ପୋଷ୍ଟ କରାଯିବା ଦିନାଙ୍କ:
09 NOV 2026 6:43PM by PIB Bhubaneswar
କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ଗୁଜରାଟର ଅହମ୍ମଦାବାଦରେ ପ୍ରାୟ ୧,୪୦୦ କୋଟି ଟଙ୍କାର ବିଭିନ୍ନ ବିକାଶ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଏହି ଅବସରରେ ଗୁଜରାଟର ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ ଏବଂ ଅନ୍ୟ କେତେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
ଶ୍ରୀ ଅମିତ ଶାହ କହିଛନ୍ତି ଯେ ଆଜି ପାଖାପାଖି ୧,୪୦୦ କୋଟି ଟଙ୍କାର ବିକାଶମୂଳକ କାର୍ଯ୍ୟର ଉଦଘାଟନ କରାଯାଇଛି ଏବଂ ସେଗୁଡ଼ିକର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏଥିମଧ୍ୟରୁ ଅହମ୍ମଦାବାଦ ମ୍ୟୁନିସିପାଲିଟି କର୍ପୋରେସନ୍ (ଏ.ଏମ୍.ସି.) ଦ୍ୱାରା ପ୍ରାୟ ୧,୦୨୪ କୋଟି ଟଙ୍କାର କାର୍ଯ୍ୟ ହାତକୁ ନିଆଯାଇଥିବା ବେଳେ ଗୁଜରାଟ ସରକାରଙ୍କ ସଡ଼କ ଏବଂ କୋଠା ବିଭାଗ ଏବଂ ଭାରତ ସରକାରଙ୍କ ମାଧ୍ୟମରେ ପ୍ରାୟ ୪୦୦ କୋଟି ଟଙ୍କାର ପ୍ରକଳ୍ପ ସମ୍ପୂର୍ଣ୍ଣ ହୋଇଛି କିମ୍ବା ଆରମ୍ଭ ହୋଇଛି।
ଶ୍ରୀ ଅମିତ ଶାହ କହିଥିଲେ ଯେ ୨୦୦୭ ମସିହାରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ବସ୍ତିରେ ରହୁଥିବା ଲୋକମାନଙ୍କୁ ସ୍ଥାୟୀ ବାସଗୃହ ଯୋଗାଇବା ପାଇଁ ଏକ ଯୋଜନା ଆରମ୍ଭ କରିଥିଲେ, ଯାହାକୁ ଏବେ ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ ଆଗେଇ ନେଉଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ରାମପୀର ନୋ ଟେକ୍ରୋ ବାସିନ୍ଦାଙ୍କୁ ବର୍ତ୍ତମାନ ସୁନ୍ଦର ଘରୋଇ ଫ୍ଲାଟ ଯୋଗାଇ ଦିଆଯାଉଛି। ସେ କହିଛନ୍ତି ଯେ ଥରେ ସମ୍ପୂର୍ଣ୍ଣ ପ୍ରକଳ୍ପ କାର୍ଯ୍ୟକାରୀ ହେବା ପରେ, ଗୋଟିଏ କମ୍ପ୍ଲେକ୍ସ ମଧ୍ୟରେ ୫୫,୦୦୦ ରୁ ଅଧିକ ଲୋକ ସାମାଜିକ ସୁରକ୍ଷା, ମନୋରଞ୍ଜନ, ଶିକ୍ଷା ଏବଂ ସ୍ୱାସ୍ଥ୍ୟସେବା ସୁବିଧା ପାଇପାରିବେ। ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଅହମ୍ମଦାବାଦର ପ୍ରାୟ ଏକ ଲକ୍ଷ ବସ୍ତି ବାସିନ୍ଦାଙ୍କୁ ସ୍ଥାୟୀ ଘର ପ୍ରଦାନ କରି ସେମାନଙ୍କ ପୁନର୍ବାସ ପାଇଁ ଏକ ଯୋଜନା ଆରମ୍ଭ କରିଛନ୍ତି ଏବଂ ମୁଖ୍ୟମନ୍ତ୍ରୀ ତଥା ଗୁଜରାଟ ସରକାର ଏହି ପଦକ୍ଷେପକୁ ସଫଳତାର ସହ ଆଗକୁ ନେଉଛନ୍ତି।
ଗୃହମନ୍ତ୍ରୀ କହିଛନ୍ତି ଯେ ୧୯୪୭ ରୁ ୧୯୯୫ ପର୍ଯ୍ୟନ୍ତ ଦେଶ ଏବଂ ଗୁଜରାଟରେ ଶାସନ କରିଥିବା ବିରୋଧୀ ଦଳ ରାମପୀର ନୋ ଟେକ୍ରୋ ଭଳି କ୍ଷେତ୍ର ଉପରେ କେବେ ଧ୍ୟାନ ଦେଇନଥିଲା। ସେ କହିଥିଲେ ଯେ ଗରିବମାନେ ଦୀର୍ଘ ସମୟ ଧରି ବିରୋଧୀ ଦଳକୁ ଭୋଟ୍ ଦେବା ଜାରି ରଖିଥିଲେ, କିନ୍ତୁ ସେମାନଙ୍କ ଘର କେବେ ନିର୍ମାଣ ହୋଇନଥିଲା। ସେ କହିଥିଲେ ଯେ ପରିବର୍ତ୍ତନର ପ୍ରକ୍ରିୟା ୧୯୯୫ରେ ପ୍ରଥମ କାଉନସିଲରଙ୍କ ନିର୍ବାଚନ ସହିତ ଆରମ୍ଭ ହୋଇଥିଲା ଏବଂ ୨୦୧୨ରେ ସେ ନିଜେ ଏହି ନିର୍ବାଚନମଣ୍ଡଳୀରୁ ବିଧାୟକ ଭାବେ ନିର୍ବାଚିତ ହୋଇଥିଲେ।
ଶ୍ରୀ ଶାହ ରମାପୀର୍ କା ଟିଲା ର ବାସିନ୍ଦାଙ୍କୁ ସେମାନଙ୍କ ପିଲାମାନଙ୍କ ଶିକ୍ଷାକୁ ପ୍ରାଥମିକତା ଦେବାକୁ ଅନୁରୋଧ କରିଥିଲେ। ଆଜି ଦୁଇଟି ପ୍ରାଥମିକ ବିଦ୍ୟାଳୟର ଉଦଘାଟନ ବିଷୟରେ ଉଲ୍ଲେଖ କରି ସେ କହିଛନ୍ତି ଯେ ଅହମ୍ମଦାବାଦ ମ୍ୟୁନିସିପାଲିଟି କର୍ପୋରେସନ୍ ଏହି ଅଞ୍ଚଳର ସମସ୍ତ ପ୍ରାଥମିକ ବିଦ୍ୟାଳୟକୁ ସ୍ମାର୍ଟ ସ୍କୁଲରେ ପରିଣତ କରିଛି। ସେ ଆହୁରି ମଧ୍ୟ କହିଛନ୍ତି ଯେ ଗାନ୍ଧୀନଗର ଲୋକସଭା କ୍ଷେତ୍ରର ପ୍ରାଥମିକ ଶିକ୍ଷା କମିଟିଗୁଡ଼ିକ ମଧ୍ୟ ବିଦ୍ୟାଳୟଗୁଡ଼ିକୁ ସ୍ମାର୍ଟ ସ୍କୁଲରେ ପରିଣତ କରିଛନ୍ତି।
ଶ୍ରୀ ଅମିତ ଶାହ କହିଛନ୍ତି ଯେ ବୋପାଲ-ଘୁମା ଅଞ୍ଚଳରେ ବର୍ଷା ଜଳ ନିଷ୍କାସନ ପାଇଁ ଏକ ପମ୍ପ ହାଉସ ନିର୍ମାଣ ପାଇଁ ଆଜି ଭିତ୍ତିପ୍ରସ୍ତର ସ୍ଥାପନ କରାଯାଇଛି। ସେ କହିଛନ୍ତି ଯେ ସେ ଗତ ୩୦ ବର୍ଷ ଧରି ଏହି ଅଞ୍ଚଳ ସହିତ ଜଡିତ ଅଛନ୍ତି ଏବଂ ପ୍ରତିଶ୍ରୁତି ଦେଇଛନ୍ତି ଯେ ୨୦୨୯ ପୂର୍ବରୁ ଏକ ବ୍ୟବସ୍ଥା ସ୍ଥାପନ କରାଯିବ ଯାହା ଦ୍ୱାରା ଏହି ଅଞ୍ଚଳ କଦାପି ଜଳମଗ୍ନ ହେବ ନାହିଁ। ଶ୍ରୀ ଶାହ କହିଥିଲେ ଯେ ଚାରି କିଲୋମିଟର ଦୀର୍ଘ ଇସକନ୍ ଓଭରବ୍ରିଜ୍ ନିର୍ମାଣ କାର୍ଯ୍ୟ ମଧ୍ୟ ଆଜିଠାରୁ ଆରମ୍ଭ ହୋଇଛି। ସେ କହିଥିଲେ ଯେ ପୂର୍ବରୁ ସରଖେଜରୁ ଗାନ୍ଧୀନଗର ପର୍ଯ୍ୟନ୍ତ ଯାତ୍ରା କରିବା ପାଇଁ ଅଢ଼େଇ ଘଣ୍ଟା ଲାଗି ଯାଉଥିଲା। ତେବେ, ଏହି ପ୍ରକଳ୍ପ ତିନି ବର୍ଷ ମଧ୍ୟରେ ସମ୍ପୂର୍ଣ୍ଣ ହେବା ପରେ, ଲୋକମାନେ ସିଗନାଲ-ମୁକ୍ତ ଓଭରବ୍ରିଜ୍ ମାଧ୍ୟମରେ ବହୁତ କମ୍ ସମୟ ମଧ୍ୟରେ ଏହି ଦୂରତା ଅତିକ୍ରମ କରିବାକୁ ସକ୍ଷମ ହେବେ। ସେ ଆହୁରି ମଧ୍ୟ କହିଥିଲେ ଯେ ବିଶ୍ୱର ଖୁବ୍ କମ୍ ସହରରେ ଏଭଳି ଆଧୁନିକ ଭିତ୍ତିଭୂମି ରହିଛି। ସେ ଆହୁରି ମଧ୍ୟ କହିଛନ୍ତି ଯେ ଆଜି ଜଳସାପୁର ଜଳ ବିଶୋଧନ ପ୍ଲାଣ୍ଟର ମଧ୍ୟ ଉଦଘାଟନ କରାଯାଇଥିଲା।
ଗୃହମନ୍ତ୍ରୀ କହିଥିଲେ ଯେ ଆଜି ହାତକୁ ନିଆଯାଇଥିବା ପ୍ରକଳ୍ପ ସମେତ ଗାନ୍ଧୀନଗର ଲୋକସଭା କ୍ଷେତ୍ରରେ ଗତ ସାତ ବର୍ଷ ମଧ୍ୟରେ ୨୫,୦୦୦ କୋଟି ଟଙ୍କାର ବିକାଶମୂଳକ କାର୍ଯ୍ୟ ଶେଷ ହୋଇଛି। "ସବୁଜ ଗାନ୍ଧୀନଗର ଏବଂ ବିକଶିତ ଗାନ୍ଧୀନଗର" ଲୋକସଭା ନିର୍ବାଚନ ମଣ୍ଡଳୀର ଲକ୍ଷ୍ୟକୁ ସାକାର କରିବା ଲାଗି ସେ ନିଜର ପ୍ରତିବଦ୍ଧତାକୁ ଦୋହରାଇଥିଲେ।
ଶ୍ରୀ ଅମିତ ଶାହ ଗତ ଶନିବାର କେନ୍ଦ୍ର ଗୃହ ମନ୍ତ୍ରଣାଳୟ ଏବଂ ଗୁଜରାଟ ଗୃହ ବିଭାଗ ମଧ୍ୟରେ ହୋଇଥିବା ମିଳିତ ବୈଠକ ବିଷୟରେ ଉଲ୍ଲେଖ କରିଥିଲେ, ଯେଉଁଥିରେ ନବୀନ ନ୍ୟାୟ ସଂହିତା (ନୂତନ ଅପରାଧିକ ଆଇନ) ର କାର୍ଯ୍ୟକାରିତା, ଗୃହ ବିଭାଗର ଆଧୁନିକୀକରଣ ଏବଂ ଗୁଜରାଟକୁ ନିଶାମୁକ୍ତ କରିବା ଉପରେ ଆଲୋଚନା କରାଯାଇଥିଲା। ସେ ସମାବେଶକୁ ୧୦୩୩ ହେଲ୍ପଲାଇନ୍ ନମ୍ବର ବିଷୟରେ ସୂଚନା ଦେଇଥିଲେ ଏବଂ କହିଥିଲେ ଯେ ଯିଏ ୧୦୩୩ ମାଧ୍ୟମରେ ନିଶାଦ୍ରବ୍ୟ ବିକ୍ରୟ କିମ୍ବା ବ୍ୟବହାର ବିଷୟରେ ରିପୋର୍ଟ କରିବେ, ତାଙ୍କ ପରିଚୟ ଗୋପନୀୟ ରଖାଯିବ ଏବଂ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ନିଶା ବ୍ୟବହାର ଏପରି ଏକ ଜିନିଷ ଯାହା ଶାରୀରିକ ଏବଂ ମାନସିକ ସ୍ୱାସ୍ଥ୍ୟକୁ ନଷ୍ଟ କରିବା ସହିତ ଯୁବକମାନଙ୍କ ଏକାଗ୍ରତାକୁ ନଷ୍ଟ କରିଥାଏ ଏବଂ ଆତଙ୍କବାଦକୁ ପ୍ରୋତ୍ସାହିତ କରିଥାଏ ବୋଲି ଗୃହ ମନ୍ତ୍ରୀ ବର୍ଣ୍ଣନା କରିଥିଲେ। ଶ୍ରୀ ଶାହ କହିଥିଲେ ଯେ, 'ନକ୍ସଲ ମୁକ୍ତ ଭାରତ "ଲକ୍ଷ୍ୟ ହାସଲ କରିବା ପରେ ମୋଦୀ ସରକାର ଡିସେମ୍ବର ୩୧, ୨୦୨୯ ସୁଦ୍ଧା' ନିଶାମୁକ୍ତ ଭାରତ" ଗଠନ ପାଇଁ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଡିସେମ୍ବର ୩୧, ୨୦୨୮ ପୂର୍ବରୁ 'ନିଶାମୁକ୍ତ ଗୁଜରାଟ ’ ର ଦାୟିତ୍ୱ ନେବାକୁ ସେ ସମସ୍ତଙ୍କୁ ନିବେଦନ କରିଥିଲେ। ଶ୍ରେଣୀଗୃହରେ ପିଲାମାନଙ୍କର ଆଚରଣରେ ପରିବର୍ତ୍ତନ ଦେଖିଲା ବେଳେ ପରୀକ୍ଷା ଆୟୋଜନ କରିବା ଏବଂ ପିତାମାତାଙ୍କୁ ଭେଟିବା ପାଇଁ ଶ୍ରୀ ଶାହ ଶିକ୍ଷକମାନଙ୍କୁ ଅନୁରୋଧ କରିଥିଲେ। ସେ ପିତାମାତା ଏବଂ ନାଗରିକମାନଙ୍କୁ ସେମାନଙ୍କ ପଡ଼ୋଶୀ ଅଞ୍ଚଳରେ ନିଶାଦ୍ରବ୍ୟ ସମ୍ବନ୍ଧୀୟ କାର୍ଯ୍ୟକଳାପ ବିଷୟରେ କୌଣସି ସୂଚନା ପ୍ରଦାନ କରି ସେମାନଙ୍କ ଦାୟିତ୍ୱ ନିର୍ବାହ କରିବାକୁ ମଧ୍ୟ ନିବେଦନ କରିଥିଲେ। ସେ କହିଥିଲେ ଯେ ନିଶାସକ୍ତ ହୋଇପଡୁଥିବା ଯୁବକମାନଙ୍କ ପାଇଁ ନିଶାମୁକ୍ତି କେନ୍ଦ୍ରମାନ ପ୍ରତିଷ୍ଠା କରାଯାଉଛି। ନିଶାସକ୍ତର ଚିକିତ୍ସା ପାଇଁ କୌଣସି ଦ୍ୱିଧା କିମ୍ବା ଲଜ୍ଜା ରହିବା ଉଚିତ ନୁହେଁ ବୋଲି ସେ ଗୁରୁତ୍ୱାରୋପ କରିଥିଲେ। ଏଭଳି ଯୁବକମାନଙ୍କ ପରିଚୟ ମଧ୍ୟ ଗୋପନୀୟ ରଖାଯିବ ବୋଲି ସେ ଆଶ୍ୱାସନା ଦେଇଥିଲେ।
ଗୃହମନ୍ତ୍ରୀ ଗୁରୁତ୍ୱାରୋପ କରି କହିଥିଲେ ଯେ ଗୁଜରାଟ ଏବଂ ଭାରତକୁ ନିଶାମୁକ୍ତ କରିବାର ଲଢ଼େଇ କେବଳ ସରକାର ଦ୍ୱାରା ଲଢ଼ାଯାଇପାରିବ ନାହିଁ। ନାଗରିକ, ଶିକ୍ଷକ ଏବଂ ଅଭିଭାବକଙ୍କ ସହଯୋଗ ନିହାତି ଆବଶ୍ୟକ। ସେ କହିଛନ୍ତି ଯେ ଡିସେମ୍ବର ୧ ରୁ ଏକ କଣ୍ଟ୍ରୋଲ୍ ରୁମ୍ କାର୍ଯ୍ୟକ୍ଷମ ହେବ, ଯେଉଁଥିରେ ଡ୍ରଗ୍ସ ସମ୍ବନ୍ଧୀୟ କୌଣସି ସୂଚନା ପାଇବାର ତିନି ଘଣ୍ଟା ମଧ୍ୟରେ କାର୍ଯ୍ୟାନୁଷ୍ଠାନ ସୁନିଶ୍ଚିତ କରିବା ପାଇଁ ଏକ ବ୍ୟବସ୍ଥା ରହିବ। ଶ୍ରୀ ଶାହ କହିଥିଲେ ଯେ ଏଥିପାଇଁ ଏକ ବୈଜ୍ଞାନିକ ପଦ୍ଧତି ବିକଶିତ କରାଯାଇଛି। ନିଶାଦ୍ରବ୍ୟ କାରବାରରେ ସମ୍ପୃକ୍ତ କିଙ୍ଗ୍ ପିନ୍ ଏବଂ କାର୍ଯ୍ୟକର୍ତ୍ତାଙ୍କୁ ଜେଲ୍ ପଠାଇବା ପାଇଁ ମଧ୍ୟ ବ୍ୟବସ୍ଥା କରାଯାଇଛି। ପ୍ରଧାନମନ୍ତ୍ରୀ ଏବଂ ମୁଖ୍ୟମନ୍ତ୍ରୀଙ୍କ ତରଫରୁ ଗ୍ୟାରେଣ୍ଟି ଦେଇ ସେ କହିଥିଲେ ଯେ ନିଶାଦ୍ରବ୍ୟ କାରବାର ବିରୋଧରେ ଲଢ଼େଇରେ ସରକାର ଗୋଟିଏ ବି ପାଦ ପଛକୁ ନେବେ ନାହିଁ। ଏହି କାର୍ଯ୍ୟକ୍ରମ ସମୟରେ ସେ ଗୁଜରାଟର ଅଧିବାସୀମାନଙ୍କୁ ଗୁଜରାଟକୁ ନିଶାମୁକ୍ତ କରିବା ଦିଗରେ ସକ୍ରିୟ ଭାବେ ଯୋଗଦାନ କରିବା ଲାଗି ଶପଥ ମଧ୍ୟ କରାଇଥିଲେ।
ଏହି ଅବସରରେ ଶ୍ରୀ ଶାହ ମଧ୍ୟ ଦୀପାବଳି ଏବଂ ଆସନ୍ତାକାଲିଠାରୁ ଆରମ୍ଭ ହେଉଥିବା ଗୁଜରାଟୀ ନବବର୍ଷ (ବେସ୍ତୁ ବରସ୍) ଅବସରରେ ଗୁଜରାଟର ଜନସାଧାରଣଙ୍କୁ ଶୁଭେଚ୍ଛା ଜଣାଇଥିଲେ।
HS