માય ભારતનું ‘વિકસિત ભારત યુવા સંવાદ: નો યોર વોટ’ અભિયાન 20 રાજ્યો/કેન્દ્રશાસિત પ્રદેશોના 60 કાર્યક્રમો દ્વારા 11,800થી વધુ યુવાનો સાથે જોડાયું

યુવા બાબતો અને રમતગમત મંત્રાલયના યુવા બાબતોના વિભાગ હેઠળ મેરા યુવા ભારત (માય ભારત) દ્વારા આજે 20 રાજ્યો અને કેન્દ્રશાસિત પ્રદેશોમાં આયોજિત ‘વિકસિત ભારત યુવા સંવાદ: નો યોર વોટ’ (Viksit Bharat Yuva Samvad: Know Your Vote) ના 60 સંસ્કરણોમાં 11,800 થી વધુ યુવાનોએ ભાગ લીધો હતો. કાર્યક્રમોના તાજેતરના રાઉન્ડ સાથે, 29 રાજ્યો અને કેન્દ્રશાસિત પ્રદેશોમાં કુલ 220 યુવા સંવાદો યોજવામાં આવ્યા છે, જેમાં 43,995 યુવાનો અને 220 યુથ આઇકોન્સ જોડાયા છે.

દેશવ્યાપી અભિયાન 26.10.2026 થી 05.11.2026 સુધી દેશભરની 500 યુનિવર્સિટીઓ, કોલેજો અને શૈક્ષણિક સંસ્થાઓને આવરી લેવાના ઉદ્દેશ્ય સાથે ચલાવવામાં આવી રહ્યું છે. તે યુવાનો, ખાસ કરીને પ્રથમ વખતના મતદાતાઓમાં આંકડાકીય અને ચૂંટણી વિષયક જાગૃતિ લાવવા અને લોકશાહી પ્રક્રિયામાં તેમની માહિતગાર ભાગીદારીને પ્રોત્સાહિત કરવાનો પ્રયાસ કરે છે. આ પહેલ તેમને મતદાનના અધિકારો, ચૂંટણી પ્રક્રિયાઓ અને નાગરિક ફરજોથી પરિચિત કરે છે અને સાથે જ ચૂંટાયેલા પ્રતિનિધિઓ, યુથ આઇકોન્સ અને અન્ય વિશિષ્ટ વ્યક્તિઓ સાથે વાર્તાલાપ કરવાની તકો પૂરી પાડે છે.

નવી દિલ્હીમાં, કેન્દ્રીય કોર્પોરેટ બાબતો અને સડક પરિવહન તથા ધોરીમાર્ગ રાજ્ય મંત્રી શ્રી હર્ષ મલ્હોત્રાએ કાર્યક્રમમાં હાજરી આપી હતી અને મતદાનના અધિકારો, ચૂંટણી ભાગીદારીનું મહત્વ અને લોકશાહીને મજબૂત કરવામાં જવાબદાર નાગરિકો તરીકે યુવાનોની ભૂમિકા અંગે પોતાના વિચારો વ્યક્ત કર્યા હતા.

પશ્ચિમ બંગાળમાં, રાણાઘાટ (SC) લોકસભા મતવિસ્તારના સંસદસભ્ય શ્રી જગન્નાથ સરકારે નાદિયા ખાતે આ કાર્યક્રમમાં હાજરી આપી હતી અને વિદ્યાર્થીઓ સાથે વાર્તાલાપ કર્યો હતો, જ્યારે આસામમાં સાંસદ શ્રી દેવાશીષ શર્માએ નગાંવ ખાતે યુવાનો સાથે જોડાણ કર્યું હતું.

બિહારમાં, પૂર્વી ચંપારણ (મોતીહારી) અને સિવાનના કાર્યક્રમોમાં સામૂહિક લોકતાંત્રિક શપથ લેવામાં આવ્યા હતા, જેમાં સહભાગીઓએ જવાબદાર નાગરિકત્વ અને લોકશાહીમાં સક્રિય ભાગીદારી પ્રત્યેની પોતાની પ્રતિબદ્ધતાનો પુનરોચ્ચાર કર્યો હતો. બિહારના ભૂતપૂર્વ નાયબ મુખ્યમંત્રી અને કટિહાર સદરના ધારાસભ્ય શ્રી તારકિશોર પ્રસાદે કટિહારમાં યુવા સંવાદ દરમિયાન યુવા સહભાગીઓ સાથે વાર્તાલાપ કર્યો હતો અને તેમને તેમના વોટનું મહત્વ સમજવા અને લોકશાહીને મજબૂત કરવા માટે સક્રિયપણે યોગદાન આપવા પ્રોત્સાહિત કર્યા હતા.

હરિયાણામાં, વુશુ ખેલાડી અને યુથ આઇકોન આર્યન સૂદે પાણીપતમાં યુવા સહભાગીઓ સાથે રાજકારણમાં યુવાનોની ભૂમિકા, મતદાન જાગૃતિ અને રમતગમતમાં કારકિર્દીની તકો અંગે ચર્ચા કરી હતી. પંજાબમાં, માનસા ખાતેના કાર્યક્રમમાં યુથ આઇકોન અને સહભાગીઓ વચ્ચે એક ઇન્ટરેક્ટિવ સત્ર યોજાયું હતું, સાથે જ સામૂહિક લોકતાંત્રિક શપથ લેવામાં આવ્યા હતા.

મધ્ય પ્રદેશમાં, બરવાની, બાલાઘાટ, ભીંડ, છિંદવાડા, ડીંડોરી, ગુના, પન્ના, રતલામ અને સાગર ખાતેના કાર્યક્રમોમાં યુથ આઇકોન્સ, રમતગમતની હસ્તીઓ અને જાહેર પ્રતિનિધિઓ સાથે વાર્તાલાપ અને લોકતાંત્રિક શપથ લેવામાં આવ્યા હતા. આ કાર્યક્રમોમાં યુવાનોને માય ભારતની તકો અને તેના ડિજિટલ પ્લેટફોર્મ વિશે પણ પરિચિત કરવામાં આવ્યા હતા.

ઉત્તર પ્રદેશમાં, અમેઠી (સુલતાનપુર) ખાતેના કાર્યક્રમમાં યુથ આઇકોન દ્વારા પ્રસ્તુતિ આપવામાં આવી હતી, ત્યારબાદ પ્રશ્નોત્તરીનું એક ઇન્ટરેક્ટિવ સત્ર આયોજિત થયું હતું. ઇન્ફ્લુએન્સર ઋષભ મિશ્રાએ સહભાગીઓને સંબોધિત કર્યા હતા અને કવિતાનું પઠન કર્યું હતું, જ્યારે ડૉ. ધનંજય સિંહ અને શ્રી વિષુવ મિશ્રાએ પ્રેરણાદાયી સંબોધન આપ્યા હતા અને યુવાનો સાથે વાર્તાલાપ કર્યો હતો.

આ કાર્યક્રમો દ્વારા, માય ભારત યુવાનોને જાહેર પ્રતિનિધિઓ અને યુથ આઇકોન્સ સાથે વાર્તાલાપ કરવાની, ચૂંટણી પ્રક્રિયાઓને સમજવાની અને લોકશાહી ભાગીદારી તથા નાગરિક ફરજો પર ચર્ચામાં સામેલ થવાની તકો પૂરી પાડવાનું ચાલુ રાખશે.

SM/IJ/JD