উত্তৰ ২৪ পৰগনাত ‘খেত বচাও অভিযান’ত অংশগ্ৰহণ কেন্দ্ৰীয় কৃষি আৰু কৃষক কল্যাণ ৰাজ্যমন্ত্ৰী শ্ৰী ৰামনাথ ঠাকুৰৰ

দেশজুৰি চলি থকা ‘খেত বচাও অভিযান’ৰ অংশ হিচাপে কেন্দ্ৰীয় কৃষি আৰু কৃষক কল্যাণ ৰাজ্যমন্ত্ৰী শ্ৰী ৰামনাথ ঠাকুৰে পশ্চিমবংগৰ উত্তৰ ২৪ পৰগনা জিলাৰ স্বৰূপনগৰ খণ্ডৰ সুভাষনগৰত আইচিএআৰ-নেচনেল ইনষ্টিটিউট অৱ নেচাৰেল ফাইবাৰ ইঞ্জিনিয়াৰিং এণ্ড টেকন’লজী (আইচিএআৰ-এনআইএনএফইটি)ৰ উদ্যোগত আয়োজিত এটা কাৰ্যসূচীত অংশগ্ৰহণ কৰে।

এই কাৰ্যসূচীত কৃষিভূমি সুৰক্ষিত কৰা, মাটিৰ স্বাস্থ্য পুনৰুদ্ধাৰ কৰা আৰু কৃষিৰ এক বহনক্ষম পদ্ধতি হিচাপে প্ৰাকৃতিক কৃষিৰ প্ৰসাৰৰ ক্ষেত্ৰত ভাৰত চৰকাৰৰ দায়বদ্ধতাৰ ওপৰত গুৰুত্ব আৰোপ কৰা হয়। বৰ্তমান আৰু ভৱিষ্যৎ প্ৰজন্মৰ কল্যাণৰ বাবে মাটিৰ সম্পদ সংৰক্ষণ, ৰাসায়নিক উপাদানৰ অত্যধিক ব্যৱহাৰৰ ওপৰত নিৰ্ভৰশীলতা হ্ৰাস কৰা আৰু পৰিৱেশ-অনুকূল কৃষি পদ্ধতিক উৎসাহিত কৰাৰ গুৰুত্বৰ বিষয়টোও উত্থাপন কৰা হয়।

সভাত ভাষণ দি কেন্দ্ৰীয় মন্ত্ৰীগৰাকীয়ে মাটিৰ স্বাস্থ্য অটুট ৰখাৰ বাবে পুনৰ প্ৰাকৃতিক কৃষি পদ্ধতিলৈ উভতি অহা আৰু ৰাসায়নিক সাৰৰ ব্যৱহাৰ ন্যূনতম কৰাৰ ওপৰত গুৰুত্ব আৰোপ কৰে। তেওঁ মাটিৰ উৰ্বৰতা বজাই ৰখা, মাটিৰ স্বাস্থ্য উন্নত কৰা আৰু পৰিৱেশতন্ত্ৰৰ ভাৰসাম্য ৰক্ষাৰ ক্ষেত্ৰত প্ৰাকৃতিক কৃষিক এক গুৰুত্বপূৰ্ণ পদ্ধতি হিচাপে উল্লেখ কৰে। দীৰ্ঘম্যাদী কৃষি উৎপাদনশীলতা আৰু বহনক্ষমতা নিশ্চিত কৰাৰ বাবে তেওঁ কৃষকসকলক জলবায়ু পৰিৱৰ্তন সহনশীল কৃষি পদ্ধতি, বৈজ্ঞানিক উদ্ভাৱন আৰু আধুনিক প্ৰযুক্তি গ্ৰহণ কৰিবলৈও উৎসাহিত কৰে।

মন্ত্ৰীগৰাকীয়ে জীৱন্ত সম্পদ হিচাপে মাটি সংৰক্ষণ কৰা আৰু সুষম তথা প্ৰয়োজনভিত্তিক কৃষি উপাদান ব্যৱস্থাপনা গ্ৰহণ কৰাৰ গুৰুত্বৰ ওপৰতো জোৰ দিয়ে। সাৰ প্ৰয়োগৰ ক্ষেত্ৰত সঠিক সিদ্ধান্ত গ্ৰহণ, পুষ্টি উপাদানৰ দক্ষ ব্যৱহাৰ বৃদ্ধি আৰু মাটিৰ উৰ্বৰতা বজাই ৰখাৰ বাবে তেওঁ কৃষকসকলক মাটিৰ স্বাস্থ্য কাৰ্ডৰ ফলপ্ৰসূ ব্যৱহাৰ কৰিবলৈ আহ্বান জনায়। এই সন্দৰ্ভত বহনক্ষম আৰু প্ৰাকৃতিক কৃষি পদ্ধতি গ্ৰহণৰ সুবিধাৰ্থে কাৰিকৰী পৰামৰ্শ, ব্যৱহাৰিক প্ৰদৰ্শন আৰু সম্প্ৰসাৰণ সেৱা প্ৰদানৰ ক্ষেত্ৰত কৃষি বিজ্ঞান কেন্দ্ৰসমূহ (কেভিকে)ৰ ভূমিকাৰ বিষয়েও তেওঁ  প্ৰকাশ কৰে।

কেন্দ্ৰীয় মন্ত্ৰীগৰাকীয়ে কৃষকসকলক কৃষিৰ পৰম্পৰাগত পদ্ধতিলৈ উভতি আহিবলৈ আহ্বান জনায়। ইয়াৰ ভিতৰত জৈৱিক সাৰ আৰু জৈৱিক কীটনাশকৰ ব্যৱহাৰো অন্তৰ্ভুক্ত। প্ৰাকৃতিক কৃষিৰ প্ৰসাৰৰ লগতে জীৱৰ বাবে স্বাস্থ্যকৰ শস্য উৎপাদনতো এই পদ্ধতিয়ে সহায় কৰিব বুলি তেওঁ উল্লেখ কৰে।

আইচিএআৰ-এনআইএনএফইটিৰ উদ্যোগত এই কাৰ্যসূচীৰ আয়োজন কৰা হৈছিল।

এই কাৰ্যসূচীয়ে সমগ্ৰ দেশতে ২২ অক্টোবৰৰ পৰা ৩০ নৱেম্বৰলৈ চলি থকা ৰবি শস্যৰ ‘খেত বচাও অভিযান’ৰ মূল বাৰ্তাক পুনৰ দৃঢ় কৰে। সেই বাৰ্তাটো হৈছে—স্বাস্থ্যকৰ মাটিয়েই স্বাস্থ্যকৰ শস্য, বহনক্ষম কৃষি আৰু কৃষকৰ সমৃদ্ধিৰ ভেটি।

প্ৰাকৃতিক কৃষিৰ প্ৰসাৰ, মাটিৰ উৰ্বৰতা সংৰক্ষণ আৰু পৰিৱেশগতভাৱে বহনক্ষম কৃষি পদ্ধতি গ্ৰহণ কৰাটো কৃষি সম্পদ সুৰক্ষিত কৰা আৰু দীৰ্ঘম্যাদী খাদ্য তথা জীৱিকাৰ নিৰাপত্তা নিশ্চিত কৰাৰ বাবে অত্যন্ত প্ৰয়োজনীয়।

 ********

SSS/AS/PB