স্বচ্ছতাক প্ৰতিষ্ঠানিক ৰূপ প্ৰদান আৰু বাকী থকা কামৰ বোজা হ্ৰাস কৰাৰ উদ্দেশ্যে ভূমি সম্পদ বিভাগে বিশেষ অভিযান ৬ সফলতাৰে সম্পন্ন কৰে।

গ্ৰামোন্নয়ন মন্ত্ৰালয়ৰ ভূমি সম্পদ বিভাগে প্ৰশাসনিক সংস্কাৰ আৰু জনঅভিযোগ বিভাগৰ (DARPG) নিৰ্দেশনাত ২০২৬ চনৰ ২ অক্টোবৰৰ পৰা ৩১ অক্টোবৰলৈকে অনুষ্ঠিত বিশেষ অভিযান ৬-ত অংশগ্ৰহণ সফলতাৰে সম্পন্ন কৰে। এই অভিযানৰ মূল লক্ষ্য আছিল স্বচ্ছতাক প্ৰতিষ্ঠানিক ৰূপ প্ৰদান কৰা, চৰকাৰী কাৰ্যালয়সমূহত বাকী থকা কামৰ বোজা হ্ৰাস কৰা, নথি-পত্ৰৰ ব্যৱস্থাপনা উন্নত কৰা আৰু কাৰ্যালয়ৰ স্থান তথা সম্পদসমূহৰ দক্ষতাপূৰ্ণ ব্যৱহাৰক উৎসাহিত কৰা।

দক্ষ আৰু নাগৰিককেন্দ্ৰিক শাসন ব্যৱস্থাৰ প্ৰতি নিজৰ দায়বদ্ধতা প্ৰদৰ্শন কৰি বিভাগটোৱে নিজৰ কাৰ্যালয় চৌহদৰ ভিতৰে-বাহিৰে ১০০ শতাংশ পৰিষ্কাৰ-পৰিচ্ছন্নতা অভিযান সম্পন্ন কৰাৰ লক্ষ্য পূৰণ কৰে। অভিযোগ নিষ্পত্তিৰ ক্ষেত্ৰতো উল্লেখযোগ্য অগ্ৰগতি লাভ কৰা হয়। অভিযানৰ সময়ছোৱাত জনসাধাৰণৰ পৰা লাভ কৰা অভিযোগ আৰু আপত্তি ১০০ শতাংশ নিষ্পত্তি কৰা হয়। ইয়াৰ উপৰি সংসদৰ সদস্যসকলৰ পৰা লাভ কৰা ২১টা প্ৰসংগও নিষ্পত্তি কৰা হয়।

নথি-পত্ৰৰ ব্যৱস্থাপনা আৰু ডিজিটাইজেচনৰ বাবে এক বিশেষ পদক্ষেপ গ্ৰহণ কৰা হয়। নথিভুক্তকৰণ, অপ্ৰয়োজনীয় নথি-পত্ৰ আঁতৰোৱা আৰু প্ৰয়োজন অনুসৰি বন্ধ কৰাৰ উদ্দেশ্যে মুঠ ১,৪৪৯টা ভৌতিক ফাইল আৰু ৫০১টা ই-ফাইল পৰ্যালোচনা কৰা হয়। ইয়াৰ ফলত নথি-পত্ৰৰ উন্নত ব্যৱস্থাপনা আৰু প্ৰশাসনিক প্ৰক্ৰিয়াসমূহ সুশৃংখলিত কৰাত সহায়ক হয়। এই অভিযানৰ জৰিয়তে কাৰ্যালয়ৰ স্থানৰ ফলপ্ৰসূ ব্যৱহাৰ আৰু অপ্ৰয়োজনীয় সামগ্ৰীসমূহ নিষ্কাশন কৰাৰ ক্ষেত্ৰতো অৰিহণা যোগোৱা হয়।

পৰিষ্কাৰ-পৰিচ্ছন্নতা আৰু প্ৰশাসনিক সংস্কাৰৰ উপৰি বিভাগটোৱে কৰ্মচাৰীসকলৰ স্বাস্থ্য, কল্যাণ আৰু দক্ষতা বিকাশৰ ওপৰতো বিশেষ গুৰুত্ব আৰোপ কৰে। বিভাগৰ শিৱাজী ষ্টেডিয়াম এনেক্স কাৰ্যালয় চৌহদত অৱস্থিত ৰিজুভ ৱেলনেছ চেণ্টাৰত যোগাভ্যাসৰ অধিৱেশন অনুষ্ঠিত কৰা হয়। কৰ্মচাৰীসকলৰ মাজত সৃজনশীলতা, সজাগতা আৰু সক্ৰিয় অংশগ্ৰহণৰ মনোভাৱ গঢ়ি তোলাৰ উদ্দেশ্যে স্বচ্ছতা সম্পৰ্কীয় বিষয়বস্তুৰ ওপৰত তৰ্ক আৰু চিত্ৰাংকন প্ৰতিযোগিতাৰো আয়োজন কৰা হয়। এই অভিযানৰ অংশ হিচাপে বিভাগটোত মানসিক স্বাস্থ্য সম্পৰ্কীয় এক বিশেষ সজাগতা অধিৱেশনো অনুষ্ঠিত কৰা হয়।

বিশেষ অভিযান ৬-ৰ সফল ৰূপায়ণে পৰিষ্কাৰ-পৰিচ্ছন্নতাৰ প্ৰসাৰ, প্ৰশাসনিক দক্ষতাৰ উন্নতি, দায়বদ্ধতা সুদৃঢ়কৰণ আৰু এক উৎপাদনশীল কৰ্ম পৰিৱেশ গঢ়ি তোলাৰ ক্ষেত্ৰত ভূমি সম্পদ বিভাগৰ নিৰন্তৰ দায়বদ্ধতাক প্ৰতিফলিত কৰে।

SS/HR/SD