پوسٹ کرنے کی تاریخ:
06 NOV 2026 5:20PM by PIB Delhi
وزارتِ دیہی ترقی کے محکمہ برائے اراضی وسائل نے محکمہ برائے انتظامی اصلاحات اور عوامی شکایات (ڈی اے آر پی جی) کی رہنمائی میں 2 اکتوبر سے 31 اکتوبر 2026 تک منعقدہ ‘خصوصی مہم 6’ میں اپنی شرکت کامیابی کے ساتھ مکمل کی۔ اس مہم کا بنیادی مقصد صفائی ستھرائی کو ادارہ جاتی شکل دینا، سرکاری دفاتر میں زیرِ التوا معاملات میں کمی لانا، ریکارڈ کے انتظام کو بہتر بنانا اور دفتری جگہوں و وسائل کے مؤثر استعمال کو فروغ دینا تھا۔
موثر اور عوام پر مرکوز حکمرانی کے عزم کا مظاہرہ کرتے ہوئے محکمہ نے اپنے دفاتر اور ان کے اطراف 100 فیصد صفائی مہمات چلانے کا ہدف حاصل کیا۔ شکایات کے ازالے کے شعبے میں بھی نمایاں پیش رفت ہوئی اور مہم کے دوران عوامی شکایات اور اپیلوں کے 100 فیصد معاملات نمٹائے گئے۔ اس کے علاوہ ارکانِ پارلیمنٹ کی جانب سے موصول ہونے والے 21 حوالہ جات کا بھی تصفیہ کیا گیا۔
ریکارڈ کے انتظام اور ڈیجیٹلائزیشن کے لئے خصوصی اقدامات کیے گئے۔ مجموعی طور پر 1,449 کاغذی فائلوں اور 501 الیکٹرک فائلوں کا جائزہ لیا گیا تاکہ حسبِ ضرورت انہیں ریکارڈ میں درج کرنے، غیر ضروری ریکارڈ سے خارج کرنے یا بند کرنے کی کارروائی مکمل کی جا سکے۔ ان اقدامات سے ریکارڈ کے بہتر انتظام اور انتظامی عمل کو مزید منظم بنانے میں مدد ملی۔ اس مہم کے ذریعے دفتری جگہوں کے مؤثر استعمال اور غیر ضروری سامان کو ٹھکانے لگانے میں بھی پیش رفت ہوئی۔
صفائی ستھرائی اور انتظامی اصلاحات کے علاوہ محکمہ نے اپنے ملازمین کی صحت، فلاح و بہبود اور صلاحیتوں میں اضافے پر بھی خصوصی توجہ دی۔ محکمہ کے شیواجی اسٹیڈیم اینیکسی دفتر میں واقع ریجوو ویلنیس سینٹر میں یوگا سیشن منعقد کیے گئے۔ ملازمین میں تخلیقی صلاحیتوں، بیداری اور فعال شرکت کو فروغ دینے کے لئے صفائی ستھرائی کے موضوعات پر مباحثے اور مصوری کے مقابلے بھی منعقد کیے گئے۔ اس مہم کے تحت محکمہ میں ذہنی صحت سے متعلق ایک خصوصی اجلاس کا بھی اہتمام کیا گیا۔
‘خصوصی مہم 6’ پر کامیابی سے عمل درآمد، صفائی ستھرائی کو فروغ دینے، انتظامی کارکردگی کو بہتر بنانے، جواب دہی کو مضبوط بنانے اور کام کے لیے ایک سازگار و نتیجہ خیز ماحول تشکیل دینے کے تئیں محکمہ برائے اراضی وسائل کے مسلسل عزم کی عکاسی کرتا ہے۔
***
ش ح۔ ک ا۔ ا ک م
U.NO. 7350