गोंय, 21 नोव्हेंबर 2026
म्हायती आनी प्रसारण मंत्रालयाचो उपक्रम आनी राष्ट्रीय चित्रपट विकास महामंडळावतीन (NFDC) राबयल्ल्या ‘क्रिएटिव्ह माइंड्स ऑफ टुमारो’ (CMOT) ह्या उपक्रमाच्या 6व्या आवृत्तीचें उक्तावण आयज गोयांत कला अकादमीत 57व्या भारतीय आंतरराष्ट्रीय चित्रपट महोत्सवाच्या (IFFI) निमतान जाले.
हो उपक्रम भारतभरांतल्या 100 तरणाट्या सृजनशील प्रतिभावंतांक एकठांय हाडटा आनी तांकां सहकार्य करपाक, आपली कौशल्यां दाखोवपाक आनी चित्रपट उद्देगाचो प्रत्यक्ष अणभव मेळोवपाक एक माची उपलब्ध करून दिता.

उक्तावण सुवाळ्याक म्हायती आनी प्रसारण मंत्रालयाचे सचिव श्री. चंचल कुमार, अतिरिक्त सचिव श्री. प्रभात, एफटीआयआयचे कुलसचिव श्री. लौकिक पारख, म्हायती आनी प्रसारण मंत्रालयाचे संयुक्त सचिव श्री. के. के. निराला, एनएफडीसीचे अध्यक्ष श्री. जी. कृष्णकुमार आनी एनएफडीसीचे महाव्यवस्थापक श्री. गौतम भनोट उपस्थित आशिल्ले.
उपस्थितांक संबोधित करतना, म्हायती आनी प्रसारण मंत्रालयाचे सचिव श्री. चंचल कुमार हांणी सांगलें, दरेक सहभागीन पयलींच आपली प्रतिभा सिद्ध केल्या, आनी फुडले 48 वरां तांकां त्या प्रतिभेक फिल्मांत रुपांतरीत करपाची संद मेळटली.
आपलीं मुळां संस्कृती, भास आनी अणभव हांच्यांपसून घडतात, जाल्यार सपनां कल्पनाशक्ती, जिज्ञासा आनी कितें तरी नवें करपाच्या धाडसांतल्यान जल्माक येतात. फ्रेंच तत्त्वज्ञ जोसेफ जुबेर हांचो उल्लेख करून तांणी म्हळें, कल्पनाशक्ती आमकां सपनां पळोवपाक मजत करता, कलेचे कौशल्य आत्मसात केल्ल्यान त्या सपनांक योग्य दिशा दिता आनी आपलीं मुळां आपल्या कथांक स्वताचो आवाज दितात.

ह्या उपक्रमात भाग घेवप्यांक तांणी आपल्या कथांच्या आवाठाक मर्यादा घालनासतना, आपल्या मूळांतल्यान प्रेरणा घेवची अशें आवाहन केलें. भारतांतल्या एका ल्हानशा गांवांत जल्मल्ली काणी जर प्रामाणिकपणान मांडली, जाल्यार ती संवसारभरांतल्या प्रेक्षकांच्या काळजाक भिडूंक शकता, अशेंय तांणी नमूद केलें.
चित्रपट हो एक सामूहिक कलाप्रकार आशिल्ल्याचे तांणी मुखार अधोरेखित केले. सहभागींक एकामेकांचें म्हणणें आयकपाचें, आपल्या सहकाऱ्यांचेर विस्वास दवरपाचें, नवे प्रयोग करपाचे, सर्जनशीलतेच्या बाबतींत धाडसी निर्णय घेवपाचे आनी ह्या पुराय प्रक्रियेचो आनंद घेवपाचो उलो तांणी मारलो. आपलीं मुळां जपून, कल्पनाशक्तीक मुक्त भरारी घेवपाक दिवन, आपल्यो कथा संवसारा मुखार मांडच्यो, अशें आवाहन तांणी केले.
उक्तावण सुवाळ्याचे एक मुखेल खाशेलपण म्हळ्यार 48 वरां चलपी फिल्म निर्मिती आव्हानाची औपचारीक सुरवात. 2026 च्या ह्या गटांत चित्रपट निर्मितीच्या वेगवेगळ्या कलात्मक क्षेत्रांचें प्रतिनिधित्व करपी 100 सहभागी आसात. हांतूंत दिग्दर्शन, अभिनय, छायाचित्रण, संकलन आनी उपशीर्षक लेखन, पटकथा लेखन, पार्श्वगायन, संगीत रचना, ध्वनीमुद्रण, वेशभूषा रचना, केशभूषा आनी रंगभूषा, कला दिग्दर्शन, एनिमेशन, व्हिज्युअल इफेक्ट्स (VFX), ऑगमेंटेड रिअॅलिटी (AR), व्हर्च्युअल रिऍलिटी (VR), तशेंच व्हॉइस-ओव्हर आनी डबिंग ह्या क्षेत्रांचो आस्पाव जाता.
फिल्म अँड टेलिव्हिजन इन्स्टिट्यूट ऑफ इंडिया (FTII), पुणे हाणी नॅशनल फिल्म डेव्हलपमेंट कॉर्पोरेशन (NFDC) हांच्या सहकार्यान आयोजित केल्ल्या ह्या 48 वरांच्या चित्रपट निर्मिती आव्हानांत सहभागींचे पांच पंगड एकठांय येवन, चित्रपटाची संकल्पना विकसित करून 48 वरांच्या निर्मिती कालावधीत लघुपट तयार करतले. तयार जाल्ल्या चित्रपटांचें इफ्फीत (IFFI) खास प्रदर्शन जातलें.

सीएमओटी टॅलेंट कॅम्प भाग घेवप्यांक माध्यम आनी मनरिजवण उद्देगा कडेन आनीक जोडटलो. तांकां निर्मिती संस्था, स्टुडिओ, संगीत कंपन्यो, ओटीटी प्लॅटफॉर्म, प्रसारक तशेंच उद्योगांतल्या हेर महत्त्वाच्या घटकां कडेन संवाद साधपाच्यो संदी उपलब्ध जातल्यो.
2021 वर्सा सुरू जाले उपरांत, सीएमओटी नव्या सृजनशील वेवसायिकांखातीर माध्यम आनी मनरिजवण उद्देगा कडेन जोडपी एक महत्त्वाचें व्यासपीठ म्हणून विकसित जालां. ह्या उपक्रमांतल्या आदल्या सहभागीं पैकी जायत्यां जाणांनी आंतरराष्ट्रीय चित्रपट निर्मिती प्रकल्पांचेर काम केलां आनी कान्स, बर्लिनेल, टोरंटो आंतरराष्ट्रीय चित्रपट महोत्सव आनी आंतरराष्ट्रीय एमी पुरस्कार ह्या सारख्या प्रतिष्ठित व्यासपीठांचेर आनी महोत्सवांनी मान्यताय मेळयल्या. ह्या उपक्रमांतलें एक उल्लेखनीय यश म्हळ्यार, फाटल्या आवृत्तींतल्या 18 सहभागींची मुकेश छाब्रा कास्टिंग कंपनीन (MCCC) निवड केली. सीएमओटीच्या माध्यमांतल्यान विकसित केल्ल्या प्रतिभेक वेवसायिक संदींत रुपांतरीत करपाच्या दिकेन, हें एक उत्साहवर्धक पावल थारलां.
Read IFFILOID here: https://www.pib.gov.in/iffi/57/iffiLoid.aspx?yr=2026&lang=1®=48
* * *
पीआयबी मुंबई | मनाली प्रभूगांवकर/मोनाली प्रभू/दर्शना राणे