കുകയും പരിപാലിക്കുകയും ചെയ്തു. അർബൻ ലേണിംഗ് ഇന്റേൺഷിപ്പ് പ്രോഗ്രാം (TULIP) ട്രെയിനികൾ പ്രചാരണത്തിൽ സജീവമായി പങ്കെടുത്തപ്പോൾ പ്രാദേശിക നിവാസികൾ അയൽപക്കത്തെ തെരുവുകൾ ശുചീകരിക്കുന്നതിനും മനോഹരമാക്കുന്നതിനും സംഭാവന നൽകി. അവരുടെ പങ്കാളിത്തം, ശുചിത്വത്തിന്റെ പ്രാദേശിക ഉടമസ്ഥാവകാശം ശക്തിപ്പെടുത്തുന്നതിനും പങ്കിട്ട പൊതുയിടങ്ങളുടെ സുസ്ഥിരമായ പരിപാലനത്തെ പിന്തുണയ്ക്കുന്നതിനും കമ്മ്യൂണിറ്റി പങ്കാളിത്തത്തിന് എങ്ങനെ സാധിക്കുമെന്ന് തെളിയിക്കുന്നു.

സുരക്ഷിതത്വത്തിൽ നിന്ന് അവസരത്തിലേക്ക്

ഭോപ്പാലിലെ ജ്യോത്സ്ന ധാബ്ഡെയ്ക്ക് സ്ഥാപനഗത വായ്പ ലഭ്യത സംരംഭകത്വം പിന്തുടരാനുള്ള അവസരം നൽകി. ഭോപ്പാൽ മുനിസിപ്പൽ കോർപ്പറേഷൻ വായ്പാ മേളയിൽ സ്വച്ഛത ഉദ്യമി യോജനയ്ക്ക് കീഴിൽ അവർക്ക് വായ്പ ലഭിച്ചു. ഇതൊരു ശുചീകരണ വാഹനം വാങ്ങാൻ അവരെ പ്രാപ്തയാക്കി. ന്യൂഡൽഹി മുനിസിപ്പൽ കൗൺസിലിലെ സൂപ്പർവൈസറായ രാജ യന്ത്രവൽകൃത സീവേജ് ശുചീകരണത്തിലെ തന്റെ അനുഭവം പങ്കുവെച്ചു.

ശുചീകരണ ജോലികൾ കൂടുതൽ സുരക്ഷിതവും വൈദഗ്ധ്യമുള്ളതും അന്തസ്സുള്ളതുമാക്കാനുള്ള ശ്രമങ്ങളെയാണ് ഈ അനുഭവങ്ങളെല്ലാം വ്യക്തമാക്കുന്നത്.

സഫായി മിത്ര സുരക്ഷാ ചലഞ്ച് 2021 ആരോഗ്യ ബോധവൽക്കരണം, സുരക്ഷാ ഉപകരണങ്ങളുടെ വിതരണവും ഉപയോഗവും, തൊഴിലാളി ക്ഷേമം, തൊഴിൽപരമായ അപകടസാധ്യതകൾ കുറയ്ക്കൽ എന്നിവയിൽ ശ്രദ്ധ കേന്ദ്രീകരിച്ചു. സ്വച്ഛ് ഭാരത് മിഷൻ - അർബൻ 2.0-ന് കീഴിൽ ശുചീകരണ ജോലികളിലെ മരണനിരക്ക് പൂജ്യമാക്കുന്നതിനായി പ്രവർത്തിക്കുന്നതിന് നഗര പ്രാദേശിക ഭരണകൂടങ്ങൾ (ULB) വഴി സംരക്ഷണ ഉപകരണങ്ങൾ നൽകൽ, പരിശീലനം, സുരക്ഷാ ബോധവൽക്കരണം എന്നിവയ്ക്ക് ഭവന, നഗരകാര്യ മന്ത്രാലയം (MoHUA) പ്രാധാന്യം നൽകിയിട്ടുണ്ട്.

ഈ മേഖലയിലെ മുൻഗാമി എന്ന നിലയിൽ ചണ്ഡീഗഡ് 2018 മുതൽ അപകടകരമായ രീതിയിലുള്ള, കൈകൊണ്ടുള്ള സീവേജ് ശുചീകരണം നിരോധിച്ചിട്ടുണ്ട്. റെസ്‌പോൺസിബിൾ സാനിറ്റേഷൻ അതോറിറ്റിക്ക് (RSA) കീഴിൽ പ്രവർത്തിക്കുന്ന എമർജൻസി റെസ്‌പോൺസ് സാനിറ്റേഷൻ യൂണിറ്റ് (ERSU), വ്യക്തിഗത സംരക്ഷണ ഉപകരണങ്ങൾ (PPE), സുരക്ഷാ ഗിയറുകൾ, ക്രമപരമായ വൈദ്യപരിശോധനകൾ എന്നിവ നൽകിക്കൊണ്ട് സുരക്ഷിതമായ ശുചിത്വ രീതികളെ പിന്തുണയ്ക്കുന്നു.

അസമിൽ 96 നഗര പ്രാദേശിക ഇടങ്ങളിൽ (ULB) 83 എണ്ണവും 2023-ൽ 'സഫായിമിത്ര സുരക്ഷിത് ഷെഹർ' ആയി പ്രഖ്യാപിച്ചു. സംസ്ഥാനം 5,230 ശുചീകരണ തൊഴിലാളികളുടെ വിവരങ്ങൾ പട്ടികപ്പെടുത്തുകയും 92 ആരോഗ്യ ക്യാമ്പുകൾ സംഘടിപ്പിക്കുകയും ചെയ്തു. മഹാരാഷ്ട്രയിൽ ഒന്നാം ഘട്ടത്തിൽ 246 മാസ്റ്റർ ട്രെയിനർമാരെ സജ്ജരാക്കുകയും തുടർന്ന് 1,917 ശുചീകരണ തൊഴിലാളികൾക്ക് പരിശീലനം നൽകുകയും ചെയ്തു. വായ്പാ ലഭ്യതയും ഉപജീവന അവസരങ്ങളും സുഗമമാക്കിക്കൊണ്ട് ഉത്തർപ്രദേശ് സഫായിമിത്രങ്ങളെ പിന്തുണച്ചു. സഫായിമിത്രകളുടെ സുരക്ഷ, സാമൂഹിക-സാമ്പത്തിക ഭദ്രത, അന്തസ്സ്, സംരംഭകത്വ അവസരങ്ങൾ എന്നിവ ശക്തിപ്പെടുത്താനും ശുചീകരണ ജോലിയിൽ നിന്ന് സാനി-സംരംഭകത്വത്തിലേക്ക് (sani-entrepreneurship) വഴികൾ തുറക്കാനും ഈ നടപടികൾ ഒരുമിച്ച് ലക്ഷ്യമിടുന്നു.

തയ്യാറെടുപ്പിൽ നിന്ന് സാമൂഹിക പ്രവർത്തനത്തിലേക്ക്

മഴയെത്തുമ്പോൾ പ്രീ-മൺസൂൺ തയ്യാറെടുപ്പുകളുടെ യഥാർത്ഥ വില താഴെത്തട്ടിൽ ദൃശ്യമാകുന്നു. വൃത്തിയാക്കിയ ഓട മഴവെള്ളത്തിന് തടസ്സമില്ലാതെ ഒഴുകാൻ അവസരമൊരുക്കുന്നു, വൃത്തിയുള്ള തെരുവ് മാലിന്യക്കൂമ്പാരം തടയുന്നു, കൂടാതെ ഒരു മുൻകൂട്ടിയുള്ള ആരോഗ്യ ക്യാമ്പ് രോഗങ്ങൾ പടരുന്നതിന് മുമ്പ് തന്നെ അവ കണ്ടെത്താനും നിയന്ത്രിക്കാനും സമൂഹത്തെ സഹായിക്കുന്നു. ഓരോ നടപടിയുടെയും കേന്ദ്രബിന്ദു പൗരന്മാരുടെ സജീവ പങ്കാളിത്തമാണ്. ഇത് പൊതുജനാരോഗ്യത്തെ ഒരു പങ്കാളിത്ത ഉത്തരവാദിത്തമാക്കി മാറ്റുന്നു.

വടക്കുകിഴക്കൻ മലനിരകൾ മുതൽ ഡൽഹിയിലെ തെരുവുകൾ വരെയും തെലങ്കാന, ഛത്തീസ്ഗഡ്, മധ്യപ്രദേശ്, ഉത്തർപ്രദേശ് എന്നിവിടങ്ങളിലെ സമൂഹങ്ങളിലുടനീളവും ഈ പ്രചാരണം വൈവിധ്യമാർന്നതും പ്രാദേശികവുമായ രൂപങ്ങൾ കൈക്കൊണ്ടിട്ടുണ്ട്. എങ്കിലും അവയ്ക്കെല്ലാം പിന്നിൽ ഏകീകൃതമായ ഒരു സത്യമുണ്ട് - യഥാർത്ഥ മൺസൂൺ തയ്യാറെടുപ്പ് എന്നത് കേവലം മഴയോട് പ്രതികരിക്കുക എന്നതല്ല, മറിച്ച് ഒരുമിച്ച് തയ്യാറെടുക്കുക എന്നതാണ് — ഒരു സമയം ഒരു തെരുവ്, ഒരു അയൽപക്കം, ഒരു സമൂഹം എന്ന രീതിയിൽ.

അവലംബം

Ministry of Housing and Urban Affairs

https://sbmurban.org/SABB-in-Northeast
https://sbmurban.org/safai-Apnao-Bimaari-Bhagao-2025
https://sbmurban.org/Back-Lanes-Cleaning
https://sbmurban.org/Sani-Entrepreneur

Click here to see pdf 

***

SK