લોકસભા સચિવાલય
azadi ka amrit mahotsav

સહિયારા લોકતાંત્રિક મૂલ્યો ભારત–અમેરિકા આર્થિક સહયોગ માટે મજબૂત પાયો પૂરો પાડે છે: લોકસભા અધ્યક્ષ


સંશોધન, નવીનતા અને વૈશ્વિક સ્પર્ધાત્મકતાને આગળ વધારવા માટે ઉદ્યોગ–શૈક્ષણિક સંસ્થાઓ વચ્ચે મજબૂત ભાગીદારી આવશ્યક છે: લોકસભા અધ્યક્ષ

ટેકનોલોજી, સ્વચ્છ ઊર્જા અને ઉભરતા ક્ષેત્રોમાં ભારત–અમેરિકા વચ્ચે વધુ ગાઢ સહયોગ માટે લોકસભા અધ્યક્ષનું આહ્વાન

ભારતની યુવા પ્રતિભા, સ્ટાર્ટઅપ્સ અને MSMEs રોકાણ અને ભાગીદારી માટે અપાર તકો પૂરી પાડે છે: લોકસભા અધ્યક્ષ

23મી ઇન્ડો-યુએસ ઇકોનોમિક સમિટ 2026 ને લોકસભા અધ્યક્ષનું સંબોધન

પોસ્ટેડ ઓન: 19 NOV 2026 4:54PM by PIB Ahmedabad

લોકસભા અધ્યક્ષ શ્રી ઓમ બિરલાએ આજે ભારપૂર્વક જણાવ્યું હતું કે ભારત અને અમેરિકાના સહિયારા લોકતાંત્રિક મૂલ્યો દ્વિપક્ષીય વેપાર, રોકાણ અને ટેકનોલોજીકલ સહયોગના વિસ્તરણ માટે મજબૂત આધાર પૂરો પાડે છે. તેમણે અવલોકન કર્યું હતું કે લોકતાંત્રિક સંસ્થાઓ, સ્થિર નીતિઓ, સ્વતંત્ર ન્યાયતંત્ર અને હિતધારકો સાથે સતત સંવાદ રોકાણકારોનો વિશ્વાસ મજબૂત બનાવે છે અને આર્થિક વિકાસ માટે તકો ઊભી કરે છે.

શ્રી બિરલાએ 23મી ઇન્ડો-યુએસ ઇકોનોમિક સમિટ 2026 ને સંબોધન કરતી વખતે આ અવલોકનો કર્યા હતા. ભારત અને અમેરિકાને વિશ્વના સૌથી મોટા લોકતંત્રોમાંના બે ગણાવતા તેમણે કહ્યું કે મજબૂત અને ગતિશીલ લોકતાંત્રિક સંસ્થાઓ સ્થિર અને પ્રતિભાવશીલ નીતિ-નિર્માણમાં ફાળો આપે છે. લોકતંત્ર વિવિધ અવાજો માટે અવકાશ પૂરું પાડે છે અને નીતિઓ તથા કાયદા ઘડતી વખતે ઉદ્યોગ, વેપાર, કૃષિ, ટેકનોલોજી, વિદ્યાર્થીઓ અને અન્ય હિતધારકોના મંતવ્યોને ધ્યાનમાં લેવામાં આવે તે સુનિશ્ચિત કરે છે, એમ તેમણે ઉમેર્યું હતું. તેમણે ભારતના લોકતાંત્રિક માળખાના મહત્વપૂર્ણ સ્તંભો તરીકે વ્યક્તિગત સ્વતંત્રતા, અભિવ્યક્તિની સ્વતંત્રતા, કાયદા સમક્ષ સમાનતા અને સ્વતંત્ર ન્યાયતંત્ર પર પ્રકાશ પાડ્યો હતો. તેમણે નોંધ્યું હતું કે સ્થિર નીતિગત વાતાવરણ, અનુમાન કરી શકાય તેવી કરવેરા નીતિઓ અને ઉદ્યોગ તથા નીતિ-નિર્માતાઓ વચ્ચે નિયમિત સંવાદ રોકાણને પ્રોત્સાહન આપે છે અને આર્થિક ભાગીદારીને મજબૂત બનાવે છે.

શ્રી બિરલાએ 1968 માં તેની સ્થાપના થઈ ત્યારથી બંને દેશો વચ્ચે આર્થિક જોડાણને પ્રોત્સાહન આપવામાં ઇન્ડો-અમેરિકન ચેમ્બર ઓફ કોમર્સના યોગદાનની પ્રશંસા કરી હતી. તેમણે સંવાદને સરળ બનાવવા, વેપાર સંબંધોનો વિસ્તાર કરવા, ટેકનોલોજી ભાગીદારીને પ્રોત્સાહન આપવા અને રોજગારીની તકો ઊભી કરવા માટે તેના ક્રમિક નેતૃત્વની સરાહના કરી હતી. તેમણે કહ્યું કે ભારતના કુશળ માનવ સંસાધનોનો વધતો સમૂહ આ ભાગીદારીને વધુ મજબૂત બનાવવા માટે નોંધપાત્ર અવકાશ પૂરો પાડે છે.

ઉદ્યોગ અને શૈક્ષણિક સંસ્થાઓ વચ્ચે વધુ ગાઢ સહયોગ માટે આહ્વાન કરતા, શ્રી બિરલાએ સંશોધન અને નવીનતાને આગળ વધારવા માટે યુનિવર્સિટીઓ, IITs, IIITs, એન્જિનિયરિંગ કોલેજો અને અન્ય તકનીકી સંસ્થાઓ સાથે કામ કરવા વ્યવસાયોને વિનંતી કરી હતી. તેમણે નોંધ્યું હતું કે સંશોધનમાં ઉદ્યોગ દ્વારા કરવામાં આવેલા રોકાણે સમગ્ર વિશ્વમાં ટેકનોલોજીકલ પ્રગતિને આગળ વધારવામાં મહત્વપૂર્ણ ભૂમિકા ભજવી છે. તેમણે કહ્યું કે ઉદ્યોગ અને શૈક્ષણિક સંસ્થાઓ વચ્ચેની મજબૂત ભાગીદારી ભારતને નવી ટેકનોલોજી વિકસાવવામાં, સ્પર્ધાત્મકતા વધારવામાં અને ઉભરતા ક્ષેત્રોમાં નેતૃત્વ સ્થાપિત કરવામાં મદદ કરશે.

ફાર્માસ્યુટિકલ ક્ષેત્રનો ઉલ્લેખ કરતા, શ્રી બિરલાએ નોંધ્યું હતું કે ભારતીય દવાઓ ખાસ કરીને આફ્રિકન દેશોમાં વ્યાપક આંતરરાષ્ટ્રીય માન્યતા ધરાવે છે. તેમણે ઉભરતી આરોગ્યસંભાળ જરૂરિયાતોને પૂરી કરવા માટે ફાર્માસ્યુટિકલ કંપનીઓ અને યુનિવર્સિટીઓ દ્વારા સંયુક્ત સંશોધન હાથ ધરવાની જરૂરિયાત પર ભાર મૂક્યો હતો. તેમણે કહ્યું કે AI અને મેડિકલ ટેકનોલોજીમાં પ્રગતિ નવીનતા માટે નોંધપાત્ર તકો પૂરી પાડે છે. તેમણે પ્રધાનમંત્રી શ્રી નરેન્દ્ર મોદીના નેતૃત્વ હેઠળ સંરક્ષણમાં આત્મનિર્ભરતા તરફ ભારતની પ્રગતિ તેમજ સંરક્ષણ ઉત્પાદન અને નિકાસમાં તેની વધતી ક્ષમતાઓ પર પણ પ્રકાશ પાડ્યો હતો.

ભારતની યુવા વસ્તીને એક મુખ્ય તાકાત ગણાવતા, શ્રી બિરલાએ કહ્યું કે યુવા ભારતીયોના વિચારો, કૌશલ્યો અને નવીન ક્ષમતાઓ દેશના વિકાસમાં નોંધપાત્ર યોગદાન આપી રહી છે. તેમણે નોંધ્યું હતું કે ભારતની વિસ્તરતી સ્ટાર્ટઅપ ઇકોસિસ્ટમે ઘણા વૈશ્વિક પડકારોના ઉકેલો રજૂ કર્યા છે. સૂક્ષ્મ, લઘુ અને મધ્યમ ઉદ્યોગો (MSMEs) પણ રોકાણ, ટેકનોલોજીકલ સહયોગ અને રોજગાર સર્જન માટે નોંધપાત્ર તકો પૂરી પાડે છે. તેમણે ભારત અને અમેરિકાના વ્યવસાયોને એવી ભાગીદારી રચવા પ્રોત્સાહિત કર્યા જે તેમની સંબંધિત શક્તિઓનો લાભ લે અને આંતરરાષ્ટ્રીય બજારોમાં તકોનો વિસ્તાર કરે.

ઊર્જા સહયોગ પર, શ્રી બિરલાએ અવલોકન કર્યું હતું કે ઔદ્યોગિક વૃદ્ધિ, ડેટા સેન્ટર્સનો વિસ્તાર અને ટેકનોલોજીમાં રોકાણ ઊર્જાની માંગમાં વધારો કરી રહ્યા છે. તેમણે ભારપૂર્વક જણાવ્યું હતું કે ઔદ્યોગિક વિકાસ પર્યાવરણીય જવાબદારી સાથે હાથ મિલાવીને ચાલવો જોઈએ અને સ્વચ્છ તથા હરિત ઊર્જા (clean and green energy) ને પ્રોત્સાહન આપવાના ભારતના પ્રયાસો પર પ્રકાશ પાડ્યો હતો. તેમણે કહ્યું કે ઉદ્યોગ, વૈજ્ઞાનિકો અને સંશોધકો વચ્ચે વધુ સહયોગ ઊર્જા ટેકનોલોજીમાં નવીનતાને વેગ આપી શકે છે અને ટકાઉ આર્થિક વિકાસને ટેકો આપી શકે છે.

શ્રી બિરલાએ નોંધ્યું હતું કે એક દેશમાં થતા વિકાસ વિશ્વભરની અર્થવ્યવસ્થાઓ અને સમાજોને વધુને વધુ અસર કરે છે. શાંતિ, સ્થિરતા અને પરસ્પર વિશ્વાસના મહત્વ પર ભાર મૂકતા તેમણે કહ્યું કે ભારતે વૈશ્વિક પડકારોનો સામનો કરવા માટે સતત સામૂહિક પ્રયાસોની હિમાયત કરી છે. 'વસુધૈવ કુટુમ્બકમ્' ના દર્શનથી માર્ગદર્શિત થઈને, ભારત માને છે કે આર્થિક પ્રગતિ અને સામાજિક કલ્યાણને આગળ વધારવા માટે દેશોએ પરસ્પર આદરની ભાવનાથી સાથે મળીને કામ કરવું જોઈએ.

શ્રી બિરલાએ વિશ્વાસ વ્યક્ત કર્યો હતો કે સમિટ દરમિયાન થયેલા વિચાર-વિમર્શથી ઉદ્યોગ, વેપાર, ટેકનોલોજી, સંશોધન અને નવીનતામાં સહયોગ માટે નવા વિચારો પેદા થશે. તેમણે ભારપૂર્વક જણાવ્યું હતું કે આર્થિક વિકાસ સર્વસમાવેશક હોવો જોઈએ, સમાન તકો સુનિશ્ચિત કરે અને સામાજિક કલ્યાણમાં ફાળો આપે. તેમણે કહ્યું કે સહિયારી સમૃદ્ધિ અને માનવ કલ્યાણ એ આંતરરાષ્ટ્રીય સહયોગના માર્ગદર્શક ઉદ્દેશ્યો રહેવા જોઈએ.

SM/DK/JD


(રીલીઝ આઈડી: 2338580) મુલાકાતી સંખ્યા : 11
આ રીલીઝ વાંચો: English , Urdu , हिन्दी , Tamil