पत्र सूचना कार्यालय

ಸೆಪ್ಟೆಂಬರ್ 17 ರಂದು, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ದ್ವಾರಕಾದ ಯಶೋಭೂಮಿಗೆ ಆಗಮಿಸಿ ‘ಸೆಮಿಕಾನ್ ಇಂಡಿಯಾ 2026’ ಅನ್ನು ಉದ್ಘಾಟಿಸಲಿದ್ದಾರೆ. ಜಾಗತಿಕ ಚಿಪ್ ತಯಾರಕರು, ನೀತಿ ನಿರೂಪಕರು ಮತ್ತು ಹೂಡಿಕೆದಾರರು ಅವರ ಹಿಂದೆ ಸಭಾಂಗಣಗಳನ್ನು ತುಂಬಲಿದ್ದು, ಭಾರತವು ತಳಮಟ್ಟದಿಂದ ನಿರ್ಮಿಸಿದ ಉದ್ಯಮವನ್ನು ವೀಕ್ಷಿಸಲಿದ್ದಾರೆ. ಮೂರು ದಿನಗಳ ಕಾಲ, ದೇಶದ ಸೆಮಿಕಂಡಕ್ಟರ್ (ಅರೆವಾಹಕ) ಉತ್ಪಾದನಾ ಕಥೆಯು ಪೂರ್ಣ ಪ್ರಮಾಣದಲ್ಲಿ ಪ್ರದರ್ಶನಗೊಳ್ಳಲಿದೆ. ಒಂದು ದಶಕದ ಹಿಂದೆ ಭಾರತದಲ್ಲಿ ಕನಿಷ್ಠ ಜೀವಕಳೆಯೂ ಇಲ್ಲದಿದ್ದ ಈ ಉದ್ಯಮಕ್ಕೆ, ಇದು ಬರಿ ಸಮ್ಮೇಳನವಲ್ಲ. ಇದು ಭಾರತದ ಸೆಮಿಕಂಡಕ್ಟರ್ ಆಕಾಂಕ್ಷೆಗಳು ಜಾಗತಿಕ ಹಂತದಲ್ಲಿ ಮುಂಚೂಣಿಗೆ ಬರುವ ಕ್ಷಣವಾಗಿದೆ.

ಈ ವರ್ಷದ ಧೇಯವಾಕ್ಯ "ಸಿಲಿಕಾನ್‌ನಿಂದ ಸಿಸ್ಟಮ್ಸ್‌ವರೆಗೆ: ಪರಿಸರ ವ್ಯವಸ್ಥೆಯ ನಿರ್ಮಾಣ". ಈ ಸಾಲು ಮೇಲ್ನೋಟಕ್ಕೆ ಕಾಣಿಸುವುದಕ್ಕಿಂತ ಹೆಚ್ಚಿನ ತೂಕವನ್ನು ಹೊಂದಿದೆ. ಭಾರತವು ಇನ್ನು ಮುಂದೆ ಚಿಪ್‌ಗಳನ್ನು ತಯಾರಿಸಲು ಸಾಧ್ಯವೇ ಎಂದು ಕೇಳಿಕೊಳ್ಳುತ್ತಿಲ್ಲ; ಬದಲಿಗೆ ಅವುಗಳ ಸುತ್ತಲಿನ ಪ್ರತಿಯೊಂದನ್ನೂ ಎಷ್ಟು ವೇಗವಾಗಿ ನಿರ್ಮಿಸಬಹುದು ಎಂದು ಕೇಳುತ್ತಿದೆ.

ಜಗತ್ತನ್ನು ನಡೆಸುವ ವಸ್ತು

ನಿಮ್ಮ ಫೋನ್ ಹಿಡಿದು ನೋಡಿ. ಅದರೊಳಗೆ ಎಲ್ಲಿಯೋ ಅಂಚೆ ಚೀಟಿಗಿಂತ ಚಿಕ್ಕದಾದ ಸಿಲಿಕಾನ್ ತುಂಡೊಂದು ಕುಳಿತಿದೆ, ಅದು ಸೆಕೆಂಡಿಗೆ ಶತಕೋಟಿ ಬಾರಿ ಆನ್ ಮತ್ತು ಆಫ್ ಆಗುವ ಶತಕೋಟಿ ಟ್ರಾನ್ಸಿಸ್ಟರ್‌ಗಳನ್ನು ಹೊಂದಿದೆ. 3 ನ್ಯಾನೋಮೀಟರ್‌ನಲ್ಲಿ ನಿರ್ಮಿಸಲಾದ ಆಪಲ್‌ನ A19 ಬಯೋನಿಕ್ ಚಿಪ್, ಆ ಸಣ್ಣ ಮೇಲ್ಮೈಯಲ್ಲಿ ಸುಮಾರು 30 ಶತಕೋಟಿ ಟ್ರಾನ್ಸಿಸ್ಟರ್‌ಗಳನ್ನು ಹೊಂದಿದೆ. ಯಾವುದೇ ಉತ್ಪ್ರೇಕ್ಷೆಯಿಲ್ಲದೆ ಹೇಳುವುದಾದರೆ, ಇದು ಮಾನವರು ಇದುವರೆಗೆ ನಿರ್ಮಿಸಿದ ಅತ್ಯಂತ ಸಂಕೀರ್ಣವಾದ ವಸ್ತುಗಳಲ್ಲಿ ಒಂದಾಗಿದೆ.

ಚಿಪ್‌ಗಳು ಇನ್ನು ಮುಂದೆ ಕೇವಲ ಒಂದು ನಿರ್ದಿಷ್ಟ ಕ್ಷೇತ್ರದ ಉತ್ಪನ್ನವಾಗಿ ಉಳಿದಿಲ್ಲ. ಅವು ಕಾರುಗಳು, ಡ್ರೋನ್‌ಗಳು, ವಿಮಾನಗಳು, ಎಂಆರ್‌ಐ ಯಂತ್ರಗಳು ಮತ್ತು ಉಪಗ್ರಹಗಳ ಒಳಗೆ ಕುಳಿತಿವೆ. ಪ್ರಸ್ತುತ, ಜಾಗತಿಕ ಎಲೆಕ್ಟ್ರಾನಿಕ್ಸ್ ಉದ್ಯಮದ ಮೌಲ್ಯವು ಸುಮಾರು $4.3 ಟ್ರಿಲಿಯನ್ ಆಗಿದ್ದು, ವೇಗವಾಗಿ ಬೆಳೆಯುತ್ತಿದೆ. ಸೆಮಿಕಂಡಕ್ಟರ್‌ಗಳು ಈ ಬೆಳೆಯುತ್ತಿರುವ ರಚನೆಯ ತಳಭಾಗದಲ್ಲಿದ್ದು, ಅದರ ತಡಿಪಾಯವನ್ನು ರೂಪಿಸುತ್ತವೆ. ಆಟೋಮೊಬೈಲ್‌ನಿಂದ ಹಿಡಿದು ಆರೋಗ್ಯ ರಕ್ಷಣೆ ಮತ್ತು ರಕ್ಷಣಾ ಕ್ಷೇತ್ರದವರೆಗಿನ ಪ್ರತಿಯೊಂದು ಉದ್ಯಮವೂ ಚಿಪ್ ಫ್ಯಾಬ್ರಿಕೇಶನ್ ಪ್ಲಾಂಟ್‌ನಿಂದ ಹೊರಬರುವುದನ್ನು ಆಧರಿಸಿದೆ. ಸೆಮಿಕಂಡಕ್ಟರ್‌ಗಳನ್ನು ಮೂಲಭೂತ ಉದ್ಯಮವನ್ನಾಗಿ ಮಾಡುವುದು ಇದೇ. ಈ ಹಂತವನ್ನು ತಪ್ಪಿಸಿದರೆ, ಇದರ ಮೇಲಿರುವ ಪ್ರತಿಯೊಂದು ಹಂತವೂ ದುರ್ಬಲಗೊಳ್ಳುತ್ತದೆ.

ಜಗತ್ತು ಇದನ್ನು ಕಠಿಣ ಹಾದಿಯ ಮೂಲಕ ಕಲಿಯಿತು. ಉದಾಹರಣೆಗೆ, ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಕಾರು ಕಾರ್ಖಾನೆಗಳು ಸ್ಥಗಿತಗೊಂಡವು. ಉಕ್ಕು ಅಥವಾ ಕಾರ್ಮಿಕರ ಕೊರತೆಯಿಂದಲ್ಲ, ಬದಲಿಗೆ ಅವರಿಗೆ ಚಿಪ್‌ಗಳು ಸಿಗದ ಕಾರಣ. ದಶಕಗಳಿಂದ ಸೆಮಿಕಂಡಕ್ಟರ್‌ಗಳನ್ನು ಬೇರೆಯವರ ಸಮಸ್ಯೆ ಎಂದು ಪರಿಗಣಿಸಿದ್ದ ದೇಶಗಳು, ಹಠಾತ್ತನೆ ತಮ್ಮದೇ ಆದ ಸಾಮರ್ಥ್ಯವನ್ನು ನಿರ್ಮಿಸಲು ಹೆಣಗಾಡಿದವು. ಸಾಂಕ್ರಾಮಿಕ ರೋಗವು ಚಿಪ್‌ಗಳಿಗಾಗಿನ ಓಟವನ್ನು ಸೃಷ್ಟಿಸಲಿಲ್ಲ; ಅದು ಎಲ್ಲರೂ ವೇಗವಾಗಿ ಓಡುವಂತೆ ಮಾಡಿತಷ್ಟೇ.

ಈ ಕ್ಷಣಕ್ಕೆ ಬಂದ ಸುದೀರ್ಘ ಹಾದಿ

ಸೆಮಿಕಂಡಕ್ಟರ್‌ಗಳ ಮೇಲಿನ ಭಾರತದ ಆಸಕ್ತಿಯು ಹೆಚ್ಚಿನ ಜನರು ಭಾವಿಸುವುದಕ್ಕಿಂತಲೂ ಹಳೆಯದು. ದಶಕಗಳ ಶಾಂತ ಯತ್ನಗಳು, ಸಣ್ಣ ಆರಂಭಗಳು ಮತ್ತು ಕಠಿಣ ಹಾದಿಯಲ್ಲಿ ಕಲಿತ ಪಾಠಗಳು ಇವುಗಳಲ್ಲಿವೆ. ದೀರ್ಘಕಾಲದವರೆಗೆ ಆಕಾಂಕ್ಷೆಯಿತ್ತಾದರೂ, ಅದರ ಸುತ್ತಲಿನ ಪರಿಸರ ವ್ಯವಸ್ಥೆ ಎಂದಿಗೂ ಸರಿಯಾಗಿ ಒಂದಾಗಲಿಲ್ಲ. ವಿಭಿನ್ನ ವಿಧಾನದೊಂದಿಗೆ ಅದು ಬದಲಾಯಿತು. ವಿದೇಶಿ ಹೂಡಿಕೆ, ತೆರಿಗೆ ಮತ್ತು ಸುಂಕಗಳಲ್ಲಿನ ಸುಧಾರಣೆಗಳು ಬಾಗಿಲನ್ನು ಅಗಲವಾಗಿ ತೆರೆದವು. ಜಾಗತಿಕ ಎಲೆಕ್ಟ್ರಾನಿಕ್ಸ್ ಕಂಪನಿಗಳು ಭಾರತದಲ್ಲಿ ಉತ್ಪಾದನಾ ಮಾರ್ಗಗಳನ್ನು ನಿಧಾನವಾಗಿ ಸ್ಥಾಪಿಸಲು ಪ್ರಾರಂಭಿಸಿದವು ಮತ್ತು ಅದರ ಫಲಿತಾಂಶಗಳನ್ನು ಅಲ್ಲಗಳೆಯುವುದು ಕಷ್ಟ.

2014-15ರಲ್ಲಿ, ಭಾರತವು ಸುಮಾರು ₹1.9 ಲಕ್ಷ ಕೋಟಿ ಮೌಲ್ಯದ ಎಲೆಕ್ಟ್ರಾನಿಕ್ಸ್ ವಸ್ತುಗಳನ್ನು ಉತ್ಪಾದಿಸಿತ್ತು. 2025-26 ರ ವೇಳೆಗೆ, ಆ ಸಂಖ್ಯೆಯು ₹13.11 ಲಕ್ಷ ಕೋಟಿಯನ್ನು ತಲುಪಿದ್ದು, ಏಳು ಪಟ್ಟು ಜಿಗಿತ ಕಂಡಿದೆ. ಎಲೆಕ್ಟ್ರಾನಿಕ್ಸ್ ರಫ್ತು ಸುಮಾರು ₹38,000 ಕೋಟಿಯಿಂದ ₹4.24 ಲಕ್ಷ ಕೋಟಿಗೆ ಏರಿದ್ದು, ಹನ್ನೊಂದು ಪಟ್ಟು ಹೆಚ್ಚಳವಾಗಿದೆ.

ಮೊಬೈಲ್ ಫೋನ್‌ಗಳು ಇನ್ನು ತೀಕ್ಷ್ಣವಾದ ಕಥೆಯನ್ನು ಹೇಳುತ್ತವೆ. ಉತ್ಪಾದನೆಯು ₹18,000 ಕೋಟಿಯಿಂದ ₹6.27 ಲಕ್ಷ ಕೋಟಿಗೆ 33 ಪಟ್ಟು ಹೆಚ್ಚಾಗಿದೆ. ರಫ್ತು ಸುಮಾರು ₹1,500 ಕೋಟಿಯಿಂದ ₹2.59 ಲಕ್ಷ ಕೋಟಿಗೆ 165 ಪಟ್ಟು ಹೆಚ್ಚಾಗಿದೆ. 2014 ರಲ್ಲಿ ಭಾರತದ ಉನ್ನತ 100 ರಫ್ತು ಸರಕುಗಳಲ್ಲಿ ಸ್ಮಾರ್ಟ್‌ಫೋನ್‌ಗಳು ಇರಲೇ ಇಲ್ಲ. ಆದರೆ 2025-26 ರ ಹಣಕಾಸು ವರ್ಷದಲ್ಲಿ, ಸ್ಮಾರ್ಟ್‌ಫೋನ್‌ಗಳು ಭಾರತದ ಅತ್ಯಂತ ದೊಡ್ಡ ರಫ್ತು ವಸ್ತುವಾಗಿ ಹೊರಹೊಮ್ಮಿವೆ. ಪೆಟ್ರೋಲಿಯಂ ಉತ್ಪನ್ನಗಳು ಮತ್ತು ರತ್ನ ಹಾಗೂ ಆಭರಣಗಳಿಗಿಂತ ಮುಂಚೂಣಿಯಲ್ಲಿವೆ. ಭಾರತವು ಈಗ ತಾನು ಬಳಸುವ ಶೇಕಡಾ 99.2 ರಷ್ಟು ಫೋನ್‌ಗಳನ್ನು ತಾನೇ ತಯಾರಿಸುತ್ತದೆ ಮತ್ತು ಮೊಬೈಲ್‌ಗಳ ನಿವ್ವಳ ಆಮದುದಾರನಿಂದ ನಿವ್ವಳ ರಫ್ತುದಾರನಾಗಿ ಬದಲಾಗಿದೆ. ಈ ಸಂಪೂರ್ಣ ಉತ್ಪಾದನಾ ವ್ಯವಸ್ಥೆಯು ಈಗ 2.5 ಮಿಲಿಯನ್ (25 ಲಕ್ಷ) ಉದ್ಯೋಗಗಳನ್ನು ಬೆಂಬಲಿಸುತ್ತಿದೆ.

ಚಿತ್ರಣವು ಬದಲಾಗುವ ಕ್ಷಣ ಇದು. ಎಲೆಕ್ಟ್ರಾನಿಕ್ಸ್ ಕ್ಷೇತ್ರದಲ್ಲಿ ಒಮ್ಮೆ ಸಫಲವಾಗದ ಆರಂಭಗಳಿಗೆ ಹೆಸರಾಗಿದ್ದ ದೇಶವು, ಈಗ ಪ್ರಮಾಣದ ಆಧಾರದಲ್ಲಿ ವಿಶ್ವದ ಎರಡನೇ ಅತಿದೊಡ್ಡ ಮೊಬೈಲ್ ಫೋನ್ ತಯಾರಕ ದೇಶವಾಗಿದೆ. ಎಲೆಕ್ಟ್ರಾನಿಕ್ಸ್ ಉತ್ಪಾದನೆಯು ಯೋಜನೆಯ ಯಶಸ್ಸಿಗೆ ಸಾಕ್ಷಿಯಾಗಿತ್ತು. ಸೆಮಿಕಂಡಕ್ಟರ್‌ಗಳು ಯಾವಾಗಲೂ ಇದರ ಮುಂದಿನ ಹಂತವಾಗಿದ್ದವು.

ಮಿಷನ್‌ ಅನ್ನು ಕಟ್ಟುವುದು

ಆ ಮುಂದಿನ ಹಂತವು 2021ರಲ್ಲಿ 'ಸೆಮಿಕಾನ್ ಇಂಡಿಯಾ' ಕಾರ್ಯಕ್ರಮದೊಂದಿಗೆ ಬಂದಿತು. ಈ ತಂತ್ರವನ್ನು ಅತ್ಯಂತ ಯೋಜನಾಬದ್ಧವಾಗಿ ರೂಪಿಸಲಾಗಿತ್ತು. ಕೇವಲ ಪ್ರದರ್ಶನದ ವಸ್ತುವನ್ನಾಗಿ ಮಾಡದೆ, ನಿಜವಾದ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವುದು ಇದರ ಉದ್ದೇಶವಾಗಿತ್ತು. 'ಸೆಮಿಕಾನ್ 1.0' ₹76,000 ಕೋಟಿ ವೆಚ್ಚದ ಯೋಜನೆಯೊಂದಿಗೆ ಬಂದಿತು. ಇದು ಚಿಪ್ ವಿನ್ಯಾಸ ಮತ್ತು ಫ್ಯಾಬ್ರಿಕೇಶನ್‌ನಿಂದ ಹಿಡಿದು ಪ್ಯಾಕೇಜಿಂಗ್, ಪರೀಕ್ಷೆ, ಉಪಕರಣಗಳು, ಕಚ್ಚಾವಸ್ತುಗಳು ಹಾಗೂ ನುರಿತ ಪ್ರತಿಭೆಗಳವರೆಗಿನ ಸಂಪೂರ್ಣ ಮೌಲ್ಯ ಸರಪಳಿಯನ್ನು ಒಳಗೊಂಡಿತ್ತು. ಜುಲೈ 2026 ರಲ್ಲಿ, ಸರ್ಕಾರವು ₹1,27,500 ಕೋಟಿ ವೆಚ್ಚದಲ್ಲಿ ಆ ಅಡಿಪಾಯವನ್ನು ಮತ್ತಷ್ಟು ವಿಸ್ತರಿಸುತ್ತಾ 'ಸೆಮಿಕಾನ್ 2.0' ಅನ್ನು ಅನುಮೋದಿಸಿತು. ಇದನ್ನು ಆರು ಪ್ರಮುಖ ಸ್ತಂಭಗಳ ಸುತ್ತ ನಿರ್ಮಿಸಲಾಗಿದೆ: ಚಿಪ್ ವಿನ್ಯಾಸ, ಸೆಮಿಕಂಡಕ್ಟರ್ ಉಪಕರಣಗಳು ಮತ್ತು ಕಚ್ಚಾವಸ್ತುಗಳು, ಫ್ಯಾಬ್ರಿಕೇಶನ್ ಸೌಲಭ್ಯಗಳು, ಸುಧಾರಿತ ಪ್ಯಾಕೇಜಿಂಗ್, ಸಂಶೋಧನೆ ಮತ್ತು ಅಭಿವೃದ್ಧಿ, ಹಾಗೂ ಪ್ರತಿಭಾ ಅಭಿವೃದ್ಧಿ.

ನೆಲಮಟ್ಟದ ಅಂಕಿಅಂಶಗಳು ಈ ಉದ್ದೇಶಕ್ಕೆ ಬೆಂಬಲವಾಗಿವೆ. ಆರು ರಾಜ್ಯಗಳಲ್ಲಿ ₹1.64 ಲಕ್ಷ ಕೋಟಿಗೂ ಹೆಚ್ಚಿನ ಹೂಡಿಕೆ ಬದ್ಧತೆಯೊಂದಿಗೆ 12 ಸೆಮಿಕಂಡಕ್ಟರ್ ಯೋಜನೆಗಳನ್ನು ಅನುಮೋದಿಸಲಾಗಿದೆ. ಈ ಯೋಜನೆಗಳು ಸಿಲಿಕಾನ್ ಮತ್ತು ಕಾಂಪೌಂಡ್ ಸೆಮಿಕಂಡಕ್ಟರ್ ಫ್ಯಾಬ್‌ಗಳು, ಡಿಸ್ಪ್ಲೇ ಫ್ಯಾಬ್ರಿಕೇಶನ್ ಮತ್ತು ಸುಧಾರಿತ ಪ್ಯಾಕೇಜಿಂಗ್‌ಗಳನ್ನು ಒಳಗೊಂಡಿವೆ. ಮೂರು ಸೌಲಭ್ಯಗಳು ಈಗಾಗಲೇ ವಾಣಿಜ್ಯ ಉತ್ಪಾದನೆಯನ್ನು ಪ್ರಾರಂಭಿಸಿವೆ. ಈ ಒಂದು ಸಂಗತಿಯು, ಭಾರತವು ಕಾಗದದ ಮೇಲಿದ್ದ ಸೆಮಿಕಂಡಕ್ಟರ್ ನೀತಿಯಿಂದ ನೆಲಮಟ್ಟದ ಸೆಮಿಕಂಡಕ್ಟರ್ ತಯಾರಿಕೆಗೆ ಬದಲಾಗಿರುವುದನ್ನು ಸೂಚಿಸುತ್ತದೆ.

ಚಿಪ್‌ಗಳ ಹಿಂದಿನ ಪ್ರತಿಭೆಯನ್ನು ಬೆಳೆಸುವುದು

ಚಿಪ್‌ನ ಒಳಗೆ ಏನಿದೆ ಎಂಬುದನ್ನು ವಿನ್ಯಾಸಗೊಳಿಸುವ ಎಂಜಿನಿಯರ್‌ಗಳು ಎಷ್ಟರಮಟ್ಟಿಗೆ ಸಮರ್ಥರಾಗಿದ್ದಾರೋ, ಫ್ಯಾಬ್ ಕೂಡ ಅಷ್ಟೇ ಉತ್ತಮವಾಗಿರುತ್ತದೆ. ಇದಕ್ಕಾಗಿ ನಿಗದಿಪಡಿಸಿದ ಗುರಿ ಸ್ಪಷ್ಟವಾಗಿದೆ. ಈ ದಶಕದೊಳಗೆ 85,000 ನುರಿತ ಸೆಮಿಕಂಡಕ್ಟರ್ ಎಂಜಿನಿಯರ್‌ಗಳ ಪಡೆಯನ್ನು ಸೃಷ್ಟಿಸುವುದು. 'ಚಿಪ್ಸ್ ಟು ಸ್ಟಾರ್ಟ್‌ಅಪ್' ಕಾರ್ಯಕ್ರಮದ ಮೂಲಕ, 320 ಶೈಕ್ಷಣಿಕ ಸಂಸ್ಥೆಗಳಲ್ಲಿ ಎಲೆಕ್ಟ್ರಾನಿಕ್ ಡಿಸೈನ್ ಆಟೊಮೇಷನ್ ಉಪಕರಣಗಳನ್ನು ಈಗಾಗಲೇ ಅಳವಡಿಸಲಾಗಿದ್ದು, ಇದುವರೆಗೆ 68,000 ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ತರಬೇತಿ ನೀಡಲಾಗಿದೆ. ಇದಲ್ಲದೆ, ಡಿಎಲ್‌ಐ ಯೋಜನೆಯಡಿ ಹಣಕಾಸಿನ ನೆರವಿಗಾಗಿ 24 ಸೆಮಿಕಂಡಕ್ಟರ್ ವಿನ್ಯಾಸ ಯೋಜನೆಗಳನ್ನು ಅನುಮೋದಿಸಲಾಗಿದ್ದು, 105 ಸ್ಟಾರ್ಟ್‌ಅಪ್‌ಗಳು ಮತ್ತು ಎಂಎಸ್‌ಎಂಇ ಗಳು ಇಡಿಎ ಉಪಕರಣದ ಬೆಂಬಲವನ್ನು ಪಡೆಯುತ್ತಿವೆ.

ಏಪ್ರಿಲ್ 2026ರ ವೇಳೆಗೆ, 75 ಸಂಸ್ಥೆಗಳು 211 ಚಿಪ್‌ಗಳನ್ನು ಟೇಪ್-ಔಟ್ ಮಾಡಿದ್ದವು. ಇದು ವಿನ್ಯಾಸದ ಸಾಮರ್ಥ್ಯವು ಕೇವಲ ಬೆರಳಣಿಕೆಯಷ್ಟು ಗಣ್ಯ ಸಂಶೋಧನಾಲಯಗಳನ್ನು ಮೀರಿ ವಿಸ್ತರಿಸುತ್ತಿರುವುದಕ್ಕೆ ಸ್ಪಷ್ಟ ಸಾಕ್ಷಿಯಾಗಿದೆ. ಆ ಚಿಪ್‌ಗಳಲ್ಲಿ ಏಳನ್ನು 12 ನ್ಯಾನೋಮೀಟರ್‌ವರೆಗಿನ ಸುಧಾರಿತ ನೋಡ್‌ಗಳು ಸೇರಿದಂತೆ ವಿವಿಧ ನೋಡ್‌ಗಳಲ್ಲಿ ತಯಾರಿಸಲಾಗಿದೆ.

ದೇಶಾದ್ಯಂತ ಚಿಪ್ ವಿನ್ಯಾಸವನ್ನು ಪ್ರಜಾಸತ್ತಾತ್ಮಕಗೊಳಿಸಲು, 'ಚಿಪ್ಸ್ ಟು ಸ್ಟಾರ್ಟ್‌ಅಪ್' ಕಾರ್ಯಕ್ರಮ ಮತ್ತು 'ಡಿಸೈನ್ ಲಿಂಕ್ಡ್ ಇನ್ಸೆಂಟಿವ್' ಯೋಜನೆಯಡಿ ಸಿ-ಡಿಎಸಿ ನಲ್ಲಿ 'ಚಿಪ್‌ಇನ್ ಸೆಂಟರ್' ಅನ್ನು ಸ್ಥಾಪಿಸಲಾಗಿದೆ. ಇದು ಸುಧಾರಿತ ಚಿಪ್-ವಿನ್ಯಾಸ ಉಪಕರಣಗಳು, ಫ್ಯಾಬ್ರಿಕೇಶನ್ ಸೇವೆಗಳು ಮತ್ತು ವಿಶೇಷ ತರಬೇತಿಗೆ ಪ್ರವೇಶವನ್ನು ನೀಡುವ ಕೇಂದ್ರೀಕೃತ ರಾಷ್ಟ್ರೀಯ ಸೌಲಭ್ಯವಾಗಿ ಕಾರ್ಯನಿರ್ವಹಿಸುತ್ತದೆ.

ಚಿಪ್‌ಇನ್ ಸೆಂಟರ್ ಈ ಸೌಲಭ್ಯಗಳನ್ನು 400 ಶೈಕ್ಷಣಿಕ ಸಂಸ್ಥೆಗಳು ಮತ್ತು 100 ಸ್ಟಾರ್ಟ್‌ಅಪ್‌ಗಳು ಸೇರಿದಂತೆ 500 ಕ್ಕೂ ಹೆಚ್ಚು ಸಂಸ್ಥೆಗಳ 1 ಲಕ್ಷಕ್ಕೂ ಹೆಚ್ಚು ಎಂಜಿನಿಯರ್‌ಗಳಿಗೆ ವಿಸ್ತರಿಸಿದೆ. ಈ ಸಂಸ್ಥೆಗಳು ಒಟ್ಟಾಗಿ ಮೊಹಾಲಿ ಎಸ್‌ಸಿಎಲ್ (SCL) ಮತ್ತು ವಿದೇಶಗಳ ಸುಧಾರಿತ ಫೌಂಡ್ರಿಗಳಲ್ಲಿ ತಯಾರಿಕೆಗಾಗಿ 300 ಕ್ಕೂ ಹೆಚ್ಚು ಚಿಪ್ ವಿನ್ಯಾಸಗಳನ್ನು ಅಭಿವೃದ್ಧಿಪಡಿಸಿವೆ, ಹಾಗೆಯೇ 4 ಕೋಟಿಗೂ ಹೆಚ್ಚು ಗಂಟೆಗಳ ಚಿಪ್-ವಿನ್ಯಾಸ ಉಪಕರಣಗಳ ಬಳಕೆಯನ್ನು ದಾಖಲಿಸಿವೆ. ಹೆಚ್ಚು ಬಂಡವಾಳ ಬೇಡುವ ಉಪಕರಣಗಳು ಮತ್ತು ಸೇವೆಗಳನ್ನು ಹಂಚಿಕೊಂಡು ಬಳಸಲು ಅವಕಾಶ ಮಾಡಿಕೊಡುವ ಮೂಲಕ, ಈ ಉಪಕ್ರಮವು ಪ್ರವೇಶದ ಅಡೆತಡೆಗಳನ್ನು ಕಡಿಮೆ ಮಾಡಿದೆ, ಅಭಿವೃದ್ಧಿ ವೆಚ್ಚವನ್ನು ತಗ್ಗಿಸಿದೆ ಮತ್ತು ಚಿಪ್ ಆವಿಷ್ಕಾರವನ್ನು ವೇಗಗೊಳಿಸಿದೆ, ಇದು ಕೇಂದ್ರೀಕೃತ ಚಿಪ್-ವಿನ್ಯಾಸ ಸೌಲಭ್ಯಕ್ಕಾಗಿ ವಿಶ್ವದ ಅತಿದೊಡ್ಡ ಬಳಕೆದಾರರ ನೆಲೆಯನ್ನು ಸೃಷ್ಟಿಸಿದೆ.

ಚಿಪ್ ಯುಗದ ಮೈತ್ರಿ

ಭಾರತದ ಸೆಮಿಕಂಡಕ್ಟರ್ ಪ್ರಯತ್ನವು ಈಗ ಕೇವಲ ದೇಶೀಯ ಕಥೆಯಾಗಿ ಉಳಿದಿಲ್ಲ. 'ಇಂಡಿಯಾ AI ಇಂಪ್ಯಾಕ್ಟ್ ಸಮಿಟ್ 2026' ರ ಐದನೇ ದಿನದಂದು, ಭಾರತವು ಅಧಿಕೃತವಾಗಿ 'ಪ್ಯಾಕ್ಸ್ ಸಿಲಿಕಾ' ಒಕ್ಕೂಟವನ್ನು ಸೇರಿಕೊಂಡಿತು. ಈ ಒಕ್ಕೂಟವು ಅಮೆರಿಕ ಮತ್ತು ಇತರ ಪಾಲುದಾರ ರಾಷ್ಟ್ರಗಳನ್ನು ಒಂದೆಡೆ ತರುತ್ತದೆ, ಇದು ಜಾಗತಿಕ ಸಿಲಿಕಾನ್ ಪೂರೈಕೆ ಸರಪಳಿಯನ್ನು ಭದ್ರಪಡಿಸುವುದರ ಮೇಲೆ ಗಮನ ಹರಿಸುತ್ತದೆ. ನಿರ್ಣಾಯಕ ಖನಿಜಗಳು ಮತ್ತು ಫ್ಯಾಬ್ರಿಕೇಶನ್‌ನಿಂದ ಹಿಡಿದು ಸುಧಾರಿತ AI ವ್ಯವಸ್ಥೆಗಳು ಮತ್ತು ನಿಯೋಜನೆ ಮೂಲಸೌಕರ್ಯಗಳವರೆಗೆ ಸಂಪೂರ್ಣ "ಸಿಲಿಕಾನ್ ಸ್ಟಾಕ್" ಅನ್ನು ಕಾಯ್ದುಕೊಳ್ಳುವುದು ಇದರ ಗುರಿಯಾಗಿದೆ. ಇದರ ಮಿಷನ್ ಸರಳವಾಗಿದೆ. ಪೂರೈಕೆ ಸರಪಳಿಗಳು ತೀರಾ ಕನಿಷ್ಠ ಜನರ ಕೈಯಲ್ಲಿರದಂತೆ ನೋಡಿಕೊಳ್ಳುವುದು. ಆರ್ಥಿಕ ಒತ್ತಡಗಳನ್ನು ಎದುರಿಸುವುದು. ಈ ಶತಮಾನವನ್ನು ನಿರ್ಣಯಿಸುವ ತಂತ್ರಜ್ಞಾನಗಳನ್ನು ಮುಕ್ತ, ಪ್ರಜಾಸತ್ತಾತ್ಮಕ ರಾಷ್ಟ್ರಗಳ ಕೈಯಲ್ಲಿಡುವುದು. ಭಾರತಕ್ಕೆ, ಇದು ತನ್ನ ಸೆಮಿಕಂಡಕ್ಟರ್ ಆಕಾಂಕ್ಷೆಗಳು ಈಗ ತನ್ನ ಸ್ವಂತ ಗಡಿಗಳನ್ನು ಮೀರಿ ತಲುಪುತ್ತಿವೆ ಎಂಬುದಕ್ಕೆ ಪುರಾವೆಯಾಗಿದೆ.

ಎಲ್ಲವೂ ಒಂದಾಗುವ ಸ್ಥಳ

ಇದೇ ಕಾರಣಕ್ಕಾಗಿ 'ಸೆಮಿಕಾನ್ ಇಂಡಿಯಾ 2026' ಬರಿ ಪ್ರದರ್ಶನವಲ್ಲ. ಯಶೋಭೂಮಿಯಲ್ಲಿ ಮೂರು ದಿನಗಳ ಕಾಲ, 600 ಕ್ಕೂ ಹೆಚ್ಚು ಪ್ರದರ್ಶಕರು, 300 ಅಂತಾರಾಷ್ಟ್ರೀಯ ಕಂಪನಿಗಳು 15,000 ಚದರ ಮೀಟರ್ ಜಾಗವನ್ನು ತುಂಬಲಿವೆ ಮತ್ತು 150 ಕ್ಕೂ ಹೆಚ್ಚು ಪ್ರಸಿದ್ಧ ಭಾಷಣಕಾರರು ಜ್ಞಾನ ಮತ್ತು ಒಳನೋಟಗಳನ್ನು ಹಂಚಿಕೊಳ್ಳಲಿದ್ದಾರೆ. ಆರು ರಾಷ್ಟ್ರೀಯ ಪೆವಿಲಿಯನ್‌ಗಳು ಮತ್ತು 12 ರಾಜ್ಯ ಪೆವಿಲಿಯನ್‌ಗಳು ಸ್ಟಾರ್ಟ್‌ಅಪ್ ಶೋಕೇಸ್, ವಿದ್ಯಾರ್ಥಿಗಳ ಹ್ಯಾಕಥಾನ್, ಕಾರ್ಯಪಡೆ ಅಭಿವೃದ್ಧಿ ಪೆವಿಲಿಯನ್ ಮತ್ತು ಮಹಿಳಾ ವೇದಿಕೆಯ ಪಕ್ಕದಲ್ಲಿ ಇರಲಿವೆ. ಪ್ರತಿಯೊಂದೂ ಭಾರತವು ಐದು ವರ್ಷಗಳಿಂದ ನಿರ್ಮಿಸಿದ ಪರಿಸರ ವ್ಯವಸ್ಥೆಯ ಸಣ್ಣ ಕಿಟಕಿಯಾಗಿದೆ.

ಚಿಪ್ ಅನ್ನು ವಿನ್ಯಾಸಗೊಳಿಸಲು ವರ್ಷಗಳು ಮತ್ತು ತಯಾರಿಸಲು ತಿಂಗಳುಗಳು ಬೇಕಾಗುತ್ತವೆ, ಆದರೆ ಅದು ಚಾಲನೆ ನೀಡುವ ಪ್ರತಿಯೊಂದು ಫೋನ್, ಕಾರು ಮತ್ತು ಆಸ್ಪತ್ರೆಯ ಉಪಕರಣದ ಒಳಗೆ ಅದರ ಪ್ರಭಾವವು ಹಲವು ಕಾಲ ಉಳಿಯುತ್ತದೆ. ಇಂದು ನಿಮ್ಮ ಜೀವನದಲ್ಲಿರುವ ಪ್ರತಿಯೊಂದು ಸಾಧನವೂ ಎಲ್ಲೋ, ಯಾರೋ ಒಬ್ಬರು ಆ ಚಿಪ್ ಅನ್ನು ಮೊದಲು ನಿರ್ಮಿಸಿರುವುದನ್ನು ಅವಲಂಬಿಸಿರುತ್ತದೆ. ಸೆಮಿಕಾನ್ ಇಂಡಿಯಾ 2026 ಎಂಬುದು ತಾನು ಆ 'ಯಾರೋ ಒಬ್ಬರು' ಆಗಲು ಬಯಸುತ್ತೇನೆ ಎಂಬ ಭಾರತದ ಘೋಷಣೆಯಾಗಿದೆ. ನಾಳೆಯಿಂದ ಅಲ್ಲ. ಕೇವಲ ಈಗಿನಿಂದಲೇ.

References

Ministry of Electronics & IT:

• https://www.pib.gov.in/PressReleasePage.aspx?PRID=2300831&reg=48&lang=2
• https://www.pib.gov.in/PressReleasePage.aspx?PRID=2230648&reg=3&lang=1
• https://www.pib.gov.in/PressReleasePage.aspx?PRID=2238195&reg=1&lang=1
• https://www.pib.gov.in/PressReleasePage.aspx?PRID=2291171&reg=48&lang=2
• https://ashwinivaishnaw.substack.com/p/how-we-are-building-indias-semiconductor
• https://www.ism.gov.in/semicon-india-2026
• https://www.semiconindia.org/

PIB Backgrounders:

• https://www.pib.gov.in/FactsheetDetails.aspx?Id=150860&reg=48&lang=2
• https://www.pib.gov.in/PressNoteDetails.aspx?id=156978&NoteId=156978&ModuleId=3&reg=48&lang=2

Click here for pdf file

*****