ચીફ લેબર કમિશનર (સેન્ટ્રલ)એ શ્રમ સંહિતાઓના અમલીકરણને મજબૂત કરવા અને હિતધારકોની સાથે પરામર્શ વધારવા રેલવે બોર્ડ સાથે બેઠક કરી

શ્રમ અને રોજગાર મંત્રાલય, ભારત સરકારના ચીફ લેબર કમિશનર (સેન્ટ્રલ)ના કાર્યાલયે શ્રમ સંહિતાઓ, 2020 ના અસરોકારક અમલીકરણની ચર્ચા કરવા અને સમન્વય તથા હિતધારકોના પરામર્શને મજબૂત કરવા માટે શ્રમેવ જયતે ભવન, દ્વારકા, નવી દિલ્હી ખાતે ચીફ લેબર કમિશનર (સેન્ટ્રલ) શ્રીમતી સોનલ મિશ્રા, IAS ની અધ્યક્ષતામાં 3 નવેમ્બર 2026 ના રોજ રેલવે બોર્ડના વરિષ્ઠ અધિકારીઓ સાથે એક બેઠક યોજી હતી.

આ બેઠક શ્રમ સંહિતાઓના અસરકારક અમલીકરણને સુવિધાયુક્ત કરવા, પાલનને પ્રોત્સાહન આપવા અને સંસ્થાકીય સમન્વયને મજબૂત કરવા માટે ચીફ લેબર કમિશનર (સેન્ટ્રલ) [CLC(C)]ના કાર્યાલય દ્વારા વિવિધ મંત્રાલયો, વિભાગો અને કેન્દ્રીય જાહેર ક્ષેત્રના સાહસો સાથે હાથ ધરવામાં આવી રહેલી વન-ટુ-વન ચર્ચાઓની શ્રેણીના ભાગરૂપે આયોજિત કરવામાં આવી હતી.

રેલવે બોર્ડનું પ્રતિનિધિત્વ એક્ઝિક્યુટિવ ડિરેક્ટર (લેબર લોઝ) શ્રીમતી વિનિતા વર્મા અને તેમની ટીમે કર્યું હતું, જેમાં સેન્ટર ફોર રેલવે ઇન્ફોર્મેશન સિસ્ટમ્સ (CRIS)ના પ્રતિનિધિઓ વર્ચ્યુઅલી જોડાયા હતા. ચીફ લેબર કમિશનર (સેન્ટ્રલ)ના કાર્યાલયના તમામ વરિષ્ઠ અધિકારીઓએ આ બેઠકમાં હાજરી આપી હતી, જ્યારે શ્રમ અને રોજગાર મંત્રાલયના નેશનલ ઇન્ફોર્મેટિક્સ સેન્ટર (NIC)ના પ્રતિનિધિઓએ વર્ચ્યુઅલી ભાગ લીધો હતો.

બેઠક દરમિયાન, CLC(C)ના કાર્યાલયે શ્રમ સંહિતાઓની રૂપરેખા અને ભારતીય રેલવે માટે પ્રાસંગિક મુખ્ય જોગવાઈઓ, આવશ્યક શ્રમ પાલન આવશ્યકતાઓ, કોન્ટ્રાક્ટ લેબર સંબંધિત મુદ્દાઓ, નોંધણી અને લાયસન્સિંગ આવશ્યકતાઓ, અને નવી શ્રમ સંહિતાઓ સાથે સંરેખણમાં શ્રમિક કલ્યાણ પોર્ટલમાં અપગ્રેડેશનના સૂચનો સહિત ડિજિટલ પ્લેટફોર્મના ઉપયોગને આવરી લેતું એક પ્રેઝન્ટેશન રજૂ કર્યું હતું. પાલનને સુવિધાયુક્ત બનાવવામાં અને ઇઝ ઓફ ડુઇંગ બિઝનેસ સુનિશ્ચિત કરવામાં CLC(C) સંસ્થાની ભૂમિકા પર પણ પ્રકાશ પાડવામાં આવ્યો હતો.

રેલવે બોર્ડના એક્ઝિક્યુટિવ ડિરેક્ટર (LL) શ્રીમતી વિનિતા વર્માએ પણ તેના સંગઠનાત્મક માળખા, કાર્યબળ અને માનવબળની તૈનાતી, જેમાં કોન્ટ્રાક્ટ લેબરનું જોડાણ, રેલવે સ્થાપનાઓ અને પ્રોજેક્ટ્સનો ભૌગોલિક તથા ઓપરેશનલ ફેલાવો, હાલની શ્રમ-કાયદા પાલન પદ્ધતિઓ અને ભારતીય રેલવે દ્વારા અપનાવવામાં આવેલી સારી પદ્ધતિઓની રૂપરેખા રજૂ કરી હતી.

આ વાતચીતનો મુખ્ય ઉદ્દેશ્ય ભારતીય રેલવેની હાલની ડિજિટલ અનુપાલન (compliance) પ્રણાલીઓને સમજવાનો અને 'શ્રમ સુવિધા પોર્ટલ' તથા 'સમાધાન પોર્ટલ' સાથે તેના સુમેળની શક્યતાઓ તપાસવાનો હતો. આ બેઠક દરમિયાન રેલવેને લગતા વિશિષ્ટ મુદ્દાઓ અને વિવિધ અધિકારક્ષેત્રોમાં 'લેબર કોડ્સ' (શ્રમ સંહિતાઓ)ના અમલીકરણમાં આવતા વ્યવહારુ પડકારો પર ચર્ચા કરવાની તક પણ મળી હતી.

આ વાર્તાલાપનો ઉદ્દેશ્ય ચીફ લેબર કમિશનર (સેન્ટ્રલ)ના કાર્યાલય અને ભારતીય રેલવે વચ્ચેના સમન્વયને મજબૂત કરવાનો, ક્ષેત્ર-વિશિષ્ટ આવશ્યકતાઓની વધુ સારી સમજ સુનિશ્ચિત કરવાનો અને શ્રમ સંહિતાઓના અસરકારક અમલીકરણ તરફ બંને સંસ્થાઓના ગ્રાઉન્ડ લેવલના કાર્યકરો વચ્ચે સમન્વયિત અભિગમને સુવિધાયુક્ત કરવાનો છે.

CLC(C) નું કાર્યાલય જાગૃતિ વધારવા, પાલનને સુવિધાયુક્ત કરવા, ડિજિટલ સક્ષમતાને મજબૂત કરવા અને ચાર શ્રમ સંહિતાઓના સરળ અને અસરકારક અમલીકરણને સુનિશ્ચિત કરવા માટે સંબંધિત મંત્રાલયો, વિભાગો અને સંસ્થાઓ સાથે આવી માળખાકીય ચર્ચાઓ હાથ ધરી રહ્યું છે.

SM/IJ/JD