لوک سبھا اسپیکر نے اراکین اسمبلی سے اختلافِ رائے کو جمہوریت کی طاقت کے طور پر برقرار رکھنے کی اپیل کی

لوک سبھا کے اسپیکر جناب اوم برلا نے آج اس بات پر زور دیا کہ ایک صحت مند اور متحرک جمہوریت میں اتفاق اور اختلافِ رائے ایک ہی سکے کے دو رخ ہیں۔ انہوں نے کہا کہ اختلافِ رائے کا خیرمقدم کیا جانا چاہیے اور اسے ایک ایسی اہم محرک قوت کے طور پر تسلیم کیا جانا چاہیے جو نئے نقطۂ نظر سامنے لانے، انتظامی خامیوں کی نشاندہی کرنے اور بہتر حکمرانی کو فروغ دینے میں مددگار ثابت ہوتی ہے۔ انہوں نے اس بات پر زور دیا کہ سیاسی، جماعتی یا نظریاتی اختلافات سے قطع نظر، تمام عوامی نمائندوں کا اولین عزم ریاست اور ملک کی مسلسل ترقی کو یقینی بنانا ہونا چاہیے۔

جناب برلا نے یہ بات آج پنچکولہ میں ہریانہ قانون ساز اسمبلی کے زیر اہتمام سمودھان پکھواڑا پروگرام کے تحت منعقدہ ’جن پرتی ندھی سمیلن‘کے افتتاحی اجلاس سے خطاب کرتے ہوئے کہی۔ ہریانہ قانون ساز اسمبلی کے موجودہ اور سابق ارکان کے ساتھ ساتھ سابق وزراء سے خطاب کرتے ہوئے انہوں نے ہریانہ کے چھ دہائیوں پر محیط ترقیاتی سفر، سماجی و اقتصادی استقامت اور مختلف شعبوں میں اس کی قیادت کا ذکر کیا۔ انہوں نے ریاست کی نمایاں کامیابیوں کو بھارت کی آئینی اقدار اور جمہوری روایات کے تناظر میں پیش کیا۔

گزشتہ ساٹھ برسوں کے دوران ریاست کے ارتقائی سفر پر روشنی ڈالتے ہوئے جناب برلا نے کہا کہ ہریانہ متعدد تاریخی اور انتظامی چیلنجوں کے باوجود مسلسل قومی ترقی میں پیش پیش رہا ہے۔ بھگوت گیتا میں بیان کردہ عمل کے لازوال پیغام کا حوالہ دیتے ہوئے انہوں نے ان کسان برادری کی ستائش کی، جنہوں نے جدید زرعی ٹیکنالوجی کو اپنانے میں پہل کی، فصلوں کی پیداوار میں اضافہ کیا اور ملک کی غذائی سلامتی کو یقینی بنانے میں نمایاں کردار ادا کیا۔ انہوں نے مسلح افواج میں خدمات انجام دینے والے ہریانہ کے نوجوانوں کی بھی تعریف کی، جو ملک کی سرحدوں اور داخلی سلامتی کے تحفظ میں مثالی بہادری کا مظاہرہ کر رہے ہیں۔ اس کے علاوہ، انہوں نے ہریانہ کے کھلاڑیوں کو بھی خراجِ تحسین پیش کیا، جو عالمی کھیلوں کے میدان میں مسلسل بھارت کا وقار بلند کر رہے ہیں۔

بھارت کے آئینی سفر کی جامع اور مشاورت پر مبنی نوعیت کو اجاگر کرتے ہوئے جناب برلا نے کہا کہ مسودہ ساز کمیٹی کے چیئرمین بابا صاحب ڈاکٹر بی آر امبیڈکر کی رہنمائی اور ہریانہ و پنجاب سمیت مختلف خطوں کے ممتاز رہنماؤں کی شرکت سے دستور ساز اسمبلی نے بے پناہ لسانی، ثقافتی اور مذہبی تنوع کے باوجود ایک متحدہ پارلیمانی جمہوریت کی بنیاد رکھی۔ انہوں نے زور دے کر کہا کہ بھارت کے متنوع وفاقی نظام کا برقرار رہنا اور اس کا پھلنا پھولنا دنیا بھر میں اس کی جمہوریت کی مضبوطی اور استقامت کا ثبوت ہے۔ انہوں نے کہا، ’’ہمارا آئین محض حکومت چلانے کا ایک نظام نہیں ہے بلکہ یہ بھارت کی روح ہے، جو ہمارے قومی شعور اور کروڑوں لوگوں کی امنگوں کی عکاسی کرتا ہے۔‘‘

جناب برلا نے اس بات پر زور دیا کہ قانون ساز ادارے میں کسی کی مدتِ کار مکمل ہونے کے ساتھ عوامی خدمت کا عزم ختم نہیں ہو جاتا۔ انہوں نے قانون سازوں پر زور دیا کہ وہ حکمرانی اور انتظامیہ کو محض انتظامی طریقۂ کار کے بجائے بنیادی سطح پر عوام کو بااختیار بنانے کا اہم ذریعہ سمجھیں۔ انہوں نے کہا کہ سیاسی اور سماجی زندگی کی حقیقی کامیابی کا پیمانہ یہ ہے کہ معاشرے کے سب سے زیادہ کمزور طبقات، یعنی قطار میں کھڑے آخری شخص کی زندگی میں حقیقی سماجی و اقتصادی تبدیلی لائی جائے اور اس کی خوشیوں میں اضافہ کیا جائے۔

جناب برلا نے ہریانہ قانون ساز اسمبلی کی بھی ستائش کی کہ اس نے اپنے چھ دہائیوں پر محیط پارلیمانی سفر کے دوران معیاری مباحثوں، مدلل مکالموں اور قانون سازی کے وقار کو برقرار رکھتے ہوئے ایک مثالی معیار قائم کیا ہے۔ انہوں نے کہا کہ یہ اسمبلی ملک بھر کی قانون ساز اداروں کے لیے ایک تحریک کا ذریعہ رہی ہے اور اس نے ثابت کیا ہے کہ جمہوری ادارے اسی وقت مضبوط ہوتے ہیں جب وہ عوامی فلاح و بہبود اور ادارہ جاتی جواب دہی کے اصولوں سے مضبوطی کے ساتھ وابستہ رہتے ہیں۔

اس موقع پر ہریانہ کے وزیر اعلیٰ جناب نائب سنگھ سینی، ہریانہ قانون ساز اسمبلی کے اسپیکر جناب ہروِندر کلیان، ہریانہ قانون ساز اسمبلی میں قائد حزب اختلاف جناب بھوپیندر سنگھ ہڈا، ہریانہ کے وزیر برائے پارلیمانی امور جناب مہپال ڈھانڈا اور ہریانہ قانون ساز اسمبلی کے ڈپٹی اسپیکر ڈاکٹر کرشن لال مدھا بھی موجود تھے۔

***

ش ح۔ ک ا۔ ت ع

U.NO.7093