Economy
ಜಿಎಸ್‌ಟಿ ಸುಧಾರಣೆ: ಕಾಫಿ ತೋಟಗಳಿಂದ ಟೆಕ್ ಹಬ್‌ಗಳವರೆಗೆ, ಕರ್ನಾಟಕದ ಬೆಳವಣಿಗೆಗೆ ಉತ್ತೇಜನ
Posted On:
24 OCT 2025 09:20 AM
ಪ್ರಮುಖ ಮಾರ್ಗಸೂಚಿಗಳು
- ಭಾರತದ ಒಟ್ಟು ಕಾಫಿ ಉತ್ಪಾದನೆಯ 71% ರಷ್ಟು ಕೊಡುಗೆ ನೀಡುವ ಕಾಫಿ ವಲಯಕ್ಕೆ ಉತ್ತೇಜನ; ಇನ್‌ಸ್ಟಂಟ್ ಕಾಫಿಯ ಮೇಲಿನ ಜಿಎಸ್‌ಟಿ (GST) ಯನ್ನು 5% ಗೆ ಇಳಿಸಿರುವುದರಿಂದ ಅದು 11–12% ರಷ್ಟು ಅಗ್ಗವಾಗಲಿದ್ದು, ಸಣ್ಣ ಬೆಳೆಗಾರರು ಮತ್ತು ರಫ್ತುದಾರರಿಗೆ ಬಲ ನೀಡಲಿದೆ.
- 26 ಲಕ್ಷ ರೈತರಿಗೆ ಡೈರಿ ವಲಯದಲ್ಲಿ ಪರಿಹಾರ: ಹಾಲು ಮತ್ತು ಪನೀರ್ ತೆರಿಗೆ ಮುಕ್ತವಾಗಿದ್ದು, ತುಪ್ಪ ಮತ್ತು ಬೆಣ್ಣೆ ೫–೭% ಅಗ್ಗವಾಗಲಿವೆ
- ಅಡಿಕೆ, ಕಾಯರ್ ಮತ್ತು ಸಮುದ್ರ ಉತ್ಪನ್ನಗಳ ಮೇಲಿನ ಜಿಎಸ್‌ಟಿ ದರವನ್ನು 5% ಗೆ ಇಳಿಸಿರುವುದರಿಂದ ಕರಾವಳಿ ಪ್ರದೇಶಕ್ಕೆ ಉತ್ತೇಜನ ದೊರೆತಿದೆ. ಇದರಿಂದ ಮಹಿಳಾ ನೇತೃತ್ವದ ಎಂ.ಎಸ್.ಎಂ.ಇ ಗಳು ಮತ್ತು ಕರಾವಳಿಯ ಜೀವನೋಪಾಯಕ್ಕೆ ಅನುಕೂಲವಾಗಲಿದೆ.
- ಟ್ರಾಕ್ಟರ್‌ಗಳು, ಯಂತ್ರೋಪಕರಣಗಳು, ಸಿಮೆಂಟ್ ಮತ್ತು ಗ್ರಾನೈಟ್ 6–8% ರಷ್ಟು ಅಗ್ಗವಾಗುವುದರಿಂದ ಕೈಗಾರಿಕಾ ಕ್ಷೇತ್ರಕ್ಕೆ ಉತ್ತೇಜನ ದೊರೆಯಲಿದೆ, ಇದು ಗ್ರಾಮೀಣ ಯಾಂತ್ರೀಕರಣ ಮತ್ತು ನಿರ್ಮಾಣ ಉದ್ಯೋಗಗಳನ್ನು ಹೆಚ್ಚಿಸುತ್ತದೆ.
- ಇಳಕಲ್ ಸೀರೆ, ಬೀದರಿವೇರ್, ರೋಸ್‌ವುಡ್ ಇನ್ಲೇ ಮತ್ತು ಡ್ರೋನ್‌ಗಳ ಮೇಲಿನ ಜಿಎಸ್‌ಟಿ (GST) ಯನ್ನು 5% ಗೆ ಇಳಿಸಿರುವುದರಿಂದ ಕರಕುಶಲ ಮತ್ತು ನಾವೀನ್ಯತೆಗೆ ಉತ್ತೇಜನ ದೊರೆತಿದೆ, ಇದು ಕುಶಲಕರ್ಮಿಗಳು ಮತ್ತು ಟೆಕ್ ಸ್ಟಾರ್ಟ್‌ಅಪ್‌ಗಳಿಗೆ ಬೆಂಬಲ ನೀಡುತ್ತದೆ.
ಪರಿಚಯ
ಕರ್ನಾಟಕವು ಸಂಪ್ರದಾಯ ಮತ್ತು ತಂತ್ರಜ್ಞಾನದ ಸಂಗಮದಲ್ಲಿದೆ. ಕೂರ್ಗ್‌ನ ಕಾಫಿ ತೋಟಗಳ ಸುವಾಸನೆಯು ಪೀಣ್ಯದಿಂದ ಹೊಸೂರಿನವರೆಗಿನ ಕೈಗಾರಿಕಾ ಯಂತ್ರೋಪಕರಣಗಳ ಸದ್ದು ಮತ್ತು ಜತೆಗೂಡುತ್ತದೆ. ದಕ್ಷಿಣ ಕನ್ನಡದ ಕರಾವಳಿ ಮೀನುಗಾರಿಕೆಯಿಂದ ಹಿಡಿದು ಮೈಸೂರು ಮತ್ತು ಬೀದರ್‌ನ ಕರಕುಶಲ ಕ್ಲಸ್ಟರ್‌ಗಳವರೆಗೆ, ಈ ರಾಜ್ಯದ ಆರ್ಥಿಕತೆಯು ಭಾರತದ ವೈವಿಧ್ಯತೆ, ಸ್ಥಿತಿಸ್ಥಾಪಕತ್ವ ಮತ್ತು ಉದ್ಯಮಶೀಲತಾ ಮನೋಭಾವವನ್ನು ಪ್ರತಿಬಿಂಬಿಸುತ್ತದೆ.
ಇತ್ತೀಚಿನ ಜಿಎಸ್‌ಟಿ ದರ ತರ್ಕಬದ್ಧಗೊಳಿಸುವಿಕೆಯು (GST rate rationalisation) ಕರ್ನಾಟಕದ ಆರ್ಥಿಕತೆಗೆ ಒಂದು ಪ್ರಮುಖ ಮೈಲಿಗಲ್ಲಾಗಿದೆ, ಇದು ಕೃಷಿ, ಉತ್ಪಾದನೆ ಮತ್ತು ಸೇವೆಗಳಾದ್ಯಂತ ಪರಿಹಾರವನ್ನು ನೀಡುತ್ತದೆ. ಕಾಫಿ, ಡೈರಿ, ಉಡುಪುಗಳು, ಕರಕುಶಲ ವಸ್ತುಗಳು, ಕಾಯರ್ ಮತ್ತು ಅಗತ್ಯ ಕೈಗಾರಿಕಾ ಸಾಮಗ್ರಿಗಳಂತಹ ಪ್ರಮುಖ ಸರಕುಗಳ ಮೇಲಿನ ತೆರಿಗೆ ದರಗಳನ್ನು ಕಡಿಮೆ ಮಾಡುವುದರಿಂದ, ಈ ಸುಧಾರಣೆಗಳು ಕೈಗೆಟುಕುವ ದರಗಳನ್ನು ಹೆಚ್ಚಿಸಲು, ದೇಶೀಯ ಬೇಡಿಕೆಯನ್ನು ಉತ್ತೇಜಿಸಲು ಮತ್ತು ಎಂ.ಎಸ್.ಎಂ.ಇ ಗಳು ಹಾಗೂ ರಫ್ತುದಾರರ ಸ್ಪರ್ಧಾತ್ಮಕತೆಯನ್ನು ಬಲಪಡಿಸಲು ಸಿದ್ಧವಾಗಿವೆ.
ಹೊಸ ತೆರಿಗೆ ವಿನ್ಯಾಸದಿಂದಾಗಿ, ಕರ್ನಾಟಕದ ರೈತರು, ಕುಶಲಕರ್ಮಿಗಳು ಮತ್ತು ಉದ್ಯಮಿಗಳು ಕಡಿಮೆ ತೆರಿಗೆ ಅನುಸರಣಾ ವೆಚ್ಚ (compliance costs), ಬಲಿಷ್ಠ ಮೌಲ್ಯ ಸರಪಳಿಗಳು ಮತ್ತು ವಿಸ್ತೃತ ಮಾರುಕಟ್ಟೆ ಪ್ರವೇಶದಿಂದ ಪ್ರಯೋಜನ ಪಡೆಯಲಿದ್ದಾರೆ. ಈ ಸುಧಾರಣೆಯು ತೆರಿಗೆಯನ್ನು ಸರಳೀಕರಿಸುವ ಭಾರತದ ವಿಶಾಲ ಗುರಿಯೊಂದಿಗೆ ಹೊಂದಿಕೆಯಾಗಿದ್ದು, ಸಮಗ್ರ, ನಾವೀನ್ಯತೆ-ನೇತೃತ್ವದ ಮತ್ತು ಸುಸ್ಥಿರ ಬೆಳವಣಿಗೆಯ ಕರ್ನಾಟಕದ ದೃಷ್ಟಿಕೋನವನ್ನು ಬಲಪಡಿಸುತ್ತದೆ
ಕೃಷಿ ಮತ್ತು ಗ್ರಾಮೀಣ ಜೀವನೋಪಾಯ
ಕಾಫಿ
ಕರ್ನಾಟಕವು ಭಾರತದ ಕಾಫಿ ಆರ್ಥಿಕತೆಯ ಕೇಂದ್ರವಾಗಿದೆ. ಇದು ದೇಶದ ಒಟ್ಟು ಉತ್ಪಾದನೆಯ ಸುಮಾರು 71% ರಷ್ಟು ಕೊಡುಗೆ ನೀಡುತ್ತಿದ್ದು, ಕೊಡಗು, ಚಿಕ್ಕಮಗಳೂರು ಮತ್ತು ಹಾಸನ ಜಿಲ್ಲೆಗಳಲ್ಲಿ ಕಾಫಿ ತೋಟಗಳು ಕೇಂದ್ರೀಕೃತವಾಗಿವೆ. ಈ ವಲಯದಲ್ಲಿ ಸಣ್ಣ ಮತ್ತು ಅತಿ ಸಣ್ಣ ಬೆಳೆಗಾರರೇ ಹೆಚ್ಚಾಗಿದ್ದು, ಅವರು ರಾಷ್ಟ್ರಮಟ್ಟದಲ್ಲಿ ಕಾಫಿ ಕೃಷಿ ಮತ್ತು ಸಂಸ್ಕರಣೆಯಲ್ಲಿ ತೊಡಗಿರುವ 6.7 ಲಕ್ಷ ವ್ಯಕ್ತಿಗಳ ಭಾಗವಾಗಿದ್ದಾರೆ. ಇವರಲ್ಲಿ ಬಹುಪಾಲು ಜನರು ಕರ್ನಾಟಕದ ಮಲೆನಾಡು ಪ್ರದೇಶದಲ್ಲಿ ನೆಲೆಸಿದ್ದಾರೆ.
ಕಾಫಿ ಎಕ್ಸ್‌ಟ್ರ್ಯಾಕ್ಟ್‌ಗಳು, ಎಸೆನ್ಸ್‌ಗಳು ಮತ್ತು ಇನ್‌ಸ್ಟಂಟ್ ಕಾಫಿಯ ಮೇಲಿನ ಜಿಎಸ್‌ಟಿ ದರವನ್ನು 18% ರಿಂದ 5% ಗೆ ಇಳಿಸಿರುವುದು ಒಂದು ಪ್ರಮುಖ ಆರ್ಥಿಕ ಉತ್ತೇಜನವಾಗಿದೆ ಮತ್ತು ಚಿಲ್ಲರೆ ಬೆಲೆಗಳನ್ನು 11–12% ರಷ್ಟು ಕಡಿಮೆ ಮಾಡುವ ನಿರೀಕ್ಷೆಯಿದೆ. ಈ ಬದಲಾವಣೆಯು ದೇಶೀಯ ಬೇಡಿಕೆಯನ್ನು ಉತ್ತೇಜಿಸುತ್ತದೆ, ಸಣ್ಣ ಸಂಸ್ಕಾರಕರು ಮತ್ತು ಸಹಕಾರಿ ಸಂಸ್ಥೆಗಳ ಲಾಭಾಂಶವನ್ನು ಸುಧಾರಿಸುತ್ತದೆ ಮತ್ತು ಭಾರತದ ತಲಾವಾರು ಕಾಫಿ ಬಳಕೆಗೂ ಮತ್ತು ಜಾಗತಿಕ ಬಳಕೆಗೂ ಇರುವ ಅಂತರವನ್ನು ಕಡಿಮೆ ಮಾಡುತ್ತದೆ.
ಕರ್ನಾಟಕದ ನೆರಳಿನಲ್ಲಿ ಬೆಳೆಯುವ ಅರೇಬಿಕಾ ಮತ್ತು ರೋಬಸ್ಟಾ ತಳಿಗಳಾದ ಕೂರ್ಗ್ ಅರೇಬಿಕಾ, ಚಿಕ್ಕಮಗಳೂರು ಅರೇಬಿಕಾ ಮತ್ತು ಬಾಬಾಬುಡನ್‌ಗಿರಿ ಅರೇಬಿಕಾ (ಇವೆಲ್ಲವೂ GI-ಟ್ಯಾಗ್ ಪಡೆದಿವೆ), ಇಟಲಿ, ಜರ್ಮನಿ ಮತ್ತು ಸ್ವಿಟ್ಜರ್‌ಲ್ಯಾಂಡ್‌ನಲ್ಲಿ ಬಲವಾದ ರಫ್ತು ಬೇಡಿಕೆಯನ್ನು ಹೊಂದಿವೆ. ದರ ಕಡಿತವು ದೇಶೀಯ ಮತ್ತು ಜಾಗತಿಕ ಮಾರುಕಟ್ಟೆಗಳಲ್ಲಿ ಕರ್ನಾಟಕದ ಉತ್ಪಾದಕರ ಸ್ಪರ್ಧಾತ್ಮಕತೆಯನ್ನು ಮತ್ತಷ್ಟು ಬಲಪಡಿಸುತ್ತದೆ.
ಡೈರಿ
ಕರ್ನಾಟಕ ಹಾಲು ಮಹಾಮಂಡಳಿ (KMF) ನೇತೃತ್ವದ ರಾಜ್ಯದ ಡೈರಿ ವಲಯವು ಗ್ರಾಮೀಣ ಆರ್ಥಿಕತೆಯ ಮೂಲಾಧಾರವಾಗಿದೆ. ಇದು 26 ಲಕ್ಷಕ್ಕೂ ಹೆಚ್ಚು ಹಾಲು ಉತ್ಪಾದಕರಿಗೆ ಬೆಂಬಲ ನೀಡುತ್ತಿದ್ದು, ಅವರಲ್ಲಿ ಹೆಚ್ಚಿನವರು ಸಣ್ಣ ಮತ್ತು ಅತಿ ಸಣ್ಣ ರೈತರಾಗಿದ್ದಾರೆ.ಬೆಂಗಳೂರು, ಮೈಸೂರು, ಹಾಸನ ಮತ್ತು ತುಮಕೂರಿನಂತಹ ಪ್ರಮುಖ ಸಂಸ್ಕರಣಾ ಕೇಂದ್ರಗಳನ್ನು ಒಳಗೊಂಡಂತೆ ರಾಜ್ಯಾದ್ಯಂತ 15,000 ಕ್ಕೂ ಹೆಚ್ಚು ಪ್ರಾಥಮಿಕ ಡೈರಿ ಸಹಕಾರಿ ಸಂಘಗಳಿದ್ದು, ಈ ವಲಯವು ಗ್ರಾಮೀಣ ಮತ್ತು ಅರೆ-ನಗರ ಪ್ರದೇಶಗಳಲ್ಲಿ ಸುಮಾರು 22 ಲಕ್ಷ ಜನರಿಗೆ ಜೀವನೋಪಾಯವನ್ನು ಒದಗಿಸುತ್ತದೆ.
ಕೆ.ಎಂ.ಎಫ್ ನ ಪ್ರಮುಖ ಬ್ರ್ಯಾಂಡ್ ಆದ ನಂದಿನಿ, ಗ್ರಾಮೀಣ ಉತ್ಪಾದಕರನ್ನು ನಗರ ಗ್ರಾಹಕರೊಂದಿಗೆ ಸಂಪರ್ಕಿಸುವ ಮೂಲಕ ಸಹಕಾರಿ ಯಶಸ್ಸಿನ ಸಂಕೇತವಾಗಿ ಮಾರ್ಪಟ್ಟಿದೆ. 2023-24ರ ಹಣಕಾಸು ವರ್ಷದಲ್ಲಿ, ಕರ್ನಾಟಕವು 13.46 ಮಿಲಿಯನ್ ಟನ್ ಹಾಲು ಉತ್ಪಾದಿಸಿತು ಮತ್ತು ಕೆ.ಎಂ.ಎಫ್ ದಿನಕ್ಕೆ ಸರಾಸರಿ 52.7 ಲಕ್ಷ ಲೀಟರ್ ಹಾಲು ಮಾರಾಟ ಮಾಡಿ, ಭಾರತದ ಎರಡನೇ ಅತಿದೊಡ್ಡ ಡೈರಿ ಸಹಕಾರಿಯಾಗಿ ಸ್ಥಾನ ಪಡೆಯಿತು.
ಇತ್ತೀಚಿನ ಜಿಎಸ್‌ಟಿ ಕಡಿತವು (UHT ಹಾಲು ಮತ್ತು ಪನೀರ್ ಮೇಲೆ 5% ನಿಂದ ಶೂನ್ಯಕ್ಕೆ, ಮತ್ತು ತುಪ್ಪ ಹಾಗೂ ಬೆಣ್ಣೆ ಮೇಲೆ 12% ನಿಂದ 5% ಗೆ) ಚಿಲ್ಲರೆ ಬೆಲೆಗಳನ್ನು 5–7% ರಷ್ಟು ಕಡಿಮೆ ಮಾಡುತ್ತದೆ. ಇದು ಮೌಲ್ಯವರ್ಧಿತ ಉತ್ಪನ್ನಗಳಿಗೆ ಬೇಡಿಕೆಯನ್ನು ಹೆಚ್ಚಿಸುತ್ತದೆ ಮತ್ತು ಸಹಕಾರಿ ಸಂಸ್ಥೆಗಳ ಲಾಭಾಂಶವನ್ನು ಬಲಪಡಿಸುತ್ತದೆ. ಈ ದ್ವಿಗುಣ ಪ್ರಯೋಜನವು ಗ್ರಾಹಕರ ಖರೀದಿಯ ಸಾಮರ್ಥ್ಯವನ್ನು ಹೆಚ್ಚಿಸುವುದರ ಜೊತೆಗೆ, ಕೆ.ಎಂ.ಎಫ್ ತನ್ನ ರೈತ ಸದಸ್ಯರಿಗೆ ಉತ್ತಮ ಮತ್ತು ಸ್ಥಿರ ಬೆಲೆಗಳನ್ನು ನೀಡಲು ಅನುವು ಮಾಡಿಕೊಡುತ್ತದೆ. ಹೀಗಾಗಿ, ಡೈರಿ ವಲಯವು ಕರ್ನಾಟಕದಲ್ಲಿ ಗ್ರಾಮೀಣ ಆದಾಯ ಮತ್ತು ಮಹಿಳಾ ಸಬಲೀಕರಣದ ಪ್ರಮುಖ ಚಾಲಕಶಕ್ತಿಯಾಗಿ ಹೊರಹೊಮ್ಮುತ್ತದೆ.
ಕರಾವಳಿ ಮತ್ತು ಕುಟೀರ ಕೈಗಾರಿಕೆಗಳು
ಗೇರುಬೀಜ
ದಕ್ಷಿಣ ಕನ್ನಡ ಮತ್ತು ಉಡುಪಿ ಕರಾವಳಿ ಜಿಲ್ಲೆಗಳು ಗೇರುಬೀಜ ಸಂಸ್ಕರಣೆಯ ಮುಖ್ಯ ಕೇಂದ್ರಗಳಾಗಿವೆ. ಇದು ಕಾರ್ಮಿಕ-ತೀವ್ರ ಉದ್ಯಮವಾಗಿದ್ದು, ಗ್ರಾಮೀಣ ಮತ್ತು ಸಾಮಾಜಿಕವಾಗಿ ದುರ್ಬಲ ಸಮುದಾಯಗಳ ಸಾವಿರಾರು ಮಹಿಳೆಯರಿಗೆ ಉದ್ಯೋಗ ನೀಡಿದೆ. ದಕ್ಷಿಣ ಕನ್ನಡವೊಂದರಲ್ಲೇ ಸುಮಾರು 66 ಸಂಸ್ಕರಣಾ ಘಟಕಗಳಿವೆ, ಇದು ಸ್ಥಳೀಯ ಆರ್ಥಿಕತೆಯ ಪ್ರಮುಖ ಭಾಗವಾಗಿದೆ.
ಸಂಸ್ಕರಿಸಿದ ಗೇರುಬೀಜದ ಮೇಲಿನ ಜಿಎಸ್‌ಟಿ ದರವನ್ನು 12% ರಿಂದ 5% ಗೆ ಇಳಿಸಿರುವುದರಿಂದ, ಬೆಲೆಗಳು 6–7% ರಷ್ಟು ಕಡಿಮೆಯಾಗುವ ನಿರೀಕ್ಷೆಯಿದೆ, ಇದು ಸಣ್ಣ ಸಂಸ್ಕಾರಕರು ಮತ್ತು ರಫ್ತುದಾರರ ಲಾಭಾಂಶವನ್ನು ಸುಧಾರಿಸುತ್ತದೆ. ಯುಎಇ, ಜಪಾನ್ ಮತ್ತು ನೆದರ್ಲ್ಯಾಂಡ್ಸ್ ಸೇರಿದಂತೆ ವಿವಿಧ ಸ್ಥಳಗಳಿಗೆ ಗೇರುಬೀಜದ ಕಾಳುಗಳನ್ನು ರಫ್ತು ಮಾಡುವ ಭಾರತವು ಜಾಗತಿಕ ಗೇರುಬೀಜ ವ್ಯಾಪಾರದಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಈ ಕ್ರಮವು ದೇಶೀಯ ಬೇಡಿಕೆಯನ್ನು ಹೆಚ್ಚಿಸಲು ಮತ್ತು ಕರ್ನಾಟಕದ ಕರಾವಳಿ ಮಹಿಳಾ ಕಾರ್ಮಿಕರಿಗೆ ಆದಾಯದ ಸ್ಥಿರತೆಯನ್ನು ಹೆಚ್ಚಿಸಲು ನಿರೀಕ್ಷಿಸಲಾಗಿದೆ.
ಕಾಯರ್
ತುಮಕೂರು, ಹಾಸನ, ಚಿಕ್ಕಮಗಳೂರು ಮತ್ತು ಕರಾವಳಿ ಕರ್ನಾಟಕದಾದ್ಯಂತ ಹರಡಿರುವ ಕಾಯರ್ ಕೈಗಾರಿಕೆಯು ಸಾಂಪ್ರದಾಯಿಕ ಕುಟೀರ ವಲಯವಾಗಿದೆ. ಇದು ಗ್ರಾಮೀಣ ಪ್ರದೇಶದಲ್ಲಿ, ವಿಶೇಷವಾಗಿ ಮಹಿಳೆಯರಿಗೆ, ಕೃಷಿಯೇತರ ಉದ್ಯೋಗವನ್ನು ಒದಗಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತದೆ. ಕರ್ನಾಟಕ ರಾಜ್ಯ ಕಾಯರ್ ಅಭಿವೃದ್ಧಿ ನಿಗಮ ಮತ್ತು ಕೇಂದ್ರೀಯ ಕಾಯರ್ ಮಂಡಳಿಯ ಬೆಂಬಲದೊಂದಿಗೆ, ಇದು ಮಹಿಳಾ ಸಬಲೀಕರಣ ಮತ್ತು ಗ್ರಾಮೀಣ ಜೀವನೋಪಾಯದ ಸೃಷ್ಟಿಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.
ರಾಷ್ಟ್ರಮಟ್ಟದಲ್ಲಿ, ಕಾಯರ್ ಉದ್ಯಮವು ಸುಮಾರು 5.5 ಲಕ್ಷ ಜನರಿಗೆ ಉದ್ಯೋಗ ನೀಡುತ್ತದೆ. ಪ್ರಮುಖ ತೆಂಗು ಉತ್ಪಾದಕ ರಾಜ್ಯವಾಗಿರುವ ಕರ್ನಾಟಕವು ಈ ವಲಯದ ವಿಸ್ತರಣೆಗೆ ಗಮನಾರ್ಹ ಸಾಮರ್ಥ್ಯವನ್ನು ಹೊಂದಿದೆ. ಭಾರತವು ಕಾಯರ್ ಉತ್ಪನ್ನಗಳ ವಿಶ್ವದ ಅತಿದೊಡ್ಡ ಉತ್ಪಾದಕ ಮತ್ತು ರಫ್ತುದಾರನಾಗಿದ್ದು, ಮುಖ್ಯವಾಗಿ ಯುಎಸ್‌ಎ ಮತ್ತು ಚೀನಾಕ್ಕೆ ರಫ್ತು ಮಾಡುತ್ತದೆ.
ಕಾಯರ್ ಚಾಪೆಗಳು, ರಗ್ಗುಗಳು ಮತ್ತು ಜಿಯೋ ಟೆಕ್ಸ್ಟೈಲ್‌ಗಳ ಮೇಲಿನ ಜಿಎಸ್‌ಟಿ ದರವನ್ನು 12% ರಿಂದ 5% ಗೆ ಇಳಿಸಿರುವುದು, ಅವುಗಳನ್ನು 6–7% ರಷ್ಟು ಅಗ್ಗವಾಗಿಸುತ್ತದೆ ಮತ್ತು ಸಿಂಥೆಟಿಕ್ ಉತ್ಪನ್ನಗಳ ವಿರುದ್ಧ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುತ್ತದೆ.
ಈ ಸುಧಾರಣೆಯು ತೆಂಗಿನ ಸಿಪ್ಪೆಯಿಂದ ತಯಾರಿಸಿದ ಪರಿಸರ ಸ್ನೇಹಿ ಉತ್ಪನ್ನಗಳನ್ನು ಉತ್ತೇಜಿಸುವ ಮೂಲಕ ವೃತ್ತಾಕಾರದ ಮತ್ತು ಹಸಿರು ಆರ್ಥಿಕತೆಗೆ ಬೆಂಬಲ ನೀಡುತ್ತದೆ, ಹಾಗೂ MSME ಗಳಿಗೆ ತಮ್ಮ ಕಾರ್ಯಾಚರಣೆಯನ್ನು ಹೆಚ್ಚಿಸಲು ಪ್ರೋತ್ಸಾಹ ನೀಡುತ್ತದೆ. ಜೊತೆಗೆ, ಇದು ಪ್ರಧಾನಮಂತ್ರಿಗಳ ಉದ್ಯೋಗ ಸೃಷ್ಟಿ ಕಾರ್ಯಕ್ರಮದಂತಹ (PMEGP) ರಾಷ್ಟ್ರೀಯ ಯೋಜನೆಗಳೊಂದಿಗೆ ಹೊಂದಿಕೊಂಡು, ಹೆಚ್ಚುವರಿ ಕೃಷಿಯೇತರ ಉದ್ಯೋಗಗಳನ್ನು, ವಿಶೇಷವಾಗಿ ಮಹಿಳೆಯರಿಗೆ ಸೃಷ್ಟಿಸುವ ಸಾಮರ್ಥ್ಯವನ್ನು ಹೊಂದಿದೆ.
ಮೀನುಗಾರಿಕೆ
ಕರ್ನಾಟಕದ 320 ಕಿ.ಮೀ. ಉದ್ದದ ಕರಾವಳಿ ತೀರವು ದಕ್ಷಿಣ ಕನ್ನಡ, ಉಡುಪಿ ಮತ್ತು ಉತ್ತರ ಕನ್ನಡ ಜಿಲ್ಲೆಗಳಲ್ಲಿದ್ದು, ಸಾವಿರಾರು ಸಾಂಪ್ರದಾಯಿಕ ಮೀನುಗಾರ ಕುಟುಂಬಗಳು ಮತ್ತು ಬಲವಾದ ಸಮುದ್ರಾಹಾರ ಸಂಸ್ಕರಣಾ ಉದ್ಯಮಕ್ಕೆ ಆಧಾರವಾಗಿದೆ. ಇದು ವಿಶೇಷವಾಗಿ ಮಹಿಳೆಯರಿಗೆ ಗಣನೀಯ ಉದ್ಯೋಗವನ್ನು ಒದಗಿಸುತ್ತದೆ. ಈ ವಲಯವು ಕರಾವಳಿಯ ಉದ್ದಕ್ಕೂ ಇರುವ ಸಂಸ್ಕರಣಾ ಘಟಕಗಳು, ಕೋಲ್ಡ್ ಸ್ಟೋರೇಜ್ ಘಟಕಗಳು ಮತ್ತು ರಫ್ತು ಕೇಂದ್ರಗಳಲ್ಲಿ ತೊಡಗಿರುವ ಲಕ್ಷಾಂತರ ಮೀನುಗಾರರು ಮತ್ತು ಕಾರ್ಮಿಕರಿಗೆ ಬೆಂಬಲ ನೀಡುತ್ತದೆ.
ಭಾರತದ ಕಡಲ ಮೀನು ಉತ್ಪಾದನೆಯಲ್ಲಿ ಕರ್ನಾಟಕವು ೫ನೇ ಸ್ಥಾನದಲ್ಲಿದೆ. ಹೆಚ್ಚಿನ ಮೀನು ದೇಶೀಯವಾಗಿ ಬಳಕೆಯಾದರೂ, ಸಂಸ್ಕರಿಸಿದ ಮತ್ತು ಸಂರಕ್ಷಿತ ಸಮುದ್ರಾಹಾರಗಳಿಗೆ (ಉದಾಹರಣೆಗೆ ಡಬ್ಬಿಯಲ್ಲಿಟ್ಟ, ಘನೀಕೃತ ಮತ್ತು ಸಿದ್ಧಪಡಿಸಿದ ಉತ್ಪನ್ನಗಳು) ದೇಶೀಯ ಮತ್ತು ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಬೇಡಿಕೆ ಹೆಚ್ಚುತ್ತಿದೆ.
ಸಂಸ್ಕರಿಸಿದ ಮೀನು ಮತ್ತು ಸಮುದ್ರ ಉತ್ಪನ್ನಗಳ ಮೇಲಿನ ಜಿಎಸ್‌ಟಿ ದರವನ್ನು 12% ರಿಂದ 5% ಗೆ ಇಳಿಸಿರುವುದು, ಡಬ್ಬಿಯಲ್ಲಿಟ್ಟ ಟ್ಯೂನಾ, ಘನೀಕೃತ ಸೀಗಡಿ ಮತ್ತು ಸಿದ್ಧಪಡಿಸಿದ ಮೀನು ಸಾರುಗಳಂತಹ ಉತ್ಪನ್ನಗಳನ್ನು ಸುಮಾರು 6–7% ರಷ್ಟು ಅಗ್ಗವಾಗಿಸುತ್ತದೆ, ಇದು ಮೀನುಗಾರಿಕೆ ಮೌಲ್ಯ ಸರಪಳಿಯಲ್ಲಿ ಮೌಲ್ಯವರ್ಧನೆಗೆ ಉತ್ತೇಜನ ನೀಡುತ್ತದೆ. ಈ ನೀತಿ ಬದಲಾವಣೆಯು ಸ್ಥಳೀಯ ಸಂಸ್ಕರಣೆಯನ್ನು ಪ್ರೋತ್ಸಾಹಿಸುತ್ತದೆ, ಹೆಚ್ಚು ಸ್ಥಿರವಾದ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತದೆ ಮತ್ತು ಅಸ್ಥಿರ ರಫ್ತು ಮಾರುಕಟ್ಟೆಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ.
ಸಮುದ್ರಾಹಾರ ಎಂ.ಎಸ್.ಎಂ.ಇ ಗಳು ಮತ್ತು ಸಹಕಾರಿ ಸಂಸ್ಥೆಗಳಿಗೆ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವುದರಿಂದ, ಈ ಸುಧಾರಣೆಯು ಕರಾವಳಿ ಜೀವನೋಪಾಯಕ್ಕೆ ನೇರ ಉತ್ತೇಜನ ನೀಡುತ್ತದೆ. ಇದು ರಾಜ್ಯದ ಪ್ರಮುಖ ನೈಸರ್ಗಿಕ ಸಂಪನ್ಮೂಲಗಳಲ್ಲಿ ಒಂದರಿಂದ ಹೆಚ್ಚಿನ ಮೌಲ್ಯವನ್ನು ಪಡೆಯಲು ಕರ್ನಾಟಕದ ಮೀನುಗಾರ ಸಮುದಾಯಗಳಿಗೆ ಸಹಾಯ ಮಾಡುತ್ತದೆ.
ಕೃಷಿ ಯಂತ್ರೋಪಕರಣಗಳು
ಟ್ರಾಕ್ಟರ್‌ಗಳು, ಕೃಷಿ ಯಂತ್ರೋಪಕರಣಗಳು ಮತ್ತು ಬಿಡಿಭಾಗಗಳ ಮೇಲಿನ ಜಿಎಸ್‌ಟಿ ಕಡಿತವು ಕರ್ನಾಟಕದಲ್ಲಿ ಗ್ರಾಮೀಣ ಉತ್ಪಾದಕತೆ ಮತ್ತು ಕೈಗಾರಿಕಾ ಬೆಳವಣಿಗೆಯನ್ನು ಹೆಚ್ಚಿಸುವ ಪ್ರಮುಖ ಹೆಜ್ಜೆಯಾಗಿದೆ.
78 ಲಕ್ಷಕ್ಕೂ ಹೆಚ್ಚು ರೈತರು, ಅವರಲ್ಲಿ ಹೆಚ್ಚಿನವರು ಸಣ್ಣ ಮತ್ತು ಅತಿ ಸಣ್ಣ ಹಿಡುವಳಿದಾರರಾಗಿದ್ದು, ಅವರಿಗೆ: ಟ್ರ್ಯಾಕ್ಟರ್‌ಗಳು ಮತ್ತು ಯಂತ್ರೋಪಕರಣಗಳ ಮೇಲಿನ ದರ ಕಡಿತವು 12% ರಿಂದ 5% ಗೆ, ಟ್ರ್ಯಾಕ್ಟರ್ ಬಿಡಿಭಾಗಗಳ ಮೇಲಿನ ದರ ಕಡಿತವು 18% ರಿಂದ 5% ಗೆ ಇಳಿಕೆಯಾಗಿರುವುದರಿಂದ, ಕೃಷಿ ಯಾಂತ್ರೀಕರಣದ ವೆಚ್ಚವು ಗಣನೀಯವಾಗಿ ಕಡಿಮೆಯಾಗಲಿದೆ.
ಉದಾಹರಣೆಗೆ, ₹8 ಲಕ್ಷ ಬೆಲೆಯ ಟ್ರ್ಯಾಕ್ಟರ್‌ನ ಮೇಲೆ, ಜಿಎಸ್‌ಟಿ ಘಟಕವು ಈಗ ₹96,000 ರಿಂದ ₹40,000 ಕ್ಕೆ ಇಳಿಯುತ್ತದೆ. ಇದರಿಂದ ರೈತರಿಗೆ ಸುಮಾರು ₹56,000 ನೇರ ಉಳಿತಾಯವಾಗುತ್ತದೆ. ಇದು ಅಗತ್ಯ ಉಪಕರಣಗಳನ್ನು ರೈತರು, ರೈತ ಉತ್ಪಾದಕ ಸಂಸ್ಥೆಗಳು (FPOs) ಮತ್ತು ಕಸ್ಟಮ್ ಹೈರಿಂಗ್ ಕೇಂದ್ರಗಳಿಗೆ ಹೆಚ್ಚು ಸುಲಭವಾಗಿ ತಲುಪುವಂತೆ ಮಾಡುತ್ತದೆ, ಯಾಂತ್ರೀಕರಣ ಮತ್ತು ಹೆಚ್ಚಿನ ಉತ್ಪಾದಕತೆಯನ್ನು ಬೆಂಬಲಿಸುತ್ತದೆ.
ಹಳೇ ಹುಬ್ಬಳ್ಳಿ-ಧಾರವಾಡ, ಬೆಳಗಾವಿ ಕೈಗಾರಿಕಾ ಕ್ಲಸ್ಟರ್‌ಗಳು ಮತ್ತು ಬೆಂಗಳೂರು ಆಟೋಮೋಟಿವ್ ಕಾರಿಡಾರ್‌ ಸಹ ಪ್ರಯೋಜನ ಪಡೆಯುತ್ತವೆ. ಏಕೆಂದರೆ ರಾಜ್ಯದಲ್ಲಿ ಟ್ರ್ಯಾಕ್ಟರ್ ಬಿಡಿಭಾಗಗಳು ಮತ್ತು ಯಂತ್ರೋಪಕರಣಗಳ ಘಟಕಗಳನ್ನು ತಯಾರಿಸುವ MSME ಗಳ ಬಲವಾದ ಜಾಲವಿದೆ. ಟೊಯೋಟಾ, ಟಿವಿಎಸ್, ಬಾಷ್ ಮತ್ತು ಹಲವಾರು ಇತರ ಪೂರಕ ಕೈಗಾರಿಕೆಗಳಿಗೆ ನೆಲೆಯಾಗಿರುವ ಕರ್ನಾಟಕದಲ್ಲಿ ಬೃಹತ್ ಆಟೋ ಘಟಕ ಉದ್ಯಮವೂ ಇದೆ.
ಹೊಸ ಜಿಎಸ್‌ಟಿ ರಚನೆಯಡಿಯಲ್ಲಿ ಕೃಷಿ ಯಂತ್ರೋಪಕರಣಗಳ ಬೇಡಿಕೆಯು ಹೆಚ್ಚಾಗುವ ನಿರೀಕ್ಷೆಯಿದ್ದು, ಇದು ಕೈಗಾರಿಕಾ ಉದ್ಯೋಗ (55,000 ಕ್ಕೂ ಹೆಚ್ಚು ಕಾರ್ಮಿಕರು) ಮತ್ತು ಗ್ರಾಮೀಣ ಆದಾಯ ಎರಡನ್ನೂ ಹೆಚ್ಚಿಸುತ್ತದೆ. ಕೈಗೆಟುಕುವ ಯಾಂತ್ರೀಕರಣವನ್ನು ಬಲವಾದ ಉತ್ಪಾದನಾ ಪರಿಸರ ವ್ಯವಸ್ಥೆಗಳೊಂದಿಗೆ ಜೋಡಿಸುವ ಮೂಲಕ, ಈ ಸುಧಾರಣೆಯು ಕರ್ನಾಟಕದಾದ್ಯಂತ ಗ್ರಾಮೀಣ ಮತ್ತು ಕೈಗಾರಿಕಾ ಬೆಳವಣಿಗೆಯ ಸುಸ್ಥಿರ ಚಕ್ರವನ್ನು ಸೃಷ್ಟಿಸುತ್ತದೆ.
ಉತ್ಪಾದನೆ ಮತ್ತು ಕೈಗಾರಿಕಾ ಬೆಳವಣಿಗೆ
ಜವಳಿ ಮತ್ತು ಸಿದ್ಧ ಉಡುಪುಗಳು
ಸಿದ್ಧ ಉಡುಪು ಮತ್ತು ಜವಳಿ ವಲಯವು ಕರ್ನಾಟಕದಲ್ಲಿ ಅತಿ ಹೆಚ್ಚು ಉದ್ಯೋಗ ಸೃಷ್ಟಿಸುವ ಕ್ಷೇತ್ರಗಳಲ್ಲಿ ಒಂದಾಗಿದೆ. ಬೆಂಗಳೂರು, ಬಳ್ಳಾರಿ, ಹುಬ್ಬಳ್ಳಿ–ಧಾರವಾಡ ಮತ್ತು ಮಂಡ್ಯದಲ್ಲಿ ಇದರ ಪ್ರಮುಖ ಕೇಂದ್ರಗಳಿವೆ. “ಭಾರತದ ಉಡುಪು ರಾಜಧಾನಿ” ಎಂದೇ ಹೆಸರಾದ ಬೆಂಗಳೂರು 400ಕ್ಕೂ ಹೆಚ್ಚು ಅಪ್ಯಾರಲ್ ಘಟಕಗಳನ್ನು ಹೊಂದಿದ್ದು, ಟಾಮಿ ಹಿಲ್ಫಿಗರ್, ನೈಕಿ ಮತ್ತು ಅಡಿಡಾಸ್‌ನಂತಹ ಜಾಗತಿಕ ಬ್ರ್ಯಾಂಡ್‌ಗಳಿಗೆ ಪ್ರಮುಖ ಸೋರ್ಸಿಂಗ್ ಕೇಂದ್ರವಾಗಿದೆ.
ಈ ಉದ್ಯಮವು ಸುಮಾರು ಆರು ಲಕ್ಷ ಜನರಿಗೆ ಜೀವನೋಪಾಯ ಒದಗಿಸುತ್ತದೆ ಮತ್ತು ಉದ್ಯೋಗ ನೀಡುವಿಕೆಯಲ್ಲಿ ಭಾರತದಲ್ಲಿ ಎರಡನೇ ಅತಿದೊಡ್ಡ ಜವಳಿ ವಲಯವಾಗಿದೆ. ಕಾರ್ಮಿಕರಲ್ಲಿ ಹೆಚ್ಚಿನವರು ಮಹಿಳೆಯರಾಗಿದ್ದು, ಅನೇಕರು ಗ್ರಾಮೀಣ ಮತ್ತು ಕಡಿಮೆ ಆದಾಯದ ಹಿನ್ನೆಲೆಯಿಂದ ಬಂದವರು. ಕರ್ನಾಟಕವು ಭಾರತದ ಒಟ್ಟು ಉಡುಪು ಉತ್ಪಾದನೆಯಲ್ಲಿ 20% ಮತ್ತು ಜವಳಿ ರಫ್ತಿನಲ್ಲಿ 11% ರಷ್ಟಿದೆ, ಇದರ ಮೌಲ್ಯ ಸುಮಾರು ₹4,000 ಕೋಟಿ ಆಗಿದ್ದು, ಅಮೆರಿಕ ಸಂಯುಕ್ತ ಸಂಸ್ಥಾನವು ಪ್ರಮುಖ ರಫ್ತು ತಾಣವಾಗಿದೆ.
ಹೊಸ ಜಿಎಸ್‌ಟಿ ರಚನೆಯಡಿಯಲ್ಲಿ, 5% ದರಕ್ಕಾಗಿ ಮೌಲ್ಯ ಮಿತಿಯನ್ನು ₹1,000 ದಿಂದ ₹2,500 ಪ್ರತಿ ಉಡುಪು ಎಂದು ಹೆಚ್ಚಿಸಲಾಗಿದೆ. ಇದು ಎಂ.ಎಸ್.ಎಂ.ಇ ಅಪ್ಯಾರಲ್ ಘಟಕಗಳಿಗೆ ಪ್ರಮುಖ ಪರಿಹಾರ ನೀಡುತ್ತದೆ. ಈ ಸುಧಾರಣೆಯು ವ್ಯಾಪಕ ಶ್ರೇಣಿಯ ಉತ್ಪನ್ನಗಳ ಮೇಲಿನ ತೆರಿಗೆ ಹೊರೆಯನ್ನು ಕಡಿಮೆ ಮಾಡುತ್ತದೆ, ಬೆಲೆಯ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುತ್ತದೆ ಮತ್ತು ದೇಶೀಯ ಉತ್ಪಾದಕರಿಗೆ ಕಾರ್ಯನಿರ್ವಹಣಾ ಬಂಡವಾಳವನ್ನು ಸುಧಾರಿಸುತ್ತದೆ.
ಈ ಕ್ರಮವು ಕರ್ನಾಟಕದ ರಫ್ತು-ಆಧಾರಿತ ಉಡುಪು ಕ್ಲಸ್ಟರ್‌ಗಳನ್ನು ಬಲಪಡಿಸುತ್ತದೆ, ಮಹಿಳೆಯರ ಉದ್ಯೋಗವನ್ನು ಸುಧಾರಿಸುತ್ತದೆ ಮತ್ತು ದಾವಣಗೆರೆ ಹಾಗೂ ಬೆಳಗಾವಿಯಲ್ಲಿನ ನೂಲುವಿಕೆಯಿಂದ ಹಿಡಿದು ಬೆಂಗಳೂರು ಮತ್ತು ಬಳ್ಳಾರಿಯ ಉಡುಪು ಉತ್ಪಾದನೆಯವರೆಗೆ ರಾಜ್ಯದ ಜವಳಿ ಮೌಲ್ಯ ಸರಪಳಿಯಾದ್ಯಂತ ಬೇಡಿಕೆಯನ್ನು ಉತ್ತೇಜಿಸುವ ನಿರೀಕ್ಷೆಯಿದೆ.
ಗ್ರಾನೈಟ್
ರಾಮನಗರ, ಚಾಮರಾಜನಗರ, ಬಳ್ಳಾರಿ, ಕೊಪ್ಪಳ ಮತ್ತು ರಾಯಚೂರಿನಲ್ಲಿ ಗಣಿಗಾರಿಕೆ ಮತ್ತು ಸಂಸ್ಕರಣಾ ಕ್ಲಸ್ಟರ್‌ಗಳನ್ನು ಹೊಂದಿರುವ ಕರ್ನಾಟಕವು ಭಾರತದ ಗ್ರಾನೈಟ್ ಉದ್ಯಮದಲ್ಲಿ ಪ್ರಮುಖ ಶಕ್ತಿಯಾಗಿದೆ. ಈ ವಲಯವು ಕಲ್ಲು ಕ್ವಾರಿ ಕಾರ್ಮಿಕರು, ಯಂತ್ರ ನಿರ್ವಾಹಕರು ಮತ್ತು ಸಾರಿಗೆ ಸಿಬ್ಬಂದಿ ಸೇರಿದಂತೆ ಅನೇಕರಿಗೆ ಉದ್ಯೋಗ ಒದಗಿಸುತ್ತದೆ, ಅವರಲ್ಲಿ ಹಲವರು ಅಂಚಿನಲ್ಲಿರುವ ಮತ್ತು ಬುಡಕಟ್ಟು ಸಮುದಾಯಗಳಿಗೆ ಸೇರಿದವರಾಗಿದ್ದಾರೆ.
ರಾಜ್ಯವು ಭಾರತದ ಒಟ್ಟು ಗ್ರಾನೈಟ್ ರಫ್ತಿನಲ್ಲಿ ಸುಮಾರು 32% ರಷ್ಟು ಕೊಡುಗೆ ನೀಡುತ್ತದೆ, ಇದು ಜಾಗತಿಕ ಮಾರುಕಟ್ಟೆಯಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಭಾರತವು ಗ್ರಾನೈಟ್ ಅನ್ನು ಮುಖ್ಯವಾಗಿ ಚೀನಾಕ್ಕೆ ಕಚ್ಚಾ ಬ್ಲಾಕ್‌ಗಳಾಗಿ ರಫ್ತು ಮಾಡುತ್ತದೆ. ಗ್ರಾನೈಟ್ ಬ್ಲಾಕ್‌ಗಳ ಮೇಲಿನ ಜಿಎಸ್‌ಟಿಯನ್ನು 12% ರಿಂದ 5%ಗೆ ಇಳಿಸಿರುವುದರಿಂದ, ಸಂಸ್ಕರಣಾ ಘಟಕಗಳಿಗೆ ಕಚ್ಚಾ ಸಾಮಗ್ರಿಯ ವೆಚ್ಚವು 6–7% ರಷ್ಟು ಕಡಿಮೆಯಾಗಲಿದೆ. ಇದರಿಂದ ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ಲಾಭಾಂಶವು ನೇರವಾಗಿ ಸುಧಾರಿಸುತ್ತದೆ.
ಈ ವೆಚ್ಚದ ಅನುಕೂಲವು ಬ್ರೆಜಿಲ್ ಮತ್ತು ನಾರ್ವೆಯಂತಹ ಜಾಗತಿಕ ಉತ್ಪಾದಕರ ವಿರುದ್ಧ ಭಾರತೀಯ ಗ್ರಾನೈಟ್‌ನ ಬೆಲೆಯ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆ. ಜೊತೆಗೆ, ಇದು ಕರ್ನಾಟಕದ ಕ್ವಾರಿ ಪ್ರದೇಶಗಳಲ್ಲಿ ಆಧುನಿಕ ಯಂತ್ರೋಪಕರಣಗಳು, ಸುರಕ್ಷತೆ ಮತ್ತು ಪರಿಸರ ಮಾನದಂಡಗಳಲ್ಲಿ ಹೆಚ್ಚಿನ ಹೂಡಿಕೆಯನ್ನು ಪ್ರೋತ್ಸಾಹಿಸುತ್ತದೆ.
ಸಿಮೆಂಟ್
ಕಲಬುರಗಿ ಮತ್ತು ಬಳ್ಳಾರಿ ಪ್ರದೇಶಗಳಲ್ಲಿ ಕೇಂದ್ರೀಕೃತವಾಗಿರುವ ಕರ್ನಾಟಕದ ಸಿಮೆಂಟ್ ಉದ್ಯಮವು ಉತ್ತರ ಕರ್ನಾಟಕದ ಕೈಗಾರಿಕಾ ಅಭಿವೃದ್ಧಿಗೆ ಮೂಲಾಧಾರವಾಗಿದೆ. ಇಲ್ಲಿನ ಸಮೃದ್ಧ ಸುಣ್ಣದ ಕಲ್ಲು ನಿಕ್ಷೇಪಗಳು ಇದಕ್ಕೆ ಪೂರಕವಾಗಿವೆ. ಈ ವಲಯವು ಇಂಜಿನಿಯರ್‌ಗಳು, ತಂತ್ರಜ್ಞರು ಮತ್ತು ಸಾರಿಗೆ ಸಿಬ್ಬಂದಿ ಸೇರಿದಂತೆ ಸಾವಿರಾರು ನುರಿತ ಮತ್ತು ಅರೆ-ನುರಿತ ಕಾರ್ಮಿಕರಿಗೆ ಉದ್ಯೋಗ ನೀಡುತ್ತದೆ ಮತ್ತು ವ್ಯಾಪಕವಾದ ಪೂರಕ ಸೇವೆಗಳ ಜಾಲವನ್ನು ಬೆಂಬಲಿಸುತ್ತದೆ.
ಅಲ್ಟ್ರಾಟೆಕ್ ಸಿಮೆಂಟ್ ಮತ್ತು ಎಸಿಸಿಯಂತಹ ಪ್ರಮುಖ ಕಂಪನಿಗಳು ಇಲ್ಲಿ ಕಾರ್ಯಾಚರಿಸುವುದರಿಂದ, ಕರ್ನಾಟಕವು ದಕ್ಷಿಣ ಭಾರತದಾದ್ಯಂತ ನಿರ್ಮಾಣ ಮತ್ತು ಮೂಲಸೌಕರ್ಯ ವಲಯಗಳಿಗೆ ಪ್ರಮುಖ ಪೂರೈಕೆದಾರವಾಗಿದೆ. ಸಿಮೆಂಟ್ ಮೇಲಿನ ಜಿಎಸ್‌ಟಿ ದರವನ್ನು 28% ರಿಂದ 18% ಗೆ ಇಳಿಸಿರುವುದು ಅತ್ಯಂತ ಮಹತ್ವದ ನೀತಿ ಕ್ರಮಗಳಲ್ಲಿ ಒಂದಾಗಿದೆ. ಇದರಿಂದ ಚಿಲ್ಲರೆ ಬೆಲೆಗಳು 7–8% ರಷ್ಟು ಕಡಿಮೆಯಾಗುವ ನಿರೀಕ್ಷೆಯಿದೆ.
ಈ ಪ್ರಮುಖ ವೆಚ್ಚ ಕಡಿತವು ವಸತಿ, ರಿಯಲ್ ಎಸ್ಟೇಟ್ ಮತ್ತು ಸಾರ್ವಜನಿಕ ಮೂಲಸೌಕರ್ಯ ಯೋಜನೆಗಳಿಗೆ ಕಚ್ಚಾ ಸಾಮಗ್ರಿಗಳ ವೆಚ್ಚವನ್ನು ಕಡಿಮೆ ಮಾಡುತ್ತದೆ, ಆದರೆ ಕಟ್ಟಡ ಸಾಮಗ್ರಿಗಳ ಬೇಡಿಕೆಯನ್ನು ಹೆಚ್ಚಿಸುತ್ತದೆ. ಪರಿಣಾಮವಾಗಿ, ನಿರ್ಮಾಣ ಚಟುವಟಿಕೆಯಲ್ಲಿನ ವಿಸ್ತರಣೆಯು ನುರಿತ ಮತ್ತು ಅಕೌಶಲ್ಯ ಕಾರ್ಮಿಕರಿಗೆ ವ್ಯಾಪಕವಾದ ಉದ್ಯೋಗವನ್ನು ಸೃಷ್ಟಿಸುವ ನಿರೀಕ್ಷೆಯಿದೆ. ಇದು ಕರ್ನಾಟಕದ ಕೈಗಾರಿಕಾ ಮತ್ತು ನಿರ್ಮಾಣ ಪರಿಸರ ವ್ಯವಸ್ಥೆಯಾದ್ಯಂತ ಆರ್ಥಿಕ ಬೆಳವಣಿಗೆಗೆ ಶಕ್ತಿಶಾಲಿ ಪ್ರಚೋದಕವಾಗಿ ಕಾರ್ಯನಿರ್ವಹಿಸುತ್ತದೆ.
ಶ್ರೀಗಂಧ ಮತ್ತು ಸಾಬೂನುಗಳು
ಶ್ರೀಗಂಧದೊಂದಿಗಿನ ಕರ್ನಾಟಕದ ಪರಂಪರೆ ಶಾಶ್ವತವಾದದ್ದು. ಇದು ರಾಜ್ಯ-ಮಾಲೀಕತ್ವದ ಕರ್ನಾಟಕ ಸಾಬೂನು ಮತ್ತು ಮಾರ್ಜಕ ನಿಯಮಿತ ಬೆಂಗಳೂರಿನಲ್ಲಿ ಉತ್ಪಾದಿಸುವ ವಿಶ್ವವಿಖ್ಯಾತ ಮೈಸೂರು ಸ್ಯಾಂಡಲ್ ಸೋಪ್‌ನಲ್ಲಿ ಸಾಕಾರಗೊಂಡಿದೆ. ರಾಜ್ಯದಾದ್ಯಂತ ಮೂಲದ ಶ್ರೀಗಂಧದ ಎಣ್ಣೆಯನ್ನು ಬಳಸುವ ಈ ಬ್ರ್ಯಾಂಡ್ ಮೇಲೆ ಕರ್ನಾಟಕ ಸಾಬೂನು ಮತ್ತು ಮಾರ್ಜಕ ನಿಯಮಿತ ಐತಿಹಾಸಿಕ ಏಕಸ್ವಾಮ್ಯವನ್ನು ಹೊಂದಿದೆ. ಈ ಬ್ರ್ಯಾಂಡ್ ಕರ್ನಾಟಕದ ಕರಕುಶಲತೆ ಮತ್ತು ಪರಂಪರೆಯ ಸಂಕೇತವಾಗಿ ಉಳಿದಿದೆ.
GI ಸ್ಥಾನಮಾನವನ್ನು ಪಡೆದಿರುವ ಮೈಸೂರು ಸ್ಯಾಂಡಲ್ ಸೋಪ್, KSDL ನ ವಹಿವಾಟಿನಲ್ಲಿ ಸುಮಾರು 75% ರಷ್ಟು ಕೊಡುಗೆ ನೀಡುತ್ತದೆ. ಜಿಎಸ್‌ಟಿ ದರವನ್ನು 18% ರಿಂದ 5% ಗೆ ಇಳಿಸಿರುವುದರಿಂದ, ಚಿಲ್ಲರೆ ಬೆಲೆಗಳು 11–12% ರಷ್ಟು ಕಡಿಮೆಯಾಗುವ ನಿರೀಕ್ಷೆಯಿದೆ. ಇದು ದೊಡ್ಡ FMCG (ವೇಗವಾಗಿ-ಮಾರಾಟವಾಗುವ ಗ್ರಾಹಕ ಸರಕುಗಳು) ಆಟಗಾರರು ಪ್ರಾಬಲ್ಯ ಹೊಂದಿರುವ ಮಾರುಕಟ್ಟೆಯಲ್ಲಿ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುತ್ತದೆ.
ಈ ಸುಧಾರಣೆಯು ಮಾರಾಟವನ್ನು ಹೆಚ್ಚಿಸಲು, ಲಾಭದಾಯಕತೆಯನ್ನು ಬಲಪಡಿಸಲು ಮತ್ತು ಆಧುನೀಕರಣ ಹಾಗೂ ಉತ್ಪನ್ನ ವೈವಿಧ್ಯೀಕರಣಕ್ಕೆ ಬೆಂಬಲ ನೀಡಲು ಸಹಾಯ ಮಾಡುತ್ತದೆ. ಇದರಿಂದ ಈ ಸಾಂಪ್ರದಾಯಿಕ ಬ್ರ್ಯಾಂಡ್ ಜಾಗತಿಕವಾಗಿ ಕರ್ನಾಟಕವನ್ನು ಪ್ರತಿನಿಧಿಸುವುದನ್ನು ಮುಂದುವರಿಸಲು ಸಾಧ್ಯವಾಗುತ್ತದೆ.
ಡ್ರೋನ್‌ಗಳು
ಬೆಂಗಳೂರು ಭಾರತದ ಡ್ರೋನ್ ಉತ್ಪಾದನೆ, ಸಂಶೋಧನೆ ಮತ್ತು ಅಭಿವೃದ್ಧಿ (R&D) ಹಾಗೂ ಸೇವೆಗಳ ಪರಿಸರ ವ್ಯವಸ್ಥೆಯ ಕೇಂದ್ರವಾಗಿದೆ. ಇದು ಸ್ಥಾಪಿತವಾದ ಏರೋಸ್ಪೇಸ್ ಸಂಸ್ಥೆಗಳು ಮತ್ತು ಸಕ್ರಿಯ ತಂತ್ರಜ್ಞಾನ ಸ್ಟಾರ್ಟ್‌ಅಪ್‌ಗಳ ಜಾಲಕ್ಕೆ ನೆಲೆಯಾಗಿದೆ. ಈ ವಲಯವು ನುರಿತ ಇಂಜಿನಿಯರ್‌ಗಳು, ಸಾಫ್ಟ್‌ವೇರ್ ಡೆವಲಪರ್‌ಗಳು ಮತ್ತು ತಂತ್ರಜ್ಞರಿಗೆ ಉದ್ಯೋಗ ನೀಡುತ್ತಿದ್ದು, ಉನ್ನತ ಮೌಲ್ಯದ ನಾವೀನ್ಯತೆ ಮತ್ತು ಕೈಗಾರಿಕಾ ವೈವಿಧ್ಯೀಕರಣಕ್ಕೆ ಕೊಡುಗೆ ನೀಡುತ್ತಿದೆ.
ಏರೋಸ್ಪೇಸ್ ನೀತಿಯನ್ನು ಪರಿಚಯಿಸಿದ ಭಾರತದ ಮೊದಲ ರಾಜ್ಯ ಕರ್ನಾಟಕವಾಗಿದೆ. ಇದು ವಲಯದ ಹೆಚ್ಚಿನ ಹೂಡಿಕೆ ಸಾಮರ್ಥ್ಯವನ್ನು ಗುರುತಿಸಿದೆ. ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (HAL) ಮತ್ತು ಇಸ್ರೋ (ISRO) ನಂತಹ ಪ್ರಮುಖ R&D ಮತ್ತು ಉತ್ಪಾದನಾ ಸಂಸ್ಥೆಗಳ ಉಪಸ್ಥಿತಿಯು ಡ್ರೋನ್ ನಾವೀನ್ಯತೆಯನ್ನು ಬೆಂಬಲಿಸುವ ಬಲವಾದ ತಾಂತ್ರಿಕ ನೆಲೆಯನ್ನು ನಿರ್ಮಿಸಲು ಸಹಾಯ ಮಾಡಿದೆ.
ಪೈಲಟ್ ರಹಿತ ವಿಮಾನಗಳ (ಡ್ರೋನ್‌ಗಳು) ಮೇಲಿನ ಜಿಎಸ್‌ಟಿ ದರವನ್ನು 18%/28% ರಿಂದ 5% ಗೆ ಇಳಿಸಿರುವುದು ಗಣನೀಯ ಆರ್ಥಿಕ ಪ್ರೋತ್ಸಾಹವನ್ನು ಸೂಚಿಸುತ್ತದೆ. ಇದರಿಂದ ದೇಶೀಯವಾಗಿ ತಯಾರಿಸಿದ ಡ್ರೋನ್‌ಗಳ ವೆಚ್ಚವು 11–20% ರಷ್ಟು ಕಡಿಮೆಯಾಗುತ್ತದೆ. ಈ ಕ್ರಮವು ಆಮದುಗಳ ವಿರುದ್ಧ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆ ಮತ್ತು ಕೃಷಿ, ಲಾಜಿಸ್ಟಿಕ್ಸ್, ಮೂಲಸೌಕರ್ಯ ಮೇಲ್ವಿಚಾರಣೆ ಮತ್ತು ರಕ್ಷಣಾ ಕ್ಷೇತ್ರಗಳಂತಹ ಪ್ರಮುಖ ಪ್ರದೇಶಗಳಲ್ಲಿ ಅವುಗಳ ಅಳವಡಿಕೆಯನ್ನು ವೇಗಗೊಳಿಸುತ್ತದೆ.
ಈ ಸುಧಾರಣೆಯು ಡ್ರೋನ್ ನಾವೀನ್ಯತೆ ಮತ್ತು ಉತ್ಪಾದನೆಗೆ ಪ್ರಮುಖ ಕೇಂದ್ರವಾಗಿ ಕರ್ನಾಟಕದ ಸ್ಥಾನವನ್ನು ಬಲಪಡಿಸುತ್ತದೆ, ಉದ್ಯೋಗ ಸೃಷ್ಟಿ, ತಂತ್ರಜ್ಞಾನದ ಪ್ರಗತಿ ಮತ್ತು 'ಮೇಕ್ ಇನ್ ಇಂಡಿಯಾ' ಉಪಕ್ರಮದೊಂದಿಗೆ ಹೊಂದಾಣಿಕೆಯನ್ನು ಉತ್ತೇಜಿಸುತ್ತದೆ.
ಕರಕುಶಲ ಮತ್ತು ಸಾಂಸ್ಕೃತಿಕ ಆರ್ಥಿಕತೆ
ಇಳಕಲ್ ಮತ್ತು ಉಡುಪಿ ಕೈಮಗ್ಗ ಸೀರೆಗಳು
ಕರ್ನಾಟಕದ ನೇಯ್ಗೆ ಪರಂಪರೆಯನ್ನು, ಇಳಕಲ್ (ಬಾಗಲಕೋಟೆ) ಮತ್ತು ಉಡುಪಿಯ ಕ್ಲಸ್ಟರ್‌ಗಳು ಅತ್ಯುತ್ತಮವಾಗಿ ಪ್ರತಿನಿಧಿಸುತ್ತವೆ. ಇಲ್ಲಿ ಸಾಂಪ್ರದಾಯಿಕ ಕುಶಲಕರ್ಮಿ ಸಮುದಾಯಗಳು ತಲೆಮಾರುಗಳಿಂದ ಕೈಮಗ್ಗ ನೇಯ್ಗೆಯನ್ನು ಅಭ್ಯಾಸ ಮಾಡುತ್ತಿವೆ. ಈ ವಲಯವು ಸುಮಾರು 55,000 ನೇಕಾರರ ಕುಟುಂಬಗಳಿಗೆ ಬೆಂಬಲ ನೀಡುತ್ತದೆ. ಇವರು ಮನೆ-ಆಧಾರಿತ ಘಟಕಗಳು ಅಥವಾ ಸಹಕಾರಿ ಸಂಘಗಳಿಂದ ಕೆಲಸ ಮಾಡುತ್ತಾರೆ, ಆದರೆ ಸಾಮಾನ್ಯವಾಗಿ ನೂಲಿನ ಬೆಲೆ ಏರಿಳಿತ ಮತ್ತು ಪವರ್ ಲೂಮ್‌ಗಳ ಸ್ಪರ್ಧೆಯ ಸವಾಲುಗಳನ್ನು ಎದುರಿಸುತ್ತಾರೆ.
ಇಳಕಲ್ ಮತ್ತು ಉಡುಪಿ ಎರಡೂ ಸೀರೆಗಳು ಭೌಗೋಳಿಕ ಸೂಚಕ ಸ್ಥಾನಮಾನವನ್ನು ಪಡೆದಿವೆ. ಇಳಕಲ್ ಸೀರೆಗಳು ದೇಹ ಮತ್ತು ಸೆರಗಿನ ನೂಲನ್ನು ಜೋಡಿಸುವ ವಿಶಿಷ್ಟವಾದ ‘ತೊಪೆ ತೆನಿ’ ನೇಯ್ಗೆ ತಂತ್ರಕ್ಕಾಗಿ ಮತ್ತು ಅದರ ವಿಶಿಷ್ಟ ಕೆಂಪು ರೇಷ್ಮೆ ಸೆರಗುಗಳಿಗಾಗಿ ಪ್ರಸಿದ್ಧವಾಗಿವೆ. ಆದರೆ, ಉಡುಪಿ ಸೀರೆಗಳು ತಮ್ಮ ಉತ್ತಮ ಹತ್ತಿ ಮತ್ತು ಸಾಂಪ್ರದಾಯಿಕ ವಿನ್ಯಾಸಗಳಿಗೆ ಹೆಸರುವಾಸಿಯಾಗಿದೆ.
ಕೈಮಗ್ಗ ಸೀರೆಗಳ ಮೇಲಿನ ಜಿಎಸ್‌ಟಿ (GST) ದರವನ್ನು 12% ರಿಂದ 5% ಗೆ ಇಳಿಸಿರುವುದರಿಂದ, ಬೆಲೆಗಳು 6–7% ರಷ್ಟು ಕಡಿಮೆ ಆಗುವ ನಿರೀಕ್ಷೆಯಿದೆ. ಇದು ಬೃಹತ್ ಪ್ರಮಾಣದಲ್ಲಿ ಉತ್ಪಾದಿಸಿದ ಪರ್ಯಾಯ ಉತ್ಪನ್ನಗಳ ವಿರುದ್ಧ ಅವುಗಳ ಸ್ಪರ್ಧಾತ್ಮಕತೆಯನ್ನು ಸುಧಾರಿಸುತ್ತದೆ. ಈ ಸುಧಾರಣೆಯು ಸಹಕಾರ ಸಂಘಗಳು, ಸರ್ಕಾರಿ ಮಳಿಗೆಗಳು, ಖಾಸಗಿ ಚಿಲ್ಲರೆ ವ್ಯಾಪಾರಿಗಳು ಮತ್ತು ಆನ್‌ಲೈನ್ ವೇದಿಕೆಗಳ ಮೂಲಕ ಮಾರಾಟವನ್ನು ಹೆಚ್ಚಿಸುವ ನಿರೀಕ್ಷೆಯಿದೆ. ಇದರಿಂದ ನೇಕಾರರ ಆದಾಯ ಸುಧಾರಿಸಿ, ಕರ್ನಾಟಕದ ಶತಮಾನಗಳಷ್ಟು ಹಳೆಯದಾದ ಕೈಮಗ್ಗ ಸಂಪ್ರದಾಯಗಳನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ.
ಬಿದರಿ ಕಲೆ
ಪ್ರತ್ಯೇಕವಾಗಿ ಬಿದರ್‌ನಲ್ಲಿ ಹುಟ್ಟಿಕೊಂಡ ಬಿದರಿ ಕಲೆಯು ಭಾರತದ ಅತ್ಯುತ್ತಮ ಲೋಹದ ಕರಕುಶಲ ವಸ್ತುಗಳಲ್ಲಿ ಒಂದಾಗಿದೆ. ಬಿದರ್ ಕೋಟೆಯ ವಿಶೇಷ ಮಣ್ಣನ್ನು ಬಳಸಿ, ಸತು ಮತ್ತು ತಾಮ್ರದ ಮಿಶ್ರಲೋಹದಿಂದ ಕಪ್ಪು ಬಣ್ಣಕ್ಕೆ ತಿರುಗಿಸಿದ ಮೇಲ್ಮೈಯಲ್ಲಿ ಶುದ್ಧ ಬೆಳ್ಳಿಯ ತಂತಿಯ ಸೂಕ್ಷ್ಮ ಕೆತ್ತನೆಯಿಂದ ಇದು ಪ್ರಸಿದ್ಧವಾಗಿದೆ. ಜಿಐ ಟ್ಯಾಗ್‌ನೊಂದಿಗೆ ಗುರುತಿಸಲ್ಪಟ್ಟಿರುವ ಬಿದರಿ ಕಲೆಯು, ಸಾಂಪ್ರದಾಯಿಕ ಕುಶಲಕರ್ಮಿ ಕುಟುಂಬಗಳ ಮೂಲಕ ತಲೆಮಾರುಗಳಿಂದ ಸಾಗಿ ಬಂದಿರುವ ಜೀವಂತ ಕರಕುಶಲ ಪರಂಪರೆಯನ್ನು ಪ್ರತಿನಿಧಿಸುತ್ತದೆ.
ಈ ಉದ್ಯಮವು ಬಿದರ್ ಪ್ರದೇಶದಲ್ಲಿ ನುರಿತ ಉದ್ಯೋಗಕ್ಕೆ ಪ್ರಮುಖ ಮೂಲವಾಗಿ ಉಳಿದಿದೆ, ಆದರೆ ಕಡಿಮೆ ಸಂಭಾವನೆ ಮತ್ತು ಯಂತ್ರದಿಂದ ತಯಾರಿಸಿದ ಉತ್ಪನ್ನಗಳ ಸ್ಪರ್ಧೆಯು ಕುಶಲಕರ್ಮಿಗಳ ಮೇಲೆ ಆರ್ಥಿಕ ಒತ್ತಡವನ್ನು ಹೇರಿದೆ. ಜಿಎಸ್‌ಟಿ ದರವನ್ನು 12% ರಿಂದ 5% ಗೆ ಇಳಿಸಿರುವುದು 6–7% ರಷ್ಟು ಬೆಲೆಯ ಅನುಕೂಲವನ್ನು ಒದಗಿಸುತ್ತದೆ. ಇದರಿಂದ ಈ ಕರಕುಶಲ ಕಲಾಕೃತಿಗಳು ದೇಶೀಯ ಮತ್ತು ಪ್ರವಾಸಿ-ಆಧಾರಿತ ರಫ್ತು ಮಾರುಕಟ್ಟೆಗಳಲ್ಲಿ ಹೆಚ್ಚು ಕೈಗೆಟುಕುವ ಬೆಲೆಯಲ್ಲಿ ಮತ್ತು ಸ್ಪರ್ಧಾತ್ಮಕವಾಗುತ್ತವೆ.
ಬಿದರಿ ಕಲೆಯನ್ನು 90ಕ್ಕೂ ಹೆಚ್ಚು ದೇಶಗಳಿಗೆ ರಫ್ತು ಮಾಡಲಾಗುತ್ತಿದ್ದು, ಈ ಸುಧಾರಣೆಯು ಕುಶಲಕರ್ಮಿಗಳಿಗೆ ಲಾಭದಾಯಕತೆಯನ್ನು ಸುಧಾರಿಸುವ ನಿರೀಕ್ಷೆಯಿದೆ ಮತ್ತು ಈ ಪರಂಪರೆಯ ಕಲೆಯಲ್ಲಿ ಆಸಕ್ತಿಯನ್ನು ಪುನರುಜ್ಜೀವನಗೊಳಿಸುತ್ತದೆ. ಹೀಗಾಗಿ, ಕರ್ನಾಟಕದ ಶತಮಾನಗಳಷ್ಟು ಹಳೆಯ ಲೋಹದ ಕಲಾತ್ಮಕತೆಯನ್ನು ಸಂರಕ್ಷಿಸುವ ಜೊತೆಗೆ ಜೀವನೋಪಾಯವನ್ನು ಉಳಿಸಲು ಸಹಾಯ ಮಾಡುತ್ತದೆ.
ಮೈಸೂರು ರೋಸ್‌ವುಡ್ ಜಡಿತ ಕಲೆ
ಮೈಸೂರಿನ ಮತ್ತು ಸುತ್ತಮುತ್ತಲಿನ ಪ್ರದೇಶಗಳ ಅತ್ಯಂತ ನುರಿತ, ಕುಟುಂಬ-ಆಧಾರಿತ ಕುಶಲಕರ್ಮಿಗಳ ಕ್ಲಸ್ಟರ್‌ಗಳಿಂದ ಅಭ್ಯಾಸ ಮಾಡಲ್ಪಡುವ ಮೈಸೂರು ರೋಸ್‌ವುಡ್ ಜಡಿತ ಕಲೆ ಕರ್ನಾಟಕದ ರಾಜಮನೆತನದ ಪರಂಪರೆಯ ಮುದ್ರೆಯಾಗಿದೆ. ಒಡೆಯರ್ ರಾಜವಂಶ ಮತ್ತು ಟಿಪ್ಪು ಸುಲ್ತಾನರಿಂದ ಪೋಷಿಸಲ್ಪಟ್ಟ ಈ ಅತಿ ಸುಂದರ ಕಲಾ ಪ್ರಕಾರವು, ಅಲಂಕಾರಿಕ ಪೀಠೋಪಕರಣಗಳು ಮತ್ತು ಉತ್ತಮ ಕಲಾಕೃತಿಗಳನ್ನು ರಚಿಸಲು ಬಣ್ಣದ ಮರಗಳು, ಮುತ್ತಿನ ಚಿಪ್ಪು ಮತ್ತು ಇತರ ಪರಿಸರ ಸ್ನೇಹಿ ವಸ್ತುಗಳನ್ನು ರೋಸ್‌ವುಡ್ ಮೇಲ್ಮೈಗಳಲ್ಲಿ ಹುದುಗಿಸುವುದನ್ನು ಒಳಗೊಂಡಿದೆ. ಐತಿಹಾಸಿಕವಾಗಿ ದಂತವನ್ನು ಬಳಸಲಾಗುತ್ತಿತ್ತು, ಆದರೆ ಇತ್ತೀಚೆಗೆ ಅದನ್ನು ಸುಸ್ಥಿರ ಪರ್ಯಾಯಗಳೊಂದಿಗೆ ಬದಲಾಯಿಸಲಾಗಿದೆ.
2005 ರಲ್ಲಿ ಜಿಐ ಸ್ಥಾನಮಾನವನ್ನು ಪಡೆದ ಈ ಕಲೆಯು ಮೈಸೂರಿನ ಸಾಂಸ್ಕೃತಿಕ ಪರಿಸರ ವ್ಯವಸ್ಥೆಯ ಒಂದು ಪ್ರಮುಖ ಭಾಗವಾಗಿ ಉಳಿದಿದೆ. ಕಾವೇರಿ ಕರಕುಶಲ ವಸ್ತುಗಳ ಮಳಿಗೆಗಳು, ಖಾಸಗಿ ಗ್ಯಾಲರಿಗಳು ಮತ್ತು ಯುಎಸ್ ಹಾಗೂ ಯುಕೆಗೆ ವಿಶೇಷ ರಫ್ತುಗಳ ಮೂಲಕ ಇದರ ಮಾರಾಟವು ನಡೆಯುತ್ತಿದೆ. ಆನ್‌ಲೈನ್ ವೇದಿಕೆಗಳ ಮೂಲಕವೂ ಅಂತರರಾಷ್ಟ್ರೀಯ ಬೇಡಿಕೆ ಹೆಚ್ಚುತ್ತಿದೆ.
ಜಿಎಸ್‌ಟಿ ದರವನ್ನು 12% ರಿಂದ 5% ಗೆ ಇಳಿಸಿರುವುದರಿಂದ, ಬೆಲೆಗಳು 6–7% ರಷ್ಟು ಕಡಿಮೆಯಾಗುವ ನಿರೀಕ್ಷೆಯಿದೆ. ಇದು ಕೈಗೆಟುಕುವ ಬೆಲೆಯನ್ನು ಸುಧಾರಿಸುತ್ತದೆ ಮತ್ತು ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುತ್ತದೆ. ಉದಾಹರಣೆಗೆ, $4,000 ಬೆಲೆಯ ರೋಸ್‌ವುಡ್ ಡೈನಿಂಗ್ ಸೆಟ್‌ನಲ್ಲಿ $250ಕ್ಕಿಂತ ಹೆಚ್ಚು ಉಳಿತಾಯವಾಗಬಹುದು. ಈ ಹಣಕಾಸಿನ ಪರಿಹಾರವು ಸಣ್ಣ, ಕುಟುಂಬ-ನಿರ್ವಹಣೆಯ ಉದ್ಯಮಗಳ ಲಾಭದಾಯಕತೆಯನ್ನು ಹೆಚ್ಚಿಸುತ್ತದೆ. ಇದರಿಂದ ವಿಶಿಷ್ಟ, ಉನ್ನತ-ಮೌಲ್ಯದ ಮರದ ಕಲೆಯ ಜಾಗತಿಕ ಮಾರುಕಟ್ಟ
ಉಪಸಂಹಾರ
ಕರ್ನಾಟಕದಾದ್ಯಂತ ವೈವಿಧ್ಯಮಯ ಆರ್ಥಿಕತೆಗೆ ಜಿಎಸ್‌ಟಿ (ಸರಕು ಮತ್ತು ಸೇವಾ ತೆರಿಗೆ) ಸುಧಾರಣೆಗಳು ವ್ಯಾಪಕವಾದ ಪ್ರಯೋಜನಗಳನ್ನು ಒದಗಿಸುತ್ತವೆ. ಇದು ಕಾಫಿ, ಡೈರಿ ಮತ್ತು ಗೋಡಂಬಿ ಬೆಳೆಯುವ ರೈತರಿಂದ ಹಿಡಿದು, ಕೈಮಗ್ಗ ಮತ್ತು ಕರಕುಶಲ ವಸ್ತುಗಳಲ್ಲಿ ತೊಡಗಿರುವ ಕುಶಲಕರ್ಮಿಗಳು ಮತ್ತು ಕೈಗಾರಿಕಾ ಮತ್ತು ತಾಂತ್ರಿಕ ಬೆಳವಣಿಗೆಯನ್ನು ಮುನ್ನಡೆಸುವ ಉದ್ಯಮಿಗಳವರೆಗೆ ಎಲ್ಲರಿಗೂ ಅನುಕೂಲ ಮಾಡಿಕೊಡುತ್ತದೆ.
ಕಡಿಮೆ ತೆರಿಗೆ ದರಗಳು ವೆಚ್ಚಗಳನ್ನು ಕಡಿಮೆಗೊಳಿಸುತ್ತವೆ, ಮಾರುಕಟ್ಟೆ ಸ್ಪರ್ಧಾತ್ಮಕತೆಯನ್ನು ಸುಧಾರಿಸುತ್ತವೆ ಮತ್ತು ಪ್ರಮುಖ ಕ್ಷೇತ್ರಗಳಲ್ಲಿ ಹೆಚ್ಚಿನ ಮೌಲ್ಯವರ್ಧನೆಗೆ ಬೆಂಬಲ ನೀಡುತ್ತವೆ. ಇದು ಗ್ರಾಮೀಣ ಮತ್ತು ನಗರ ಸಮುದಾಯಗಳೆರಡರಲ್ಲೂ ಆದಾಯದ ಅವಕಾಶಗಳನ್ನು ಹೆಚ್ಚಿಸುತ್ತದೆ.
ಸಾಂಪ್ರದಾಯಿಕ ಜೀವನೋಪಾಯ ಮತ್ತು ಆಧುನಿಕ ಕೈಗಾರಿಕೆಗಳ ನಡುವಿನ ಸಂಬಂಧವನ್ನು ಬಲಪಡಿಸುವ ಮೂಲಕ, ಈ ತೆರಿಗೆ ಸುಧಾರಣೆಗಳು ಸಮಗ್ರ, ಉದ್ಯೋಗ-ಆಧಾರಿತ ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಪೋಷಿಸುತ್ತವೆ. ಈ ಸುಧಾರಣೆಗಳು ಉತ್ಪಾದಕತೆಯನ್ನು ಹೆಚ್ಚಿಸಲು, ದೇಶೀಯ ಬೇಡಿಕೆಯನ್ನು ಉತ್ತೇಜಿಸಲು ಮತ್ತು ಭಾರತದ ಅತ್ಯಂತ ಕ್ರಿಯಾತ್ಮಕ ಮತ್ತು ನಾವೀನ್ಯತೆ-ಚಾಲಿತ ರಾಜ್ಯ ಆರ್ಥಿಕತೆಗಳಲ್ಲಿ ಒಂದಾಗಿ ಕರ್ನಾಟಕದ ಸ್ಥಾನವನ್ನು ಮತ್ತಷ್ಟು ಕ್ರೋಢೀಕರಿಸಲು ನಿರೀಕ್ಷಿಸಲಾಗಿದೆ.
Click here to see PDF
*****
(Factsheet ID: 150423)
Visitor Counter : 15
Provide suggestions / comments