پوسٹ کرنے کی تاریخ:
05 NOV 2026 9:32PM by PIB Delhi
سماجی انصاف اور تفویض اختیارات کی وزارت کی جانب سے نئی دہلی کے دلی ہاٹ، آئی این اے میں منعقد کیے جا رہے شلپ سماگم میلہ 2026 میں آج شام وزارت کے مرکزی سکریٹری جناب سدھانش پنت نے اہم دورہ کیا۔
ان کے ہمراہ نیشنل شیڈیولڈ کاسٹس فنانس اینڈ ڈیولپمنٹ کارپوریشن (این ایس ایف ڈی سی) کے چیئرمین و منیجنگ ڈائریکٹر جناب پربھات تیاگی، کارپوریشن کے ڈپٹی جنرل منیجر (ڈی جی ایم)جناب رجنیِش بنکر اور وزارت کے دیگر افسران بھی موجود تھے۔
جناب سدھانش پنت نے میلے میں لگائے گئے اسٹالوں کا دورہ کیا اور ان کا معائنہ کیا۔ یہ اسٹال درج فہرست ذاتوں، دیگر پسماندہ طبقات، صفائی کرمچاریوں اور معذور افراد سے تعلق رکھنے والے دست کاروں اور استفادہ کنندگان کی کاروباری صلاحیتوں کو فروغ دینے کے لیے وزارت کے مسلسل عزم کی عکاسی کرتے ہیں۔ اس اقدام کا مقصد انہیں اپنی مصنوعات کی نمائش اور فروخت کے لیے ایک قابلِ رسائی پلیٹ فارم فراہم کرنا ہے۔
جناب پنت نے کہا کہ شلپ سماگم میلہ روایتی دست کاروں اور کاروباری افراد کو صارفین سے جوڑنے، منڈی تک رسائی کے روابط قائم کرنے اور روزگار کے مواقع کو مستحکم بنانے کے لیے ایک اہم پلیٹ فارم کے طور پر ابھرا ہے۔
انہوں نے کہا کہ اس میلے میں 130 سے زائد اسٹالوں کے ذریعے دست کاری کی متنوع مصنوعات، ہینڈلوم کی اشیاء، روایتی ملبوسات، تہواروں کی آرائشی اشیاء، چراغ، گھریلو سجاوٹ کی مصنوعات اور دیگر دیسی مصنوعات کی نمائش کی جا رہی ہے۔
جناب پنت نے کہا کہ وزارت 2022 سے شلپ سماگم میلوں کا انعقاد کر رہی ہے۔ ان میلوں کے ذریعے درج فہرست ذاتوں، دیگر پسماندہ طبقات اور صفائی کرمچاری برادریوں سے تعلق رکھنے والے ایک ہزار سے زائد دست کاروں کو اپنی مصنوعات کی نمائش اور فروخت کے مواقع سے فائدہ پہنچا ہے۔
سکریٹری نے بتایا کہ شلپ سماگم میلہ 2026 دلی ہاٹ، آئی این اے میں 15 نومبر 2026 تک جاری رہے گا۔ انہوں نے شہریوں، خاندانوں اور دیگر آنے والوں سے اپیل کی کہ وہ روایتی مصنوعات کی متنوع اقسام کا مشاہدہ کریں، میلے میں حصہ لینے والے دست کاروں کے ہنر اور کاریگری کو سراہیں اور انہیں کاروبار کے فروغ، معاشی خودمختاری اور خود کفالت کی جانب بڑھنے کی کوششوں میں تعاون فراہم کریں۔
این ایس ایف ڈی سی کے ایک سینئر عہدیدار نے کہا کہ میلے کے آغاز سے ہی اس میں حوصلہ افزا فروخت ریکارڈ کی گئی ہے، جو میلے میں آنے والوں کے پُرجوش ردعمل اور استفادہ کنندہ برادریوں کی تیار کردہ مصنوعات کے لیے بڑھتی ہوئی پذیرائی کی عکاسی کرتی ہے۔
عہدیدار نے بتایا کہ میلے میں شرکت کرنے والے چار کارپوریشنوں، یعنی این ایس ایف ڈی سی ، این بی سی ایف ڈی سی، این ایس کے ایف ڈی سی اور این ڈی ایف ڈی سی کے مجموعی فروخت کے اعداد و شمار کے مطابق، یکم نومبر سے 4 نومبر 2026 کے درمیان 29,86,110 روپے کی مجموعی فروخت درج کی گئی۔
انہوں نے مزید کہا کہ اس کے بعد تقریباً 5 لاکھ روپے کی اضافی فروخت کے ساتھ اب تک مجموعی فروخت تقریباً 34.86 لاکھ روپے تک پہنچ گئی ہے، جو میلے میں پیش کی جانے والی مصنوعات کو بازار میں ملنے والی مثبت پذیرائی کو ظاہر کرتی ہے۔
انہوں نے مزید کہا کہ ’پرکاش اور پرمپرا – جیوتی سے جیوتی جلائیں‘ کے موضوع پر منعقد کیا جانے والا یہ 15 روزہ میلہ سات منفرد موضوعاتی زونز کے ذریعے ہندوستان کے مالا مال ثقافتی ورثے اور روایتی دست کاری کو یکجا کرتا ہے۔
انہوں نے بتایا کہ ان میں کلا آنگن، پرکاش چوک، پوجا پتھ، سجاوٹ بازار، گھرانہ، سوا د چوک اور منچ شامل ہیں، جو زائرین کو ہندوستان کے فنون، ثقافت اور کھانوں کے تنوع کا ایک جامع تجربہ فراہم کرتے ہیں۔
عہدیدار نے کہا کہ یہ میلہ دست کاروں کو بھارت ٹولیپ جیسے اقدامات کے ذریعے اپنی مصنوعات کی منڈی تک رسائی بڑھانے کا موقع بھی فراہم کرتا ہے، جو دست کاروں کو ای کامرس پلیٹ فارمز سے جوڑتا ہے۔ اس کے علاوہ، پرپل فیسٹ معذور افراد کی تخلیقی صلاحیتوں اور استعداد کو اجاگر کرنے کے ساتھ ساتھ شمولیت اور مساوی مواقع کو فروغ دیتا ہے۔
انہوں نے کہا کہ میلے میں شرکت کرنے والے مستفیدین کو وزارت کے تحت کام کرنے والے اعلیٰ سطحی کارپوریشنوں کی معاونت حاصل ہے، جن میں نیشنل شیڈیولڈ کاسٹس فنانس اینڈ ڈیولپمنٹ کارپوریشن (این ایس ایف ڈی سی) ، نیشنل بیک ورڈ کلاسز فنانس اینڈ ڈیولپمنٹ کارپوریشن (این بی سی ایف ڈی سی) ، نیشنل صفائی کرمچاریز فنانس اینڈ ڈیولپمنٹ کارپوریشن(این ایس کے ایف ڈی سی) اور نیشنل دیویانگ جن فنانس اینڈ ڈیولپمنٹ کارپوریشن(این ڈی ایف ڈی سی) شامل ہیں۔ انہوں نے مزید کہا کہ وزارت ان کی شرکت کو آسان بنانے کے لیے مفت اسٹال، سفری اخراجات، یومیہ الاؤنس اور ان کی مصنوعات کی نقل و حمل کی سہولیات فراہم کرتی ہے۔
****
ش ح۔ع ح۔ف ر
Urdu No. 7319